၆၅
တၢင်းဢၼ်ၸီႇယၢင်လႄႈတၢင်းၵႄႇၶျွတ်ႈ
၁ ၵဝ်လႆႈၶၢမ်ႇ တၢင်းဢၼ်ၶဝ်ၸိူဝ်းဢၼ် ဢမ်ႇတွင်ႈထၢမ်တီႈၵဝ်ၼၼ်ႉလႆႈလဝ်ႈလၢတ်ႈတီႈၵဝ်ယဝ်ႉ။ၵဝ်လႆႈၶၢမ်ႇတၢင်းဢၼ်ၶဝ်ၸိူဝ်းဢၼ်ဢမ်ႇႁႃၵဝ်ၼၼ်ႉ လႆႈထူပ်းႁၼ်ၵဝ်ယဝ်ႉ။ၵဝ်လႆႈလၢတ်ႈတီႈမဵဝ်းၵူၼ်းဢၼ်ဢမ်ႇၶၢမ်ႇတၢင်းဢၼ်ႁွင်ႉႁိၵ်ႈၵူပ်းလူၺ်ႈ ၼႃႇမႃႉၸိုဝ်သဵင်ၵဝ်ၼၼ်ႉလႄႈဝႃႈ တူၺ်းၵဝ်တႃႉ၊တူၺ်းၵဝ်တႃႉ၊ ဝႃႈၼင်ႇၼႆဢေႃႈ။
၂ ၵဝ်လႆႈၵီႈၽႃႇမိုဝ်းၵဝ်တေႃႇမဵဝ်းၵူၼ်းဢၼ်ၸၢင်ႊထဵင်ပႅတ်ႈလႄႈ ၸွမ်းသဵၼ်ႈတၢင်းဢၼ်ဢမ်ႇလီဢမ်ႇငၢမ်း မႅၼ်ႈၼင်ႇဢလူဝ်ႇၶဝ်ၼၼ်ႉ ယူႇတင်းဝၼ်းတင်းဝၼ်းယဝ်ႉ။
၃ မဵဝ်းၵူၼ်းၼၼ်ႉၸၢင်ႊႁဵတ်းႁႂ်ႈလႆႈတိုၵ်းယူင်း တၢင်းၸႂ်မႆႈၶႆႈၸႃႉၵဝ်သိုဝ်ႈၼႃႈတႂ်ႈတႃၵဝ်ယူႇတႃႇသေႇဢေႃႈ။ၸၢင်ႊပုၵ်ႉၸေႃႇၵႃႈၼႂ်းသူၼ်ဢူးယဵၼ်ႇတင်းလၢႆသေလႄႈဢဝ်လေႃႇပၢၼ်ႇ တုတ်ႇၽႆးၵႃႈၼိူဝ်မၢၵ်ႇဢုတ်ႇတင်းလၢႆဢေႃႈ။
၄ ၸၢင်ႊယူႇၵႃႈၼႂ်းပႃႇႁဵဝ်ႈတင်းလၢႆလႄႈ ၼွၼ်းၵႃႈၼႂ်းၶုမ်သၢင်းၶႅင်းတင်းလၢႆဢေႃႈ။ၸၢင်ႊၵိၼ်ၼိူဝ်ႉမူလႄႈၼမ်ႉတူမ်ႈၼိူဝ်ႉ ဢၼ်လီႁင်ႈဢဵတ်ႇသဵတ်ႇၼၼ်ႉမီးယူႇ ၵႃႈၼႂ်းမေႃႈၶဝ်တင်းလၢႆဢေႃႈ။
၅ ၸၢင်ႊလၢတ်ႈလႄႈဝႃႈ မႂ်းယူႇၶေႃၶေႃတႃႉ။ယႃႇပသေုတ်ႉမႃးၵႃႈတီႈၵဝ်။ၵဝ်ၼႆႉယိင်ႈၶႅၼ်းမူတ်းၸၢင်ႇ လိူဝ်တွၼ်းၼႃႇသေမႂ်းဢေႃႈ၊ဝႃႈၼင်ႇၼႆဢေႃႈ။ ၶဝ်ၸိူဝ်ႉၼင်ႇၼၼ်ၼၼ်ႉပဵၼ်ၸိူဝ်ႉၼင်ႇၵွၼ်းၽႆးတီႈၶူႈလင်ၵဝ် ဢိၵ်ႇတင်းၸိူဝ်ႉ ၼင်ႇၽႆးဢၼ်မႆႈယူႇတႃႇသေႇၼၼ်ႉဢေႃႈ။
၆ တူၺ်းလူ။ပဵၼ်ဢၼ်မၢတ်ႈမၢႆၸရၢင်းဝႆႉၵႃႈတီႈၽၢႆႇၼႃႈၵဝ်လႄႈ ၵဝ်ယင်းဢမ်ႇယူႇ တဵတ်ႇတဵတ်ႇယဵၼ်ယဵၼ်လႄႈ တၵ်းတွပ်ႇတႅၼ်းပၼ်ဢၵျူဝ်းဢပျႅတ်ႈဢေႃႈ။
၇ ၵဝ်တၵ်းဢဝ်တူႉၸရိူၵ်ႈဢပျႅတ်ႈသူဢိၵ်ႇတင်း တူႉၸရိူၵ်ႈဢပျႅတ်ႈပူႇမွၼ်ႇသူဢၼ်ဢဝ်လေႃႇပၢၼ်ႇ တုတ်ႇၽႆးၵႃႈၼိူဝ်လွႆတင်းလၢႆလႄႈ သေႉသွမ်းၵဝ်ၵႃႈၼိူဝ်ၵုင်းတင်းလၢႆၼၼ်ႉ တွပ်ႇတႅၼ်းပၼ်ၵႃႈၼႂ်းႁူဝ်ဢူၵ်းသူဢေႃႈ။ၵဝ်တၵ်းတုင်းဢဝ်ၵႂၢၵ်ႈဢဝ်ဢၵျူဝ်းဢပျႅတ်ႈတၢင်းၵမ်ၵျၢင်ႉဢၼ်ၵဝ်ယၢမ်ႈႁဵတ်းၸိူဝ်းၼၼ်ႉသႂ်ႇပၼ်ၵႃႈၼႂ်းႁူဝ်ဢူၵ်းၶဝ်ဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၈ ထႃႇဝရႃႉၽြႃးမီးဢမိင်ႉၸမ်း၊-ၸိူဝ်ႉၼင်ႇဢၼ်ထူပ်းႁၼ်ၼမ်ႉၸပိတ်ႉ ၵႃႈၼႂ်းပူၵ်ႉမၢၵ်ႇၸပိတ်ႉၼၼ်ႉလႄႈၵေႃႉၼိုင်ႈလၢတ်ႈလႄႈဝႃႈ ယႃႇပယေႃႉပႅတ်ႈသေၵမ်း။ၵႃႈၼႂ်းမၼ်းမီးမၢင်ႇၵလႃႇဢေႃႈ၊ဝႃႈၼင်ႇၼႆၼၼ်ႉၵဝ်တၵ်းႁဵတ်းပုၼ်ႈဢၵျူဝ်းၶႃႈၵဝ်တင်းလၢႆ ႁႂ်ႈဢမ်ႇယႃႉၶဝ်ပႅတ်ႈမူတ်းမူတ်းသဵင်ႈသဵင်ႈ မိူၼ်ၸိူဝ်ႉၼင်ႇၼၼ် ဢေႃႈ။
၉ ၵဝ်တၵ်းႁႂ်ႈၸိူဝ်းၽၢၼ်ပေႃႈဢွၵ်ႇၵႃႈၼႂ်းမဵဝ်းယႃႇၵုပ်ႉလႄႈ ႁႂ်ႈၵေႃႉဢၼ်ၶၢမ်ႇဢမူၺ်ႇလွႆႈၵဝ်တင်းလၢႆပေႃႇဢွၵ်ႇၵႃႈၼႂ်းမဵဝ်းယုတဢေႃႈ။ၶဝ်ၸိူဝ်းဢၼ်ၵဝ်လိူၵ်ႈၵဵပ်းဢဝ်ၼၼ်ႉ တၵ်းလႆႈၶၢမ်ႇဢဝ်ဢမူၺ်ႇမိူင်းၸဝ်ႈလႄႈ ၶႃႈၵဝ်တင်းလၢႆတၵ်းလႆႈယူႇၵႃႈတီႈ ၼၼ်ႉဢေႃႈ။
၁၀ တီႈသႃႇရုၼ်ႇၼၼ်ႉတၵ်းပဵၼ်ၶွၵ်ႈသူဝ်း၊တီႈၶူင်ႈႁူၺ်ႈဢႃႇၵေႃႇၵေႃႈ တၵ်းပဵၼ်တီႈဢၼ်ဝူဝ်းတင်းလၢႆၼွၼ်းပုၼ်ႈၵူၼ်းၵဝ် ဢၼ်ႁႃဢဝ်ၵဝ်ၸိူဝ်း ၼၼ်ႉဢေႃႈ။
၁၁ သူၸမ်းပဵၼ်ၵေႃႉဢၼ်ၸုၼ်ႉပႅတ်ႈထႃႇဝရႃႉၽြႃး၊ ၵေႃႉဢၼ်လူင်လိုမ်းပႅတ်ႈလွႆဢၼ်မူတ်းၸၢင်ႇၵဝ်၊ ၵေႃႉဢၼ်သိုဝ်ႉတီႈၵိၼ်ဝႆႉပုၼ်ႈၽြႃးလၢမ်ႈဝၢၼ်ႇ၊ ၵေႃႉဢၼ်မႄးႁႅၼ်းၶိူင်ႈပုၵ်ႉၸေႃႇဢၼ်သွၼ်း လေႃႇၼၼ်ႉပုၼ်ႈၽြႃးၵၢမ်ႇဢေႃႈ။
၁၂ ပိူဝ်ႈၼႆလႄႈၵဝ်တၵ်းၼပ်ႉဢၢၼ်ႇသူသေလႄႈ ဢၢပ်ႈပၼ်တီႈလၢပ်ႇတီႈလႅဝ်းလႄႈ သူၵႃႈမီးတင်းသဵင်ႈတင်းလူင် တၵ်းလႆႈဝၢင်းႁူဝ် ႁႂ်ႈလႆႈၶၢမ်ႇတၢင်းဢၼ်ဢဝ်တၢႆဢေႃႈ။လွင်ႈမၼ်ၸမ်း ယၢမ်းမိူဝ်ႈဢၼ် ၵဝ်ႁွင်ႉသူၼၼ်ႉသူဢမ်ႇဢိူဝ်ႈ။ယၢမ်းမိူဝ်ႈဢၼ်ၵဝ်လၢတ်ႈၼၼ်ႉသူဢမ်ႇထွမ်ႇဢမ်ႇငိၼ်း။သူၵမ်ၵျၢင်ႉတၢင်းၵမ်တၢင်ၵျၢင်ႉဢၼ်ဢမ်ႇလီ သိုဝ်ႈၼႃႈတႂ်ႈတႃၵဝ်လႄႈ လိူၵ်ႈၵဵပ်းဢဝ်လွင်ႈတၢင်းဢၼ်ၵဝ်ဢမ်ႇထုၵ်ႇၸႂ်ၵျိူၵ်ႈၸႂ်ၼၼ်ႉ ဢေႃႈ။
၁၃ ပိူဝ်ႈၼႆလႄႈၸဝ်ႈထႃႇဝရႃႉၽြႃးမီးဢမိင်ႉဝႆႉၸမ်း၊-တူၺ်းလူ။ၶႃႈၵဝ်တင်းလၢႆတၵ်းလႆႈၵိၼ်လႆႈၶူပ်းလႄႈ သူၸမ်းတၵ်းလႆႈတွင်ႉမႆႈသႆႈလိူတ်ႇယူႇဢေႃႈ။ၶႃႈၵဝ်တင်းလၢႆ တၵ်းလႆႈသူတ်ႉၼမ်ႉဢိုၼ်ၼမ်ႉလႄႈသူၸမ်းတၵ်းလႆႈယၢၵ်ႈၼမ်ႉၶေႃးႁွင်ႉယူႇဢေႃႈ။ၶႃႈၵဝ်တင်းလၢႆတၵ်းလႆႈၸူမ်းသိူဝ်းလႄႈ သူၸမ်းတၵ်းလႆႈ ဢူၵ်းဢၢႆဢေႃႈ။
၁၄ ၶႃႈၵဝ်တင်းလၢႆတၵ်းလႆႈပႃးတင်းၸႂ်ဢၼ်သႂၢင်ႇသိူဝ်းသေလႄႈႁဵတ်းၵႂၢမ်းလႄႈ၊ သူၸမ်းတၵ်းလႆႈပႃးတင်း ၸႂ်ဢၼ်ငိၼ်းၽၢၼ်တိူဝ်ႉၸႂ်သေလႄႈႁွင်ႉႁႆႈဢေႃႈ။ သူတၵ်းလႆႈပႃးတင်းႁူဝ်ၸႂ်ဢၼ်တႅၵ်ႇလႅဝ်သေလႄႈ ၶၢင်းၶီၶၢင်းၽၢၼ်ပွင်ႉမိူၼ်ႇယူႇ ဢေႃႈ။
၁၅ သူတၵ်းႁႂ်ႈၸိုဝ်ႈသဵင်သူၵိုတ်းၵျၢၼ်ႇဝႆႉပုၼ်ႈၵူၼ်းဢၼ်ၵဝ်လိူၵ်ႈၵဵပ်းဢဝ် တၵ်းၵိၼ်ႇလႃႇၼၼ်ႉဢေႃႈ။ၸဝ်ႈထႃႇဝရႃႉၽြႃးၼၼ်ႉတၵ်းၶႃႈၽၼ်းသူပႅတ်ႈလႄႈ တၵ်းႁွင်ႉႁိၵ်ႈၸိုဝ်ႈၶႃႈမၼ်းၸဝ်ႈတင်းလၢႆ ၼႃႇ မႃႉၸိုဝ်သဵင်တၢင်ႇၸိူဝ်ႉတၢင်ႇဢၼ်ဢေႃႈ။
၁၆ ၵေႃႉဢၼ်တူဝ်ၸဝ်ႈၵဝ်ႇပၼ်တၢင်း လီတီႈတူဝ်ၸဝ်ႈၵဝ်ႇၵႃႈၼိူဝ်လိၼ်မိူင်းၼႆႉၼၼ်ႉ တၵ်းဢိင်ပိုင်ႈၽြႃးပဵၼ်ၸဝ်ႈဢၼ်ပႂ်ႉသႅတ်ႉၸႃႇၼၼ်ႉလႄႈ ပၼ်တၢင်းလီဢိၵ်ႇတင်းၵေႃႉဢၼ်လႆႈၵိၼ်ႇဝႃႈၵႃႈၼိူဝ်လိၼ်မိူင်းၼႆႉၼၼ်ႉ တၵ်းဢဝ်ၽြႃးပဵၼ်ၸဝ်ႈ ဢၼ်ပႂ်ႉသႅတ်ႉၸႃႇၼၼ်ႉၵိၼ်ႇဝႃႈဢေႃႈ။လွင်ႈမၼ်းၸမ်း၊လွင်ႈတၢင်းဢွၼ်တၢင်းၸိူဝ်းၼၼ်ႉ လႆႈၶၢမ်ႇတၢင်းဢၼ်လူင်လိုမ်းပႅတ်ႈလႄႈ မီးတၢင်းဢၼ်လပ်ႉႁၢႆၵႂႃႇလႄႈ ၵႃႈတီႈတႃၵဝ်ဢေႃႈ။
ၵၢင်ႁၢဝ်ဢၼ်မႂ်ႇလိၼ်မိူင်းဢၼ်မႂ်ႇ
၁၇ တူၺ်းလူ။ ၵဝ်တၵ်းၽၢၼ်ႇသၢင်းႁဵတ်းပဵၼ်ၾႃႉၵၢင်ႁၢဝ်ဢၼ်မႂ်ႇဢိၵ်ႇတင်း လိၼ်မိူင်းဢၼ်မႂ်ႇလႄႈလွင်ႈတၢင်းဢၼ်မီးဢွၼ်တၢင်းၸိူဝ်းၼၼ်ႉ တၵ်းဢမ်ႇလႆႈ ၶၢမ်ႇတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်း၊ ႁူဝ်ၸႂ်တၵ်းဢမ်ႇလႆႈမၢတ်ႈဝႆႉတွင်းဝႆႉ။
၁၈ သူဢွၼ်ၵၼ်ပျေႃႇလႄႈသႂၢင်ႇသိူဝ်းယူႇၵႃႈၼႂ်း လွင်ႈတၢင်းဢၼ်ၵဝ်တၵ်းၽၢၼ်ႇသၢင်းႁဵတ်းပဵၼ်ၼၼ်ႉယူႇတႃႇသေႇတႃႉ။ၵဝ်ၽၢၼ်ႇသၢင်းႁဵတ်းပဵၼ်ဝဵင်းယေႇရုသလႅမ်ႇ ႁႂ်ႈပဵၼ်တီႈဢၼ်လီသႂၢင်ႇလီသိူဝ်း ဢိၵ်ႇတင်းၵူၼ်းမၼ်းတင်းလၢႆႁႂ်ႈ ပဵၼ်တီႈဢၼ်လီၸူမ်းပျေႃႇဢေႃႈ။
၁၉ ၵဝ်တၵ်းသႂၢင်ႇသိူဝ်းယူႇၵႃႈၼႂ်းဝဵင်းယေႇရုသလႅမ်ႇလႄႈ ၸူမ်းပျေႃႇယူႇၵႃႈၼႂ်းၵူၼ်းၵဝ်တင်းလၢႆဢေႃႈ။ၵမ်းလိုၼ်းဢမ်ႇလႆႈငိၼ်းသဵင်ဢၼ်ႁႆႈဢၼ်ႁွင်ႉဢိၵ်ႇတင်းသဵင်ဢၼ်ႁွင်ႉသႅၼ်ႇၵႃႈၼႂ်းဝဵင်းၼၼ်ႉ။
၂၀ ၵႃႈတီႈဝဵင်းၼၼ်ႉဢမ်ႇလႆႈမီးလုၵ်ႈဢွၼ်ႇ ဢၼ်မိူဝ်ႉဝၼ်းဢသၢၵ်ႈမၼ်းၵေႇၼၼ်ႉ။ၵူၼ်းထဝ်ႈဢၼ်မိူဝ်ႉဝၼ်းဢသၢၵ်ႈမၼ်းဢမ်ႇတဵမ်ထူၼ်ႈၼၼ်ႉၵေႃႈဢမ်ႇလႆႈမီး။လုၵ်ႈဢွၼ်ႇၼၼ်ႉဢသၢၵ်ႈမၼ်း ထူၼ်ႈပဵၼ်ပၢၵ်ႇပီႊသေယဝ်ႉၸင်ႇတၵ်းလႆႈတၢႆဢေႃႈ။ ၵေႃႉဢၼ်မီးဢပျႅတ်ႈလႄႈဢသၢၵ်ႈမၼ်းထူၼ်ႈပဵၼ်ပၢၵ်ႇပီႊၼၼ်ႉ တၵ်းလႆႈပဵၼ်ၵေႃႉဢၼ် ၶၢမ်ႇတၢင်းဢၼ်ၵိၼ်ႇဢၼ်ဝႃႈဢေႃႈ။
၂၁ ၶဝ်ၼၼ်ႉတၵ်းဢွၼ်ၵၼ်တႄႇႁဵတ်းႁိူၼ်းသေလႄႈ ယူႇသဝ်းဢေႃႈ။ၶဝ်တၵ်းဢွၼ်ၵၼ်ၽုၵ်ႇသူၼ်ဢူးယဵၼ်ႇ မၢၵ်ႇၸပိတ်ႉ သေလႄႈၵိၼ်မၢၵ်ႇမၼ်းဢေႃႈ။
၂၂ ၶဝ်တၵ်းတႄႇႁဵတ်းႁိူၼ်းလႄႈပိူၼ်ႈတၢင်ႇၵေႃႉတၵ်းလႆႈယူႇဢမ်ႇၸႂ်ႈ။ၶဝ်တၵ်းၽုၵ်ႇသူၼ်ဢူးယဵၼ်ႇမၢၵ်ႇၸပိတ်ႉလႄႈ ပိူၼ်ႈတၢင်ႇၵေႃႉတၵ်းလႆႈၵိၼ်ဢမ်ႇၸႂ်ႈ။ဢသၢၵ်ႈၵူၼ်းၵဝ်တင်းလၢႆ ပဵၼ်ၸိူဝ်ႉၼင်ႇဢသၢၵ်ႈတူၼ်ႈမႆႉလႄႈ ၶဝ်ၸိူဝ်းဢၼ်ၵဝ်လိူၵ်ႈၵဵပ်း ဢဝ်ၼၼ်ႉတၵ်းလႆႈသုင်းသွင်ႇလွင်ႈတၢင်းဢၼ် မိုဝ်းၶဝ်လုမ်းလႃးႁဵတ်းၼၼ်ႉဢေႃး။
၂၃ ၶဝ်ၼၼ်ႉ တၵ်းဢမ်ႇလႆႈႁဵတ်းလႆႈသၢင်ႈလၢႆလၢႆလွၵ်ႇလွၵ်ႇဢမ်ႇပွင်ႇလွင်ႈၵႃႈသင်ၼၼ်ႉ။ၶဝ်တၵ်းဢမ်ႇလႆႈၵိူတ်ႇလဵင်ႉလုၵ်ႈလဵင်ႉလၢင်း ပုၼ်ႈတၢင်းဢၼ်တၵ်းမႆႈၸႂ်ယၢပ်ႇၸႂ်ၼၼ်ႉ။ၶဝ်ဢိၵ်ႇလူၺ်ႈၵၼ်တင်းၸိူဝ်ႉၶိူဝ်းၶဝ် တၵ်းပဵၼ်ၵေႃႉဢၼ်လႆႈၶၢမ်ႇတၢင်းလီမၢင်ႇၵလႃႇ ဢၼ်ထႃႇဝရႃႉၽြႃးပၼ်ၼၼ်ႉဢေႃႈ။
၂၄ ၵဝ်ၼႆႉတၵ်းဢိူဝ်ႈၶဝ် ၸဵမ်မိူဝ်ႈဢၼ်ၶဝ်ဢမ်ႇပႆႇႁွင်ႉၼၼ်ႉဢေႃႈ။ၵဝ်တၵ်းထွမ်ႇဢဝ်ၶဝ် ၼႂ်းမိူဝ်ႈဢၼ်ၶဝ်ယင်းတိုၵ်ႉလဝ်ႈ လၢတ်ႈယူႇၼၼ်ႉဢေႃႈ။
၂၅ မႃထိူၼ်ႇဢိၵ်ႇတင်းသူဝ်းဢွၼ်ႇတၵ်းဢွၼ်ၵၼ်ၵိၼ်ယူႇလူၺ်ႈၵၼ်လႄႈ သၢင်ႇသီႈတၵ်းၵိၼ်ယိူဝ်ႈမိူၼ်ၸိူဝ်ႉၼင်ႇဝူဝ်းဢေႃႈ။ မုၼ်ႈလိၼ်တင်းလၢႆတပ်းပဵၼ်တၢင်းၵိၼ်ငူးဢေႃႈ။ၶဝ်တၵ်းဢမ်ႇႁဵတ်းတၢင်းဢၼ် ၼိၵ်ႈၸၢၵ်ႈငႅၼ်းသေး၊တၢင်းဢၼ်ယႃႉပႅတ်ႈၵႃႈၼိူဝ်လွႆ ဢၼ်မူတ်းၸၢင်ႇၵဝ်တင်းသဵင်ႈတင်းမူတ်းၼၼ်ႉ၊ဝႃႈၼင်ႇၼႆ ထႃႇဝရႃႉၽြႃးမီးဢမိင်ႉဢေႃႈ။