၁၃
ပျႃႇတိၵ်ႈမိူင်းပႃႇပုလုၼ်ႇ
၁ ပျႃႇတိၵ်ႈဢၼ်ဝႃႈလူၺ်ႈလွင်ႈဝဵင်းပႃႇပုလုၼ်ႇ ဢၼ်ဢိသႃႇယ လုၵ်ႈၸၢႆးဢမ်ႇမုတ်ႉလႆႈၶၢမ်ႇၼၼ်ႉၸမ်း၊-
၂ ဢွၼ်ၵၼ်ပူၵ်းလၢမ်ႇၵႃႈၼိူဝ်လွႆ ဢၼ်ပၢင်ႇလီလိူမ်ႈလီၼၼ်ႉတႃႉ။ဢွၼ်ၵၼ်ႁဵတ်းသဵင်ဢၼ်ယႂ်ႇၵႂၢင်ႈလႄႈႁွင်ႉသႅၼ်ႇတီႈၶဝ်တႃႉ။ဢွၼ်ၵၼ်သၼ်ႇၶွၼ်းမိုဝ်းၼႄႁႂ်ႈ ၶဝ်ၶဝ်ႈၵႃႈၼႂ်းၽၵ်းတူတီႈယူႇၶုၼ်တင်းလၢႆတႃႉ။
၃ ၵဝ်သင်ႇလၢတ်ႈ တီႈၶဝ်ၸိူဝ်းဢၼ် ၵဝ်ႁႂ်ႈမူတ်းၸၢင်ႇၼၼ်ႉဝႆႉယဝ်ႉ။ ၵဝ်ႁွင်ႉဢဝ်ၵူၼ်းႁတ်းၵူၼ်းႁၢၼ်ႈၵဝ်ဢၼ်ပဵၼ်ၶဝ်ၸိူဝ်းဢၼ် သႂၢင်ႇသိူဝ်းလူၺ်ႈမူၼ်ႈၽုင်းဢႃႇၼူႉၽေႃႇၵဝ်ၼၼ်ႉဝႆႉ ႁႂ်ႈပဵၼ်တၢင်းၸႂ်မႆႈၶႆႈၸႃႉၵဝ် လႆႈပျေႇယဝ်ႉ။
၄ မီးသဵင်ၵူၼ်းၼမ်ၼႃႇၵႃႈၼိူဝ်လွႆတင်းလၢႆၸိူဝ်ႉၼင်ႇသဵင်ၵူၼ်း ဢၼ်ပဵၼ်မုၵ်ႉပဵၼ်ၸိူဝ်းယႂ်ႇၼႃႇ၊ သဵင်ႈဢၼ်ႁူၼ်ႈႁၢၼ်ဢူၼ်ဢဵၼ်မေႃးမေးၵူၼ်းဝၢၼ်ႈၵူၼ်းမိူင်းၼမ်ၼႃႇ ၸူႉၵၼ်တုမ်ၵၼ်ၼၼ်ႉလႄႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉ ၸီႇယၢင်ႇႁၢင်ႈပွင်ႁဵတ်းမုၵ်ႉႁဵတ်းၸိူဝ်း ႁႂ်ႈလႆႈတိုၵ်းသိုၵ်းဢေႃႈ။
၅ ထႃႇဝရႃႉၽြႃး ဢိၵ်ႇတင်းလၢၵ်ႈၼၢၵ်ႈတေႃးသႃႉတင်းၸႂ်မႆႈၶႆႈၸႃႉမၼ်းၸဝ်ႈၼၼ်ႉလုၵ်ႉသေၵႃႈတီႈမိူင်းဢၼ်ၵႆတီႈႁိမ်းၸဵင်ႇႁိမ်းလႅၼ်ၵၢင်ႁၢဝ်ၼၼ်ႉ မႃးႁႂ်ႈ လႆႈယႃႉပႅတ်ႈတင်းမိူင်းဢေႃႈ။
၆ ၵွပ်ႈပိူဝ်ႈဢၼ်မိူဝ်ႉဝၼ်းထႃႇဝရႃႉၽြႃးၸမ်ယဝ်ႉလႄႈ ဢွၼ်ၵၼ်ႁႆႈႁွင်ႉပွင်ႉၶၢင်းတႃႉ။တၵ်းႁွတ်ႈမႃးမိူၼ်ၸိူဝ်ႉၼင်ႇၽေးဢၼ်ႇတရေႇဢၼ်ၸဝ်ႈဢၼတ်ႈတႃႉတၼ်းၶူဝ်း ၸီႇယၢင်ႇၼၼ်ႉ ဢေႃႈ။
၇ ပိူဝ်ႈၼႆလႄႈမိုဝ်းၵႃႈမီးၼၼ်ႉတၵ်းဢူၼ်ႈတၢၵ်ႇလႄႈ ႁူဝ်ၸႂ်ႈၵူၼ်းတင်းလၢႆတၵ်းလူႉလႄႈ ၶဝ်တၵ်းဢွၼ်ၵၼ်ႁွတ်ႈထိုင် တၢင်းဢၼ်ၵူဝ်ဢၼ်ႁႄဢေႃႈ။
၈ ဝူၺ်ႇတၼႃႇ တၢင်းဢၼ်ၸဵပ်းဢၼ်ၶိုၼ်ႈၵူႈၸိူဝ်ႉၵူႈပိူင်တၵ်းတီႉၵမ်ဢဝ်ၶဝ်လႄႈ ၶဝ်တၵ်းလႆႈၶၢမ်ႇဝူၺ်ႇတၼႃႇမိူၼ်ၸိူဝ်ႉၼင်ႇ မေႈယိင်းဢၼ်ၵိူတ်ႇလဵင်ႉလုၵ်ႈယူႇၼၼ်ႉဢေႃႈ။ၵေႃႉၼိုင်ႈလႄႈၵေႃႉၼိုင်ႈတၵ်းလူတူၺ်းၵၼ်လႄႈငိူဝ်ႈငဝ်ယူႇသေလႄႈ ၼႃႈၶဝ်တၵ်းမီး ႁၢင်ႊၽၢင်ပိဝ်ၽႆးဢေႃႈ။
၉ တူၺ်းလူ။မိူဝ်ႉဝၼ်းထႃႇဝရႃႉၽြႃးဢၼ်ၵျၢမ်းထၢမ်းၼႃႇလႄႈ တဵမ်ဝႆႉတင်းတေႃးသႃႉတၢင်းၸႂ်မႆႈၶႆႈၸႃႉၼၼ်ႉ တၵ်းႁွတ်ႈမႃးႁႂ်ႈလႆႈယႃႉမိူင်းၸဝ်ႈပႅတ်ႈလႄႈ ပႄႇၽဵဝ်ႈၵူၼ်းဝၢၼ်ႈၵူၼ်းမိူင်းဢၼ်ဢပျႅတ်ႈၼႃႇၸိူဝ်းၼၼ်ႉ ပႅတ်ႈသေၵႃႈၼႂ်းမၼ်း ဢေႃႈ။
၁၀ လၢဝ်ၼၢၵ်ႈၶၢတ်ႈၵႃႈၼိူဝ်ၵၢင်ႁၢဝ်ၸိူဝ်းၼၼ်ႉတၵ်းဢမ်ႇပၼ်ဢၼ်လႅင်းၵၢင်ဝၼ်းတၵ်းလမ်ၵႂႃႇတင်းသဵင်ႈတင်းမူတ်း ၼႂ်းမိူဝ်ႈဢၼ်မၼ်းဢွၵ်ႇမႃးၼၼ်ႉလႄႈ လိူၼ်ၵေႃႈယင်းဢမ်ႇႁိူဝ်ႈဢမ်ႇလႅင်းလႄႈဢေႃႈ။
၁၁ ၵဝ်တၵ်းၸႅတ်ႈတူၺ်းဢပျႅတ်ႈလိၼ်မိူင်းဢိၵ်ႇတင်းတူႉၸရိူၵ်ႈ ၶဝ်ၸိူဝ်းဢၼ်ဢမ်ႇတြႃးၼၼ်ႉလႄႈႁႂ်ႈတၢင်းဢၼ်ပူၵ်းပႅၼ် ၵေႃႉဢၼ်မႃႇၼႃႉယႂ်ႇၼၼ်ႉထၢတ်ႇသုတ်းလႄႈၶျႃးတၢင်းဢၼ်ၸွၵ်ႇၵႃးၵေႃႉ ဢၼ်ႁၢဝ်ႈၵျၢမ်းၼၼ်ႉတူၵ်းတီႈတႅမ်ႇဢေႃႈ။
၁၂ ၵဝ်တၵ်းႁဵတ်းႁႂ်ႈၵူၼ်းထိူၵ်ႈၵႃႈထိူၵ်ႈၶၼ်ၼႃႇသေ ၶမ်းလွတ်ႈငၢၼ်ႇလႄႈ ႁႂ်ႈၵူၼ်းသတ်ႉတဝႃႇထိူၵ်ႈၵႃႈထိူၵ်ႈၶၼ် ၼႃႇသေသႅင်ၶမ်းဢေႃႇၽိရဢေႃႈ။
၁၃ ပိူဝ်ႈၼႆလႄႈၵဝ်တၵ်းသၼ်ႇၶွၼ်းၾႃႉၵၢင်ႁၢဝ်လႄႈ ႁႂ်ႈလိၼ်မိူင်းၶၢႆႉသေတီႈယူႇမၼ်း ၼႂ်းလွင်ႈဢၼ်တေႃးသႃႉတၢင်းၸႂ်မႆႈၸႂ်လိူတ်ႇၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ဢွၵ်ႇၼႂ်းမိူဝ်ႉဝၼ်းတၢင်းၸႂ််မႆႈၶႆႈၸႃႉမၼ်းၸဝ်ႈ ႁႅင်းယႂ်ႇၼႃႇ ၼၼ်ႉဢေႃႈ။
၁၄ ၶဝ်တၵ်းလႆႈပဵၼ်ၸိူဝ်ႉၼင်ႇၵႂၢင်မေႈဢိၵ်ႇတင်းၸိူဝ်ႉၼင်ႇသူဝ်းတင်းလၢႆ ဢၼ်ဢမ်ႇမီးၵေႃႉဢၼ်ပႂ်ႉထိင်းၼၼ်ႉလႄႈ တၵ်းဢွၼ်ၵၼ်ဝၢႆႇၼႃႈတေႃႇၵူၼ်းမဵဝ်းတူဝ်ၸဝ်ႈၵဝ်ႇႁင်းၽႂ်ႁင်းမၼ်းသေလႄႈ ပႆၵႂႃႇၸူး ၵႃႈတီႈမိူင်းတူဝ်ၸဝ်ႈၵဝ်ႇႁင်းၽႂ်ႁင်းမၼ်းဢေႃႈ။
၁၅ ၶဝ်ၸိူဝ်းဢၼ် လႆႈၶၢမ်ႇတၢင်းဢၼ် ထူပ်းမႅၼ်ႈၵႃႈမီးၼၼ်ႉတၵ်းလႆႈၶၢမ်ႇတၢင်းဢၼ် ဢဝ်ႁွၵ်ႇတႅင်းလႄႈၶဝ်ႈၸိူဝ်းဢၼ် ဝၢင်းၵွမ်းၼွမ်းၸူးၼၼ်ႉၵေႃႈတၵ်းလႆႈသုမ်းလူၺ်ႈလၢပ်ႇလႅဝ်းဢေႃႈ။
၁၆ လုၵ်ႈဢွၼ်ႇလၢင်းဢွၼ်ႇၶဝ်ႈၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်ၽတ်ႉဢဝ်သွင်ႉၵႃႈတီႈသိုဝ်ႈၼႃႈတႂ်ႈတႃၶဝ်လႄႈ ႁိူၼ်းၶဝ်ယေးၶဝ် တၵ်းလႆႈၶၢမ်ႇတၢင်းဢၼ်ႁိမ်ႁူင်ႇဢဝ်လႄႈမေးၶဝ်တင်းလၢႆတၵ်းလႆႈၶၢမ်ႇတၢင်းဢၼ် ႁဵတ်းဢႃႉ ထမ်ႇမႃႉဢေႃႈ။
၁၇ တူၺ်းလူ။ၵဝ်တၵ်းတိုၵ်းယူင်းၵူၼ်းမေႇတိဢၼ်ဢမ်ႇမၢတ်ႈငိုၼ်းပဵၼ်ၵႃႈသင် ဢၼ်ဢမ်ႇမီးဢလူဝ်ႇၶႂ်ႈလႆႈၶမ်းၸိူဝ်းၼၼ်ႉ ႁႂ်ႈလုၵ်ႉယူႇၽၢႆႇၼိုင်ႈ တင်းၶဝ်ဢေႃႈ။
၁၈ ၵၢင်ႇၶဝ်ၼၼ်ႉတၵ်းပေႃႉၽတ်ႉၵူၼ်းၼုမ်ႇၵူၼ်းၵမ်တင်းလၢႆ ၶၢတ်ႇပဵၼ်ပွတ်းပဵၼ်တွၼ်ႈၵႂႃႇလႄႈၶဝ်ဢမ်ႇဢိတ်းလူမၢတ်ႈတွင်း တူဝ်ၶၼ်ႇထႃႇတင်းလၢႆလႄႈမၢၵ်ႇတႃၶဝ်ဢမ်ႇသေႈလၢႆ လုၵ်ႈဢွၼ်ႇလၢင်းဢွၼ်ႇတင်းလၢႆ။
၁၉ ဝဵင်းပႃႇပုလုၼ်ႇ ဢၼ်ပဵၼ်ၸိၵ်းပဵၼ်ၸွမ်သိုင်ႇၸိုင်ႈဝၢၼ်ႈမိူင်း၊ဢၼ်ပဵၼ်မူၼ်ႈၽုင်းသရေႇၵူၼ်း မဵဝ်းၶႃႇလတေႇ ၸိူဝ်းၼၼ်ႉ တၵ်းလႆႈပဵၼ်ၸိူ်ဝ်ႉၼင်ႇ ဝဵင်းသေႃးတုမ်ႇ တင်းဝဵင်းၵေႃးမေႃးရ ဢၼ်ၽြႃးပဵၼ်ၸဝ်ႈယႃႉပႅတ်ႈၼၼ်ႉဢေႃႈ။
၂၀ ၵႃႈတီႈၼၼ်ႉၽူႈ လႂ်တၵ်းဢမ်ႇလႆႈယူႇလႃးလႃးလႄႈၽူႈ လႂ်တၵ်းဢမ်ႇလႆႈတူၵ်းတီႈတူၵ်းလႅၼ်လႄႈ ယူႇၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ်။ၵႃႈတီႈၼၼ်ႉၵူၼ်းဢႃႇရေႇပျႃႇတၵ်းဢမ်ႇလႆႈၵင်ႈသုမ်ႉထဵင်။ၵူၼ်းလဵင်ႉသူဝ်းထိင်းသူဝ်းတင်းလၢႆတၵ်းဢမ်ႇလႆႈႁဵတ်းၶွၵ်ႈသူဝ်းလႃးလႃး။
၂၁ တူဝ်ထိူၼ်ႇႁၢႆႉတင်းလၢႆ တၵ်းဢွၼ်ၵၼ်ၼွၼ်းၵႃႈတီႈၼၼ်ႉလႄႈႁိူၼ်းၶဝ်ၼၼ်ႉတၵ်းတဵမ်ဝႆႉတင်းတရိၵ်ႈသၢၼ်ႇဢၼ်ႁွင်ႉဢၼ်ၶင်းဢေႃႈ။ၼူၵ်ႈၵလႃႇဢုၵ်ႉတင်းလၢႆတၵ်းတူၵ်းတီႈတူၵ်းလႅၼ်ယူႇလႄႈ ထိူၼ်ႇ တင်းလၢႆတၵ်းဢွၼ်ၵၼ်ၵႃႈဝႅၼ်ဢေႃႈ။
၂၂ မႃႇထိူၼ်ႇတင်း လၢႆတၵ်းဢွၼ်ၵၼ် ႁဝ်ႇႁွၼ်ၵႃႈၼႂ်းႁေႃၶမ်းၶဝ်လႄႈ မႃလိၼ်တင်းလၢႆတၵ်းဢွၼ်ၵၼ်ႁဝ်ႇႁွၼ်ၵႃႈၼႂ်းၽုင်ႇပိၵ်ႉမၢၼ်ႇၸိူဝ်းၼၼ်ႉဢေႃႈ။ၶိင်ႇၵႃႇလႃႉမၼ်းၸမ်ၼႃႇယဝ်ႉ။ ၸူဝ်ႈတႃႇဢသၢၵ်ႈမၼ်းဢမ်ႇလႆႈယိုၼ်းလႆႈယၢဝ်း။