၁၁
ၵိင်ႇၶႃႊၵူၼ်းမဵဝ်းယေႇသေႇ
၁ ၵႃႈတီႈတေႃမဵဝ်းယေႇသေႇ ၼၼ်ႉတၵ်းတႅၵ်ႇၵိင်ႇတႅၵ်ႇယွတ်ႈလႄႈ ႁုၼ်ႈၵႃႈတီႈႁၢၵ်ႈမၼ်းၸိူဝ်းၼၼ်ႉ တၵ်း မၢၵ်ႇမၢၵ်ႇဢေႃႈ။
၂ ဝိၺိၺ်ႇၽြႃးဢၼ်ဝႃႈဝိၺိၺ်ႇဢၼ်ပၼ်ၺၢၼ်ႇပိင်ႇၺႃႇ၊ဝိၺိၺ်ႇဢၼ်ပၼ်တၢင်းၵတ်ႉတၢင်းၶၼ်ဢၼ်ၵျၢမ်ႇပွင်ပဵၼ်လႆႈ၊ ဝိၺိၺ်ႇဢၼ်ပၼ်သၽေႃးဢၼ်ႁူႉၸၵ်းလႄႈၵူဝ်ႁႄထႃႇဝရႃႉၽြႃးၼၼ်ႉ တၵ်းၵိင်းဝပ်ႈယူႇၵႃႈၼိူဝ်မၼ်းၼၼ်ႉဢေႃႈ။
၃ မၼ်းၼၼ်ႉ တၵ်းမူၼ်ႈပျေႃႇယူႇၼႂ်းတၢင်းဢၼ်ၵူဝ်ႁႄထႃႇဝရႃႉၽြႃးလႄႈယင်းဢမ်ႇၸီႇယၢင်ႇတြႃးၸွမ်းၵႃႈၼင်ႇဢၼ်မၢၵ်ႇတႃမၼ်းႁၼ်၊ ယင်းဢမ်ႇတႅပ်းတတ်း ၸွမ်းၵႃႈၼင်ႇဢၼ်ႁူမၼ်းငိၼ်းၼၼ်ႉလႄႈ တၵ်းၸီႇယၢင်ႇဢမူႉၶဝ်ၸိူဝ်းဢၼ်ယၢၵ်ႈၽၢၼ်ၸွမ်းၼင်ႇတြႃးၸဝ်ႈလႄႈ ယူႇၽၢႆႇၵူၼ်းလိၼ်မိူင်းဢၼ်ၶျႃးတႅမ်ႇတင်းလၢႆၼၼ်ႉသေလႄႈ တႅပ်းတတ်း သိုဝ်ႈသိုဝ်ႈတေႃႇတေႃႇဢေႃႈ။
၄ မၼ်းတၵ်းဢဝ်ၵၼ်းႁွၵ်ႇသူပ်းမၼ်း ပေႃႉယႅၼ်ႉလိၼ်မိူင်းလႄႈ ဢဝ်လူမ်းဢၼ်ဢွၵ်ႇသီႇသူပ်းမၼ်းၼၼ်ႉလႄႈ ဢဝ်ၵေႃႉဢၼ်ႁၢႆႉ ဢၼ်မိူၵ်ႈၼၼ်ႉတၢႆဢေႃႈ။
၅ တြႃးတၢင်းသိုဝ်ႈတေႃႇတၵ်းပဵၼ်ဢၼ်ႁတ်ႉဢၼ်ၶဵၼ်းဢႅဝ်မၼ်းလႄႈ သႅတ်ႉၸႃႇၵေႃႈ တၵ်းပဵၼ်ဢၼ်ႁတ်ႉဢၼ်ၶဵၼ်းႁူဝ်ဢူၵ်း မၼ်းဢေႃႈ။
၆ မႃထိူၼ်တၵ်းယူႇလူၺ်ႈၵၼ်တင်းသူဝ်းဢွၼ်ႇလႄႈ သိူဝ်ၸုမ်ႈတၵ်းၼွၼ်းလူၺ်ႈၵၼ်တင်းပႄႉဢွၼ်ႇဢေႃႈ။ ဝူဝ်းဢွၼ်ႇ၊သၢင်ႇသီႈဢွၼ်ႇ၊တူဝ်ဢွၼ် ဢၼ်လဵင်ႉႁႂ်ႈပီးမၼ်းၸိူဝ်းၼၼ်ႉတၵ်းၵႂႃႇမႃးလူၺ်ႈၵၼ်လႄႈ လုၵ်ႈဢွၼ်ႇတၵ်းဢဝ်ၶဝ်သူင်ႇဢေႃႈ။
၇ ဝူဝ်းမေႈဢိၵ်ႇတင်း မီမေႈတၵ်းၵိၼ်တီႈလဵဝ်တၢၼ်းလဵဝ်ၵၼ်လႄႈ လုၵ်ႈဢွၼ်ႇၶဝ်တၵ်းၼွၼ်းႁူမ်ႈလူၺ်ႈၵၼ်ဢေႃႈ။ သၢင်ႇသီႈၵေႃႈတၵ်းၵိၼ်ယိူဝ်ႈယႃႈၸိူဝ်ႉ ၼင်ႇဝူဝ်းဢေႃႈ။
၈ လုၵ်ႈဢွၼ်ႇဢၼ်ၵိၼ်ၼူမ်းတၵ်းလဵၼ်ႈလေႃးယူႇၵႃႈၼိူဝ်ႁူးငူးႁၢႆႉလႄႈ လုၵ်ႈဢွၼ်ႇဢၼ်ၽၢတ်ႇၼူမ်းၵေႃႈ တၵ်းဢဝ်မိုဝ်းမၼ်းသေႇၸူၵ်း ၵႃႈၼႂ်းႁူးငူးဢေႃႈ။
၉ ၶဝ်ဢမ်ႇလႆႈႁဵတ်းတၢင်းဢၼ်ၼင်ႇၵၼ်ၵၼ်ၼိၵ်ႈၸၢၵ်ႈငႅၼ်းသေးၵၼ် တၢင်းဢၼ်ယႃႉၽဵဝ်ႈပႅတ်ႈ ၵၼ်ၵႃႈၼိူဝ်လွႆဢၼ်မူတ်းၸၢင်ႇၵဝ်တင်းသဵင်ႈတင်းမူတ်းၼၼ်ႉ။ လွင်ႈမၼ်းၸမ်းလိၼ်မိူင်းၼႆႉတၵ်းတဵမ်ဝႆႉတင်းတၢင်း ဢၼ်ႁူႉၸၵ်းထႃႇဝရႃႉၽြႃးမိူၼ်ၸိူဝ်ႉၼင်ႇဢၼ်ၼမ်ႉပၢင်ႇလၢႆႇ ထူမ်ႈႁူမ်ႇတီႈယူႇမၼ်းယူႇၼၼ်ႉဢေႃႈ။
၁၀ ၼႂ်းမိူဝ်ႉဝၼ်းၶိင်ႇၵႃႇလႃႉၼၼ်ႉ ႁၢၵ်ႈယေႇသေႇတၵ်းဢွၵ်ႇလႄႈ ပဵၼ်လမ်းဢၼ်ပုၵ်းဝႆႉမဵဝ်းၵူၼ်းတင်းလၢႆလႄႈၵူၼ်းၵူႈၸိူဝ်ႉၵူႈမဵဝ်း တၵ်းဢွၼ်ၵၼ်သုတ်ႉၸပ်းသုတ်ႉၸူးတီႈမၼ်းဢေႃႈ။တီႈဢၼ်မၼ်းၵိင်းဝပ်ႈယူႇၼၼ်ႉၵေႃႈမူၼ်ႈၽုင်းတၵ်းယႂ်ႇၼႃႇဢေႃႈ။
၁၁ ၼႂ်းမိူဝ်ႉဝၼ်းၶိင်ႇၵႃႇလႃႉၼၼ်ႉထႃႇဝရႃႉၽြႃး တၵ်းယဵတ်ႇမိုဝ်းမၼ်းၸဝ်ႈလႄႈႁဵတ်းႁႂ်ႈလႆႈၼုၵ်ႈဢဝ်ၵူၼ်းမၼ်းၸဝ်ႈဢၼ်ၵိုတ်းဢၼ်ၵျၢၼ်ႇတင်းလၢႆ ဢွၵ်ႇသေၵႃႈၼႂ်းမိူင်းဢႃႇသုရိမိူင်းဢေႇၵႅပ်ႉတု၊ မိူင်းပႃႇသရု၊ မိူင်းၵုသ၊မိူင်းဢေႇလမ်ႇ၊မိူင်းသိၼႃႇ၊ မိူင်းႁႃႇမတ်ႉ၊ ၵူၼ်း ၵႃႈၼႂ်းပၢင်ႇလၢႆႇၸိူဝ်းၼၼ်ႉမႃးထႅင်ႈဢေႃႈ။
၁၂ မၼ်းၸဝ်ႈတၵ်းပူၵ်းလၢမ်ႇဝႆႉ ပုၼ်ႈၵူၼ်းၵူႈၸိူဝ်ႉၵူႈမဵဝ်းလႄႈႁွင်ႉဢဝ်ၵူၼ်းမဵဝ်းဢိသရေႇလ ဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈ ဢိၵ်ႇတင်းၵူၼ်းမဵဝ်းယုတဢၼ်ၽၢတ်ႇၽႄၵၼ်ယူႇ ၵူႈတီႈၵူႈလႅၼ်ၸိူဝ်းၼၼ်ႉလုၵ်ႉသေၵႃႈတီႈသီႇၼႃႈသီႇၽၢႆႇလိၼ်မိူင်းမႃးသေလႄႈ ႁႂ်ႈ ၸူႉၵၼ်တုမ်ၵၼ်ဢေႃႈ။
၁၃ တၢင်းဢၼ်မဵဝ်းဢေႇၽရိမ်ႇသီႇၵေႉၼၼ်ႉတၵ်းထၢတ်ႇယဵၼ်လႄႈ ၶဝ်ၸိူဝ်းဢၼ်ႁဵတ်းတၢင်းၽိတ်းသႂ်ႇတီႈမဵဝ်းယုတၼၼ်ႉ တၵ်းၶၢမ်ႇတၢင်းဢၼ်ပႄႇၽဵဝ်ႈပႅတ်ႈဢေႃႈ။ မဵဝ်းဢေႇၽရိမ်ႇဢမ်ႇလႆႈသီႇၵေႉမဵဝ်းယုတ။ မဵဝ်းယုႉတၵေႃႈဢမ်ႇလႆႈ ႁဵတ်းတၢင်းၽိတ်းသႂ်ႇတီႈမဵဝ်းဢေႇၽရိမ်ႇ။
၁၄ ၶဝ်ၼၼ်ႉတၵ်းဢွၼ်ၵၼ်မိၼ်ၵႂႃႇသႂ်ႇ ၵႃႈတီႈႁူဝ်မႃႇၵူၼ်းၽိလိတ်ႉတိ တင်းလၢႆၵႃႈတီႈၽၢႆႇတၢင်းဝၼ်းတူၵ်းပုၼ်ႉလႄႈ တၵ်းၽွမ်ႉၵၼ်ႁိမ်ႁူင်ႇဢဝ်ႇၶွင်ၶူဝ်းၵူၼ်းမိူင်းဝၼ်းဢွၵ်ႇၸိူဝ်းၼၼ်ႉဢေႃႈ။ၶဝ်တၵ်းဢွၼ်ၵၼ်ယဵတ်ႇမိုဝ်းၶဝ်သႂ်ႇတီႈမဵဝ်းဢေႇတုမ်ႇ တင်းမဵဝ်းမေႃႇၽလႄႈ ၵူၼ်းမဵဝ်းဢမ်ႇမုၼ်ႇ တင်းလၢႆတၵ်းလႆႈၶၢမ်ႇ တၢင်းဢၼ်ၵဝ်ဢုပ်ႉပိူင်ႇဢေႃႈ။
၁၅ ထႃႇဝရႃႉၽြႃးတၵ်းယႃႉၸဵင်ႇလႅမ် ဢၼ်ပဵၼ်လိၼ်ပၢင်ႇလၢႆႇဢေႇၵႅပ်ႉတုၼၼ်ႉႁၢႆပႅတ်ႈလႄႈ ဢဝ်လူမ်းၸဝ်ႈဢၼ်ႁႅင်းယႂ်ႇၼႃႇၼၼ်ႉသၼ်ႇၶွၼ်းမိုဝ်းမၼ်းၸဝ်ႈ ၵႃႈၼိူဝ်ၼမ်ႉႁွင်ႊလူင်လႄႈၽတ်ႉယႅၼ်ႉႁႂ်ႈပဵၼ်ႁွင်ႈၸဵတ်းႁွင်ႈသေယဝ်ႉ ၵူၼ်းတင်းလၢႆတၵ်းလႆႈတိုဝ်းသွၵ်းတိၼ်သေလႄႈ ၶၢမ်ႈၵႂႃႇဢေႃႈ။
၁၆ တၵ်းမီးသဵၼ်ႈတၢင်းလူင်ပုၼ်ႈၵူၼ်းမၼ်းၸဝ်ႈဢၼ်ၵိုတ်းဢၼ်ၵျၢၼ်ႇယူႇၵႃႈတီႈမိူင်းဢႃႇသုရိ ၸိူဝ်းၼၼ်ႉမိူၼ်ၸိူဝ်ႉၼင်ႇဢၼ်မီးပုၼ်ႈ မဵဝ်းဢိသရေႇလၼႂ်းမိူဝ်ႉဝၼ်းဢၼ် ၶဝ်ဢွၵ်ႇသေၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။