၃၇
ပျႃႇတိၵ်ႉဝႆႉလွင်ႈဝဵင်းယေႇရုသလႅမ်ႇ တၵ်းလႆႈလွတ်ႈ
၁ ၶုၼ်လူင်ႁေႇၸၵိငိၼ်းၵႂၢမ်းၼၼ်ႉသေယဝ်ႉ ၸၵ်ႉသိၵ်ႇၶူဝ်းၼုင်ႈမၼ်းသေလႄႈ ဢဝ်ၶူဝ်းၼုင်ႈၼင်ပေႃၼုင်ႈမႆႊလႄႈ ၶဝ်ႈၵႂႃႇၵႃႈၼႂ်းပိၵ်ႉမၢၼ်ႇၸဝ်ႈထႃႇဝရႃႉၽြႃး ဢေႃႈ။
၂ မၼ်းပွႆႇၸႂ်ႉဢေႇလျႃႇၵိမ်ႇၵေႃႉဢၼ်ဢုပ်ႉၵႃႈၼိူဝ်ႁေႃၶမ်းဢိၵ်ႇတင်း ၸရေးလူင်သေႇပၼ၊ယိတ်ႉပရေႃးႁိၵ်ႈဢၼ်ဢသၢၵ်ႈယႂ်ႇတင်းလၢႆ ဢၼ်ၼုင်ႈမႆႊၶူဝ်းၼုင်ႈၼင်ပေႃၸိူဝ်းၼၼ်ႉ ၵႂႃႇၵႃႈတီႈပရေႃးၽႅတ်ႈ ဢိသႃႇယလုၵ်ႈၸၢႆးဢႃႇမုတ်ႉၼၼ်ႉဢေႃႈ။
၃ ၶဝ်ၼၼ်ႉလၢတ်ႈတီႈမၼ်းလႄႈဝႃႈ၊-ၶုၼ်လူင်ႁေႇၸၵိ သင်ႇလၢတ်ႈမႃးလႄႈဝႃႈၸမ်း၊-ဝၼ်ႈမိူဝ်ႈၼႆႉပဵၼ်ဝၼ်းတုၵ်ႉၶႃႉ၊ဝၼ်းဢၼ်လႆႈၶၢမ်ႇ တၢင်းဢၼ်သင်ႇသွၼ်သုင်းမႃႉ၊ဝၼ်းဢၼ်လႆႈၶၢမ်ႇ တၢင်းဢၼ်သေႉဢၼ်သွမ်းဢေႃႈ။ႁွတ်ႈထိုင်ၶိင်ႇဢၼ်ၵိူတ်ႇလဵင်ႉလုၵ်ႈလႄႈဢမ်ႇ မီးႁႅင်းဢၼ်ႁႂ်ႈပေႃးၵိူတ်ႇလဵင်ႉလုၵ်ႈလႆႈ။
၄ ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈမႂ်း ငိၼ်းၵႂၢမ်းရႃႇပသႃႇၶဢၼ်ၸဝ်ႈမၼ်းၶုၼ်ႁေႃၶမ်းဢႃႇသုရိ ပွႆႇၸႂ်ႉမႃးႁႂ်ႈလႆႈသေႉသွမ်းၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇၼၼ်ႉသေလႄႈ ၵႄႈလိတ်ႈၵႂၢမ်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈမႂ်းငိၼ်းၼၼ်ႉသေၵမ်းလူၺ်ႈ။ မႂ်းၵေႃႈသူးတွင်းႁဵတ်းပထၼႃႇ ပုၼ်ႈၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇဝႆႉၼၼ်ႉသေၵမ်း၊ဝႃႈၼင်ႇၼႆဢေႃႈ။
၅ ၼင်ႇၼၼ်လႄႈၶႃႈၶုၼ်လူင်ႁေႇၸၵိၸိူဝ်းၼၼ်ႉႁွတ်ႈထိုင်ၵႃႈတီႈဢိသႃႇယသေယဝ်ႉ၊ဢိသႃႇယ ၶိုၼ်း လၢတ်ႈတီႈၶဝ်လႄႈဝႃႈ၊-
၆ ဢွၼ်ၵၼ်ၶိုၼ်းလဝ်ႈလၢတ်ႈတီႈၸဝ်ႈသူလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ယႃႇပေၵူဝ်ပေႁႄၵွပ်ႈပိူဝ်ႈဢၼ်မႂ်းလႆႈငိၼ်းလႄႈ ၶႃႈၶုၼ်ႁေႃၶမ်းဢႃႇသုရိသေႉသွမ်းၶဝ်ၼၼ်ႉ။
၇ ၵဝ်တၵ်းဢဝ် ၸႂ်သၽေႃးတၢင်ႇၸိူဝ်ႉတၢင်ႇဢၼ်သႂၢင်းသႂ်ႇပၼ် ၵႃႈၼႂ်းမၼ်းၼၼ်ႉလႄႈ မၼ်းတၵ်းငိၼ်းသတၢင်းသဵင်ၶၢဝ်ႇသေလႄႈၶိုၼ်းမိူဝ်းၵႂႃႇ ၵႃႈတီႈမိူင်းတူဝ်ၸဝ်ႈၵဝ်ႇဢေႃႈ။ၵဝ်တၵ်းႁႂ်ႈပၼ်သုမ်းလူၺ်ႈလၢပ်ႇလူၺ်ႈလႅဝ်း ၵႃႈၼႂ်းမိူင်းတီႈယူႇၶဝ်ၼၼ်ႉဢေႃႈ၊ ဝႃႈၼင်ႇၼႆတႃႉဝႃႈၼင်ႇၼႆဢေႃႈ။
၈ မိူဝ်ႈၼၼ်ႉ ရႃႇပသႃႇၶၼၼ်ႉငိၼ်းလွင်ႈဢၼ် ၶုၼ်ႁေႃၶမ်းဢႃႇသုရိဢွၵ်ႇသေၵႃႈတီႈဝဵင်းလႃႇၶိသၵႂႃႇၼၼ်ႉသေယဝ်ႉ ၶိုၼ်းမိူဝ်းၵႂႃႇလႄႈ ႁူပ်ႉထူပ်းၶုၼ်ႁေႃၶမ်းၼၼ်ႉတိုၵ်းတေႃး ဝဵင်းလိပၼယူႇဢေႃႈ။
၉ လိုၼ်းၼၼ်ႉၶုၼ်ႁေႃၶမ်းၼၼ်ႉငိၼ်းပိူၼ်ႈလဝ်ႈလၢတ်ႈလွင်ႈ တိရိၵ်ႉၵၶုၼ်လူင်ၵုသၼၼ်ႉလႄႈဝႃႈ မၼ်းၼၼ်ႉ ၶီႇသိုၵ်းမႃးႁႂ်ႈလႆႈတိုၵ်းတေႃးၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆၼၼ်ႉလႄႈမိူဝ်ႈဢၼ်မၼ်းငိၼ်းလွင်ႈၼၼ်ႉယဝ်ႉၼၼ်ႉၸိုင် မၼ်းသမ်ႉပွႆႇၸႂ်ႉသၢၼ်ႇတမၢၼ်ႇတင်းလၢႆ မႃးၸူးၵႃႈတီႈၶုၼ်ႁေႇၸၵိလႄႈသင်ႇလၢတ်ႈဝႃႈ၊-
၁၀ ၵႂၢမ်းဢၼ်သူ တၵ်းလႆႈလၢတ်ႈတီႈႁေႇၸၵိၶုၼ်လူင်ယုတၼၼ်ႉၸမ်း၊- ယႃႇပေႁႂ်ႈၽြႃးဢၼ်မႂ်းဢိင်ပိုင်ႈၼၼ်ႉပႅတ်ႉလႅၼ်မႂ်းလႄႈဝႃႈ၊-ဝဵင်းယေႇရုသလႅမ်ႇဢမ်ႇလႆႈႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းဢႃႇသုရိၵူၺ်း၊ ဝႃႈၼင်ႇ ၼႆၼၼ်ႉသေၵမ်း။
၁၁ တူၺ်းလူ။မႂ်းလႆႈငိၼ်းလွင်ႈဢၼ်ၶုၼ်ႁေႃၶမ်းဢႃႇသုရိ တင်းလၢႆ ႁဵတ်းတီႈမိူင်းတင်းသဵင်ႈတင်းလူင်လႄႈ ယႃႉပႅတ်ႈမူတ်းမူတ်းသဵင်ႈသဵင်ႈ ယဝ်ႉဢေႃႈ။
၁၂ တူဝ်မႂ်းတၵ်းလွတ်ႈႁိုဝ်။ၽြႃးၵူၼ်းၵူႈၸိူဝ်ႉၵူႈမဵဝ်းယၢမ်ႈၵႄႇသႄႇၼုၵ်ႈဢဝ် ၶဝ်ၸိူဝ်းဢၼ်ပူႇမွၼ်ႇၶဝ်ယႃႉပႅတ်ႈဢၼ်ဝႃႈၵူၼ်းမဵဝ်းၵေႃႇၸၼ်ႇ၊ ၵူၼ်းမဵဝ်းၶႃႇရရၼ်ႇ၊ၵူၼ်းမဵဝ်းရေႇတပ်ႉ၊ ၵူၼ်းမဵဝ်းဢေႇတိၼ်ႇဢၼ်မီးၵႃႈတီႈဝဵင်းတေႇလၸႃႇ ၸိူဝ်းၼၼ်ႉယဝ်ႉႁိုဝ်။
၁၃ ၶုၼ်လူင်ဝဵင်းႁႃႇမတ်ႉ၊ၶုၼ်လူင်ဝဵင်းဢႃႇပတ်ႉ၊ ၶုၼ်လူင်ဢၼ်ဢုပ်ႉပိူင်ႇဝဵင်းသေႇရဝိမ်ႇ၊ၶုၼ်လူင်ဝဵင်းႁေႇၼ ၶုၼ်လူင်ဝဵင်းဢိဝႃ ၸိူဝ်းၼၼ်ႉမီးၵႃႈ လႂ်ဝႃႈၼင်ႇၼႆဢေႃႈ။
တၢင်းသူးတွင်းႁေႇၸၵိ
၁၄ လိၵ်ႈၼၼ်ႉၸိုင် ႁေႇၸၵိႁပ်ႉၶၢမ်ႇဢဝ်ၵႃႈတီႈမိုဝ်းတမၢၼ်ႇၸိူဝ်းၼၼ်ႉလႄႈ ၽတ်းသေယဝ်ႉ ႁေႇၸၵိၶိုၼ်ႈၸူးၵႃႈတီႈပိၵ်ႉမၢၼ်ႇထႃႇဝရႃႉၽြႃးလႄႈ ဢဝ် ၽႄႇၵီဝႆႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၁၅ မိူဝ်ႈၼၼ်ႉၶုၼ်လူင်ႁေႇၸၵိသူးတွင်းၵႃႈတီႈၽၢႆႇၼႃႈ ထႃႇဝရႃႉၽြႃးလႄႈဝႃႈၸမ်း၊-
၁၆ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃး ပဵၼ်ၸဝ်ႈမဵဝ်းဢိသရေႇလ ဢၼ်ၼင်ႈယူႇၵႃႈၼိူဝ်ၶေႇရုၽိမ်ႇၼၼ်ႉတီႈၶႃႈ။ၸဝ်ႈႁဝ်းပဵၼ်ၽြႃးပဵၼ်ၸဝ်ႈတီႈၶႃႈဢေႃႈ။ၸဝ်ႈႁဝ်းသူလဵဝ်ပႃးလဵဝ်ၵူၺ်းပဵၼ်ၽြႃးၸဝ်ႈ ၵူႈသိုင်ႇၵူႈမိူင်းၵႃႈဢၼ်မီးယူႇၵႃႈၼိူဝ်လိၼ်မိူင်းၼႆႉတီႈၶႃႈဢေႃႈ။ၸဝ်ႈႁဝ်းႁဵတ်းပဵၼ်ၾႃႉၵၢင်ႁၢဝ်တင်းလိၼ်မိူင်းတီႈၶႃႈဢေႃႈ။
၁၇ ထႃႇဝရႃႉၽြႃးတီႈၶႃႈ။ ၶႅၼ်းတေႃႈႁႄႈႁူၸဝ်ႈႁဝ်းလႄႈထွမ်ႇငိၼ်းသေၵမ်းတီႈၶႃႈ။ထႃႇဝရႃႉၽြႃးတီႈၶႃႈ။ၶႅၼ်းတေႃႈၽုၺ်ႇတႃမိုၼ်းတႃၸဝ်ႈႁဝ်းလႄႈလူတူၺ်းသေၵမ်းတီႈၶႃႈ။ ထွမ်ႇငိၼ်းၵႂၢမ်းဢၼ်သၼႃႇၶရိပ်ႉ ပွႆႇၸႂ်ႉမႃး ႁႂ်ႈလႆႈသေႉသွမ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉသေၵမ်းတီႈၶႃႈ။
၁၈ ထႃႇဝရႃႉၽြႃးတီႈၶႃႈ။ ၶုၼ်ႁေႃၶမ်းဢႃႇသုရိၸိူဝ်းၼၼ်ႉယႃႉၵူႈသိုင်ႇၵူႈမိူင်း ဢိၵ်ႇတင်းၼမ်ႉၶဝ်လိၼ်ၶဝ်ပႅတ်ႈဢမၢၼ်ႇၶၢၼ်ပဵၼ်လႄႈ ဢဝ်ၽြႃးၶဝ်တင်းလၢႆ ထႅမ်ႈတူၵ်းသႂ်ႇၵႃႈၼႂ်းၽႆးတီႈၶႃႈယဝ်ႉ။
၁၉ ၵွပ်ႈပိူဝ်ႈၸိူဝ်းၼၼ်ႉဢမ်ႇပဵၼ်ၽြႃး၊ပဵၼ်မႆႉတင်း မၢၵ်ႇႁိၼ်ဢၼ်ၵူၼ်းဢဝ်မိုဝ်းႁဵတ်းၼၼ်ႉလႄႈ ၶဝ်ၼၼ်ႉလႆႈယႃႉၶဝ်ပႅတ်ႈတီႈၶႃႈယဝ်ႉ။တေႃႈလဵဝ်ၼႆႉထႃႇဝရႃႉၽြႃးၽြႃးပဵၼ် ၸဝ်ႈႁဝ်းၶႃႈတီႈၶႃႈ။
၂၀ လွင်ႈၼင်ႇႁိုဝ်ၵူႈသိုင်ႇၵူႈမိူင်းၵႃႈဢၼ်မီးၵႃႈၼိူဝ်လိၼ်မိူင်းၼႆႉၸိူဝ်းၼၼ်ႉတၵ်းႁူႉ လွင်ႈဢၼ်ၸဝ်ႈႁဝ်းထႃႇဝရႃႉၽြႃးဢၼ်ဝႃႈ ၸဝ်ႈႁဝ်းသူႇလဵဝ်ပႃးလဵဝ်ၵူၺ်း ပဵၼ်ၽြႃးပဵၼ်ၸဝ်ႈၼၼ်ႉၸိုင်ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ် ဢွၵ်ႇသေၵႃႈၼႂ်းမိုဝ်းၶုၼ်ၼၼ်ႉသေၵမ်းတီႈၶႃႈ၊ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
ၶုၼ်သၼႃႇၶရိပ်ႉတူၵ်းသုမ်း
၂၁ မိူဝ်ႈၼၼ်ႉဢိသႃႇယ လုၵ်ႈၸၢႆးဢႃႇမုတ်ႉပွႆႇၸႂ်ႉၸူးၵႃႈတီႈၶုၼ်ႁေႇၸၵိလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ ၼၼ်ႉမီးဢမိင်ႉလႄႈဝႃႈၸမ်း၊-ၵွပ်ႈပိူဝ်ႈမႂ်းႁဵတ်းပထၼႃႇတီႈၵဝ် လူၺ်ႈလွင်ႈသၼႃႇၶ ရိပ်ႉၶုၼ်ႁေႃၶမ်းဢႃႇသုရိၼၼ်ႉလႄႈ
၂၂ ၵႂၢမ်းဢၼ်ထႃႇဝရႃႉၽြႃးမီးဢမိင်ႉလူၺ်ႈလွင်ႈမၼ်းၼၼ်ႉၸမ်း၊-ၵၢၼ်ႇၺႃႇလုၵ်ႈယိင်းသၢဝ်ၸိဢုၼ်ႇ ႁဵတ်းဢမ်ႇပေႃးၼင်ႇႁိုဝ်တီႈမႂ်းလႄႈႁဵတ်းပျၢၵ်ႈၶူဝ်မႂ်းယူႇဢေႃႈ။
၂၃ လုၵ်ႈယိင်း ဝဵင်းယေႇရုသလႅမ်ႇငွၵ်းႁူဝ်ၶွၼ်းႁူဝ်တေႃႇမႂ်းဢေႃႈ။မႂ်းၼႆႉသေႉသွမ်းလႄႈလႃႇလင်ၽူႈ လႂ်။မႂ်းဢဝ်သဵင်မႂ်းသႅၼ်ႇႁွင်ႉႁႃၽူႈ လႂ်လႄႈ မိုၼ်းတႃပူၵ်းပႅၼ်ၽႅၼ်သုင်ယူႇ။တေႃႈၵႃႈ ၽြႃးဢၼ်မူတ်းၸၢင်ႇ မဵဝ်းဢိသရေႇလ ၼၼ်ႉမႂ်းယင်းႁဵတ်းတေႃႇယူႇလူင်ပေႇ။
၂၄ မႂ်းဢဝ်ၶႃႈမႂ်းၵူၼ်းမႂ်းၸိူဝ်းၼၼ်ႉသေႉသွမ်းထႃႇဝရႃႉၽြႃးလႄႈလၢတ်ႈဝႃႈ၊-ၵဝ်ပႃးဢဝ်လေႃႉရထႃးၵဝ်ၼမ်ၼႃႇသေၶိုၼ်ႈၵႃႈ ၼိူဝ်ပၢႆၸိၵ်းလွႆတင်းလၢႆၵႃႈၼိူဝ်ပဵမ်ႉလွႆလေႇပၼုၼ်ႇၸိူဝ်းၼၼ်ႉယဝ်ႉ။ၵဝ်ပွမ်ႈတူၼ်ႈဢႃႇရိတ်ႉမၼ်းဢၼ်သုင်ဢၼ်ယၢဝ်းတင်းလၢႆ ဢိၵ်ႇတင်းတူၼ်ႈမႆႉပႅၵ်ႇမၼ်းဢၼ်လီၼႃႇၸိူဝ်းၼၼ်ႉလူမ်ႉယဝ်ႉ။ၵဝ်ၶဝ်ႈႁွတ်ႈၶဝ်ႈထိုင်ၵႃႈၼႂ်း တီႈဢၼ်သုင်ၼႃႇသေပိူၼ်ႈၵႃႈတီႈထိူၼ်ႇမၼ်းဢၼ်မီးမၢၵ်ႇမီးဝၢၵ်ႈလိူင်ႇ ၼမ်ၼႃႇၼၼ်ႉယဝ်ႉ။ၵဝ်လႆႈၶုတ်းၶုမ်ၶုတ်းလုၵ်းလႄႈၵိၼ်ၼမ်ႉ ယဝ်ႉ။
၂၅ ၵဝ်တၵ်းဢဝ်တင်းၽႃႇတိၼ်ၵဝ်ႁႂ်ႈၼမ်ၵႃႈဢၼ်မီးၵႃႈၼႂ်းၼမ်ႉႁွင်ႊၼမ်ႉၵႄးမိူင်းဢေႇၵႅပ်ႉတုၸိူဝ်းၼၼ်ႉႁႅင်ႈႁွင်ၵႂႃႇဢေႃႈ၊ဝႃႈၼင်ႇၼႆလူင်ပေႇ။
၂၆ မႂ်းဢမ်ႇလႆႈငိၼ်း လွင်ႈဢၼ်ၵဝ်ၸီႇယၢင်ႇဢမူႉၼႆႉမိူဝ်ႈဢွၼ်တၢင်းၼၼ်ႉဢိၵ်ႇတင်း လွင်ႈဢၼ်ၵဝ်ပွင်မႄးဝႆႉမိူဝ်ႈဢွၼ်ၼႆႉၼၼ်ႉႁိုဝ်။ မိူဝ်ႈလဵဝ်ၼႆႉၵေႃႈၵဝ်ၸီႇယၢင်ႇဝႆႉႁႂ်ႈမႂ်းပဵၼ် ၵေႃႉဢၼ်ယႃႉၽဵဝ်ႈဝဵင်းဢၼ်မၼ်ႈၶိူင်ႇတင်း လၢႆပႅတ်ႈလႄႈႁႂ်ႈပဵၼ်ၵွင်းမၢၵ်ႇႁိၼ်ဝႆႉၼၼ်ႉယဝ်ႉ။
၂၇ ပိူဝ်ႈၼႆလႄႈၵူၼ်းဝဵင်းၸိူဝ်းၼၼ်ႉ ႁႅင်းလဵၵ်ႉႁႅင်းၵေႇလႄႈမီးတၢင်းဢၼ်ၵႂင်ၸႂ်ယုင်ႈၸႂ်လႄႈလူႉယူႇဢေႃႈ။ၶဝ်ပဵၼ်ၸိူဝ်ႉၼင်ႇတူၼ်ႈယိူဝ်ႈယႃႈ ၵႃႈၼႂ်းထိူၼ်ႇတင်းတူၼ်ႈၶဝ်ႈဢၼ်ၶဵဝ်ၼၼ်ႉဢိၵ်ႇတင်း ၸိူဝ်ႉၼင်ႇတူၼ်ႈယိူဝ်ႈဢၼ်ဢွၵ်ႇၵႃႈၼိူဝ်မုင်းႁိူၼ်းတင်း တူၼ်ႈၶဝ်ႈဢၼ် ဢမ်ႇပႆႇတၢၼ်ႇယႂ်ႇတၢၼ်ႇထူၼ်ႈၼၼ်ႉဢေႃႈ။
၂၈ ၵဝ်ႁူႉတၢင်းဢၼ်မႂ်းၼင်ႈ၊ တၢင်းဢၼ်မႂ်းၶဝ်ႈမႂ်းဢွၵ်ႇ၊တၢင်းဢၼ်ၸႂ်မႆႈၶႆႈၸႃႉႁွင်ႉႁိုတ်း တီႈၵဝ်ၸိူဝ်းၼၼ်ႉယူႇဢေႃႈ။
၂၉ ၵွပ်ႈပိူဝ်ႈ တၢင်းဢၼ်မႂ်းၸႂ်မႆႈၶႆႈၸႃႉႁွင်ႉႁိုတ်းတီႈၵဝ်၊တၢင်းဢၼ်မႂ်းၸွၵ်ႈၵႃးၸႂ်သုင်ၼၼ်ႉ ၶိုၼ်းႁွတ်ႈၶိုၼ်းထိုင်ၵႃႈၼႂ်းႁူၵဝ်ၼၼ်ႉလႄႈၵဝ်တၵ်းဢဝ်သၢႆလင်သူၼ်သႂ်ႇၵႃႈတီႈၶူႈလင်မႂ်းလႄႈ ဢဝ်ၵၵ်ႉဢူမ်ႇသႂ်ႇတီႈသူပ်းမႂ်းသေလႄႈ ႁႂ်ႈမႂ်းၶိုၼ်းမိူဝ်းၵႂႃႇၸွမ်းသဵၼ်ႈတၢင်းဢၼ်မႂ်းမႃးၼၼ်ႉဢေႃႈ။
၃၀ ၼီႈမိၵ်ႈလၵ်ႈၶၼႃႇ ဢၼ်မႂ်းတၵ်းလႆႈမၢတ်ႈတွင်းဝႆႉၸမ်းသူတၵ်းလႆႈၵိၼ်မၢၵ်ႇႁူင်းဢၼ်ယႂ်ႇမႃးၵူၺ်းမၼ်းၼၼ်ႉပီႊၼႆႉဢိၵ်ႇတင်း ဢၼ်ဢွၵ်ႇပဵၼ်မႃးမိူၼ်ၸိူဝ်ႉၼင်ႇၼၼ်ၼႂ်းပီႊတုတိယၼၼ်ႉဢေႃႈ။ ၼႂ်းပီႊတုတိယၼၼ်ႉဝၢၼ်ႇၸိူဝ်ႉဝၢၼ်ႇၽၼ်းလႄႈ ပၢတ်ႇ ၶဝ်ႈတႃႉ။
၃၁ သူၼ်ဢူးယဵၼ်ႇၸပိတ်ႉၵေႃႈၽုၵ်ႇလႄႈၵိၼ်မၢၵ်ႇမၼ်းတႃႉ။ၵူၼ်းမဵဝ်းယုတဢၼ်လွတ်ႈၽေးလႄႈၵိုတ်းၵျၢၼ်ႇဝႆႉၸိူဝ်းၼၼ်ႉ တၵ်းသမ်ႉယင်ႇႁၢၵ်ႈၵႃႈတႂ်ႈ လႄႈမၢၵ်ႇမၢၵ်ႇၵႃႈၼိူဝ်လူးၵွၼ်ႇဢေႃႈ။
၃၂ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇဝႆႉၼၼ်ႉ တၵ်းပေႃႇမႃးၵႃႈၼႂ်းဝဵင်းယေႇရုသလႅမ်ႇလႄႈၶဝ်ၸိူဝ်းဢၼ်လွတ်ႈၽေးၼၼ်ႉတၵ်းပေႃႇမႃးၵႃႈတီႈလွႆၸိဢုၼ်ႇဢေႃႈ။ဢလူဝ်ႇၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးဢၼ်ႁႅင်းယႂ်ႇၼႃႇလူင်လၢင်လႄႈ ၸီႇယၢင်ႇႁဵတ်းဢမူႉၼၼ်ႉဢေႃႈ။
၃၃ ပိူဝ်ႈၼႆလႄႈ ထႃႇဝရႃႉၽြႃးမီးဢမိင်ႉလူၺ်ႈလွင်ႈၶုၼ်ႁေႃၶမ်းဢႃႇသုရိလႄႈဝႃႈၸမ်း၊- မၼ်းၼၼ်ႉဢမ်ႇလႆႈၶဝ်ႈၵႃႈၼႂ်းဝဵင်းၼႆႉ။ ဢမ်ႇလႆႈယိုဝ်းပိုၼ်ၶဝ်ႈၵႃႈၼႂ်းဝဵင်း။ဢမ်ႇလႆႈၼႄပျႃႉၶိူင်ႈဢၼ်ႁႄႉလၢၵ်ႈၼၢၵ်ႈၵႃႈတီႈၽၢႆႇၼႃႈဝဵင်း။ ဢမ်ႇလႆႈၵေႃႇလႆႈၵွင်တႅၼ်ႈ လိၼ်ၵႃႈတီႈၼွၵ်ႈဝဵင်း။
၃၄ မၼ်းတၵ်းလႆႈၶိုၼ်းမိူဝ်းၵႂႃႇၸွမ်းသဵၼ်ႈတၢင်းဢၼ်မၼ်းမႃးၼၼ်ႉဢေႃႈ။မၼ်းဢမ်ႇလႆႈၶဝ်ႈၵႃႈၼႂ်းဝဵင်းၼႆႉ။ထႃႇဝရႃႉၽြႃးမီးဢမိင်ႉ ဢေႃႈ။
၃၅ ၵဝ်တၵ်းထွၵ်ႈလူၺ်ႈၼႃႈၵဝ်တင်းၼႃႈၶႃႈၵဝ်တႃႇဝိတ်ႉၼၼ်ႉလႄႈ မုင်းႁူမ်ႇဝဵင်းၼႆႉယူႇႁႂ်ႈလႆႈၵႄႇသႄႇၶျွတ်ႈဢဝ်ဝဵင်းၼႆႉဢေႃႈ၊ဝႃႈၼင်ႇၼႆဢေႃႈ။
၃၆ မိူဝ်ႈၼၼ်ႉ တမၢၼ်ႇၵၢင်ႁၢဝ်ထႃႇဝရႃႉၽြႃးဢွၵ်ႇလႄႈပၼ်တၢမ်ႇဢဝ်ၵူၼ်းၼႂ်းတပ်ႉဢႃႇသုရိ တၢႆသႅၼ်ၼိုင်ႈပႅတ်ႇမိုၼ်ႇပၢႆႁႃႈႁဵင်လႄႈမိူဝ်ႈဢၼ်ထိုင်ၶိင်ႇဢၼ်ၵူၼ်းလုၵ်ႉၵၢင်ၼႂ်ၸဝ်ႉၸဝ်ႉၼၼ်ႉၸိုင် ၶဝ်ၼၼ်ႉပဵၼ်တူဝ် တၢႆၵႂႃႇတင်းသဵင်ႈတင်းလူင်ဢေႃႈ။
၃၇ ၼင်ႇၼၼ်လႄႈသၼႃႇၶရိပ်ႉ ၼၼ်ႉလုၵ်ႉဢွၵ်ႇသေၵႃႈတီႈၼၼ်ႉလႄႈၵႂႃႇသေယဝ်ႉၶိုၼ်းမိူဝ်းလႄႈ ယူႇၵႃႈတီႈဝဵင်းၼိၼေႇ ဝူၺ်ႇဢေႃႈ။
၃၈ လိုၼ်းၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉၵူဝ်းၵႂၢႆႇၵႃႈၼႂ်းပိၵ်ႉမၢၼ်ႇၼိသရွၵ်ႉၽြႃးမၼ်းယူႇၼၼ်ႉၸိုင်လုၵ်ႈၸၢႆးမၼ်းဢႃႇတြမ်ႇမလိၵ်ႉတင်း သရေႇၸႃႇၸိူဝ်းၼၼ်ႉ ဢဝ်မၼ်းတၢႆလူၺ်ႈလၢပ်ႇလူၺ်ႈလႅဝ်းသေလႄႈ ဢွၵ်ႇပၢႆႈၵႂႃႇၵႃႈတီႈမိူင်းဢႃႇရရတ်ႉဢေႃႈ။လုၵ်ႈၸၢႆးမၼ်းဢေႇသရႁတ်ႉတုၼ် ၼၼ်ႉၼင်ႈႁၢင်ႈၼင်ႈႁေႃတၢင်ႇတူဝ်ၸဝ်ႈပေႃႈမၼ်းဢေႃႈ။