၃၅
တၢင်းၸူမ်းသိူဝ်းၶဝ်ၸိူဝ်းဢၼ်လႆႈတၢင်းၵႄႇၶျွတ်ႈဢဝ်
၁ ထိူၼ်ႇဢိၵ်ႇတင်းပၢင်ႇပဵင်းၼၼ်ႉ တၵ်းၸူမ်းသိူဝ်းလႄႈတီႈဢၼ်သိတ်ႇဢၼ်ယဵၼ်ၼၼ်ႉ တၵ်းသႂၢင်ႇသိူဝ်းသေလႄႈ မွၵ်ႇမွၵ်ႇမိူၼ်ၸိူဝ်ႉၼင်ႇမွၵ်ႇၼႅင်းသီႇဢေႃႈ။
၂ တၵ်းမွၵ်ႇမွၵ်ႇၼမ်ၼႃႇလူင်လၢင်လႄႈ မီးတၢင်းဢၼ်မူၼ်ႈပျေႃႇတၢင်းဢၼ်ႁဵတ်းၵႂၢမ်းသေလႄႈ သႂၢင်ႇသိူဝ်းဢေႃႈ။တၵ်းတဵမ်ဝႆႉတင်းမူၼ်ႈၽုင်းလွႆ လေႇပၼုၼ်ႇဢိၵ်ႇတင်းသရေႇ တၢင်းဢၼ်ႁၢင်ႊလီႁၢင်ႊငၢမ်း လွႆၵရမေႇလတင်းသႃႇရုၼ်ႇၼၼ်ႉလႄႈ ၶဝ်တၵ်းလႆႈႁၼ်မူၼ်ႈၽုင်းထႃႇဝရႃႉၽြႃး ဢိၵ်ႇတင်း သရေႇတၢင်းဢၼ်ႁၢင်ႊလီႁၢင်ႊငၢမ်းၽြႃးပဵၼ်ၸဝ်ႈႁဝ်းဢေႃႈ။
၃ သူဢွၼ်ၵၼ်ႁႂ်ႈမိုဝ်းဢၼ်ဢမ်ႇမီးႁႅင်းၸိူဝ်းၼၼ်ႉမၼ်ႈၶိူင်ႇလႄႈ ႁႂ်ႈႁူဝ်ၸႂ်ၶဝ်ဢၼ်ၸၢင်ႊတူင်ႉၸၢင်ႊ ၶွၼ်းၸိူဝ်းၼၼ်ႉၵႅၼ်ႇၶႅင်တႃႉ။
၄ ဢွၼ်ၵၼ်လၢတ်ႈတီႈၶဝ်ၸိူဝ်းဢၼ် ႁူဝ်ၸႂ်ၸၢင်ႊၵူဝ်ၸၢင်ႊႁႄၼၼ်ႉလႄႈဝႃႈ၊- ဢဝ်ႁႅင်းတႃႉ။ယႃႇပေမႆႈၸႂ်၊ဝႃႈၼင်ႇၼႆတႃႉ။လွင်ႈမၼ်းၸမ်းၽြႃးပဵၼ်ၸဝ်ႈသူၼၼ်ႉ တၵ်းပႃးဢဝ်တၢင်းဢၼ်ပၼ်ဢပျႅတ်ႈ တၢင်းဢၼ်ၽြႃးပဵၼ်ၸဝ်ႈၸီႇယၢင်ႇတၢမ်ႇၼၼ်ႉသေလႄႈမႃးဢေႃႈ။မၼ်းၸဝ်ႈ တၵ်းမႃးလႄႈၵႄႇသႄႇၶျွတ်ႈဢဝ်သူဢေႃႈ။
၅ မိူဝ်ႈၼၼ်ႉတႃၶဝ်ၸိူဝ်းဢၼ်မွတ်ႇၼၼ်ႉ တၵ်းမီးတၢင်းဢၼ်ပိုတ်ႇလႅင်းလႄႈ ႁူၶဝ်ၸိူဝ်းဢၼ်ၼူၵ်ႇၼၼ်ႉတၵ်းမီး တၢင်းဢၼ်ၽုၺ်ႇပိုတ်ႇငိၼ်းလီဢေႃႈ။
၆ ၶဝ်ၸိူဝ်းဢၼ်တိၼ်ၵႅင်ႉၼၼ်ႉ တၵ်းၵျွၵ်းဝႅၼ်မိူၼ်ၸိူဝ်ႉၼင်ႇတိုင်လႄႈလိၼ်ႉၶဝ်ၸိူဝ်းဢၼ်ဢႃႉၼၼ်ႉ တၵ်းႁဵတ်းၵႂၢမ်းဢေႃႈ။လွင်ႈမၼ်းၸမ်း ၼမ်ႉဢွၵ်ႇႁူးတၵ်းဢွၵ်ႇၵႃႈတီႈထိူၼ်ႇလႄႈ ၼမ်ႉႁွင်ႊၼမ်ႉၵႄးတၵ်းလႆၵႃႈၼႂ်းပၢင်ႇပႅင်းဢေႃႈ။
၇ တီႈဢၼ်သၢႆဢရွင်ႇၵၢင်ဝၼ်းထွင်ႇ မိူၼ်ၼင်ႇႁၢင်ႈပဵၼ်ၼမ်ႉၼၼ်ႉ တၵ်းပဵၼ်ၼမ်ႉၼွင်လႄႈလိၼ်ဢၼ်ႁႅင်ႈဢၼ်ႁွင်ၼၼ်ႉတၵ်းပဵၼ်တီႈဢၼ်မီး ၼမ်ႉဢွၵ်ႇႁူးတင်းလၢႆဢေႃႈ။ၵႃႈၼႂ်းတီႈယူႇတီႈၼွၼ်းမႃလိၼ်ၼၼ်ႉ တၵ်းလႆႈပဵၼ်တီႈဢၼ်တူၼ်ႈမႆႉဢေႃႈ ဢိၵ်ႇ တင်းတူၼ်ႈၵမႃႇဢွၵ်ႇမႃးဢေႃႈ။
၈ ၵႃႈတီႈၼၼ်ႉတၵ်းမီးသဵၼ်ႈတၢင်းလူင်ဢိၵ်ႇတင်း သဵၼ်ႈတၢင်းလႄႈသဵၼ်ႈတၢင်းၼၼ်ႉတၵ်းလႆႈၶၢမ်ႇ တၢင်းဢၼ်ႁွင်ႉႁိၵ်ႈၸိုဝ်သဵၼ်ႈတၢင်းဢၼ်မူတ်းၸၢင်ႇဢေႃႈ။ၵေႃႉဢၼ်ဢမ်ႇမူတ်းသႂ်ၼၼ်ႉဢမ်ႇလႆႈတႆႇ လႆႈၵႂႃႇၵႃႈၼႂ်းမၼ်းၼၼ်ႉ။တၵ်းလႆႈပဵၼ်ပုၼ်ႈၶဝ်ၸိူဝ်းဢၼ်ၵႂႃႇၼၼ်ႉၵူၺ်းဢေႃႈ။ၶဝ်ၸိူဝ်းဢၼ်ၸွမ်းသဵၼ်ႈတၢင်းၼၼ်ႉၵႂႃႇၼၼ်ႉပိၵ်ႉသမ်ႉ ပဵၼ်ၵေႃႉဢၼ်မိူၵ်ႈသေၵေႃႈဢမ်ႇလႆႈပိူင်ႈတၢင်းၽိတ်းတၢင်းၵႂႃႇ။
၉ ၵႃႈတီႈၼၼ်ႉဢမ်ႇလႆႈမီးသၢင်ႇသီႈတူဝ်ႁၢႆႉတူဝ်ၵႅမ်း။ဢမ်ႇလႆႈၶိုၼ်ႈလႆႈၸူးသေတူဝ်။ႁႃလႄႈဢမ်ႇလႆႈထူပ်း။ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ထုတ်ႇၼုၵ်ႈဢဝ်ၼၼ်ႉၵူၺ်းတၵ်းလႆႈၸွမ်းသဵၼ်ႈတၢင်းၼၼ်ႉဢေႃႈ။
၁၀ ၶဝ်ၸိူဝ်းဢၼ်ထႃႇဝရႃႉၽြႃးၵႄႇသႄႇဢဝ်လွတ်ႈၼၼ်ႉတၵ်းဢွၼ်ၵၼ်ၶိုၼ်းမႃးလႄႈ ပႃးတင်းတၢင်းဢၼ်ႁဵတ်းၵႂၢမ်းယူႇသေလႄႈ ႁွတ်ႈထိုင်ၵႃႈတီႈဝဵင်းၸိဢုၼ်ႇလႄႈ တၢင်းဢၼ်ၸူမ်းသိူဝ်းထႃႇဝရႃႉၼၼ်ႉတၵ်းတိူဝ်ႉသႂ်ႇဝႆႉယူႇၵႃႈတီႈႁူဝ်ၶဝ်ဢေႃႈ။တၢင်းဢၼ်မူၼ်ႈပျေႃႇဢိၵ်ႇတင်း တၢင်းဢၼ်သႂၢင်ႇသိူဝ်းၼၼ်ႉတၵ်းၶိုတ်းၶဝ်လႄႈ တၢင်းဢၼ်မႆႈၸႂ်ၶီၸႂ်ဢိၵ်ႇတင်းတၢင်းဢၼ်ၶၢင်းၶီၶၢင်းၽၢၼ်ၼၼ်ႉ တၵ်းလႆႈဢွၵ်ႇပၢႆၵႂႃႇဢေႃႈ။