၁၀
၁ ၶဝ်ၸိူဝ်းဢၼ်ၸီႇယၢင်ႇ ဢၼ်ဢမ်ႇတြႃးဢိၵ်ႇတင်းၸရေး ဢၼ်မၢတ်ႈမၢႆတႅမ်ႈဝႆႉလွင်ႈတၢင်းဢၼ်ၵိတ်ႇ ၼႃႇၵႅပ်ႈၼႃႇ ႁႂ်ႈၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉ သုမ်းတြႃး
၂ ႁႂ်ႈလႆႈသိမ်းဢဝ်ဢၶႂၢင်ႉဢရႃႇၶဝ်ၸိူဝ်းဢၼ်ယၢၵ်ႈဢၼ်ၽၢၼ်ႇ ၼႂ်းမဵဝ်းၵူၼ်းၵဝ်တင်းလၢႆႁႂ်ႈလႆႈၼိၵ်ႈၸၢၵ်ႈငႅၼ်းသေး မေႈမုၵ်ႉမေႈမၢႆႈတင်းလၢႆ လႄႈႁိမ်ဢဝ်ႁူင်ႇဢဝ်ၶွင်ၶူဝ်းၶဝ်ၸိူဝ်းဢၼ်ဢမ်ႇမီးပေႃႈမီးမေႈၸိူဝ်းၼၼ်ႉမီးဢႃႉမၢင်ႇၵလႃႇဢေႃႈ။
၃ သူတၵ်းႁဵတ်းၸိူဝ်ႉၼင်ႇႁိုဝ် ၼႂ်းမိူဝ်ႉဝၼ်းဢၼ်ၵဝ်လူတူၺ်းၸီႇယၢင်ႇ၊ မိူဝ်ႈဢၼ်ပဵၼ်တၢင်းဢၼ်ယႃႉပႅတ်ႈဢၼ်တၵ်းလုၵ်ႉသေၵႃႈတီႈၵႆႁွတ်ႈမႃးၼၼ်ႉ။လွင်ႈၼင်ႇႁိုဝ်သူတၵ်းလႆႈၵတ်းယဵၼ်ၶျၢမ်းသႃႇၸိုင် သူတၵ်းပၢႆၵႂႃႇၸူးၵႃႈတီႈၽူႈ လႂ်။တၵ်းဢဝ်မူၼ်ႈၽုင်းသူသိမ်းဝႆႉၵႃႈ တီႈ လႂ်။
၄ ၶဝ်ၸိူဝ်းဢၼ်ဢမ်ႇလႆႈၶၢမ်ႇဢဝ်ၵျေးၸူးၵဝ်ၼၼ်ႉ တၵ်းလႆႈၵူမ်ႈႁူဝ်ၵွမ်းႁူဝ် ၵႃႈတီႈတႂ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶျုၵ်ႈဝႆႉၼၼ်ႉလႄႈ တၵ်းလႆႈလူမ်ႉလႆႈတူၵ်း ၵႃႈတီႈတႂ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ဢဝ်တၢႆၼၼ်ႉဢေႃႈ။ၼႂ်းဝႃႈၼၼ်သေၵေႃႈတၢင်းၸႂ်မႆႈၶႆႈၸႃႉမၼ်းၸဝ်ႈ ဢမ်ႇထၢတ်ႇဢမ်ႇယဵၼ်မိုဝ်းမၼ်းၸဝ်ႈၵေႃႈယင်းယဵတ်ႇယူႇဢေႃႈ။
ၽြႃးပဵၼ်ၸဝ်ႈၸီႇယၢင်ႇၼိူဝ်ၵူၼ်းဢႃႇသုရိ
၅ ၵူၼ်းဢႃႇသုရိၼၼ်ႉမီးဢႃႉမၢင်ႇၵလႃႇဢေႃႈ။ ပဵၼ်ၵၼ်းႁွၵ်ႇတၢင်းၸႂ်မႆႈၶႆႈၸႃႉၵဝ်ဢေႃႈ။ၶွၼ်ႉတဝ်ႉဢၼ်မၼ်းယိပ်းၵမ်ၼၼ်ႉ ပဵၼ်ပုၼ်ႈဢၼ်ၵဝ်လီဢဝ်ပၼ် တၢမ်ႇ ဢေႃႈ။
၆ ၵဝ်တၵ်းပွႆႇၸႂ်ႉမၼ်းၵႂႃႇႁဵတ်းၶတ်းၵၼ်တင်းမဵဝ်းဢႃႉထမ်ႇမႃႉၼၼ်ႉလႄႈ ၵဝ်တၵ်းသင်ႇလၢတ်ႈတီႈမၼ်းၵႂႃႇ ႁဵတ်းၶတ်းၵၼ်တင်းမဵဝ်းၵူၼ်းဢၼ်ၶၢမ်ႇတၢင်းၸႂ်မႆႈၶႆႈၸႃႉၵဝ်ၼၼ်ႉ ႁႂ်ႈမၼ်းလႆႈႁိမ်ဢဝ်ႁူင်ႇဢဝ်ၶဝ် ယႃႉပႅတ်ႈၶဝ်ယဵပ်ႇၶၢမ်ႈၶဝ်မိူၼ်ၸိူဝ်ႉၼင်ႇၵူမ်ႇ ၵႃႈတီႈၵၢင်တၢင်းၼၼ်ႉဢေႃႈ။
၇ ၼႂ်းဝႃႈၼၼ်သေၵေႃႈမၼ်းဢမ်ႇမီးတၢင်းၵျၢမ်ႇတၢင်းပွင် ၸိူဝ်ႉၼင်ႇၼၼ်ဢလူဝ်ႇၸိူဝ်ႉၼင်ႇၼၼ်။မၼ်းမီးဢလူဝ်ႇဢၼ်ၶႆႈယႃႉပႅတ်ႈလႄႈ ပႄႇၽဵဝ်ႈၵူၼ်းမဵဝ်းၼမ်ၼႃႇပႅတ်ႈဢေႃႈ။
၈ မၼ်းၸၢင်ႊလၢတ်ႈၸိူဝ်ႉၼင်ႇႁိုဝ်ၸမ်း၊-မူးမၢတ်ႈၽွင်း မိူင်းၵဝ်ၸိူဝ်းၼႆႉပဵၼ်ၶုၼ်လူင်ဢမ်ႇၸႂ်ႈႁိုဝ်။
၉ ဝဵင်းၵႃႇလၼႃႇ ပဵၼ်ၸိူဝ်ႉၼင်ႇဝဵင်းၶႃႇၶေႇမိတ်ႉ၊ဝဵင်းႁႃႇမတ်ႉပဵၼ်ၸိူဝ်ႉၼင်ႇဝဵင်းဢႃႇပတ်ႉ၊ဝဵင်းသမႃႇရိ ပဵၼ်ၸိူဝ်ႉၼင်ႇဝဵင်း ထမ်ႇမသိတ်ႉဢမ်ႇၸႂ်ႈႁိုဝ်။
၁၀ ၸိူဝ်ႉၼင်ႇဢၼ်မိုဝ်းၵဝ်ၼႆႉသိမ်းဢဝ်မၢၼ်ႈမိူင်း ဢၼ်ၵူဝ်းၵႂၢႆႇရုၵ်ႉထူႉသၢင်းထူႉဢၼ်ယိင်ႈၶႅၼ်းႁူင်ႁၢင်းၼႃႇသေ ရုၵ်ႉထူႉသၢင်းထူႉယေႇရုသလႅမ်ႇ
၁၁ တင်းရုၵ်ႉထူႉသၢင်းထူႉသမႃႇရိ ၸိူဝ်းၼၼ်ႉဢိၵ်ႇတင်း ၸိူဝ်ႉၼင်ႇဢၼ်ၵဝ်ႁဵတ်းတီႈဝဵင်းသမႃႇရိတင်းရုၵ်ႉထူႉမၼ်းၸိူဝ်းၼၼ်ႉ ၵဝ်တၵ်းႁဵတ်းတီႈဝဵင်းယေႇရုသလႅမ်ႇတင်းရုၵ်ႉထူႉမၼ်းၸိူဝ်းၼၼ်ႉဢမ်ႇၸႂ်ႈႁိုဝ်၊ ဝႃႈၼင်ႇၼႆဢေႃႈ။
၁၂ ၼႂ်းဝႃႈၼၼ်သေၵေႃႈထႃႇဝရႃႉၽြႃး ႁႂ်ႈဢမူႉမၼ်းၸဝ်ႈတင်းသဵင်ႈတင်းမူတ်း ယဝ်ႉတူဝ်ႈၵႃႈတီႈလွႆၸိဢုၼ်ႇဢိၵ်ႇတင်းဝဵင်းယေႇရုသလႅမ်ႇ သေယဝ်ႉၵဝ်တၵ်းလူတူၺ်းလႄႈ ၸီႇယၢင်ႇတၢင်းဢၼ်မႃႇၼႃႉပူၵ်းပႅၼ်ၶုၼ်ႁေႃၶမ်းဢႃႇသုရိ ဢိၵ်ႇတင်းတၢင်းဢၼ်မၼ်းႁဵတ်း ၼႃႈမၼ်းၽႅၼ်သုင်ၼႃႇလႄႈၸွၵ်ႇၵႃးၼၼ်ႉ ဢေႃႈ။
၁၃ မၼ်းၼၼ်ႉလၢတ်ႈလႄႈဝႃႈ၊-ၵဝ်ၼႆႉၵွပ်ႈပိူဝ်ႈတၢင်းၵတ်ႉတၢင်းၶၼ်မိုဝ်းၵဝ်ဢိၵ်ႇတင်း ၺၢၼ်ႇၵဝ်လႄႈတတ်ႈၼိုင်ႇလႆႈဢေႃႈ။ၵဝ်တဵမ်ဝႆႉတင်းပိင်ႇၺႃႇသတိလႄႈ ၵဝ်ၶၢႆႉတီႈဢၼ်ၶၼ်ႈဢၼ်ၶႅၼ်ႈတီႈမဵဝ်းၵူၼ်းတင်းလၢႆယဝ်ႉ။ၵဝ်ႁိမ်ဢဝ်ၽၼ်ႇတႃႇၶွင်ၶူဝ်းၶဝ်လႄႈ ၶျႃးၵူၼ်းဝၢၼ်ႈၵူၼ်းမိူင်းတင်းလၢႆတူၵ်းမိူၼ်ၸိူဝ်ႉ ၼင်ႇၵူၼ်းသိုၵ်းၼၼ်ႉယဝ်ႉ။
၁၄ မိုဝ်းၵဝ်ၼႆႉထူပ်းႁၼ်ၶွင်ၶူဝ်းၸေးၸိမ်ႇမဵဝ်းၵူၼ်းတင်းလၢႆမိူၼ်ၸိူဝ်ႉၼင်ႇဢၼ်ထူပ်းႁၼ်ႁင်းၼူၵ်ႉၼၼ်ႉလႄႈ သိမ်းဢဝ်ၶိူင်ႈပိူင်လိၼ်မိူင်းၵႃႈမီးမိူၼ်ၸိူဝ်ႉၼင်ႇဢၼ် သိမ်းဢဝ်ၶႆႇၼူၵ်ႉဢၼ်ၸုၼ်ႉပႅတ်ႈၼၼ်ႉယဝ်ႉ။ၽူႈ လႂ်ဢမ်ႇတူင်ႉပိၵ်ႇသၼ်ႇပိၵ်ႇ၊ဢမ်ႇၽုၺ်ႇသူပ်းဢႃႈသူပ်း၊ဢမ်ႇႁွင်ႉဢမ်ႇၶၢင်းလႃးလႃး၊ဝႃႈၼင်ႇၼႆဢေႃႈ။
၁၅ တႃမၢတ်ႇတၵ်းလႆႈဢုပ်ႇဢၢတ်ႇတေႃႇ ၵေႃႉဢၼ်မၼ်းပွမ်ႈမၼ်းၽၼ်းၼၼ်ႉႁိုဝ်။လဵၵ်းလိူဝ်ႈတၵ်းလႆႈႁဵတ်းတူဝ်ယူႇၽၢႆႇၼိုင်ႈတင်းၵေႃႉဢၼ်ဢဝ်မၼ်းလိူဝ်ႈၼၼ်ႉႁိုဝ်။ပဵၼ်ၸိူဝ်ႉၼင်ႇဢၼ်ၶွၼ်ႉဝၢႆတူင်ႉၼိုင်သၼ်ႇၶွၼ်း ၵေႃႉဢၼ်ယိပ်းၵမ်မၼ်းၼၼ်ႉဢိၵ်ႇတင်း ၸိူဝ်ႉၼင်ႇဢၼ်ၶွၼ်ႉတဝ်ႉယုၵ်ႉ ယွင်ႈၸဝ်ႈမၼ်းၼၼ်ႉဢေႃႈ။
၁၆ ပိူဝ်ႈၼႆလႄႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး တၵ်းဢဝ်တၢင်းဢၼ်ယွမ်ႁဵဝ်ႇသႂၢင်းသႂ်ႇပၼ်ၵႃႈၼႂ်းၶဝ်ၸိူဝ်းဢၼ်ပီးလီမၼ်းလီၼၼ်ႉဢေႃႈ။ ၵႃႈတီႈတႂ်ႈမူၼ်ႈၽုင်းမၼ်းၵေႃႈမၼ်းၸဝ်ႈတၵ်းတုတ်ႇတၵ်းၽဝ်ၽႆးဢၼ်တၵ်းမႆႈမိူၼ် ၸိူဝ်ႉၼင်ႇဢၼ်ၽႆးမႆႈၼၼ်ႉဢေႃႈ။
၁၇ ဢၼ်လႅင်းမဵဝ်းဢိသရေႇလ ၼၼ်ႉတၵ်းပဵၼ်ၽႆးလႄႈၽြႃးဢၼ်မူတ်းၸၢင်ႇမၼ်းၼၼ်ႉတၵ်းပဵၼ်ပိဝ်ၽႆးဢေႃႈ။ဢၼ်ၼၼ်ႉတၵ်းမႆႈတူၼ်ႈၼၢမ်မၼ်း ၵူႈၸိူဝ်ႉၵူႈမဵဝ်းသုတ်းပႅတ်ႈ ၼႂ်းဝၼ်းလဵဝ်ၵူၺ်းဢေႃႈ။
၁၈ မၼ်းၸဝ်ႈတၵ်းႁႂ်ႈမူၼ်ႈၽုင်းပႃႇမႆႉပႃႇၸိင်ႇမၼ်း ဢိၵ်ႇတင်းမူၼ်ႈၽုင်းႁႆႊၼႃးဢၼ်ဢွၵ်ႇမၢၵ်ႇဢွၵ်ႇႁူင်းၸႃႉၸဵမ်တူဝ်ၶၼ်ႇထႃႇလႄႈ ၼၢမ်ႇဝိၺိၺ်ႇမၼ်းသဵင်ႈမူတ်းပႅတ်ႈလႄႈတၵ်းပဵၼ်ၸိူဝ်ႉၼင်ႇဢၼ်ႁႅင်း ၵူၼ်းၶႆႈၵူၼ်းပဵၼ်သုတ်ႈယွမ်း ၵႂႃႇၼၼ်ႉဢေႃႈ။
၁၉ တူၼ်ႈမႆႉဢၼ်ၵိုတ်းၵျၢၼ်ႇဝႆႉၵႃႈၼႂ်းပႃႇမႆႉပႃႇၸိင်မၼ်းၸိူဝ်းၼၼ်ႉ တၵ်းမီးဢိတ်းဢွၼ်ႇၼိုင်ႈၵူၺ်းထၼ်ႈပေႃး လုၵ်ႈဢွၼ်ႇၼပ်ႉဢၢၼ်ႇဢဝ်ၸရၢင်းလႆႈယူႇဢေႃႈ။
ၵူၼ်းဢိသရေႇလဢၼ်ၵိုတ်းၵျၢၼ်ႇ
၂၀ ၸႃႉၸဵမ်မိူဝ်ႉဝၼ်းၼၼ်ႉလႄႈ မဵဝ်းဢိသရေႇလ ဢၼ်ၵိုတ်းဢၼ်ၵျၢၼ်ႇဢိၵ်ႇတင်းမဵဝ်းယႃႇၵုပ်ႉ ဢၼ်ၵၢင်းလွတ်ႈတင်းၽေးယူႇၸိူဝ်းၼၼ်ႉၵမ်းလိုၼ်းယင်းဢမ်ႇဢိင်ဢမ်ႇပိုင်ႈ ၵေႃႉဢၼ်ၼိၵ်ႈၸၢၵ်ႈငႅၼ်းသေးၶဝ်ၼၼ်ႉလႄႈတၵ်းဢိင်ပိုင်ႈထႃႇဝရႃႉၽြႃးၽြႃးဢၼ်မူတ်းၸၢင်ႇ မဵဝ်းဢိသရေႇလ ၼၼ်ႉဢမၢၼ်ႇ ၶၢၼ်ပဵၼ်ဢေႃႈ။
၂၁ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇဢၼ်ဝႃႈ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇဝႆႉၵႃႈတီႈမဵဝ်းယႃႇၵုပ်ႉၼၼ်ႉ တၵ်းဢွၼ်ၵၼ်ၶိုၼ်းမႃးၸူးၵႃႈတီႈၽြႃးပဵၼ်ၸဝ်ႈ ဢၼ်တၼ်းၶူဝ်းယႂ်ႇၼႃႇၼၼ်ႉဢေႃႈ။
၂၂ မဵဝ်းဢိသရေႇလဢိူၺ်း။ပိၵ်ႉသမ်ႉၵူၼ်းမဵဝ်းမႂ်းတင်းလၢႆၼမ်ထၢၼ်ႇမဵတ်ႉသၢႆးၼမ်ႉသမ်ႇမုၵ်ႉ တြႃႇသေၵေႃႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉၵူၺ်းတၵ်းၶိုၼ်းမႃးဢေႃႈ။ တၢင်းဢၼ်ၽဵဝ်ႈမူတ်းပႅတ်ႈဢၼ်လူၼ်ႉတဵမ်ဝႆႉလူၺ်ႈတၢင်းဢၼ် ၸွမ်းၼင်ႇတြႃးၼၼ်ႉလႆႈမီး တၢင်းဢၼ်ၸီႇယၢင်ႇၶၢၼ်းဝႆႉယဝ်ႉ။
၂၃ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉ တၵ်းႁဵတ်းတၢင်းဢၼ်ၽဵဝ်ႈမူတ်းပႅတ်ႈဢၼ်ၸီႇယၢင်ႇၶၢၼ်းဝႆႉ ၼၼ်ႉၵႃႈၼႂ်းၵၢင်ၼႃႈလိၼ်တင်းသဵင်ႈတင်းမူတ်းဢေႃႈ။
၂၄ ပိူဝ်ႈၼႆလႄႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉၸမ်း ၵူၼ်းမဵဝ်းၵဝ်ဢၼ်ယူႇၵႃႈတီႈ ဝဵင်းၸိဢုၼ်ႇၶဝ်ဢိူၺ်း။ယႃႇပေၵူဝ်ပေႁႄလူၺ်ႈလွင်ႈၶုၼ်ဢႃႇသုရိၼၼ်ႉ။ မၼ်းတၵ်းဢဝ်တင်းၶွၼ်ႉဝၢႆမၼ်းပေႃႉယႅၼ်ႉမႂ်းလႄႈ ယုၵ်ႉယွင်ႈၵၼ်းႁွၵ်ႇမၼ်းၵႃႈၼိူဝ်မႂ်း မိူၼ်ၸိူဝ်ႉ ၼင်ႇဢၼ်ၶုၼ်ဢေႇၵႅပ်ႉတုႁဵတ်းၼၼ်ႉဢေႃႈ။
၂၅ ၼႂ်းဝႃႈၼၼ်သေၵေႃႈႁိုင်ၵမ်းဢွၼ်ႇၼိုင်ႈၵူၺ်းလႄႈ တၢင်းၶႆႈၸႃႉၶႆႈၸိတ်ႉၵဝ်ဢိၵ်ႇတင်း တၢင်းဢၼ်ၸႂ်မႆႈၸႂ်လိူတ်ႇၵဝ်တၵ်းတဵမ်ဝႆႉ ၼႂ်းတၢင်းဢၼ်ၶဝ်ႁွတ်ႈထိုင်တၢင်းလူႉ တၢင်းလႅဝ်ၼၼ်ႉဢေႃႈ။
၂၆ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး တၵ်းမႄးႁႅၼ်းၽေးဢူးပၢတ်ႈပုၼ်ႈမၼ်းၼၼ်ႉမိူၼ်ၸိူဝ်ႉၼင်ႇဢၼ်မၼ်းၸဝ်ႈ ပၼ်တီႈမဵဝ်းမိတျၢၼ်ႇၵႃႈႁိမ်းမၢၵ်ႇႁိၼ်မၢၵ်ႇၽႃ ဢေႃႇရၽၼၼ်ႉလႄႈသမ်ႉၶိုၼ်းယုၵ်ႉယွင်ႈၵၼ်းႁွၵ်ႇမၼ်းၸဝ်ႈ ၵႃႈၼိူဝ်ပၢင်ႇလၢႆႇလႄႈ ယုၵ်ႉယွင်ႈၵၼ်းႁွၵ်ႇမၼ်းၸဝ်ႈၵႃႈၼင်ႇဢၼ် ႁဵတ်းၵႃႈၼႂ်းမိူင်းဢေႇၵႅပ်ႉတုၼၼ်ႉဢေႃႈ။
၂၇ ၼႂ်းမိူဝ်ႉဝၼ်းၶိင်ႇၵႃႇလႃႉၼၼ်ႉၶူဝ်းႁၢပ်ႇမၼ်းၼၼ်ႉ တၵ်းလႆႈၶၢမ်ႇတၢင်းဢၼ်ၶျႃးတူၵ်းပႅတ်ႈသေ ၵႃႈၼိူဝ်ႁူဝ်မႃႇမႂ်းလႄႈၵၢၼ်းမၼ်းၼၼ်ႉ တၵ်းလႆႈၶၢမ်ႇတၢင်းဢၼ်ၶျႃးတူၵ်းပႅတ်ႈသေၵႃႈၼိူဝ်ၶေႃးမႂ်းလႄႈ ၵၢၼ်းၼၼ်ႉတၵ်းလႆႈလူႉလႅဝ်ၵႂႃႇၵွပ်ႈပိူဝ်ႈၵျေးၸူး တၢင်းဢၼ်မီးဢၼ်ၶၢမ်ႇၽိၵ်ႈသိၵ်ႈၼၼ်ႉဢေႃႈ။
၂၈ မၼ်းႁွတ်ႈထိုင်ၵႃႈတီႈဝဵင်းဢႃႇယပ်ႉယဝ်ႉ။မၼ်းပူၼ်ႉမႃးတေႃႇထိုင်ႁူတ်ႈဝဵင်းမိၵရုၼ်ႇယဝ်ႉ။ၵႃႈတီႈဝဵင်းမိၵ်ႉမတ်ႉၼၼ်ႉမၼ်းၶျႃးၶူဝ်းလဵင်းမၼ်းဝႆႉယဝ်ႉ။
၂၉ ၶဝ်ဢွၼ်ၵၼ်ပူၼ်ႉၵႄႈလွႆမႃးယဝ်ႉ။ၶဝ်ဢွၼ်ၵၼ် ၶျႃးပၢင်ၶဝ်ၵႃႈတီႈဝဵင်းၵေႇပယဝ်ႉ။ဝဵင်းရႃႇမၼၼ်ႉမီးတၢင်းဢၼ်သၼ်ႇဝႆၵူဝ်ႁႄယူႇဢေႃႈ။ဝဵင်းၵိပႃႇတီႈယူႇသေႃးလုၼၼ်ႉဢွၵ်ႇပၢႆႈဢွၵ်ႇၼီယဝ်ႉ။
၃၀ လုၵ်ႈယိင်းဝဵင်းၵႃႇရိမ်ႇဢိူၺ်း။ႁွင်ႉသႅၼ်ႇသဵင်မႂ်းတႃႉ။ဝဵင်းလေႇသဢိူၺ်း။ထွမ်ႇငိၼ်းတႃႉ။
၃၁ ဝဵင်းဢႃႇၼသုတ်ႉဢၼ်မီးဢႃႉမၢင်ႇၵလႃႇဢိူၺ်း။ဝဵင်းမႃႇတမေႇၼၼၼ်ႉၶၢႆႉတီႈၵႂႃႇယဝ်ႉ။ၵူၼ်းဝဵင်းၵေႇပိမ်ႇ ၸိူဝ်းၼၼ်ႉဢွၼ်ၵၼ်ပၢႆႈႁႂ်ႈလွတ်ႈဢေႃႈ။
၃၂ ဝၼ်းမိူဝ်ႈၼႆႉၵမ်းလဵဝ်မၼ်းတၵ်းၵိုတ်းသဝ်းယူႇၵႃႈတီႈဝဵင်း ၼေႃႇၽသေလႄႈ ဢဝ်မိုဝ်းမၼ်းငႃၸူးယိင်ႈၸူးလွႆလုၵ်ႈယိင်းၸိဢုၼ်ႇ ဢၼ်ဝႃႈ လွႆယေႇရုသလႅမ်ႇၼၼ်ႉဢေႃႈ။
၃၃ တူၺ်းလူ။ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးတၵ်းဢဝ်တၢင်းဢၼ်လီၵူဝ်လီႁႄ တီႇၽဵဝ်ႈပၢႆၸိၵ်းၸွမ်တူၼ်ႈမႆႉပႅတ်ႈလႄႈ မၼ်းၸဝ်ႈတၵ်းတႅပ်းၽၼ်းၵိင်ႇဢၼ်သုင်တင်းလၢႆလူမ်ႉပႅတ်ႈသေလႄႈ ၶျႃးၵိင်ႇဢၼ် ယႂ်ႇၶိူဝ်းၼႃတင်းလၢႆတူၵ်းတီႈတႅမ်ႇဢေႃႈ။
၃၄ မၼ်းၸဝ်ႈတၵ်းဢဝ်တႃမၢတ်ႇ တီႇပွမ်ႈယုမ်းမႆႉယုမ်းထိူၼ်ႇပႅတ်ႈလႄႈ ထိူၼ်ႇလေႇပၼုၼ်ႇ ၼၼ်ႉတၵ်းလူႉတူၵ်းယူႇလူၺ်ႈမိုဝ်းၵေႃႉဢၼ်တၼ်းၶူဝ်းယႂ်ႇၼၼ်ႉဢေႃႈ။