၉
လုၵ်ႈဢွၼ်ႇၵိူတ်ႇလဵင်ႉမႃးပုၼ်ႈႁဝ်း
၁ ၼႂ်းဝႃႈၼၼ်သေၵေႃႈ မိူင်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉၵမ်းလိုၼ်း တၵ်းၵၢင်းလွတ်ႈတၢင်းလပ်းသိင်ႇဢေႃႈ။မိူဝ်ႈဢွၼ်ၼႆႉၼၼ်ႉမၼ်းၸဝ်ႈၶျႃးဢိုင်ႇၸေႇပုလုၼ်ႇ တင်းဢိူင်ႇ ၼပ်ႉထလိ တူၵ်းတီႈတႅမ်ႇဢေႃႈ။ၵူၺ်းၵႃႈမိူဝ်ႈၵမ်းလိုၼ်းမၼ်းၸဝ်ႈတၵ်းႁႂ်ႈသဵၼ်ႈတၢင်း ဢၼ်တႆႇၸွမ်းႁိမ်းၼွင်ၽၢႆႇပုၼ်ႉၼမ်ႉႁွင်ႊယေႃႇတၢၼ်ႇ၊ မိူင်းၵႃႇလိလႄးတီႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယူႇၼၼ်ႉ တဵမ်ဝႆႉတင်း မူၼ်ႈသရေႇဢေႃႈ။
၂ ၵူၼ်းဢၼ်ၵႂႃႇမႃးၼႂ်းလပ်းသိင်ႇတင်းလၢႆလႆႈႁၼ်ဢၼ်လႅင်း ဢၼ်ယႂ်ႇၼႃႇလူင်လၢင်လႄႈ ဢၼ်လႅင်းပေႃႇမႃးႁိူဝ်ႈလႅင်းၵႃႈတီႈၵူၼ်းဢၼ်မီးယူႇၼႂ်းႁူမ်ႈတင်းလၢႆၼၼ်ႉယဝ်ႉ။ၸဝ်ႈႁဝ်းႁႂ်ႈၵူၼ်းဝၢၼ်ႈၵူၼ်းမိူင်းၼမ်ၵိုၼ်းၼႃႇလႄႈ ႁႂ်ႈတၢင်းဢၼ် ၸူမ်းသိူဝ်းၶဝ်ယႂ်ႇၵႂၢင်ႈမႃးဢေႃႈ။
၃ ၶဝ်ၼၼ်ႉလႆႈၸူမ်းသိူဝ်းၵႃႈတီႈၽၢႆႇၼႃႈၸဝ်ႈႁဝ်း မိူၼ်ၸိူဝ်ႉၼင်ႇဢၼ်ၸူမ်းသိူဝ်းၼႂ်းၶိင်ႇဢၼ်ၸူႉသိမ်းၶဝ်ႈပိူၵ်ႇ ဢိၵ်ႇတင်းမိူၼ်ၸိူဝ်ႉၼင်ႇ ၶဝ်ၸိူဝ်းဢၼ်ၸူမ်းသိူဝ်းၼႂ်းမိူဝ်ႈဢၼ်ၽႄမႅင်ႇပၼ်ၵၼ် ၶွင်ၶူဝ်းဢၼ်ႁိမ်ႁူင်ႇဢဝ်လႆႈမႃး ၼၼ်ႉဢေႃႈ။
၄ လွင်ႈမၼ်းၸမ်းၸဝ်ႈႁဝ်းႁၵ်းႁိၵ်းပႅတ်ႈၵၢၼ်းဢၼ်ၶဝ်လႆႈႁၢပ်ႇ၊ ၶွၼ်ႉဢၼ်ၶဝ်လႆႈၶၢမ်ႇၵႃႈတီႈမႃႇတီႈလင်၊ ၵၼ်းႁွၵ်ႇၵေႃႉဢၼ်ၼိၵ်ႈၸၢၵ်ႈငႅၼ်းသေၶဝ်ၼၼ်ႉ မိူၼ်ၸိူဝ်ႉၼင်ႇဢၼ်ၸဝ်ႈႁဝ်းႁဵတ်းၼႂ်း ၸူဝ်ႈပၢၼ်မိတျၢၼ်ႇၼၼ်ႉယဝ်ႉ။
၅ သွၵ်းတိၼ်ၵူၼ်းသိုၵ်းဢၼ်တိုၵ်းသိုၵ်းဢိၵ်ႇတင်း ၶူဝ်းၼုင်ႈတၢင်းမႆႊဢၼ်ၵူဝ်ႈလိူတ်ႈၵႃႈမီးၼၼ်ႉ တၵ်းလႆႈပဵၼ်ပုၼ်ႈဢၼ်တၵ်း တုတ်ႇၽႆးတီႈဢၼ်ၽႆးတၵ်းၵိၼ်ဢေႃႈ။
၆ လွင်ႈမၼ်းၸမ်းလုၵ်ႈဢွၼ်ႇလႆႈၶၢမ်ႇတၢင်းဢၼ် ၵိူတ်ႇလဵင်ႉမႃးပုၼ်ႈႁဝ်းလႄႈ လုၵ်ႈၸၢႆးလႆႈၶၢမ်ႇတၢင်းဢၼ်ဢိတ်းလူပၼ်တီႈႁဝ်းဢေႃႈ။ ဢႃႇၼႃႇၸၢၵ်ႈတၢင်းဢၼ်ဢုပ်ႉပိူင်ႇတၵ်းမီးၵႃႈၼိူဝ်ႁူဝ်မႃႇမၼ်းၼၼ်ႉလႄႈ ၼႃႇမႃႉၸိုဝ်သဵင်မၼ်းၼၼ်ႉ တၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈၸိုဝ်လီဢၢမ်း၊ ၵေႃႉဢၼ်ႁူမ်ႈတိူင်ႇပၢင်ႇ၊ၽြႃးပဵၼ်ၸဝ်ႈ ဢၼ်တၼ်းၶူဝ်းယႂ်ႇ၊ပေႃႈထႃႇဝရႃႉ၊ၸဝ်ႈတၢင်းၼိမ်ဢေႃႈ။
၇ တၢင်းဢၼ်ဢႃႇၼႃႇၸဝ်ႈယႂ်ႇၽႄႈတူဝ်းတွၼ်းမႃးဢိၵ်ႇတင်းတၢင်းဢၼ်မၼ်းၸဝ်ႈတႄႇၼိမ်ၼၼ်ႉတၵ်းလႆႈမီးယူႇၼိၵ်ႉၸႃႉထႃႇဝရႃႉ ၵႃႈၼိူဝ်ရႃႇၸႃႉပလၢင်ႇၶုၼ်တႃႇဝိတ်ႉ ဢိၵ်ႇတင်းၵႃႈၼိူဝ်သိုင်ႇၸိုင်ႈဝၢၼ်ႈမိူင်းမၼ်း ႁႂ်ႈလႆႈတႄႇယူႇဢိၵ်ႇတင်းႁႂ်ႈလႆႈမၼ်ႈၶိူင်ႇယူႇလူၺ်ႈ တၢင်းဢၼ်ၸီႇယၢင်ႇၸွမ်းၼင်ႇတြႃးဢိၵ်ႇတင်း တၢင်းဢၼ်သိုဝ်ႈတေႃႇၼၼ်ႉဢဝ်ၸႃႉၸဵမ်မိူဝ်ႈၼႆႉၵႂႃႇမိူဝ်းၼႃႈ ၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်ႈတၢမ်ႈဢမ်ႇထၢတ်ႇဢေႃႈ။ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉ ဢလူဝ်ႇၸဝ်ႈႁႅင်းယႂ်ႇၼႃႇလႄႈတၵ်းႁႂ်ႈလွင်ႈတၢင်းၼၼ်ႉယဝ်ႉတူဝ်ႈဢေႃႈ။
ၽြႃးပဵၼ်ၸဝ်ႈၸႂ်မႆႈၶႆႈၸႃႉၼိူဝ်ဢိသရေႇလ
၈ ၸဝ်ႈၽြႃး ပွႆႇပျႃႇတိၵ်ႈၸဝ်ႈၸူးတီႈမဵဝ်းယႃႇၵုပ်ႉလႄႈႁႂ်ႈတူၵ်းႁွတ်ႈၵႃႈၼိူဝ်မဵဝ်းဢိသရေႇလဢေႃႈ။
၉ ၵူၼ်းတင်းသဵင်ႈတင်းလူင်ဢၼ်ဝႃႈ ၵူၼ်းဢေႇၽရိမ်ႇဢိၵ်ႇတင်းၵူၼ်းသမႃႇရိ လႂ် ဢၼ်မီးမႃႇၼႃႉယႂ်ႇႁူဝ်ၸႂ်ပူၵ်းပႅၼ်ၼႃႇလႄႈဝႃႈ၊-ပိၵ်ႉသမ်ႉလမ်းဢုတ်ႇလူမ်ႉပင်းသေၵေႃႈ ႁဝ်းတၵ်းဢဝ်မၢၵ်ႇႁိၼ်ဢၼ်ထၢၵ်ႇႁဵတ်း သပ်းႁဵတ်းၼၼ်ႉၶိုၼ်းတႄႇဢေႃႈ။
၁၀ ပိၵ်ႉသမ်ႉတူၼ်ႈမၢၵ်ႇလိူဝ်ႇတင်းလၢႆ လႆႈၶၢမ်ႇတၢင်းဢၼ်ပွမ်ႈလူမ်ႉပႅတ်ႈသေၵေႃႈႁဝ်းတၵ်းဢဝ်တူၼ်ႈဢႃႇရိတ်ႉ တင်းလၢႆၽုၵ်ႇသႂ်ႇဝႆႉၵႃႈတီႈႁွႆးၶဝ်ၼၼ်ႉဢေႃႈ၊ ဝႃႈၼင်ႇၼႆၼၼ်ႉတၵ်း လႆႈႁူႉဢေႃႈ။
၁၁ ပိူဝ်ႈၼႆလႄႈထႃႇဝရႃႉၽြႃးတၵ်းယုၵ်ႉယွင်ႈဢၼ်ပဵၼ်ရၢၼ်ႇသူႇ ၶုၼ်ရေႇၸိၼ် ၼၼ်ႉယူႇၽၢႆႇၼိုင်ႈတင်းၶဝ်ၼၼ်ႉလႄႈ ႁႂ်ႈရၢၼ်ႇသူႇၶဝ်လုၵ်ႉလႄႈၵႃႈတီႈၽၢႆႇၼႃႈ ၸမ်းၵူၼ်းသုရိတင်းလၢႆၵႃႈတီႈၽၢႆႇလင်ၸမ်းၵူၼ်းၽိလိတ်ႉတိ တင်းလၢႆတၵ်းဢွၼ်ၵၼ်ဢႃႈပၢၵ်ႇသေလႄႈ ၶူပ်းၵိၼ်မဵဝ်းဢိသရေႇလဢေႃႈ။
၁၂ ၼႂ်းဝႃႈၼၼ်သေၵေႃႈ တၢင်းၸႂ်မႆႈၶႆႈၸႃႉမၼ်းၸဝ်ႈဢမ်ႇထၢတ်ႇဢမ်ႇယဵၼ်။မိုဝ်းမၼ်းၸဝ်ႈၼၼ်ႉယင်းယဵတ်ႇယူႇဢေႃႈ။
၁၃ ၵူၺ်းၵႃႈၵူၼ်းတင်းလၢႆၼႆႉဢမ်ႇဝၢႆႇၶိုၼ်းမႃးၸူးၵႃႈတီႈမၼ်းၸဝ်ႈ ဢၼ်ပၼ်တၢမ်ႇတီႈၶဝ်။ဢမ်ႇၸၢင်ႊသွၵ်ႈၸၢင်ႊႁႃၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး။
၁၄ ပိူဝ်ႈၼႆလႄႈထႃႇဝရႃႉၽြႃးၼၼ်ႉတၵ်းတႅပ်းၵွၵ်းႁူဝ်တင်းႁၢင်တူၼ်ႈထၼ်း တင်းတူၼ်ႈၶဵၼ်းၶၢတ်ႇပႅတ်ႈသေၵႃႈတီႈမဵဝ်းဢိသရေႇလ ၼႂ်းဝၼ်းလဵဝ်ၼၼ်ႉၵူၺ်းဢေႃႈ။
၁၅ ၵွၵ်းႁူဝ်ၸမ်းပဵၼ်ၵေႃႉဢၼ်ဢသၢၵ်ႈယႂ်ႇဢိၵ်ႇတင်းၵေႃႉဢၼ်မီးသရေႇလႄႈႁၢင်ၸမ်း
၁၆ ပဵၼ်ပရေႃးၽႅတ်ႈဢၼ်ႁေႃးလၢတ်ႈမုသႃႇဢေႃႈ။ၶဝ်ၸိူဝ်းၼၼ်ႉ ၼႄပျႃႉသဵၼ်ႈတၢင်းတီႈၵူၼ်းတင်းလၢႆႁႂ်ႈၶဝ်ၽိတ်းပိူင်ႈတၢင်းလႄႈ ၶဝ်ၸိူဝ်းဢၼ်ၸွမ်းၶဝ်ၼၼ်ႉ
၁၇ တၵ်းႁွတ်ႈထိုင်တၢင်းလူႉတၢင်းလႅဝ်ဢေႃႈ။ပိူဝ်ႈၼႆလႄႈၸဝ်ႈၽြႃးဢမ်ႇၶိုတ်းၸႂ်ပဵင်းၸႂ် တီႈၵူၼ်းၼုမ်ႇၵူၼ်းၵမ်ၶဝ်ၼၼ်ႉ။ဢမ်ႇဢိတ်းလူလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မေႈ ဢိၵ်ႇတင်းမေႈမုၵ်ႉမေႈမၢႆႈၶဝ်ၼၼ်ႉ။လွင်ႈမၼ်းၸမ်း ၶဝ်တင်းသဵင်ႈတင်းလူင်ပဵၼ်ၵေႃႉဢၼ်ႁၢႆႉမိူၵ်ႈ၊ၵေႃႉဢၼ်ႁဵတ်းဢႃႉထမ်ႇမႃႉလႄႈ သူပ်းၶဝ်ၵူႈၵေႃႉၵူႈၵူၼ်း ၸၢင်ႊလၢတ်ႈၵႂၢမ်းဢၼ်ဢမ်ႇတြႃးဢေႃႈ။ၼႂ်းဝႃႈၼၼ်သေၵေႃႈ တၢင်းၸႂ်မႆႈၶႆႈၸႃႉမၼ်းၸဝ်ႈဢမ်ႇထၢတ်ႇဢမ်ႇယဵၼ်။ မိုဝ်းမၼ်းၸဝ်ႈၵေႃႈယင်း ယဵတ်ႇယူႇဢေႃႈ။
၁၈ တၢင်းဢၼ်ႁၢႆႉဢၼ်မိူၵ်ႈၼၼ်ႉၸၢင်ႊမႆႈၸိူဝ်ႈၼင်ႇၽႆးလႄႈတူၼ်ႈၼၢမ်ၵူႈၸိူဝ်ႉၵူႈမဵဝ်းမႆႉသုတ်းပႅတ်ႈဢေႃႈ။ ၽႆးၸပ်းယုမ်းထိူၼ်ႇတင်းလၢႆလႄႈ ၸိူဝ်းၼၼ်ႉပိဝ်ၶိုၼ်ႈလူၺ်ႈၵွၼ်းၽႆးဢၼ်ၼႃ တၼ်ၼႃႇၼၼ်ႉဢေႃႈ။
၁၉ ၵွပ်ႈပိူဝ်ႈတၢင်းၸႂ်မႆႈၶႆႈၸႃႉၸဝ်ႈပူဝ်ႇပႃႇၵၢင် ႁၢဝ်ထႃႇဝရႃႉၽြႃးၼၼ်ႉ လိၼ်ၼႆႉမႆႈသုတ်းပႅတ်ႈလႄႈၵူၼ်းတင်းလၢႆပဵၼ်ၽိုၼ်းပုၼ်ႈဢၼ်တၵ်းၸိုၵ်းၽႆးသုမ်ၽႆးဢေႃႈ။ပီႈၵၼ်ၼွင်ႉၵၼ် ၵေႃႉၼိုင်ႈတၵ်းဢမ်ႇလႆႈသေလၢႆၵေႃႉၼိုင်ႈ။
၂၀ ပိၵ်ႉသမ်ႉတႅပ်းၽၼ်းဢဝ်ၵႃႈတီႈၽၢႆႇၶႂႃသေၵေႃႈ တၵ်းဢိုပ်းယၢၵ်ႈယူႇလႄႈၶူပ်းငၢၼ်ႈၵႃႈတီႈၽၢႆႇသၢႆႉသေၵေႃႈတၵ်းဢမ်ႇလႆႈဢိမ်ႇလႆႈတဵမ်။ ၵူၼ်းၸၢႆးၵူႈၵေႃႉတၵ်းလႆႈၶူပ်းၵိၼ်ၼိူဝ်ႉၵူၼ်းႁိူၼ်းၸမ်ၵၼ်ဢေႃႈ။
၂၁ မဵဝ်းမၼႃႇသေႇတင်းမဵဝ်းဢေႇၽရိမ်ႇ၊မဵဝ်းဢေႇၽရိမ်ႇတင်း မဵဝ်းမၼႃႇသေႇတၵ်းၶူပ်းၵိၼ်ၵၼ်ဢေႃႈ။ တင်းသွင်မဵဝ်းၼၼ်ႉ တၵ်းၽွမ်ႉၵၼ် ယူႇၽၢႆႇၼိုင်ႈတင်းမဵဝ်းယုတဢေႃႈ။ၼႂ်းဝႃႈၼၼ်သေၵေႃႈတၢင်းၸႂ်မႆႈၶႆႈၸႃႉမၼ်းၸဝ်ႈဢမ်ႇထၢတ်ႇဢမ်ႇယဵၼ်။ မိုဝ်းမၼ်းၸဝ်ႈၵေႃႈယင်းယဵတ်ႇယူႇဢေႃႈ။