၆
တၢင်းဢၼ်ပွႆႇၸႂ်ႉဢိသႃႇယ
၁ ၼႂ်းပီႊဢၼ် ၶုၼ်ႁေႃၶမ်းဢုဝ်ႇၸိယႁွတ်ႈဢၼိၵ်ႈၸႃႉၼၼ်ႉၵဝ်ႁၼ်ထႃႇဝရႃႉၽြႃး ၼင်ႈယူႇၵႃႈၼိူဝ်ပလၢင်ႇဢၼ်သုင်မျၢတ်ႈၼႃႇလူင်လၢင်ၼၼ်ႉလႄႈ ၶိူင်ႈၶူဝ်းတၢင်းၼုင်ႈတၢင်းမႆႊႊမၼ်းၸဝ်ႈၼၼ်ႉ တဵမ်ဝႆႉၵႃႈၼႂ်း ပိၵ်ႉမၢၼ်ႇမၼ်းၸဝ်ႈၼၼ်ႉဢေႃႈ။
၂ တမၢၼ်ႇၵၢင်ႁၢဝ်သရပ်ႉ ဢွၼ်ၵၼ်ၸုၵ်းယူႇၵႃႈတီႈႁိမ်းႁွမ်းမၼ်းၸဝ်ႈဢေႃႈ။ၶဝ်ၼၼ်ႉယေႈပႃးမီးပိၵ်ႇႁူၵ်းဢၼ်လႄႈဢဝ်တင်းပိၵ်ႇသွင်ဢၼ်ႁူမ်ႇၼႃႈယူႇ၊ ဢဝ်တင်းပိၵ်ႇသွင်ဢၼ်ႁူမ်ႇတိၼ်ယူႇ၊ဢဝ်တင်းပိၵ်ႇသွင်ဢၼ်မိၼ် ယူႇဢေႃႈ။
၃ ၶဝ်ၼၼ်ႉပႃးၼိုင်ႈႁွင်ႉသႅၼ်ႇတီႈပႃးၼိုင်ႈလႄႈမွၵ်ႇလၢတ်ႈလႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမူတ်းၸၢင်ႇဢေႃႈ။မူတ်းၸၢင်ႇဢေႃႈ။မူတ်းၸၢင်ႇဢေႃႈ။ ႁူၺ်ႈလိၼ်မိူင်းတဵမ်ဝႆႉတင်းမူၼ်ႈၽုင်း မၼ်းၸဝ်ႈဢေႃႈ၊ဝႃႈၼင်ႇၼႆဢေႃႈ။
၄ သဝ်ၽၵ်းတူတင်းလၢႆသၼ်ႇၶွၼ်း ၵွပ်ႈပိူဝ်ႈသဵင်ၵေႃႉဢၼ်ႁွင်ႉသႅၼ်ႇၼၼ်ႉလႄႈ ႁိူၼ်းၸဝ်ႈတင်းႁိူၼ်းတဵမ်ဝႆႉတင်းၵွၼ်းၽႆး ဢေႃႈ။
၅ မိူဝ်ႈဢၼ်ၵဝ်လၢတ်ႈလႄႈဝႃႈ၊-ၵဝ်ၼႆႉမီးဢႃႉမၢင်ႇၵလႃႇဢေႃႈ။ၵဝ်မီးတၢင်းဢၼ်သုမ်းယဝ်ႉ။လွင်ႈမၼ်းၸမ်း ၵဝ်ပဵၼ်ၵေႃႉဢၼ်မီးသူပ်းဢၼ်ၵူဝ်ႈၵိူၵ်ႇလႄႈ ယူႇသဝ်းၵႃႈၼႂ်းၵူၼ်းမဵဝ်းဢၼ်မီးသူပ်းဢၼ်ၵူဝ်ႈၵိူၵ်ႇၼၼ်ႉယူႇသေလႄႈ ဢဝ်တင်းမၢၵ်ႇတႃၵဝ်လႆႈႁၼ်ၶုၼ်ႁေႃၶမ်းဢၼ်ဝႃႈ ၸဝ်ႈပူဝ်ႇပႃႇၵၢင်ႁၢဝ်ထႃႇ ဝရႃႉၽြႃးၼၼ်ႉယဝ်ႉလူင်ပေႇ၊ဝႃႈၼင်ႇၼႆဢေႃႈ။
၆ မိူဝ်ႈၼၼ်ႉတမၢၼ်ႇၵၢင်ႁၢဝ်သရပ်ႉ ပႃးၼိုင်ႈဢဝ်မိုဝ်းမၼ်းယိပ်းၵမ်ဢဝ်ထၢၼ်ႇၽႆးထၢၼ်ႇၼိုင်ႈ ဢၼ်ဢဝ်တင်းၵိမ်းၵိပ်ႈဢဝ်ၵႃႈၼိူဝ်ယိတ်ႉပလၢင်ႇသေလႄႈ မိၼ်မႃးၸူးၵႃႈတီႈဢၼ်ၵဝ်မီးလႄႈ၊ ဢဝ်တမ်သႂ်ႇသူပ်းၵဝ်သေ ယဝ်ႉလၢတ်ႈဝႃႈ၊-
၇ တူၺ်းလူ။ဢၼ်ၼႆႉတိူဝ်ႉထုၵ်ႇတီႈသူပ်းမႂ်းယဝ်ႉ။တူႉၸရိူၵ်ႈမႂ်းလႆႈၶၢမ်ႇတၢင်းဢၼ်ၽဵဝ်ႈပႅတ်ႈလႄႈ ဢပျႅတ်ႈမႂ်းၵေႃႈလႆႈၶၢမ်ႇတၢင်းဢၼ်ပျေႇမူတ်းပႅတ်ႈယဝ်ႉ၊ဝႃႈၼင်ႇၼႆဢေႃႈ။
၈ ၵဝ်ငိၼ်းသဵင်ဢၼ်ထႃႇဝရႃႉၽြႃးထၢမ်လႄဝႃႈ၊-ၵဝ်တၵ်းလႆႈပွႆႇၸႂ်ႉၽူႈ လႂ်။ၽူႈ လႂ်တၵ်းၵႂႃႇပုၼ်ႈႁဝ်း၊ဝႃႈၼင်ႇၼႆသေယဝ်ႉၵဝ်လဝ်ႈလၢတ်ႈလႄႈဝႃႈ၊-ၶႃႈၸဝ်ႈမီးယူႇတီႈၶႃႈဢေႃႈ။ပွႆႇၸႂ်ႉၶႃႈၸဝ်ႈသေၵမ်းတီႈၶႃႈ၊ ဝႃႈၼင်ႇၼႆဢေႃႈ။
၉ မၼ်းၸဝ်ႈၵေႃႈမီးဢမိင်ႉလႄႈဝႃႈ၊-ၵႂႃႇလႄႈလၢတ်ႈတီႈၵူၼ်းမဵဝ်းၼၼ်ႉလႄႈဝႃႈ၊-သူငိၼ်းယူႇသေၵေႃႈ တၵ်းငိၼ်းတၢင်းဢမ်ႇႁူႉဢမ်ႇၸႅင်ႈဢေႃႈ။ႁၼ်ယူႇသေၵေႃႈတၵ်းႁၼ်တၢင်းဢမ်ႇမၢတ်ႈ ဢမ်ႇတွင်းဢေႃႈ၊ဝႃႈၼင်ႇတႃႉ။
၁၀ ၵွပ်ႈပိူဝ်ႈဢၼ်ၵူဝ်မၢၵ်ႇတႃၶဝ်တၵ်းႁၼ်၊ ႁူၶဝ်တၵ်းငိၼ်း၊ႁူဝ်ၸႂ်ၶဝ်တၵ်းႁူႉၸႅင်ႈ၊တၢင်းၵျၢမ်ႇတၢင်းပွင်ၶဝ်တၵ်းၶၢႆႉပုတ်ႈလႄႈတၢင်းၶႆႈတၢင်းပဵၼ်ၶဝ်တၵ်းႁၢႆၼၼ်ႉ ႁဵတ်းႁႂ်ႈႁူဝ်ၸႂ်ၶဝ်ၼၵ်းၼႃတႃႉ။ႁူၶဝ်ၵေႃႈႁႂ်ႈၼၵ်းတႃႉ။မၢၵ်ႇတႃၶဝ်ၵေႃႈ ႁႂ်ႈဢိုတ်းဝႆႉတႃႉ၊ဝႃႈၼင်ႇၼႆဢေႃႈ။
၁၁ ၵဝ်ၶိုၼ်းလဝ်ႈထၢမ်လႄႈဝႃႈ၊-ထႃႇဝရႃႉၽြႃးတီႈၶႃႈ၊တၵ်းႁိုင်ၵႃႈႁိုဝ်ၶႃႈ၊ဝႃႈၼင်ႇၼႆသေယဝ်ႉမၼ်းၸဝ်ႈမီးဢမိင်ႉလႄႈဝႃႈ၊-တေႃႇထိုင်ႁွတ်ႈထၼ်ႈပေႃး ဝဵင်းတင်းလၢႆဢမ်ႇမီးၵေႃႉၼ် ယူႇဢၼ်သဝ်း၊ႁိူၼ်းတင်းလၢႆဢမ်ႇမီးၽူႈမီးၵူၼ်းလႄႈ
၁၂ ႁွတ်ႈထိုင်တၢင်းလူႉတၢင်းလႅဝ်သေလႄႈ မိူင်းတင်းမိူင်းပဵၼ်ဢၼ်သိတ်ႈယဵၼ်ဝႆႉၵူၺ်းၵူၺ်း၊ ဢိၵ်ႇတင်းတေႃႇထိုင်ႁွတ်ႈထႃႇဝရႃႉၽြႃး ဢဝ်ၵူၼ်းတင်းလၢႆၵႂႃႇၵႃႈတီႈဢၼ်ၵႆၼၼ်ႉလႄႈတီႈဢၼ်ၸုၼ်ႉပႅတ်ႈမီးၼမ်ၼႃႇၵႃႈၼႂ်းမိူင်းၸဝ်ႈၼၼ်ႉဢေႃႈ။
၁၃ ပိၵ်ႉသမ်ႉသိပ်းပုၼ်ႈယင်းၵိုတ်းယင်းၵျၢၼ်ႇဝႆႉ ပုၼ်ႈၼိုင်ႈသေၵေႃႈ ဢၼ်ၼၼ်ႉတၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပ်တ်ႈၶိူဝ်းၶိူဝ်းယႂ်းယႂ်းဢေႃႈ။ ၼႂ်းဝႃႈၼၼ်သေၵေႃႈၸိူဝ်ႉၼင်ႇဢၼ် ၽၼ်းတူၼ်ႈမႆႉပႅၵ်ႇတင်းတူၼ်ႈမႆႉၼိမ်လူမ်ႉပႅတ်ႈသေလႄႈ တေႃမၼ်းၵိုတ်းၵျၢၼ်ႇဝႆႉယူႇၼၼ်ႉၸိူဝ်ႉၶိူဝ်းဢၼ်မူတ်းၸၢင်ႇၼၼ်ႉ တၵ်းပဵၼ်တေႃဢၼ်ၵိုတ်းၵျၢၼ်ႇဝႆႉယူႇဢေႃႈ၊ဝႃႈၼင်ႇၼႆဢေႃႈ။