၄၉
ၼုၵ်ႉၵပၢတ်ႈၸဝ်ႈ လူၺ်ႈလွင်ႈမိူင်းဢမ်ႇမုၼ်ႇ
၁ ထႃႇဝရႃႉၽြႃး ဢဝ်လွင်ႈၵူၼ်းမဵဝ်းဢမ်ႇမုၼ်ႇတင်းလၢႆသေလႄႈမီးဢမိင်ႉၸမ်း၊-ဢိသရေႇလၼၼ်ႉဢမ်ႇမီးလုၵ်ႈၸၢႆးႁိုဝ်။ဢမ်ႇမီးၵေႃႉဢၼ်ၶၢမ်ႇဢမူၺ်ႇႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၽြႃးမႃႇလၶၢမ်ႇသိမ်းဢဝ်မိူင်းၵတ်ႉလႄႈ ၵူၼ်းမၼ်းတင်းလၢႆဢွၼ်ၵၼ်ယူႇၵႃႈ ၼႂ်းမိူင်းၼၼ်ႉၼင်ႇႁိုဝ်။
၂ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊-မိူဝ်ႉဝၼ်းဢၼ်ၵဝ်တၵ်းႁႂ်ႈငိၼ်းသဵင်တၢင်းဢၼ်တိုၵ်းၵၼ်တင်းဝဵင်းရပ်ႉပႃႇ တီႈယူႇၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉတၵ်းႁွတ်ႈထိုင်ဢေႃႈ။ဝဵင်းၼၼ်ႉ ပဵၼ်ပူမ်ပဵၼ်ၵွင်းတီႈဢၼ်ပဝ်ႇဢၼ်လၢပ်ႈလႄႈလုၵ်ႈယိင်းမၼ်းတင်းလၢႆ တၵ်းလႆႈၶၢမ်ႇတၢင်းဢၼ်ဢဝ်ၽႆးတုတ်ႇၽႆးမႆႈဢေႃႈ။မိူဝ်ႈၼၼ်ႉမဵဝ်းဢိသရေႇလ သမ်ႉတၵ်းလႆႈၶိုၼ်းသိမ်းဢဝ် ဢုပ်ႉပိူင်ႇၶဝ်ၸိူဝ်းဢၼ်သိမ်းဢဝ်ဢုပ်ႉပိူင်ႇမၼ်းၼၼ်ႉဢေႃႈ၊ ဝႃႈၼင်ႇ ၼႆထႃႇဝရႃႉၽြႃးမီးဢမိင်ႉဢေႃႈ။
၃ ဝဵင်းႁေႇသၽုၼ်ႇဢိူၺ်း။ႁွင်ႉႁႆႈပွင်ႉၶင်းတႃႉ။ ဝဵင်းဢႃႇဢိ လူႉလႅဝ်ယဝ်ႉ။လုၵ်ႈယိင်းဝဵင်းရပ်ႉပႃႇ ၶဝ်ဢိူၺ်းဢွၼ်ၵၼ်ႁႆႈႁွင်ႉလႄႈၼုင်ႈၶူဝ်းၼုင်ႈၼင်ပေႃယူႇတႃႉ။ ဢွၼ်ၵၼ်ပွင်ႉၶင်းပွင်ႉမိူၼ်ႇယူႇသေလႄႈ လႅၼ်ႈၵႂႃႇလႅၼ်ႈမႃးၵႃႈတီႈႁိမ်းႁူဝ်ႁိမ်းဝၢင်းတႃႉ။လွင်ႈမၼ်းၸမ်းၽြႃးမႃႇလၶမ်ႇၼၼ်ႉလႆႈၶၢမ်ႇတၢင်းဢၼ် သိမ်းဢဝ်ၵႂႃႇလူၺ်ႈၵၼ်တင်းယိတ်ႉပရေႃးႁိၵ်ႈမၼ်း တင်းၶုၼ်မၼ်းတင်းလၢႆယဝ်ႉ။
၄ လုၵ်ႈယိင်းဢၼ်ၽွၵ်ႈပျၢၼ်ႇၶိုုၼ်းလႄႈဢိင်ပိုင်ႈၸေးၸိမ်ႇ တူဝ်ၸဝ်ႈၵဝ်ႇယူႇသေလႄႈ လၢတ်ႈလႄႈဝႃႈၽူႈ လႂ်တၵ်းႁွတ်ႈထိုင်ၵႃႈတီႈၵဝ်လႆႈဝႃႈၼင်ႇၼႆၼၼ်ႉဢိူၺ်း ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢုပ်ႇဢၢတ်ႇယူႇ ၵႃႈၼႂ်းပၢင်ႇႁူၺ်ႈမႂ်းတင်းလၢႆၵႃႈၼႂ်းပၢင်ႇႁူၺ်ႈမႂ်း ဢၼ်ပဵၼ်တီႈဢၼ်လိူတ်ႈလႆၵႂႃႇၼၼ်ႉ။ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉၸမ်း၊-
၅ တူၺ်းလူ။ၵဝ်တၵ်းႁႂ်ႈတၢင်းဢၼ်လီၵူဝ်လီႁႄႁွတ်ႈထိုင်တီႈမႂ်း ၵွပ်ႈပိူဝ်ႈၶဝ်ၸိူဝ်းဢၼ်ယူႇၵႃႈတီႈႁိမ်းႁွမ်းလဵပ်ႈႁွပ်ႈမႂ်းၼၼ်ႉဢေႃႈ။သူၵႃႈမီးတၵ်းလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈႁင်းၽႂ်ႁင်းမၼ်းလႄႈ ဢမ်ႇလႆႈမီးၵေႃႉဢၼ် ႁႂ်ႈၶဝ်ၸိူဝ်းဢၼ် ၽၢတ်ႇၽႄၵၼ်ၵႂႃႇ ၼၼ်ႉလႆႈၸူႉလႆႈတုမ်ၵၼ်။
၆ ၼႂ်းဝႃႈၼၼ်သေၵေႃႈၵမ်းလိုၼ်းၵဝ်တၵ်းဢဝ်ၵူၼ်းမဵဝ်း ဢမ်ႇမုၼ်ႇ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉ ၶိုၼ်းမႃးဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
ၼုၵ်ႉၵပၢတ်ႈၸဝ်ႈ လူၺ်ႈလွင်ႈမိူင်းဢေႇတုမ်ႇ
၇ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးဢဝ်လွင်ႈမိူင်းဢေႇတုမ်ႇ သေလႄႈမီးဢမိင်ႉၸမ်းပိင်ႇၺႃႇသဵင်ႈမူတ်းသေၵႃႈၼႂ်းမိူင်းတေႇမၼ်ႇယဝ်ႉႁိုဝ်။ ၵေႃႉဢၼ်မီးပိင်ႇၺႃႇသတိၼၼ်ႉ ဢမ်ႇပၼ်တၢင်းၵျၢမ်ႇတၢင်းပွင်လႆႈ ႁိုဝ်။
၈ ၺၢၼ်ႇၶဝ်ၼၼ်ႉႁၢႆလၢႆၵႂႃႇယဝ်ႉႁိုဝ်။ၵူၼ်းဝဵင်းတေႇတၼ်ႇၶဝ်ဢိူၺ်း။ဢွၼ်ၵၼ်ဢွၵ်ႇပၢႆႈလႄႈသုတ်ႉၶိုၼ်းယိုတ်းၶိုၼ်းသေလႄႈ ယူႇၵႃႈၼႂ်းတီႈဢၼ်လိုၵ်ႉဢၼ်လမ်ႇၼၼ်ႉတႃႉ။ ၵဝ်တၵ်းႁႂ်ႈၽေးဢၼ် ဢေးသေႃးထူပ်းၼၼ်ႉ ႁွတ်ႈထိုင်ၵႃႈၼိူဝ်မၼ်းၼႂ်းမိူဝ်ႈဢၼ်ၵဝ် သင်ႇသွၼ်သုင်းမႃႉမၼ်းၼၼ်ႉဢေႃႈ။
၉ ပေႃးၶဝ်ၸိူဝ်းဢၼ်ပိတ်းမၢၵ်ႇၸပိတ်ႈၼၼ်ႉ မႃးတီႈမႂ်းၸိုင်ၶဝ်တၵ်းဢွၼ်ၵၼ်ႁႂ်ႈၵိုတ်းၵျၢၼ်ႇဝႆႉ ပုၼ်ႈဢၼ်ပိူၼ်ႈတၵ်းၸွမ်းလႄႈၵဵပ်းဢဝ်ၼၼ်ႉဢမ်ႇၸႂ်ႈႁိုဝ်။ပေႃးၽူႈလၵ်ႉမႃးၶိင်ႇၵၢင်ၶိုၼ်းၸိုင် ၶဝ်တၵ်းႁိမ်ဢဝ်ႁူင်ႇဢဝ်ႁႂ်ႈထၼ်ႈပေႃး ပျေႇၸႂ်ၶဝ်ဢမ်ႇၸႂ်ႈႁိုဝ်။
၁၀ ၵဝ်တၵ်းထွတ်ႇၶူဝ်းၼုင်ႈဢေးသေႃး ပႅတ်ႈလႄႈ ၽုၺ်ႇပိုတ်ႇတီႈဢၼ်သိူင်ႇဢၼ်လပ်ႉမၼ်းၸိူဝ်းၼၼ်ႉ ထၼ်ႈပေႃး မၼ်းဢမ်ႇတဵတ်ႇဢမ်ႇမႅပ်းယူႇလႆႈဢေႃႈ။မဵဝ်းၸိူဝ်ႉၶိူဝ်းမၼ်းတၵ်းႁွတ်ႈထိုင်တၢင်းလူႉတၢင်းလႅဝ်လႄႈ ပီႈၼွင်ႉမၼ်းၵူၼ်းႁိူၼ်းၸမ်ၵၼ်တင်းမၼ်း ဢိၵ်ႇတင်းတူဝ်မၼ်းတၵ်း လႆႈႁၢႆၵႂႃႇဢေႃႈ။
၁၁ ဢဝ်လုၵ်ႈတိၼႃ်ႉမႂ်းၸိူဝ်းၼၼ်ႉၵိုတ်းၵျၢၼ်ႇဝႆႉတႃႉ။ၵဝ်တၵ်းပႂ်ႉၶဝ်ယူႇဢေႃႈ။ႁႂ်ႈမေႈမုၵ်ႉမေႈမၢႆႈမႂ်းၸိူဝ်းၼၼ်ႉ သွၼ်ႈပိုင်ႈၵဝ်ယူႇသေၵမ်းလူၺ်ႈ။
၁၂ ထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။ပေႃးၶဝ်ၸိူဝ်းဢၼ်ဢမ်ႇထိူၵ်ႈ သူတ်ႉၵိၼ်ၵွၵ်းဝၢၼ်ႇၸိူဝ်းၼၼ်ႉလႆႈသူတ်ႉၵိၼ်ဢမၢၼ်ႇၶၢၼ်ပဵၼ်ၸိုင် မႂ်းယင်းဢမ်ႇၶၢမ်ႇဢပျႅတ်ႈလႄႈ တၵ်းလႆႈလွတ်ႈမူတ်းမူတ်းသဵင်ႈသဵင်ႈႁိုဝ်။မႂ်းယင်းဢမ်ႇလႆႈၶၢမ်ႇတၢမ်ႇဢပျႅတ်ႈလႄႈဢမ်ႇလႆႈယူႇ။မႂ်းတၵ်းလႆႈသူတ်ႉၵိၼ်ဢမၢၼ်ႇၶၼ်ပဵၼ် ဢေႃႈ။
၁၃ ၵဝ်တၵ်းဢဝ်တူဝ်ၸဝ်ႈၵဝ်ႇတိူင်ႇဝႃႈၵိၼ်ႇဝႃႈလူၺ်ႈလွင်ႈဢၼ် မိူင်းပေႃႇၸရ တၵ်းလႆႈပဵၼ်တီႈဢၼ်လီဢၢမ်း၊တီႈဢၼ်သေႉသွမ်း၊တီႈဢၼ်သိတ်ႇၵူၼ်းယဵၼ်ၵူၼ်း၊တီႈဢၼ်ၵိၼ်ႇလႃႇၼၼ်ႉဢေႃႈ။ဝဵင်းမၼ်း ၵႃႈမီးတင်းသဵင်ႈတင်းလူင် တၵ်းလႆႈပဵၼ်တီႈဢၼ်ပဝ်ႇဢၼ်လၢပ်ႈယူႇသေဢေႃႈ၊ဝႃႈၼင်ႇၼႆထႃႇဝရႃႉ ၽြႃးမီးဢမိင်ႉဢေႃႈ။
၁၄ ၵဝ်ငိၼ်းသဵင်ဢၼ် ထႃႇဝရႃႉၽြႃး ပဝ်ႇသေႃႇလႄႈမၼ်းၸဝ်ႈပွႆႇၸႂ်ႉ သၢၼ်ႇတမၢၼ်ႇ ၸူးၵႃႈတီႈၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆလႄႈဝႃႈ၊-သူၸူႉၵၼ်တုမ်ၵၼ်သေလႄႈ ဢွၼ်ၵၼ်ၶီႇသိုၵ်းမႃးႁႂ်ႈလႆႈတိုၵ်း မၼ်းတႃႉ၊ဝႃႈၼင်ႇၼႆၼၼ်ႉယဝ်ႉ။
၁၅ တူၺ်းလူ။ၵဝ်တၵ်းႁဵတ်းႁႂ်ႈမႂ်းပဵၼ်ဢၼ်ယူတ်းဢၼ်ယွမ်းၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ ဢိၵ်ႇတင်းႁႂ်ႈမႂ်းလႆႈၶၢမ်ႇတၢင်းဢၼ်ၶျႃးတုၵ်းတီႈတႅမ်ႇ ၵႃႈၼႂ်းၵူၼ်းတင်း လၢႆဢေႃႈ။
၁၆ မႂ်းဢၼ်ယူႇၵႃႈၼႂ်းၵႄႈမၢၵ်ႇႁိၼ်မၢၵ်ႇၽႃလႄႈသွၼ်ႈပိုင်ႈၸိၵ်းလွႆပၢႆလွႆၼႆႉဢူၺ်း လွင်ႈတၢင်းဢၼ်လီၵူဝ်လီႁႄမႂ်း၊ မႃႇၼႃႉမႂ်းၼၼ်ႉပႅတ်ႉလႅၼ်မႂ်းယဝ်ႉ။ပိၵ်ႉသမ်ႉမႂ်းႁဵတ်းႁၢင်ႊမႂ်းယူႇ ၵႃႈတီႈဢၼ်သုင်မိူၼ်ၸိူဝ်ႉၼင်ႇႁူင်ႉၶမ်းၼၼ်ႉသေၵေႃႈ ၵဝ်တၵ်းၶျႃးမႂ်းတုၵ်းသေၵႃႈတီႈၼၼ်ႉဢေႃႈ၊ဝႃႈၼင်ႇၼႆ ထႃႇဝရႃႉၽြႃးမီး ဢမိင်ႉဢေႃႈ။
၁၇ မိူင်းဢေႇတုမ်ႇတၵ်းပဵၼ်တီႈဢၼ်လီဢၢမ်းလႄႈ ၵႃႈပဵၼ်ၵေႃႉဢၼ်တႆႇတၢင်းပႆတၢင်းၵႆၵႂႃႇၵႃႈတီႈၼၼ်ႉၸိူဝ်းၼၼ်ႉ တၵ်းဢွၼ်ၵၼ်ဢၢမ်းလႄႈႁဵတ်းသဵင်သီႉသီႉသေႃႉသေႃႉ သေႉသွမ်းၵွပ်ႈပိူဝ်ႈၽေးဢူးပၢတ်ႈ ဢၼ်မၼ်းလႆႈၶၢမ်ႇတင်းသဵင်ႈတင်းလူင်ၼၼ်ႉဢေႃႈ။
၁၈ မိူၼ်ၸိူဝ်ႉၼင်ႇဢၼ်ပဵၼ်ၼႂ်းတၢင်းဢၼ်ဝဵင်းသေႃးတုမ်ႇ ဢိၵ်ႇတင်း ဝဵင်းၵေႃႇမေႃးရ တင်းဝဵင်းဢၼ်မီးၸပ်းမီးၸမ် ၵၼ်တင်းမၼ်းၸိူဝ်းၼၼ်ႉလူႉလႅဝ်ၼၼ်ႉလႄႈ ၽူႈ လႂ်ဢမ်ႇလႆႈယူႇလႆႈသဝ်းၵႃႈတီႈၼၼ်ႉသေၵေႃႉသေၵူၼ်း။လုၵ်ႈၵူၼ်းသေၵေႃႉသေၵူၼ်းဢမ်ႇလႆႈတုၵ်းတီႈယူႇတီႈသဝ်းၵႃႈၼႂ်းမၼ်း၊ ဝႃႈၼင်ႇ ၼႆထႃႇဝရႃႉၽြႃးမီးဢမိင်ႉဢေႃႈ။
၁၉ တူၺ်းလူ။မၼ်းၼၼ်ႉ တၵ်းၶိုၼ်ႈၸူးၵႃႈတီႈတီႈယူႇဢၼ်မၼ်းၶိုၼ်းမိူၼ်ၸိူဝ်ႉၼင်ႇသၢင်ႇသီႈ လုၵ်ႉသေၵႃႈတီႈၵုင်ႇသရေႇၼမ်ႉႁွင်ႊယေႃႇတၢၼ်ႇ ၶိုၼ်ႈၼၼ်ႉလႄႈၵဝ်တၵ်းႁဵတ်းႁႂ်ႈမၼ်းၼၼ်ႉဢွၵ်ႇပၢႆႈဢေႃႈ။ၵေႃႉဢၼ်လိူၵ်ႈၵဵပ်းဢဝ်ဢၼ်ဝႃႈ ၵေႃႉဢၼ်ၵဝ်တၵ်းၶၢၼ်းဝႆႉ ၵႃႈၼိူဝ်မၼ်းၼၼ်ႉပဵၼ်ၽူႈ လႂ်။ၽူႈ လႂ်တၵ်းမိူၼ်ၵၼ်တင်းၵဝ်။ၽူႈ လႂ်တၵ်းမၵ်းၶၢၼ်းၶိင်ႇမိူဝ်ႈဝႆႉတီႈၵဝ်။ ၵေႃႉဢၼ်လဵင်ႉသူဝ်းထိင်းသူဝ်းဢၼ်ၸိူဝ်ႉၼင်ႇႁိုဝ်ၼၼ်ႉ တၵ်းၸုၵ်းယူႇၵႃႈတီႈၽၢႆႇၼႃႈၵဝ်။
၂၀ ၵွပ်ႈပိူဝ်ႈဢၼ်ပဵၼ်ၼင်ႇၼႆလႄႈ ဢွၼ်ၵၼ်ထွမ်ငိၼ်းတၢင်းၵျၢမ်ႇတၢင်းပွင်ဢၼ်ထႃႇဝရႃႉၽြႃး ၵျၢမ်ႇပွင်ယူႇၽၢႆႇၼိုင်ႈတင်းမိူင်းဢေႇတုမ်ႇ၊ တၢင်းၵျၢမ်ႇတၢင်းပွင်ဢၼ်မၼ်းၸဝ်ႈၵျၢမ်ႇပွင်ယူႇ ၽၢႆႇၼိုင်ႈတင်းၵူၼ်းမိူင်းမၼ်းတင်းလၢႆၼၼ်ႉတႃႉ။ၶဝ်ၼၼ်ႉတၵ်းတိုတ်ႉၸၼ်ဢဝ်ၶဝ်ဢၼ်ဝႃႈသူဝ်းဢၼ်ႁႅင်းလဵၵ်ႉသေပိူၼ်ႈၸိူဝ်းၼၼ်ႉဢမၢၼ်ႇၶၼ်ပဵၼ်ဢေႃႈ။မၼ်းတၵ်းမႃးတီႈဢၼ်ၶဝ်မီးၼၼ်ႉလႄႈ ႁဵတ်းႁႂ်ႈတီႈဢၼ်ၶဝ်ယၢမ်ႈၵိၼ်ယူႇၼၼ်ႉ ပဵၼ်ဢၼ်ပဝ်ႇဢၼ်လၢပ်ႈၵႂႃႇဢေႃႈ။
၂၁ လိၼ်မိူင်းသၼ်ႇဝႆ ၵွပ်ႈပိူဝ်ႈ သဵင်ဢၼ်ၶဝ်ၵိူၼ်ႇလူမ်ႉၼၼ်ႉလႄႈ သဵင်ဢၼ်ၶဝ်သႅၼ်ႇႁွင်ႉၼၼ်ႉလႆႈငိၼ်းၵႂႃႇတေႃႇထိုင်ႁွတ်ႈပၢင်ႇလၢႆႇဢေႇတုမ်ႇဢေႃႈ။
၂၂ တူၺ်းလူ။ မၼ်းၼၼ်ႉတၵ်းၶိုၼ်ႈလႄႈမိၼ်ယူႇၸိူဝ်ႉၼင်ႇႁူင်ႉၶမ်းၼၼ်ႉယူႇသေလႄႈ ၵီႈပိၵ်ႇမၼ်းမုင်းႁူမ်ႇဝဵင်းပေႃႇၸရ ဢေႃႈ။ၼႂ်းမိူဝ်ႉဝၼ်းၼၼ်ႉႁူဝ်ၸႂ်ႁူဝ်ႁၢၼ်ၵူၼ်းသိုၵ်းမိူင်းဢေႇတုမ်ႇ ၸိူဝ်းၼၼ်ႉတၵ်းပဵၼ်ၸိူဝ်ႉၼင်ႇႁူဝ်ၸႂ် မေႈယိင်းဢၼ်လႆႈၶၢမ်ႇ ဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉဢေႃႈ။
ၼုၵ်ႉၵပၢတ်ႈၸဝ်ႈလူၺ်ႈလွင်ႈမိူင်းထမ်ႇမသႅတ်ႉ
၂၃ ၵႂၢမ်းၸဝ်ႈ ဢၼ်ဢဝ်လွင်ႈဝဵင်းထမ်ႇမသႅတ်ႉသေလႄႈဝႃႈၸမ်း၊-ဝဵင်းႁႃႇမတ်ႉဢိၵ်ႇတင်းဝဵင်းဢႃႇပတ်ႉၸိူဝ်းၼၼ်ႉဢွၼ်ၵၼ်ဢူၵ်းဢၢႆ ၵွပ်ႈပိူဝ်ႈဢၼ်ငိၼ်းသတၢင်းသဵင်ၶၢဝ်ႇ ဢၼ်ဢမ်ႇလီၼၼ်ႉလႄႈ ၸိုမ်းယၢႆႈၵႂႃႇဢေႃႈ။မီးလွင်ႈဢၼ်လီမႆႈၸႂ်ၶီၸႂ်တီႈပၢင်ႇလၢႆႇၼၼ်ႉလႄႈဢမ်ႇႁွတ်ႈထိုင် တၢင်းဢၼ်တိတ်ႇလီၼိမ်လီ လႆႈ။
၂၄ ဝဵင်းထမ်ႇမသႅတ်ႉႁႅင်းဢူၼ်ႈႁႅင်းယွမ်းၵႂႃႇယဝ်ႉ။မၼ်းဝႆႉတူဝ်မၼ်းႁႂ်ႈလႆႈဢွၵ်ႇပၢႆႈယဝ်ႉ။တၢင်းဢၼ်သၼ်ႇဢၼ်ဝႆတီႈၵမ်ဢဝ်မၼ်းယဝ်ႉ။ မၼ်းလႆႈၶၢမ်ႇတုၵ်ႉၶႃႉတၢင်းၽၢၼ် ဢိၵ်ႇတင်းဝူၺ်ႇတၼႃႇဢၼ်ႁႅင်းယႂ်ႇၼႃႇၼၼ်ႉ မိူၼ်ၸိူဝ်ႉၼင်ႇမေႈယိင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉဢေႃႈ။
၂၅ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝဵင်းဢၼ်သႃႇႁူင်၊ ဝဵင်းဢၼ်ၵဝ်လီၸူမ်းသိူဝ်း ၼၼ်ႉဢမ်ႇလႆႈၵိုတ်းလႆႈၵျၢၼ်ႇဝႆႉ။
၂၆ ပိူဝ်ႈဢၼ်ပဵၼ်ၼင်ႇၼႆလႄႈ ၵူၼ်းၼုမ်ႇၵူၼ်းၵမ်မၼ်းတင်းလၢႆ တၵ်းလူမ်ႉတုၵ်းၵႃႈၼႂ်းသဵၼ်ႈတၢင်းမၼ်းတင်းလၢႆလႄႈ ၼႂ်းမိူဝ်ႉဝၼ်းၼၼ်ႉႁူဝ်ႁၢၼ်ၵူၼ်းသိုၵ်းမၼ်း တင်းသဵင်ႈတင်း လူင်ၼၼ်ႉတၵ်းသုမ်းတၵ်းၸွမ်းဢေႃႈ။
၂၇ ၵဝ်တၵ်းဢဝ်ႆးတုတ်ႇၵႃႈတီႈလမ်းဝဵင်းထမ်ႇမသႅတ်ႉလႄႈ ႁႂ်ႈမႆႈႁေႃၶမ်းပိၼ်ႇႁႃႇတတ်ႉ ၸိူဝ်းၼၼ်ႉဢေႃႈ၊ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။
၂၈ ၼုၵ်ႉၵပၢတ်ႈၸဝ်ႈ လူၺ်ႈလွင်ႈမိူင်းၵေႇတႃႇ တင်းမိူင်းႁႃႇၸေႃႇၵႂၢမ်းၸဝ်ႈ ဢၼ်ဢဝ်လွင်ႈမိူင်း ၵေႇတႃႇဢိၵ်ႇတင်းမိူင်းႁႃႇၸေႃႇ ဢၼ်ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ် တိုၵ်းတေႃးယႃႉပႅတ်ႈၸိူဝ်းၼၼ်ႉလႄႈဝႃႈၸမ်း၊- ထႃႇဝရႃႉၽြႃးမီးဢမိင်ႉလႄႈဝႃႈ၊-ဢွၼ်ၵၼ်လုၵ်ႉလႄႈၶီႇၸူးၵႃႈတီႈမိူင်းၵေႇတႃႇသေလႄႈ ႁိမ်ဢဝ်ႁူင်ႇဢဝ်ၵူၼ်းဢၼ်ယူႇၵႃႈတီႈၼႃႈ ဝၼ်းဢွၵ်ႇၸိူဝ်းၼၼ်ႉတႃႉ။
၂၉ တၵ်းလႆႈဢွၼ်ၵၼ်သိမ်းဢဝ်သုမ်ႉထဵင်ၶဝ် ဢိၵ်ႇတင်းၽုင်သူဝ်းၶဝ်လႄႈ ဢဝ်ၽႃႈၵင်ႈၶဝ်၊ၶိူင်ႈယိပ်းၶိူင်ႈၵႅမ်းၶဝ်၊ ၵလႃႈဢုၵ်ႉၶဝ်ၸိူဝ်းၼၼ်ႉၵႂႃႇပုၼ်ႈတူဝ်ၸဝ်ႈၵဝ်ႇဢေႃႈ။ တၵ်းလႆႈဢွၼ်ၵၼ်ႁွင်ႉပၢဝ်ႇႁွင်ႉသေႃႇလႄႈဝႃႈ၊-တၢင်းဢၼ်လီၵူဝ်လီႁႄမီးလဵပ်ႈႁွပ်ႈဝႆႉယူႇၵူႈၽၢႆႇၵူႈပႃႈဢေႃႈ၊ဝႃႈၼင်ႇ ၼႆဢေႃႈ။
၃၀ ထႃႇဝရႃႉၽြႃးမီးဢမိင်ႉၸမ်း၊-ၵူၼ်းဢၼ်ယူႇၵႃႈတီႈမိူင်းႁႃႇၸေႃႇၶဝ်ဢိူၺ်း။ဢွၼ်ၵၼ်ဢွၵ်ႇပၢႆႈလႄႈၵႂႃႇၵႆၵႆသေလႄႈ ယူႇၵႃႈၼႂ်းတီႈဢၼ်လိုၵ်ႉဢၼ်လမ်ႇတႃႉ။ ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇၼၼ်ႉ ၵျၢမ်ႇပွင်တၢင်းၵျၢမ်ႇတၢင်းပွင်ယူႇၽၢႆႇၼိုင်ႈတင်းမႂ်းလႄႈ ဢၢင်ႈတၵ်းႁဵတ်းဢမူႉယူႇၽၢႆႇၼိုင်ႈ တင်းမႂ်းဢေႃႈ။
၃၁ ထႃႇဝရႃႉၽြႃးမီးဢမိင်ႉၸမ်း၊-ဢွၼ်ၵၼ်လုၵ်ႉလႄႈ ၶိုၼ်ႈၸူးၵႃႈတီႈၵူၼ်းမဵဝ်းဢၼ်ၼိမ်ၼိမ်လီလီလႄႈ ဢမ်ႇမီးတၢင်းဢၼ်မႆႈၸႂ်ၶီၸႂ်ဢၼ်ဢမ်ႇၸၢင်ႊသုင်းတိုဝ်းၽၵ်းတူဝဵင်း ဢိၵ်ႇတင်းၵိူၼ်ႇၽၵ်းတူဢၼ်ယူႇၶေႃၶေႃၵူၺ်းၶဝ်ၼၼ်ႉတႃႉ။
၃၂ ၵလႃႈဢုၵ်ႉၶဝ်တင်းလၢႆ တၵ်းပဵၼ်တီႈဢၼ်ႁိမ်ဢဝ်ႁူင်ႇဢဝ်လႄႈ တရိၵ်ႈသၢၼ်ႇၶဝ်ဢၼ်ၼမ်ၼႃႇၼၼ်ႉတၵ်းပဵၼ်တီႈဢၼ်တီႉလႆႈသိမ်းဢဝ်ဢေႃႈ။ၵဝ်တၵ်းဢဝ်ၵူၼ်းမဵဝ်း ဢၼ်ၸၢင်ႊထႃၼူတ်ႇၵႅမ်ႈၼူတ်ႇၵၢင်းၸိူဝ်းၼၼ်ႉ ၸၢတ်ႇပိုၼ်သႂ်ႇ ၵႃႈတီႈလူမ်းၵူႈၽၢႆႇၵူႈပႃႈလႄႈၵဝ်တၵ်းႁႂ်ႈၽေးဢူးပၢတ်ႈလုၵ်ႉသေ ၵႃႈတီႈၵူႈတီႈၵူႈလႅၼ်ႁွတ်ႈထိုင်ၵႃႈၼိူဝ်ၶဝ်ဢေႃႈ၊ ဝႃႈၼင်ႇ ၼႆထႃႇဝရႃႉၽြႃးမီးဢမိင်ႉဢေႃႈ။
၃၃ မိူင်းႁႃႇၸေႃႇၼၼ်ႉတၵ်းလႆႈပဵၼ်တီႈယူႇမႃလိၼ်၊ တီႈဢၼ်သိတ်ႇၵူၼ်းယဵၼ်ၵူၼ်းယူႇသေလႄႈၽူႈ လႂ်သေၵေႃႉသေၵူၼ်းဢမ်ႇလႆႈယူႇလႆႈသဝ်းၵႃႈတီႈၼၼ်ႉ။ လုၵ်ႈၵူၼ်းသေၵေႃႉသေ ၵူၼ်းဢမ်ႇလႆႈတုၵ်းတီႈတုၵ်းလႅၼ်ၵႃႈၼႂ်းမၼ်း။
ၼုၵ်ႉၵပၢတ်ႈၸဝ်ႈလူၺ်ႈလွင်ႈမိူင်းဢေႇလမ်ႇ
၃၄ ၼုၵ်ႈၵပၢတ်ႈထႃႇဝရႃႉၽြႃး ဢၼ်ဢဝ်လွင်ႈမိူင်းဢေႇလမ်ႇသေလႄႈ ႁွတ်ႈမႃးတီႈပရေႃးၽိတ်ႈယေႇရမိၼႂ်းမိူဝ်ႈဢၼ်ၸေႇတၵိၶုၼ်ႁေႃၶမ်းယုတၸၢမ်ႇႁၢင်ႈ ၸၢမ်ႇႁေႃၼၼ်ႉၸမ်း၊-
၃၅ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလႄႈဝႃႈ၊-တူၺ်းလူ။ၵဝ်တၵ်းႁၵ်းႁိၵ်းၵၢင်ႇဢေႇတုမ်ႇ ဢၼ်ဝႃႈ ဢၼ်ထွတ်ႈဢၼ်မျၢတ်ႈတၢင်းၵတ်ႉတၢင်း ၶၼ်မၼ်းၼၼ်ႉပႅတ်ႈသေဢေႃႈ။
၃၆ ၵဝ်တၵ်းဢဝ်လူမ်းသီႇမဵဝ်း ၵႃႈတီႈသီႇၼႃႈၵၢင်ႁၢဝ်ၸိူဝ်းၼၼ်ႉမႃးတီႈမိူင်းဢေႇလမ်ႇ လႄႈၵဝ်တၵ်းဢဝ်ၵူၼ်းဝၢၼ်ႈၵူၼ်းမိူင်းတင်းလၢႆၸၢတ်ႇပိုၼ်ပႅတ်ႈၵႃႈၼႂ်းလူမ်းၵႃႈမီးၼၼ်ႉဢေႃႈ။သိုင်ႇၸိုင်ႈဝၢၼ်ႈမိူင်းဢၼ်ၵူၼ်းဢေႇလမ်ႇ ဢမ်ႇလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈၸိူဝ်းၼၼ်ႉဢမ်ႇႁွတ်ႈဢမ်ႇထိုင်ၼၼ်ႉဢမ်ႇလႆႈမီးသေသိုင်ႇသေမိူင်း။
၃၇ ၵဝ်တၵ်းႁႂ်ႈၵူၼ်းမိူင်းဢေႇလမ်ႇ ၸိူဝ်းၼၼ်ႉၵူဝ်ႁႄၵႃႈတီႈၽၢႆႇၼႃႈရၼ်ႇသူႇၶဝ်တင်းလၢႆဢိၵ်ႇတင်းၵႃႈတီႈ ၽၢႆႇၼႃႈၶဝ်ၸိူဝ်းဢၼ်ႁႃဢဝ်ဢသၢၵ်ႈၶဝ်ၼၼ်ႉလႄႈ ႁႂ်ႈၽေးဢူးပၢတ်ႈဢၼ်ဝႃႈ တၢင်းၸႂ်မႆႈၶႆႈၸႃႉၵဝ် ဢၼ်ႁႅင်းယႂ်ႇၼႃႇၼၼ်ႉႁွတ်ႈထိုင်ၵႃႈၼိူဝ်ၶဝ်ဢေႃႈ။ၵဝ်တၵ်းပွႆႇလၢပ်ႇပွႆႇလႅဝ်းလိုပ်ႈၸွမ်းလမ်းၸွမ်းၶဝ် တေႃႇထိုင်ႁွတ်ႈထၼ်ႈပေႃးယႃႉၶဝ်ပႅတ်ႈမူတ်းမူတ်းသဵင်ႈသဵင်ႈၼၼ်ႉဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၃၈ ၵဝ်တၵ်းတႄႇႁဵတ်းပလၢင်ႇၵဝ်ဝႆႉၵႃႈၼႂ်းမိူင်းဢေႇလမ်ႇ လႄႈယူႇၵႃႈတီႈၼၼ်ႉသေလႄႈပႄႇၽဵဝ်ႈၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းတင်းလၢႆပႅတ်ႈဢေႃႈ၊ ဝႃႈ ၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၃၉ ၼႂ်းဝႃႈၼၼ်သေၵေႃႈ ၶိင်ႇၵႃႇလႃႉ မိူဝ်ႉဝၼ်းၵမ်းလိုၼ်းၼၼ်ႉၵဝ်တၵ်းဢဝ်ၵူၼ်းမဵဝ်းဢေႇလမ်ႇ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉၶိုၼ်းမႃးဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။