၄၇
ၼုၵ်ႉၵပၢတ်ႈၸဝ်ႈလူၺ်ႈလွင်ႈၽိလိတ်ႉတိ
၁ ၼုၵ်ႈၵပၢတ်ႈထႃႇဝရႃႉၽြႃး ဢၼ်ဢဝ်လွင်ႈမဵဝ်းၽိလိတ်ႉတိသေလႄႈ ႁွတ်ႈမႃးတီႈပရေႃးၽိတ်ႈယေႇရမိၸူဝ်ႈဢၼ်ၶုၼ်ၽႃႇရေႃးဢမ်ႇပႆႇတိုၵ်းတေႃးယႃႉပႅတ်ႈဝဵင်းၵႃႇၸ ၼၼ်ႉၸမ်းထႃႇဝရႃႉၽြႃးမီးဢမိင်ႉ လႄႈဝႃႈ၊-
၂ တူၺ်းလူ။ၼမ်ႉလုၵ်ႈၵႃႈတီႈတၢင်းႁွင်ႇမႃးလႄႈပဵၼ်ပၢင်ႇလၢႆႇ ဢၼ်ထူမ်ႈႁူမ်ႇယူႇသေလႄႈထူမ်ႈႁူမ်ႇမိူင်းတင်းမိူင်းဢိၵ်ႇတင်း ၵႃႈဢၼ်မီးၵႃႈၼႂ်းမၼ်းတင်းၶဝ်ၸိူဝ်းဢၼ်ယူႇၵႃႈၼႂ်းမၼ်းလႄႈ ၶဝ်ၼၼ်ႉတၵ်းဢွၼ်ၵၼ်သႅၼ်ႇႁွင်ႉလႄႈ ၵူၼ်းဝၢၼ်ႈၵူၼ်းမိူင်း ၵႃႈမီးတၵ်းဢွၼ်ၵၼ်ပွင်ႉၶၢင်းပွင်ႉမိုၼ်ဢေႃႈ။
၃ ၵွပ်ႈပိူဝ်ႈသဵင်ၵိပ်ႇမႃႉႁူဝ်ႁၢၼ်ၵူၼ်းသိုၵ်းမၼ်းဢၼ်ႁႅင်းယႂ်ႇၼႃႇၸိူဝ်းၼၼ်ႉ ထိပ်ႇၽၢင်ႈၼၼ်ႉ ဢိၵ်ႇတင်းသဵင်လေႃႉရထႃးမေႃးလင်ဢိၵ်ႇတင်းမၢၵ်ႇလေႃႉရထႃးၶုၼ်ႇလႅၼ်ႈၼၼ်ႉလႄႈ ၶဝ်ၸိူဝ်းဢၼ်ပဵၼ်ပေႃႈၼၼ်ႉႁႅင်းမိုဝ်းဢူၼ်ႈၵႂႃႇလႄႈ ဢမ်ႇဢွၼ်ၵၼ်ဝၢႆႇၶိုၼ်းလူ တူၺ်းလုၵ်ႈၶဝ်လၢင်းၶဝ်။
၄ လွင်ႈမၼ်းၸမ်းမိူဝ်ႉဝၼ်းဢၼ်လႆႈႁိမ်ႁူင်ႇဢဝ်ၵူၼ်းမဵဝ်းၽိလိတ်ႉတိ တင်းသဵင်ႈတင်းလူင်မိူဝ်ႉဝၼ်းဢၼ်လႆႈပႄႇတႅပ်းပဵတ်ႈၶဝ်ၸိူဝ်းဢၼ်ၸွႆႈသိုၵ်းထႅမ်သိုၵ်းဝဵင်းတုရု၊ ဝဵင်းၸိတုမ်ႇဢၼ်ၵိုတ်းဢၼ်ၵျၢၼ်ႇၵႃႈမီးၼၼ်ႉႁွတ်ႈထိုင်လႄႈ ထႃႇဝရႃႉၽြႃးတၵ်းပႄႇၽဵဝ်ႈၵူၼ်းမဵဝ်း ၽိလိတ်ႉတိ ဢိၵ်ႇတင်းၵူၼ်းမိူင်းၵပ်ႉတေႃႇရ ဢၼ်ၵိုတ်းဢၼ်ၵျၢၼ်ႇ ၸိူဝ်းၼၼ်ႉပႅတ်ႈဢေႃႈ။
၅ ဝိင်းၵႃႇၸ ၼၼ်ႉလႆႈၶၢမ်ႇတၢင်းဢၼ်ထႃၶူၼ်ႁူဝ်ပႅတ်ႈလႄႈဝဵင်း ဢႃႇသၵေႇလုၼ်ႇ ဢိၵ်ႇတင်းပၢင်ႇႁူၺ်ႈဢၼ်ၵိုတ်းဢၼ်ၵျၢၼ်ႇၼၼ်ႉလူႉလႅဝ်ယဝ်ႉ။မႂ်းတၵ်းလႆႈထိူဝ်ၼိူဝ်ႉထိူဝ်ၼင်တူဝ် ၸဝ်ႈၵဝ်ႇယူႇၶိင်ႇၵႃႇလႃႉႁိုင်ယူႇႁိုဝ်။
၆ လၢပ်ႇလႅဝ်းထႃႇဝရႃႉၽြႃးဢိူၺ်း၊မႂ်းယင်းဢမ်ႇယူႇၼိမ်ၼိမ်လီလီလႄႈ တၵ်းယူႇၶိင်ႇၵႃႇလႃႉႁိုင်ၵႃႈႁိုဝ်။ဢဝ်တူဝ်မႂ်းၶဝ်ႈၵႃႈၼႂ်းၵပ်းမႂ်းသေလႄႈယူႇတႃႉ။တုၵ်းတီႈယူႇတီႈသဝ်း လႄႈယူႇၼိမ်ၼိမ်လီလီတႃႉ။
၇ ၵွပ်ႈပိူဝ်ႈဢၼ်ထႃႇဝရႃႉၽြႃး သင်ႇလၢတ်ႈဢမူႉဝႆႉယူႇၽၢႆႇၼိုင်ႈတင်းဝဵင်းဢႃႇသၵေႇလုၼ်ႇ တင်းၽင်ႇပၢင်ႇလၢႆႇၼၼ်ႉလႄႈမႂ်းတၵ်းယူႇၼိမ်ၼိမ်လီလီလႆႈၸိူဝ်ႉၼင်ႇႁိုဝ်။မၼ်းၸဝ်ႈၶၢၼ်းဝႆႉႁႂ်ႈပွင်ႁဵတ်းဢမူႉၼၼ်ႉဢေႃႈ။