၁
တၢင်းဢၼ်ႁွင်ႉဢဝ်ယေႇရမိ
၁ ၵႂၢမ်းပရေႃးၽိတ်ႈယေႇရမိ လုၵ်ႈၸၢႆးႁိလၶိဢၼ်ၶဝ်ႈပႃးၵႃႈၼႂ်းယိတ်ႉပရေႃးႁိၵ်ႈတင်းလၢႆ ဢၼ်ယူႇၵႃႈၼႂ်းဝဵင်းဢႃႇၼသုတ်ႉ မိူင်းပိၼ်ႇယႃႇမိၼ်ႇ ဢၼ်လႆႈၶၢမ်ႇပျႃႇတိၵ်ႈ
၂ ထႃႇဝရႃႉၽြႃးၼႂ်းပီႊဢၼ်ၶုၼ်ယုဝ်ႇသိယလုၵ်ႈၸၢႆးဢႃႇမုၼ်ႇၶုၼ်ႁေႃၶမ်းယုတ ၸၢမ်ႇႁၢင်ႈ ၸၢမ်ႇႁေႃသိပ်းသၢမ်ပီႊ
၃ ဢိၵ်ႇတင်း ၼႂ်းၸူဝ်ႈပၢၼ်ယေႃႇယၵိမ်ႇ လုၵ်ႈၸၢႆးယုဝ်ႇသိယၶုၼ်ႁေႃၶမ်းယုတတေႃႇထိုင်ႁွတ်ႈပီႊဢၼ်ၸေႇၸၵိ လုၵ်ႈၸၢႆး ယုဝ်ႇသိယ ၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသိပ်း ပၢႆဢဵတ်းပီႊလႄႈ
၄ ၵူၼ်းဝဵင်းယေႇရုသလႅမ်ႇ တင်းလၢႆလႆႈၶၢမ်ႇတၢင်းဢၼ်သိမ်းဢဝ်ၵႂႃႇ ၶျုၵ်ႈဝႆႉၼႂ်းလိူၼ်ပိၼ်ႇၸမၼၼ်ႉၸမ်းၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈၵဝ်လႄႈမီးဢမိင်ႉဝႃႈၸမ်း၊-
၅ ၵဝ်ႁူႉမႂ်းၸဵမ်မိူဝ်ႈ ၸူဝ်ႈဢၼ်ၵဝ်ဢမ်ႇပႆႇႁဵတ်းပဵၼ်မႂ်းၵႃႈၼႂ်းတွင်ႉမေႈမႂ်းၼၼ်ႉယဝ်ႉ။ႁႂ်ႈမႂ်းမူတ်းၸၢင်ႇၸဵမ်မိူဝ်ႈၸူဝ်ႈဢၼ်မႂ်း ဢမ်ႇပႆႇၵိူတ်ႇလဵင်ႉသေၵႃႈၼႂ်းတွင်ႉၼၼ်ႉသေလႄႈၶၢၼ်းမႂ်းဝႆႉ ႁႂ်ႈပဵၼ်ပရေႃးၽိတ်ႈပုၼ်ႈၵူၼ်းၵူႈၸိူဝ်ႉၵူႈ မဵဝ်းယဝ်ႉ၊ဝႃႈၼင်ႇၼႆဢေႃႈ။
၆ ၵဝ်ၵေႃႈလဝ်ႈလၢတ်ႈလႄႈဝႃႈ၊-ၸဝ်ႈထႃႇဝရႃႉၽြႃးတီႈၶႃႈ။ၶႃႈၸဝ်ႈဢမ်ႇမေႃႁေႃးမေႃလၢတ်ႈတီႈၶႃႈ။ပဵၼ်လုၵ်ႈဢွၼ်ႇတီႈၶႃႈဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃးၵေႃႈမီးဢမိင်ႉလႄႈဝႃႈ၊-
၇ မႂ်းယႃႇပေလဝ်ႈလၢတ်ႈဝႃႈ၊- ၶႃႈၸဝ်ႈပဵၼ်လုၵ်ႈဢွၼ်ႇတီႈၶႃႈဢေႃႈ ဝႃႈၼင်ႇၼႆၼၼ်ႉၵဝ်ပွႆႇၸႂ်ႉမႂ်းၵႂႃႇၸူး ၵႃႈတီႈၽူႈၵေႃႈမႂ်းတၵ်းလႆႈၵႂႃႇၸူးၵႃႈတီႈဢၼ်ၵေႃႉၼၼ်ႉမီးၼၼ်ႉဢေႃႈ ၵဝ်သင်ႇလၢတ်ႈဝႆႉၵႂၢမ်းဢၼ် လႂ်သေဢမ်ႇဝႃႈမႂ်းတၵ်းလႆႈဢဝ်ၵႂၢမ်း ၼၼ်ႉၵႂႃႇသင်ႇလၢတ်ႈဢေႃႈ။
၈ ယႃႇပေၵူဝ်ပေႁႄၼႃႈၶဝ်။ၵဝ်မီးယူႇလူၺ်ႈၵၼ်တင်းမႂ်းႁႂ်ႈလႆႈၵႄႇသႄႇၼုၵ်ႈဢဝ်မႂ်းဢေႃႈ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉ ဢေႃႈ။
၉ မိူဝ်ႈၼၼ်ႉထႃႇဝရႃႉၽြႃးယဵတ်ႇမိုဝ်းမၼ်းၸဝ်ႈလႄႈတိူဝ်ႉသႂ်ႇသူပ်းၵဝ်ယူႇသေလႄႈမီးဢမိင်ႉဝႃႈ၊- တူၺ်းလူ။ၵဝ်ဢဝ်ၵႂၢမ်းၵဝ်သႂၢင်းသႂ်ႇဝႆႉၵႃႈၼႂ်းသူပ်းမႂ်း ယဝ်ႉ။
၁၀ တူၺ်းလူ။ၵဝ်ၶၢၼ်းမႂ်းဝႆႉၵႃႈၼိူဝ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢိၵ်ႇတင်း ၵႃႈၼိူဝ်သိုင်ႇၸိုင်ႈဝၢၼ်ႈမိူင်းတင်းလၢႆဝၼ်းမိူဝ်ႈၼႆႉ ႁႂ်ႈမႂ်းလႆႈထူၺ်ႈထွၼ်ၵိူၼ်ႇတူၵ်းယႃႉပႅတ်ႈပိၼ်ႈၶႂၢမ်ႈ ႁႂ်ႈလႆႈတႄႇႁဵတ်းဝၢၼ်ႇပိုၼ်ၽုၵ်ႇသွမ်ႈဢေႃႈ၊ဝႃႈၼင်ႇၼႆဢေႃႈ။
၁၁ လၢႆးသမ်ႉ ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈထၢမ်ဝႃႈ၊-ယေႇရမိဢိူၺ်း။မႂ်းႁၼ်ၵႃႈသင်၊ဝႃႈၼင်ႇၼႆလႄႈၵဝ်ၵေႃႈလဝ်ႈလၢတ်ႈလႄႈဝႃႈ၊-
၁၂ ၶႃႈ ၸဝ်ႈႁၼ်ၵိင်ႇမႆႉပႃႇတမ်ႇတီႈၶႃႈဢေႃႈ။မိူဝ်ႈဢၼ်ဝႃႈၼင်ႇၼႆၸိုင်ထႃႇဝရႃႉၽြႃး မီးဢမိင်ႉတီႈၵဝ်လႄႈဝႃႈ၊-မႂ်းလႆႈႁၼ်တႄႉတႄႉဝႃႈဝႃႈယဝ်ႉ။လွင်ႈမၼ်းၸမ်းၵဝ်ၶတ်းၸႂ်ၶတ်းၶေႃးပႂ်ႉထႃႈယူႇႁႂ်ႈၵႂၢမ်းၵဝ်လႆႈတဵမ်ထူၼ်ႈယဝ်ႉ၊ဝႃႈၼင်ႇၼႆဢေႃႈ။
၁၃ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်ၵမ်းတုတိယလႄႈဝႃႈၸမ်း၊-မႂ်းႁၼ်ၵႃႈသင်၊ဝႃႈၼင်ႇၼႆလႄႈၵဝ်ၵေႃႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁၼ်မေႃႈလိၼ်ဢၼ်လိူတ်ႇယူႇတီႈၶႃႈဢေႃႈ။ မီးတၢင်းဢၼ်ဝၢႆႇၼႃႈၵႂႃႇၸူး ၵႃႈတီႈၽၢႆႇၼႃႈတၢင်းႁွင်ႇယူႇ တီႈၶႃႈ။
၁၄ မိူဝ်ႈဢၼ်ဝႃႈၼင်ႇၼႆၸိုင်ထႃႇဝရႃႉၽြႃးမီးဢမိင်ႉတီႈၵဝ်လႄႈဝႃႈ၊- ၽေးဢူးပၢတ်ႈတၵ်းဢွၵ်ႇသေၵႃႈတီႈၽၢႆႇၼႃႈတၢင်းႁွင်ႇၼၼ်ႉ မႃးၸူးၵႃႈၼိူဝ် ၵူၼ်းမိူင်းၼႆႉဢေႃႈ။
၁၅ လွင်ႈမၼ်းၸမ်းၵဝ်တၵ်းႁွင်ႉဢဝ်ၵူၼ်းဝၢၼ်ႈၵူၼ်းမိူင်းၽၢႆႇၼႃႈတၢင်းႁွင်ႇ ၵူႈၸိူဝ်ႉၵူႈမဵဝ်းၸိူဝ်းၼၼ်ႉမႃးလႄႈ ၶဝ်ၼၼ်ႉတၵ်းမႃးသေလႄႈဢွၼ်ၵၼ်တႄႇႁဵတ်းရႃႇၸႃႉပလၢင်ႇၶဝ် ၵႃႈတီႈသူပ်းၽၵ်းတူဝဵင်းယေႇရုလႅမ်ႇ တင်းလၢႆ ၵႃႈတီႈလဵပ်ႈႁွပ်ႈႁိမ်းလမ်းဝဵင်းၵူႈတီႈၵူႈလႅၼ်၊ ၵႃႈတီႈဝဵင်းယုတၵူႈဝၢၼ်ႈၵူႈ ဝဵင်းႁင်းၽႂ်ႁင်းမၼ်းဢေႃႈ။
၁၆ ၵဝ်တၵ်းၸႅတ်ႈထၢမ်ၶဝ်လႄႈၸီႇယၢင်ႇၸွမ်းၼင်ႇတြႃး လူၺ်ႈလွင်ႈဢပျႅတ်ႈၶဝ်ၵႃႈမီးဢၼ်ဝႃႈ ဢပျႅတ်ႈဢၼ်ၶဝ်ၸုၼ်ႉပႅတ်ႈၵဝ်ဢိၵ်ႇတင်း ဢပျႅတ်ႈဢၼ်ၶဝ်ဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူႇတၢင်ႇပႃး တင်းဢပျႅတ်ႈဢၼ်ၶဝ်ၵူဝ်းၵႂၢႆႇ ဢၼ်ၶဝ်ဢဝ်မိုဝ်းၶဝ်ႁဵတ်းပဵၼ်ၸိူဝ်းၼၼ်ႉဢေႃႈ။
၁၇ ပိူဝ်ႈၼႆၸင်ႇမႂ်းႁတ်ႉသၢႆဢႅဝ်မႂ်းသေလႄႈလုၵ်ႉတႃႉ။ ဢဝ်ၵႃႈၼင်ႇဢၼ်ၵဝ်သင်ႇလၢတ်ႈဝႆႉၼႆႉႁေႃးလၢတ်ႈပၼ်တီႈၶဝ်တႃႉ။လွင်ႈၼင်ႇႁိုဝ်ၵဝ်တၵ်းဢမ်ႇလႆႈႁႂ်ႈမႂ်းဢူၵ်းဢၢႆ ၵႃႈတီႈၽၢႆႇၼႃႈၶဝ်ၸိုင်ယႃႇပေၵူဝ် ပေႁႄၼႃႈၶဝ်ႈ။
၁၈ တူၺ်းလူ။ၵဝ်ႁႂ်ႈမႂ်းပဵၼ်ဝဵင်းဢၼ်မၼ်ႈၶိူင်ႇသဝ်လဵၵ်း၊ ၽႃတွင်းလိူင်ယူႇၽၢႆႇၼိုင်ႈတင်းမိူင်းတၢင်ႇမိူင်းဢၼ်ဝႃႈ ၽၢႆႇၼိုင်ႈတင်းၶုၼ်ႁေႃၶမ်းယုတတင်းလၢႆ၊ ၽၢႆႇၼိုင်ႈတင်းလုၵ်ႈၸၢႆးၶုၼ်တင်းလၢႆ၊ၽၢႆႇၼိုင်ႈတင်း ယိတ်ႉပရေႃးႁိၵ်ႈတင်းလၢႆ၊ၽၢႆႇၼိုင်ႈတင်းၵူၼ်းဝၢၼ်ႈၵူၼ်းမိူင်းတင်းလၢႆဝၼ်းမိူဝ်ႈၼႆႉ ဢေႃႈ။
၁၉ ၶဝ်ၼၼ်ႉတၵ်းဢွၼ်ၵၼ်တိုၵ်းတေႃးမႂ်းလႄႈဢမ်ႇလႆႈပေႉလႆႈၼႅင်ႇမႂ်း။ၵဝ်မီးယူႇလူၺ်ႈၵၼ်တင်းမႂ်းႁႂ်ႈလႆႈၵႄႇသႄႇၼုၵ်ႈဢဝ်မႂ်းယဝ်ႉ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။