၁၈
တီႈႁိူၼ်းၸဝ်ႈမေႃႈလိၼ်
၁ ၼုၵ်ႈၵပၢတ်ႈထႃႇဝရႃႉၽြႃး ဢၼ်ႁွတ်ႈမႃးတီႈ ယေႇရမိၸမ်း၊-
၂ မႂ်းလုၵ်ႉလႄႈလူင်းၸူးၵႃႈတီႈႁိူၼ်းၸဝ်ႈမေႃႈလိၼ်ၼၼ်ႉတႃႉ။ၵဝ်တၵ်းႁႂ်ႈမႂ်းငိၼ်းၵႂၢမ်းၵဝ် ၵႃႈတီႈၼၼ်ႉဢေႃႈ၊ဝႃႈၼင်ႇၼႆလႄႈ၊
၃ ၵဝ်လူင်းၸူးၵႃႈတီႈႁိူၼ်းၸဝ်ႈမေႃႈလိၼ်ၼၼ်ႉလႄႈ ထူပ်းႁၼ် မၼ်းဢဝ်ၸၢၵ်ႈမေႃႈႁဵတ်းမေႃႈယူႇဢေႃႈ။
၄ မိူဝ်ႈဢၼ်မေႃႈဢၼ် ဢဝ်လိၼ်ႁဵတ်းၼၼ်ႉလူႉလႅဝ်ၵႂႃႇၵႃႈၼႂ်းမိုဝ်းၸဝ်ႈမေႃႈၼၼ်ႉၸိုင် မၼ်းသမ်ႉဢဝ်ဢၼ်ၼၼ်ႉႁဵတ်းမေႃႈထႅင်ႈတၢင်ႇလုၵ်ႈ ၸွမ်းၵႃႈၼင်ႇဢၼ်ၸဝ်ႈမေႃႈလိၼ်မီးဢလူဝ်ႇၶႂ်ႈႁဵတ်းၼၼ်ႉဢေႃႈ။
၅ မိူဝ်ႈၼၼ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈၵဝ်လႄႈထႃႇဝရႃႉၽြႃးမီးဢမိင်ႉၸမ်း၊-မဵဝ်းဢိသရေႇလ ဢိူၺ်း။
၆ ၵဝ်ဢမ်ႇႁဵတ်းတီႈသူလႆႈမိူၼ်ၸိူဝ်ႉၼင်ႇဢၼ်ၸဝ်ႈမေႃႈလိၼ်ႁဵတ်းၼၼ်ႉႁိုဝ်။ မဵဝ်းဢိသရေႇလဢိူၺ်း။ၸိူဝ်ႉၼင်ႇဢၼ်လိၼ်မီးၵႃႈၼႂ်းမိုဝ်းၸဝ်ႈမေႃႈ ၼၼ်ႉသူမီးယူႇၵႃႈတီႈမိုဝ်းၵဝ်ဢေႃႈ။
၇ မိူဝ်ႈဢၼ်ၵဝ်ဢဝ်လွင်ႈမဵဝ်းၵူၼ်းမဵဝ်းၼိုင်ႈ ဢိၵ်ႇတင်းသိုင်ႇၸိုင်ႈဝၢၼ်ႈမိူင်းမိူင်းၼိုင်ႈလႄႈ မီးဢမိင်ႉႁႂ်ႈၼုၵ်ႈထွၼ်ႁႂ်ႈၵိူၼ်ႇတူၵ်းႁႂ်ႈယႃႉပႅတ်ႈမၼ်း ၼႂ်းၸူဝ်ႈၵႅပ်ႉဢွၼ်ႇၵမ်းၼိုင်ႈၼၼ်ႉ
၈ ပေႃးသိုင်ႇၸိုင်ႈဝၢၼ်ႈမိူင်း ဢဝ်ၵဝ်မီးလူၺ်ႈလွင်ႈမၼ်းၼၼ်ႉ ၸုၼ်ႉပႅတ်ႈတုၸရိူၵ်ႈ မၼ်းၸိုင်ၵဝ်တၵ်းၶိုၼ်းဝူၼ်ႉၽေးတၢမ်ႇဢၼ်ၵဝ်ဢၢင်ႈဢၢၼ်း တၵ်းႁဵတ်းတီႈ မၼ်းၼၼ်ႉဢေႃႈ။
၉ မိူဝ်ႈဢၼ်ၵဝ်ဢဝ်လွင်ႈမဵဝ်းၵူၼ်းမဵဝ်းၼိုင်ႈဢိၵ်ႇတင်းသိုင်ႇၸိုင်ဝၢၼ်ႈမိူင်း မိူင်းၼိုင်ႈလႄႈမီးဢမိင်ႉႁႂ်ႈတႄႇႁဵတ်းႁႂ်ႈလုမ်းလႃးမၼ်း ၼႂ်းၸူဝ်ႈၵႅပ်ႉ ဢွၼ်ႇၵမ်းၼိုင်ႈၼၼ်ႉ၊
၁၀ ပေႃးမၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃၵဝ်ထၼ်ႈပေႃး ဢမ်ႇထွမ်ႇဢမ်ႇဢဝ်ၵႂၢမ်းၵဝ်ၸိုင်ၵဝ်တၵ်းၶုၵ်းၸႂ်လႆႈမႆႈၸႂ်လူၺ်ႈတၢင်းဢၼ်လီဢၼ်ငၢမ်းဢၼ်ၵဝ်ဝႃႈ တၵ်းလုမ်းလႃးႁႂ်ႈပဵၼ်ဢၵျူဝ်းတီႈၶဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၁ မိူဝ်ႈလဵဝ်ၼႆႉမႂ်းသင်ႇလၢတ်ႈဝႆႉတီႈၵူၼ်းမိူင်းယုတ ဢိၵ်ႇတင်းၶဝ်ၸိူဝ်းဢၼ်ယူႇၵႃႈၼႂ်းဝဵင်း ယေႇရုသလႅမ်ႇၼၼ်ႉလႄႈဝႃႈ၊-ထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။ ၵဝ်ပွင်ႈမႄးပွင်ႈႁႅၼ်းၽေးတၢမ်ႇဝႆႉပုၼ်ႈသူလႄႈဢႅၼ်းဢၢၼ်း တၢင်းဢၼ်ႁဵတ်းၶတ်းၵၼ်တင်းသူယူႇဢေႃႈ။ပိူဝ်ႈၼႆလႄႈသူဢွၼ်ၵၼ်လုၵ်ႉသေၵႃႈတီႈသဵၼ်ႈတၢင်းဢၼ်ႁၢႆၼၼ်ႉ ၶိုၼ်းမႃးႁင်းၽႂ်ႁင်းမၼ်းတႃႉ။ႁႂ်ႈသဵၼ်ႈတၢင်းသူဢိၵ်ႇတင်းတၢင်းၵမ်တၢင်းၵျၢင်ႉသူၸိူဝ်းၼၼ်ႉသိုဝ်ႈလီတႃႉဝႃႈၼင်ႇၼႆတႃႉ။
၁၂ ၵူၺ်းၵႃႈၶဝ်ဢွၼ်ၵၼ်လၢတ်ႈလႄႈဝႃႈ၊-ဢမ်ႇမီးတီႈဢၼ်လီမုင်ႈထႃႈမွင်းထႃႈ။ႁဝ်းတၵ်းၵႂႃႇတၵ်းပႆၸွမ်းၵႃႈၼင်ႇဢၼ် တၢင်းၵျၢမ်ႇတၢင်းပွင်ႁဝ်းမီးၼၼ်ႉလႄႈႁဵတ်းၸွမ်းၵႃႈၼင်ႇဢၼ် ႁူဝ်ၸႂ်ဢၼ်ႁၢႆႉမိူၵ်ႈၵႅၼ်ႇၶႅင်ႁဝ်းမီးၼၼ်ႉႁင်းၽႂ်ႁင်းမၼ်းဢေႃႈ၊ ဝႃႈၼင်ႇၼႆ ဢေႃႈ။
၁၃ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊-ဢွၼ်ၵၼ်ထၢမ်တီႈ ၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆလႄႈဝႃႈ၊- ၽူႈ လႂ်ယၢမ်ႈတွၼ်ႉငိၼ်းလွင်ႈတၢင်းၸိူဝ်ႉၼင်ႇၼၼ်ၼၼ်ႉ၊ဝႃႈၼင်ႇၼႆတႃႉ။ ၵၢၼ်ႇၺႃႇလုၵ်ႈယိင်းသၢဝ် ဢိသရေႇလ ႁဵတ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇၼႃႇလူင်လၢင်ယဝ်ႉ။
၁၄ မူၺ်ႁႃႇလေႇပၼုၼ်ႇၼၼ်ႉ တၵ်းထၢတ်ႇသေ မၢၵ်ႇႁိၼ်မၢၵ်ႇၽႃၵႃႈၼႂ်းတီႈပၢင်ႇပဵင်းၼၼ်ႉႁိုဝ်။ၼမ်ႉႁွင်ႊဢၼ်ၵတ်းလီလႄႈ လုၵ်ႉသေၵႃႈတီႈဢၼ်ၵႆမႃးၼၼ်ႉတၵ်းယူတ်း ႁႅင်ႈႁိုဝ်။
၁၅ ၵူၼ်းၵဝ်တင်းလၢႆၸမ်းဢွၼ်ၵၼ်လူင်လိုမ်းၵဝ်လႄႈ ဢဝ်ၼၢမ်ႇသႃႇတုတ်ႇၽႆးတီႈလွင်ႈတၢင်းဢၼ်လၢႆလၢႆလွၵ်ႇလွၵ်ႇ ဢမ်ႇပွင်ႇလွင်ႈၵႃႈသင်ၼၼ်ႉ ယဝ်ႉ။
၁၆ ဢၼ်ၸိူဝ်းၼၼ်ႉႁႂ်ႈၶဝ်ၶီႇလိုတ်းလႄႈလူမ်ႉၵႃႈၼႂ်းသဵၼ်ႈတၢင်းၶဝ် ၵႃႈၼႂ်းႁွႆးတၢင်းဢၼ်ယၢမ်ႈၸွမ်းၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉလႄႈႁႂ်ႈၶဝ်ဢွၼ်ၵၼ်ၸွမ်းၵႃႈၼႂ်း သဵၼ်ႈတၢင်းဢၼ်လဵၵ်ႉဢၼ်ဢွၼ်ႇသဵၼ်ႈတၢင်းဢၼ်ဢမ်ႇဢဝ်လိၼ်ၵေႃႇတဵင်ၼၼ်ႉ ႁႂ်ႈမိူင်းၶဝ်လႆႈပဵၼ်တီႈဢၼ်လီဢၢမ်း၊ တီႈဢၼ်လႆႈငိၼ်းသဵင်ဢၼ်ႁဵတ်းသီႉသီႉသေႃႉသေႃႉသေႉသွမ်းဢေႃႈ။ ၶဝ်ၸိူဝ်းဢၼ်တႆႇတၢင်းပႆတၢင်းၵႃႈမီးၼၼ်ႉ တၵ်းဢွၼ် ၵၼ်ဢၢမ်းလႄႈဝႆႁူဝ်ငွၵ်းႁူဝ်ၸူးဢေႃႈ။
၁၇ ၵဝ်တၵ်းဢဝ်ၶဝ်ၸၢတ်ႇပိုၼ်ပႅတ်ႈ ၵႃႈတီႈၽၢႆႇၼႃႈရၢၼ်ႇသူႇၶဝ်မိူၼ်ၸိူဝ်ႉၼင်ႇလူမ်းတၢင်းဢွၵ်ႇၼၼ်ႉဢေႃႈ။ၼႂ်းမိူဝ်ႉဝၼ်းဢၼ်ၽေးႁွတ်ႈထိုင်ၼၼ်ႉၵဝ်တၵ်းဝၢႆႇလင်တေႃႇၶဝ်လႄႈဢမ်ႇဝၢႆႇၼႃႈတေႃႇၶဝ်။
၁၈ မိူဝ်ႈၼၼ်ႉၶဝ်လၢတ်ႈလႄႈဝႃႈ၊-မႃးမႃးဢိူၺ်း။ဢွၼ်ၵျၢမ်ႇပွင်တၢင်းၵျၢမ်ႇတၢင်းပွင်ယူႇၽၢႆႇၼိုင်ႈတင်းယေႇရမိတႃႉႁဝ်း။ တြႃးၸဝ်ႈတၵ်းဢမ်ႇလပ်ႉႁၢႆသေၵႃႈတီႈယိတ်ႉပရေႃးႁိၵ်ႈ။တၢင်းဢၼ်ပၼ်တၢင်းၵျၢမ်ႇတၢင်းပွင်တၵ်းဢမ်ႇလပ်ႉဢမ်ႇႁၢႆသေ ၵႃႈတီႈၵေႃႉဢၼ်မီးပိင်ႇၺႃႇ။တၢင်းဢၼ်ႁေႃးလၢတ်ႈတၵ်းဢမ်ႇလႆႈလပ်ႉႁၢႆသေၵႃႈတီႈပရေႃးၽႅတ်ႈၵူၺ်း။မႃးမႃးဢိူၺ်း။ဢွၼ်ၵၼ်ဢဝ်တင်းလိၼ်ႉႁဝ်း သေႉသဝ်ႇမၼ်းၼၼ်ႉတႃႉႁဝ်း။ ယင်းဢမ်ႇထွမ်ႇဢမ်ႇဢဝ်ၵႂၢမ်းမၼ်းလႄႈဢွၼ်ၵၼ်ယူႇတႃႉႁဝ်း၊ဝႃႈၼင်ႇၼႆဢေႃႈ။
၁၉ ထႃႇဝရႃႉၽြႃးတီႈၶႃႈ။ လူတူၺ်းၶႃႈၸဝ်ႈသေၵမ်းတီႈၶႃႈ။မၢတ်ႈတွင်းၵႂၢမ်းၶဝ်ၸိူဝ်းဢၼ်ႁဵတ်းတၢင်းဢၼ်ၶတ်းၵၼ်တင်းၶႃႈၸဝ်ႈၼၼ်ႉ သေၵမ်းတီႈၶႃႈ။တၵ်းထုၵ်ႇလီတႅၼ်းပၼ် တၢင်းဢၼ်ဢမ်ႇလီဢမ်ႇငၢမ်းပုၼ်ႈတၢင်းဢၼ်လီဢၼ်ငၢမ်းတီႈၶႃႈႁိုဝ်။ ၶဝ်ၼၼ်ႉဢွၼ်ၵၼ်ၶုတ်းၶုမ်ၶုတ်းႁူး ပုၼ်ႈဢသၢၵ်ႈၶႃႈ ၸဝ်ႈတီႈၶႃႈယဝ်ႉ။
၂၀ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၶႃႈၸဝ်ႈ ၸုၵ်းယူႇၵႃႈတီႈၽၢႆႇၼႃႈၸဝ်ႈႁဝ်းႁႂ်ႈလႆႈလဝ်ႈလၢတ်ႈၵႂၢမ်း ဢၼ်လီဢၼ်ငၢမ်းပုၼ်ႈၶဝ်ႁႂ်ႈတၢင်းၸႂ်မႆႈၶႆႈၸႃႉၸဝ်ႈႁဝ်း ဝႄႈပိူင်ႈသေၵႃႈတီႈ ၶဝ်ၼၼ်ႉသေၵမ်းတီႈၶႃႈ။
၂၁ ပိူဝ်ႈၼႆလႄႈၶႅၼ်းတေႃႈဢဝ်လုၵ်ႈၶဝ်လၢင်းၶဝ် ဢၢပ်ႈပၼ်တီႈတၢင်းဢၼ်ဢိုပ်းယၢၵ်ႈလႄႈ ဢဝ်ၶဝ်ဢၢပ်ႈပၼ်တီႈၽေးလၢပ်ႇၽေးလႅဝ်းသေၵမ်းတီႈၶႃႈ။ႁႂ်ႈမေႈယိင်းၶဝ်သုမ်းလုၵ်ႈသုမ်းလၢင်းလႄႈပဵၼ်မေႈမုၵ်ႉမေႈမၢႆႈသေၵမ်းလူၺ်ႈ။ႁႂ်ႈၵူၼ်းလူင်ၶဝ်လႆႈၶၢမ်ႇတၢင်းဢၼ်ဢဝ်တၢႆလႄႈ ၵူၼ်းၼုမ်ႇၵူၼ်းၵမ်ၶဝ်သုမ်းလူၺ်ႈလၢပ်ႇလူၺ်ႈလႅဝ်း ၵႃႈၼႂ်းပွႆး သိုၵ်းၼၼ်ႉသေၵမ်းလူၺ်ႈ။
၂၂ ႁႂ်ႈလႆႈငိၼ်းသဵင်ဢၼ်ႁွင်ႉသႅၼ်ႇၵႃႈၼႂ်းႁိူၼ်းၼႂ်းယေးၶဝ် ယၢမ်းမိူဝ်ႈဢၼ်ၸဝ်ႈႁဝ်းႁႂ်ႈမူႇၽုင်မုၵ်ႉၸိူဝ်းၵူၼ်း ဢၼ်တိုၵ်းသိုၵ်းၶီႉၶႃႉႁွတ်ႈမႃးတီႈၶဝ်ၼၼ်ႉသေၵမ်းလူၺ်ႈ။လွင်ႈမၼ်းၸမ်းၶဝ်ဢွၼ်ၵၼ်ၶုတ်းၶုမ်ၶုတ်းလုၵ်း ႁႂ်ႈလႆႈၵၢင်ဢဝ်ၶႃႈၸဝ်ႈလႄႈ သိူပ်ႇမႅပ်းတူင်ႇႁဵဝ်ႉဝႆႉပုၼ်ႈတိၼ်ၶႃႈၸဝ်ႈတီႈၶႃႈ ယဝ်ႉ။
၂၃ ထႃႇဝရႃႉၽြႃးတီႈၶႃႈ။ၸဝ်ႈႁဝ်းႁူႉလွင်ႈၵႃႈဢၼ်ၶဝ်ၵျၢမ်ႇပွင် ႁႂ်ႈလႆႈဢဝ်ဢသၢၵ်ႈၶႃႈၸဝ်ႈတၢႆၼၼ်ႉတီႈၶႃႈဢေႃႈ။ယႃႇပေပွႆႇဢပျႅတ်ႈၶဝ်လွတ်ႈသေၵမ်းတီႈၶႃႈ။
ယႃႇပေမွတ်ႇပႅတ်ႈဢပျႅတ်ႈၶဝ်သေၵႃႈတီႈသိုဝ်ႈၼႃႈတႂ်ႈတႃၸဝ်ႈႁဝ်းသေၵမ်းတီႈၶႃႈ။
ႁႂ်ႈၶဝ်လႆႈၶၢမ်ႇတၢင်းဢၼ်လူမ်ႉတူၵ်းၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ။ၶႅၼ်းတေႃႈၸီႇယၢင်ႇၶဝ်ၼႂ်းမိူဝ်ႈဢၼ်တၢင်းၸႂ်မႆႈၶႆႈၸႃႉၸဝ်ႈႁဝ်းဢွၵ်ႇၼၼ်ႉ သေၵမ်းတီႈၶႃႈ။