၄၈
ၼုၵ်ႉၵပၢတ်ႈၸဝ်ႈလူၺ်ႈလွင်ႈမိူင်းမေႃႇၽ
၁ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ ဢဝ်လွင်ႈမိူင်းမေႃႇၽမီးဢမိင်ႉၸမ်း၊ဝဵင်းၼေႇပေႃႇမီးဢႃႉမင်ႇၵလႃႇဢေႃႈ။မၼ်းႁွတ်ႈထိုင်တၢင်းဢၼ်လူႉဢၼ်လႅဝ်ယဝ်ႉ။ဝဵင်းၵိရယၵိမ်ႇလႆႈၶၢမ်ႇတၢင်းဢၼ်ဢူၵ်းဢၢႆလႄႈ မီးတၢင်းဢၼ်ပိူၼ်ႈႁိမ်ႁူင်ႇသိမ်းဢဝ်ယဝ်ႉ။ဝဵင်းမိသၵပ်ႉၵေႃႈလႆႈၶၢမ်ႇတၢင်းဢၼ်ဢူၵ်းဢၢႆလႄႈၸႂ်လူႉဢေႃႈ။
၂ တၢင်းဢၼ်ဢုပ်ႇဢၢတ်ႇမိူင်းမေႃႇၽ ၼၼ်ႉၵမ်းလိုၼ်းဢမ်ႇလႆႈမီးလႃးလႃး။ၵႃႈၼႂ်းဝဵင်းႁေႇသၽုၼ်ႇ ၼၼ်ႉပိူၼ်ႈဢွၼ်ၵၼ်ၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ဢမ်ႇလီယူႇၽၢႆႇၼိုင်ႈတင်းမၼ်းလႄႈဝႃႈ၊-မႃးမႃးဢိူၺ်း။ဢွၼ်ၵၼ်ပႄႇၽဵဝ်ႈမိူင်းမေႃႇၽ ပႅတ်ႈႁႂ်ႈမၼ်းထၼ်ႈပေႃးဢမ်ႇပဵၼ်ဝၢၼ်ႈပဵၼ်မိူင်းလႆႈတႃႉႁဝ်းဝႃႈၼင်ႇၼႆဢေႃႈ။ ဝဵင်းမႃႇတမေႇ ဢိူၺ်း မႂ်းၵေႃႈတၵ်းလႆႈႁွတ်ႈထိုင်တၢင်းဢၼ်သိတ်ႇဢၼ်ယဵၼ်ဢေႃႈ။ၽေးလၢပ်ႇၽေးလႅဝ်း တၵ်းလိုပ်ႇၸွမ်းလမ်းၸွမ်းမႂ်းဢေႃႈ။
၃ လႆႈငိၼ်းသဵင်ဢၼ်သႅၼ်ႇႁွင်ႉၵႃႈတီႈဝဵင်းႁေႃႇရၼိမ်ႇလႄႈ မီးတၢင်းဢၼ်ၼိၵ်ႈၸၢၵ်ႈငႅၼ်းသေး ဢိၵ်ႇတင်းတၢင်းဢၼ် ယႃႉၽဵဝ်ႈပႅတ်ႈဢၼ်ယႂ်ႇၼႃႇဢေႃႈ။
၄ မိူင်းမေႃႇၽၼၼ်ႉႁွတ်ႈထိုင်တၢင်းဢၼ်လူႉဢၼ်လႅဝ်လႄႈ လုၵ်ႈလဵင်ႉဢွၼ်ႇမၼ်းၸိူဝ်းၼၼ်ႉ ဢွၼ်ၵၼ်ႁဵတ်းသဵင်ႈႁႂ်ႈပိူၼ်ႈ လႆႈငိၼ်းဢေႃႈ။
၅ သဵင်ဢၼ်ႁႆႈႁွင်ႉယူႇၼၼ်ႉလႆႈလုၵ်ႉၶိုၼ်ႈၵႃႈတီႈတီႈဢၼ်ၶိုၼ်ႈၸူးၵႃႈၼိူဝ် လွႆလုႁိတ်ႉၼၼ်ႉယူႇသေလႄႈၵႃႈတီႈဢၼ်လူင်းၸူးဝဵင်း ႁေႃႇရၼိမ်ႇ ၼၼ်ႉၵေႃႈဢွၼ်ၵၼ်လႆႈငိၼ်းသဵင်တုၵ်ႉၶႃႉၼႂ်း သဵင်တင်းဢၼ်သုမ်းဢၼ်ၸွမ်းၼၼ်ႉဢေႃႈ။
၆ ဢွၼ်ၵၼ်ပၢႆႁႂ်ႈဢသၢၵ်ႈသူလွတ်ႈတႃႉ။ဢွၼ်ၵၼ်ပဵၼ်ၸိူဝ်ႉၼင်ႇတူၼ်ႈမႆႉႁႅင်ႈမႆႉလွၵ်ႇ ၵႃႈတီႈပၢင်ႇပဵင်းၼၼ်ႉတႃႉ။ၵွပ်ႈပိူဝ်ႈဢၼ်မႂ်း ဢိင်ပိုင်ႈၽၼ်ႇတႃႇဢုၵ်ႉၸႃႇဢၼ်မႂ်းၵဵပ်းႁွမ်သိမ်းပႅင်းဝႆႉၼၼ်ႉလႄႈ တၵ်းလႆႈႁွတ်ႈထိုင် ၵႃႈၼႂ်းမိုဝ်းပိူၼ်ႈဢေႃႈ။
၇ ၽြႃးၶေႇမုသဢိၵ်ႇတင်းယိတ်ႉပရေႃးႁိၵ်ႈမၼ်းတင်းၶုၼ်မၼ်းၸိူဝ်းၼၼ်ႉ တၵ်းၶၢမ်ႇ တၢင်းဢၼ်သိမ်းဢဝ်ၵႂႃႇဢေႃႈ။
၈ ၵေႃႉဢၼ်ႁိမ်ဢဝ်ၼၼ်ႉတၵ်းႁွတ်ႈမႃးၵႃႈတီႈဝဵင်းၵူႈဝဵင်းလႄႈ ဢမ်ႇလႆႈၵၢင်းလွတ်ႈသေဝဵင်း။ပၢင်ႇႁူၺ်ႈတၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈလႄႈ ပၢင်ႇပဵင်းတၵ်းလႆႈႁွတ်ႈထိုင်တၢင်းဢၼ်လူႉဢၼ်လႅဝ်ဢေႃႈ။ထႃႇဝရႃႉၽြႃးမီးဢ မိင်ႉၸိူဝ်ႉၼင်ႇၼၼ်ယဝ်ႉ။
၉ ဢဝ်ပိၵ်ႇၼူၵ်ႉတင်းလၢႆပၼ်တီႈမိူင်းမေႃႇၽ ႁႂ်ႈမၼ်းလႆႈမိၼ်ပၢႆႈၵႂႃႇလႄႈလွတ်ႈတႃႉ။ဝဵင်းမၼ်းၸိူဝ်းၼၼ်ႉ တၵ်းလႆႈပဵၼ်တီႈဢၼ်ပဝ်ႇဢၼ်လၢပ်ႈ။
၁၀ ဢမ်ႇမီးၵေႃႉဢၼ်ယူႇဢၼ်သဝ်းလႃးလႃး။ႁႂ်ႈၵေႃႉဢၼ် ဢမ်ႇၵႆႉသၢင်ႈႁဵတ်းဢမူႉထႃႇဝရႃႉၽြႃးလီလီငၢမ်းငၢမ်းၼၼ်ႉလႆႈၶၢမ်ႇ တၢင်းဢၼ်ၵိၼ်ႇဢၼ်ဝႃႈသေၵမ်းလူၺ်ႈ။ ႁႂ်ႈၵေႃႉဢၼ်ၵူႈသိမ်းဢဝ်လၢပ်ႇမၼ်းသေၵႃႈတီႈ တၢင်းဢၼ်ထွၵ်ႇလိူတ်ႈၵူၼ်းပႅတ်ႈၼၼ်ႉ လႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈသေၵမ်း လူၺ်ႈ။
၁၁ မိူင်းမေႃႇၽၼၼ်ႉၵွပ်ႈပိူဝ်ႈဢၼ်ၸႃႉၸဵမ်မိူဝ်ႈဢၼ် ဢသၢၵ်ႈဢရွႆႇမၼ်းယင်းလဵၵ်ႉယင်းၼုမ်ႇၼၼ်ႉလႄႈမီးတၢင်းဢၼ်ၼိမ်ဢၼ်လီယူႇ၊ တုၵ်းတီႈယူႇတီႈသဝ်းၵႃႈၼိူဝ်ယိူဝ်ႈၼိူဝ်ယေႇမၼ်းယူႇ၊ ဢမ်ႇလႆႈၶၢမ်ႇတၢင်းဢၼ်ဢဝ်သေၵႃႈတီႈမေႃႈလုၵ်ႈၼိုင်ႈထွၵ်ႇသႂ်ႇၵႃႈတီႈမေႃႈလုၵ်ႈၼိုင်ႈ ဢမ်ႇလႆႈၶၢမ်ႇတၢင်းဢၼ်သိမ်းဢဝ်ၵႂႃႇတၢင်ႇဝၢၼ်ႈတၢင်ႇမိူင်းလႄႈ ဢရသႃႇမၼ်းၼၼ်ႉတႄႇယူႇၵႃႈၼႂ်းမၼ်းဢေႃႈ။ဢၢႆဢၼ်ႁွမ်ဢၼ်ႁူၺ်းမၼ်းၼၼ်ႉၵေႃႈ ဢမ်ႇလူႉဢမ်ႇႁၢႆ။
၁၂ ၼႂ်းဝႃႈၼၼ်သေၵေႃႈ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-မိူဝ်ႉဝၼ်းဢၼ်ၵဝ်တၵ်းပွႆႇၸႂ်ႉၶဝ်ၸိူဝ်းဢၼ်ထွၵ်ႇမေႃႈ မုးၸူးတီႈမၼ်းၼၼ်ႉတၵ်းႁွတ်ႈထိုင်ဢေႃႈ။ ၶဝ်ၼၼ်ႉတၵ်းဢွၼ်ၵၼ်ထွၵ်ႇမေႃႈၶဝ်ပႅတ်ႈသေလႄႈပေႃႉၼမ်ႉတဝ်ႈၶဝ်တႅၵ်ႇပႅတ်ႈဢေႃႈ။
၁၃ မဵဝ်းမေႃႇၽ ၼၼ်ႉတၵ်းလႆႈမီးတၢင်းဢၼ်ဢူၵ်းဢၼ်ဢၢႆၵွပ်ႈပိူဝ်ႈၽြႃးၶေႇမုသ မိူၼ်ၸိူဝ်ႉၼင်ႇမဵဝ်း ဢိသရေႇလ လႆႈမီးတၢင်းဢၼ်ဢူၵ်းဢၼ်ဢၢႆ ၵွပ်ႈပိူဝ်ႈ ၽြႃးပေႇလဢၼ်ၶဝ်သွၼ်ႈပိုင်ႈၼၼ်ႉဢေႃႈ။
၁၄ သူဢွၼ်ၵၼ်လဝ်ႈလၢတ်ႈလႄႈဝႃႈ၊-ႁဝ်းၼႆႉပဵၼ်ၵေႃႉဢၼ်ႁႅင်းယႂ်ႇၼႃႇ၊ပဵၼ်ၵေႃႉဢၼ်တတ်ႈၼိုင်ႇလႆႈႁႂ်ႈလႆႈတိုၵ်းသိုၵ်းဢေႃႈ၊ဝႃႈၼင်ႇၼႆၸိူဝ်ႉၼင်ႇႁိုဝ်။ မိူင်းမေႃႇၽၼၼ်ႉလူႉလႅဝ်ယဝ်ႉ။
၁၅ ဝဵင်းမၼ်းၸိူ်ဝ်းၼၼ်ႉမႆႈသုတ်းပႅတ်ႈယဝ်ႉ။ ၵူၼ်းၼုမ်ႇၵူၼ်းၵမ်မၼ်းဢၼ်လိူၵ်ႈၵဵပ်းဢဝ်ၸိူဝ်းၼၼ်ႉဢွၼ်ၵၼ်လူင်းၸူး ႁႂ်ႈလႆႈၶၢမ်ႇတၢႆယဝ်ႉ၊ဝႃႈၼင်ႇၼႆ၊ ၶုၼ်ႁေႃၶမ်းဢၼ်မီးၼႃႇမႃႉၸိုဝ်သဵင်ဢၼ်ဝႃႈ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ၼၼ်ႉ မီးဢမိင်ႉဢေႃႈ။
၁၆ ၽေးဢၼ်တၵ်းလႆႈႁွတ်ႈထိုင်မေႃႇၽၼၼ်ႉၸမ်ယဝ်ႉ။ဢူးပၢတ်ႈဢၼ်မၼ်းတၵ်းလႆႈၶၢမ်ႇ ၼၼ်ႉႁိပ်ႈၼႅတ်ႈမႃးယူႇဢေႃႈ။
၁၇ သူၸိူဝ်းဢၼ်ယူႇၵႃႈတီႈႁိမ်းႁွမ်းလဵပ်ႈႁွပ်ႈမၼ်း တင်းသဵင်ႈတင်းလူင်ၶဝ်ဢိူၺ်း။ ဢွၼ်ၵၼ်ပွင်ႉၶၢင်းပွင်ႉမိုၼ်ပုၼ်ႈမၼ်းတႃႉ။သူၸိူဝ်းဢၼ်ႁူႉၼႃႇမႃႉၸိုဝ်သဵင်မၼ်း တင်းသဵင်ႈတင်းလူင်ၶဝ်ဢိူၺ်း ဢွၼ်ၵၼ်လၢတ်ႈလႄႈဝႃႈၵၼ်းႁွၵ်ႇဢၼ်တၼ်းၶူဝ်းယႂ်ႇ၊ ၶွၼ်ႉႁေႃႈဢၼ်သရေႇႁၢင်ႊလီႁၢင်ႊငၢမ်းၼၼ်ႉႁၵ်းယဝ်ႉလူင်ပေႇ၊ဝႃႈၼင်ႇၼႆတႃႉ။
၁၈ လုၵ်ႈယိင်းဢၼ်ယူႇၵႃႈၼႂ်းဝဵင်းတိၽုၼ်ႇဢိူၺ်း၊ လူင်းသေၵႃႈတီႈၸေးၸိမ်ႇ ဢၼ်မႂ်းၸၢမ်ႇၸႃးၼၼ်ႉလႄႈၶၢမ်ႇဢိုပ်းၶၢမ်ႇယၢၵ်ႈယူႇသေလႄႈၼင်ႈတႃႉ။ၵေႃႉဢၼ်ႁိမ်ဢဝ်ႁူင်ႇဢဝ်မေႃႇၽ ၼၼ်ႉတၵ်းမႃးယူႇၽၢႆႇၼိုင်ႈတင်းမႂ်းလႄႈ ယႃႉၽဵဝ်ႈတိူၵ်ႈတီႈတိုၵ်းသိုၵ်းမႂ်း ပႅတ်ႈဢေႃႈ။
၁၉ ၵူၼ်းဢၼ်ယူႇၵႃႈတီႈဝဵင်းဢႃႇရေႃႇဢိူၺ်း။ ၸုၵ်းယူႇၵႃႈတီႈႁိမ်းသဵၼ်ႈတၢင်းသေလႄႈလူတူၺ်းတႃႉ။တွင်ႉထၢမ်တီႈၵူၼ်းၸၢႆးဢၼ်ဢွၵ်ႇပၢႆႈဢိၵ်ႇတင်း မေႈယိင်းဢၼ်လွတ်ႈဢသၢၵ်ႈၸိူဝ်းၼၼ်ႉ လႄႈဝႃႈ မီးဢမူႉၵႃႈသင်ဝႃႈၼင်ႇၼႆတႃႉ။
၂၀ မေႃႇၽၼၼ်ႉၸႂ်လူႉလႄႈ မီးတၢင်းဢၼ်လူမ်ႉပင်းယဝ်ႉယဝ်ႉ။ဢွၼ်ၵၼ်ဢဝ်လွင်ႈဢၼ်မိူင်းမေႃႇၽ လူႉလႅဝ်ၼၼ်ႉ မွၵ်ႇလၢတ်ႈတီႈဝဵင်းဢႃႇၼုၼ်ႇတႃႉ။
၂၁ တၢင်းဢၼ်ၸီႇယၢင်ႇဢပျႅတ်ႈ လႆႈႁွတ်ႈထိုင်ၵႃႈၼိူဝ် တီႈပၢင်ႇတီႈပဵင်းဢိၵ်ႇတင်းဝဵင်းႁေႃႇလုၼ်ႇ၊ ဝဵင်းယႁႃႇၸ၊ဝဵင်းမေႇ ၽတ်ႉ၊ဝဵင်းတိၽုၼ်ႇ၊
၂၂ ဝဵင်း ၼေႇပေႃႇ၊ဝဵင်းပႅတ်ႉတီႇပလ သိမ်ႇ၊ဝဵင်းၵိရယသိမ်ႇ၊ ဝဵင်းပႅတ်ႉၵမုလ၊
၂၃ ဝဵင်းပႅတ်ႉမွင်ႇ၊ဝဵင်းၵေႇရုတ်ႉ၊ ဝဵင်းပေႃႇၸရ ဢိၵ်ႇတင်း
၂၄ ဝဵင်းဢၼ်ၵႆဢၼ်ၸမ်ၵႃႈဢၼ်မီးၵႃႈၼႂ်းမိူင်းမေႃႇၽ ၸိူဝ်းၼၼ်ႉ ဢေႃႈ။ၶဝ်လႅမ်မေႃႇၽၼၼ်ႉပုတ်းၵႂႃႇၶၢတ်ႇၵႂႃႇယဝ်ႉ။
၂၅ ၶႅၼ်မိုဝ်းမၼ်းၼၼ်ႉ ႁၵ်းၵႂႃႇၵႅင်ႉၵႂႃႇယဝ်ႉဝႃႈၼင်ႇၼႆ ထႃႇဝရႃႉၽြႃးမီးဢမိင်ႉဢေႃႈ။
၂၆ ၵွပ်ႈပိူဝ်ႈဢၼ်မၼ်းဢုပ်ႇဢၢတ်ႇယူႇၽၢႆႇၼိုင်ႈတင်းထႃႇဝရႃႉၽြႃးလႄႈ ဢွၼ်ၵၼ်ႁႂ်ႈမၼ်းမဝ်းလဝ်ႈမဝ်းၵမ်တႃႉ။မိူင်းမေႃႇၽလႆႈၵိင်ႈၵိူၵ်ႇယူႇၵႃႈၼႂ်းႁၢၵ်ႈမၼ်းလႄႈ မၼ်းလႆႈၶၢမ်ႇတၢင်း ဢၼ်သေႉဢၼ်သွမ်းၼႃႇလူင်လၢင်ဢေႃႈ။
၂၇ ဢိသရေႇလပဵၼ်တီႈဢၼ်မႂ်းသေႉသွမ်းယဝ်ႉဢမ်ႇၸႂ်ႈႁိုဝ်။ယၢမ်ႈတွၼ်ႉထူပ်းႁၼ်မၼ်းၼၼ်ႉ ႁူမ်ႈပွင်းယူႇလူၺ်ႈၵၼ်တင်းၽူႈလၵ်ႉၽူႈလိူတ်ႈႁိုဝ်။ၼႂ်းမိူဝ်ႈဢၼ်မႂ်းလၢတ်ႈ လွင်ႈမၼ်းၵူႈပွၵ်ႈၼၼ်ႉမႂ်းငွၵ်းႁူဝ်မႂ်းလူင်ပေႇ။
၂၈ သူၸိူဝ်းဢၼ်ယူႇၵႃႈတီႈမိူင်းမေႃႇၽ ဢိူၺ်းဢွၼ်ၵၼ်ၸုၼ်ႉပႅတ်ႈဝဵင်းတင်းလၢႆသေလႄႈ ယူႇၵႃႈၼႂ်းၵႄႈမၢၵ်ႇႁိၼ်မၢၵ်ႇၽႃတႃႉ။ဢွၼ်ၵၼ်ႁဵတ်းၸိူဝ်ႉၼင်ႇၼူၵ်ႉတူႈဢၼ်ၸၢင်ႊႁဵတ်းႁၢင်ႊယူႇၵႃႈတီႈႁိမ်းႁူးထမ်ႈၼၼ်ႉတႃႉ။
၂၉ ႁဝ်းလႆႈႁူႉလႆႈငိၼ်းမႃႇၼႃႉမေႃႇၽ တၢင်းဢၼ်မၼ်းၸႂ်သုင်ၼႃႇ၊ တၢင်းဢၼ်မၼ်းႁဵတ်းတူဝ်း၊ မႃႇၼႃႉမၼ်း၊တၢင်းဢၼ်မၼ်းပုၵ်းပႅၼ်ၽႅၼ်သုင်၊ တၢင်း ဢၼ်မၼ်းဢမ်ႇၼပ်ႉယမ်ပိူၼ်ႈၸိူဝ်းၼၼ်ႉယဝ်ႉ။
၃၀ ၵဝ်ႁူႉလွင်ႈဢၼ် တေႃးသႃႉတၢင်းၸႂ်မႆႈၶႆႈၸႃႉမၼ်း ပဵၼ်ဢၼ်လၢႆလၢႆလွၵ်ႇလွၵ်ႇၼၼ်ႉလႄႈ တၢင်းဢၼ်မၼ်းလၢတ်ႈၵႂၢမ်းဢုပ်ႇၵႂၢမ်းဢၢတ်ႇၼၼ်ႉ ဢမ်ႇပွင်ႇလွင်ႈၵႃႈသင်၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၃၁ ပိူဝ်ႈၼႆလႄႈ ၵဝ်တၵ်းႁွင်ႉႁႆႈပွင်ႉၶၢင်းၵွပ်ႈပိူဝ်ႈမိူင်းမေႃႇၽဢေႃႈ။ တၵ်းသႅၼ်ႇသဵင်ၵိဝ်သဵင်ၵွပ်ႈပိူဝ်ႈမိူင်းမေႃႇၽတင်းမိူင်းဢေႃႈ။ ၶဝ်တၵ်းလႆႈမီးတၢင်းဢၼ်ၶၢင်းၶီၶၢင်းၽၢၼ်ၵွပ်ႈပိူဝ်ႈၵူၼ်းဝဵင်း ၵိရႁရိၵ်ႉ ၸိူဝ်းၼၼ်ႉ ဢေႃႈ။
၃၂ ၶိူဝ်းတူၼ်ႈမၢၵ်ႇၸပိတ်ႈၸိပမႃႇဢိူၺ်း။ၵဝ်တၵ်းၼမ်တႃတုၵ်းပုၼ်ႈမႂ်း လိူဝ်တွၼ်းၼႃႇသေၼမ်ႉတႃတုၵ်းပုၼ်ႈဝဵင်းယႃႇၸႃႇၼၼ်ႉဢေႃႈ။ ယွတ်ႈမႂ်းၸိူဝ်းၼၼ်ႉ ဢွၼ်ၵၼ်ပူၼ်ႉပၢင်ႇလၢႆႇၵႂႃႇလႄႈ ၽႅဝ်တေႃႇထိုင်ႁွတ်ႈပၢင်ႇလၢႆႇယႃႇၸႃႇဢေႃႈ။ၵေႃႉဢၼ်ယႃႉပႅတ်ႈၼၼ်ႉ ႁိမ်ဢဝ်ႁူင်ႇဢဝ်မၢၵ်ႇမႆႉမၢၵ်ႇတွၵ်ႇမႂ်း ဢိၵ်ႇတင်းမၢၵ်ႇၸပိတ်ႈမႂ်းဢေႃႈ။
၃၃ တၢင်းဢၼ်မူၼ်ႈပျေႃႇ၊တၢင်းဢၼ်ၸူမ်းသိူဝ်းထၢတ်ႇၵႂႃႇသေၵႃႈၼႂ်းတီႈပၢင်ႇတီႈပဵင်း ဢၼ်ၶွၼ်ႇၼမ်ႉမၼ်းလိၼ်လီဢၼ်ဝႃႈမိူင်းမေႃႇၽၼၼ်ႉယဝ်ႉ။ၵဝ်ႁႂ်ႈၼမ်ႉၸပိတ်ႈထၢတ်ႈၵႂႃႇသေၵႃႈတီႈၶိူင်ႈၼူတ်ႈမၢၵ်ႇၸပိတ်ႈၼၼ်ႉယဝ်ႉ။ၽူႈ လႂ် ဢမ်ႇလႆႈႁဵတ်းသဵင်ဢၼ်ႁုၼ်ႉဢၼ်ႁိူဝ်ႇသေလႄႈယဵပ်ႇယမ်ႈမၢၵ်ႇၸပိတ်ႈ။ သဵင်ဢၼ်ႁုၼ်ႉဢၼ်ႁိူဝ်ႇ ၼၼ်ႉဢမ်ႇလႆႈၸိုဝ်လႆႈသဵင်ဢၼ်ႁုၼ်ႉဢၼ်ႁိူဝ်ႇ။
၃၄ ၸႃႉၸဵမ်သဵင်ႁွင်ႉသဵင်ႁႆႈ ဝဵင်းႁေႇသၽုၼ်ႇ လႄႈ ၶဝ်ဢွၼ်ၵၼ်ၵိဝ်သဵင်တေႃႇထိုင်ႁွတ်ႈဝဵင်းဢေႇလႃႇ လႄႈတေႃႇထိုင်ႁွတ်ႈဝဵင်းယႃႇႁတ်ႉ ဢိၵ်ႇတင်းၸႃႉၸဵမ်ဝဵင်းၸေႃႇရ တေႃႇထိုင်ႁွတ်ႈဝဵင်းႁေႃႇရၼိမ်ႇၼၼ်ႉမိူၼ်ၸိူဝ်ႉၼင်ႇ သဵင်ဝူဝ်းမေႈ ဢၼ်ဢသၢၵ်ႈလႆႈသၢမ်ပီႊၼၼ်ႉ ႁွင်ႉၼၼ်ႉဢေႃႈ။လွင်ႈမၼ်းၸမ်းၼမ်ႉၼွင်ၼိမ်ႇရိမ်ႇ ၸိူဝ်းၼၼ်ႉၵေႃႈဢွၼ်ၵၼ်မီးတၢင်းဢၼ်သိတ်ႇ ဢၼ်ယဵၼ်ယူႇဢေႃႈ။
၃၅ ၵဝ်တၵ်းႁႂ်ႈၵေႃႉဢၼ်ပုၵ်ႉၸေႃႇၵႃႈၼိူဝ်ထႃႇၼႃႉတီႈသုင်၊ၵေႃႉဢၼ်ဢဝ်ၼၢမ်ႇသႃႇတုတ်ႇၽႆးတီႈၽြႃးမၼ်းၸိူဝ်းၼၼ်ႉ ထၢတ်ႇၵႂႃႇသေၵႃႈတီႈမိူင်းမေႃႇၽဢေႃႈ၊ ဝႃႈၼင်ႇၼႆထႃႇဝရႃႉၽြႃး မီးဢမိင်ႉဢေႃႈ။
၃၆ ပိူဝ်ႈၼႆလႄႈႁူဝ်ၸႂ်ၵဝ်ၼႆႉမီးတၢင်းဢၼ်လင်ယူႇမိူၼ်ၸိူဝ်ႉၼင်ႇပီႇၼင်ႇၼႄးၼၼ်ႉ ၵွပ်ႈပိူဝ်ႈမိူင်းမေႃႇၽလႄႈ ႁူဝ်ၸႂ်ၵဝ်ၼႆႉမီးတၢင်းဢၼ်လင်ယူႇမိူၼ်ၸိူဝ်ႉၼင်ႇပီႇၼင်ႇၼႄးၼၼ်ႉ ၵွပ်ႈပိူဝ်ႈၵူၼ်းဝဵင်းၵိရႁရိၵ်ႉၸိူဝ်းၼၼ်ႉဢေႃႈ။ဢုၵ်ႉၸႃႇဢၼ်ၶဝ်ၵဵပ်းႁွမ်သိမ်းပႅင်း ဝႆႉၼၼ်ႉလူႉလႅဝ်ၵႂႃႇယဝ်ႉ။
၃၇ ၵူႈၵေႃႉၵူႈၵူၼ်းလႆႈမီးတၢင်းဢၼ်ႁူဝ်ပုတ်းယူႇ၊ ထႃၼူတ်ႇၵၢင်းယူႇ၊တိုဝ်းမတ်ႉၵႃႈတီႈမိုဝ်းယူႇ၊ၼုင်ႈၶူဝ်းၼုင်ႈၼင်ပေႃ ၵႃႈတီႈဢႅဝ်ယူႇ ဢေႃႈ။
၃၈ ၵႃႈတီႈၼိူဝ်မုင်းႁိူၼ်းမေႃႇၽတင်းလၢႆဢိၵ်ႇတင်းၵႃႈၼႂ်းသဵၼ်ႈတၢင်းမၼ်းၵႃႈမီးၼၼ်ႉ မီးတၢင်းဢၼ်ၶၢင်းၶီၶၢင်းၽၢၼ် ပွင်ႉမိူၼ်ႇၵူႈတီႈၵူႈလႅၼ်ၵွပ်ႈပိူဝ်ႈဢၼ်ၵဝ်ဢဝ် မိူင်းမေႃႇၽ တႅၵ်ႇပႅတ်ႈမိူၼ်ၸိူဝ်ႉၼင်ႇဢၼ်ဢဝ်မေႃႈဢၼ်ဢမ်ႇလႆႈဢသုင်းၼၼ်ႉတႅၵ်ႇပႅတ်ႈၼၼ်ႉဢေႃႈ၊ ဝႃႈၼင်ႇၼႆထႃႇဝရႃႉၽြႃး မီးဢမိင်ႉဢေႃႈ။
၃၉ ၶဝ်ဢွၼ်ၵၼ်ၶၢင်းၶီၶၢင်းၽၢၼ်ပွင်ႉမိူၼ်ႇလႄႈဝႃႈ မိူင်းမေႃႇၽ ၼၼ်ႉၵိူၼ်ႇပင်းၵႂႃႇယဝ်ႉလူင်ပေႇ။ဢူၵ်းလၢႆလႄႈသုတ်ႈၶိုၼ်းၵႂႃႇယဝ်ႉလူင်ပေႇ၊ဝႃႈၼင်ႇၼႆဢေႃႈ။ မိူင်းမေႃႇၽၼၼ်ႉတၵ်းလႆႈပဵၼ်တီႈဢၼ်သေႉသွမ်းဢိၵ်ႇတင်း တီႈဢၼ်တူၵ်းၸႂ်ၵူဝ်ႁႄတီႈၶဝ်ၸိူဝ်းဢၼ် ယူႇႁိမ်းႁွမ်းလဵပ်ႈႁွပ်ႈမၼ်းၼၼ်ႉဢေႃႈ။
၄၀ ထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။မၼ်းၼၼ်ႉတၵ်းမိၼ်မႃးမိူၼ်ၸိူ်ဝ်ႉၼင်ႇႁူင်ႉၶမ်း ၼၼ်ႉလႄႈ ဢဝ် ပိၵ်ႇမၼ်းႁူမ်ႇသုမ်ႇမိူင်းမေႃႇၽဢေႃႈ။
၄၁ ၵေႇရုတ်ႉလႆႈၶၢမ်ႇတၢင်းဢၼ်သိမ်းဢဝ်လႄႈ တိူၵ်ႈတီႈတိုၵ်းသိုၵ်းၸိူဝ်းၼၼ်ႉလႆႈၶၢမ်ႇတၢင်းဢၼ် ၶီႉၶႃႉတိုၵ်းတေႃးဢဝ်လႄႈၼႂ်းမိူဝ်ႉဝၼ်းၼၼ်ႉႁူဝ်ၸႂ်ႁူဝ်ႁၢၼ်ၵူၼ်းသိုၵ်း မေႃႇၽတင်းလၢႆတၵ်းလႆႈပဵၼ်ၸိူဝ်ႉၼင်ႇ ႁူဝ်ၸႂ်မေႈယိင်းဢၼ်လႆႈၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈ ၼၼ်ႉဢေႃႈ။
၄၂ မေႃႇၽၼၼ်ႉတၵ်းလႆႈလူႉလႆႈလႅဝ်ထၼ်ႈပေႃးဢမ်ႇပဵၼ်မိူင်းလႆႈမိူဝ်ႈၵမ်းလိုၼ်းၼၼ်ႉ ၵွပ်ႈပိူဝ်ႈဢၼ်မၼ်းဢုပ်ႇဢၢတ်ႇ ယူႇၽၢႆႇၼိုင်ႈတင်းထႃႇဝရႃႉ ၽြႃးၼၼ်ႉဢေႃႈ။
၄၃ ၵူၼ်းဢၼ်ယူႇၵႃႈတီႈမိူင်းမေႃႇၽဢိူၺ်း။ တၢင်းဢၼ်လီၵူဝ်လီႁႄ၊ၶုမ်လိၼ်ႁူးလိၼ်၊ တူင်ႇႁဵဝ်ႉတူင်ႇၶိုမ်းႁွတ်ႈထိုင်ၵႃႈၼိူဝ်မႂ်းယဝ်ႉ။
၄၄ ၵေႃႉဢၼ်ဢွၵ်ႇပၢႆႈသေ ၵႃႈတီႈတၢင်းဢၼ်လီၵူဝ်လီႁႄၼၼ်ႉတၵ်းတုၵ်းသႂ်ႇၵႃႈၼႂ်းၶုမ်လိၼ်ႁူးလိၼ်ဢေႃႈ။ ၵေႃႉဢၼ်ဢွၵ်ႇသေ ၶုမ်လိၼ်ႁူးလိၼ်ၼၼ်ႉ တၵ်းထုၵ်ႇၶဵၼ်းမႅၼ်ႈၵႃႈၼႂ်းတူင်ႇႁဵဝ်ႉတူင်ႇၶိုမ်းဢေႃႈ။ၵဝ်တၵ်းႁႂ်ႈၶူပ်ႇပီႊဢၼ်ၶဝ်လႆႈၶၢမ်ႇ တၢင်းဢၼ်သင်ႇသွၼ်သုင်းမႃႉၼၼ်ႉႁွတ်ႈထိုင်ၵႃႈၼိူဝ်မိူင်းမေႃႇၽဢေႃႈ၊ ဝႃႈၼင်ႇၼႆထႃႇဝရ ၾႃႉၽြႃးမီးဢမိင်ႉဢေႃႈ။
၄၅ ၶဝ်ၸိူဝ်းဢၼ်ဢွၵ်ႇပၢႆႈၼၼ်ႉႁႅင်းဢူၼ်ႈႁႅင်းသဵင်ႈလႄႈ ဢွၼ်ၵၼ်သွၼ်ႈပိုင်ႈယူႇၵႃႈတႂ်ႈႁူမ်ႈဝဵင်းႁေႇသၽုၼ်ႇ သေၵေႃႈၽႆးဢွၵ်ႇသေၵႃႈၼႂ်းဝဵင်းႁေႇသၽုၼ်ႇ၊ ပိဝ်ၽႆးဢွၵ်ႇသေၵႃႈၼႂ်းတီႈယူႇၶုၼ်သိႁူၼ်ႇ လႄႈမႆႉတီႈၸွၵ်ႉတီႈၸဵင်ႇလိၼ်မိူင်းမေႃႇၽ ဢိၵ်ႇတင်းၸိၵ်းႁူဝ်ၶဝ်ၸိူဝ်းဢၼ်မႃႇၼႃႉပုၵ်းပႅၼ် ဢူၼ်ဢဵၼ်မေႃးမေးယူႇၼၼ်ႉ ဢေႃႈ။
၄၆ မေႃႇၽဢိူၺ်း။မႂ်းၼႆႉမီးဢႃႉမင်ႇၵလႃႇဢေႃႈ။တပေးတပၢၼ်းၶေႇမုသၸိူဝ်းၼၼ်ႉႁၢႆလၢႆၵႂႃႇယဝ်ႉ။လုၵ်ႈၸၢႆးမႂ်းတင်းလၢႆ လႆႈၶၢမ်ႇတၢင်းဢၼ်သိမ်းဢဝ်ၵႂႃႇလႄႈ လုၵ်ႈယိင်းမႂ်းတင်းလၢႆလႆႈၶၢမ်ႇတၢင်းဢၼ် ဢဝ်ၶၢႆႉတီႈၵႂႃႇယဝ်ႉ။
၄၇ ၼႂ်းဝႃႈၼၼ်သေၵေႃႈၶိင်ႇၵႃႇလႃႉမိူဝ်ႉဝၼ်းၵမ်းလိုၼ်းၼၼ်ႉ ၵဝ်တၵ်းဢဝ်ၵူၼ်းမဵဝ်းမေႃႇၽ ဢၼ်လႆႈၶၢမ်ႇတၢင်းဢၼ် သိမ်းဢဝ်ၵႂႃႇၸိူဝ်းၼၼ်ႉၶိုၼ်းမႃးဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။ဢၼ်ၼႆႉၸမ်းပဵၼ်တၢင်းဢၼ်ၸီႇယၢင်ႇၸွမ်းၼင်ႇတြႃးဢၼ်မိူင်းမေႃႇၽလႆႈၶၢမ်ႇဢေႃႈ။