၄၀
ယေႇရမိဢွၵ်ႇပၢႆ
၁ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ယေႇရမိလိုၼ်းသေၵူဝ်ႇရၢမ်ႇမူးၼေႇပုၸႃႇရတၼ်ႇ ပွႆႇမၼ်းလွတ်ႈၵႃႈတီႈဝဵင်းရႃႇမၼၼ်ႉဢေႃႈ။မိူဝ်ႈၼၼ်ႉၼေႇပုၸႃႇရတၼ်ႇ ႁၼ်မၼ်းလႆႈၶၢမ်ႇၸိူၵ်ႈလဵၵ်းမတ်ႉၽုၵ်ႈႁူမ်ႈလူၺ်ႈၵၼ်တင်းၵူၼ်းမိူင်းယုတ၊ ၵူၼ်းဝဵင်းယေႇရုသလႅမ်ႇ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈ တီႈဝဵင်းပႃႇပုလုၼ်ႇၼၼ်ႉဢေႃႈ။
၂ ၵူဝ်ႇရၢမ်ႇတေႃႇမူးၼၼ်ႉႁွင်ႉဢဝ် ယေႇရမိ လႄႈလၢတ်ႈတီႈမၼ်းလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမႂ်းၼၼ်ႉၸီႇယၢင်ႇမွၵ်ႇလၢတ်ႈထႃးဝႆႉ ဢမူႉဢၼ်ႁွတ်ႈထိုင်ၵႃႈတီႈမိူင်းၼႆႉၼၼ်ယဝ်ႉ။ ထႃႇဝရႃႉၽြႃး ႁႂ်ႈဢမူႉၼၼ်ႉႁွတ်ႈထိုင်လႄႈ ၸီႇယၢင်ႇႁဵတ်းၸွမ်းၵႃႈၼင်ႇဢၼ်မၼ်းၸဝ်ႈ မွၵ်ႇလၢတ်ႈၼၼ်ႉယဝ်ႉ။
၃ ၵွပ်ႈပိူဝ်ႈဢၼ်သူယင်းဢမ်ႇထွမ်ႇဢဝ်ဢမိင်ႉၸဝ်ႈလႄႈ ၽိတ်းပိူင်ႈထႃႇဝရႃႉၽြႃးၼၼ်ႉလႄႈဢမူႉၼႆႉႁွတ်ႈထိုင်ၵႃႈၼိူဝ်သူယဝ်ႉ။မိူဝ်ႈလဵဝ်ၼႆႉ ၵဝ်တၵ်းထွၵ်ႇၸိူၵ်ႈလဵၵ်းဢၼ်မတ်ႉၽုၵ်ႇၵႃႈတီႈမိုဝ်းမႂ်းၼၼ်ႉပႅတ်ႈဢေႃႈ။ ပေႃးမႂ်းမီးဢလူဝ်ႇၶႂ်ႈၸွမ်းလူၺ်ႈၵၼ်တင်းၵဝ်ၵႂႃႇၵႃႈတီႈဝဵင်းပႃႇပုလုၼ်ႇ ၸိုင်ၸွမ်းသေၵမ်းတႃႉ။ၵဝ်တၵ်းလူတူၺ်းလုမ်းလႃးမႂ်းလီ လီငၢမ်းငၢမ်းဢေႃႈ။
၄ ပေႃးမႂ်းဢမ်ႇမီးဢလူဝ်ႇၶႂ်ႈၸွမ်းလူၺ်ႈၵၼ်တင်းၵဝ်ၵႂႃႇၵႃႈတီႈဝဵင်းပႃႇပုလုၼ်ႇ ၵေႃႈယႃႇပေၸွမ်း။မိူင်းၼႆႉတင်းမိူင်းမီးယူႇၵႃႈတီႈၽၢႆႇၼႃႈမႂ်းဢေႃႈ။တီႈဢၼ်မႂ်းထၢင်ႇပဵၼ်ဢၼ်လီဢၼ်ငၢမ်းလႄႈ ထုၵ်ႇလီၵႂႃႇၼၼ်ႉၵႂႃႇၸူးၵႃတီႈၼၼ်ႉသေၵမ်း၊ ဝႃႈၼင်ႇၼႆဢေႃႈ။
၅ ၸူဝ်ႈဢၼ်မၼ်းဢမ်ႇပႆႇဝၢႆႇၶိုၼ်းသေၵႃႈတီႈမၼ်းၼၼ်ႉၸိုင် မၼ်းၼၼ်ႉလၢတ်ႈထႅင်ႈလႄႈဝႃႈ၊- မႂ်းၶိုၼ်းမိူဝ်းၵႂႃႇၸူးၵႃႈတီႈၵေႇတိလုၵ်ႈၸၢႆးဢႁိၵမ်ႇ ဢၼ်ပဵၼ်လုၵ်ႈၸၢႆးသႃႇၽၼ်ႇဢၼ်ၶုၼ်ႁေႃၶမ်းပႃႇပုလုၼ်ႇ ၶၢၼ်းဝႆႉႁဵတ်းပူႇၵေႇၵႃႈၼိူဝ်ဝဵင်းယုတ ၸိူဝ်းၼၼ်ႉၼၼ်ႉလႄႈယူႇလူၺ်ႈၵၼ်တင်းမၼ်းၵႃႈၼႂ်းၵူၼ်းဝၢၼ်ႈ ၵူၼ်းမိူင်းတင်းလၢႆသေၵမ်း။ဢမ်ႇၼၼ်ၵေႃႈ ၵႂႃႇၵႃႈတီႈဢၼ်မႂ်းထၢင်ႇပဵၼ်ဢၼ်မႂ်းထုၵ်ႇလီၵႂႃႇၼၼ်ႉသေၵမ်း၊ဝႃႈၼင်ႇၼႆဢေႃႈ။ၼင်ႇၼၼ်လႄႈၵူဝ်ႇရၢမ်ႇတေႃႇမူးၼၼ်ႉ ပၼ်ၸရိပ်ႈတၢင်းၵိၼ်ဢိၵ်ႇတင်းလၢၵ်ႈသွင်ႇတီႈမၼ်းသေလႄႈ ပွႆႇမၼ်း သေဢေႃႈ။
၆ မိူဝ်ႈၼၼ်ႉယေႇရမိၵႂႃႇၸူးၵႃႈတီႈၵေႇတလိလုၵ်ႈၸၢႆးဢႁိၵမ်ႇၵႃႈတီႈဝဵင်းမိၸပႃႇ ၼၼ်ႉလႄႈယူႇလူၺ်ႈၵၼ်တင်းၵူၼ်းတင်းလၢႆ ဢၼ်ယင်းၵိုတ်းယင်းၵျၢၼ်ႇၵႃႈၼႂ်းမိူင်းၸဝ်ႈၼၼ်ႉဢေႃႈ။
ၵေႇတလိလႆႈၶၢမ်ႇဢဝ်တၢႆ
၇ မိူဝ်ႈၼၼ်ႉ တပ်ႉမူးၵႃႈမီးဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်မီးၵႃႈတီႈထိူၼ်ႇၸိူဝ်းၼၼ်ႉ ငိၼ်းလွင်ႈဢၼ်ၶုၼ်ႁေႃၶမ်းပႃႇပုလုၼ်ႇဢဝ်ၵေႇတလိ လုၵ်ႈၸၢႆးဢႁိၵမ်ႇ ၶၢၼ်းဝႆႉႁႂ်ႈပဵၼ်ၵေႃႉဢၼ်ဢုပ်ႉၵႃႈၼိူဝ်မိူင်းလႄႈဢဝ်ၵူၼ်းၸၢႆး၊ၵူၼ်းယိင်း၊ လုၵ်ႈဢွၼ်ႇ၊ၵူၼ်းဢၼ်ယၢၵ်ႈဢၼ်ၽၢၼ်ဢၼ််ဢမ်ႇပႃး လူၺ်ႈၵၼ်တင်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ၵႃႈတီႈ
၈ ဝဵင်းပႃႇပုလုၼ်ႇ ၸိူဝ်းၼၼ်ႉဢၢပ်ႈဝႆႉၵႃႈၼႂ်းမိုဝ်းမၼ်းၼၼ်ႉၸိုင်ၶဝ်ၼၼ်ႉဢၼ်ပဵၼ်ဢိသမေႇလ လုၵ်ႈၸၢႆးၼႃႇသၼိ၊ယေႃႇႁၼၼ်ႇတင်း ယေႃႇၼသၼ်ႇလုၵ်ႈၸၢႆးၵႃႇရႃႇ၊ၸရႃႇယ လုၵ်ႈၸၢႆးတႃႇၼုမိတ်ႉလုၵ်ႈၸၢႆးဢေႇၽေႇ ၵူၼ်းမဵဝ်းတေႃႇၽတ်ႉတင်းလၢႆယေႇၸၼိလုၵ်ႈၸၢႆးၵူၼ်းမဵဝ်းမႃႇၶသိ ၸိူဝ်းၼၼ်ႉဢိၵ်ႇလူၺ်ႈၵၼ်တင်းၵူၼ်းၶဝ်တင်းလၢႆ ဢွၼ်ၵၼ်မႃးၸူး ၵႃႈတီႈၵေႇတလိ
၉ ၵႃႈတီႈဝဵင်းမိၸပႃႇၼၼ်ႉလႄႈၵေႇတလိလုၵ်ႈၸၢႆးဢႁိၵမ်ႇ ဢၼ်ပဵၼ်လုၵ်ႈၸၢႆးသႃႇၽၼ်ႇၼၼ်ႉ တိူင်ႇဝႃႈၵိၼ်ႇဝႃႈတီႈၶဝ်ဢိၵ်ႇတင်းၵူၼ်းၶဝ်တင်းလၢႆလႄႈဝႃႈ၊- သူယႃႇပေဢွၼ်ၵၼ်မႆႈၸႂ်လူၺ်ႈလွင်ႈဢၼ်တၵ်းလႆႈၵိုတ်ႈႁၢပ်ႇဢမူႉၶုၼ် ၶႃႇလတေႇၼၼ်ႉ။ဢွၼ်ၵၼ်ယူႇၵႃႈၼႂ်းမိူင်းၼႆႉလႄႈ ၵိုတ်ႈႁၢပ်ႇဢမူႉၶုၼ်ႁေႃၶမ်းပႃႇပုလုၼ်ႇတႃႉ။ပေႃးႁဵၼ်းၸိူဝ်ႉၼင်ႇၼၼ်ၸိုင် တၵ်းပဵၼ်ဢၼ်ၵတ်းယဵၼ်ၶျၢမ်းသႃႇ ပုၼ်ႈသူဢေႃႈ။
၁၀ ၵဝ်ၸမ်းတၵ်းယူႇၵႃႈတီႈဝဵင်းမိၸပႃႇၼႆႉႁႂ်ႈလႆႈၸုၵ်းၶၢမ်ႇဢဝ်ဢမိင်ႉၵူၼ်း ၶႃႇလတေႇတင်းလၢႆဢၼ်တၵ်းမႃးၸူးတီႈႁဝ်းၼၼ်ႉဢေႃႈ။သူၸမ်းဢွၼ်ၵၼ်သိမ်းဢဝ်ၼမ်ႉၸပိတ်ႈ၊ မၢၵ်ႇၶိင်ႇမႆႈမၢၵ်ႇၶိင်ႇႁိုဝ်ႉတင်းၼမ်ႉမၼ်းလႄႈ သႂၢင်းသႂ်ႇဝႆႉၵႃႈၼႂ်းမေႃႈသူဢုမ်သူသေလႄႈ ယူႇၵႃႈၼႂ်းဝဵင်းဢၼ်သူၶိုၼ်းၶဝ်ႈယူမိူဝ်ႈလဵဝ်ၼႆႉၸိူဝ်းၼၼ်ႉတႃႉ၊ဝႃႈၼင်ႇၼႆဢေႃႈ။
၁၁ လိူဝ်သေၼၼ်ႉ မိူဝ်ႈဢၼ်ၵူၼ်းယုတၵႃႈဢၼ်မီးယူႇၵႃႈၼႂ်းမိူင်းမေႃႇၽ ၵႃႈၼႂ်းမိူင်းဢမ်ႇမုၼ်ႇၵႃႈၼႂ်းမိူင်းဢေႇတုမ်ႇ ဢိၵ်ႇတင်းၵႃႈၼႂ်းၵူႈသိုင်ႇၵူႈမိူင်းၸိူဝ်းၼၼ်ႉငိၼ်းလွင်ႈဢၼ်ၶုၼ်ႁေႃၶမ်းပႃႇပုလုၼ်ႇ ႁႂ်ႈၵူၼ်းၵမ်ႈၽွင်ႈၵိုတ်းၵျၢၼ်ႇဝႆႉၵႃႈၼႂ်းမိူင်းယုတ လႄႈ
၁၂ ဢဝ်ၵေႇ တလိလုၵ်ႈၸၢႆးဢႁိၵမ်ႇဢၼ်ပဵၼ်လုၵ်ႈၸၢႆးသႃႇၽၼ်ႇၶၢၼ်းဝႆႉႁႂ်ႈပဵၼ်ၶုၼ်ၵႃႈၼိူဝ်ၶဝ်ၼၼ်ႉၸိုင် ၵူၼ်းယုတ တင်းသဵင်ႈတင်းလူင်လုၵ်ႉသေၵႃႈတီႈမိူင်းၵႃႈဢၼ်ၶဝ်လႆႈၶၢမ်ႇ တၢင်းဢၼ်ႁေႃႈဢွၵ်ႇၸူးၼၼ်ႉၸိူဝ်းၼၼ်ႉၶိုၼ်းမႃးလႄႈ ႁွတ်ႈထိုင်ၵႃႈတီႈမိူင်းယုတၸူးၵႃႈတီႈၵေႇတလိၵႃႈၼႂ်းဝဵင်းမိၸပႃႇ ၼၼ်ႉၶိင်ႇမႆႈၶိင်ႇႁိုဝ်ႉဢၼ်ၼမ်ၼႃႇလူင်လၢင်ၼၼ်ႉဢေႃႈ။
၁၃ လိုၼ်းၼၼ်ႉယေႃႇႁၼၼ်ႇ လုၵ်ႈၸၢႆးၵႃႇရႃႇၼၼ်ႉဢိၵ်ႇတင်းတပ်ႉမူးၵႃႈဢၼ်မီးၵႃႈတီႈထိူၼ်ႇၸိူဝ်းၼၼ်ႉဢွၼ်ၵၼ်မႃးၸူးၵႃႈတီႈၵေႇတလိ ၵႃႈတီႈဝဵင်း မိၸပႃႇၼၼ်ႉလႄႈလဝ်ႈထၢမ်လႄႈဝႃႈ၊-
၁၄ ၸဝ်ႈႁဝ်းႁူႉလွင်ႈဢၼ်ပႃႇလိတ်ႉၶုၼ်ႁေႃၶမ်းဢမ်ႇမုၼ်ႇပွႆႇၸႂ်ႉ ဢိသမေႇလ လုၵ်ႈၸၢႆးၼႃႇသၼိ ၼၼ်ႉမႃးႁႂ်ႈလႆႈဢဝ်ၸဝ်ႈႁဝ်းတၢႆၼၼ်ႉဢမၢၼ်ႇၶၢၼ်ပဵၼ်ယဝ်ႉၶႃႈႁိုဝ်၊ ဝႃႈၼင်ႇၼႆသေၵေႃႈၵႂၢမ်းၼၼ်ႉၸိုင်ၵေႇတလိ လုၵ်ႈၸၢႆး ဢႁိၵမ်ႇ ၼၼ်ႉဢမ်ႇယုမ်ႇၶဝ်။
၁၅ မိူဝ်ႈၼၼ်ႉ ယေႃႇႁၼၼ်ႇ လုၵ်ႈၸၢႆးၵႃႇရႃႇ ၼၼ်ႉတဵတ်ႇတဵတ်ႇလဝ်ႈလၢတ်ႈတီႈၵေႇတလိ ၵႃႈၼႂ်းဝဵင်းမိၸပႃႇလႄႈဝႃႈ၊-ပၼ်ဢၶႂၢင်ႉဢၼ်ၵဝ်ၶႃႈလႆႈၵႂႃႇလႄႈဢဝ် ဢိသမေႇလ လုၵ်ႈၸၢႆးၼႃႇသၼိၼၼ်ႉတၢႆသေၵမ်း။ၽူႈ လႂ်သေၵေႃႉသေၵူၼ်းဢမ်ႇလႆႈႁူႉလွင်ႈမၼ်းၶႃႈၵူၺ်း။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မၼ်းတၵ်းလႆႈဢဝ်ၸဝ်ႈႁဝ်းတၢႆလႄႈႁႂ်ႈၵူၼ်းယုတ ၵႃႈဢၼ်ၸူႉၵၼ်တုမ်ၵၼ်ယူႇၵႃႈတီႈၸဝ်ႈႁဝ်းၸိူဝ်းၼႆႉ လႆႈၶၢမ်ႇတၢင်းဢၼ်ၸၢတ်ႇပိုၼ်ပႅတ်ႈသေယဝ်ႉ ႁႂ်ႈၵူၼ်းဢၼ်ၵိုတ်းဢၼ်ၵျၢၼ်ႇၵႃႈတီႈမိူင်းယုၸ ၼႆႉၸိူဝ်းၼၼ်ႉလႆႈလူႉလႅဝ်ၼင်ႇႁိုဝ်ၶႃႈ၊
၁၆ ဝႃႈၼင်ႇၼႆသေၵေႃႈ၊ၵေႇတလိ လုၵ်ႈၸၢႆးဢႁိၵမ်ႇၶိုၼ်းလၢတ်ႈတီႈ ယေႃႇႁၼၼ်ႇ လုၵ်ႈၸၢႆးၵႃႇရႃႇလႄႈဝႃႈ၊-မႂ်းဢမ်ႇလႆႈႁဵၼ်းၸိူဝ်ႉၼင်ႇၼၼ်။မႂ်းၶိုၼ်းလၢတ်ႈၵႂၢမ်းဢၼ်ဢမ်ႇၸိုဝ်ႈဢမ်ႇၸႂ်ႈ လူၺ်ႈလွင်ႈဢိသမေႇလ ၼၼ်ႉဢေႃႈ၊ဝႃႈၼင်ႇၼႆဢေႃႈ။