၃၃
ၵတိဢၼ်တေၶိုၼ်းသိမ်းဢဝ်
၁ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈယေႇရမိၵမ်းတုတိယ ၼႂ်းမိူဝ်ႈဢၼ်မၼ်းယင်းတိုၵ်ႉလႆႈၶၢမ်ႇတၢင်းဢၼ်ၶျုၵ်ႈဝႆႉၵႃႈၼႂ်းထွင်ႇၼၼ်ႉလႄႈဝႃႈ၊-
၂ ထႃႇဝရႃႉၽြႃးဢၼ်ႁဵတ်းဢမူႉၼႆႉထႃႇဝရႃႉၽြႃးဢၼ်ၸီႇယၢင်ႇႁဵတ်းပၼ်ဢမူႉၼႆႉ ၽြႃးဢၼ်လႆႈၸိုဝ်ယေႇႁေႃႇ ဝႃႇ ၼၼ်ႉမီးဢမိင်ႉၸမ်း၊-
၃ ႁွင်ႉႁႃၵဝ်တႃႉ။ၵဝ်တၵ်းဢိူဝ်ႈလႄႈၼႄပျႃးလွင်ႈတၢင်းဢၼ်ယႂ်ႇၼႃႇ၊ လွင်ႈတၢင်းဢၼ်လိုၵ်ႉဢၼ်လမ်ႇထၼ်ႈပေႃး မႂ်းဢမ်ႇႁူႉလႆႈၸိူဝ်း ၼၼ်ႉတီႈမႂ်းဢေႃႈ။
၄ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ ဢဝ်လွင်ႈႁိူၼ်းၵႃႈၼႂ်းဝဵင်းၼႆႉတင်းလၢႆဢိၵ်ႇတင်းႁေႃၸဝ်ႈၶုၼ်ႁေႃၶမ်းယုတ ဢၼ်ၵိူၼ်ႇလူႉၵွပ်ႈပိူဝ်ႈတႅၼ်ႈလိၼ်လၢင်းၸီႇ ဢိၵ်ႇတင်းလၢပ်ႇ လႅဝ်းၼၼ်ႉၸိူဝ်းၼၼ်ႉလႄႈမီးဢမိင်ႉၸမ်း၊-
၅ ၶဝ်ဢွၼ်ၵၼ်မႃးႁႂ်ႈလႆႈတိုၵ်းသိုၵ်းၵၼ်တင်း ၵူၼ်းၶႃႇလတေႇတင်းလၢႆဢေႃႈ။ၵူၺ်းၵႃႈၶဝ်တၵ်းမီးတဵမ်ဝႆႉတင်းတူဝ်တၢႆဢၼ်ၵဝ်ပႃးတင်း တၢင်းဢၼ်ၶႂ်ႈၸႃႉၶႂ်ႈၸိတ်ႈ၊တၢင်းဢၼ်တေႃးသ ႁူႃႉတၢင်းၸႂ်မႆႈဢွၵ်ႇႁႅင်းၼႃႇသေလႄႈဢဝ်တၢႆၸိူဝ်းၼၼ်ႉဢေႃႈ။ လွင်ႈမၼ်းၸမ်း၊-ၵွပ်ႈပိူဝ်ႈတုၸရိူၵ်ႈၶဝ် တင်းသဵင်ႈတင်းလူင်ၼၼ်ႉလႄႈ ၵဝ်ဝၢႆႇၼႃႈပႅတ်ႈသေၵႃႈတီႈဝဵင်းၼႆႉယဝ်ႉ။
၆ ၵူၺ်းၵႃႈၵဝ်တၵ်းႁႂ်ႈတၢင်းဢၼ်ယူႇလီၵိၼ်ဝၢၼ် တၢင်းဢၼ်ႁႂ်ႈတၢင်းၸဵပ်းတၢင်းသႅပ်ႇႁၢႆၼၼ်ႉ ၶိုၼ်းႁွတ်ႈထိုင်ၵႃႈၼိူဝ်မၼ်းလႄႈႁႂ်ႈၶဝ်သၢၵ်ႈသႃႇၶႅၼ်းမႃးဢေႃႈ။ ၵဝ်တၵ်းၼႄပျႃႉၸေးၸိမ်ႇတၢင်းဢၼ်ၼိမ်ဢၼ်လီဢိၵ်ႇတင်း သႅတ်ႉၸႃႇတြႃးဢၼ်လိူင်ႇၼမ်ၼႃႇလူင်လၢင်ၼၼ်ႉဢေႃႈ။
၇ ၵဝ်တၵ်းသမ်ႉဢဝ်မဵဝ်းယုတ ဢိၵ်ႇတင်းမဵဝ်းဢိသရေႇလဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉၶိုၼ်းမႃးလႄႈ တႄႇႁဵတ်းၶဝ် မိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉဢေႃႈ။
၈ ၵဝ်တၵ်းၽႄႇဢပျႅတ်ႈ ၵႃႈဢၼ်ၶဝ်ၽိတ်းပိူင်ႈၵဝ်ၼၼ်ႉလႄႈတၵ်းပွႆႇဢပျႅတ်ႈ ၵႃႈဢၼ်ၶဝ်ၽိတ်းပိူင်ႈၵဝ်လႄႈပူၼ်ႉ လိူဝ်တြႃးၵဝ်ၸိူဝ်းၼၼ်ႉလွတ်ႈဢေႃႈ။
၉ ဝဵင်းၼႆႉတၵ်းပဵၼ်လွင်ႈဢၼ်လီၸူမ်းလီသိူဝ်း၊ လွင်ႈဢၼ်လီယွင်ႈလီယေႃး၊ လွင်ႈဢၼ်ၵုင်ႇသရေႇႁူင်ႁၢင်းၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၵႃႈၼိူဝ်လိၼ်မိူင်း ဢၼ်တၵ်းငိၼ်းလွင်ႈၵျေးၸူး ၵႃႈဢၼ်ၵဝ်ႁဵတ်းတီႈၶဝ်ၼႆႉတင်းသဵင်ႈတင်းလူင်ၼၼ်ႉလႄႈထွၵ်ႈလူၺ်ႈတၢင်းဢၼ်လီဢၼ်ငၢမ်းၵႃႈမီးဢိၵ်ႇတင်းၵတ်းယဵၼ်ၶျၢမ်းသႃႇၵႃႈမီးဢၼ်ၵဝ်လုမ်းလႃးတီႈဝဵင်းၼႆႉၼၼ်ႉသေလႄႈ သၼ်ႇဝႆၵူဝ်ႁႄဢေႃႈ။
၁၀ ထႃႇဝရႃႉၽြႃးမီးဢမိင်ႉၸမ်း၊- ၵႃႈတီႈၼႆႉဢၼ်သူၸၢင်ႊလၢတ်ႈလႄႈဝႃႈ၊-ပဵၼ်တီႈဢၼ်ပဝ်ႇဢၼ်လၢပ်ႈလႄႈ ဢမ်ႇမီးၵူၼ်းဢမ်ႇမီးတရိၵ်ႈသၢၼ်ႇၵႃႈတီႈဝဵင်းယုတ တင်းလၢႆဢိၵ်ႇတင်းၵႃႈၼႂ်းသဵၼ်ႈတၢင်းဝဵင်းယေႇရုသလႅမ်ႇတင်းလၢႆ ဢၼ်ပဵၼ်တီႈဢၼ်ပဝ်ႇဢၼ်လၢပ်ႈလႄႈ ဢမ်ႇမီးၵူၼ်းဢမ်ႇမီးၵေႃႉဢၼ်ယူႇ ဢၼ်သဝ်းဢမ်ႇမီးတရိၵ်ႈသၢၼ်ႇၼၼ်ႉ။
၁၁ ၵမ်းလိုၼ်းတၵ်းလႆႈဢွၼ်ၵၼ်ငိၼ်းသဵင်ဢၼ်မူၼ်ႈပျေႃႇ၊ သဵင်ဢၼ်ၸူမ်းသိူဝ်း၊ သဵင်ၵူၼ်းၸၢႆးဢၼ်သွင်ႇမင်ႇၵလႃႇ၊သဵင်ၵူၼ်းယိင်းဢၼ်သွင်ႇမင်ႇၵလႃႇ၊ သဵင်ၶဝ်ၸိူဝ်းဢၼ်လၢတ်ႈဝႃႈ၊-ဢွၼ်ၵၼ်ယွင်ႈယေႃးၵျေးၸူးၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ၵွပ်ႈပိူဝ်ႈဢၼ်ထႃႇဝရႃႉၽြႃး ပဵၼ်ဢၼ်မျၢတ်ႈလီလႄႈ ၵရူႉၼႃႇမၼ်းၸဝ်ႈ တႄႇယူႇတႃႇသေႇဢမ်ႇထၢတ်ႇၼၼ်ႉတႃႉဝႃႈၼင်ႇၼႆၼၼ်ႉဢိၵ်ႇတင်း သဵင်ၶဝ်ၸိူဝ်းဢၼ်ဢဝ်ၶိူင်ႈပုၵ်ႉၸေႃႇဢၼ်ယွင်ႈယေႃးၸိူဝ်းၼၼ်ႉ မႃးၵႃႈၼႂ်းႁိူၼ်းထႃႇဝရႃႉၽြႃးၸိူဝ်းၼၼ်ႉဢေႃႈ။လွင်ႈမၼ်းၸမ်းၵဝ်တၵ်းသမ်ႉဢဝ်ၵူၼ်းဝၢၼ်ႈၵူၼ်းမိူင်း ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉၶိုၼ်းမႃးလႄႈ ႁႂ်ႈယူႇမိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၂ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉၸမ်း၊-ၵႃႈၼႂ်းတီႈဢၼ်ပဵၼ်ဢၼ်ပဝ်ႇဢၼ်လၢပ်ႈလႄႈဢမ်ႇမီးၵူၼ်းဢမ်ႇမီးတရိၵ်ႈသၢၼ်ႇၼႆႉ ဢိၵ်ႇတင်းၵႃႈၼႂ်းဝဵင်းမၼ်းၵႃႈမီးၼၼ်ႉ တၵ်းမီးတီႈဢၼ်ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉ တၵ်းဢဝ်ၽုင်သူဝ်း ၶဝ်ၼွၼ်းၼၼ်ႉထႅင်ႈလူးၵွၼ်ႇဢေႃႈ။
၁၃ ၵႃႈတီႈဝဵင်းၼိူဝ်ႁၢၼ်ႉလွႆၵႃႈတီႈဝဵင်း ဢၼ်မီးၵႃႈတႂ်ႈတီႈပၢင်ႇတီႈပဵင်းၵႃႈတီႈဝဵင်းဢၼ်မီးၵႃႈၼႂ်း ပွတ်းတၢင်းၸၢၼ်းတင်းလၢႆ၊ၵႃႈၼႂ်းမိူင်းပိၼ်ႇယႃႇမိၼ်ႇ၊ၵႃႈၼႂ်းတီႈဢၼ်လဵပ်ႈႁွပ်ႈဝဵင်းယေႇရုသလႅမ်ႇတင်းလၢႆ၊ ၵႃႈၼႂ်းဝဵင်းယုတ တင်းလၢႆၸိူဝ်းၼၼ်ႉ ၽုင်သူဝ်းတင်းလၢႆသမ်ႉတၵ်းလႆႈဢွၼ်ၵၼ် တႆႇၵႂႃႇပႆၵႂႃႇၵႃႈတႂ်ႈမိုဝ်းၵေႃႉဢၼ်ၼပ်ႉဢၼ်ဢၢၼ်ႇၶဝ်ၼၼ်ႉဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၄ ထႃႇဝရႃႉၽြႃးမီးဢမိင်ႉၸမ်း၊-မိူဝ်ႉဝၼ်းဢၼ်ၵဝ်တၵ်းႁဵတ်းၵျေးၸူး ၸွမ်းၼင်ႇၵတိဢၼ်ၵဝ်ဝႆႉတီႈၵူၼ်းမဵဝ်းဢိသရေႇလ ဢိၵ်ႇတင်းၵူၼ်းမဵဝ်းယုတတင်းလၢႆ ၼၼ်ႉတၵ်းႁွတ်ႈထိုင်ဢေႃႈ။
၁၅ ၼႂ်းမိူဝ်ႉဝၼ်းၼၼ်ႉၼႂ်းၶိင်ႇၵႃႇလႃႉၼၼ်ႉၵဝ်တၵ်းႁႂ်ႈယွတ်ႈတၢင်းဢၼ်သိုဝ်ႈတေႃႇတႅၵ်ႇဢွၵ်ႇမႃးပုၼ်ႈတႃႇဝိတ်ႉလႄႈ မၼ်းၼၼ်ႉတၵ်းၸီႇယၢင်ႇတႅပ်းတတ်း ၸွမ်းတၢင်းဢၼ်ႁဵတ်းၸွမ်းၼင်ႇတြႃးဢိၵ်ႇတင်း တၢင်းဢၼ်သိုဝ်ႈတေႃႇ ၵႃႈၼိူဝ်လိၼ်မိူင်းဢေႃႈ။
၁၆ ၼႂ်းၶိင်ႇၵႃႇလႃႉမိူဝ်ႉဝၼ်းၼၼ်ႉမိူင်းယုတ တၵ်းႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ်လႄႈဝဵင်းယေႇရုသလႅမ်ႇ ၵေႃႈတၵ်းမီးတၢင်းဢၼ်တဵတ်ႇလီၼိမ်လီလႄႈ ၼႃႇမႃႉၸိုဝ်သဵင်မၼ်းတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈလႄႈဝႃႈ ယေႇႁေႃးဝႃႇၸေႇတၵၼု ဝႃႈၼင်ႇၼႆဢေႃႈ။
၁၇ ထႃႇဝရႃႉၽြႃးမီးဢမိင်ႉၸမ်း၊-သိုပ်ႇၶုၼ်ၶိူဝ်းၶုၼ်
တႃႇဝိတ်ႉ ဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇ ဢိသရေႇလ ၼၼ်ႉဢမ်ႇလႆႈသုတ်းလႆႈထၢတ်ႇလႃးလႃး။
၁၈ ၶိူဝ်းယိတ်ႉပရေႃးႁိၵ်ႈၵူၼ်းလေႇဝိ ဢၼ်ပုၵ်ႉၸေႃႇယိၸ်ႉဢၼ်တုတ်ႇၽႆးယူႇ၊ ဢဝ်ၶိူင်ႈပိူင်ပုၵ်ႉၸေႃႇယိၸ်ႉဢၼ်တုတ်ႇၽႆးယူႇသေလႄႈလႆႈႁဵတ်းဝၢတ်ႈဢၼ်ပုၵ်ႉၸေႃႇယူႇတႃႇသေႇၼၼ်ႉၵေႃႈ ဢမ်ႇလႆႈသုတ်းလႆႈထၢတ်ႇလႃးလႃးဝႃႈၼင်ႇၼႆဢေႃႈ။
၁၉ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ယေႇရမိလႄႈဝႃႈ၊- ထႃႇဝရႃႉၽြႃးမီးဢမိင်ႉၸမ်း၊-
၂၀ ပေႃးသူ တတ်ႈၼိုင်ႇလႆႈႁႂ်ႈလႆႈ ယႃႉပတိၺိၼ်ႇတြႃးၵႃႈဝၼ်းဢိၵ်ႇတင်းပတိၺိၼ်ႇတြႃးၵႃႈၶိုၼ်း ဢၼ်ၵဝ်ဝႆႉၼၼ်ႉပႅတ်ႈထၼ်ႈပေႃး ဢမ်ႇႁႂ်ႈမီးဢၼ်ၶၼ်ႈၶႅၼ်ႈၵႃႈဝၼ်း ဢိၵ်ႇတင်းၵႃႈၶိုၼ်းၼၼ်ႉလႆႈၸိုင်
၂၁ ပတိၺိၼ်ႇဢၼ်ၵဝ်ဝႆႉတီႈၶႃႈၵဝ်တႃႇဝိတ်ႉ ၼၼ်ႉတၵ်းလူႉထၼ်ႈပေႃးၶိူဝ်းၶုၼ်မၼ်း ဢၼ်လႆႈဢုပ်ႉပိူင်ႇၸၢမ်ႇၸႃးပလၢင်ႇမၼ်းၼၼ်ႉတၵ်းသုတ်းလႆႈထၢတ်ႇလႆႈလႄႈ ၶိူဝ်းယိတ်ႉပရေႃးႁိၵ်ႈၵူၼ်းလေႇဝိ ဢၼ်ၵိုတ်ႈႁၢပ်ႇဢမူႉၵဝ်ၵေႃႈ တၵ်းသုတ်းလႆႈထၢတ်ႇလႆႈဢေႃႈ။
၂၂ ၸိူဝ်ႉၼင်ႇဢၼ်ၶိူင်ႈပိူငႃ်ႉၵၢင်ႁၢဝ် ၼမ်ၵိုၼ်းၼႃႇထၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈၼၼ်ႉဢိၵ်ႇတင်း ၸိူဝ်ႉၼင်ႇဢၼ်မဵတ်ႉႁိၼ်မဵတ်ႉသံၢးၼမ်ႉသမ်ႇမုၵ်ႉတြႃႇ ၼမ်ၵိုၼ်းၼႃႇထၼ်ႈပေႃးဢမ်ႇဢဝ်ၵွၵ်းတူင်တူၺ်းလႆႈၼၼ်ႉ ၵဝ်တၵ်းႁႂ်ႈမဵဝ်းၶႃႈၵဝ်တႃႇဝိတ်ႉ ဢိၵ်ႇတင်းၵူၼ်းလေႇဝိ ဢၼ်ၵိုတ်ႈႁၢပ်ႇဢမူႉၵဝ်ၸိူဝ်းၼၼ်ႉၼမ်ၵိုၼ်းၼႃႇဢေႃႈ၊ဝႃႈၼင်ႇၼႆဢေႃႈ။
၂၃ လၢႆးသမ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈယေႇရမိၸမ်း၊-မႂ်းဢမ်ႇၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ၵူၼ်းတင်းလၢႆၸိူဝ်းၼႆႉၸၢင်ႊလၢတ်ႈဝႃႈ၊-
၂၄ ၵူၼ်းမဵဝ်းဢၼ်ထႃႇဝရႃႉၽြႃး လိူၵ်ႈၵဵပ်းဢဝ်သွင်ႈမဵဝ်းၼႆႉၸိုင်မၼ်းၸဝ်ႈသမ်ႉပႄႇပႅတ်ႈယဝ်ႉ။ဝႃႈၼင်ႇၼႆၼၼ်ႉႁိုဝ်။ၼင်ႇၼၼ်လႄႈ ၶဝ်ၼၼ်ႉဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ်တီႈၵူၼ်းၵဝ်တင်းလၢႆထၼ်ႈပေႃး ဢမ်ႇမၢတ်ႈပဵၼ်မဵဝ်းၵူၼ်းသိုဝ်ႈၼႃႈတႂ်ႈတႃၶဝ်ယဝ်ႉ။
၂၅ ထႃႇဝရႃႉၽြႃးမီးဢမိင်ႉၸမ်း၊-ပေႃးပတိၺိၼ်ႇတြႃးၵႃႈဝၼ်းဢိၵ်တင်းၵႃႈၶိုၼ်းၼၼ်ႉဢမ်ႇမီးပေႃးၵဝ်ဢမ်ႇၸီႇယၢင်ႇၽြႃႃးႉၵၢင်ႁၢဝ် ဢိၵ်ႇတင်းလိၼ်မိူင်း ယူႇၸိုင်၊
၂၆ ၵဝ်တၵ်းပႄႇပႅတ်ႈၸုၼ်ႉပႅတ်ႈမဵဝ်းယႃႇၵုပ်ႉဢိၵ်ႇတင်းၸိူဝ်ႉၶိူဝ်းၶႃႈၵဝ်တႃႇဝိတ်ႉ ထၼ်ႈပေႃးဢမ်ႇလိူၵ်ႈၵဵပ်းဢဝ်ၶုၼ် ဢၼ်လႆႈဢုပ်ႉပိူင်ႇမဵဝ်းဢႃႇပႁမ်ႇ၊ဢိၸၢၵ်ႉ၊ ယႃႇၵုပ်ႉ ၼၼ်ႉၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။ ဢမ်ႇၼၼ်ၵေႃႈၵဝ်တၵ်းဢဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ် သိမ်းဢဝ်ၵႂႃႇၼၼ်ႉ ၶိုၼ်းမႃးလႄႈ ဢိတ်းလူမီးၵရူႉၼႃႇတီႈၶဝ်ဢေႃႈ၊ ဝႃႈၼင်ႇၼႆဢေႃႈ။