၄၆
ၼုၵ်ႉၵပၢတ်ႈၸဝ်ႈ လူၺ်ႈလွင်ႈမိူင်းဢေႇၵႅပ်ႉတု
၁ ၼုၵ်ႈၵပၢတ်ႈထႃႇဝရႃႉၽြႃးဢၼ်ဢဝ်လွင်ႈၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆသေလႄႈ ႁွတ်ႈမႃးတီႈ
၂ ပရေႃးၽိတ်ႈယေႇရမိ လူၺ်ႈလွင်ႈၵူၼ်းဝၢၼ်ႈၵူၼ်းမိူင်းဢေႇၵႅပ်ႉတု ႁူဝ်ႁၢၼ်ၵူၼ်းသိုၵ်းၽႃႇရေႃး ၶုၼ်ႁေႃၶမ်းဢေႇၵႅပ်ႉတု ဢၼ်ၶျႃးတပ်ႉၵႃႈတီႈႁိမ်းၼမ်ႉႁွင်ႊလူင်ဢုၽရတ်ႉၵႃႈတီႈၵႃႇၶမေိတ်ႉလႄႈ ၼေႇပုၶၢတ်ႈၼေႇၸႃႇၶုၼ်ႁေႃၶမ်းပႃႇပုလုၼ်ႇ တိုၵ်းတေႃးယႃႉပႅတ်ႈၼႂ်းၸူဝ်ႈပၢၼ်ယေႃႇယၵိမ်ႇ လုၵ်ႈၸၢႆးယုဝ်ႇ သိယၶုၼ်ႁေႃၶမ်းယုတၼၼ်ႉၸမ်း၊-
၃ ဢွၼ်ၵၼ်မႄးႁႅၼ်းၶိူင်ႈႁႄႉလၢၵ်ႈၼၢၵ်ႈလူင်၊ ၶိူင်ႈႁႄႉလၢၵ်ႈၼၢၵ်ႈဢွၼ်ႇသေလႄႈ သုတ်ႉၸပ်းသုတ်ႉၸူးႁႂ်ႈလႆႈတိုၵ်းသိုၵ်း တႃႉ။
၄ ဢွၼ်ၵၼ်ႁၢင်ႈၶိူင်ႈၵၵ်ႉႉၶိူင်ႈဢၢၼ်မႃႉသေလႄႈၶီႇသိုၵ်းလႄႈ တိုဝ်းမွၵ်ႇႁူဝ်လဵၵ်းသူယူႇသေလႄႈ ဢွၼ်ၵၼ်ဢွၵ်ႇတႃႉ။သူၸိူဝ်းဢၼ်ၶီႇမႃႉဢိူၺ်း။ဢွၼ်ၵၼ်ပွတ်ႈသီႁွၵ်ႇသူသေလႄႈၼုင်ႈသိူဝ်ႈၶႅပ်းလဵၵ်းတႃႉ။
၅ ၵဝ်လႆႈႁၼ်ၸိူဝ်ႉၼင်ႇႁိုဝ်။ ၶဝ်ၵူဝ်ႁႄလႄႈဢွၼ်ၵၼ်သုတ်ႉၶိုၼ်းၵႂႃႇယဝ်ႉ။ ၶဝ်ၸိူဝ်းဢၼ်ႁႅင်းယႂ်ႇၼႃႇတီႈၶဝ်ၼၼ်ႉတူၵ်းသုမ်းလႄႈ ဢွၼ်ၵၼ်ဢွၵ်ႇပၢႆႈလႄႈဢမ်ႇႁတ်းဝၢႆႇၶိုၼ်းတူၺ်းၶိုၼ်း။
၆ ၽေးတၢင်းဢၼ်လီၵူဝ်လီ ႁႄမီးလဵပ်ႈႁွပ်ႈဝႆႉယူႇၵူႈၽၢႆႇၵူႈပႃႈဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။ၵေႃႉဢၼ်ၶၼ်ၽႂ်းၼၼ်ႉဢမ်ႇလႆႈၶုၼ်ႇလႆႈလႅၼ်ႈ။ၵေႃႉဢၼ်ႁႅင်းယႂ်ႇၼႃႇဢမ်ႇလႆႈၵၢင်းလႆႈလွတ်ႈ။ၶဝ်တၵ်းဢွၼ်ၵၼ်တိူဝ်ႉမႅၼ်ႈၵႃႈတီႈၼႃႈတၢင်းႁွင်ႇႁိမ်းႁွမ်းၼမ်ႉႁွင်ႊဢုၽရတ်ႉ ၼၼ်ႉ လႄႈလူမ်ႉဢေႃႈ။
၇ ၵေႃႉဢၼ်လုၵ်ႉၶိုၼ်းမိူၼ်ၸိူဝ်ႉၼင်ႇဢၼ်ၼမ်ႉႁွင်ႊၼိယ လုၵ်ႉၶိုၼ်းၼၼ်ႉဢိၵ်ႇတင်းၸိူဝ်ႉၼင်ႇဢၼ်ၼမ်ႉမေႈတင်းလၢႆဢၼ်ၼမ်ႉမၼ်းပဵၼ်ႁွၼ်ပဵၼ်ႁႅၼ်ယူႇၼၼ်ႉၼႆႉၸမ်းပဵၼ်ၽူႈ လႂ်။
၈ မိူင်းဢေႇၵႅပ်ႉတု လုၵ်ႉၶိုၼ်းယူႇမိူၼ်ၸိူဝ်ႉၼင်ႇဢၼ်ၼမ်ႉႁွင်ႊၼိလ လုၵ်ႉၶိုၼ်းၼၼ်ႉလႄႈၼမ်ႉမၼ်းပဵၼ်ႁွၼ်ပဵၼ်ႁႅၼ်မိူၼ်ၸိူဝ်ႉၼင်ႇ ၼမ်ႉမေႈတင်းလၢႆၼၼ်ႉယူႇသေလႄႈလၢတ်ႈလႄႈဝႃႈ၊-ၵဝ်ၼႆႉတၵ်းလုၵ်ႉၶိုၼ်းလႄႈထူမ်ႈႁူမ်ႇလိၼ်မိူင်းဢေႃႈ။ၵဝ်တၵ်းယႃႉဝဵင်းဢိၵ်ႇလူၺ်ႈၵၼ်တင်းၵူၼ်းဢၼ်ယူႇၵႃႈၼႂ်းဝဵင်းၸိူဝ်းၼၼ်ႉပႅတ်ႈဢေႃႈ၊ဝႃႈၼင်ႇၼႆဢေႃႈ။
၉ မႃႉတင်းလၢႆၶဝ်ဢိူၺ်းဢွၼ်ၵၼ်ၶိုၼ်ႈတႃႉ။လေႃႉရထႃးတင်းလၢႆၶဝ်ဢိူၺ်း ဢွၼ်ၵၼ်မေႃး ၶိုင်ႈၶိုင်ႈၶၢင်ႈၶၢင်းယူႇတႃႉ။ ႁႂ်ႈၵူၼ်းႁႅင်းယႂ်ႇၼႃႇဢၼ်ဝႃႈ ၵူၼ်းမဵဝ်းၵုသ၊ၵူၼ်းမဵဝ်းပုတ ဢၼ်ၸၢင်ႊယိပ်းၶိူင်ႈႁႄႉလၢၵ်ႈၼၢၵ်ႈ၊ ၵူၼ်းမဵဝ်းလုတိဢၼ်ၸၢင်ႊယိပ်းၵမ်ၵၢင်ႇၸိူဝ်း ၼၼ်ႉဢွၼ်ၵၼ်ဢွၵ်ႇသေ။
၁၀ မိူဝ်ႉဝၼ်းၼၼ်ႉပဵၼ်မိူဝ်ႉဝၼ်းၸဝ်ႈပူဝ်ႇပႃႇၵၢင်ႁ ၢဝ်ထႃႇဝရႃႉၽြႃး၊မိူဝ်ႉဝၼ်းဢၼ်မၼ်းၸဝ်ႈတွပ်ႇတႅၼ်းၶိုၼ်းႁႂ်ႈလႆႈပၼ်တၢမ်ႇတီႈရၢၼ်ႇသူႇမၼ်းၸဝ်ႈဢေႃႈ။ လၢပ်ႇမၼ်းၸဝ်ႈၼၼ်ႉတၵ်းၶူပ်းၵိၼ်လႄႈဢိမ်ႇဢေႃႈ။တၵ်းမဝ်းလူၺ်ႈလိူတ်ႈၶဝ်ဢေႃႈ။လွင်ႈမၼ်းၸမ်းၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးလွင်ႈဢၼ်တၵ်းလႆႈပုၵ်ႉၸေႃႇယိၸ်ႉၵႃႈတီႈၼႃႈတၢင်းႁွင်ႇၵႃႈႁိမ်းၼမ်ႉႁွင်ႊဢုၽရတ်ႉ ၼၼ်ႉ ဢေႃႈ။
၁၁ ၵၼ်ႇၺႃႇလုၵ်ႈယိင်းသၢဝ်ဢေႇၵႅပ်ႉတုဢိူၺ်း။ၶိုၼ်ႈၵႂႃႇၵႃႈတီႈမိူင်းၵိလတ် လႄႈဢဝ်ယၢင်ပလၸမ်ႈတႃႉ။ မႂ်းၸၢင်ႊသုင်းသွင်ႇယႃႈယႃၼမ်ၼႃႇလၢႆလၢႆ လွၵ်ႇလွၵ်ႇလႄႈတၢင်းၸဵပ်းမႂ်းဢမ်ႇႁၢႆလႆႈ။
၁၂ ၵူၼ်းၵူႈၸိူဝ်ႉၵူႈမဵဝ်း လႆႈငိၼ်းလွင်ႈဢၼ် မႂ်းသရေႇလူႉၼၼ်ႉယဝ်ႉ။သဵင်ဢၼ်မႂ်းပွင်ႉၶၢင်းပွင်ႉမိူၼ်ႇၼၼ်ႉၸွတ်ႇၵႃႈၼိူဝ်လိၼ်မိူင်းယဝ်ႉ။ႁူဝ်ႁၢၼ်ၵူၼ်းသိုၵ်းၼင်ႇၵၼ်ၵေႃႉၼိုင်ႈလႄႈၵေႃႉၼိုင်ႈတိူဝ်ႉထုၵ်ႇၵၼ်လႄႈ တင်းသွင်ၽၢႆႇသွင်ပႃႈၼၼ်ႉဢွၼ်ၵၼ်လူႉယဝ်ႉ၊ဝႃႈၼင်ႇၼႆဢေႃႈ။
၁၃ ၵႂၢမ်းဢၼ်ထႃႇဝရႃႉၽြႃး မီးဢမိင်ႉတီႈပရေႃးၽိတ်ႈယေႇရမိ လူၺ်ႈလွင်ႈဢၼ်ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇ တၵ်းမႃးလႄႈ တိုၵ်းယႃႉပႅတ်ႈမိူင်းဢေႇၵႅပ်ႉတုၼၼ်ႉၸမ်း ဢွၼ်ၵၼ်ပၢဝ်ႇသေႃႇၵႃႈၼႂ်းမိူင်းဢေႇၵႅပ်ႉတု လႄႈဢွၼ်ၵၼ်မွၵ်ႇလၢတ်ႈတီႈ ဝဵင်းမိၵတေႃႇလ သေလႄႈမွၵ်ႇလၢတ်ႈတီႈဝဵင်း ၼေႃႇၽဢိၵ်ႇတင်းဝဵင်းတႃႇပၼိတ်ႉလႄႈဝႃႈ၊-
၁၄ ဢွၼ်ၵၼ်ဢွၵ်ႇလႄႈမႄးႁႅၼ်းတူဝ်ၸဝ်ႈၵဝ်ႇဝႆႉတႃႉ။လွင်ႈမၼ်းၸမ်းလၢပ်ႇၸဝ်ႈၶူပ်းၵိၼ် ၵႃႈတီႈႁိမ်းႁွမ်းလဵပ်ႈႁွပ်ႈမႂ်း ၼၼ်ႉယဝ်ႉ။
၁၅ ၵွပ်ႈပိူဝ်ႈၼင်ႇႁိုဝ်လႄႈႁူဝ်ႁၢၼ်ၵူၼ်းသိုၵ်းမႂ်းၸိူဝ်းၼၼ်ႉသုမ်းၸွမ်းၼင်ႇႁိုဝ်။ၵွပ်ႈပိူဝ်ႈဢၼ်ထႃႇဝရႃႉၽြႃးဢီးၶဝ်တုၵ်းလႄႈ ၶဝ်ဢမ်ႇၸုၵ်းဢမ်ႇၶၢမ်ႇ ယူႇလႆႈ။
၁၆ မၼ်းၸဝ်ႈႁဵတ်းႁႂ်ႈၵူၼ်းၼမ်ၼႃႇတိူဝ်ႉမႅၼ်ႈသေလႄႈၵေႃႉၼိုင်ႈ လူမ်ႉသႂ်ႇၵႃႈၼိူဝ်ၵေႃႉၼိုင်ႈလႄႈၶဝ်လၢတ်ႈၵၼ်လႄႈဝႃႈ၊- လုၵ်ႉတႃႉႁဝ်းဢိူၺ်း။ၵွပ်ႈပိူဝ်ႈတၢင်းဢၼ် ၼိၵ်ႈၸၢၵ်ႈငႅၼ်းသေးၼၼ်ႉႁဝ်းဢွၼ်ၵၼ်ၶိုၼ်းမိူဝ်းၸူး ၵႃႈတီႈပီႈၼွင်ႉၸိူဝ်ႉၶိူဝ်းႁဝ်းဢိၵ်ႇတင်းၵႃႈတီႈမိူင်းတီႈယူႇႁဝ်း ဢၼ်ႁဝ်းၵိူတ်ႇလဵင်ႉမႃး ၼၼ်ႉတႃႉႁဝ်း၊ဝႃႈၼင်ႇၼႆဢေႃႈ။
၁၇ ၶဝ်ဢွၼ်ၵၼ်ႁွင်ႉသႅၼ်ႇၵႃႈတီႈၼၼ်ႉလႄႈဝႃႈ၊-ၽႃႇရေႃးၶုၼ်ႁေႃၶမ်းဢေႇၵႅပ်ႉတု ၼၼ်ႉပဵၼ်လူမ်းပဵၼ်လႅင်ႉၵူၺ်းဢေႃႈ။မၼ်းပူၼ်ႉၶိင်ႇဢၼ်မၵ်းၶဵၼ်းဝႆႉၼၼ်ႉယဝ်ႉ၊ ဝႃႈၼင်ႇ ၼႆဢေႃႈ။
၁၈ ၶုၼ်ႁေႃၶမ်းဢၼ်မီးၼႃႇမႃႉၸိုဝ်သဵင်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉ မီးဢမိင်ႉၸမ်း၊-ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ ၶုၼ်ၼၼ်ႉတၵ်းမႃးမိူၼ်ၸိူဝ်ႉၼင်ႇ လွႆတႃႇပေႃႇၵႃႈၼႂ်းလွႆတင်းလၢႆၼၼ်ႉဢိၵ်ႇတင်း ၸိူ်ဝ်ႉၼင်ႇလွႆၵႃႇလမေႇလၵႃႈတီႈ ႁိမ်းပၢင်ႇလၢႆႇၼၼ်ႉဢေႃႈ။
၁၉ မႂ်းဢၼ်တုၵ်းတီႈယူႇတီႈသဝ်းယူႇလူၺ်ႈၵၼ်တင်းလုၵ်ႈယိင်းဢေႇၵႅပ်ႉတု ၼၼ်ႉၼႆႉဢိူၺ်း။မႄးႁႅၼ်းၶိူင်ႈဢၼ်သုင်းဢၼ်သွင်ႇဝႆႉပုၼ်ႈတူဝ်ၸဝ်ႈၵဝ်ႇ ပုၼ်ႈဢၼ်တၵ်းလႆႈၶၢႆႉတီႈယူႇတီႈသဝ်းၼၼ်ႉတႃႉ။လွင်ႈမၼ်းၸမ်းဝဵင်းၼေႃႇၽၼၼ်ႉတၵ်းလႆႈပဵၼ်တီႈဢၼ်ပဝ်ႇဢၼ်လၢပ်ႈလႄႈ ၶၢမ်ႇတၢင်းဢၼ်မႆႈသုတ်းပႅတ်ႈထၼ်ႈပေႃး ဢမ်ႇမီးၵေႃႉဢၼ်ယူႇဢၼ်သဝ်းဢေႃႈ။
၂၀ မိူင်းဢေႇၵႅပ်ႉတု ၼၼ်ႉပဵၼ်ဝူဝ်းမေႈသိုဝ်ႇဢၼ်ႁၢင်ႊလီႁၢင်ႊငၢမ်းဢေႃႈ။ၼႂ်းဝႃႈၼၼ်သေၵေႃႈလွင်ႈတၢင်းဢၼ်ယႃႉၽဵဝ်ႈပႅတ်ႈ လုၵ်ႈသေၵႃႈတီႈၼႃႈတၢင်းႁွင်ႇ ပေႃႇမႃးတီႈမၼ်းဢေႃႈ။
၂၁ ပိၵ်ႉသမ်ႉၶဝ်ၸိူဝ်းဢၼ်ၵိၼ်ၸၢင်ႈၵိၼ်ငႃတီႈမၼ်း ၵႃႈၼႂ်းၵၢင်မၼ်းၼၼ်ႉပဵၼ်ၸိူဝ်ႉၼင်ႇဝူဝ်းမေႈဢွၼ်ႇဢၼ်လဵင်ႉႁႂ်ႈ မၼ်းပီးလီၼၼ်ႉသေၵေႃႈ ဢွၼ်ၵၼ်ဝၢႆႇလင်ၵွင်လင်လႄႈ ဢွၵ်ႇပၢႆလူၺ်ႈၵၼ်လႄႈ ၶဝ်ၼၼ်ႉဢမ်ႇၸုၵ်းဢမ်ႇဝႆႉယူႇလႆႈၵွၵ်ႈပိူဝ်ႈဢၼ်မိူဝ်ႉဝၼ်း တၢင်းဢၼ်လူႉလႅဝ်ၶိင်ႇမိူဝ်ႈဢၼ်လႆႈၶၢမ်ႇတၢင်းဢၼ် သုင်းမႃႉသင်ႇသွၼ်ၼၼ်ႉ ႁွတ်ႈထိုင်ၼၼ်ႉဢေႃႈ။
၂၂ သဵင်မၼ်းၼၼ်ႉတၵ်းပဵၼ်ၸိူဝ်ႉၼင်ႇသဵင်ငူးႁွင်ႉငူးႁဝ်ႇၼၼ်ႉ ၵွပ်ႈပိူဝ်ႈဢၼ်ၶဝ်ပႃးဢဝ်တင်းတႃႇမၢတ်ႇမိူၼ်ၸိူဝ်ႉၼင်ႇ ၵေႃႉဢၼ်ပွမ်ႈတူၼ်ႈမႆႉၼၼ်ႉမႃးယူႇသေလႄႈ ၶီႇမႃးႁူမ်ႈလူၺ်ႈၵၼ်တင်းမူႇ ၵူၼ်းၽုင်ၵူၼ်းၼၼ်ႉဢေႃႈ။
၂၃ ပိၵ်ႉသမ်ႉပႃႇမႆႉပႃႇတွၵ်ႇမၼ်းၼၼ်ႉဢမ်ႇမီးတၢင်းဢၼ်ၶဝ်သွၵ်ႈၶဝ်ႁႃလႆႈ သေၵေႃႈၶဝ်တၵ်းဢွၼ်ၵၼ်ပွမ်ႈလူမ်ႉပႅတ်ႈ ၵွပ်ႈပိူဝ်ႈဢၼ်ၶဝ်ၼၼ်ႉ ၼမ်လိူဝ်တွၼ်းၼႃႇသမေႅင်းၵႅင်းလႄႈ ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉဢေႃႈ၊ ဝႃႈၼင်ႇၼႆ ထႃႇ ဝရႃႉၽြႃးမီးဢမိင်ႉဢေႃႈ။
၂၄ လုၵ်ႈယိင်းဢေႇၵိပ်ႉတုၼၼ်ႉတၵ်းလႆႈၶၢမ်ႇတၢင်းဢၼ်ဢူၵ်းဢၼ်ဢၢႆလႄႈ မၼ်းတၵ်းတုၵ်းႁွတ်ႈၵႃႈၼႂ်းမိုဝ်း ၵူၼ်းမိူင်းတၢင်းႁွင်ႇၸိူဝ်း ၼၼ်ႉဢေႃႈ။
၂၅ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-တူၺ်းလူ။ၵဝ်တၵ်းသင်ႇသွၼ်သုင်းမႃႉၽြႃးဢမ်ႇမုၼ်ႇ ဢၼ်မီးၵႃႈတီႈဝဵင်းၼေႃႇ ဢိၵ်ႇတင်း ၽႃႇရေႃး တင်းၵူၼ်းဝၢၼ်ႈၵူၼ်းမိူင်းဢေႇၵႅပ်ႉတု တင်းလၢႆ၊ၽြႃးမၼ်းတင်းလၢႆ ၶုၼ်ႁေႃၶမ်းမၼ်းတင်းလၢႆဢၼ်ဝႃႈၶုၼ်ႁေႃၶမ်းၽႃႇရေႃးဢိၵ်ႇတင်း ၶဝ်ၸိူဝ်းဢၼ်ဢိင်ပိုင်ႈမၼ်းၵႃႈ မီးတင်းသဵင်ႈတင်းလူင်ၼၼ်ႉဢေႃႈ။
၂၆ ၵဝ်တၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်း ၶဝ်ၸိူဝ်းဢၼ်ႁႃဢဝ်ဢသၢၵ်ႈၶဝ်ဢၼ်ဝႃႈၵႃႈၼႂ်းမိုဝ်း ၶုၼ်ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇတင်းၶႃႈမၼ်းၵူၼ်းမၼ်းတင်းလၢႆၼၼ်ႉဢေႃႈ။ လိုၼ်းၼၼ်ႉမိူဝ်ႈၼၼ်ႉတၵ်းသမ်ႉၶိုၼ်းလီ မိူၼ်ၸိူဝ်ႉၼင်ႇမိူဝ်ႈဢွၼ်တၢင်း ၼၼ်ႉဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၂၇ ၶႃႈၵဝ်ယႃႇၵုပ်ႉဢိူၺ်း။ယႃႇပေၵူဝ်ပေႁႄ။မဵဝ်းဢိသရေႇလဢိူၺ်း။ယႃႇပေၸႂ်လူႉ။ ၵဝ်တၵ်းၼုၵ်ႈဢဝ်မႂ်းမႃးသေၵႃႈတီႈဢၼ်ၵႆၼၼ်ႉ ဢိၵ်ႇတင်းပီႈၼွင်ႉၸိူဝ်ႉၶိူဝ်းမႂ်းတင်းလၢႆသေ ၵႃႈၼႂ်းမိူင်းဢၼ်ၶဝ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇၼၼ်ႉလႄႈမဵဝ်းယႃႇၵုပ်ႉ တၵ်းလႆႈၶိုၼ်းမႃးသေလႄႈ ယူႇတဵတ်ႇလီၼိမ်လီၵတ်းယဵၼ်ၶျၢမ်းသႃႇလႄႈ ဢမ်ႇမီးၵေႃႉဢၼ်လွၵ်ႇဢၼ်ငိူတ်ႈ ဢေႃႈ။
၂၈ ၶႃႈၵဝ်ယႃႇၵုပ်ႉဢိူၺ်း။ယႃႇပေမႆႈၸႂ်ၶီၸႂ်။ၵဝ်မီးယူႇလူၺ်ႈၵၼ်တင်းမႂ်းဢေႃႈ။ ပိၵ်ႉသမ်ႉၵဝ်ႁႂ်ႈၵူၼ်းၵူႈၸိူဝ်ႉၵူႈမဵဝ်းတီႈဢၼ်ၵဝ်ႁေႃႈမႂ်းဢွၵ်ႇၸူးၼၼ်ႉသုမ်းၸွမ်းသေၵေႃႈၵဝ်တၵ်းဢမ်ႇႁႂ်ႈမႂ်းသုမ်းၸွမ်း။ၼႂ်းဝႃႈၼၼ်သေၵေႃႈၵဝ်ယင်းဢမ်ႇပွႆႇဢပျႅတ်ႈမႂ်းလွတ်ႈမူတ်းမူတ်းသဵင်ႈသဵင်ႈလႄႈ တၵ်းသင်ႇသွၼ်သုင်းမႃႉမႂ်းႁႂ်ႈမႅၼ်ႈၸွမ်းၼင်ႇတြႃးဢေႃႈ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။