၁၂
တၢင်းဢၼ်ယေႇရမိပွင်ႉမိုၼ်
၁ ထႃႇဝရႃႉၽြႃးတီႈၶႃႈ။ ယၢမ်းမိူဝ်ႈဢၼ်ၶႃႈၸဝ်ႈတိူင်ႇပၢင်ႇတွင်ႉထၢမ်ၵႂၢမ်းတြႃးၵၼ်တင်း ၸဝ်ႈႁဝ်းၼၼ်ႉၸိုင်ၸဝ်ႈႁဝ်းၸွမ်းၼင်ႇတြႃးတီႈၶႃႈဢေႃႈ။ၵူၺ်းၵႃႈၶႃႈၸဝ်ႈတၵ်းလဝ်ႈထၢမ် လွင်ႈတၢင်းဢၼ်ၸဝ်ႈႁဝ်းၸႅတ်ႈထၢမ်ၸီႇယၢင်ႇၼၼ်ႉၶႃႈဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၢင်းၵျၢင်ႉတၢင်းပွင်ၶဝ်ၸိူဝ်းဢၼ်ဢမ်ႇႁူႉတြႃးၼၼ်ႉလႆႈလီလႆးပဵၼ်ၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶဝ်ၵႃႈဢၼ်သႅတ်ႉၸႃႇလူႉၼႃႇလူင်လၢင်ၼၼ်ႉ လႆႈၵတ်းယဵၼ်ၶျၢမ်းသႃႇၶႃႈ။
၂ ၸဝ်ႈႁဝ်းၽုၵ်ႇသွမ်ႈၶဝ်လႄႈ ၶဝ်ယင်ႇႁၢၵ်ႈသေလႄႈယႂ်ႇမႃးတီႈၶႃႈဢေႃႈ။ၸဝ်ႈႁဝ်း ၸမ်ၵၼ်တင်းသူပ်းၶဝ်လႄႈၵႆၵၼ်တင်းႁူဝ် ၸႂ်မၢၵ်ႇလၼ်းၶဝ်တီႈၶႃႈဢေႃႈ။
၃ ထႃႇဝရႃႉၽြႃးတီႈၶႃႈ။ၸဝ်ႈႁဝ်းႁူႉၶႃႈၸဝ်ႈယူႇတီႈၶႃႈဢေႃႈ။ၸဝ်ႈႁဝ်းႁၼ်ၶႃႈၸဝ်ႈလႄႈ ၸႅတ်ႈထၢမ်ၸႅတ်ႈတူၺ်းလွင်ႈဢၼ်ႁူဝ်ၸႂ်ၶႃႈၸဝ်ႈ ပဵၼ်ၸိူဝ်ႉၼင်ႇႁိုဝ်ယူႇၼၼ်ႉတီႈၶႃႈယဝ်ႉ။တိုတ်ႉၸၼ်ဢဝ်ၶဝ်ဢွၵ်ႇၸိူဝ်ႉၼင်ႇဢၼ်ဢဝ်သူဝ်းဢွၵ်ႇဝႆႉပုၼ်ႈဢၼ်တၵ်းဢဝ်တၢႆၼၼ်ႉ သေၵမ်း တီႈၶႃႈ။
၄ မိူင်ႈၸဝ်ႈတၵ်းလႆႈပွင်ႉၶၢင်းပွင်ႉမိူၼ်ႇယူႇၶိင်ႇၵႃႇလႃႉႁိုင်ၵႃႈႁိုဝ်ၶႃႈ။ယိူဝ်ႈယႃႈဢၼ်မီးၵႃႈတီႈၼႃႈလိၼ်ၵူႈတီႈၵူႈလႅၼ်ၼၼ်ႉ တၵ်းလႆႈႁဵဝ်ႇၸွပ်ႈယူႇၶိင်ႇၵႃႇလႃႉႁိုင်ၵႃႈႁိုဝ်ၶႃႈ။ၵွပ်ႈပိူဝ်ႈတုၸရိူၵ်ႈဢပျႅတ်ႈၶဝ်ၸိူဝ်းဢၼ်ယူႇၵႃႈၼႂ်းမၼ်းၼၼ်ႉ တရိၵ်ႈသၢၼ်ႇတင်းလၢႆဢိၵ်ႇတင်း ၼူၵ်ႉတင်းလၢႆဢွၼ်ၵၼ်လူႉႁၢႆၵႂႃႇတီႈၶႃႈယဝ်ႉ။ လွင်ႈမၼ်းၸမ်းၶဝ်လၢတ်ႈဝႃႈမၼ်းၸဝ်ႈဢမ်ႇႁူႉဢမ်ႇႁၼ်တီႈသုတ်းတီႈၵွႆႁဝ်းၵူၺ်း၊ ဝႃႈၼင်ႇၼႆတီႈၶႃႈဢေႃႈ။
ၽြႃးပဵၼ်ၸဝ်ႈၶိုၼ်းတွပ်ႇ
၅ ပေႃးမႂ်းၶုၼ်ႇလႅၼ်ႈ ၶေႉၶဵင်ႇၵၼ်တင်းၶဝ်ၸိူဝ်းဢၼ်ပႆတိၼ်ၼၼ်ႉလႄႈ ႁိူဝ်ႉဢူၼ်ႈၸိုင်မႂ်းတၵ်းၶေႉၶဵင်ႇၵၼ်တင်းမႃႉလႆႈၸိူဝ်ႉၼင်ႇႁိုဝ်။ပိၵ်ႉသမ်ႉမႂ်းမီးတၢင်းဢၼ်လုင်ႉလီလွတ်ႈလီယူႇ ၵႃႈၼႂ်းမိူင်းဢၼ်ၼိမ်ဢၼ်လီသေၵေႃႈမႂ်းတၵ်းႁဵတ်းၸိူဝ်ႉၼင်ႇႁိုဝ် ၵႃႈၼႂ်းတၢင်းဢၼ် ၼမ်ႉႁွင်ႊယေႃႇတၢၼ်ႇၼွင်းမႃးၼၼ်ႉ။
၆ တေႃႈၵႃႈပီႈမႂ်းၼွင်ႉမႂ်းၵူၼ်းႁိူၼ်းၵူၼ်းယေးပေႃႈမႂ်းၸိူဝ်းၼၼ်ႉ ယင်းဢွၼ်ၵၼ်ယႃႉသႅတ်ႉၸႃႇမႂ်းလႄႈ သႅၼ်ႇႁွင်ႉၸွမ်းလင် မႂ်းယူႇဢိူဝ်ႈ။
၇ ပိၵ်ႉသမ်ႉၶဝ်လၢတ်ႈၵႂၢမ်းဢၼ်လီတီႈမႂ်းသေၵေႃႈယႃႇပေႇယုမ်ႇၶဝ်။ ၵဝ်ၼႆႉၸုၼ်ႉပႅတ်ႈႁိူၼ်းၵဝ်လႄႈပႅတ်ႈဢမူၺ်ႇၵဝ်ဝႆႉယဝ်ႉ။ ၵဝ်ဢဝ်မေႈယိင်းဢၼ်ႁူဝ်ၸႂ်ၵဝ်ႁၵ်ႉၼႃႇၼၼ်ႉဢၢပ်ႈဝႆႉၵႃႈၼႂ်းမိုဝ်း ရၢၼ်ႇသူႇမၼ်းယဝ်ႉ။
၈ ၵွပ်ႈပိူဝ်ႈဢမူၺ်ႇၵဝ်ၼၼ်ႉပဵၼ်ၸိူဝ်ႉၼင်ႇသၢင်ႇသီႈ ဢၼ်ထူပ်းၵႃႈၼႂ်းထိူၼ်ႇၼၼ်ႉတီႈၵဝ်လႄႈ ႁွင်ႉၶၢင်းတေႃႇၵဝ်ယူႇလႄႈၵဝ်ၸင်းမၼ်းဢေႃႈ။
၉ ဢမူၺ်ႇၵၼ်ၼၼ်ႉပဵၼ်ၸိူဝ်ႉၼင်ႇၼူၵ်ႉႁၢႆႉ ဢၼ်ပဵၼ်ၸုမ်ႈပဵၼ်လၢႆးၼၼ်ႉတီႈၵဝ်ယဝ်ႉႁိုဝ်။ၼူၵ်ႉႁၢႆႉၵႃႈမီးလဵပ်ႈႁွပ်ႈမၼ်းယူႇလႄႈဢွၼ်ၵၼ်တိုၵ်းတေႃးမၼ်းႁိုဝ်။ဢွၼ်ၵၼ်ၵႂႃႇလႄႈ ႁႂ်ႈတူဝ်ထိူၼ်ႇႁၢႆႉတင်းသဵင်ႈတင်းလူင် ၸူႉၵၼ်တုမ်ၵၼ်သေလႄႈမႃးႁႂ်ႈလႆႈၶူပ်းလႆႈၵိၼ် တႃႉ။
၁၀ ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼမ်ၼႃႇၼၼ်ႉဢွၼ်ၵၼ်ယႃႉသူၼ်ဢူးယဵၼ်ႇၸပိတ်ႉၵဝ် ပႅတ်ႈယဝ်ႉ။ၶဝ်ဢွၼ်ၵၼ် ယဵပ်ႇယမ်ႈပႅတ်ႈပုၼ်ႈၵဝ်တႃႇၵဝ်ၼၼ်ႉယဝ်ႉ။ၶဝ်ဢွၼ်ၵၼ်ႁႂ်ႈတီႈဢၼ်လီထုၵ်ႇၸႂ်ၵျိူၵ်ႈၸႂ်ၵဝ်ၼၼ်ႉပဵၼ်ထိူၼ်ႇပဵၼ်ၶိူဝ်း တီႈဢၼ်ၽိတ်ႇၵူၼ်းငႅဝ် ၵူၼ်းၵႂႃႇယဝ်ႉ။
၁၁ ၶဝ်ႁႂ်ႈမၼ်းပဵၼ်တီႈဢၼ်ၽိတ်ႇၵူၼ်းငႅဝ်ၵူၼ်းလႄႈ ၵွပ်ႈပိူဝ်ႈဢၼ်မီးတၢင်းဢၼ်ၽိတ်ႇဢၼ်ငႅဝ်ၵူၼ်းယူႇၼၼ်ႉလႄႈ ၶၢင်းၶီၶၢင်းၽၢၼ်တေႃႇၵဝ်ဢေႃႈ။မိူင်းလူႉလႅဝ်ၵႂႃႇတင်းမိူင်းၵွပ်ႈပိူဝ်ႈဢၼ်ၽူႈ လႂ်သေၵေႃႉသေၵူၼ်းဢမ်ႇၸၢင်ႈႁဵတ်းပမႃႇၼႃႉၼၼ်ႉ ဢေႃႈ။
၁၂ ၶဝ်ၸိူဝ်းဢၼ်ႁိမ်ႁူင်ႇဢဝ်ၼၼ်ႉဢွၼ်ၵၼ်ႁွတ်ႈထိုင်ၵႃႈၼိူဝ်တီႈဢၼ်သုင်ၵႂႃႇ ၼႂ်းထိူၼ်ႇၵႃႈမီးၼၼ်ႉယဝ်ႉ။ လၢပ်ႇထႃႇဝရႃႉၽြႃးယႃႉၽဵဝ်ႈပႅတ်ႈၸႃႉၸဵမ်ႁိမ်းလႅၼ်မိူင်းၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈပႅတ်ႈလႄႈၽူႈ လႂ်သေၵေႃႉသေၵူၼ်းဢမ်ႇလႆႈ ၵတ်းယဵၼ်ၶျၢမ်းသႃႇ။
၁၃ ၶဝ်ဢွၼ်ၵၼ်ဝၢၼ်ႇပိုၼ်ၸိူဝ်ႉၽၼ်းၶဝ်ႈၵျုင်ႇလႄႈလႆႈပၢတ်ႇဢဝ်ႇတူၼ်ႈၼၢမ်ၵူၺ်းဢေႃႈ။ ၶဝ်ဢွၼ်ၵၼ်ႁဵတ်းယၢပ်ႇႁဵတ်းၽိုတ်ႇၼႃႇလူင်လၢင်လႄႈဢမ်ႇမီးၵျေးၸူး။ၶဝ်တၵ်းဢွၼ်ၵၼ်ထွၵ်ႈလူၺ်ႈဢၵျူဝ်းၶဝ်ၼၼ်ႉသေလႄႈ ဢူၵ်းဢၢႆၵွပ်ႈပိူဝ်ႈဢၢႆႁႅင်းတၢင်းၸႂ်မႆႈၶႆႈၸႃႉ ထႃႇဝရႃႉၽြႃးၼၼ်ႉဢေႃႈ။
၁၄ ထႃႇဝရႃႉၽြႃးမီးဢမိင်ႉလူၺ်ႈလွင်ႈၵႃႈဢၼ်ပဵၼ်ၵူၼ်းႁိူၼ်းၸမ်ၵၼ်တင်းၵဝ် ဢၼ်ႁၢႆႉမိူၵ်ႈဢၼ်တိူဝ်ႉထုၵ်ႇဢမူၺ်ႇ ဢၼ်ၵဝ်ဢိတ်းလူပၼ်ႁႂ်ႈၵူၼ်းၵဝ်မဵဝ်းဢိသရေႇလ ထိူၵ်ႈပိူင်ႇၼၼ်ႉၸိူဝ်းၼၼ်ႉၸမ်း၊-တူၺ်းလူ။ၵဝ်တၵ်းထွတ်ႇထူၺ်ႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းၶဝ်ၼၼ်ႉလႄႈထွတ်ႇထူၺ်ႈၼုၵ်ႈဢဝ်မဵဝ်း ယုတဢွၵ်ႇသေၵႃႈၼႂ်းၶဝ်ၼၼ်ႉဢေႃႈ။
၁၅ ၵဝ်ထွတ်ႇထူၺ်ႈၼုၵ်ႈဢဝ်ၶဝ်သေယဝ်ႉ ၵဝ်တၵ်းသမ်ႉၶိုၼ်းမႃးလႄႈ ဢိတ်းလူၶဝ်သေလႄႈ ဢဝ်ၶဝ်သမ်ႉၶိုၼ်းသူင်ႇၵႃႈတီႈဢမူၺ်ႇဢၼ်ၶဝ်ထိူၵ်ႈပိူင်ႇ တီႈဢၼ်ၶဝ်ယူႇ ၵဝ်ႇၵဝ်ႇၼၼ်ႉႁင်းၽႂ်ႁင်းမၼ်းဢေႃႈ။
၁၆ ပေႃးၶဝ်ၶတ်းၸႂ်ႈသွၼ်ဢဝ်ၽႃႇသႃႇသဵၼ်ႈတၢင်း ၵူၼ်းမဵဝ်းၵဝ်တင်းလၢႆႁႂ်ႈလႆႈဢဝ်ၼႃႇမႃႉၸိုဝ်သဵင်ၵဝ် တိူင်ႇဝႃႈၵိၼ်ႇဝႃႈလႄႈဝႃႈၵႃႈၼင်ႇဢၼ်ထႃႇဝရႃႉၽြႃး ဢသၢၵ်ႈလိပ်းယူႇၼၼ်ႉဝႃႈၼင်ႇၼႆပိၵ်ႉသမ်ႉဝႃႈ ၶဝ်ယၢမ်ႈသွၼ်ပၼ်တီႈၵူၼ်းၵဝ်တင်းလၢႆႁႂ်ႈလႆႈဢဝ်ၽြႃးပႃႇလ တိူင်ႇဝႃႈၵိၼ်ႇဝႃႈသေၵေႃႈ ၵဝ်တၵ်းႁႂ်ႈၶဝ်တႄႇယူႇၵႃႈၼႂ်းၵူၼ်း မဵဝ်းၵဝ်တင်းလၢႆဢေႃႈ။
၁၇ ပေႃးဢမ်ႇၼၼ်ပေႃးၶဝ်ယင်းဢမ်ႇထွမ်ႇဢမ်ႇဢဝ်လႄႈ ယူႇၸိုင် ၵဝ်တၵ်းထွတ်ႇထူၺ်ႈၼုၵ်ႈဢဝ်ၵူၼ်းမဵဝ်းၼၼ်ႉသေလႄႈ ယႃႉပႅတ်ႈမူတ်းမူတ်းသဵင်ႈသဵင်ႈဢေႃႈ၊ ဝႃႈၼႆထႃႇဝရႃႉၽြႃးမီးဢမိင်ႉဢေႃႈ။