၂၃
ၵိင်ႇၶႃႊဢၼ်သိုဝ်ႈတေႃႇ
၁ ထႃႇဝရႃႉၽြႃးမီးဢမိင်ႉၸမ်း၊-ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းဢၼ်ယႃႉပႅတ်ႈလႄႈ ႁႂ်ႈသူဝ်းဢၼ်ယၢမ်ႈၵိၼ်ယူႇၵႃႈတီႈၵဝ်တင်းလၢႆမၢၵ်ႇမိူဝ်ၵႂႃႇၼၼ်ႉ မီးဢႃႉ မင်ႇၵလႃႇဢေႃႈ။
၂ ပိူဝ်ႈၼႆလႄႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉလူၺ်ႈလွင်ႈၶဝ်ၸိူဝ်းဢၼ်လဵင်ႉသူဝ်းထိင်းသူဝ်း ဢၼ်လႆႈလဵင်ႉလူၵူၼ်းၵဝ်တင်းလၢႆၼၼ်ႉၸမ်း၊-သူႁႂ်ႈၽုင်သူဝ်းၵဝ်မၢၵ်ႇမိူဝ်ၵႂႃႇ၊ႁေႃႈၶဝ်ပႅတ်ႈ၊ ဢမ်ႇလူတူၺ်းလုမ်းလႃးၶဝ်လႄႈ၊တူၺ်းလူ။ၵဝ်တၵ်းႁႂ်ႈတုၸရိူၵ်ႈဢပျႅတ်ႈဢၼ်သူႁဵတ်းၼၼ်ႉတူၵ်းႁွတ်ႈၵႃႈၼိူဝ်သူဢေႃႈ၊ ဝႃႈၼင်ႇၼႆ ထႃႇ ဝရႃႉၽြႃးမီးဢမိင်ႉဢေႃႈ။
၃ ၵဝ်တၵ်းႁႂ်ႈၽုင်သူဝ်းဢၼ်ယင်းၵိုတ်းယင်းၵျၢၼ်ႇၼၼ်ႉ ဢွၵ်ႇသေႇၵႃႈၼႂ်းမိူင်းၵႃႈမီးဢၼ်ၵဝ်ႁေႃႈၶဝ်ၵႂႃႇၸူးၼၼ်ႉ မႃးၸူႉၵၼ်တုမ်ၵၼ်လႄႈ သမ်ႉတၵ်းဢဝ်ၶဝ်ၶိုၼ်းမႃးၸူးၵႃႈတီႈၶွၵ်ႈသူဝ်းတီႈယူႇၶဝ်ၼၼ်ႉဢေႃႈ။ၶဝ်ၵေႃႈတၵ်းဢွၼ်ၵၼ်ၵိူတ်ႇလဵင်ႉလုၵ်ႈလဵင်ႉလၢင်းလႄႈ ၼမ်ၵိုၼ်းမႃးဢေႃႈ။
၄ ၵဝ်တၵ်းၶၢၼ်းၶဝ်ၸိူဝ်းဢၼ်လဵင်ႉသူဝ်းထိင်းသူဝ်းဢၼ်လဵင်ႉလူၶဝ်ၼၼ်ႉဝႆႉၵႃႈၼိူဝ်ၶဝ်လႄႈ ၶဝ်ၼၼ်ႉၵမ်းလိုၼ်းဢမ်ႇလႆႈၵူဝ်လႆႈႁႄ။ ဢမ်ႇလႆႈတူၵ်းၸႂ်လႄႈတိုၼ်ႇ။ဢမ်ႇလႆႈၶၢမ်ႇတၢင်းဢၼ်ႁူင်ႈၵႂႃႇႁၢႆၵႂႃႇ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၅ ထႃႇဝရႃႉၽြႃးမီးဢမိင်ႉၸမ်း၊-မို်ဝ်ႉဝၼ်းဢၼ်ၵဝ်တၵ်းႁႂ်ႈယွတ်ႈဢၼ်သိုဝ်ႈတေႃႇ တႅၵ်ႇဢွၵ်ႇပုၼ်ႈတႃႇဝိတ်ႉလႄႈ မၼ်းၼၼ်ႉတၵ်းႁဵတ်းၶုၼ်ႁေႃၶမ်းလႄႈၸွမ်းလူၺ်ႈၺၢၼ်ႇသေလႄႈ ၸီႇယၢင်ႇတႅပ်းတတ်းၸွမ်းတၢင်းဢၼ်ႁဵတ်းၸွမ်းၼင်ႇတြႃး ဢိၵ်ႇတင်းတၢင်းဢၼ်သိုဝ်ႈတေႃႇၵႃႈၼိူဝ်လိၼ်မိူင်းၼႆႉၼၼ်ႉတၵ်း ႁွတ်ႈထိုင်ဢေႃႈ။
၆ ၼႂ်းၸူဝ်ႈပၢၼ်မၼ်းၼၼ်ႉ မိူင်းယုတတၵ်းႁွတ်ႈထိုင် တၢင်းဢၼ်ၵႄႇသႄႇၶျွတ်ႈဢဝ်လႄႈမိူင်းဢိသရေႇလၵေႃႈတၵ်းလႆႈယူႇၼိမ်ၼိမ်လီလီဢေႃႈ။ ၼႃႇမႃႉၸိုဝ်သဵင်ဢၼ်မၼ်းတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈၼၼ်ႉၸမ်း၊-ပဵၼ်ယေႇႁေႃးဝႃႇၸေႇတၵၼုဢေႃႈ။
၇ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။မိူဝ်ႉဝၼ်းဢၼ်ယင်းဢမ်ႇလႆႈတိူင်ႇလႄႈဝႃႈ ၵႃႈၼင်ႇဢၼ်ထႃႇဝရႃႉၽြႃးဢၼ်ၼုၵ်ႈဢဝ်ၵူၼ်းမဵဝ်းဢိသရေႇလ တင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတု မႃးၼၼ်ႉဢသၢၵ်ႈလိပ်းယူႇၼၼ်ႉဝႃႈၼင်ႇၼႆလႄႈ တၵ်းလႆႈတိူင်ႇဝႃႈလႄႈဝႃႈ၊-
၈ ၵႃႈၼင်ႇဢၼ်ထႃႇဝရႃႉၽြႃး ဢၼ်ဢဝ်မဵဝ်းဢိသရေႇလ လုၵ်ႉသေၵႃႈတီႈမိူင်းတၢင်းၸၢၼ်းဢိၵ်ႇတင်းမိူင်းတီႈဢၼ်ႁေႃႈၶဝ်ဢွၵ်ႇၸူးၵႃႈမီးၼၼ်ႉ မႃးၼၼ်ႉဢသၢၵ်ႈလိပ်းယူႇၼၼ်ႉ ဝႃႈၼင်ႇၼႆၼၼ်ႉ တၵ်းႁွတ်ႈထိုင်ဢေႃႈ။ၶဝ်ၼၼ်ႉတၵ်းသမ်ႉဢွၼ်ၵၼ်ၶိုၼ်းလႆႈယူႇၵႃႈၼႂ်းမိူင်းတီႈယူႇၶဝ်ဢေႃႈ။
ပရေႃးၽိတ်ႉဢၼ်ၽႅတ်ႉလႅၼ်
၉ ၵႂၢမ်းဢၼ်ဢဝ်လွင်ႈ ပရေႃးၽိတ်ႈတင်းလၢႆဝႃႈၸမ်း၊ၵွပ်ႈပိူဝ်ႈထႃႇဝရႃႉၽြႃး ဢိၵ်ႇတင်းၵွပ်ႈပိူဝ်ႈၵႂၢမ်းမၼ်းၸဝ်ႈဢၼ်မူတ်းၸၢင်ႇၼၼ်ႉလႄႈ ႁူဝ်ၸႂ်ၵဝ်မီးတၢင်းဢၼ်တႅၵ်ႇလႅဝ်ယူႇဢေႃႈ။လုပ်ႇၵဝ်ၵႃႈမီးဢွၼ်ၵၼ်သၼ်ႇဝႆလႄႈ ၵဝ်ပဵၼ်ၸိူဝ်ႉၼင်ႇၵေႃႉဢၼ်မဝ်းလဝ်ႈဢိၵ်ႇတင်း ၸိူဝ်ႉၼင်ႇၵေႃႉဢၼ်ၼမ်ႉၸပိတ်ႈပေႉၼႅင်ႇ ၼၼ်ႉယူႇဢေႃႈ။
၁၀ လွင်ႈမၼ်းၸမ်း၊မိူင်းၸဝ်ႈမီးတၢင်းဢၼ်တဵမ်ဝႆႉတင်း ၶဝ်ၸိူဝ်းဢၼ်ႁဵတ်းလူၺ်ႈမေႇထုင်ႇဢၼ်ဢမ်ႇတြႃးၼၼ်ႉလႄႈ မိူင်းၸဝ်ႈလႆႈမီးတၢင်းဢၼ်ၶၢင်းၶီၶၢင်းၽၢၼ်ယူႇ ၵွပ်ႈပိူဝ်ႈတၢင်းဢၼ်ၵိၼ်ႇဢၼ်ဝႃႈဢေႃႈ။တီႈဢၢၼ်ယၢမ်ႈၵိၼ်ယူႇၵႃႈတီႈထိူၼ်ႇတီႈၶိူဝ်းၸိူဝ်းၼၼ်ႉ မီးတၢင်းဢၼ်ယူတ်းႁႅင်ႈၵႂႃႇဢေႃႈ။ သဵၼ်ႈတၢင်းဢၼ်ၶဝ်ၵႂႃႇၶဝ်ၸွမ်းၼၼ်ႉပဵၼ်ဢၼ်ႁၢႆႉဢၼ်ယုတ်ႈလႄႈ တၢင်းၵတ်ႉတၢင်းၶၼ် ၶဝ်ဢမ်ႇၸၢင်ႈယူႇၽၢႆႇတြႃး။
၁၁ ပရေႃးၽိတ်ႈဢိၵ်ႇတင်းယိတ်ႉပရေႃးႁိၵ်ႈသွင်မဵဝ်းၼၼ်ႉ ဢွၼ်ၵၼ်ႁဵတ်းဢမ်ႇရူဝ်ႇသေႇၵူဝ်ယမ်ၽြႃးယဝ်ႉ။ တေႃႈၵႃႈၵႃႈၼႂ်းႁိူၼ်းၵဝ်ၼၼ်ႉၵဝ်ယင်းထူပ်းႁၼ် လွင်ႈတၢင်းဢၼ်ႁၢႆႉဢၼ်မိူၵ်ႈဢၼ်ၶဝ်ႁဵတ်းၼၼ်ႉယဝ်ႉဝႃႈၼင်ႇၼႆ ထႃႇဝရႃႉ ၽြႃးမီးဢမိင်ႉဢေႃႈ။
၁၂ ပိူဝ်ႈၼႆလႄႈသဵၼ်ႈတၢင်းဢၼ်ၶဝ်ၵႂႃႇၶဝ်ၸွမ်းၼၼ်ႉ တၵ်းပဵၼ်ၸိူဝ်ႉၼင်ႇတီႈဢၼ်မိုၼ်ႈၶျေႃးၵႃႈၼႂ်းလပ်းသိင်ႇၼၼ်ႉလႄႈ ၶဝ်ၼၼ်ႉတၵ်းလႆႈဢွၼ်ၵၼ် ၶၢမ်ႇတၢင်းဢၼ်တွၵ်ႈဢီးလႄႈလူမ်ႉဢေႃႈ။လွင်ႈမၼ်းၸမ်းၵဝ်တၵ်းႁႂ်ႈၽေးဢူးပၢတ်ႈဢၼ်ဝႃႈ ၶူပ်ႇပီႊဢၼ်လႆႈၶၢမ်ႇတၢင်းဢၼ်သင်ႇသွၼ်သုင်းမႃႉၼၼ်ႉႁွတ်ႈထိုင်ၵႃႈၼိူဝ်ၶဝ်ဢေႃႈ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၃ ၵဝ်ႁၼ်သၽေႃးဢၼ်မိူၵ်ႈ ၵႃႈၼႂ်းပရေႃးၽိတ်ႈၵူၼ်းဝဵင်းသမႃႇရိၸိူဝ်းၼၼ်ႉယဝ်ႉ။ၶဝ်ၼၼ်ႉဢိင်ၽြႃးပႃႇလသေလႄႈ ႁဵတ်းပရေႃးၽိတ်ႈလႄႈဢွၼ်ၵၼ်ႁဵတ်းႁႂ်ႈၵူၼ်းမဵဝ်းဢိသရေႇလၽိတ်းပိူင်ႈယဝ်ႉ။
၁၄ ၵႃႈၼႂ်းပရေႃးၽိတ်ႈၵူၼ်းဝဵင်းယေႇရုသလႅမ်ႇ ၸိူဝ်းၼၼ်ႉၵေႃႈ ၵဝ်ႁၼ်သၽေႃးဢၼ်လီႁင်ႈဢဵတ်ႇသဵတ်ႇယဝ်ႉ။ၶဝ်ၼၼ်ႉႁဵတ်းလူၺ်ႈမေႇထုင်ႇဢၼ်ဢမ်ႇတြႃးယူႇ၊ သုင်းသွင်ႇမူႉသႃႇယူႇသေလႄႈ ၸၢင်ႊပၼ်ႁႅင်းတီႈမိုဝ်းၶဝ်ၸိူဝ်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉထၼ်ႈပေႃးၽူႈ လႂ်သေၵေႃႉသေၵူၼ်း ဢမ်ႇၸုၼ်ႉပႅတ်ႈတၢင်းဢၼ်ႁၢႆႉဢၼ်မိူၵ်ႈဢၼ်မၼ်းႁဵတ်းၼၼ်ႉဢေႃႈ။ၶဝ်ၵႃႈမီးၼၼ်ႉပဵၼ်ၸိူဝ်ႉၼင်ႇၵူၼ်းဝဵင်းသေႃးတုမ်ႇ လႄႈၵူၼ်းဝဵင်းယေႇရုသလႅမ်ႇတင်းလၢႆၸမ်း ပဵၼ်ၸိူဝ်ႉၼင်ႇၵူၼ်းဝဵင်းၵေႃးမေႃ:ရၼၼ်ႉတီႈၵဝ်ဢေႃႈ။
၁၅ ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလူၺ်ႈလွင်ႈပရေႃးၽိတ်ႈၸိူဝ်းၼၼ်ႉၸမ်း၊-တူၺ်းလူ။ ၵဝ်တၵ်းဢဝ်မႂ်ႊတေႃးၼႃႉလဵင်ႉလူၶဝ်လႄႈႁႂ်ႈၶဝ်သူတ်ႉၵိၼ်ယႃႈၶူမ်ဢေႃႈ။တၢင်းဢၼ်ႁဵတ်းဢမ်ႇရူဝ်ႇသေႇၵူဝ်ယမ်ၼၼ်ႉ ဢွၵ်ႇသေၵႃႈတီႈ ပရေႃးၽိတ်ႈၵူၼ်းဝဵင်းယေႇရုသလႅမ်ႇၸိူဝ်းၼၼ်ႉလႄႈ ၸွတ်ႇတူဝ်ႈ ၵႂႃႇတင်းမိူင်းယဝ်ႉ။
၁၆ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-ယႃႇပေဢွၼ်ၵၼ်ထွမ်ႇဢဝ်ၵႂၢမ်းသြႃႇတင်းလၢႆဢၼ်ၸၢင်ႊႁဵတ်းပရေႃးၽိတ်ႈလႄႈ ႁေႃးလၢတ်ႈတီႈသူၼၼ်ႉ။ၶဝ်ၼၼ်ႉၸၢင်ႈဢွၼ်ၵၼ်ႁေႃးလၢတ်ႈလွင်ႈတၢင်းဢၼ် လၢႆလၢႆလွၵ်ႇလွၵ်ႇတီႈသူဢေႃႈ။ၶဝ်ယင်းဢမ်ႇၸွမ်းၵႂၢမ်းဢၼ်ဢွၵ်ႇသူပ်းထႃႇဝရႃႉၽြႃးၼၼ်ႉလႄႈၸင်ႇဢွၼ်ၵၼ်ႁေႃးလၢတ်ႈ ၸွမ်းရူႇပႃႇရူင်ႁူဝ်ၸႂ်ၶဝ်ဢေႃႈ။
၁၇ ၶဝ်ၸင်ႇဢွၼ်ႁေႃးလၢတ်ႈတီႈၶဝ်ၸိူဝ်းဢၼ် ႁဵတ်းဢမ်ႇပေႃးၼင်ႇႁိုဝ်တီႈၵဝ်လႄႈထႃႇဝရႃႉၽြႃးမီးဢမိင်ႉၸမ်း၊-သူတၵ်းမီးတၢင်းဢၼ်ၼိမ်ဢၼ်လီဢေႃႈ၊ ဝႃႈၼင်ႇၼႆဢေႃႈ။ၶဝ်ၸၢင်ႊႁေႃးလၢတ်ႈတီႈၶဝ်ၸိူဝ်းဢၼ်ၸွမ်းသၽေႃး တၢင်းဢၼ်ႁူဝ်ၸႂ်တူဝ်ၸဝ်ႈၵဝ်ႇၵႅၼ်ႇၶႅင်ၼၼ်ႉလႄႈဝႃႈ၊-သူဢမ်ႇလႆႈထူပ်းၽေးဢူးပၢတ်ႈဝႃႈၼင်ႇ ၼႆဢေႃႈ။
၁၈ ၽူႈ လႂ်ႁဵတ်းတၢင်းဢၼ်တိူင်ႇပၢင်ႇႁူမ်ႈလူၺ်ႈၵၼ်တင်း ထႃႇဝရႃႉၽြႃး ႁႂ်ႈလႆႈႁူႉႁၼ်လႄႈငိၼ်းၼုၵ်ႈၵပၢတ်ႈမၼ်းၸဝ်ႈ။ၽူႈ လႂ်ၸွမ်းဢဝ်ၼုၵ်ႈ ၵပၢတ်ႈမၼ်းၸဝ်ႈလႄႈငိၼ်း။
၁၉ တူၺ်းလူ။လုမ်းၽိဝ်ႁုင်ထႃႇဝရႃႉၽြႃးဢၼ်ဝႃႈဢၢႆတၢင်းၸႂ်မႆႈၶႆႈၸႃႉမၼ်းၸဝ်ႈၼၼ်ႉဢွၵ်ႇမႃးလႄႈပဵၼ်လူမ်းၽိဝ်ႁုင်ဢၼ်ပၼ်ႇပတ်ႉထူဝ်းၼၼ်ႉဢေႃႈ။ တၵ်းပတ်ႉထူဝ်းသႂ်ႇၵႃႈၼိူဝ်ႁူဝ် ၶဝ်ၸိူဝ်းဢၼ်ဢမ်ႇတြႃးၼၼ်ႉႁႅင်းယႂ်ႇၼႃႇ လူင်လၢင်ဢေႃႈ။
၂၀ တၢင်းၸႂ်မႆႈၶႆႈၸႃႉထႃႇဝရႃႉၽြႃးတၵ်းဢမ်ႇဝၢႆႇဢမ်ႇၶိုၼ်း တေႃႇထိုင်ႁွတ်ႈမၼ်းၸဝ်ႈထၼ်ႈပေႃး ၵွႆႇမိုဝ်းမၼ်းၸဝ်ႈလႄႈ ႁႂ်ႈတၢင်းၵျၢမ်ႇ တၢင်းပွင်မၼ်းၸဝ်ႈလႆႈတဵမ်ထူၼ်ႈၼၼ်ႉဢေႃႈ။
၂၁ ၶိင်မိူဝ်ႉဝၼ်းလိုၼ်းၼၼ်ႉသူတၵ်းႁူႉၸႅင်ႈလီလီငၢမ်းငၢမ်းဢေႃႈ။ ပရေႃးၽိတ်ႈၸိူဝ်းၼၼ်ႉၵဝ်ယင်းဢမ်ႇပွႆႇၸႂ်ႉလႄႈၶဝ်ဢွၼ်ၵၼ်ၶုၼ်ႇလႅၼ်ႈယဝ်ႉ။ ၵဝ်ယင်းဢမ်ႇသင်ႇလၢတ်ႈဝႆႉတီႈၶဝ်လႄႈ ၶဝ်ဢွၼ်ၵၼ်ႁေႃးလၢတ်ႈ ယဝ်ႉ။
၂၂ သင်ၶဝ်ႁဵတ်းၵေႃႉဢၼ်တိူင်ႇပၢင်ႇႁူမ်ႈလူၺ်ႈၵၼ်တင်းၵဝ်ၸိုင် ၶဝ်ႁႂ်ႈၵူၼ်းၵဝ်တင်းလၢႆလႆႈငိၼ်းၵႂၢမ်းၵဝ်လႄႈၶဝ်ဝႄႈပိူင်ႈသေ ၵႃႈတီႈသဵၼ်ႈတၢင်းဢၼ်ဢမ်ႇတြႃးၶဝ် ဢိၵ်ႇတင်းသေၵႃႈတီႈတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းၶဝ်ၼၼ်ႉယဝ်ႉ။
၂၃ ၵဝ်ပဵၼ်ၽြႃးၵႃႈတီႈဢၼ်ၸမ်ၵူၺ်းႁိုဝ်။ၵႃႈတီႈဢၼ်ၵႆၵေႃႈပဵၼ်ၽြႃးယူႇဢမ်ႇၸႂ်ႈႁိုဝ်၊ ဝႃႈၼင်ႇၼႆထႃႇ ဝရႃႉၽြႃးထၢမ်ဢေႃႈ။
၂၄ ၽူႈ လႂ်တဵတ်ႇမႅပ်းယူႇၵႃႈတီႈဢၼ်လပ်ႉၼၼ်ႉ ႁႂ်ႈၵဝ်ထၼ်ႈပေႃးဢမ်ႇႁၼ်မၼ်းလႆႈဝႃႈၼင်ႇၼႆထႃႇဝရႃႉၽြႃးထၢမ်ဢေႃႈ။ၵဝ်ၸွတ်ႇတူဝ်ႈၾႃႉၵၢင်ႁၢဝ်ဢိၵ်ႇတင်းလိၼ်မိူင်းယူႇဢမ်ႇၸႂ်ႈႁိုဝ်၊ဝႃႈၼင်ႇၼႆထႃႇဝရႃႉၽြႃးထၢမ်ဢေႃႈ။
၂၅ ၵဝ်လႆႈငိၼ်းၵႂၢမ်းပရေႃးၽိတ်ႈ ဢၼ်ဢိင်ၼႃႇမႃႉၸိုဝ်သဵင်ၵဝ်သေလႄႈ ဢဝ်မူႉသႃႇလၢတ်ႈလႄႈဝႃႈ၊-ၵဝ်ၼွၼ်းၽၼ်ႁၼ်ယဝ်ႉ၊ ၵဝ်ၼွၼ်းၽၼ်ႁၼ်ယဝ်ႉဝႃႈၼင်ႇၼႆၼၼ်ႉ ယဝ်ႉ။
၂၆ ပရေႃးၽိတ်ႈဢၼ်ၸၢင်ႊႁေႃးလၢတ်ႈၵႂၢမ်းမူႉသႃႇၸိူဝ်းၼၼ်ႉ တၵ်းဢွၼ်ၵၼ်ၵျၢမ်ႇပွင်ၸိူဝ်ႉၼင်ႇၼႆယူႇၶိင်ႇၵႃႇလႃႉႁိုင်ၵႃႈႁိုဝ်။ၸၢင်ႊႁေႃးလၢတ်ႈၸွမ်း ၵႃႈၼင်ႇဢၼ်ႁူဝ်ၸႂ်ၶဝ်ပႅတ်ႉလႅၼ်ၼၼ်ႉဢေႃႈ။
၂၇ ၶဝ်မီးတၢင်းၵျၢမ်ႇတၢင်းပွင် တၵ်းႁႂ်ႈၵူၼ်းတင်းလၢႆလူင်လိုမ်းၼႃႇမႃႉၸိုဝ်သဵင်ၵဝ် ၵွပ်ႈပိူဝ်ႈတၢင်းဢၼ်ၼွၼ်းၽၼ်ႁၼ်ဢၼ်ၵေႃႉၼိုင်ႈလႄႈ ၵေႃႉၼိုင်ႈၸင်ႇလၢတ်ႈတီႈၵူၼ်းႁိူၼ်းၸမ်ၵၼ်ၼၼ်ႉ မိူၼ်ၸိူဝ်ႉၼင်ႇဢၼ်ပူႇၶဝ်မွၼ်ႇၶဝ်လူင်လိုမ်း ၼႃႇမႃႉၸိုဝ်သဵင်ၵဝ်ၵွပ်ႈပိူဝ်ႈၽြႃး ပႃႇလၼၼ်ႉလူင်ပေႇ။
၂၈ ႁႂ်ႈပရေႃးၽိတ်ႈဢၼ်မီးတၢင်းဢၼ်ၼွၼ်းၽၼ်ႁၼ်ၼၼ်ႉ လၢတ်ႈၵႂၢမ်းဢၼ်ၼွၼ်းၽၼ်ႁၼ်ၼၼ်ႉသေၵမ်း။ႁႂ်ႈၵေႃႉဢၼ်လႆႈၶၢမ်ႇဢဝ်ၼုၵ်ႈၵပၢတ်ႈၵဝ်ၼၼ်ႉ ႁေႃးလၢတ်ႈၵႂၢမ်းၼုၵ်ႈၵပၢတ်ႈၵဝ်မၢၼ်ႇမၢၼ်ႇမႅၼ်ႈမႅၼ်ႈသေၵမ်း။
ၶဝ်ႈဢၼ်လိပ်းဢၼ်ၽၢင်းၼၼ်ႉၸၢပ်ႈသႅင်ႇၵၼ်တင်းၶဝ်ႈပိူၵ်ႇၸိူဝ်ႉၼင်ႇႁိုဝ် ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၂၉ ၼုၵ်ႈၵပၢတ်ႈၵဝ်ပဵၼ်ၸိူဝ်ႉၼင်ႇၽႆးဢိၵ်ႇတင်းၸိူဝ်ႉၼင်ႇၶွၼ်ႉလဵၵ်း ဢၼ်ပေႃႉထုပ်ႉမၢၵ်ႇႁိၼ်ႁႂ်ႈလႅဝ်ၼၼ်ႉဢမ်ႇၸႂ်ႈႁိုဝ်ဝႃႈၼင်ႇၼႆထႃႇဝရႃႉ ၽြႃးထၢမ်ဢေႃႈ။
၃၀ ပိူဝ်ႈၼႆလႄႈၵဝ်တၵ်းႁဵတ်းၶတ်းၵၼ်တင်းပရေႃးၽိတ်ႈ ဢၼ်ၵူႈၵေႃႉၵူႈၵူၼ်းၼင်ႇၵၼ်ၵၼ်လၵ်ႉဢဝ်ၵႂၢမ်းၵဝ် တီႈၵူၼ်းႁိူၼ်းၸမ်ၵၼ်ၼၼ်ႉဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၃၁ တူၺ်းလူ။ၵဝ်တၵ်းႁဵတ်းၶတ်းၵၼ်တင်းပရေႃးၽိတ်ႈ ဢၼ်ဢဝ်သူပ်းဢဝ်လိၼ်ႉၶဝ်သေလႄႈဝႃႈ မၼ်းၸဝ်ႈမီးဢမိင်ႉယဝ်ႉ၊ဝႃႈၼင်ႇၼႆၼၼ်ႉၸိူဝ်းၼၼ်ႉဢေႃႈ၊ ဝႃႈၼင်ႇၼႆ လႄႈထႃႇဝရႃႉၽြႃးမီးဢမိင်ႉဢေႃႈ။
၃၂ ၵဝ်တၵ်းႁဵတ်းၶတ်းၵၼ်တင်းပရေႃးၽိတ်ႈ ဢၼ်ႁေႃးလၢတ်ႈတၢင်းဢၼ်ၼွၼ်းၽၼ်ႁၼ် ဢၼ်ဢမ်ႇၸိုဝ်ႈဢမ်ႇၸႂ်ႈလႄႈဢဝ်တင်းၵႂၢမ်းမူႉသႃႇ တင်းၵႂၢမ်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ႁႂ်ႈၵူၼ်းၵဝ်တင်းလၢႆၽိတ်းပိူင်ႈၸိူဝ်းၼၼ်ႉဢေႃႈ။ၵဝ်ဢမ်ႇပွႆႇၸႂ်ၶဝ်၊ၵဝ်ဢမ်ႇသင်ႇလၢတ်ႈဝႆႉတီႈၶဝ်လႄႈ ၶဝ်တၵ်းဢမ်ႇပဵၼ်ဢၵျူဝ်းတီႈၵူၼ်းမဵဝ်းၼႆႉ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
ပရေႃးၽိတ်ႉဢၼ်ပွမ်
၃၃ ပဵၼ်မဵဝ်းၵူၼ်းၼႆႉသေဢမ်ႇဝႃႈ၊ ပဵၼ်ပရေႃးၽိတ်ႈသေဢမ်ႇဝႃႈ၊ ပဵၼ်ယိတ်ႉပရေႃးႁိၵ်ႈသေဢမ်ႇဝႃႈ၊ပေႃးသေၵေႃႉသေၵူၼ်းထၢမ်တီႈမႂ်းလႄႈဝႃႈ၊-ပျႃႇတိၵ်ႈထႃႇဝရႃႉၽြႃးပဵၼ်ၸိူဝ်ႉၼင်ႇႁိုဝ်ဝႃႈၼင်ႇၼႆၸိုင် မႂ်းတၵ်းလႆႈၶိုၼ်းလၢတ်ႈလႄႈဝႃႈ၊-ပျႃႇတိၵ်ႈၸဝ်ႈဢၼ် လႂ်။ ထႃႇဝရႃႉၽြႃးမီးဢမိင်ႉလႄႈဝႃႈ၊-ၵဝ်ၸၵ်းၸုၼ်ႉပႅတ်ႈ သူဢေႃႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
၃၄ ပရေႃးၽိတ်ႈ၊ယိတ်ႉပရေႃးႁိၵ်ႈ၊ ၵူၼ်းဝၢၼ်ႈၵူၼ်းမိူင်းဢၼ်လၢတ်ႈလႄႈဝႃႈ၊- ပျႃႇတိၵ်ႈထႃႇဝရႃႉၽြႃးမီးယဝ်ႉဝႃႈၼင်ႇၼႆၼၼ်ႉၸမ်း၊-ၵဝ်တၵ်းပၼ်တၢမ်ႇတီႈမၼ်းဢိၵ်ႇတင်း တီႈၵူၼ်းႁိူၼ်းၵူၼ်းယေးမၼ်းၼၼ်ႉဢေႃႈ။
၃၅ သူၵူႈၵေႃႉၵူႈၵူၼ်း တီႈၵူၼ်းႁိူၼ်းၸမ်ၵၼ် ၵူႈၵေႃႉၵူႈၵူၼ်းတီႈပီႈၼွင်ႉၵၼ်ၵေႃႉၼိုင်ႈလႄႈ ၵေႃႉၼိုင်ႈၼင်ႇၵၼ်ၵၼ်တၵ်းလႆႈတွင်ႉထၢမ်တီႈၵဝ်လႄႈဝႃႈ၊- ထႃႇဝရႃႉၽြႃးၶိုၼ်းလၢတ်ႈၸိူဝ်ႉၼင်ႇႁိုဝ်ယဝ်ႉ။ ထႃႇဝရႃႉၽြႃး မီးဢမိင်ႉၸိူဝ်ႉၼင်ႇႁိုဝ်ယဝ်ႉဝႃႈၼင်ႇၼႆဢေႃႈ။
၃၆ ၵမ်းလိုၼ်း ဢမ်ႇလႆႈလၢတ်ႈဝႃႈပျႃႇတိၵ်ႈထႃႇဝရႃႉၽြႃးမီးယဝ်ႉဝႃႈၼင်ႇၼႆၼၼ်ႉ။ ၵႂၢမ်းၵူႈၵေႃႉၵူႈၵူၼ်းၼၼ်ႉပဵၼ်ပျႃႇတိၵ်ႈတူဝ်မၼ်းၵူၺ်းဢေႃႈ။လွင်ႈမၼ်းၸမ်း သူဢွၼ်ၵၼ်ယႃႉၵႂၢမ်းၽြႃးဢၼ်ဢသၢၵ်ႈလိပ်းယူႇဢၼ်ဝႃႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၼၼ်ႉပႅတ်ႈယဝ်ႉ။
၃၇ မႂ်းတၵ်းလႆႈတွင်ႉထၢမ်တီႈပရေႃးၽိတ်ႈလႄႈဝႃႈ၊-ထႃႇဝရႃႉၽြႃးၶိုၼ်းလၢတ်ႈၸိူဝ်ႉၼင်ႇႁိုဝ်တီႈမႂ်းယဝ်ႉ။ ထႃႇဝရႃႉၽြႃးမီး ဢမိင်ႉၸိူဝ်ႉၼင်ႇႁိုဝ်ယဝ်ႉ၊ဝႃႈ ၼင်ႇၼႆဢေႃႈ။
၃၈ ပေႃးသူဢွၼ်ၵၼ်လၢတ်ႈလႄႈဝႃႈ၊-ပျႃႇတိၵ်ႈထႃႇဝရႃႉၽြႃးမီးယဝ်ႉ။ထႃႇဝရႃႉၽြႃးမီးဢမိင်ႉယဝ်ႉ၊ဝႃႈၼင်ႇၼႆၸိုင်ထႃႇဝရႃႉၽြႃးမီးဢမိင်ႉၸမ်း၊-ပိၵ်ႉသမ်ႉၵဝ်ပိင်းၺၢပ်ႈဝႆႉႁႂ်ႈသူဢမ်ႇလႆႈလၢတ်ႈဝႃႈ ပျႃႇတိၵ်ႈထႃႇဝရႃႉၽြႃးမီး ယဝ်ႉဝႃႈၼင်ႇၼႆသေၵေႃႈ
၃၉ ၵွပ်ႈပိူဝ်ႈဢၼ်သူဢွၼ်ၵၼ်သုင်းတိုဝ်းၵႂၢမ်းဢၼ်လၢတ်ႈဝႃႈ ပျႃႇတိၵ်ႈထႃႇဝရႃႉၽြႃးမီးယဝ်ႉဝႃႈၼင်ႇၼႆၼၼ်ႉလႄႈ ၵဝ်တၵ်းၵွပ်ႇဢဝ်သူဢိၵ်ႇတင်း ဝဵင်းဢၼ်ၵဝ်ပၼ်တီႈသူဢိၵ်ႇတင်းပူႇသူမွၼ်ႇသူၼၼ်ႉလႄႈ ဢဝ်သူထႅမ်ႈပဵတ်ႈသေၵႃႈတီႈၵဝ် သဵင်ႈသဵင်ႈမူတ်းမူတ်းဢေႃႈ။
၄၀ ၵဝ်တၵ်းႁႂ်ႈတၢင်းဢၼ်သေႉသွမ်းထႃႇဝရႃႉဢိၵ်ႇတင်း တၢင်းဢၼ်ဢူၵ်းဢၼ်ဢၢႆ ဢၼ်သိုၵ်ႇတၢမ်းယူႇတႃႇသေႇ ဢမ်ႇလူင်လႆႈလိုမ်းလႆႈၼၼ်ႉတူၵ်းႁွတ်ႈၵႃႈၼိူဝ်သူဢေႃႈ။