၁၆
ဝၼ်းတုၵ်ႉၶႃႉတၢင်းၽၢၼ်
၁ လၢႆးသမ်ႉ ၼုၵ်ႈၵပၢတ်ႈထႃႇဝရႃႉၽြႃးဢၼ်ႁွတ်ႈမႃးတီႈၵဝ်ၸမ်း၊-
၂ မႂ်းဢမ်ႇလႆႈႁဵတ်းတၢင်းဢၼ်ပဵၼ်ၵူပ်းပဵၼ်ၵူႈ။ဢမ်ႇလႆႈမီးလုၵ်ႈမီးလၢင်းၵႃႈတီႈၼႆႉ။
၃ ထႃႇ ဝရႃႉၽြႃး ဢဝ်လွင်ႈလုၵ်ႈၸၢႆးလုၵ်ႈယိင်းဢၼ်ၵိူတ်ႇလဵင်ႉမႃးၵႃႈတီႈၼႆႉၸိူဝ်းၼၼ်ႉဢိၵ်ႇတင်းမေႈၶဝ် ဢၼ်ၵိူတ်ႇလဵင်ႉၶဝ်မႃး တင်းပေႃႈၶဝ်ဢၼ်ႁႂ်ႈၶဝ်ပဵၼ်မႃး ၵႃႈၼႂ်းမိူင်းၼႆႉၸိူဝ်းၼၼ်ႉလႄႈမီးဢမိင်ႉၸမ်း၊- ၶဝ်ၼၼ်ႉ တၵ်းလႆႈဢွၼ်ၵၼ်တၢႆလူၺ်ႈတၢင်းတၢႆဢၼ်ႁၢႆႉၼႃႇဢေႃႈ။
၄ ၶဝ်ဢမ်ႇလႆႈၶၢမ်ႇတၢင်းဢၼ်ၶၢင်းၶီၶၢင်းၽၢၼ်သေလႄႈသၢင်းၵျူဝ်ႇ။ၶဝ်တၵ်းဢွၼ်ၵၼ်ပဵၼ်ၸိူဝ်ႉၼင်ႇဢၼ် ဝူၺ်ႇဢၼ်ႁင်ႈၵႃႈၼိူဝ်လိၼ်မိူင်းၼၼ်ႉဢေႃႈ။ၶဝ်တၵ်းႁွတ်ႈထိုင်တၢင်းဢၼ်သုမ်းၸွမ်းလူၺ်ႈၽေးလၢပ်ႇၽေးလႅဝ်း ဢိၵ်ႇတင်းၽေးတၢင်းဢၼ်ဢိုပ်းယၢၵ်ႈလႄႈ တူဝ်တၢႆၶဝ်ၼၼ်ႉတၵ်းပဵၼ်ပုၼ်ႈဢၼ်ၼူၵ်ႉၵၢင်ႁၢဝ်ဢိၵ်ႇတင်း တူဝ်ထိူၼ်ႇႁၢႆႉတၵ်း ၵိၼ်ဢေႃႈ။
၅ ထႃႇဝရႃႉၽြႃးမီးဢမိင်ႉၸမ်း၊- ယႃႇပေၶဝ်ႈၵႃႈၼႂ်းႁိူၼ်းမႃႇသႃႇ။ယႃႇပေၵႂႃႇႁႂ်ႈလႆႈႁဵတ်းတၢင်းဢၼ်ႁႆႈႁွင်ႉ တၢင်းဢၼ်ၶၢင်းၶီၶၢင်းၽၢၼ်ပုၼ်ႈၶဝ်ၼၼ်ႉ။ၵဝ်ၼုၵ်ႈသိမ်းဢဝ်တၢင်းဢၼ်ၼိမ်ဢၼ်လီၵဝ်ဢၼ်ဝႃႈမႅတ်ႈတႃႇၵရူႉၼႃႇၵဝ်ၼၼ်ႉသေ ၵႃႈတီႈၵူၼ်းမဵဝ်းၼႆႉယဝ်ႉ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၆ ၵူၼ်းသုင်ၵူၼ်းတႅမ်ႇတၵ်းလႆႈတၢႆၵႃႈၼႂ်းမိူင်းၼႆႉဢေႃႈ။ၵူၺ်းၵႃႈၶဝ်ဢမ်ႇလႆႈၶၢမ်ႇတၢင်းဢၼ်သၢင်းၵျူဝ်ႇ။ၽူႈ လႂ်ဢမ်ႇလႆႈႁဵတ်းတၢင်းဢၼ်ႁႆႈဢၼ်ႁွင်ႉတၢင်းဢၼ်ၶၢင်းၶီၶၢင်းၽၢၼ်ပုၼ်ႈၶဝ်။ဢမ်ႇလႆႈႁဵတ်းတၢင်းဢၼ်တိူဝ်ႉဢၼ်မတ်ႉ တီႈတူဝ်ၸဝ်ႈၵဝ်ႇဢိၵ်ႇ တင်းတၢင်းဢၼ်ထႃႁူဝ်။
၇ ဢမ်ႇလႆႈပၼ်ၶဝ်ႈမုၼ်းတီႈၶဝ်ၸိူဝ်းဢၼ်ႁူဝ်ၸႂ်ဢမ်ႇသႃႇၶၢင်းၶီၶၢင်းၽၢၼ်ၼၼ်ႉႁႂ်ႈၶဝ်လႆႈပျေႇၸႂ်ၼိမ်ၸႂ်ပုၼ်ႈၶဝ်ၸိူဝ်းဢၼ်တၢႆယဝ်ႉၼၼ်ႉ။ဢမ်ႇလႆႈဢဝ်ၵွၵ်းတၢင်းဢၼ်ႁႂ်ႈပျေႇၸႂ်ၼိမ်ၸႂ်ၼၼ်ႉပၼ်တီႈၶဝ်ပုၼ်ႈပေႃႈမႄးၶဝ် ဢၼ်တၢႆ ယဝ်ႉၼၼ်ႉ။
၈ မိူၼ်ၸိူဝ်ႉၼင်ႇၼၼ်ယႃႇပေၶဝ်ႈၵႃႈၼႂ်းႁိူၼ်းဢၼ်ၶၢမ်ႇပွႆးၵိၼ်ပွႆးၶုပ်းၼၼ်ႉ ႁႂ်ႈလႆႈၼင်ႈလူၺ်ႈ ၵၼ်တင်းၶဝ်သေလႄႈၵိၼ်ၶူပ်း။
၉ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉၸမ်း၊-ၵဝ်တၵ်းႁႂ်ႈသဵင်ဢၼ်ၸူမ်းပျေႃႇ၊ သဵင်ၵူၼ်းယိင်းဢၼ်သွင်ႇမင်ႇၵလႃႇ သဵင်ဢၼ်သႂၢင်ႇသိူဝ်းသဵၼ်ၵူၼ်းၸၢႆးဢၼ်သွင်ႇမင်ႇၵလႃႇ၊ သဵင်ၵူၼ်းယိင်းဢၼ်သွင်ႇမင်ႇၵလႃႇထၢတ်ႇယဵၼ်သေ ၵႃႈတီႈသိုဝ်ႈ ၼႃႈတႂ်ႈတႃသူၼႂ်းၸူဝ်ႈပၢၼ်သူၼႆႉဢေႃႈ။
၁၀ မိူဝ်ႈဢၼ်မႂ်း ဢဝ်ၵႂၢမ်းၵႃႈမီးၼႆႉမွၵ်ႇလၢတ်ႈတီႈၵူၼ်းမဵဝ်းၼႆႉလႄႈၶဝ်ထၢမ်တီႈမႂ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈထႃႇဝရႃႉၽြႃးၸီႇယၢင်ႇၽေးတၢမ်ႇ ဢၼ်ယႂ်ႇၼႃႇထၢၼ်ႇၼႆႉတီႈႁဝ်း။တုၸရိူၵ်ႈႁဝ်းၸမ်းပဵၼ်ၸိူဝ်ႉၼင်ႇႁိုဝ်။ဢပျႅတ်ႈဢၼ်ႁဝ်းၽိတ်းပိူင်ႈထႃႇဝရႃႉၽြႃးၽြႃးပဵၼ်ၸဝ်ႈႁဝ်းၼၼ်ႉၸမ်း၊ ပဵၼ်ၸိူဝ်ႉၼင်ႇႁိုဝ်ဝႃႈၼင်ႇၼႆၼၼ်ႉၸိုင်၊ မႂ်းတၵ်းလႆႈဢဝ်ဢမိင်ႉထႃႇဝရႃႉၽြႃး သင်ႇလၢတ်ႈဝႆႉတီႈၶဝ်လႄႈဝႃႈၸမ်း၊-
၁၁ ၵွပ်ႈပိူဝ်ႈဢၼ်ပူႇသူမွၼ်ႇသူ ဢွၼ်ၵၼ်ၸုၼ်ႉပႅတ်ႈၵဝ်၊ဢွၼ်ၵၼ်ႁဵတ်း ဝၢတ်ႈၵူဝ်းၵႂၢႆႇၶဝ်၊
၁၂ ဢွၼ်ၵၼ်ၸုၼ်ႉပႅတ်ႈၵဝ်သေလႄႈဢမ်ႇပႂ်ႉၵမ်ပႂ်ႉၸွမ်းတြႃးၵဝ်၊ ဢိၵ်ႇတင်းၵွပ်ႈပိူဝ်ႈဢၼ်သူၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ႁၢႆႉယုတ်ႈလိူဝ်တွၼ်းၼႃႇသေတၢင်းၵမ်တၢင်းၵျၢင်ႉဢၼ်ပူႇသူမွၼ်ႇသူၵမ်ၵျၢင်ႉၸိူဝ်းၼၼ်ႉသေလႄႈ ၸွမ်းလူၺ်ႈတၢင်းဢၼ်ႁူဝ် ၸႂ်သူပဵၼ်ဢၼ်ႁၢႆႉမိူၵ်ႈလႄႈ ၵႅၼ်ႇၶႅင်ႁင်းၽႂ်ႁင်းမၼ်းထၼ်ႈပေႃး ဢမ်ႇထွမ်ႇဢမ်ႇဢဝ်ၵႂၢမ်းၵဝ်ၼၼ်ႉလႄႈၵဝ်တၵ်းႁေႃႈသူဢွၵ်ႇသေ ၵႃႈၼႂ်းမိူင်းၼႆႉၵႂႃႇၵႃႈတီႈမိူင်းဢၼ်သူဢိၵ်ႇတင်းပူႇသူမွၼ်ႇသူဢမ်ႇႁူႉၼၼ်ႉ ဢေႃႈ။
၁၃ ၵႃႈတီႈမိူင်းၼၼ်ႉသူတၵ်းလႆႈဢွၼ်ၵၼ်ႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးယူႇၵူႈဝၼ်းၵူႈၶိုၼ်းဢမ်ႇထၢတ်ႇဢေႃႈ။ၵဝ်တၵ်းဢမ်ႇၼႄပျႃးၵျေးၸူးတီႈသူ။
၁၄ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊- ၶိင်ႇမိူဝ်ႉဝၼ်းဢၼ်တၵ်းဢမ်ႇလႆႈတိူင်ႇဝႃႈလႄႈဝႃႈ၊- ၵႃႈၼင်ႇဢၼ်ထႃႇဝရႃႉၽြႃး ဢၼ်ၼုၵ်ႈဢဝ်ၵူၼ်းမဵဝ်းဢိသရေႇလ တင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉ ဢသၢၵ်ႈလိပ်းယူႇၼၼ်ႉဝႃႈၼင်ႇၼႆလႄႈ တၵ်းလႆႈတိူင်ႇဝႃႈလႄႈဝႃႈ၊-
၁၅ ၵႃႈၼင်ႇဢၼ်ထႃႇဝရႃႉၽြႃးဢၼ်ၼုၵ်ႈဢဝ်ၵူၼ်းမဵဝ်းဢိသရေႇလ တင်းလၢႆဢွၵ်ႇသေၵႃႈၼႂ်းၸႃႉၸႅမ်မိူင်းတၢင်းႁွင်ႇလႄႈ မိူင်းၵႃႈဢၼ်မၼ်းၸဝ်ႈႁေႃႈၶဝ်ဢွၵ်ႇၵႂႃႇၸူးၼၼ်ႉ ဢသၢၵ်ႈလိပ်းယူႇၼၼ်ႉ၊ဝႃႈၼင်ႇၼႆၼၼ်ႉတၵ်းႁွတ်ႈထိုင်ဢေႃႈ။ၵဝ်တၵ်းသမ်ႉဢဝ်ၶဝ်ၶိုၼ်းမႃးၵႃႈတီႈမိူင်းဢၼ်ၵဝ်ပၼ်တီႈပူႇၶဝ်မွၼ်ႇၶဝ်ၼၼ်ႉလူးၵွၼ်ႇဢေႃႈ။
၁၆ ထႃႇဝရႃႉၽြႃးမီးဢမိင်ႉၸမ်းၵဝ်တၵ်းပွႆႇၸႂ်ႉတမ်ႇငႃႈၼမ်ၼႃႇၵႂႃႇလႄႈ ၶဝ်တၵ်းဢွၼ်ၵၼ်မဵတ်းဢဝ်ၶဝ်ၼၼ်ႉဢေႃႈ။လိုၼ်းၼၼ်ႉၵဝ်တၵ်းပွႆႇၸႂ်ႉမူးသိူဝ်းၼမ်ၼႃႇၵႂႃႇလႄႈ ၶဝ်တၵ်းဢွၼ်ၵၼ်သွၵ်ႈဢဝ်ႁႃဢဝ်ၶဝ်ၵႃႈတီႈလွႆလူင်လွႆဢွၼ်ႇ ငိူပ်ႇႁိၼ်ငိူပ်ႇၽႃတင်းလၢႆ ဢေႃႈ။
၁၇ တႃၵဝ်လူတူၺ်းသဵၼ်ႈတၢင်းၵႃႈဢၼ်ၶဝ်ၵႂႃႇၼၼ်ႉယူႇဢေႃႈ။ ၶဝ်ဢမ်ႇမီးတၢင်းဢၼ်လပ်ႉဢၼ်တဵတ်ႇသေ ၵႃႈတီႈၼႃႈၵဝ်လႄႈတုၸရိူၵ်ႈၶဝ်ဢမ်ႇမီးတၢင်းဢၼ်သိူင်ႇဢၼ်မႅပ်းဝႆႉသေ ၵႃႈတီႈတႃၵဝ်လႆႈ။
၁၈ ဢွၼ်တၢင်း ၵဝ်တၵ်းပၼ်တၢမ်ႇဢပျႅတ်ႈသွင်ပုၼ်ႈတီႈၶဝ်ၵွပ်ႈပိူဝ်ႈဢၼ်ၶဝ် ႁႂ်ႈမိူင်းၵဝ်ၵူဝ်ႈၵိူၵ်ႇလူၺ်ႈတူဝ်တၢႆၶိူင်ႈပိူင် ဢၼ်လီႁင်ႈဢဵတ်ႇသဵတ်ႇၶဝ်ၸိူဝ်းၼၼ်ႉလႄႈႁႂ်ႈလိၼ်ဢၼ်ၵဝ်ၶၢမ်ႇဢမူၺ်ႇၼၼ်ႉ တဵမ်ဝႆႉတင်းၶိူင်ႈပိူင်ႈဢၼ်ဝူၺ်ႇဢၼ်ႁင်ႈၶဝ်ၸိူဝ်းၼၼ်ႉဢေႃႈ။
၁၉ ထႃႇဝရႃႉၽြႃးဢၼ်ပဵၼ်ႁႅင်းတၼ်းၶူဝ်းၵဝ်ၶႃႈ၊ တိူၵ်ႈတီႈတိုၵ်းသိုၵ်းၵဝ်ၶႃႈ၊ တီႈဢၼ်ၵဝ်ၶႃႈသွၼ်ႈပိုင်ႈၼႂ်းမိူဝ်ႉဝၼ်းဢၼ်ၽေးႁွတ်ႈထိုင်ၼၼ်ႉတီႈၶႃႈ။ၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ တၵ်းဢွၼ်ၵၼ်လုၵ်ႉသေ ၵႃႈတီႈႁိမ်းလႅၼ်သုတ်းလိၼ်မိူင်းၸိူဝ်းၼၼ်ႉမႃးၸူးတီႈၸဝ်ႈႁဝ်းလႄႈလဝ်ႈလၢတ်ႈလႄႈဝႃႈ၊-ပူႇမွၼ်ႇၶႃႈၸဝ်ႈႁဝ်းၶဝ်ၼၼ်ႉ ဢွၼ်ၵၼ်ၶၢမ်ႇဢမူၺ်ႇမူႉသႃႇ၊ဢၼတ်ႈတႃႉ၊လွင်ႈတၢင်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉ ဢမၢၼ်ႇၶၢၼ်ပဵၼ်တီႈၶႃႈယဝ်ႉ၊ ဝႃႈၼင်ႇၼႆတီႈၶႃႈဢေႃႈ။
၂၀ ၵူၼ်းတၵ်းလႆႈႁဵတ်းၽြႃးဢၼ်ဢမ်ႇၸႂ်ႈၽြႃးၼၼ်ႉပုၼ်ႈတူဝ်ၸဝ်ႈၵဝ်ႇႁိုဝ်။ ပိူဝ်ႈ ၼႆလႄႈတူၺ်းလူ။
၂၁ ၵဝ်တၵ်းႁႂ်ႈၶဝ်ႁူႉပွၵ်ႈၼိုင်ႈ၊ မိူဝ်ႈလဵဝ်ၼႆႉၵဝ်တၵ်းႁႂ်ႈၶဝ်ႁူႉမိုဝ်းၵဝ် ဢိၵ်ႇတင်းတၼ်းၶူဝ်းၵဝ်လႄႈ ၶဝ်တၵ်းလႆႈဢွၼ်ၵၼ်ႁူႉလွင်ႈဢၼ်ၼႃႇမႃႉၸိုဝ်သဵင်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ။