၃
၁ ၶဝ်လၢတ်ႈလႄႈဝႃႈ၊- ပေႃးၽူႈၸၢႆးပႅတ်ႈမေးမၼ်းလႄႈ မေးမၼ်းၼၼ်ႉဢွၵ်ႇၵႂႃႇသေၵႃႈတီႈမၼ်းလႄႈပဵၼ်မေးၵူၼ်းတၢင်ႇၵေႃႉယဝ်ႉၸိုင် မၼ်းထုၵ်ႇလီၶိုၼ်းဢဝ်မၼ်းၼၼ်ႉႁိုဝ်၊ ဝႃႈၼင်ႇၼႆဢေႃႈ။ ပေႃးၼၼ်တၵ်းပဵၼ်ဢၼ်ၵူဝ်ႈၵိူၵ်ႇဢမ်ႇၸႂ်ႈႁိုဝ်။ၵူၺ်းၵႃႈမႂ်းၼႆႉယူႇမိူၼ်ၼင်ႇမေႈမွၵ်ႇယႃႈလႄႈ ၽိတ်းပိူင်ႈယဝ်ႉသေၵေႃႈၶိုၼ်းမႃးၸူးတီႈၵဝ်တႃႉ၊ ဝႃႈၼင်ႇၼႆထႃႇဝရႃႉၽြႃး မီးဢမိင်ႉဢေႃႈ။
၂ ဢဝ်တႃမႂ်းႁႅၼ်တူၺ်းၵႃႈတီႈဢၼ်သုင်တင်းလၢႆလႄႈႁႃ ဢဝ်တီႈဢၼ်မႂ်းဢမ်ႇယၢမ်ႈတွၼ်ႉၼွၼ်းလူၺ်ႈၵၼ်တင်း ၽူဝ်ဢွၼ်ႇၼၼ်ႉသေတီႈတီႈတႃႉ။မႂ်းၼင်ႈယူႇၵႃႈတီႈသဵၼ်ႈတၢင်းတင်းလၢႆမိူၼ်ၸိူဝ်ႉၼင်ႇၵူၼ်း ဢႃႇရေႇပျႃႇ ၵႃႈၼႂ်းထိူၼ်ႇၼႂ်းၶိူဝ်းၼၼ်ႉသေလႄႈဢဝ်တင်းမေႇထုင်ႇဢၼ်ဢမ်ႇတြႃးမႂ်းဢိၵ်ႇတင်း လွင်ႈတၢင်းဢၼ်ႁၢႆႉဢၼ်ယုတ်ႈ မႂ်းႁႂ်ႈမိူင်းၵူဝ်ႈၵိူၵ်ႇယဝ်ႉ။
၃ ပိူဝ်ႈၼႆလႄႈပိၵ်ႉသမ်ႉဝႃႈၽႃႉလႅင်ႊလႄႈ ၽူၼ်ဢမ်ႇတူၵ်းတေႃႇထိုင်ႁွတ်ႈၽူၼ်ႁၢင်ပီႊသေၵေႃႈ မႂ်းယင်းမီးၼႃႈၽၢၵ်ႇမေႈမွၵ်ႇယႃႈယူႇလႄႈ ပႄႇသၽေႃးဢၼ်ဢူၵ်းဢၼ်ဢၢႆၼၼ်ႉပႅတ်ႈယဝ်ႉ။
၄ ၸႃႉၸဵမ်မိူဝ်ႈလဵဝ်ၼႆႉလႄႈ မႂ်းတၵ်းႁွင်ႉသႅၼ်ႇတီႈၵဝ်လႄႈဝႃႈ၊-ပေႃႈၵဝ်ၶႃႈဢိူၺ်းၸဝ်ႈႁဝ်းပဵၼ်ၸဝ်ႈဢၼ်ပႂ်ႉၶႃႈၸဝ်ႈယူႇ ၸဵမ်မိူဝ်ႈဢသၢၵ်ႈၶႃႈၸဝ်ႈ ယင်းလဵၵ်ႉ ယင်းဢွၼ်ႇၼၼ်ႉတီႈၶႃႈယဝ်ႉ၊ဝႃႈၼင်ႇၼႆႁိုဝ်။
၅ မၼ်းၸဝ်ႈၼၼ်ႉတၵ်းၸႂ်မႆႈၶႆႈၸႃႉယူႇတႃႇသေႇႁိုဝ်။မၼ်းၸဝ်ႈ တၵ်းမၢတ်ႈတွင်းမၼ်းဝႆႉတေႃႇထိုင်ႁွတ်ႈ တီႈသုတ်းတီႈၵွႆႁိုဝ်။တူၺ်းလူ။မႂ်းလၢတ်ႈသေလႄႈႁဵတ်းလွင်ႈတၢင်းဢၼ်ႁၢႆႉဢၼ်ယုတ်ႈတင်းလၢႆ ၸွမ်းၵႃႈၼင်ႇဢၼ်မႂ်းတတ်ႈၼိုင်ႇလႆႈၼၼ်ႉယဝ်ႉလူင်ပေႇ။
ဢိသရေလဢမ်ႇမီးသႅတ်ႉၸႃႇ
၆ လၢႆးသမ်ႉ ၼႂ်းၸူဝ်ႈပၢၼ်ၶုၼ်လူင်ယုဝ်ႇသိယ ၼၼ်ႉထႃႇဝရႃႉၽြႃးမီးဢမိင်ႉတီႈၵဝ်ၸမ်း၊- မႂ်းႁၼ်လွင်ႈတၢင်းဢၼ်မဵဝ်းဢိသရေႇလ ဢၼ်ၽွၵ်ႈပျၢၼ်ႇၶိုၼ်းၵႂႃႇၼၼ်ႉႁဵတ်းၼၼ်ႉယဝ်ႉႁိုဝ်။ မၼ်းၶိုၼ်ႈၵႃႈၼိူဝ်လွႆဢၼ်သုင်ၵႃႈမီးလႄႈ ၶဝ်ႈၵႃႈတႂ်ႈတူၼ်ႈမႆႉဢၼ်လိပ်းဢၼ်ၶဵဝ်ၵႃႈမီးၼၼ်ႉသေလႄႈႁဵတ်းမေႈမွၵ်ႇယႃႈ ယဝ်ႉ။
၇ မၼ်းၼၼ်ႉႁဵတ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼၼ်ႉသေယဝ်ႉၵဝ်လၢတ်ႈလႄႈဝႃႈ၊-ၶိုၼ်းမႃးတီႈၵဝ်သေၵမ်း၊ ဝႃႈၼင်ႇၼႆသေၵေႃႈမၼ်းဢမ်ႇၶိုၼ်းမႃး။လွင်ႈတၢင်းၼၼ်ႉၸိုင်ၼွင်ႉယိင်းမၼ်း ယုတ ဢၼ် သႅတ်ႉၸႃႇလူႉၼၼ်ႉႁၼ်ယူႇဢေႃႈ။
၈ ၵဝ်လႆႈႁၼ်လွင်ႈဢၼ်ပိၵ်ႉသမ်ႉၵွပ်ႈပိူဝ်ႈလွင်ႈတၢင်းၼႆႉလႄႈ မဵဝ်းဢိသရေႇလ ဢၼ်ၽွၵ်ႈပျၢၼ်ႇၶိုၼ်းၼၼ်ႉၽိတ်းပိူင်ႈသေယဝ်ႉၵဝ်ပႅတ်ႈၵၼ်တင်းမၼ်းလႄႈ ဢၢပ်ႈပၼ်လိၵ်ႈဢၼ်ပုတ်းဢၼ်ၶၢတ်ႇယဝ်ႉသေၵေႃႈ ၼွင်ႉယိင်းမၼ်းယုတ ဢၼ်သႅတ်ႈၸႃႇလူႉၼၼ်ႉယင်းဢမ်ႇၵူဝ်ဢမ်ႇ ႁႄလႄႈၵႂႃႇႁဵတ်းမေႈမွၵ်ႇယႃႈယူႇဢေႃႈ။
၉ ၵွပ်ႈပိူဝ်ႈတၢင်းဢၼ်မၼ်းႁဵတ်းမေႇထုင်ႇဢၼ်ဢမ်ႇတြႃးၼၼ်ႉၶုၼ်ႇသဝ်ႈလမ်ဝဝ်းလႄႈ မိူင်းၼႆႉလႆႈမီးတၢင်းဢၼ်ၵူဝ်ႈၵိူၵ်ႇလႄႈ မၼ်းၽိတ်းပိူင်ႈလူၺ်ႈမၢၵ်ႇႁိၼ်ၵွၼ်ႈႁိၼ်တင်းလၢႆဢိၵ်ႇတင်း တုမ်မႆႉပွတ်းမႆႉတင်းလၢႆ ဢေႃႈ။
၁၀ ပိၵ်ႉသမ်ႉမီးဢပျႅတ်ႈထၢၼ်ႇၼၼ်ႉသေၵေႃႈၼွင်ႉယိင်းမၼ်းယုတ ဢၼ်သႅတ်ႉၸႃႇလူႉၼၼ်ႉဢမ်ႇပႃးဢဝ်တင်းႁူဝ်ၸႂ်သဵင်ႈသဵင်ႈ ၶိုၼ်းမႃးၸူးၵႃႈတီႈၵဝ်။ႁဵတ်းၼင်ႇႁၢင်ႊၶိုၼ်းမႃးၵူၺ်း ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၁ လၢႆးသမ်ႉထႃႇဝရႃႉၽြႃးမီးဢမိင်ႉတီႈၵဝ်ၸမ်း၊-ဢိသရေႇလဢၼ်ၽွၵ်ႈပျၢၼ်ႇၶိုၼ်းၼၼ်ႉ ႁႂ်ႈတူဝ်ၸဝ်ႈၵဝ်ႇပဵၼ်ဢၼ်သိုဝ်ႈတေႃႇၼႃႇသယေုတ ဢၼ်သႅတ်ႉၸႃႇ လူႉၼၼ်ႉဢေႃႈ။
၁၂ ၵႂၢမ်းဢၼ်မႂ်းတၵ်းလႆႈၵွႃႇလႄႈႁွင်ႉပၢဝ်ႇႁွင်ႉသေႃႇ ၵႃႈတီႈၽၢႆႇၼႃႈတၢင်းႁွင်ႇၸမ်း၊-ဢိသရေႇလဢၼ်ၽွၵ်ႈပျၢၼ်ႇၶိုၼ်းၼၼ်ႉဢိူၺ်း၊ၶိုၼ်းမႃးသေၵမ်း။ၵဝ်တၵ်းဢမ်ႇႁဵတ်းတၢင်းဢၼ်တိုတ်ႉၼႃႈၸႃႉၼႃႈၸဵတ်ႉတေႃႇမႂ်း။ၵဝ်မီးၸႂ်ႈၵရူႉၼႃႇလႄႈၶႆႈၸႃႉၶႆႈၸဵတ်ႉယူႇတႃႇသေႇဢမ်ႇၸႂ်ႈ၊ ဝႃႈၼင်ႇ ၼႆထႃႇဝရႃႉၽြႃးမီးဢမိင်ႉဢေႃႈ။
၁၃ ယိုၼ်လႄႈတွင်းပၢၼ်ႇလွင်ႈတၢင်းဢၼ်ႁၢႆႉဢၼ်ယုတ်ႈ ဢၼ်ပဵၼ်ဢပျႅတ်ႈ ဢၼ်မႂ်းလုၵ်ႉၽိုၼ်ႉတေႃႇထႃႇဝရႃႉၽြႃးၽြႃးပဵၼ်ၸဝ်ႈမႂ်းၼၼ်ႉလႄႈၽိတ်းပိူင်ႈႁူမ်ႈလူၺ်ႈၵၼ်တင်းၶႅၵ်ႇတင်းလၢႆ ဢၼ်မႂ်းထူပ်းၵႃႈတီႈတႂ်ႈတူၼ်ႈမႆႉဢၼ်လိပ်းဢၼ်ၶဵဝ်ၵႃႈမီးၼၼ်ႉလႄႈ ဢမ်ႇထွမ်ႇဢမ်ႇဢဝ်ၵႂၢမ်းၵဝ်ၼၼ်ႉတႃႉ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၄ လုၵ်ႈလၢင်းဢၼ်ၽွၵ်ႈပျၢၼ်ႇၶိုၼ်းၶဝ်ဢိူၺ်း။ဢွၼ်ၵၼ်ၶိုၼ်းမႃးတႃႉ၊ဝႃႈၼင်ႇၼႆထႃႇဝရႃႉၽြႃး မီးဢမိင်ႉဢေႃႈ။ၵဝ်ပဵၼ်ၸဝ်ႈပဵၼ်ၽူဝ်သူလႄႈတၵ်းလိူၵ်ႈၵဵပ်းဢဝ်ၵႃႈၼႂ်းသူယေႈဝဵင်းယေႈၵေႃႉ၊ ၵႃႈၼႂ်းမဵဝ်းၸိူဝ်ႉၶိူဝ်းယေႈမဵဝ်းသွင်ၵေႃႉသေလႄႈ ဢဝ်သူင်ႇၵႃႈတီႈဝဵင်း ၸိ ဢုၼ်ႇ ဢေႃႈ။
၁၅ ၵဝ်တၵ်းဢဝ်ၶဝ်ၸိူဝ်းဢၼ်လူဢၼ်ထိင်းဢၼ်ထုၵ်ႇၸႂ်ၵျိူၵ်ႈၸႂ်ၵဝ်ၼၼ်ႉ ၶၢၼ်းဝႆႉၵႃႈၼိူဝ်သူလႄႈ ၶဝ်ၼၼ်ႉတၵ်းတဵမ်ဝႆႉတင်းၺၢၼ်ႇပိင်ႇၺႃႇ ယူႇသေလႄႈဢွၼ်ၵၼ်လဵင်ႉလူသူဢေႃႈ။
၁၆ ၵမ်းလိုၼ်းမိူဝ်ႈဢၼ်သူယႂ်ႇၽႄႈၼမ်ၵိုၼ်းမႃးလႄႈ တူဝ်းတွၼ်းမႃးၵႃတီႈမိူင်းၸဝ်ႈၼၼ်ႉၸိုင် ၶဝ်တၵ်းဢမ်ႇလႆႈႁွင်ႉလႆႈဝႃႈတိူၵ်ႈပတိၺိၼ်ႇထႃႇဝရႃႉၽြႃး၊ ဝႃႈၼင်ႇၼႆယဝ်ႉ။ဢမ်ႇလႆႈၸႂ်ၸပ်းၸႂ်ၸွႆးမၼ်း။ဢမ်ႇလႆႈၶုၵ်းၸႂ်လႆႈၶႆႈၸႂ်ထူပ်းမၼ်း။ ဢမ်ႇလႆႈလူတူၺ်းလုမ်းလႃးမၼ်း။ၵမ်းလိုၼ်းဢမ်ႇလႆႈႁဵတ်းလႃးလႃး၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၇ မိူဝ်ႈၼၼ်ႉၶဝ်တၵ်းႁွင်ႉႁိၵ်ႈဝဵင်းယေႇရုသလႅမ်ႇ လႄႈ ဝႃႈပလၢင်ႇထႃႇဝရႃႉၽြႃး၊ဝႃႈၼင်ႇၼႆလႄႈ ၵူၼ်းၵူႈၸိူဝ်ႉၵူႈမဵဝ်းတၵ်းၸူႉၵၼ်တုမ်ၵၼ်ၵႃႈတီႈမၼ်း ၵႃႈတီႈၼႃႇမႃႉၸိုဝ်သဵင်ထႃႇဝရႃႉၽြႃးၵႃႈၼႂ်းဝဵင်းယေႇရုသလႅမ်ႇဢေႃႈ။ၵမ်းလိုၼ်း ၶဝ်ဢမ်ႇလႆႈဢွၼ်ၵၼ်ၸွမ်းသၽေႃးတၢင်းဢၼ်ႁူဝ်ၸႂ်ၶဝ် ဢၼ်ႁၢႆႉဢၼ်ယုတ်ႈ ၵမ်ၵျၢင်ႉၵႅၼ်ႇ ၵႅၼ်ႇၶႅင်ၶႅင်ၼၼ်ႉ။
၁၈ ၼႂ်းၶိင်ႇၵႃႇလႃႉမိူဝ်ႈဝၼ်းၼၼ်ႉမဵဝ်းယုတ တၵ်းႁူမ်ႈပွင်းလူၺ်ႈၵၼ်တင်းမဵဝ်းဢိသရေႇလသေလႄႈလုၵ်ႉသေၵႃႈတီႈၼႃႈတၢင်းႁွင်ႇမႃး မုၵ်ႉလဵဝ်ၸိူဝ်းလဵဝ်ၵူၺ်းလႄႈ ႁွတ်ႈထိုင်ၵႃႈတီႈမိူင်း ဢၼ်ၵဝ်လႆႈပၼ် ပုၼ်ႈဢၼ်ပူႇသူမွၼ်ႇသူၶၢမ်ႇဢမူၺ်ႇၼၼ်ႉ ဢေႃႈ။
၁၉ ၵူၺ်းၵႃႈၵဝ်ထၢမ်လႄႈဝႃႈ၊-ၵဝ်တၵ်းလႆႈဢဝ်မႂ်းဝႆႉၵႃႈၼႂ်းလုၵ်ႈလၢင်းတင်းလၢႆလႄႈ ဢဝ်မိူင်းဢၼ်သႃႇယႃႇ မိူင်ႈတီႈဢၼ်ၶၢမ်ႇဢမူၺ်ႇဢၼ်မူၼ်ယႂ်ႇပဵၼ်ၸိၵ်းပဵၼ်ၸွမ်မိူင်းတင်းလၢႆၼၼ်ႉ ပၼ်တီႈမႂ်းၸိူဝ်ႉၼင်ႇႁိုဝ်၊ ဝႃႈၼင်ႇၼႆလႄႈသမ်ႉလၢတ်ႈလႄႈဝႃႈ၊-မႂ်းတၵ်းလႆႈႁွင်ႉႁိၵ်ႈၵဝ်ဝႃႈပေႃႈလႄႈ ဢမ်ႇလႆႈဝႄႈပိူင်ႈၵဝ်သေလႄႈၵႂႃႇ၊ဝႃႈၼင်ႇၼႆဢေႃႈ။
၂၀ မဵဝ်းဢိသရေႇလဢိူၺ်း။ၸိူဝ်ႉၼင်ႇမေးဢၼ်ယႃႉသႅတ်ႉၸႃႇၼၼ်ႉယႃႉသႅတ်ႉၸႃႇတီႈၵဝ်ယဝ်ႉ၊ဝႃႈၼင်ႇၼႆ ထႃႇဝရႃႉၽြႃးမီးဢမိင်ႉဢေႃႈ။
၂၁ လႆႈငိၼ်းသဵင်ၵႃႈၼိူဝ်တီႈဢၼ်သုင်တင်းလၢႆဢၼ်ဝႃႈ တၢင်းဢၼ်ၵူၼ်းမဵဝ်းဢိသရေႇလ တင်းလၢႆႁႆႈႁွင်ႉ ဢိၵ်ႇတင်းတၢင်းဢၼ်ၶဝ်တွင်းပၢၼ်ႇၼၼ်ႉယဝ်ႉ။လွင်ႈမၼ်းၸမ်းၶဝ်ဢွၼ်ၵၼ်ၽိတ်းပိူင်ႈတၢင်းလႄႈ လူင်လိုမ်းထႃႇဝရႃႉ ၽြႃးၽြႃးပဵၼ်ၸဝ်ႈၶဝ်ပႅတ်ႈယဝ်ႉ။
၂၂ လုၵ်ႈလၢင်းဢၼ်ၽွၵ်ႈပျၢၼ်ႇၶိုၼ်းၶဝ်ဢိူၺ်း။ဢွၼ်ၵၼ်ၶိုၼ်းမႃးသေၵမ်း။ ၵဝ်တၵ်းႁဵတ်းႁႂ်ႈတၢင်းဢၼ်ၽွၵ်ႈပျၢၼ်ႇၶိုၼ်းၼၼ်ႉသၢၵ်ႈသႃႇၶႅၼ်းမႃးဢေႃႈ။ၶဝ်ၵေႃႈလၢတ်ႈလႄႈဝႃႈ၊- ၶႃႈၸဝ်ႈႁဝ်းၶဝ်မႃးၸူးတီႈၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းပဵၼ်ထႃႇဝရႃႉၽြႃးၽြႃးပဵၼ်ၸဝ်ႈ ႁဝ်းတီႈၶႃႈဢေႃႈ။
၂၃ ၵုင်းတင်းလၢႆဢိၵ်ႇတင်းသၼ်လွႆၼမ်ၼႃႇၸိူဝ်းၼၼ်ႉ ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢမၢၼ်ႇၶၢၼ်ပဵၼ်လႄႈ ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈၼၼ်ႉပဵၼ်လွင်ႈဢၼ်ၵႄႇသႄႇ ၶျွတ်ႈဢဝ်မဵဝ်းဢိသရေႇလဢေႃႈ။
၂၄ လွင်ႈတၢင်းဢၼ်လီဢူၵ်းလီဢၢႆၼၼ်ႉ ၵိၼ်ဢုၵ်ႉၸႃႇၸေးၸိမ်ႇမွၼ်ႇႁဝ်းဢၼ်ဝႃႈၽုင်သူဝ်းၽုင်းဝူဝ်း၊ လုၵ်ႈၸၢႆးလုၵ်ႈယိင်းတင်းလၢႆၸႃႉၸဵမ်မိူဝ်ႈ ဢသၢၵ်ႈႁဝ်းယင်းလဵၵ်ႉယင်း ဢွၼ်ႇၼၼ်ႉသဵင်ႈမူတ်းယဝ်ႉ။
၂၅ ႁႂ်ႈႁဝ်းလႆႈဢွၼ်ၵၼ်ဢူၵ်းဢၢႆယူႇသေလႄႈၼွၼ်းတႃႉ။ႁႂ်ႈတၢင်းဢၼ်သရေႇလူႉၼၼ်ႉႁူမ်ႇသုမ်ႇႁဝ်းတႃႉ။ လွင်ႈမၼ်းၸမ်းႁဝ်းဢိၵ်ႇတင်းပူႇမွၼ်ႇႁဝ်း ဢွၼ်ၵၼ်ၽိတ်းပိူင်ႈထႃႇဝရႃႉၽြႃးၽြႃးပဵၼ်ၸဝ်ႈႁဝ်း ၸႃႉၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉယင်းဢွၼ်ႇၼၼ်ႉ တေႃႇထိုင်ႁွတ်ႈမိူဝ်ႈလဵဝ်ၼႆႉလႄႈဢမ်ႇထွမ်ႇဢမ်ႇဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈႁဝ်း၊ ဝႃႈၼင်ႇၼႆဢေႃႈ။