၄၃
၁ မိူဝ်ႈဢၼ်ယေႇရမိဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈၶဝ်ၵႃႈမီး ဢၼ်ထႃႇဝရႃႉၽြႃးၽြႃးပဵၼ်ၸဝ်ႈၶဝ်ဢဝ်မၼ်းသင်ႇလၢတ်ႈဝႆႉတီႈၶဝ်ဢၼ်ဝႃႈ ၵႂၢမ်းၵႃႈမီးၸိူဝ်းၼၼ်ႉ ၶိုၼ်းမွၵ်ႇလၢတ်ႈတီႈၵူၼ်းတင်းသဵင်ႈတင်းလူင်ၼၼ်ႉၸိုင် ဢႃႇၸရိလုၵ်ႈၸၢႆးႁေႃႇသေႇ၊ယေႃႇႁၼၼ်ႇလုၵ်ႈၸၢႆးၵႃႇရႃႇ ဢိၵ်ႇတင်းၶဝ်ၸိူဝ်းဢၼ်မႃႇၼႃႉပႅၼ်သုင်တင်းသဵင်ႈတင်းလူင်ၼၼ်ႉဢွၼ်ၵၼ်လၢတ်ႈတီႈယေႇရမိလႄႈဝႃႈ မႂ်းၼႆႉတၵ်း လၢတ်ႈၵႂၢမ်းမူႉသႃႇဢေႃႈ။
၂ ထႃႇဝရႃႉၽြႃးၽြႃးပဵၼ်ၸဝ်ႈႁဝ်းဢမ်ႇဢဝ်မႂ်း သင်ႇလၢတ်ႈဝႆႉတီႈႁဝ်းလႄႈဝႃႈသူဢမ်ႇလႆႈၵႂႃႇၵႃႈတီႈမိူင်းဢေႇၵႅပ်ႉတုႁႂ်ႈလႆႈသွၼ်ႈပိုင်ႈယူႇၵႃႈတီႈၼၼ်ႉဝႃႈၼင်ႇၼႆၼၼ်ႉ။
၃ ပႃႇရုၵ်ႉ လုၵ်ႈၸၢႆးၼေႇရိ ၼၼ်ႉ တိုၵ်းယူင်းၸူဝ်းဢဝ်မႂ်းယူႇၽၢႆႇၼိုင်ႈတင်းႁဝ်း ႁႂ်ႈမႂ်းလႆႈဢဝ်ႁဝ်းဢၢပ်ႈပၼ်ၵႃႈၼႂ်းမိုဝ်းၵူၼ်းၶႃႇလတေႇတ င်းလၢႆႁႂ်ႈၶဝ်ဢဝ်ႁဝ်းတၢႆလႄႈသိမ်းဢဝ်ႁဝ်းၵႂႃႇၵႃႈတီႈမိူင်းပႃႇပုလုၼ်ႇ ပုၼ်ႉဢေႃႈ၊ ဝႃႈၼင်ႇၼႆသေယဝ်ႉ၊
၄ ယေႃႇႁၼၼ်ႇလုၵ်ႈၸၢႆးၵႃႇရႃႇဢိၵ်ႇတင်း တပ်ႉမူးၵႃႈမီးတင်းၵူၼ်းတင်းသဵင်ႈတင်းလူင်ၼၼ်ႉ ယင်းဢမ်ႇထွမ်ႇဢမ်ႇဢဝ်ဢမိင်ႉထႃႇဝရႃႉၽြႃး လူၺ်ႈလွင်ႈဢၼ်ၶဝ်တၵ်းလႆႈယူႇၵႃႈၼႂ်းမိူင်း ယုတ ၼၼ်ႉလႄႈယူႇဢေႃႈ။
၅ ယေႃႇႁၼၼ်ႇ ဢိၵ်ႇတင်းတပ်ႉမူးၵႃႈမီးၸိူဝ်းၼၼ်ႉ ဢွၼ်ၵၼ်ဢဝ်ၵူၼ်းမဵဝ်းယုတ ဢၼ်ၵိုတ်းဢၼ်ၵျၢၼ်ႇလႄႈ လုၵ်ႉသေၵႃႈတီႈမိူင်းဢၼ်ၶဝ်လႆႈၶၢမ်ႇ တၢင်းဢၼ်ႁေႃႈဢွၵ်ႇၸူးၵူႈသိုင်ႇၵူႈမိူင်းၶိုၼ်းမႃးႁႂ်ႈလႆႈသွၼ်ႈပိုင်ႈယူႇၵႃႈၼႂ်းမိူင်းယုတ၊
၆ ဢၼ်ဝႃႈၵူၼ်းၸၢႆး၊ၵူၼ်းယိင်း၊လုၵ်ႈဢွၼ်ႇလုၵ်ႈယိင်းၶုၼ်ႁေႃၶမ်းတင်းလၢႆ ဢိၵ်ႇတင်းၶဝ်ၵႃႈဢၼ်ၵူဝ်ႇရၢမ်ႇတေႃႇမူး ၼေႇပုၸႃႇရတၼ်ႇ ဢဝ်ဢၢပ်ႈပၼ်ဝႆႉတီႈ ၵေႇတလိလုၵ်ႈၸၢႆးဢႁိၵမ်ႇ ဢၼ်ပဵၼ်လုၵ်ႈၸၢႆးသႃႇၽၼ်ႇ ၼၼ်ႉတင်းပရေႃးၽိတ်ႈယေႇရမိ တင်းပႃႇရုၵ်ႉလုၵ်ႈၸၢႆးၼေႇရိၸိူဝ်းၼၼ်ႉသေ လႄႈ
၇ ယင်းဢမ်ႇထွမ်ႇဢမ်ႇဢဝ်ဢမိင်ႉထႃႇဝရႃႉၽြႃးလႄႈၵႂႃႇၵႃႈတီႈ မိူင်းဢေႇၵႅပ်ႉတုလႄႈႁွတ်ႈထိုင်ၵႃႈတီႈဝဵင်းတႃႇပၼိတ်ႉဢေႃႈ။
၈ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈယေႇရမိ ၵႃႈၼႂ်းဝဵင်းတႃႇပၼိတ်ႉၼၼ်ႉလႄႈဝႃႈၸမ်း၊-မႂ်းဢဝ်မိုဝ်း မႂ်းယိပ်းဢဝ်မၢၵ်ႇႁိၼ် ဢၼ်ယႂ်ႇဢၼ်လူင်တင်းလၢႆလႄႈ
၉ ၽင်ဝႆႉၵႃႈၼႂ်းဢၢင်းၵတေႇၵႃႈတီႈတဝ်ႈဢုတ်ႇဢၼ်မီးၵႃႈႁိမ်းတီႈ ဢၼ်ၶဝ်ႈၸူးႁိူၼ်းၶုၼ်ႁေႃၶမ်းၽႃႇရေႃးၵႃႈၼႂ်းဝဵင်းတႃႇပၼိတ်ႉ ၼၼ်ႉၵႃႈတီႈၽၢႆႇ ၼႃႈၵူၼ်းယုတတင်းလၢႆတႃႉ။
၁၀ တီႈၶဝ်ၼၼ်ႉၵေႃႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်း ဢိသရေႇလ မီးဢမိင်ႉၸမ်း၊-တူၺ်းလူ။ၵဝ်တၵ်းပွႆႇၸႂ်ႉလႄႈ ဢဝ်ၶႃႈၵဝ်ၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇ မႃးလႄႈမၼ်းတၵ်းဢဝ်ရႃႇၸႃႉပလၢင်ႇမၼ်းတမ်းဝႆႉ ၵႃႈတီႈၼိူဝ်မၢၵ်ႇႁိၼ်ဢၼ်ၵဝ်ၽင်ဝႆႉၸိူဝ်းၼၼ်ႉဢေႃႈ။မၼ်းတၵ်းပိုတ်ႇၵီႈသုမ်ႉထဵင်မၼ်းၵႃႈၼိူဝ် မၢၵ်ႇႁိၼ်ၸိူဝ်းၼႆႉဢေႃႈ။
၁၁ မၼ်းတၵ်းႁွတ်ႈမႃးလႄႈပၼ်တၢမ်ႇတီႈမိူင်းဢေႇၵႅပ်ႉတု လႄႈၶဝ်ၸိူဝ်းဢၼ်ထုၵ်ႇလႆႈၶၢမ်ႇတၢင်းတၢႆၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်ဢၢပ်ႈပၼ်တီႈတၢင်းဢၼ်ၶၢမ်ႇတၢႆ၊ၶဝ်ၸိူဝ်းဢၼ် ထုၵ်ႇလီၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉတၵ်းလႆႈၶၢမ်ႇ တၢင်းဢၼ်ဢဝ်ဢၢပ်ႈပၼ်တီႈတၢင်းဢၼ်သိမ်းဢဝ်ၵႂႃႇ၊ ၶဝ်ၸိူဝ်းဢၼ်ထုၵ်ႇလီၶၢမ်ႇတၢင်းဢၼ်ၶႃႈၽၼ်းပႅတ်ႈ လူၺ်ႈလၢပ်ႇလူၺ်ႈလႅဝ်းၼၼ်ႉတၵ်းလႆႈၶၢမ်ႇတၢင်းဢၼ် ဢဝ်ဢၢပ်ႈပၼ်တီႈတၢင်းဢၼ်ၶႃႈၽၼ်းပႅတ်ႈ လူၺ်ႈလၢပ်ႇလူၺ်ႈလႅဝ်း ၼၼ်ႉဢေႃႈ။
၁၂ ၵဝ်တၵ်းဢဝ်ၽႆးတုတ်ႇႁိူၼ်းၽြႃးဢေႇၵႅပ်ႉတု တင်းလၢႆလႄႈမၼ်းတၵ်းဢဝ်ၽႆးမႆႈႁိူၼ်းၽြႃးၸိူဝ်းၼၼ်ႉသုတ်းပႅတ်ႈလႄႈ သိမ်းဢဝ်ၶဝ်ၵႂႃႇၶျုၵ်ႈဝႆႉဢေႃႈ။မၼ်းတၵ်းဢဝ်မိူင်းဢေႇၵႅပ်ႉတု ၼုင်ႈမႆႊမိူၼ်ၸိူဝ်ႉၼင်ႇ ၵူၼ်းဢၼ်လဵင်ႉသူဝ်းထိင်းသူဝ်းၼုင်ႈၶူဝ်းၼုင်ႈမၼ်းၼၼ်ႉလႄႈ ဢွၵ်ႇသေၵႃႈတီႈၼၼ်ႉၵႂႃႇၼိမ် ၼိမ်လီလီဢေႃႈ။
၁၃ မၼ်းတၵ်းယႃႉႁၵ်းႁိၵ်းသဝ်မၢၵ်ႇႁိၼ်ဢၼ်မီးၵႃႈတီႈပိၵ်ႉမၢၼ်ႇၵၢင်ဝၼ်းၵႃႈၼႂ်းမိူင်း ဢေႇၵႅပ်ႉတု ၼၼ်ႉၸိူဝ်းၼၼ်ႉပႅတ်ႈလႄႈ ဢဝ်ၽႆးတုတ်ႇႁိူၼ်းၽြႃးဢေႇၵႅပ်ႉတုတင်းလၢႆပႅတ်ႈဢေႃႈ၊ ဝႃႈၼင်ႇၼႆဢေႃႈ။