၃၅
ၵူၼ်းမဵဝ်းရေႇၶပ်ႉ
၁ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမီးတီႈယေႇရမိ ၼႂ်းၸူဝ်ႈပၢၼ် ၶုၼ်ယေႃႇယၵိမ်ႇ လုၵ်ႈၸၢႆးယုဝ်ႇသိယ ၶုၼ်ႁေႃၶမ်းယုတၼၼ်ႉလႄႈဝႃႈၸမ်း၊-
၂ မႂ်းၵႂႃႇၸူးၵႃႈတီႈႁိူၼ်းၵူၼ်းမဵဝ်းရေႇၶပ်ႉ တင်းလၢႆတၵ်းလၢတ်ႈၵၼ်တင်းၶဝ်သေယဝ်ႉ ႁွင်ႉဢဝ်ၶဝ်သႂၢင်းၶဝ်ႈၵႃႈၼႂ်းလုၵ်းႁိူၼ်းထႃႇဝရႃႉၽြႃးလုၵ်းၼိုင်ႈသေလႄႈဢဝ်ၼမ်ႉ ၸပိတ်ႈတိုၵ်းပၼ်တီႈၶဝ်တႃႉဝႃႈၼင်ႇၼႆဢေႃႈ။
၃ မိူဝ်ႈၼၼ်ႉၵဝ်ႁွင်ႉဢဝ်ၸႃႉၸဵမ် ယႃႇၸၺႃႇလုၵ်ႈၸၢႆးယေႇရမိ ဢၼ်ပဵၼ်လုၵ်ႈၸၢႆးႁႃႇပတိၺႃႇ လႄႈပီႈမၼ်း ၼွင်ႉမၼ်းလုၵ်ႈၸၢႆးမၼ်းၵႃႈမီး
၄ ဢိၵ်ႇတင်းၵူၼ်းမဵဝ်းရေႇၶပ်ႉ တင်းသဵင်ႈတင်းလူင်သေလႄႈဢဝ်ၵႂႃႇသႂၢင်းၶဝ်ႈၵႃႈၼႂ်းႁိူၼ်းထႃႇဝရႃႉၽြႃး ၸူးၵႃႈၼႂ်းလုၵ်းတီႈယူႇလုၵ်ႈၸၢႆးႁႃႇၼၢၼ်ႇ ဢၼ်ပဵၼ်လုၵ်ႈၸၢႆးဢိၵတႃႇလိ ၵူၼ်းၽြႃးပဵၼ်ၸဝ်ႈ ၵႃႈတီႈႁိမ်းလုၵ်းတီႈ ဢၼ်မူးမၢတ်ႈၽွင်းမိူင်း
၅ ၸူႉၵၼ်တုမ်ၵၼ်ၵႃႈတီႈၼိူဝ်လုၵ်းမႃႇသေႇယ လုၵ်ႈၸၢႆးသႃႇလုမ်ႇ ဢၼ်ပဵၼ်ၵေႃႉဢၼ်ပႂ်ႉၽၵ်းတူၼၼ်ႉသေယဝ်ႉ၊ ဢဝ်မေႃႈဢိၵ်ႇတင်းၵွၵ်းဢၼ်တဵမ်ဝႆႉတင်းၼမ်ႉၸပိတ်ႈတင်းလၢႆ သႂ်ႇတမ်းပၼ်ၵႃႈတီႈၽၢႆႇၼႃႈၵူၼ်းမဵဝ်းရေႇၶပ်ႉၸိူဝ်းၼၼ်ႉလႄႈလၢတ်ႈတီႈၶဝ်လႄႈဝႃႈ၊-ဢွၼ်ၵၼ်သူတ်ႉၵိၼ် ၼမ်ႉၸပိတ်ႈသေၵမ်းဝႃႈၼင်ႇၼႆဢေႃႈ။
၆ ၶဝ်ၼၼ်ႉၵေႃႈဢွၼ်ၵၼ်လၢတ်ႈလႄႈဝႃႈ၊-ႁဝ်းၶႃႈၼႆႉဢမ်ႇသူတ်ႉဢမ်ႇၵိၼ်ၼမ်ႉၸပိတ်ႈၶႃႈ။လွင်ႈမၼ်းၸမ်း ယေႃႇၼတပ်ႉလုၵ်ႈၸၢႆးရေႇၶပ်ႉ ပေႃႈၵူၼ်းမဵဝ်းၶႃႇၼၢၼ်ႇ၊ သင်ႇလၢတ်ႈဝႆႉဝႃႈ ၸႃႉၸဵမ်သူလႄႈၸူဝ်ႈလုၵ်ႈပၢၼ်လၢၼ် သူဢမ်ႇလႆႈၵိၼ်ၼမ်ႉၸပိတ်ႈလႃးလႃး။
၇ ႁိူၼ်းၵေႃႈဢမ်ႇလႆႈႁဵတ်း။ ၸိူဝ်ႉၽၼ်းၵေႃႈဢမ်ႇလႆႈဝၢၼ်ႇလႆႈပိုၼ်။သူၼ်ဢူးယဵၼ်ႇၸပိတ်ႈၵေႃႈဢမ်ႇလႆႈၽုၵ်ႇလႆႈသွမ်ႈ။ဢမ်ႇလႆႈႁႂ်ႈမီးလႃးလႃး။ လွင်ႈၼင်ႇႁိုဝ်ၸူဝ်ႈဢသၢၵ်ႈသူတၵ်းယၢဝ်းယိုၼ်းယူႇ ၵႃႈၼႂ်းတီႈဢၼ်သူပဵၼ်ၶႅၵ်ႇယူႇၼႆႉၸိုင် ၸူဝ်ႈဢသၢၵ်ႈသူၼၼ်ႉ တၵ်းလႆႈဢွၼ်ၵၼ်ယူႇၵႃႈၼႂ်းသုမ်ႉထဵင်ၵူၺ်းဢေႃႈ၊ ဝႃႈၼင်ႇ ၼႆဝႆႉတီႈႁဝ်းၶႃႈၶႃႈယဝ်ႉ။
၈ ပိူဝ်ႈၼႆလႄႈႁဝ်းၶႃႈၼႆႉလႆႈထွမ်ႇဢဝ်ၵႂၢမ်းယေႃႇၼတပ်ႉ လုၵ်ႈၸၢႆးရေႇၶပ်ႉ ပေႃႈၵူၼ်းမဵဝ်းၶႃႇၼၢၼ်ႇ ၼႂ်းၵႃႈဢၼ်မၼ်းသင်ႇလၢတ်ႈဝႆႉတီႈႁဝ်းၶႃႈလူၺ်ႈလွင်ႈဢၼ်ႁဝ်းၶႃႈ ဢိၵ်ႇတင်းမေး ႁဝ်းၶႃႈလုၵ်ႈၸၢႆးႁဝ်းၶႃႈ
၉ လုၵ်ႈယိင်းႁဝ်းၶႃႈဢမ်ႇလႆႈၵိၼ်ၼမ်ႉၸပိတ်ႈၸူဝ်ႈဢသၢၵ်ႈ၊ ဢမ်ႇလႆႈႁဵတ်းႁိူၼ်းႁဵတ်းယေးပုၼ်ႈဢၼ်သူတၵ်းယူႇတၵ်းသဝ်း၊ ဢမ်ႇလႆႈမီးသူၼ်ဢူးယဵၼ်ႇၸပိတ်ႈ၊ ဢမ်ႇလႆႈမီးႁႆႊမီးၼႃး၊ဢမ်ႇမီးၸိူဝ်ႉမီးၽၼ်းၼၼ်ႉၶႃႈယဝ်ႉ။
၁၀ ႁဝ်းၶႃႈယူႇၵႃႈၼႂ်းသုမ်ႉထဵင်သေလႄႈ ထွမ်ႇဢဝ်လႄႈႁဵတ်းၸွမ်းၵႃႈၼင်ႇဢၼ်ယေႃႇၼတပ်ႉ ပေႃႈၵူၼ်းမဵဝ်းႁဝ်းၶႃႈသင်ႇ လၢတ်ႈဝႆႉၼၼ်ႉၶႃႈယဝ်ႉ။
၁၁ မိူဝ်ႈဢၼ် ၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇၶီႇၶိုၼ်ႈမႃးၸူးၵႃႈတီႈမိူင်း ၼႆႉၼၼ်ႉႁဝ်းၶႃႈၼင်ႇၵၼ်ၵၼ်လၢတ်ႈၵၼ်လႄႈဝႃႈ၊-မႃးမႃးဢိူၺ်း။ဢွၼ်ၵၼ်ၶိုၼ်ႈၸူးၵႃႈတီႈဝဵင်းယေႇရုသလႅမ်ႇတႃႉႁဝ်း။မီးတီႈဢၼ်လီၵူဝ်လီႁႄၵူၼ်းသိုၵ်းၶႃႇလတေႇ ဢိၵ်ႇတင်းၵူၼ်းသိုၵ်းသုရိတင်းလၢႆဢေႃႈ၊ ဝႃႈၼင်ႇၼႆလႄႈမိူဝ်ႈလဵဝ်ၼႆႉႁဝ်းၶႃႈယူႇၵႃႈတီႈဝဵင်းယေႇရုသလႅမ်ႇ ၶႃႈယဝ်ႉဝႃႈၼင်ႇၼႆဢေႃႈ။
၁၂ မိူဝ်ႈၼၼ်ႉ ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈယေႇရမိလႄႈဝႃႈ၊- ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉ ၽြႃး ၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-
၁၃ မႂ်းၵႂႃႇလႄႈ လၢတ်ႈတီႈၵူၼ်းမိူင်းယုတ၊ ၵူၼ်းဝဵင်းယေႇရုသလႅမ်ႇတင်းလၢႆလႄႈဝႃႈ၊- သူၼႆႉဢမ်ႇလႆႈၶၢမ်ႇတၢင်းဢၼ်သင်ႇသွၼ်သုင်းမႃႉ ႁႂ်ႈလႆႈထွမ်ႇဢဝ်ၵႂၢမ်းၵဝ်ႁိုဝ် ဝႃႈၼင်ႇၼႆတႃႉဝႃႈၼင်ႇၼႆထႃႇဝရႃႉၽြႃး ထၢမ်ဢေႃႈ။
၁၄ ၵႂၢမ်းယေႃႇၼတပ်ႉလုၵ်ႈၸၢႆးရေႇၶပ်ႉဢၼ်မၼ်းပိင်းၺၢပ်ႈဝႆႉ တီႈလုၵ်ႈမၼ်းလၢင်းမၼ်းလူၺ်ႈလွင်ႈဢၼ် ၶဝ်ဢမ်ႇလႆႈသူတ်ႉလႆႈၵိၼ်ၼမ်ႉၸပိတ်ႈၼၼ်ႉ ပဵၼ်တီႈဢၼ်ၶဝ်ၵမ်ၶဝ်ၵျၢင်ႉလႄႈၶဝ်ယင်းဢမ်ႇသူတ်ႉဢမ်ႇၵိၼ်ၼမ်ႉၸပိတ်ႈလႄႈယူႇတေႃႇထိုင်ႁွတ်ႈဝၼ်းမိူဝ်ႈၼႆႉသေလႄႈ ဢွၼ်ၵၼ်ထွမ်ႇဢဝ်ၵႂၢမ်းပိင်းၺၢပ်ႈပေႃႈၶဝ်ဢေႃႈ။ပိၵ်ႉသမ်ႉၵဝ်လုၵ်ႉၸဝ်ႉၸဝ်ႉလႄႈလၢတ်ႈတီႈသူယူႇၶိူဝ်းၶိူဝ်းယႂ်းယႂ်းသေၵေႃႈ ဢမ်ႇဢွၼ် ၵၼ်ထွမ်ႇဢဝ်ၵႂၢမ်းၵဝ်။
၁၅ ၵဝ်လုၵ်ႉၸဝ်ႉၸဝ်ႉလႄႈပွႆႇၸႂ်ႉၶႃႈၵဝ်ပရေႃးၽိတ်ႈတင်းသဵင်ႈတင်းလူင် မႃးၸူးတီႈသူၶိူဝ်းၶိူဝ်းယႂ်းယႂ်းသေလႄႈ သင်ႇလၢတ်ႈလႄႈဝႃႈ၊-ဢွၼ်ၵၼ်ဝၢႆႇၶိုၼ်းသေ ၵႃႈတီႈသဵၼ်တၢင်းဢၼ်ႁၢႆႉဢၼ်ယုတ်ႈ ဢၼ်သူၸွမ်းယူႇႁင်းၽႂ်ႁင်းမၼ်းၼၼ်ႉလႄႈ မႄးပွင်မႄးႁႅၼ်းတၢင်းၵမ်တၢင်းၵျၢင်ႉသူတႃႉ။ယႃႇပေ ဢွၼ်ၵၼ်ၸွမ်းလင်ၽြႃးတၢင်ႇသူႇတၢင်ႇပႃးႁႂ်ႈလႆႈႁဵတ်းဝတ်ႈႁဵတ်းဝူတ်ႈတီႈၶဝ်။ ပေႃးႁဵတ်းၸိူဝ်ႉၼင်ႇၼၼ်ၸိုင် သူတၵ်းလႆႈဢွၼ်ၵၼ်ယူႇၵႃႈတီႈမိူင်းဢၼ်ၵဝ်ပၼ်တီႈသူဢိၵ်ႇတင်း တီႈပူႇသူမွၼ်ႇသူၼၼ်ႉဢေႃႈ၊ဝႃႈၼင်ႇၼႆသေၵေႃႈ သူဢွၼ်ၵၼ်ဝၢႆႇႁူႁႄႈႁူသူလႄႈ ယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်။
၁၆ ၵွပ်ႈပိူဝ်ႈဢၼ်လုၵ်ႈလၢၼ်ယေႃႇၼတပ်ႉ ဢၼ်ပဵၼ်လုၵ်ႈၸၢႆးရေႇၶပ်ႉ ၸိူဝ်းၼၼ်ႉဢွၼ်ၵၼ်ၵမ်ၵျၢင်ႉၸွမ်းၼင်ႇပိင်းၺၢပ်ႈ ဢၼ်ပေႃႈၶဝ်သင်ႇလၢတ်ႈဝႆႉၼၼ်ႉလႄႈ ၵူၼ်းမဵဝ်းၼႆႉယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈယူႇၼၼ်ႉလႄႈ
၁၇ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉၸမ်း၊-တူၺ်းလူ။ၵဝ်တၵ်းႁႂ်ႈၽေးဢူးပၢတ်ႈၵႃႈဢၼ်ၵဝ်လၢတ်ႈဝႆႉလူၺ်ႈလွင်ႈၶဝ်ၼၼ်ႉ ႁွတ်ႈထိုင်ၵႃႈၼိူဝ်ၵူၼ်းမိူင်းယုတဢိၵ်ႇတင်းၵူၼ်းဝဵင်းယေႇရုသလႅမ်ႇ တင်းလၢႆဢေႃႈ။လွင်ႈမၼ်းၸမ်းပိၵ်ႉသမ်ႉၵဝ်လၢတ်ႈတီႈၶဝ်သေၵေႃႈၶဝ်ဢမ်ႇထွမ်ႇဢမ်ႇငိၼ်း။ပိၵ်ႉသမ်ႉၵဝ်ႁွင်ႉတီႈၶဝ်သေၵေႃႈၶဝ်ဢမ်ႇၶိုၼ်းဢိူဝ်ႈ၊ဝႃႈၼင်ႇၼႆဢေႃႈ။
၁၈ ယေႇရမိ သင်ႇလၢတ်ႈဝႆႉတီႈၵူၼ်းမဵဝ်းရေႇၶပ်ႉၸိူဝ်းၼၼ်ႉလႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊- ၵွပ်ႈပိူဝ်ႈဢၼ်သူထွမ်ႇဢဝ်ၵႂၢမ်းပိင်းၺၢပ်ႈ ယေႃႇၼတပ်ႉ ပေႃႈသူလႄႈ ပႂ်ႉၵမ်ပႂ်ႉၵျၢင်ႉၸွမ်းၵႃႈၼင်ႇဢၼ်မၼ်းၸီႇယၢင်ႇႁဵတ်းထုင်းဝႆႉၸိူဝ်းၼၼ်ႉလႄႈသိူပ်ႇၵူၼ်းၶိူဝ်းၵူၼ်းယေႃႇၼတပ်ႉ လုၵ်ႈၸၢႆးရေႇၶပ်ႉဢၼ်လႆႈၸုၵ်းယူႇၵႃႈတီႈၽၢႆႇၼႃႈၵဝ် ဢမ်ႇလႆႈသုတ်းလႆႈထၢတ်ႇလႃးလႃး ဝႃႈၼင်ႇၼႆထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉဢေႃႈ။