၂၄
ပဵတ်ႈမၢၵ်ႇလိူဝ်ႇသၢင်းၽေႃးသွင်ပဵတ်ႈ
၁ ထႃႇဝရႃႉၽြႃး ၼႄပျႃးတီႈၵဝ်လႄႈၵဝ်လႆႈႁၼ်ပဵတ်ႈမၢၵ်ႇလိူဝ်ႇသၢင်းၽေႃး ဢၼ်တမ်းဝႆႉၵႃႈတီႈၽၢႆႇၼႃႈပိၵ်ႉမၢၼ်ႇထႃႇဝရႃႉၽြႃးသွင်လုၵ်ႈၼၼ်ႉ လိုၼ်းသေဢၼ်ၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇသိမ်းဢဝ်ၶုၼ်ယေႇၶေႃးၼိ လုၵ်ႈၸၢႆးယေႃႇယၵိမ်ႇၶုၼ်ႁေႃၶမ်းယုတ ဢိၵ်ႇတင်းမူးမၢတ်ႈၽွင်းမိူင်းယုတ လႂ်၊လၢၵ်ႈသမႃး လႂ်၊ ၸၢင်ႈလဵၵ်း လႂ်ၸိူဝ်းၼၼ်ႉဢွၵ်ႇသေၵႃႈၼႂ်းဝဵင်းယေႇရုသလႅမ်ႇ ၵႂႃႇၵႃႈတီႈဝဵင်းပႃႇပု လုၼ်ႇၼၼ်ႉဢေႃႈ။
၂ ပဵတ်ႈလုၵ်ႈၼိုင်ႈၸမ်း၊မီးတဵမ်ဝႆႉတင်းမၢၵ်ႇလိူဝ်ႇသၢင်းၽေႃး ဢၼ်လီၼႃႇလူင်လၢင်မိူၼ်ၸိူဝ်ႉၼင်ႇမၢၵ်ႇလိူဝ်ႇသၢင်းၽေႃး ဢၼ်မၢၵ်ႇဢွၼ်တၢင်းပိူၼ်ႈၼၼ်ႉဢေႃႈ။လုၵ်ႈၼိုင်ႈၸမ်းမီးတဵမ်ဝႆႉတင်းမၢၵ်ႇလိူဝ်ႇသၢင်းၽေႃးဢၼ်ၺၢမ်ႉၼႃႇလူင်လၢင်ထၼ်ႈပေႃး ဢမ်ႇၵိၼ်လႆႈၵွပ်ႈပိူဝ်ႈဢၼ်ၺၢမ်ႉၼၼ်ႉဢေႃႈ။
၃ ထႃႇဝရႃႉၽြႃးၵေႃႈထၢမ်တီႈၵဝ်လႄႈဝႃႈ၊-ယေႇရမိဢိူၺ်း။မႂ်းႁၼ်ၵႃႈသင်ဝႃႈၼင်ႇၼႆလႄႈၵဝ်ၶိုၼ်းလဝ်ႈလၢတ်ႈလႄႈဝႃႈ၊-မၢၵ်ႇလိူဝ်သၢင်းၽေႃးၶႃႈဢေႃႈ။ မၢၵ်ႇလိူဝ်ႇသၢင်းၽေႃးဢၼ်လီၼၼ်ႉလီၼႃႇလူင်လၢင်ၶႃႈဢေႃႈ။မၢၵ်ႇလိူဝ်ႇသၢင်းၽေႃးဢၼ်ၺၢမ်ႉၼၼ်ႉၺၢမ်ႉၼႃႇ ထၼ်ႈပေႃးဢမ်ႇၵိၼ်လႆႈၵွပ်ႈပိူဝ်ႈၺၢမ်ႉၼႃႇၼၼ်ႉတီႈၶႃႈဢေႃႈ ဝႃႈၼင်ႇၼႆဢေႃႈ။
၄ လၢႆးသမ်ႉ ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-
၅ ၵဝ်တၵ်းမၢတ်ႈၵူၼ်းမဵဝ်းယုတဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ဢၼ်ၵဝ်ပွႆႇဢွၵ်ႇသေၵႃႈတီႈၼႆႉ ၵႂႃႇၸူးၵႃႈတီႈမိူင်းၶႃႇလတေႇပုၼ်ႈဢၼ်တၵ်းပဵၼ်ဢၵျူဝ်း တီႈၶဝ်ၼၼ်ႉၸိူဝ်းၼၼ်ႉပဵၼ်ၸိူဝ်ႉၼင်ႇမၢၵ်ႇလိူဝ်ႇသၢင်းၽေႃး ဢၼ်လီၸိူဝ်းၼႆႉ ဢေႃႈ။
၆ ၵဝ်တၵ်းဢဝ်တႃၵဝ်ယႅၵ်ႉၶဝ်ႈယိင်ႈၶဝ်ယူႇပုၼ်ႈဢၼ်တၵ်းပဵၼ်ဢၵျူဝ်းတီႈၶဝ်လႄႈ သမ်ႉၶိုၼ်းဢဝ်ၶဝ်မႃးၵႃႈတီႈမိူင်းၼႆႉလူးၵွၼ်ႇဢေႃႈ။ၵမ်းလိုၼ်းၵဝ်ယင်းဢမ်ႇၵိူၼ်ႇဢမ်ႇယႃႉၶဝ်လႄႈ တၵ်းတႄႇႁဵတ်းၶဝ်ဢေႃႈ။ ၵဝ်ယင်းဢမ်ႇထူၺ်ႈဢမ်ႇထွၼ်ၶဝ်ပႅတ်ႈ လႄႈတၵ်းၽုၵ်ႇတၵ်းသွမ်ႈၶဝ်ဝႆႉဢေႃႈ။
၇ ၵဝ်တၵ်းပၼ်ႁူဝ်ၸႂ်ဢၼ်ႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃးၼၼ်ႉတီႈၶႃႈဢေႃႈ။ၶဝ်တၵ်းဢွၼ်ၵၼ်ပဵၼ်ၵူၼ်းၵဝ်လႄႈၵဝ်ၵေႃႈတၵ်းပဵၼ်ၽြႃးပဵၼ်ၸဝ်ႈၶဝ်ဢေႃႈ။ၶဝ်တၵ်းဢွၼ်ၵၼ် ပႃးတင်းႁူဝ်ၸႂ်သဵင်ႈသဵင်ႈ ၶိုၼ်းမႃးတီႈ ၶဝ်ဢေႃႈ။
၈ ၸိူဝ်ႉၼင်ႇမၢၵ်ႇလိူဝ်ႇသၢင်းၽေႃးဢၼ်ႇၺၢမ်ႉထၼ်ႈပေႃးဢမ်ႇၵိၼ်လႆႈၵွပ်ႈပိူဝ်ႈ ဢၼ်ၺၢမ်ႉၼၼ်ႉၸမ်း၊ထႃႇဝရႃႉၽြႃးမီးဢမိင်ႉလႄႈဝႃႈ၊-ၵဝ်တၵ်းၶိုင်ပွင်ႈႁႂ်ႈၸေႇတၵိ၊ၶုၼ်ႁေႃၶမ်းယုတ၊ ဢိၵ်ႇတင်းမူးမၢတ်ႈၽွင်းမိူင်း လႂ်၊ ၵူၼ်းဝဵင်းယေႇရုသလႅမ်ႇ ဢၼ်ၵိုတ်းဝႆႉၵျၢၼ်ႇဝႆႉၸိူဝ်းၼၼ်ႉ လႂ်၊ႁႂ်ႈၶဝ်တၵ်းလႆးယူႇၵႃႈၼႂ်းမိူင်းၼႆႉႁိုဝ် ၵႃႈၼႂ်းမိူင်းဢေႇၵႅပ်ႉတု ႁိုဝ်ၼၼ်ႉ ဢေႃႈ။
၉ ၵဝ်တၵ်းႁႂ်ႈၶဝ်လႆႈၶၢမ်ႇတၢင်းဢၼ်ဢဝ်ထိမ်ႈၵႂႃႇထိမ်ႈၶိုၼ်းယူႇ ၵႃႈၼႂ်းၵူႈသိုင်ႇၵူႈမိူင်းပုၼ်ႈတၢင်းဢၼ်ဢမ်ႇလီဢမ်ႇငၢမ်းၶဝ် ႁႂ်ႈၶဝ်လႆႈပဵၼ်တီႈဢၼ်သေႉဢၼ်သွမ်း၊ တီႈဢၼ်ႁဵတ်းဢပုမ်ႇတႅၵ်ႈတီႈဢၼ်လႃႇလင်ၵိၼ်ႇလႃႇ ၵႃႈၼႂ်းတီႈဢၼ်ၵဝ်ႁေႃႈၶဝ်ပႅတ်ႈ ၵူႈတီႈၵူႈလႅၼ်ၼၼ်ႉဢေႃႈ။
၁၀ ၵဝ်တၵ်းပွႆႇၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈၽေးၵႃႇလႃႉႁႃႇလႅင်ႉမိူင်းၸူးၵႃႈတီႈၶဝ် တေႃႇထိုင်ႁွတ်ႈၶဝ်ထၼ်ႈပေႃးလႆႈၶၢမ်ႇတၢင်းဢၼ်ပႄႇမူတ်းပႅတ်ႈသေၵႃႈၼႂ်း မိူင်းဢၼ်ဢၢပ်ႈပၼ်တီႈပူႇၶဝ်မွၼ်ႇၶဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။