၃၄
ၵႂၢမ်းပၼ်သတိၸေႇတၵိ
၁ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ယေႇရမိၼႂ်းမိူဝ်ႈဢၼ်ၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇ ဢိၵ်ႇတင်းပူဝ်ႇပႃႇမၼ်းၵႃႈမီး၊သိုင်ႇၸိုင်ႈဝၢၼ်ႈမိူင်းၵႃႈဢၼ်မၼ်းလႆႈဢုပ်ႉပိူင်ႇ၊ မဵဝ်းၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉဢွၼ်ၵၼ်မႃးတိုၵ်းတေႃးဝဵင်း ယေႇရုသလႅမ်ႇဢိၵ်ႇတင်း ဝၢၼ်ႈဝဵင်းၵႃႈဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉလႄႈဝႃႈ၊-
၂ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-မႂ်းၵႂႃႇလႄႈမွၵ်ႇလၢတ်ႈတီႈၸေႇတၵိ ၶုၼ်ႁေႃၶမ်းယုတလႄႈဝႃႈ၊-
၃ ထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။ ၵဝ်တၵ်းဢဝ်ဝဵင်းၼႆႉဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်းပႃႇပုလုၼ်ႇလႄႈ မၼ်းတၵ်းဢဝ်ၽႆးတုတ်ႇပႅတ်ႈဢေႃႈ။မႂ်းဢမ်ႇလႆႈၵၢင်းလွတ်ႈတင်းမိုဝ်းမၼ်း။ မႂ်းတၵ်းလႆႈၶၢမ်ႇတၢင်းဢၼ်တီႉၵမ်ဢဝ်သေလႄႈ ဢၢပ်ႈပၼ်ၵႃႈၼႂ်းမိုဝ်းမၼ်းၼၼ်ႉဢမၢၼ်ႇၶၢၼ်ပဵၼ်ဢေႃႈ။တႃႈမႂ်းတၵ်းလႆႈႁၼ်တႃႈ ၶုၼ်ႁေႃၶမ်းပႃႇပုလုၼ်ႇ လႄႈသူပ်းတေႃႇသူပ်း တၵ်းလၢတ်ႈတေႃႇၵၼ်လႄႈမႂ်းတၵ်း လႆႈၵႂႃႇၵႃႈတီႈဝဵင်းပႃႇပုလုၼ်ႇဢေႃႈ။
၄ ၵူၺ်းၵႃႈၸေႇတၵိ ၶုၼ်ႁေႃၶမ်းယုတတီႈၶႃႈဢိူၺ်း။ထွမ်ႇငိၼ်းၵႂၢမ်းထႃႇဝရႃႉၽြႃးတႃႉ။ထႃႇဝရႃႉၽြႃးဢဝ်လွင်ႈၸဝ်ႈၶုၼ် လူင်လႄႈမီးဢမိင်ႉၸမ်း၊-
၅ မႂ်းဢမ်ႇလႆႈၶၢမ်ႇတၢႆလူၺ်ႈလၢပ်ႇလူၺ်ႈလႅဝ်း။ မႂ်းတၵ်းလႆႈယူႇၼိမ်ၼိမ်လီလီလႄႈ ၶဝ်တၵ်းဢွၼ်ၵၼ်ဢဝ်ၼၢမ်ႇသႃႇတုတ်ႇၽႆးပုၼ်ႈမႂ်းမိူၼ်ႈၸိူဝ်ႉၼင်ႇဢၼ် ယၢမ်ႈႁဵတ်းပုၼ်ႈပူႇမွၼ်ႇမႂ်းဢၼ်ပဵၼ်ၶုၼ်ႁေႃၶမ်း ဢၼ်ဢုပ်ႉပိူင်ႇၸၢမ်ႇၸႃးမိူဝ်ႈဢွၼ်တၢင်းမႂ်းၸိူဝ်းၼၼ်ႉသေလႄႈဝႃႈ၊- ၸဝ်ႈဢိူၺ်း။ၸဝ်ႈဢိူၺ်း။ ဝႃႈၼင်ႇၼႆလႄႈႁႆႈႁွင်ႉပွင်ႉၶင်းပုၼ်ႈမႂ်းဢေႃႈ။ၵဝ်လၢတ်ႈဝႆႉယဝ်ႉယဝ်ႉဝႃႈၼင်ႇၼႆ ထႃႇ ဝရႃႉၽြႃးမီးဢမိင်ႉဢေႃႈ။
၆ ပရေႃးၽိတ်ႈယေႇရမိ ဢဝ်ၵႂၢမ်းၵႃႈမီးၼႆႉသင်ႇလၢတ်ႈဝႆႉတီႈ ၸေႇတၵိၶုၼ်ႁေႃၶမ်းယုတၵႃႈၼႂ်းဝဵင်းယေႇရုသလႅမ်ႇ ၼႂ်းမိူဝ်ႈဢၼ်ပူဝ်ႇ ပႃႇၶုၼ်ႁေႃၶမ်းပႃႇပုလုၼ်ႇၸိူဝ်းၼၼ်ႉ
၇ ယင်းတိုၵ်ႉဢဝ်ဝဵင်းယေႇရုသလႅမ်ႇဢိၵ်ႇတင်း ဝဵင်းယုတဢၼ်ယင်းၵိုတ်းယင်းၵျၢၼ်ႇဢၼ်ဝႃႈ ဝဵင်းလႃႇၶိသ၊ဝဵင်းဢၸေၵႃဢၼ်မၼ်ႈၶိူင်ႇလႄႈယင်းၵိုတ်းဝႆႉၼႂ်းဝဵင်းယုတၸိူဝ်းၼၼ်ႉယူႇၼၼ်ႉဢေႃႈ။
၈ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ယေႇရမိလိုၼ်းသေဢၼ်ၶုၼ်လူင်ၸေႇတၵိ ႁဵတ်းပတိၺိၼ်ႇလူၺ်ႈၵၼ်တင်း ၵူၼ်းတင်းသဵင်ႈတင်းလူင်ဢၼ်မီးၵႃႈၼႂ်းဝဵင်းယေႇရုသလႅမ်ႇ၊ လူၺ်ႈလွင်ႈဢၼ်တၵ်း ၸီႇယၢင်ႇမွၵ်ႇလၢတ်ႈတြႃး
၉ တၢင်းဢၼ်လွတ်ႈႁႂ်ႈၶဝ်ၼၼ်ႉႁင်းၽႂ်ႁင်းမၼ်းၵမ်းလိုၼ်း ယင်းဢမ်ႇၸႂ်ႉၵိၼ်ပီႈမၼ်းၼွင်ႉမၼ်းဢၼ်ပဵၼ်ၵူၼ်းယုတ ၼင်ႇၵၼ်ၵၼ်လႄႈ ပွႆႇလွတ်ႈၶႃႈၵူၼ်းၸၢႆးၶႃႈၵူၼ်းယိင်းမဵဝ်း ႁေႇပေး ဢၼ်လႆႈၶၢမ်ႇတၢင်းဢၼ်ၸႂ်ႉၵိၼ်သွႆၵိၼ်ယူႇ ၸိူဝ်းၼၼ်ႉယဝ်ႉၼၼ်ႉဢေႃႈ။
၁၀ လွင်ႈမၼ်းၸမ်းမူးမၢတ်ႈၽွင်းမိူင်းၵႃႈမီးဢိၵ်ႇတင်း ၵူၼ်းတင်းလၢႆဢၼ်ႁပ်ႉတုင်းဢဝ်ပတိၺိၼ်ႇ လူၺ်ႈလွင်ႈဢၼ်ၶဝ်ႁင်းၽႂ်ႁင်းမၼ်းၵမ်းလိုၼ်း ယင်းဢမ်ႇၸႂ်ႉၵိၼ်ပီႈမၼ်းၼွင်ႉမၼ်းၼင်ႇၵၼ်ၵၼ်လႄႈ တၵ်းပွႆႇလွတ်ႈၶႃႈၵူၼ်းၸၢႆးမၼ်းၶႃႈၵူၼ်းယိင်းမၼ်းတင်းလၢႆၼၼ်ႉ ၸိူဝ်းၼၼ်ႉၽွမ်ႉၵၼ်ထွမ်ႇဢဝ်လႄႈဢွၼ်ၵၼ်ပွႆႇလွတ်ႈဢေႃႈ။
၁၁ ၵမ်းလိုၼ်း ၶဝ်ၶၢႆႉပုတ်ႈလႄႈ သမ်ႉၶိုၼ်းႁွင်ႉဢဝ်ၶႃႈၵူၼ်းၸၢႆးၶႃႈၵူၼ်းယိင်း ဢၼ်ၶဝ်ပွႆႇလွတ်ႈယဝ်ႉၸိူဝ်းၼၼ်ႉ မႃးလႄႈႁႂ်ႈၶဝ်ၶၢမ်ႇႁဵတ်းၶႃႈထႅင်ႈဢေႃႈ။
၁၂ ပိူဝ်ႈၼႆလႄႈၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈယေႇရမိလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇမီးဢမိင်ႉၸမ်း၊-
၁၃ ၵဝ်ႁဵတ်းပတိၺိၼ်ႇလူၺ်ႈၵၼ်တင်းပူႇသူမွၼ်ႇသူ ၼႂ်းမိူဝ်ႈဢၼ်ၵဝ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတု တီႈဢၼ်လႆႈၶၢမ်ႇႁဵတ်းၶႃႈ ၼၼ်ႉလႄႈဝႃႈ၊-
၁၄ ပေႃးၸေးၸဵတ်းပီႊယဝ်ႉၸိုင်သူတၵ်းလႆႈပွႆႇလွတ်ႈပီႈသူၼွင်ႉသူဢၼ်ပဵၼ်ၵူၼ်းမဵဝ်း ႁေႇပေးၼင်ႇၵၼ်ၵၼ် ဢၼ်လႆႈၶၢမ်ႇတၢင်းဢၼ်ၶၢႆတေႃႇသူလႄႈ ၶၢမ်ႇႁဵတ်းၶႃႈတီႈသူ ႁူၵ်းပီႊတဵမ်တဵမ်ယဝ်ႉၼၼ်ႉႁင်းၽႂ်ႁင်းမၼ်းဢေႃႈ။ပိၵ်ႉသမ်ႉဝႃႈသူတၵ်းလႆႈပၼ်ဢၶႂၢင်ႉ ဢၼ်လွတ်ႈဢေႃႈဝႃႈၼင်ႇၼႆသေၵေႃႈပူႇသူမွၼ်ႇသူၸိူဝ်းၼၼ်ႉ ဢမ်ႇထွမ်ႇဢမ်ႇဢဝ်ၵႂၢမ်းၵဝ် ဢမ်ႇဝၢႆႇႁူႁႄႈႁူၸူးၵဝ်လႄႈယူႇဢေႃႈ။
၁၅ မိူဝ်ႈလဵဝ်ၼႆႉပိၵ်ႉသမ်ႉ သူမီးတၢင်းဢၼ်ၶၢႆႉပုတ်ႈလႄႈ ႁဵတ်းလွင်ႈတၢင်းဢၼ်တြႃး သိုဝ်ႈၼႃႈတႂ်ႈတႃၵဝ်ၼႂ်းလွင်ႈဢၼ်ၸီႇယၢင်ႇမွၵ်ႇလၢတ်ႈဢၶႂၢင်ႉတၢင်းဢၼ်ပွႆႇလွတ်ႈတီႈၵူၼ်းႁိူၼ်းၸမ်ၵၼ် ႁင်းၽႂ်ႁင်းမၼ်းလႄႈဢွၼ်ၵၼ်ႁဵတ်းပတိၺိၼ်ႇ တၢင်းဢၼ်ႁပ်ႉတုင်းဢဝ်ၵႃႈတီႈၽၢႆႇၼႃႈၵဝ်ၵႃႈၼႂ်းႁိူၼ်း ဢၼ်ႁွင်ႉႁိၵ်ႈလူၺ်ႈ ၼႃႇမႃႉၸိုဝ်သဵင်ၵဝ်ၼၼ်ႉသေၵေႃႈ၊
၁၆ သမ်ႉၶၢႆႉပုတ်ႈလႄႈၶျႃးၼႃႇမႃႉၸိုဝ်သဵင်ၵဝ် တူၵ်းတီႈတႅမ်ႇသေလႄႈ သမ်ႉၶိုၼ်းဢွၼ်ၵၼ်ႁွင်ႉဢဝ်ၶႃႈၵူၼ်းၸၢႆးၶႃႈၵူၼ်းယိင်းဢၼ်ပွႆႇလွတ်ႈမူတ်းမူတ်းသဵင်ႈသဵင်ႈ ႁင်းၽႂ်ႁင်းမၼ်းၸိူဝ်းၼၼ်ႉၶိုၼ်းမႃးလႄႈ ႁႂ်ႈၶၢမ်ႇႁဵတ်းၶႃႈၵူၼ်းၸၢႆးၶႃႈၵူၼ်းယိင်းယဝ်ႉလူင်ပေႇ။
၁၇ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊- သူဢမ်ႇထွမ်ႇဢမ်ႇဢဝ်ၵႂၢမ်းၵဝ် လူၺ်ႈလွင်ႈဢၼ်တၵ်းၸီႇယၢင်ႇမွၵ်ႇလၢတ်ႈဢၶႂၢင်ႉ တၢင်းဢၼ်ပွႆႇလွတ်ႈတီႈပီႈသူၼွင်ႉသူၼင်ႇၵၼ်ၵၼ် ၵူၼ်းႁိူၼ်းၸမ်ၵၼ်ႁင်းၽႂ်ႁင်းမၼ်းၼၼ်ႉလႄႈထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။ၵဝ်တၵ်းၸီႇယၢင်ႇမွၵ်ႇလၢတ်ႈဢၶႂၢင်ႉဢၼ်လွတ်ႈတီႈၽေးလၢပ်ႇၽေးလႅဝ်း၊ ၽေးၵႃႇလႃႉႁႃႇလႅင်ႉမိူင်း၊ ၽေးတၢင်းဢၼ်ဢိုပ်းဢၼ်ယၢၵ်ႈပုၼ်ႈသူလႄႈႁႂ်ႈသူ ၶၢမ်ႇတၢင်းဢၼ်ဢဝ်ထိမ်ႈၵႂႃႇထိမ်ႈမႃးယူႇၵႃႈတီႈၵူႈသိုင်ႇၵူႈမိူင်းၵႃႈၼိူဝ်လိၼ်မိူင်းဢေႃႈ။
၁၈ ၵဝ်တၵ်းဢဝ် ၶဝ်ၸိူဝ်းဢၼ်ပူၼ်ႉလိူဝ်ပတိၺိၼ်ႇၵဝ်လႄႈ ဢမ်ႇၵမ်ၵမ်ႇၵျၢင်ႉၸွမ်းၼင်ႇပတိၺိၼ်ႇဢၼ်ၶဝ်ၽႃႇဝူဝ်းဢွၼ်ႇႁဵတ်းသွင်ၽၢၵ်ႇသေလႄႈ တႆႇလတ်းၵႂႃႇၵႃႈၼႂ်းၵႄႈဝူင်ႈၵၢင်သွင်ၽၢၵ်ႇၼၼ်ႉလႄႈ ႁဵတ်း ၵႃႈတီႈၽၢႆႇၼႃႈၵဝ်ၼၼ်ႉ၊
၁၉ ဢၼ်ဝႃႈၶုၼ်ယုတ၊ၶုၼ်ယေႇရုသလႅမ်ႇ၊မူးမၢတ်ႈၽွင်းမိူင်း၊ ယိတ်ႉပရေႃးႁိၵ်ႈ၊ၵူၼ်းထိင်းၼၢင်း၊ၵူၼ်းဝၢၼ်ႈၵူၼ်းမိူင်းဢၼ်တႆႇလတ်းၵႂႃႇ ၵႃႈၼႂ်းၵႄႈဝူင်ႈၵၢင်ဝူဝ်းဢွၼ်ႇဢၼ်ၽႃႇ ႁဵတ်းသွင်ၽၢၵ်ႇၼၼ်ႉၸိူဝ်းၼၼ်ႉ၊
၂၀ ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်ဢိၵ်ႇ တင်းၵႃႈၼႂ်းမိုဝ်း ၶဝ်ၸိူဝ်းဢၼ် ႁႃဢဝ်ဢသၢၵ်ႈၶဝ်ၼၼ်ႉဢေႃႈ။
၂၁ တူဝ်တၢႆၶဝ်ၼၼ်ႉတၵ်းပဵၼ်ပုၼ်ႈဢၼ်ၼူၵ်ႉၵၢင်ႁၢဝ် တင်းတူဝ်ထိူၼ်ႇႁၢႆႉတင်းလၢႆတၵ်းၵိၼ်ဢေႃႈ။ၵဝ်တၵ်းဢဝ်ၸေႇတၵိၶုၼ်ႁေႃၶမ်းယုတ ဢိၵ်ႇတင်းမူးမၢတ်ႈၽွင်းမိူင်းတင်းလၢႆဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်၊ ၵႃႈၼႂ်းမိုဝ်းၶဝ်ၸိူဝ်းဢၼ်ႁႃဢဝ်ဢသၢၵ်ႈၶဝ်၊ၵႃႈ ၼႂ်းမိုဝ်းၶုၼ်ႁေႃၶမ်းပႃႇပုလုၼ်ႇ ဢၼ်ဝၢႆႇၶိုၼ်းၵႂႃႇသေၵႃႈတီႈသူယဝ်ႉ ၼၼ်ႉၸိူဝ်းၼၼ်ႉဢေႃႈ။
၂၂ တူၺ်းလူ။ၵဝ်တၵ်းပၼ်ဢမိင်ႉလႄႈႁႂ်ႈၶဝ်ၼၼ်ႉၶိုၼ်းမႃးၵႃႈတီႈဝဵင်းၼႆဢေႃႈ။ ၶဝ်ၼၼ်ႉတၵ်းဢွၼ်ၵၼ်တိုၵ်းတေႃးလႄႈ သိမ်းဢဝ်သေယဝ်ႉဢဝ်ၽႆးတုတ်ႇဢေႃႈ။ၵဝ်တၵ်းႁႂ်ႈဝၢၼ်ႈဝဵင်းယုတတင်းလၢႆပဵၼ်တီႈဢၼ်ပဝ်ႇဢၼ်လၢပ်ႈလႄႈ ဢမ်ႇမီးၵေႃႉဢၼ်ယူႇဢၼ်သဝ်းလႃးလႃးဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။