၁၄
တၢင်းဢၼ်ႁႅင်ႈႁွင်ၶဝ်ႈၵႃမၢၵ်ႇပႅင်းလၢပ်ႇလႅဝ်း
၁ ၼုၵ်ႈၵပၢတ်ႈထႃႇဝရႃႉၽြႃး ဢၼ်ဢဝ်လွင်ႈတၢင်းဢၼ်ၾႃႉလႅင်ႉၽူၼ်ဢမ်ႇတူၵ်းၼၼ်ႉလႄႈ ႁွတ်ႈမႃးတီႈယေႇရမိၸမ်း၊-မိူင်းယုတၶၢင်းၶီၶၢင်းၽၢၼ်လႄႈၽၵ်းတူဝဵင်းမၼ်းၸိူဝ်းၼၼ်ႉ မီးသဵင်ဢၼ်ပွင်ႉၶၢင်းပွင်ႉ မိုၼ်ႇယူႇဢေႃႈ။
၂ ၶဝ်ၼုင်ႈၶူဝ်းၼုင်ႈဢၼ်လမ်ၵမ်ႇသေလႄႈ ၼင်ႈယူႇၵႃႈၼိူဝ်လိၼ်လႄႈ သဵင်ဢၼ်ဝဵင်း ယေႇရုသလႅမ်ႇႁႆႈႁွင်ႉၼၼ်ႉၶိုၼ်ႈယူႇဢေႃႈ။
၃ မူးမၢတ်ႈၽွင်းမိူင်းတင်းလၢႆဢွၼ်ၵၼ်ပွႆႇၸႂ်ႉၵူၼ်းဢွၼ်ႇၶဝ်ၵႂႃႇတဵၵ်းၼမ်ႉလႄႈ ၶဝ်ၼၼ်ႉႁွတ်ႈထိုင်ၵႃႈတီႈဢိူင်ႇၼမ်ႉၶုမ်ႇၼမ်ႉသေယဝ်ႉဢမ်ႇထူပ်းၼမ်ႉထူပ်းၼၢႆး။ ၶဝ်ဢွၼ်ၵၼ်ပႃးဢဝ်မေႃႈပဝ်ႇမေႃႈလၢပ်ႈသေလႄႈ ၶိုၼ်းမႃးဢေႃႈ။ ၶဝ်မီးတၢင်းဢၼ်ဢူၵ်းဢၢႆငိူဝ်ႈငဝ်လႄႈ ဢွၼ်ၵၼ်ႁူမ်ႇသုမ်ႇႁူဝ်ၶဝ်ယူႇဢေႃႈ။
၄ ၵွပ်ႈပိူဝ်ႈၽူၼ်ဢမ်ႇတူၵ်းၵႃႈၼႂ်းမိူင်းၸဝ်ႈလႄႈ လိၼ်မီးတၢင်းဢၼ်တႅၵ်ႇဢႃႈဝႆႉၼၼ်ႉလႄႈၶဝ်ၸိူဝ်းဢၼ် ဢဝ်ထႆထႆၼၼ်ႉမီးတၢင်းဢၼ်ဢူၵ်းဢၼ်ဢၢႆလႄႈဢွၼ်ၵၼ်ႁူမ်ႇ သုမ်ႇႁူဝ်ၶဝ်ယူႇဢေႃႈ။
၅ တိုင်မေႈၵိူတ်ႇလဵင်ႉလုၵ်ႈမႃးၵႃႈၼႂ်း တီႈပၢင်ႇတီႈပဵင်းလႄႈၸုၼ်ႉပႅတ်ႈလုၵ်ႈဢွၼ်ႇမၼ်းၵွပ်ႈပိူဝ်ႈဢမ်ႇမီးယိူဝ်ႇၼၼ်ႉဢေႃႈ။
၆ လီႈဢၼ်ႁႄရိူၵ်းတင်းလၢႆ ဢွၼ်ၵၼ်ၸုၵ်းယူႇၵႃႈၼိူဝ်တီႈဢၼ်သုင်သေလႄႈ သုတ်ႇလူမ်းမိူၼ်ၸိူဝ်ႉၼင်ႇ မႃလိၼ်ၼၼ်ႉလႄႈ မၢၵ်ႇတႃၶဝ်လူႉၵႂႃႇၵွပ်ႈပိူဝ်ႈဢၼ်ဢမ်ႇမီးတူၼ်ႈယိူဝ်ႈတူၼ်ႈယႃႈၼၼ်ႉဢေႃႈ။
၇ ထႃႇဝရႃႉၽြႃးတီႈၶႃႈ။ပိၵ်ႉသမ်ႉဢပျႅတ်ႈၶႃႈၸဝ်ႈႁဝ်းၶဝ်ၶၢမ်ႇသၢၵ်ႈသေႇ ယူႇၽၢႆႇၼိုင်ႈတင်းၶႃႈၸဝ်ႈႁဝ်းၶဝ်သေၵေႃႈ ၶႅၼ်းတေႃႈထွၵ်ႈလူၺ်ႈၼႃႇမႃႉၸိုဝ်သဵင်ၸဝ်ႈႁဝ်းသေလႄႈၸီႇယၢင်ႇသေၵမ်းတီႈၶႃႈ။တၢင်းဢၼ်ၶႃႈၸဝ်ႈႁဝ်းၶဝ် ၽွၵ်ႈပျၢၼ်ႇၶိုၼ်းၵႂႃႇၼၼ်ႉပဵၼ်ဢၼ်ၼမ်ၼႃႇလူင်လၢင်လႄႈ ၶႃႈၸဝ်ႈႁဝ်းၶဝ်ဢွၼ် ၵၼ်ၽိတ်းပိူင်ႈၸဝ်ႈၸဝ်ႈႁဝ်းတီႈၶႃႈယဝ်ႉ။
၈ ၸဝ်ႈဢၼ်ပဵၼ်လွင်ႈဢၼ်မဵဝ်းဢိသရေႇလလီမုင်ႈမွင်း ၸဝ်ဢၼ်ၵႄႇသႄႇၶျွတ်ႈဢဝ် ၼႂ်းၶိင်ႇမိူဝ်ႈဢၼ်ၽေးႁွတ်ႈထိုင်ၼၼ်ႉတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပဵၼ်ၸိူဝ်ႉၼင်ႇၶႅၵ်ႇၵႃႈၼႂ်းမိူင်းၸဝ်ႈ ဢိၵ်ႇတင်းၸိူဝ်ႉၼင်ႇၵေႃႉ ဢၼ်ၵွႃႇတၢင်းပႆတၢင်း ဢၼ်ၶဝ်ႈႁႂ်ႈလႆႈႁဵတ်းသုမ်ႉထဵင်ၶိုၼ်းလဵဝ်ၵူၺ်းၼၼ်ႉ ၼင်ႇႁိုဝ်တီႈၶႃႈ။
၉ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းပဵၼ်ၸိူဝ်ႉၼင်ႇၵေႃႉဢၼ်ႁိူဝ်ႉဢူၼ်ႈလိုမ်းတူဝ် ဢိၵ်ႇတင်းၸိူဝ်ႉၼင်ႇၵူၼ်းသိုၵ်းဢၼ်ႁႅင်းယႂ်ႇၼႃႇလႄႈ ဢမ်ႇတတ်ႈၼိုင်ႇႁႂ်ႈလႆႈၵႄႇသႄႇဢဝ်လွတ်ႈၼၼ်ႉၼင်ႇႁိုဝ်တီႈၶႃႈ။ထႃႇဝရႃႉၽြႃးတီႈၶႃႈ။ ၸဝ်ႈႁဝ်းၸိုင်မီးယူႇၵႃႈၼႂ်းၶႃႈၸဝ်ႈႁဝ်းၶဝ်တီႈၶႃႈဢေႃႈ။ ၶႃႈၸဝ်ႈႁဝ်းၶဝ်ၼႆႉပဵၼ်ၵေႃႉဢၼ်လႆႈၶၢမ်ႇ တၢင်းဢၼ်ႁွင်ႉႁိၵ်ႈလူၺ်ႈၼႃႇမႃႉၸိုဝ်သဵင်ၸဝ်ႈႁဝ်းတီႈၶႃႈဢေႃႈ။ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။
၁၀ ထႃႇဝရႃႉၽြႃးဢဝ်လွင်ႈၵူၼ်းမဵဝ်းၼႆႉလႄႈ မီးဢမိင်ႉၸမ်း၊-ၶဝ်ဢွၼ်ၵၼ်မီးဢလူဝ်ႇၶႂ်ႈလႄႇၶႂ်ႈလၢဝ်းယူႇၼႃႇလူင်လၢင်ဢေႃႈ။ၶဝ်ဢမ်ႇဢွၼ်ၵၼ်ၶျုၵ်ႈဝႆႉတိၼ်ၶဝ်လႆႈ။ပိူဝ်ႈၼႆလႄႈထႃႇဝရႃႉၽြႃးဢမ်ႇထုၵ်ႇၸႂ်ၵျိူၵ်ႈၸႂ်။မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းတုၸရိူၵ်ႈဢၼ်ၶဝ်ႁဵတ်းၼၼ်ႉလႄႈၸႅတ်ႈထၢမ်ၶဝ်ၵွပ်ႈပိူဝ်ႈ ဢပျႅတ်ၶဝ်ဢေႃႈ။
၁၁ ထႃႇဝရႃႉၽြႃးမီးဢမိင်ႉတီႈၵဝ်ၸမ်း၊- ယႃႇပေသူးတွင်းယွၼ်းဢဝ်ဢၼ်လီဢၼ်ငၢမ်းပုၼ်ႈၵူၼ်းမဵဝ်းၼႆႉ။ယၢမ်းမိူဝ်ႈဢၼ်ၶဝ်ၵမ်တၢင်းၵိၼ်ၼၼ်ႉ ၵဝ်တၵ်းဢမ်ႇထွမ်ႇဢမ်ႇငိၼ်းသဵင်ဢၼ် ၶဝ်ႁွင်ႉသႅၼ်ႇၼၼ်ႉ။
၁၂ ယၢမ်းမိူဝ်ႈဢၼ်ၶဝ်သၢၵ်ႈၵၢပ်ႈယိၸ်ႉဢၼ်တုတ်ႇၽႆး ဢိၵ်ႇတင်းၶိူင်ႈပုၵ်ႉၸေႃႇၼၼ်ႉၵေႃႈၵဝ်တၵ်းဢမ်ႇႁပ်ႉဢမ်ႇတုင်းဢဝ်။ၵဝ်တၵ်းႁႂ်ႈၶဝ်သုမ်းၸွမ်းလူၺ်ႈၽေးလၢပ်ႇၽေးတၢင်းဢၼ်ဢိုပ်းယၢၵ်ႈၽေးၵႃႇလႃႉႁႃႇလႅင်ႉမိူင်းဢေႃႈ၊ ဝႃႈၼင်ႇၼႆသေယဝ်ႉ၊ၵဝ်ၵေႃႈလၢတ်ႈလႄႈဝႃႈ၊-
၁၃ ၸဝ်ႈထႃႇဝရႃႉၽြႃးတီႈၶႃႈ။တူၺ်းလူ။ပရေႃးၽိတ်ႈတင်းလၢႆဢွၼ်ၵၼ်ႁေႃးလၢတ်ႈတီႈၶဝ်ၼႆႉလႄႈဝႃႈ သူဢမ်ႇလႆႈထူပ်းၽေးလၢပ်ႇၽေးလႅဝ်း။သူဢမ်ႇလႆႈမီးၽေးတၢင်းဢၼ်ဢိုပ်းယၢၵ်ႈ။ၵဝ်တၵ်းပၼ်တၢင်းၼိမ်ဢၼ်မၼ်ႈဢၼ်ၶိူင်ႇၵႃႈတီႈၼႆႉဢေႃႈ၊ ဝႃႈၼင်ႇၼႆတီႈၶႃႈယဝ်ႉ၊ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉတီႈၵဝ်လႄႈ ဝႃႈ၊-
၁၄ ပရေႃးၽိတ်ႈၸိူဝ်းၼၼ်ႉဢွၼ်ၵၼ်ဢိင်ၼႃႇမႃႉၸိုဝ်သဵင်ၵဝ်သေလႄႈႁေႃးလၢတ်ႈမူႉသႃႇဢေႃႈ။ၵဝ်ဢမ်ႇပွႆႇၸႂ်ႉၶဝ်။ ၵဝ်ဢမ်ႇသင်ႇလၢတ်ႈဝႆႉတီႈၶဝ်။ ၵဝ်ဢမ်ႇပၼ်ပျႃႇတိၵ်ႈတီႈၶဝ်။ၶဝ်ဢဝ်တၢင်းဢၼ်ပႅတ်ႉတႃလႅၼ်တႃ၊တၢင်းဢၼ်ၽီၶဝ်ႈ၊ တၢင်းဢၼ်ၵျၢမ်ႇပွင်ဢၼ်လၢႆလၢႆ ဢမ်ႇပွင်ႇလွင်ႈၵႃႈသင်၊တၢင်းဢၼ်ပႅတ်ႉလႅၼ်ၸွမ်းလူၺ်ႈၺၢၼ်ႇၶဝ်လွၼ်ႉလွၼ်ႉသေ လႄႈႁေႃးလၢတ်ႈဢေႃႈ။
၁၅ ပိူဝ်ႈၼႆလႄႈထႃႇဝရႃႉၽြႃးဢဝ်လွင်ႈပရေႃးၽိတ်ႈ ဢၼ်ဢိင်ၼႃႇမႃႉၸိုဝ်သဵင်ၵဝ်သေလႄႈ ႁေႃးလၢတ်ႈဢၼ်ၵဝ်ယင်းဢမ်ႇပွႆႇဢမ်ႇၸႂ်ႉၶဝ်လႄႈ ၶဝ်လၢတ်ႈလႄႈ ဝႃႈၵႃႈတီႈမိူင်းၼႆႉဢမ်ႇလႆႈမီးၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈဝႃႈၼင်ႇၼႆၸိူဝ်းၼၼ်ႉလႄႈ ၽြႃးပဵၼ်ၸဝ်ႈမီးဢမိင်ႉၸမ်း၊-ပရေႃးၽိတ်ႈၸိူဝ်းၼၼ်ႉတၵ်းသုမ်းၸွမ်းလူၺ်ႈၽေးလၢပ်ႇၽေးလႅဝ်း ၽေးတၢင်း ဢၼ်ဢိုပ်းဢၼ်ယၢၵ်ႈဢေႃႈ။
၁၆ ၵူၼ်းတင်းလၢႆဢၼ်လႆႈထွမ်ႇဢဝ် ဢၼ်ပရေႃးၽိတ်ႈႁေႃးလၢတ်ႈၼၼ်ႉတၵ်းလႆႈၶၢမ်ႇတၢင်းဢၼ် ထႅမ်ႈတူၵ်းၵႃႈၼႂ်းသဵၼ်ႈတၢင်းဝဵင်းယေႇရုသလႅမ်ႇ ၵွပ်ႈပိူဝ်ႈၽေးဢၼ်ဢိုပ်းဢၼ်ယၢၵ်ႈ၊ ၽေးလၢပ်ႇၽေးလႅဝ်းၼၼ်ႉသေလႄႈၽူႈ လႂ်သေၵေႃႉ ဢမ်ႇလႆႈသၢင်းၵျူဝ်ႇၸႃႉၸဵမ်တူဝ်ၶဝ်ၼၼ်ႉလႄႈ မေးၶဝ် လုၵ်ႈၸၢႆးလုၵ်ႈယိင်းၶဝ် ၸိူဝ်းၼၼ်ႉ။ၵဝ်တၵ်းဢဝ်ဢပျႅတ်ႈၶဝ်ထွၵ်ႇႁိုဝ်ႈသႂ်ႇၵႃႈၼိူဝ် ၶဝ်ဢေႃႈ။
၁၇ ၵႂၢမ်းဢၼ်မႂ်းတၵ်းလႆႈလၢတ်ႈတီႈၶဝ်ၸမ်း၊-ႁႂ်ႈမၢၵ်ႇတႃၵဝ်ၼႆႉပဵၼ်ၼမ်ႉလႆတူၵ်းယူႇတင်းဝၼ်းတင်းၶိုၼ်းသေၵမ်းလူၺ်ႈ။ ယႃႇႁႂ်ႈထၢတ်ႇသေၵမ်း။ လုၵ်ႈယိင်းသၢဝ်ၵူၼ်းမဵဝ်းၵဝ်ၼႆႉၼၼ်ႉလႆႈၶၢမ်ႇတၢင်းဢၼ်လုပ်ႇမၼ်းႁၵ်းၵႂႃႇလူၺ်ႈတၢင်းၸဵပ်း ဢၼ်ႁႅင်းၼႃႇလူင်လၢင်ၼၼ်ႉယဝ်ႉ။
၁၈ ယၢမ်းမိူဝ်ႈဢၼ်ၵဝ်ၵႂႃႇၵႃႈတီႈၼွၵ်ႈတီႈပၢင်ႇၼၼ်ႉၸိုင် ၵဝ်လႆႈထူပ်းႁၼ်တူဝ်တၢႆ ဢၼ်တၢႆလူၺ်ႈလၢပ်ႇလူၺ်ႈလႅဝ်းၼၼ်ႉလႄႈ ယၢမ်းမိူဝ်ႈဢၼ်ၵဝ်ၶဝ်ႈၵႃႈၼႂ်းဝဵင်းၼၼ်ႉၸိုင်ၵဝ်လႆႈထူပ်းႁၼ် ၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်လူၺ်ႈတၢင်းဢၼ်ဢိုပ်းဢၼ်ယၢၵ်ႈၼၼ်ႉဢေႃႈ။ပရေႃးၽိတ်ႈ ဢိၵ်ႇတင်း ပရေႃးႁိၵ်ႈတင်းလၢႆယင်းဢမ်ႇႁူႉ ၵႃႈသင်လႃးလႃးလႄႈ ဢွၼ်ၵၼ်လႄႇလၢဝ်းၵႂႃႇၵူႈတီႈၵူႈလႅၼ်ဢေႃႈ။
၁၉ ၸဝ်ႈႁဝ်းတွပ်ႇပႅတ်ႈထဵင်ပႅတ်ႈမိူင်းယုတ တင်းသဵင်ႈတင်းမူတ်းယဝ်ႉတီႈၶႃႈႁိုဝ်။ႁူဝ်ၸႂ်ၸဝ်ႈႁဝ်း လီႁင်ႈဢဵတ်ႇသဵတ်ႇဝဵင်းၸိဢုၼ်ႇတီႈၶႃႈႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပၼ်တၢမ်ႇတီႈၶႃႈၸဝ်ႈႁဝ်းၶဝ်ႁႂ်ႈထၼ်ႈပေႃးဢမ်ႇလႆႈသၢၵ်ႈသႃႇၶႅၼ်းမႃးၼင်ႇႁိုဝ်တီႈၶႃႈ။ပိၵ်ႉသမ်ႉၶႃႈၸဝ်ႈႁဝ်းၶဝ်မုင်ႈမွင်းတၢင်းဢၼ်ၼိမ်ဢၼ်လီသေၵေႃႈ ဢမ်ႇလႆႈထၢင်းဢၼ်လီဢၼ်ငၢမ်းတီႈၶႃႈ။ပိၵ်ႉသမ်ႉမုင်ႈမွင်းၵတ်းယဵၼ်ၶျၢမ်းသႃႇသေၵေႃႈလႆႈဢွၼ်ၵၼ်ထူပ်းၽေးဢူးပၢတ်ႈၵူၺ်းတီႈၶႃႈဢေႃႈ။
၂၀ ထႃႇဝရႃႉၽြႃးတီႈၶႃႈ။ၶႃႈၸဝ်ႈႁဝ်းၶဝ်ႁူႉတုၸရိူၵ်ႈၶႃႈၸဝ်ႈႁဝ်းၶဝ်ဢိၵ်ႇတင်း ဢပျႅတ်ႈပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉယူႇ ဢမၢၼ်ႇၶၢၼ်ပဵၼ်တီႈၶႃႈဢေႃႈ။ၶႃႈၸဝ်ႈႁဝ်းၶဝ် ၽိတ်းပိူင်ႈၸဝ်ႈႁဝ်းယဝ်ႉတီႈၶႃႈယဝ်ႉ။
၂၁ ၵွပ်ႈပိူဝ်ႈၼႃႇမႃႉၸိုဝ်သဵင်ၸဝ်ႈႁဝ်းလႄႈ ယႃႇပလေီႁင်ႈဢဵတ်ႇသဵတ်ႇၶႃႈၸဝ်ႈႁဝ်းၶဝ်သေၵမ်းတီႈၶႃႈ။ယႃႇပေၶျႃးသရေႇပလၢင်ႇ မုၼ်ၽုင်းၸဝ်ႈႁဝ်းတူၵ်းတီႈတႅမ်ႇသေၵမ်းတီႈၶႃႈ။ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းသေၵမ်းတီႈၶႃႈ။ၶႅၼ်းတေႃႈယႃႇပယေႃႉပတိၺိၼ်ႇၸဝ်ႈႁဝ်း ဢၼ်ႁဵတ်းလူၺ်ႈၵၼ်တင်းၶႃႈၸဝ်ႈ ႁဝ်းၶဝ်ၼၼ်ႉပႅတ်ႈသေၵမ်းတီႈၶႃႈ။
၂၂ ၼႂ်းၶိူင်ႈပိူင်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢၼ်ၵူၼ်းသႃႇသၼႃႇပႃႉတင်းလၢႆၵူဝ်းၵႂၢႆႇၸိူဝ်းၼၼ်ႉ မီးဢၼ်ႁႂ်ႈၽူၼ်တူၵ်းလႆႈႁိုဝ်။ၾႃႉၵၢင်ႁၢဝ်ယူႇဢလူဝ်ႇလူဝ်ႇလႄႈယွတ်ႇၼမ်ႉၽူၼ်တူၵ်းလႆႈႁိုဝ်။ ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈတီႈၶႃႈ။ပဵၼ်ၸဝ်ႈႁဝ်းၵူၺ်းဢမ်ႇၸႂ်ႈတီႈၶႃႈႁိုဝ်။ပိူဝ်ႈၼႆလႄႈၶႃႈၸဝ်ႈႁဝ်းၶဝ်တၵ်းမုင်ႈမွင်းၸဝ်ႈယူႇတီႈၶႃႈဢေႃႈ။ၸဝ်ႈႁဝ်းႁဵတ်းပဵၼ်လွင်ႈတၢင်းၸိူဝ်းၼႆႉၵူႈၸိူဝ်ႉၵူႈပိူင်တီႈၶႃႈဢေႃႈ။