၂၁
ၽြႃးပဵၼ်ၸဝ်ႈထဵင်ပႅတ်ႈၵႂၢမ်းၸေႇတၵိ
၁ ၼုၵ်ႉၵပၢတ်ႈထႃႇဝရႃႉၽြႃးဢၼ်ႁွတ်ႈမႃးတီႈ ယေႇရမိၼႂ်းမိူဝ်ႈဢၼ်ၶုၼ်လူင်ၸေႇတၵိ ပွႆႇၸႂ်ႉပႃႇသုရလုၵ်ႈၸၢႆးမေႇလၶိ ဢိၵ်ႇတင်းၸေႇၽၼိလုၵ်ႈၸၢႆးယိတ်ႉပရေႃးႁိၵ်ႈမႃႇသေႇယ ၵႂႃႇၸူးၵႃႈတီႈမၼ်းလႄႈဝႃႈ၊-ၶႅၼ်းတေႃႈတွင်းပၢၼ်ႇတီႈ ထႃႇဝရႃႉၽြႃးပုၼ်ႈႁဝ်းၵွပ်ႈပိူဝ်ႈဢၼ် ၼေႇပုၶတ်ႉၼေႇၸႃႇ ၶုၼ်ႁေႃၶမ်း ပႃႇပုလုၼ်ႇ တိုၵ်းတေႃးႁဝ်းၼၼ်ႉသေၵမ်း။
၂ ထႃႇဝရႃႉၽြႃး ၸၢင်ႈၶေးၶိုၼ်းႁဵတ်းၸွမ်း ၵႃႈၼင်ႇဢၼ်မၼ်းၸဝ်ႈႁဵတ်းလွင်ႈတၢင်းဢၼ်လီဢၢမ်းၸိူဝ်းၼၼ်ႉတီႈႁဝ်း ႁႂ်ႈမၼ်းလႆႈၶိုၼ်းမိူဝ်းၵႂႃႇသေ ၵႃႈတီႈႁဝ်းဢေႃႈဝႃႈၼင်ႇၼႆဢေႃႈ။
၃ မိူဝ်ႈၼၼ်ႉယေႇရမိသင်ႇလၢတ်ႈဝႆႉတီႈၶဝ်လႄႈဝႃႈ၊-လွင်ႈဢၼ်သူတၵ်းလႆႈၶိုၼ်းလၢတ်ႈတီႈၶုၼ်လူင် ၸေႇတၵိၸမ်း၊-
၄ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈ၊- တူၺ်းလူ။ၵဝ်တၵ်းႁႂ်ႈလၢၵ်ႈၼၢၵ်ႈ ဢၼ်မိုဝ်းသူယိပ်းၵမ်သေလႄႈ တိုၵ်းတေႃးၶုၼ်ႁေႃၶမ်းပႃႇပုလုၼ်ႇဢိၵ်ႇတင်း ၵူၼ်းမဵဝ်းၶႃႇလတေႇ ဢၼ်တင်ႈတပ်ႉလွမ်ႉႁွပ်ႈယူႇၵႃႈတီႈၼွၵ်ႈဝဵင်းၸိူဝ်းၼၼ်ႉဝႄႈၵႂႃႇပိူင်ႈၵႂႃႇဢေႃႈ။ၵဝ်တၵ်းႁႂ်ႈၶဝ် ၼၼ်ႉၸူႉၵၼ်တုမ်ၵၼ်ၵႃႈၼႂ်းဝဵင်းၼႆႉဢေႃႈ။
၅ ၵဝ်ၼႆႉတၵ်းဢဝ်မိုဝ်းဢၼ်ႁႅင်းယႂ်ႇၼႃႇ၊ တၢင်းၸႂ်မႆႈၶႆႈၸႃႉ၊ဢၢႆႁႅင်းတေႃးသႃႉတၢင်းၶႆႈၸႃႉၶႆႈၸိတ်ႈ ဢၼ်ဢွၵ်ႇ ႁႅင်းယႂ်ႇၼႃႇၼၼ်ႉတိုၵ်းတေႃးသူဢေႃႈ။
၆ ၵဝ်တၵ်းပၼ်တၢမ်ႇတီႈၶဝ်ၸိူဝ်းဢၼ် ယူႇၵႃႈတီႈဝဵင်းၼႆႉဢၼ်ဝႃႈၵူၼ်းသတ်ႉတဝႃႇဢိၵ်ႇတင်း တရိၵ်ႈသၢၼ်ႇတင်းလၢႆလႄႈ ၶဝ်တၵ်းဢွၼ်ၵၼ်တၢႆလူၺ်ႈၵႃႇလႃႉႁႃႇလႅင်ႉ မိူင်းဢၼ်ႁႅင်းယႂ်ႇၼႃႇဢေႃႈ။
၇ ထႃႇဝရႃႉၽြႃးမီးဢမိင်ႉၸမ်း၊-လိုၼ်းၼၼ်ႉၵဝ်တၵ်းဢဝ်ၸႃႉၸဵမ် ၸေႇတၵိၶုၼ်ႁေႃၶမ်းယုတလႄႈၶႃႈမၼ်းတင်းလၢႆ ၵူၼ်းဝဵင်းတင်းလၢႆဢၼ်ဝႃႈ ၶဝ်ၸိူဝ်းဢၼ်လွတ်ႈၽေးတၢင်းၶႆႈတၢင်းပဵၼ်၊ၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈလႄႈ ၵိုတ်းၵျၢၼ်ႇဝႆႉၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇ ဢိၵ်ႇတင်းရၢၼ်ႇသူႇၶဝ်တင်းလၢႆတင်းၶဝ်ၸိူဝ်းဢၼ်ႁႃဢဝ်ဢသၢၵ်ႈၶဝ်ၼၼ်ႉလႄႈ ၶုၼ်ၼၼ်ႉယင်းဢမ်ႇသေလၢႆ ဢမ်ႇမီးၵရူႉၼႃႇတၢင်းဢၼ်ဢိတ်းလူဢမ်ႇႁၵ်ႉဢမ်ႇႁူမ်လႄႈတၵ်းၶႃႈၽၼ်းၶဝ်ပႅတ်ႈလူၺ်ႈၶူမ်း လၢပ်ႇၶူမ်းလႅဝ်းဢေႃႈ၊ဝႃႈၼင်ႇၼႆဢေႃႈ။
၈ မႂ်းတၵ်းလႆႈသင်ႇလၢတ်ႈ တီႈၵူၼ်းတင်းလၢႆၼႆႉလႄႈဝႃႈထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။ၵဝ်ၽုၺ်ႇသဵၼ်ႈတၢင်းဢၼ်ဢသၢၵ်ႈလိပ်း၊ သဵၼ်ႈတၢင်းဢၼ် တၢႆဝႆႉၵႃႈတီႈၽၢႆႇၼႃႈမႂ်းဢေႃႈ။
၉ ၵေႃႉဢၼ်ယူႇၵႃႈၼႂ်းဝဵင်းၼႆႉၼၼ်ႉ တၵ်းလႆႈတၢႆလူၺ်ႈ ၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႇလႅင်ႉမိူင်းဢေႃႈ။ၵေႃႉဢၼ်ဢွၵ်ႇၵႃႈတီႈၼွၵ်ႈဝဵင်းလႄႈၶဝ်ႈယူႇၽၢႆႇၵူၼ်းၶႃႇလတေႇ ဢၼ်တင်ႈတပ်ႉလွမ်ႉႁွပ်ႈသူယူႇၸိူဝ်းၼၼ်ႉဢသၢၵ်ႈတၵ်းလႆႈၵတ်းယဵၼ်ၶျၢမ်းသႃႇလႄႈတၵ်းလႆႈဢသၢၵ်ႈတူဝ်ၸဝ်ႈၵဝ်မိူၼ်ၸိူဝ်ႉၼင်ႇဢုၵ်ႉၸႃႇဢၼ်ႁိမ်ဢဝ်လႆႈ ၼၼ်ႉဢေႃႈ။
၁၀ ထႃႇဝရႃႉၽြႃးမီးဢမိင်ႉၸမ်း၊- ၵဝ်ဝၢႆႇၼႃႈတေႃႇဝဵင်းၼႆႉႁႂ်ႈဢမ်ႇလႆႈႁဵတ်းၵျေးၸူး၊ ႁႂ်ႈလႆႈႁဵတ်းဢပျႅတ်ႈၵူၺ်းလႄႈ ဝဵင်းၼႆႉတၵ်းလႆႈၶၢမ်ႇတၢင်းဢၼ်ဢၢပ်ႈပၼ်ၵႃႈၼႂ်းမိုဝ်းၶုၼ် ႁေႃၶမ်းပႃႇပုလုၼ်ႇလႄႈ မၼ်းၼၼ်ႉတၵ်းဢဝ်ၽႆးတုတ်ႇပႅတ်ႈဢေႃႈ။
၁၁ ဢွၼ်ၵၼ် ထွမ်ႇငိၼ်းၵႂၢမ်းဢၼ်ထႃႇဝရႃႉၽြႃးဢဝ်လွင်ႈမဵဝ်းၶုၼ်ႁေႃၶမ်းယုတလႄႈမီးဢမိင်ႉဝႆႉၼႆႉတႃႉ။ မဵဝ်းၶုၼ်လူင်တႃႇဝိတ်ႉဢိူၺ်း။ထႃႇဝရႃႉၽြႃးမီးဢမိင်ႉၸမ်း၊-
၁၂ ဢွၼ်ၵၼ်ၸီႇယၢင်ႇၸွမ်းၼင်ႇတြႃးၸႃႉၸဵမ်ၶိင်ႇၵၢင်ၼႂ်လႄႈၵႄႇသႄႇၼုၵ်ႈဢဝ်ၵေႃႉဢၼ်လႆႈၶၢမ်ႇတၢင်းဢၼ်ႁိမ်ဢဝ်ႁူင်ႇဢဝ်ၼၼ်ႉဢွၵ်ႇသေ ၵႃႈၼႂ်းမိုဝ်း ၵေႃႉဢၼ်ၼိၵ်ႈၸၢၵ်ႈငႅၼ်းသေးၼၼ်ႉတႃႉ။ပေႃးဢမ်ႇၼၼ်ႉ ဢၢႆႁႅင်းတၢင်းၸႂ်မႆႈၶႆႈၸႃႉၵဝ်တၵ်းဢွၵ်ႇပဵၼ် ၸိူဝ်ႉၼင်ႇၽႆးလႄႈမႆႈယူႇႁႂ်ႈၽူႈ လႂ်ထၼ်ႈပေႃးဢမ်ႇမွတ်ႇလႆႈ ၵွပ်ႈပိူဝ်ႈတုၸရိူၵ်ႈဢပျႅတ်ႈဢၼ် သူႁဵတ်းၼၼ်ႉဢေႃႈ။
၁၃ ထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။ၵေႃႉဢၼ်ယူႇၵႃႈတီႈ ပၢင်ႇႁူၺ်ႈၶူင်ႈႁူၺ်ႈဢိူၺ်း။မၢၵ်ႇႁိၼ်ဢမ်မီးၵႃႈၼႂ်းတီႈပၢင်ႇတီႈပဵင်းဢိူၺ်း။ၵဝ်ယူႇၽၢႆႇၼိုင်ႈတင်းမႂ်းဢေႃႈ၊သူဢၼ်ၸၢင်ႊလၢတ်ႈလႄႈဝႃႈၽူႈ လႂ်တၵ်းၶီႇသိုၵ်းၸူးႁဝ်းလႆႈ။ၽူႈ လႂ်တၵ်းၶဝ်ႈၵႃႈၼႂ်းတီႈယူႇတီႈသဝ်းလႆႈ ဝႃႈၼင်ႇၼႆ ၼၼ်ႉၶဝ်ဢိူၺ်း။
၁၄ ၵဝ်တၵ်းပၼ်တၢမ်ႇဢပျႅတ်ႈတီႈသူၸွမ်းၵႃႈၼင်ႇဢၼ် ဢၵျူဝ်းတၢင်းၵမ်တၢင်းၵျၢင်ႉသူမီးၼၼ်ႉဢေႃႈ။ၵဝ်တၵ်းဢဝ်ၽႆးတုတ်ႇၵႃႈၼႂ်းထိူၼ်ႇပႃႇမႆႉၸိင်မၼ်းလႄႈ ၽႆးၼၼ်ႉတၵ်းမႆႈၵႃႈဢၼ်မီးၵႃႈတီႈလဵပ်ႈႁွပ်ႈမၼ်းၸိူဝ်းၼၼ်ႉဢေႃႈ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။