၄၄
ၵွပ်ႈရူၵ်ႉထူႉသၢင်းထူႉလႄႈလႆႈလူႉသုမ်း
၁ ၼုၵ်ႈၵပၢတ်ႈၸဝ်ႈဢၼ်ဢဝ်လွင်ႈၵူၼ်း ယုတ ၵႃႈဢၼ်ယူႇၵႃႈၼႂ်းမိူင်းဢေႇၵႅပ်ႉတု၊ ၵႃႈတီႈဝဵင်းမိၵတေႃႇလ၊ဝဵင်းတႃႇပၼိတ်ႉ၊ဝဵင်းၼေႃႇၽ ဢိၵ်ႇတင်းၵႃႈၼႂ်းမိူင်း ပႃႇသရု ၸိူဝ်းၼၼ်ႉလႄႈႁွတ်ႈမႃးတီႈယေႇရမိ ၼၼ်ႉၸမ်း၊-
၂ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈ၊-သူဢွၼ်ၵၼ်ႁၼ်ၽေးတၢမ်ႇ ၵႃႈဢၼ်ၵဝ်ႁႂ်ႈႁွတ်ႈထိုင်ၵႃႈၼိူဝ်ဝဵင်းယေႇရုသလႅမ်ႇ ဢိၵ်ႇတင်းဝၢၼ်ႈဝဵင်းယုတ တင်းသဵင်ႈတင်းလူင်ၼၼ်ႉယဝ်ႉယဝ်ႉ။တူၺ်းလူ။ဝၼ်းမိူဝ်ႈၼႆႉဝၢၼ်းဝဵင်းၸိူဝ်းၼၼ်ႉ ပဵၼ်တီႈဢၼ်ပဝ်ႇဢၼ်လၢပ်ႈ ၵႂႃႇလႄႈဢမ်ႇမီးၵေႃႉဢၼ်ယူႇဢၼ်သဝ်း။
၃ ၵွပ်ႈပိူဝ်ႈတုၸရိူၵ်ႈ ဢၼ်ၶဝ်မိူဝ်ႈဢွၼ်တၢင်းၼၼ်ႉ ဢွၼ်ၵၼ်ႁဵတ်းႁႂ်ႈလႆႈတိုၵ်းယူင်း တၢင်းၸႂ်မႆႈၶႆႈၸႃႉၵဝ်ၼႂ်းလွင်ႈဢၼ်ၶဝ်ၵႂႃႇဢဝ်ၼၢမ်ႇသႃႇတုတ်ႇၽႆးလႄႈ ႁဵတ်းဝတ်ႈတီႈၽြႃးတၢင်ႇသူႇတၢင်ႇပႃးဢၼ်ၶဝ်ဢမ်ႇႁူႉ။ဢၼ်သူဢိၵ်ႇတင်းပူႇသူမွၼ်ႇသူ ဢမ်ႇႁူႉၼၼ်ႉဢေႃႈ။
၄ ပိၵ်ႉသမ်ႉၵဝ်လုၵ်ႉၸဝ်ႉၸဝ်ႉလႄႈ ပွႆႇၸႂ်ႉၶႃႈၵဝ်ပရေႃးၽိတ်ႈတင်းသဵင်ႈတင်းလူင် ၸူးတီႈသူၶိူဝ်းၶိူဝ်းယႂ်းယႂ်းယူႇသေလႄႈလၢတ်ႈဝႃႈ၊-ယႃႇပေႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ၵဝ်ၸင်းၼႆႉဝႃႈၼင်ႇၼႆသေၵေႃႈ၊
၅ ၶဝ်ၼၼ်ႉယင်းဢမ်ႇထွမ်ႇဢမ်ႇဢဝ်၊ယင်းဢမ်ႇဝၢႆႇႁူႁႄႈႁူၸူးႁႂ်ႈလႆႈဝႄႈပႅတ်ႈ တုၸရိူၵ်ႈဢပျႅတ်ႈၶဝ်လႄႈ ဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူႇတၢင်ႇပႃးၼၼ်ႉလႄႈယူႇဢေႃႈ။
၆ ပိူဝ်ႈဢၼ်ပဵၼ်ၼင်ႇၼၼ်လႄႈ တၢင်းၶႂ်ႈၸႃႉၶႂ်ႈၸိတ်ႈၵဝ်ဢိၵ်ႇတင်း ဢၢႆႁႅင်းတေႃးသႃႉတၢင်းၸႂ်မႆႈၵဝ်လႆႈမီးတၢင်းဢၼ်တူၵ်းလူင်းလႄႈ ဢဝ်ၽႆးတုတ်ႇၵႃႈၼႂ်းဝၢၼ်ႈဝဵင်း ယုတ တင်းလၢႆဢိၵ်ႇတင်း ၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ ၸိူဝ်းၼၼ်ႉလႄႈၶဝ်ၼၼ်ႉလႆႈပဵၼ်တီႈဢၼ်ၽဵဝ်ႈပႅတ်ႈလႄႈ ပဝ်ႇလၢပ်ႈဝႆႉၸိူဝ်ႉၼင်ႇဢၼ်ပဵၼ်ဝၼ်းမိူဝ်ႈၼႆႉၼၼ်ႉဢေႃႈ။
၇ မိူဝ်ႈလဵဝ်ၼႆႉၸိုင် ထႃႇဝရႃႉၽြႃးၽြႃးပဵၼ်ၸဝ်ႈပူဝ်ႇပႃႇၵၢင်ႁၢဝ်ၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉၸမ်းၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူႁဵတ်းတုၸရိူၵ်ႈဢၼ်ယႂ်ႇၼႃႇယူႇၽၢႆႇၼိုင်ႈတင်းၸႂ်ဝိၺိၺ်ႇသူႇႁႂ်ႈလႆႈပႄႇတႅပ်းပႅတ်ႈၵူၼ်းၸၢႆး၊ ၵူၼ်းယိင်း၊ လုၵ်ႈဢွၼ်ႇၵေႃႉဢၼ်ၵိၼ်ၼူမ်းတင်းလၢႆသေ ၵႃႈတီႈမိူင်းယုတထၼ်ႈပေႃးဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်း၊ ၼႂ်းလွင်ႈဢၼ်သူဢဝ်လွင်ႈတၢင်းဢၼ် မိုဝ်းသူႁဵတ်းယူႇ ၼၼ်ႉလႄႈ
၈ ဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူႇတၢင်ႇပႃးတင်းလၢႆၵႃႈၼႂ်းမိူင်း ဢေႇၵႅပ်ႉတု တီႈဢၼ်သူၵႂႃႇ ႁႂ်ႈလႆႈသွၼ်ႈပိုင်ႈယူႇၼၼ်ႉသူလႆႈၶၢမ်ႇတၢင်းဢၼ်ပႄႇတႅပ်းပႅတ်ႈ ဢိၵ်ႇတင်းႁႂ်ႈသူလႆႈပဵၼ်တီႈဢၼ်သေႉသွမ်း၊တီႈဢၼ်ၵိၼ်ႇလႃႇၵႃႈ ၼႂ်းၵူၼ်းၵူႈၸိူဝ်ႉၵူႈမဵဝ်းၵႃႈၼိူဝ်လိၼ်မိူင်းၼၼ်ႉသေလႄႈ
၉ တိုၵ်း ယူင်းတၢင်းၸႂ်မႆႈၶႂ်ႈၸႃႉၵဝ်ၼၼ်ႉၼင်ႇႁိုဝ်။သူလူင်လိုမ်းတုၸရိူၵ်ႈပူႇသူမွၼ်ႇသူ၊ တုၸရိူၵ်ႈၶုၼ်ႁေႃၶမ်းယုတတင်းလၢႆ၊တုၸရိူၵ်ႈၼၢင်းႁေႃၶမ်းတင်းလၢႆ၊ တုၸရိူၵ်ႈတူဝ်သူတုၸရိူၵ်ႈမေးသူ ဢၼ်ၶဝ်ႁဵတ်းၵႃႈၼႂ်းမိူင်းယုတဢိၵ်ႇတင်း ၵႃႈၼႂ်းသဵၼ်ႈတၢင်းဝဵင်းယေႇရုသ လႅမ်ႇၸိူဝ်းၼၼ်ႉယဝ်ႉႁိုဝ်။
၁၀ ၶဝ်ၼၼ်ႉဢမ်ႇမီးၸႂ်ဢၼ်ၶျႃးတႅမ်ႇတေႃႇထိုင်ႁွတ်ႈဝၼ်းမိူဝ်ႈၼႆႉ။ဢမ်ႇမီးၸႂ်ဢၼ်ၵူဝ်ဢၼ်ႁႄ၊ဢမ်ႇၸွမ်းသဵၼ်ႈတၢင်းတြႃးၵဝ်။ ဢမ်ႇပႂ်ႉၵမ်ပႂ်ႉၵျၢင်ႉပိင်းၺၢပ်ႈၸဝ်ႈတင်းလၢႆဢၼ်ၵဝ်ဝႆႉ ၵႃႈတီႈၽၢႆႇၼႃႈသူဢိၵ်ႇတင်း ပူႇသူမွၼ်ႇသူၸိူဝ်းၼၼ်ႉလႄႈ ယူႇဢေႃႈ။
၁၁ ပိူဝ်ႈဢၼ်ပဵၼ်ၼင်ႇၼႆလႄႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉၸမ်း၊-တူၺ်းလူ။ၵဝ်တၵ်းဝၢႆႇၼႃႈပႅတ်ႈသူပုၼ်ႈဢၼ်တၵ်းပဵၼ် ဢၼ်ဢမ်ႇလီဢမ်ႇငၢမ်းတီႈသူလႄႈ ပႄႇတႅပ်းၵူၼ်းမဵဝ်းယုတတင်းသဵင်ႈတင်းလူင် ပႅတ်ႈဢေႃႈ။
၁၂ ၵဝ်တၵ်းဢဝ်ၵူၼ်းမဵဝ်းယုတ ဢၼ်ၵိုတ်းဢၼ်ၵျၢၼ်ႇဢၼ်ဝၢႆႇၼႃႈၵႂႃႇၸူးၵႃႈတီႈ မိူင်းဢေႇၵႅပ်ႉတုႁႂ်ႈလႆႈသွၼ်ႈပိုင်ႈၵႃႈတီႈၼၼ်ႉလႄႈ ၶဝ်တင်းသဵင်ႈတင်းလူင်ၼၼ်ႉ တၵ်းလႆႈသုမ်းၸွမ်းၵႃႈၼႂ်းမိူင်းဢေႇၵႅပ်ႉတု လႄႈ တၵ်းလႆႈသုမ်းၸွမ်းလူၺ်ႈၽေးလၢပ်ႇၽေးလႅဝ်းဢိၵ်ႇတင်း ၽေးတၢင်းဢၼ်ဢိုပ်းဢၼ်ယၢၵ်ႈဢေႃႈ။ ၶဝ်ၸႃႉၸဵမ်ၵေႃႉဢၼ်လဵၵ်ႉသေပိူၼ်ႈတေႃႇထိုင်ႁွတ်ႈ ၵေႃႉဢၼ်ယႂ်ႇသေပိူၼ်ႈၼၼ်ႉတၵ်းလႆႈတၢႆလူၺ်ႈၽေးလၢပ်ႇၽေးလႅဝ်း ဢိၵ်ႇတင်းၽေးတၢင်းဢၼ်ဢိုပ်းယၢၵ်ႈလႄႈ ဢွၼ်ၵၼ်ပဵၼ်တီႈဢၼ်လႃႇဢၼ်လင်၊တီႈဢၼ်လီဢၢမ်း၊တီႈဢၼ်ၵိၼ်ႇလႃႇ၊တီႈဢၼ်သေႉသွမ်းဢေႃႈ။
၁၃ ၵဝ်တၵ်းပၼ်တၢမ်ႇတီႈၶဝ်ၸိူဝ်းဢၼ်ယူႇၵႃႈၼႂ်း မိူင်းဢေႇၵႅပ်ႉတုၼၼ်ႉမိူၼ်ၸိူဝ်ႉၼင်ႇဢၼ် ၵဝ်ဢဝ်ၽေးလၢပ်ႇၽေးလႅဝ်းၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႇလႅင်ႉမိူင်း ပၼ်တၢမ်ႇတီႈၵူၼ်းဝဵင်းယေႇရုသလႅမ်ႇ ၸိူဝ်းၼၼ်ႉထၼ်ႁူၼ်ႈပေႃးၵူၼ်းမဵဝ်းယုတဢၼ်ၵိုတ်းဢၼ်ၵျၢၼ်ႇဢၼ်ၵႂႃႇၵႃႈတီႈ မိူင်းဢေႇၵႅပ်ႉတု ႁႂ်ႈလႆႈသွၼ်ႈပိုင်ႈယူႇၵႃႈတီႈၼၼ်ႉၸိူဝ်းၼၼ်ႉ
၁၄ ဢမ်ႇလႆႈလွတ်ႈၽေးလွတ်ႈရၢၼ်ႇ၊ ဢမ်ႇလႆႈၵိုတ်းဝႆႉၵျၢၼ်ႇဝႆႉသေၵေႃႉသေၵူၼ်းႁႂ်ႈလႆႈၶိုၼ်းမိူဝ်းၵႃႈတီႈမိူင်း ယုတတီႈဢၼ်ၶဝ်မီးဢလူဝ်ႇ ၶႂ်ႈၶိုၼ်းမိူဝ်းႁႂ်ႈလႆႈယူႇၵႃႈတီႈၼၼ်ႉဢေႃႈ။လွင်ႈမၼ်းၸမ်း၊- ၶဝ်ၸိူဝ်းဢၼ်ၵၢင်းလွတ်ႈတင်းၽေးၼၼ်ႉၵူၺ်း တၵ်းလႆႈဢွၼ်ၵၼ်မိူဝ်းဢေႃႈ၊ဝႃႈၼင်ႇၼႆဢေႃႈ။
၁၅ မိူဝ်ႈၼၼ်ႉၵူၼ်းၸၢႆးၸိူဝ်းဢၼ်ႁူႉလွင်ႈဢၼ်မေးၶဝ်ဢဝ်တင်းၼၢမ်ႇသႃႇတုတ်ႇၽႆးတီႈၽြႃး တၢင်ႇသူႇတၢင်ႇပႃး၊ မေႈယိင်းၵႃႈဢၼ်ၸုၵ်းယူႇၵႃႈတီႈႁိမ်းႁွမ်းၼၼ်ႉမုၵ်ႉၸိူဝ်းဢၼ်ယႂ်ႇၼႃႇဢၼ်ဝႃႈ
၁၆ ၶဝ်ၸိူဝ်း ဢၼ်ယူႇၵႃႈတီႈပႃႇသရုမိူင်းဢေႇၵႅပ်ႉတု တင်းသဵင်ႈတင်းလူင်ၼၼ်ႉဢွၼ်ၵၼ်ၶိုၼ်းလၢတ်ႈတီႈ ယေႇရမိလႄႈဝႃႈၸမ်း၊-ၵႂၢမ်းဢၼ်မႂ်းဢိင်ၼႃႇၼႃႇမႃႉၸိုဝ်သဵင်ထႃႇဝရႃႉၽြႃးသေလႄႈႁေႃးလၢတ်ႈတီႈႁဝ်း ၼၼ်ႉၸိုင်ႁဝ်းဢမ်ႇထွမ်ႇဢမ်ႇဢဝ်။
၁၇ ႁဝ်းတၵ်းႁဵတ်းၸွမ်းၵႃႈၼင်ႇဢၼ်ဢွၵ်ႇသူပ်းဢွၵ်ႇပၢၵ်ႇႁဝ်းၼၼ်ႉ ႁႂ်ႈလႆႈဢဝ်ၼၢမ်ႇသႃႇတုတ်ႇၽႆး တီႈၼၢင်းႁေႃၶမ်းၵၢင်ႁၢဝ်လႄႈ ႁဵတ်းၶိူင်ႈပုၵ်ႉၸေႃႇဢၼ်သွၼ်းလေႃႇတီႈမၼ်းၼၢင်းမိူၼ်ၸိူဝ်ႉၼင်ႇဢၼ်ႁဝ်း ဢိၵ်ႇတင်းပူႇႁဝ်းမွၼ်ႇႁဝ်း၊ၶုၼ်ႁေႃၶမ်းႁဝ်း၊မူးမၢတ်ႈၽွင်းမိူင်းႁဝ်းတင်းလၢႆယၢမ်ႈႁဵတ်းၵႃႈၼႂ်းဝၢၼ်ႈၼႂ်းဝဵင်းယုတ ဢိၵ်ႇတင်းၵႃႈၼႂ်းသဵၼ်ႈတၢင်းဝဵင်းယေႇရုသလႅမ်ႇ ၸိူဝ်း ၼၼ်ႉဢမၢၼ်ႇၶၢၼ်ပဵၼ်ဢေႃႈ။
၁၈ မိူဝ်ႈဢွၼ်တၢင်းၼၼ်ႉႁဝ်းလႆႈဢွၼ်ၵၼ်ၵိၼ် ၶဝ်ႈမုၼ်းဢိမ်ႇဢိမ်ႇတဵမ်တဵမ်ဢေႃႈ။ႁဝ်းလႆႈဢွၼ်ၵၼ်ၵၢင်းလွတ်ႈတင်းၽေးလႄႈၵတ်းယဵၼ်ၶျၢမ်းသႃႇဢေႃႈ။မိူဝ်ႈဢၼ်ႁဝ်းယင်းဢမ်ႇဢဝ်ၼၢမ်ႇသႃႇတုတ်ႇၽႆး တီႈၼၢင်းႁေႃၶမ်းၵၢင်ႁၢဝ်လႄႈဢမ်ႇႁဵတ်းၶိူင်ႈပုၵ်ႉၸေႃႇ ဢၼ်သွၼ်းလေႃႇတီႈမၼ်းၼၢင်းလႄႈ ယူႇၼၼ်ႉၸိုင် ႁဝ်းလႆႈႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ် ၵူႈၸိူဝ်ႉၵူႈပိူင်ၼႃႇလူင်လၢင်လႄႈလူႉလႅဝ်လူၺ်ႈၽေးလၢပ်ႇၽေးလႅဝ်း၊ ၽေး တၢင်းဢၼ်ဢိုပ်းဢၼ်ယၢၵ်ႈယဝ်ႉ။
၁၉ မိူဝ်ႈဢၼ်ႁဝ်းယင်းတိုၵ်ႉဢဝ်ၼၢမ်ႇသႃႇတုတ်ႇၽႆး တီႈၼၢင်းႁေႃၶမ်းၵၢင်ႁၢဝ်လႄႈ ႁဵတ်းၶိူင်ႈပုၵ်ႉၸေႃႇ ဢၼ်သွၼ်းလေႃႇတီႈမၼ်းၼၢင်းယူႇၼၼ်ႉၸိုင်၊ ၽူဝ်းႁဝ်းယင်းဢမ်ႇပႃးလႄႈႁဝ်းႁဵတ်းၶဝ်ႈမုၼ်းၶႅပ်း ႁႂ်ႈလႆႈၵူဝ်းၵႂၢႆႇမၼ်းၼၢင်းလႄႈႁဵတ်းၶိူင်ႈပုၵ်ႉၸေႃႇဢၼ်သွၼ်းလေႃႇတီႈမၼ်းၼၢင်းယူႇဢမ်ႇၸႂ်ႈႁိုဝ်၊ ဝႃႈၼင်ႇၼႆ ဢေႃႈ။
၂၀ ယေႇရမိၶိုၼ်းလၢတ်ႈတီႈၵူၼ်းတင်းသဵင်ႈတင်းလူင်ၸဵမ်ယိင်းၸဵမ်ၸၢႆး ဢၼ်ဝႃႈ ၵူၼ်းတင်းသဵင်ႈတင်းလူင် ဢၼ်ၶိုၼ်းလၢတ်ႈၸိူဝ်ႉၼင်ႇၼၼ်လႄႈဝႃႈ ၼၼ်ႉၸမ်း၊-
၂၁ ၼၢမ်ႇသႃႇဢၼ်သူဢိၵ်ႇတင်းပူႇသူမွၼ်ႇသူ၊ၶုၼ်ႁေႃၶမ်းသူ၊ မူးမၢတ်ႈၽွင်းမိူင်းသူ၊ၵူၼ်းဝၢၼ်ႈၵူၼ်းမိူင်းသူ ၸိူဝ်းဢၼ်ဢဝ်တုတ်ႇၽႆးၵႃႈၼႂ်းဝၢၼ်ႈၼႂ်းဝဵင်းယုတ တင်းလၢႆဢိၵ်ႇတင်းၵႃႈၼႂ်းသဵၼ်ႈတၢင်းဝဵင်းယေႇရုသလႅမ်ႇ တင်းလၢႆၼၼ်ႉထႃႇဝရႃႉၽြႃးယင်းဢမ်ႇၶုၵ်းၸႂ်လႆႈၶႆႈၸႂ်ထူပ်း ယင်းဢမ်ႇဢဝ် သႂ်ႇၸႂ်သႂၢင်းၸႂ်လႄႈယူႇႁိုဝ်။
၂၂ ပိူဝ်ႈဢၼ်ပဵၼ်ၼင်ႇၼႆလႄႈထႃႇဝရႃႉၽြႃး ဢမ်ႇယိူၼ်ႉၶၢမ်ႇလႆႈထႅင်ႈၵွပ်ႈပိူဝ်ႈတုၸရိူၵ်ႈဢၼ်သူႁဵတ်း ဢိၵ်ႇတင်းၵွပ်ႈပိူဝ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇ ဢၼ်သူၵမ်ၵျၢင်ႉၸိူဝ်းၼၼ်ႉပိူဝ်ႈၼႆလႄႈ မိူင်းသူၼၼ်ႉလႆႈပဵၼ်တီႈဢၼ်ပဝ်ႇဢၼ်လၢပ်ႈ၊တီႈဢၼ်လီဢၢမ်း၊ တီႈၵိၼ်ႇလႃႇဢမ်ႇမီးၵေႃႉဢၼ်ယူႇဢၼ်သဝ်း ၸိူဝ်ႉၼင်ႇဢၼ်ပဵၼ်ဝၼ်းမိူဝ်ႈၼႆႉ ၼၼ်ႉယဝ်ႉလူင်ပေႇ။
၂၃ ၵွပ်ႈပိူဝ်ႈဢၼ်သူဢဝ်ၼၢမ်ႇသႃႇတုတ်ႇၽႆးလႄႈၽိတ်းပိူင်ႈ ထႃႇဝရႃႉၽြႃးဢိၵ်ႇတင်းၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ် သဵင်ၵႂၢမ်းထႃႇဝရႃႉၽြႃး၊ ဢမ်ႇၸွမ်းဢမ်ႇၵႂႃႇၵႃႈၼႂ်းသဵၼ်ႈတၢင်းပိင်းၺၢပ်ႈတြႃးၸဝ်ႈဢိၵ်ႇတင်း ထုင်းၾိင်ႈတြႃးၸဝ်ႈတင်းတီႈဢၼ်ၶၢမ်ႇသၢၵ်ႈသေႇၸဝ်ႈၼၼ်ႉလႄႈ ၽေးၼႆႉႁွတ်ႈထိုင်တီႈသူ ၸိူဝ်ႉၼင်ႇဢၼ်ပဵၼ်ယူႇဝၼ်းမိူဝ်ႈၼႆႉၼၼ်ႉယဝ်ႉလူင်ပေႇဝႃႈၼင်ႇၼႆဢေႃႈ။
၂၄ လၢႆးသမ်ႉယေႇရမိ ႁေႃးလၢတ်ႈတီႈၵူၼ်းတင်းသဵင်ႈတင်းလူင်ဢိၵ်ႇတင်း မေႈယိင်းတင်းသဵင်ႈတင်းလူင်လႄႈဝႃႈၸမ်း၊- ၵူၼ်းယုတၵႃႈဢၼ်မီးၵႃႈၼႂ်းမိူင်းဢေႇၵႅပ်ႉတုတင်းလၢႆၶဝ်ဢိူၺ်း။ဢွၼ်ၵၼ်ထွမ်ႇငိၼ်းဢမိင်ႉထႃႇဝရႃႉၽြႃးတႃႉ။ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃး ပဵၼ်ၸဝ်ႈမဵဝ်းဢိသရေႇလမီးဢမိင်ႉ ၸမ်း၊-
၂၅ သူဢိၵ်ႇတင်းမေးသူတင်းလၢႆဢဝ်သူပ်းသူလၢတ်ႈလႄႈ ဢဝ်မိုဝ်းသူႁဵတ်းၸွမ်းၼၼ်ႉလႄႈဝႃႈႁဝ်းတၵ်းႁဵတ်းၵတိသႅတ်ႉၸႃႇ ၸွမ်းၵႃႈၼင်ႇဢၼ်ႁဝ်းဝႆႉၵတိသႅတ်ႉၸႃႇဢၼ်ဝႃႈ ႁဝ်းတၵ်းဢဝ်ၼၢမ်ႇသႃႇတုတ်ႇၽႆးတီႈၼၢင်းႁေႃၶမ်းၵၢင်ႁၢဝ်လႄႈ ႁဵတ်းၶိူင်ႈပုၵ်ႉၸေႃႇ ဢၼ်သွၼ်းလေႃႇတီႈမၼ်းၼၢင်း ဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။ၵွပ်ႈႁွႆႈၼႆႉလႄႈ သူဢွၼ်ၵၼ်ႁႂ်ႈၵတိသႅတ်ႉၸႃႇသူၼၼ်ႉ တႄႇလႄႈႁဵတ်းၸွမ်းၵႃႈၼင်ႇဢၼ်သူဝႆႉ ၵတိသႅတ်ႉၸႃႇ ၼၼ်ႉတႃႉ။
၂၆ ပိူဝ်ႈၼႆလႄႈၵူၼ်းယုတၵႃႈဢၼ်ယူႇၵႃႈၼႂ်းမိူင်းဢေႇၵႅပ်ႉတုတင်းသဵင်ႈတင်းလူင်ၶဝ်ဢိူၺ်း။ဢွၼ်ၵၼ်ထွမ်ႇငိၼ်းဢမိင်ႉထႃႇဝရႃႉၽြႃးတႃႉ။ထႃႇဝရႃႉၽြႃးမီးဢမိင်ႉၸမ်း၊-ၵဝ်ဢဝ်မႁႃႇၼႃႉမႃႉၸိုဝ်သဵင်ၵဝ်တိူင်ႇဝႃႈၵိၼ်ႇဝႃႈလူၺ်ႈလွင်ႈဢၼ်ၵူၼ်း ယုတဢၼ်မီးၵႃႈၼႂ်းမိူင်းဢေႇၵႅပ်ႉတု ၵူႈတီႈၵူႈလႅၼ်ၸိူဝ်းၼၼ်ႉၸမ်း၊- ၵႃႈၼင်ႇဢၼ်ၸဝ်ႈထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ ၶဝ်တၵ်းဢမ်ႇလႆႈဢဝ်ၼႃႇမႃႉၸိုဝ်သဵင်ၵဝ်ဢွၵ်ႇသူပ်းလႄႈဝႃႈသေၵေႃႉသေၵူၼ်း၊ ဝႃႈ ၼင်ႇၼႆဢေႃႈ။
၂၇ ၵဝ်ပႂ်ႉၶဝ်ယူႇႁႂ်ႈၵဝ်လႆႈႁဵတ်းဢၼ်လီဢၼ်ငၢမ်းတီႈၶဝ်ဢမ်ႇၸႂ်ႈ။ႁႂ်ႈလႆႈႁဵတ်းဢၼ်ႁၢႆႉဢၼ်ၸႃႉတီႈၶဝ်လႄႈၵူၼ်းယုတ ၵႃႈဢၼ်မီးယူႇၵႃႈၼႂ်းမိူင်းဢေႇၵႅပ်ႉတု ၸိူဝ်းၼၼ်ႉတၵ်းဢွၼ်ၵၼ်သုမ်းၸွမ်းလူၺ်ႈၽေးလၢပ်ႇၽေးလႅဝ်း၊ ၽေးဢၼ်ဢိုပ်းဢၼ်ယၢၵ်ႈတေႃႇထိုင်ႁွတ်ႈ ၶဝ်ႈထၼ်ႈပေႃးသုတ်းပေႃးဝၢႆး ဢေႃႈ။
၂၈ ၼႂ်းဝႃႈၼၼ်သေၵေႃႈၶဝ်ၸိူဝ်းဢၼ်ၵၢင်းလွတ်ႈတင်းၽေးလၢပ်ႇၽေးလႅဝ်းၼၼ်ႉ တၵ်းလုၵ်ႉသေၵႃႈတီႈမိူင်းဢေႇၵႅပ်ႉတု ၶိုၼ်းမိူဝ်းၸူးၵႃႈတီႈမိူင်းယုတလႄႈပဵၼ်ဢၼ်ၵေႇၼႃႇလူင်လၢင်ဢေႃႈ။ၵူၼ်းယုတ ဢၼ်ၵိုတ်းဢၼ်ၵျၢၼ်ႇဢၼ်ၵႂႃႇၵႃႈတီႈမိူင်းဢေႇၵႅပ်ႉတုႁႂ်ႈလႆႈသွၼ်ႈပိုင်ႈယူႇၵႃႈတီႈၼၼ်ႉ တင်းသဵင်ႈတင်းလူင်ၼၼ်ႉ တၵ်းဢွၼ်ၵၼ်ႁူႉလွင်ႈဢၼ်ဝႃႈၵႂၢမ်းၵဝ်တၵ်းတႄႇယူႇႁိုဝ်။ၵႂၢမ်းၶဝ်တၵ်းတႄႇႁိုဝ်ဢၼ် ဝႃႈၼၼ်ႉဢေႃႈ။
၂၉ လွင်ႈဢၼ်ထႃႇဝရႃႉၽြႃးမီးဢမိင်ႉဝႃႈၼီႈမိၵ်ႈလၵ်ႉၶၼႃႇဢၼ်ၵဝ်ပၼ်တီႈသူလူၺ်ႈလွင်ႈဢၼ်ၵဝ်တၵ်းသင်ႇသွၼ်သုင်းမႃႉသူၵႃႈတီႈၼႆႉ
၃၀ ႁႂ်ႈသူလႆႈႁူႉလွင်ႈဢၼ်ၵႂၢမ်းၵဝ်တၵ်းတႄႇယူႇၽၢႆႇၼိုင်ႈတင်းသူပုၼ်ႈဢၼ်တၵ်းႁဵတ်းဢၼ်ႁၢႆႉ ဢၼ်ၸႃႉတီႈသူၼၼ်ႉၸမ်းၵဝ်တၵ်းဢဝ် ၽရေႃႇႁေႃႇၽရႃႇၶုၼ်ႁေႃၶမ်းဢေႇၵႅပ်ႉတု ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇမၼ်းဢိၵ်ႇတင်း ၵႃႈၼႂ်းမိုဝ်းၶဝ်ၸိူဝ်းဢၼ်ႁႃဢဝ်ဢသၢၵ်ႈမၼ်းယူႇၸိူဝ်းၼၼ်ႉ မိူၼ်ၸိူဝ်ႉၼင်ႇဢၼ်ၵဝ်ဢဝ်ၸေႇတၵိၶုၼ်ႁေႃၶမ်းယုတ ဢၢပ်ႈပၼ်ၵႃႈၼႂ်းမိုဝ်းၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇဢၼ်ဝႃႈရၢၼ်ႇသူႇ ဢၼ်ႁႃဢဝ်ဢသၢၵ်ႈမၼ်းယူႇၼၼ်ႉဢေႃႈ၊ဝႃႈၼင်ႇၼႆဢေႃႈ။