၄၂
၁ မိူဝ်ႈၼၼ်ႉ တပ်ႉမူးၵႃႈမီးဢိၵ်ႇတင်း ယေႃႇႁၼၼ်ႇလုၵ်ႈၸၢႆးၵႃႇရႃႇ၊ ယေႇၸၼိ လုၵ်ႈၸၢႆးႁေႃႇသေႇတင်းၵူၼ်းလူင်ၵူၼ်းဢွၼ်ႇ တင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်သုတ်ႉၸပ်းသုတ်ႉၸူးလႄႈ လၢတ်ႈတီႈ ပရေႃးၽိတ်ႈယေႇရမိလႄႈဝႃႈ၊-
၂ ၵွပ်ႈပိူဝ်ႈဢၼ်ႁဝ်းၶႃႈၵိုတ်းၵျၢၼ်ႇဝႆႉၵေႇၼႃႇလူင်လၢင်ၵႃႈၼႂ်း ၶဝ်ၸိူဝ်းဢၼ်ၼမ်ၼႃႇမိူဝ်ႈဢွၼ်တၢင်းၼၼ်ႉ ၵႃႈၼင်ႇဢၼ်ၸဝ်ႈႁဝ်းႁၼ်ၼႆႉလႄႈ ၶႅၼ်းတေႃႈႁႂ်ႈတၢင်းဢၼ်ႁဝ်းၶႃႈတွင်းပၢၼ်ႇယွၼ်းဢဝ်ၼႆႉ မီးတၢင်းဢၼ်ႁပ်ႉတုင်းဢဝ် ၵႃႈတီႈၽၢႆႇၼႃႈၸဝ်ႈႁဝ်းလႄႈ
၃ သူးတွင်းတီႈထႃႇဝရႃႉၽြႃးၽြႃးပဵၼ်ၸဝ်ႈ ၸဝ်ႈႁဝ်းပုၼ်ႈႁဝ်းၶႃႈဢၼ်ဝႃႈ ပုၼ်ႈၵူၼ်းၵႃႈဢၼ်ၵိုတ်းဢၼ်ၵျၢၼ်ႇၸိူဝ်းၼႆႉထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်းလႆႈၼႄပျႃးသဵင်ႈတၢင်းဢၼ်ႁဝ်းၶႃႈတၵ်းလႆႈၵႂႃႇ ဢိၵ်ႇတင်းလွင်ႈတၢင်းဢၼ်ႁဝ်းၶႃႈ တၵ်းလႆႈႁဵတ်းၼၼ်ႉတီႈၶႃႈသေ ၵမ်းၶႃႈ၊ဝႃႈၼင်ႇၼႆဢေႃႈ။
၄ ပရေႃးၽိတ်ႈယေႇရမိၵေႃႈလၢတ်ႈတီႈၶဝ်လႄႈဝႃႈ၊-ၵဝ်ငိၼ်းသူယဝ်ႉ။ၵဝ်တၵ်းသူးတွင်းတီႈထႃႇဝရႃႉၽြႃး ၽြႃးပဵၼ်ၸဝ်ႈသူၸွမ်းၵႃႈၼင်ႇဢၼ်သူလၢတ်ႈၼႆႉဢေႃႈ။ၵဝ်တၵ်းၶိုၼ်းလၢတ်ႈၵႃႈဢၼ်ထႃႇဝရႃႉၽြႃး မီးဢမိင်ႉတီႈသူၼၼ်ႉဢေႃႈ။ၵဝ်တၵ်းဢမ်ႇသိူင်ႇဢမ်ႇမႅပ်းဝႆႉ လွင်ႈတၢင်းသေၸိူဝ်ႉ သေပိူင်ဝႃႈၼင်ႇၼႆဢေႃႈ။
၅ ၶဝ်ၵေႃႈဢွၼ်ၵၼ်လၢတ်ႈတီႈယေႇရမိလႄႈဝႃႈ၊- ႁႂ်ႈထႃႇဝရႃႉၽြႃးပဵၼ်သၢၵ်ႈသေႇဢၼ်ၸိုဝ်ႈဢၼ်ၸႂ်ႈလႄႈ ပႂ်ႉသႅတ်ႉၸႃႇတီႈႁဝ်းၶႃႈ လူၺ်ႈလွင်ႈဢၼ်ႁဝ်းၶႃႈတၵ်းႁဵတ်းၸွမ်း ၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းသင်ႇ လၢတ်ႈဝႆႉတီႈႁဝ်းၶႃႈၼၼ်ႉသေၵမ်းလူၺ်ႈ။
၆ ဢမိင်ႉထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈ ဢၼ်ပဵၼ်ၸဝ်ႈဢၼ်ႁဝ်းၶႃႈပွႆႇၸႂ်ႉၸဝ်ႈႁဝ်းၵႂႃႇၸူးၼၼ်ႉ ပဵၼ်ဢၼ်လီသေဢမ်ႇဝႃႈ၊ ပဵၼ်ဢၼ်ဢမ်ႇလီသေဢမ်ႇဝႃႈႁဝ်းၶႃႈတၵ်းထွမ်ႇဢဝ်ၸွမ်းဢဝ် ႁႂ်ႈလႆႈၵတ်းၵတ်းယဵၼ်ၶျၢမ်းသႃႇ မိူဝ်ႈဢၼ်ႁဝ်းၶႃႈထွမ်ႇဢဝ်ၸွမ်းဢဝ်ဢမိင်ႉထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။
၇ လိုၼ်းၼၼ်ႉမိူဝ်ႈဢၼ်လႆႈသိပ်းဝၼ်းယဝ်ႉၼၼ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈယေႇရမိ လႄႈမၼ်းႁွင်ႉဢဝ်ယေႃႇႁၼၼ်ႇလုၵ်ႈ ၸၢႆးၵႃႇရႃႇ၊
၈ တပ်ႉမူးၵႃႈဢၼ်ပႃးလူၺ်ႈၵၼ်တင်းမၼ်းဢိၵ်ႇတင်း ၵူၼ်းလူင်ၵူၼ်းဢွၼ်ႇတင်းသဵင်ႈတင်း လူင်မႃးလႄႈလၢတ်ႈဝႃႈ၊-
၉ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ ဢၼ်သူပွႆႇၸႂ်ႉၵဝ်ႁႂ်ႈလႆႈလဝ်ႈထၢမ်ႇတၢင်းဢၼ်သူယွၼ်းဢဝ်ၼၼ်ႉ မီးဢမိင်ႉၸမ်းပေႃးသူယူႇၵႃႈတီႈမိူင်းၼႆႉ ဢမၢၼ်ႇၶၢၼ်ပဵၼ်ၸိုင်ၵဝ်တၵ်းတႄႇႁဵတ်းသူလႄႈ ဢမ်ႇၵိူၼ်ႇဢမ်ႇယႃႉသူပႅတ်ႈ။
၁၀ ၵဝ်တၵ်းၽုၵ်ႇသွမ်ႈသူလႄႈ ဢမ်ႇထွတ်ႇဢမ်ႇထူၺ်ႈသူပႅတ်ႈ။ၵဝ်ၶုၵ်းၸႂ်လႆႈၶႆႈၸႂ်ၵွပ်ႈပိူဝ်ႈၽေးတၢမ်ႇဢၼ်ၵဝ်ႁႂ်ႈႁွတ်ႈထိုင်ၵႃႈၼိူဝ်သူၼၼ်ႉဢေႃႈ။
၁၁ ယႃႇပေၵူဝ်ပေႁႄၶုၼ်ႁေႃၶမ်းပႃႇပုလုၼ်ႇ ဢၼ်သူၸၢင်ႊၵူဝ်ႁႄၼၼ်ႉ။ ထႃႇဝရႃႉၽြႃးမီးဢမိင်ႉၸမ်း၊-ယႃႇပေၵူဝ်ပေႁႄမၼ်းၼၼ်ႉ။ ၵဝ်မီးယူႇလူၺ်ႈၵၼ်တင်းသူႁႂ်ႈလႆႈၵႄႇသႄႇၶျွတ်ႈဢဝ်သူလႄႈ ၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းမၼ်းၼၼ်ႉဢေႃႈ။
၁၂ ၵဝ်တၵ်းဢိတ်းလူၵႄႇသႄႇၸွႆႈထႅမ်သူ ႁႂ်ႈမၼ်းၼၼ်ႉလႆႈမီးတၢင်းဢၼ်ဢိတ်းလူသေလႄႈ ႁႂ်ႈသူၶိုၼ်းမိူဝ်းၵႃႈတီႈမိူင်းယူႇသူဢေႃႈ။
၁၃ ပေႃးဢမ်ႇၼၼ်ပေႃးသူလၢတ်ႈလႄႈဝႃႈ၊-ႁဝ်းတၵ်းဢမ်ႇယူႇၵႃႈၼႂ်းမိူင်းၼႆႉဝႃႈၼင်ႇၼႆယူႇတေႃႇထိုင်ႁွတ်ႈထၼ်ႈပေႃး ဢမ်ႇထွမ်ႇဢမ်ႇဢဝ်ၵႂၢမ်းဢမိင်ႉထႃႇဝရႃႉၽြႃးၽြႃးပဵၼ်ၸဝ်ႈႁဝ်းလႄႈလၢတ်ႈဝႃႈဢမ်ႇၸႂ်ႈၵူၺ်း။
၁၄ ႁဝ်းတၵ်းၵႂႃႇၵႃႈတီႈမိူင်းဢေႇၵႅပ်ႉတု တီႈဢၼ်ဢမ်ႇထူပ်းဢမ်ႇႁၼ်ဢမူႉသိုၵ်း၊ ဢမ်ႇငိၼ်းသဵင်ပဝ်ႇၼႄးၶရႃႇ၊ဢမ်ႇဢိုပ်းဢမ်ႇယၢၵ်ႈၼၼ်ႉလႄႈယူႇၵႃႈတီႈၼၼ်ႉဢေႃႈ၊ ဝႃႈၼင်ႇၼႆၸိုင်ၵူၼ်းမဵဝ်းယုတဢၼ်ယင်းၵိုတ်းယင်းၵျၢၼ်ႇ ၶဝ်ဢိူၺ်း။
၁၅ ဢွၼ်ၵၼ်ထွမ်ႇငိၼ်းဢမိင်ႉထႃႇဝရႃႉၽြႃးတႃႉ။ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-ပေႃးသူဝၢႆႇၼႃႈသူႁႂ်ႈလႆႈၵႂႃႇၸူးၵႃႈတီႈ မိူင်းဢေႇၵႅပ်ႉတုတိၵ်းတိၵ်းယူႇသေလႄႈ ၵႂႃႇႁႂ်ႈလႆႈသွၼ်ႈပိုင်ႈယူႇၵႃႈတီႈမိူင်းၼၼ်ႉ
၁၆ ဢမၢၼ်ႇၶၢၼ်ပဵၼ်ၸိုင်ၽေးလၢပ်ႇၽေးလႅဝ်းဢၼ်သူၵူဝ်ႁႄၼၼ်ႉ တၵ်းၶိုတ်းယူႇၵႃႈတီႈမိူင်းဢေႇၵႅပ်ႉတုလႄႈ ၽေးတၢင်းဢၼ်ဢိုပ်းဢၼ်ယၢၵ်ႈ ဢၼ်သူၵူဝ်ႁႄႇၼၼ်ႉၵေႃႈ တၵ်းလိုပ်ႈၸွမ်းလမ်းၸွမ်းသူၵႂႃႇၵႃႈတီႈမိူင်းဢေႇၵိပ်ႉတုၼၼ်ႉတိၵ်းတိၵ်းလႄႈ သူတၵ်းလႆႈ တၢႆၵႃႈတီႈမိူင်းၼၼ်ႉဢေႃႈ။
၁၇ ၶဝ်ၸိူဝ်းဢၼ်ဝၢႆႇၼႃႈၶဝ်ၵႂႃႇၸူးၵႃႈတီႈမိူင်းဢေႇၵႅပ်ႉတု ႁႂ်ႈလႆႈသွၼ်ႈပိုင်ႈယူႇၵႃႈတီႈၼၼ်ႉၵႃႈမီးၼၼ်ႉတၵ်းလႆႈဢွၼ်ၵၼ်တၢႆလူၺ်ႈၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႇလႅင်ႉမိူင်းဢေႃႈ။ၽူႈ လႂ်သေၵေႃႉသေၵူၼ်း ဢမ်ႇလႆႈလွတ်ႈတင်းၽေးတၢမ်ႇဢၼ်ၵဝ်တၵ်းႁႂ်ႈႁွတ်ႈထိုင်ၵႃႈၼိူဝ်ၶဝ်ၼၼ်ႉ။ဢမ်ႇလႆႈမီးၵေႃႉဢၼ်ၵိုတ်းဝႆႉၵျၢၼ်ႇဝႆႉသေၵေႃႉသေၵူၼ်း။
၁၈ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-မိူၼ်ၸိူဝ်ႉၼင်ႇဢၼ်တၢင်းၶႆႈၸႃႉၶႆႈၸဵတ်ႈၵဝ် ဢိၵ်ႇတင်းဢၢႆႁႅင်းတေႃးသႃႉတၢင်းၸႂ်မႆႈၵဝ် မီးတၢင်းဢၼ်တူၵ်းထိုင်ၵႃႈၼိူဝ်ၵူၼ်းဝဵင်းယေႇရုသလႅမ်ႇ တင်းလၢႆၼၼ်ႉ တေႃးသႃႉတၢင်းၸႂ်မႆႈၵဝ် တၵ်းမီးတၢင်းဢၼ်သွၼ်းလေႃႇၵႃႈၼိူဝ်သူၼႂ်းမိူဝ်ႈဢၼ်သူၶဝ်ႈၵႃႈၼႂ်း မိူင်းဢေႇၵႅပ်ႉတုၼၼ်ႉလႄႈ သူတၵ်းလႆႈပဵၼ်တီႈဢၼ်လႃႇလင်တီႈဢၼ်လီဢၢမ်း၊ တီႈဢၼ်ၵိၼ်ႇဝႃႈ၊ တီႈဢၼ်သေႉ သွမ်းဢေႃႈ။ၵမ်းလိုၼ်းသူဢမ်ႇလႆႈၶိုၼ်းထူပ်းၶိုၼ်း ႁၼ်ၵႃႈတီႈၼႆႉ။
၁၉ ၵူၼ်းမဵဝ်းယုတဢၼ်ယင်းၵိုတ်းယင်းၵျၢၼ်ႇၶဝ်ဢိူၺ်း။ထႃႇဝရႃႉၽြႃးမီးဢမိင်ႉလူၺ်ႈလွင်ႈသူလႄႈဝႃႈ၊-ယႃႇပေဢွၼ်ၵၼ်ၵႂႃႇၵႃႈတီႈမိူင်းဢေႇၵႅပ်ႉတုပုၼ်ႉဝႃႈၼင်ႇၼႆဢေႃႈ။ သူဢွၼ်ၵၼ်ႁူႉမၢတ်ႈလွင်ႈဢၼ်ၵဝ်ၼႆႉၶၢမ်ႇသၢၵ်ႈသေႇ တီႈသူဝၼ်းမိူဝ်ႈၼႆႉ ၼၼ်ႉဝႆႉတႃႉ။
၂၀ တူဝ်သူပႅတ်ႉလႅၼ်ႁူဝ်ၸႂ်သူယဝ်ႉ။လွင်ႈမၼ်းၸမ်းသူပွႆႇၸႂ်ႉၵဝ်ၸူးၵႃႈတီႈ ထႃႇဝရႃႉၽြႃးၽြႃးပဵၼ်ၸဝ်ႈသူလႄႈဢွၼ်ၵၼ်လၢတ်ႈလႄႈဝႃႈ၊-သူးတွင်းတီႈထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈပုၼ်ႈႁဝ်းၶႃႈသေၵမ်း။ ၶိုၼ်းမွၵ်ႇလၢတ်ႈၸွမ်းၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈမီးဢမိင်ႉၼၼ်ႉသေၵမ်း။ႁဝ်းၶႃႈတၵ်းထွမ်ႇဢဝ်ၸွမ်းဢဝ်ဢေႃႈ၊ဝႃႈၼင်ႇၼႆလႄႈ ၵဝ်ၶိုၼ်းမွၵ်ႇလၢတ်ႈလွင်ႈမၼ်းတီႈသူဝၼ်းမိူဝ်ႈၼႆႉဢေႃႈ။
၂၁ ၵူၺ်းၵႃႈသူယင်းဢမ်ႇထွမ်ႇဢမ်ႇဢဝ်ဢမိင်ႉထႃႇဝရႃႉၽြႃး ၽြႃးပဵၼ်ၸဝ်ႈသူ ဢၼ်မၼ်းၸဝ်ႈ ဢဝ်ၵဝ်သင်ႇလၢတ်ႈဝႆႉတီႈသူ ၼၼ်ႉသေ ၸိူဝ်ႉသေပိူင်လႄႈယူႇလူင်ပေႇ။
၂၂ ပိူဝ်ႈဢၼ်ပဵၼ်ၼင်ႇၼၼ်လႄႈ သူဢွၼ်ၵၼ်ႁူႉမၢတ်ႈလွင်ႈဢၼ်သူတၵ်းလႆႈတၢႆလူၺ်ႈၽေးလၢပ်ႇၽေးလႅဝ်း ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႇလႅင်ႉမိူင်းၵႃႈၼႂ်းတီႈဢၼ်သူ ၶၢႆႉၵႂႃႇသွၼ်ႈပိုင်ႈယူႇၼၼ်ႉဢမၢၼ်ႇၶၢၼ်ပဵၼ်တႃႉဝႃႈၼင်ႇၼႆဢေႃႈ။