၃၈
ယေႇရမိလႆႈၶၢမ်ႇပွႆႇတူၵ်းၼႂ်းႁူးလိၼ်ၶုမ်လိၼ်
၁ မိူဝ်ႈဢၼ်သေႇၽတိ လုၵ်ႈၸၢႆးမတ်ႉထၼ်ႇ၊ၵေႇတလိလုၵ်ႈၸၢႆးပႃႇသုရ၊ ယေႇႁုၵလလုၵ်ႈၸၢႆးသေႇလမိ၊ပႃႇသုရလုၵ်ႈၸၢႆးမႃႇလၶိ ၸိူဝ်းၼၼ်ႉငိၼ်းၵႂၢမ်းဢၼ်ယေႇရမိ ႁေႃးလၢတ်ႈတီႈၵူၼ်းတင်းသဵင်ႈတင်းလႄႈ ဝႃႈ၊-
၂ ထႃႇဝရႃႉၽြႃးမီးဢမိင်ႉၸမ်း၊-ၵေႃႉဢၼ်ယူႇၵႃႈၼႂ်းဝဵင်းၼႆႉၼၼ်ႉ တၵ်းလႆႈတၢႆလူၺ်ႈၽေးလၢပ်ႇၽေးလႅဝ်းၽေးတၢင်းဢၼ်ဢိုပ်းဢၼ်ယၢၵ်ႈ ၽေးၵႃႇလႃႉႁႃႇလႅင်ႉမိူင်းဢေႃႈ။ ၵေႃႉဢၼ်ဢွၵ်ႇၵႂႃႇၶဝ်ႈယူႇၽၢႆႇၵူၼ်းၶႃႇလတေႇ ၼၼ်ႉၸမ်းဢသၢၵ်ႈတၵ်းၵတ်းယဵၼ်ၶျၢမ်းသႃႇလႄႈ တၵ်းလႆႈဢသၢၵ်ႈမၼ်းမိူၼ်ၸိူဝ်ႉၼင်ႇဢုၵ်ႉၸႃႇဢၼ်ႁိမ်ဢဝ်လႆႈၼၼ်ႉလႄႈ တၵ်းလႆႈ ဢသၢၵ်ႈလိပ်းယူႇဢေႃႈ။
၃ ထႃႇဝရႃႉၽြႃးမီးဢမိင်ႉၸမ်းဝဵင်းၼႆႉတၵ်းလႆႈၶၢမ်ႇ တၢင်းဢၼ်ဢဝ်ဢၢပ်ႈပၼ်ၵႃႈၼႂ်းမိူင်းၵူၼ်းသိုၵ်းၶုၼ်ႁေႃၶမ်းပႃႇပုလုၼ်ႇ တင်းလၢႆဢမၢၼ်ႇၶၢၼ်ပဵၼ်လႄႈ မၼ်းၼၼ်ႉတၵ်းသိမ်းဢဝ်ဢေႃႈ၊ ဝႃႈၼင်ႇၼႆဝႆႉယဝ်ႉ ဝႃႈၼင်ႇၼႆၼၼ်ႉၸိုင်ႉမူးမၢတ်ႈၽွင်းမိူင်းၸိူဝ်းၼၼ်ႉ ဢွၼ်ၵၼ်လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ႁႂ်ႈၵေႃႉၼႆႉလႆႈၶၢမ်ႇတၢင်း ဢၼ်ဢဝ်တၢႆသေၵမ်းတီႈၶႃႈ။
၄ ၶႃႈၸဝ်ႈႁဝ်းၶဝ်တွင်းပၢၼ်ႇတီႈၶႃႈဢေႃႈ။မၼ်းၼႆႉႁေႃးလၢတ်ႈၵႂၢမ်းၸိူဝ်ႉၼင်ႇၼႆသေလႄႈ ၸၢင်ႊႁႂ်ႈမိုဝ်းႁူဝ်ႁၢၼ်ၵူၼ်းသိုၵ်းဢၼ်ယင်းၵိုတ်းယင်းၵျၢၼ်ႇယူႇ ၵႃႈၼႂ်းဝဵင်းၼႆႉတင်းလၢႆဢိၵ်ႇတင်း ၵူၼ်းတင်းသဵင်ႈတင်းလူင်ႁႅင်းဢူၼ်ႈၵႂႃႇတီႈၶႃႈဢေႃႈ။မၼ်းၼႆႉဢမ်ႇၸၢင်ႊလုမ်းလႃးပွင်ႁဵတ်းဢၵျူဝ်းၵူၼ်းမဵဝ်းၼႆႉတီႈၶႃႈ။ၸၢင်ႊယႃႉပႅတ်ႈတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ၶုၼ်လူင်ၸေႇတၵိ မီးဢမိင်ႉလႄႈဝႃႈ၊-
၅ မၼ်းၼၼ်ႉမီးယူႇၵႃႈၼႂ်းမိုဝ်းသူဢေႃႈ။ၶုၼ်လူင်ဢမ်ႇႁၢမ်ႈတပ်ႉႁႄႉၶႅၼ်ဢလူဝ်ႇသူလႆႈ ဝႃႈၼင်ႇၼႆဢေႃႈ။
၆ မိူဝ်ႈၼၼ်ႉၶဝ်ဢွၼ်ၵၼ်ဢဝ် ယေႇရမိ ၶျႃးတူၵ်းၵႃႈၼႂ်းႁူးလိၼ်ၶုမ်လိၼ်မႃႇလၶိ လုၵ်ႈၸၢႆးၸဝ်ႈဢၼ်မီးၵႃႈၼႂ်းဝၢင်းထွင်ႇၼၼ်ႉလႄႈ ဢွၼ်ၵၼ်ဢဝ်ၸိူၵ်ႈသေလႄႈ ဢဝ်ယေႇရမိ ယွၼ်ႇတူၵ်းဢေႃႈ။ၵႃႈၼႂ်းႁူးလိၼ်ၶုမ်လိၼ်ၼၼ်ႉဢမ်ႇမီးၼမ်ႉ၊မီးၵူမ်ႇၵူၺ်းလႄႈ ယေႇရမိ ၼၼ်ႉလူမ်ႉၶဝ်ႈၵႃႈၼႂ်းၵူမ်ႇယူႇဢေႃႈ။
၇ မိူဝ်ႈဢၼ်ဢေႇပတမေႇလိၵ်ႉၵူၼ်းမဵဝ်းၵုသဢၼ်ပဵၼ်ၵူၼ်းထိင်းၼၢင်း ၵႃႈၼႂ်းႁေႃၶမ်းၼၼ်ႉႁူႉငိၼ်းလွင်ႈဢၼ်ၶဝ်ဢဝ်ယေႇရမိ ၶျႃးတူၵ်းသႂ်ႇဝႆႉၵႃႈၼႂ်းႁူးလိၼ်ၶုမ်လိၼ်ၸိူဝ်ႉၼင်ႇၼၼ်လႄႈ
၈ ၶုၼ်ႁေႃ ၶမ်းၼင်ႈယူႇၵႃႈၼႂ်းႁူးၽၵ်းတူပိၼ်ႇယႃႇမိၼ်ႇ ၼၼ်ႉၸိုင် ဢေႇပတမေႇလိၵ်ႉၼၼ်ႉဢွၵ်ႇသေ ၵႃႈၼႂ်းႁေႃၶမ်းလႄႈၵႂႃႇၸူးၵႃႈတီႈ ၶုၼ်ႁေႃၶမ်းသေယဝ်ႉလဝ်ႈလၢတ်ႈ လႄႈဝႃႈ၊-
၉ ၸဝ်ႈၵဝ်ၶႃႈၸဝ်ႈၶုၼ်လူင်တီႈၶႃႈ။ ၶဝ်ၼၼ်ႉ ဢွၼ်ၵၼ်ၽိတ်းပိူင်ႈ ၼႂ်းလွင်ႈၵႃႈဢၼ်ၶဝ်ႁဵတ်းတီႈပရေႃးၽိတ်ႈယေႇရမိ ဢၼ်ၶဝ်ဢွၼ်ၵၼ်ဢဝ်ၶျႃးတူၵ်းသႂ်ႇဝႆႉ ၵႃႈၼႂ်းႁူးလိၼ်ၶုမ်လိၼ်ၼၼ်ႉတီႈၶႃႈယဝ်ႉ။မၼ်းတၵ်းတၢႆၵႃႈၼႂ်းတီႈဢၼ်မၼ်းမီးၼၼ်ႉၵွပ်ႈပိူဝ်ႈတၢင်းဢၼ်ဢိုပ်းဢၼ်ယၢၵ်ႈ တီႈၶႃႈဢေႃႈ။
၁၀ လွင်ႈမၼ်းၸမ်းၶဝ်ႈမုၼ်းသဵင်ႈမူတ်းသေ ၵႃႈၼႂ်းဝဵင်းၼႆႉယဝ်ႉတီႈၶႃႈယဝ်ႉ မိူဝ်ႈဢၼ်ဝႃႈၼင်ႇၼႆၸိုင်ႈၶုၼ်ႁေႃၶမ်းမီးဢမိင်ႉတီႈ ဢေႇပတမေႇလိၵ်ႉ ၵူၼ်းမဵဝ်းၵုသၼၼ်ႉလႄႈဝႃႈ၊-ႁွင်ႉဢဝ်ၵူၼ်းသၢမ်သိပ်းသေၵႃႈတီႈၼႆႈၵႂႃႇလႄႈၼုၵ်ႈဢဝ်ပရေႃးၽိတ်ႈယေႇရမိ ဢွၵ်ႇသေၵႃႈၼႂ်းႁူးလိၼ်ၶုမ်လိၼ်ၼၼ်ႉ ၸူဝ်ႈဢၼ်မၼ်းဢမ်ႇ ပႆႇတၢႆၼၼ်ႉတႃႉဝႃႈၼင်ႇၼႆဢေႃႈ။
၁၁ ၼင်ႇၼၼ်လႄႈဢေႇပႃႉတမေႇလိၵ်ႉ ႁွင်ႉဢဝ်ၵူၼ်းသေလႄႈ ၶဝ်ႈၵႃႈၼႂ်းႁေႃၶမ်းၵႃႈတႂ်ႈတိူၵ်ႈၽၼ်ႇတႃႇသေလႄႈ ဢဝ်ၶူဝ်းၼုင်ႈ ဢၼ်ၵဝ်ႇဢၼ်မွင်ၶူဝ်းလဵင်း ဢၼ်သိၵ်ႇဢၼ်ၶၢတ်ႇၼၼ်ႉမႃးလႄႈ ဢဝ်တင်းၸိူၵ်ႈၸိူဝ်းၼၼ်ႉယွၼ်ႇတူၵ်းၵႃႈၼႂ်းႁူးလိၼ်ၶုမ်လိၼ်ၸူးတီႈ ယေႇရမိ ၼၼ်ႉဢေႃႈ။
၁၂ မိူဝ်ႈၼၼ်ႉဢေႇပတမေႇလိၵ်ႉၵူၼ်းမဵဝ်းၵုသၼၼ်ႉလၢတ်ႈတီႈယေႇရမိလႄႈဝႃႈ၊- ဢဝ်ၶူဝ်းၼုင်ႈဢၼ်ၵဝ်ႇဢၼ်မွင် ၶူဝ်းလဵင်းဢၼ်သိၵ်ဢၼ်ၶၢတ်ႇၼႆႉ လွင်ၸိူၵ်ႈၵႃႈတီႈၵႄႈၵၢပ်ႇၵိင်ႇႁႄႉမႂ်းတႃႉ၊ ဝႃႈၼင်ႇၼႆလႄႈ ယေႇရမိႁဵတ်းၸွမ်းၵႃႈၼင်ႇဢၼ်ဝႃႈၼၼ်ႉ ဢေႃႈ။
၁၃ ၼင်ႇၼၼ်လႄႈၶဝ်ဢွၼ်ၵၼ်ဢဝ်တင်းၸိူၵ်ႈတိုတ်ႉၸၼ်ဢဝ်ယေႇရမိ လႄႈဢဝ်ယေႇရမိဢွၵ်ႇသေၵႃႈၼႂ်းႁူးလိၼ်ၶုမ်လိၼ်ၼၼ်ႉဢေႃႈ။လိုၼ်းသေၼၼ်ႉယေႇရမိလႆႈယူႇၵႃႈၼႂ်းဝၢင်းထွင်ႇဢေႃႈ။
၁၄ လၢႆးသမ်ႉ ၶုၼ်လူင်ၸေႇတၵိပွႆႇၸႂ်ႉလႄႈႁွင်ႉဢဝ်ယေႇရမိမႃးၵႃႈၼႂ်းလုၵ်းတတိယၵႃႈၼႂ်းႁိူၼ်းထႃႇဝရႃႉၽြႃးသေယဝ်ႉၶုၼ်ႁေႃၶမ်းလၢတ်ႈတီႈယေႇရမိ လႄႈ ဝႃႈ၊-
၁၅ ၵဝ်တၵ်းတွင်ႈထၢမ်သေၸိူဝ်ႉသေပိူင်တီႈမႂ်းဢေႃႈ။ယႃႇပသေိုင်ႇမႅပ်းဝႆႉ လွင်ႈတၢင်းသေၸိူဝ်ႉသေပိူင်တီႈၵဝ်၊မိူဝ်ႈဢၼ်ဝႃႈၼင်ႇၼႆၸိုင်ယေႇရမိ လဝ်ႈထၢမ်တီႈၸေႇတၵိလႄႈဝႃႈ၊- ပေႃးၶႃႈၸဝ်ႈဢဝ်လွင်ႈၼၼ်ႉလဝ်ႈလၢတ်ႈတီႈၸဝ်ႈႁဝ်းၸိုင် ၸဝ်ႈႁဝ်းတၵ်းဢဝ်ၶႃႈတၢႆဢမၢၼ်ႇၶၢၼ်ပဵၼ်ဢမ်ႇၸႂ်ႈတီႈၶႃႈႁိုဝ်။ပေႃးၶႃႈၸဝ်ႈ ပၼ်တၢင်းၵျၢမ်ႇတၢင်းပွင်တီႈၸဝ်ႈႁဝ်းၸိုင်ၸဝ်ႈႁဝ်း တၵ်းဢမ်ႇထွမ်ႇဢမ်ႇဢဝ်ၵႂၢမ်းၶႃႈၸဝ်ႈ လႄႈယူႇတီႈၶႃႈဢေႃႈ၊ဝႃႈၼင်ၼႆဢေႃႈ။
၁၆ ၶုၼ်လူင်ၸေႇတၵိ ၼၼ်ႉတဵတ်ႇတဵတ်ႇတိူင်ႇဝႃႈၵိၼ်ႇဝႃႈတီႈယေႇရမိလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢၼ်ႁဵတ်းပဵၼ်ဢသၢၵ်ႈဝိၺိၺ်ႇ တီႈႁဝ်းၼႆႉၼၼ်ႉဢသၢၵ်ႈလိပ်းယူႇၼၼ်ႉၵဝ်တၵ်းဢမ်ႇဢဝ်မႂ်းတၢႆ။ ၵဝ်တၵ်းဢမ်ႇဢဝ်မႂ်း ဢၢပ်ႈပၼ်ၵႃႈၼႂ်းမိုဝ်း ၶဝ်ၸိူဝ်းဢၼ်ႁႃဢသၢၵ်ႈမႂ်းယူႇၸိူဝ်းၼၼ်ႉၵူၺ်း ဝႃႈၼင်ႇၼႆ ဢေႃႈ။
၁၇ မိူဝ်ႈၼၼ်ႉယေႇရမိလဝ်ႈလၢတ်ႈတီႈၸေႇတၵိလႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-ပေႃးၸဝ်ႈႁဝ်းဢွၵ်ႇၵႂႃႇၸူးၵႃႈတီႈမူးမၢတ်ႈၽွင်းမိူင်း ၶုၼ်ႁေႃၶမ်းပႃႇပုလုၼ်ႇ ၸိူဝ်းၼၼ်ႉဢမၢၼ်ႇၶၢၼ်ပဵၼ်ၸိုင်ၸဝ်ႈႁဝ်း တၵ်းလႆႈဢသၢၵ်ႈၵတ်းယဵၼ်ၶျၢမ်းသႃႇတီႈၶႃႈလႄႈ ဝဵင်းၼႆႉၵေႃႈတၵ်းလွတ်ႈတင်းတၢင်းဢၼ်ဢဝ်ၽႆးတုတ်ႇတီႈၶႃႈဢေႃႈ။ၸဝ်ႈႁဝ်းဢိၵ်ႇတင်းပီႈၼွင်ႉၸိူဝ်ႉၶိူဝ်းၸဝ်ႈႁဝ်းၸိူဝ်းၼၼ်ႉ တၵ်းဢွၼ်ၵၼ်လႆႈ ဢသၢၵ်ႈၵတ်းယဵၼ်ၶျၢမ်းသႃႇတီႈၶႃႈဢေႃႈ။
၁၈ ပေႃးဢမ်ႇၼၼ် ပေႃးၸဝ်ႈႁဝ်းဢမ်ႇဢွၵ်ႇၵႂႃႇၸူးၵႃႈတီႈမူးမၢတ်ႈၽွင်းမိူင်းၶုၼ်ႁေႃၶမ်းပႃႇပုလုၼ်ႇ ၸိူဝ်းၼၼ်ႉၸိုင်ဝဵင်းၼႆႉတၵ်းလႆႈၶၢမ်ႇ တၢင်းဢၼ်ဢဝ်ဢၢပ်ႈၵႃႈၼႂ်းမိုဝ်းၵူၼ်းၶႃႇလတေႇ တင်းလၢႆလႄႈၶဝ်ၼၼ်ႉတၵ်းဢွၼ်ၵၼ်ဢဝ်ၽႆးတုတ်ႇလႄႈ ၸဝ်ႈႁဝ်းၵေႃႈတၵ်းဢမ်ႇလွတ်ႈသေၵႃႈၼႂ်းမိုဝ်းၶဝ်ၼၼ်ႉတီႈၶႃႈ၊ ဝႃႈၼင်ႇ ၼႆဢေႃႈ။
၁၉ ၶုၼ်လူင်ၸေႇတၵိၵေႃႈလၢတ်ႈတီႈ ယေႇရမိလႄႈဝႃႈ၊-ၵဝ်ၵူဝ်ႁႄၵူၼ်းယုတဢၼ်ၵႂႃႇၶဝ်ႈယူႇၽၢႆႇၵူၼ်းၶႃႇလတေႇ ၸိူဝ်းၼၼ်ႉလႄႈၵူဝ်ၶဝ်တၵ်းဢဝ်ၵဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၼၼ်ႉလႄႈ ၶဝ်ၼၼ်ႉတၵ်းဢွၼ်ၵၼ်ႁဵတ်းပျၢၵ်ႈသေႉသွမ်းၵဝ်ဢေႃႈ၊ မိူဝ်ႈဢၼ်ဝႃႈ ၼင်ႇၼႆၸိုင်၊ယေႇရမိလဝ်ႈလၢတ်ႈလႄႈဝႃႈ၊-
၂၀ ၶဝ်ဢမ်ႇလႆႈဢဝ်ၸဝ်ႈႁဝ်းဢၢပ်ႈတီႈၶႃႈၵူၺ်း။ၶႅၼ်းတေႃႈထွမ်ႇဢဝ်ၵႂၢမ်းထႃႇဝရႃႉၽြႃးဢၼ်ၶႃႈၸဝ်ႈသင်ႇ လၢတ်ႈတီႈၸဝ်ႈႁဝ်းၼႆႉသေၵမ်းတီႈၶႃႈ။
၂၁ ပေႃးႁဵတ်းၸိူဝ်ႉၼင်ႇၼၼ်ၸိုင် ၸဝ်ႈႁဝ်းတၵ်းလႆႈၵတ်းယဵၼ်ၶျၢမ်းသႃႇလႄႈ ဢသၢၵ်ႈတၵ်းလႆႈလိပ်းတီႈၶႃႈဢေႃႈ။ပေႃးဢမ်ႇၼၼ် ပေႃးၸဝ်ႈႁဝ်းထဵင်ပႅတ်ႈလူၺ်ႈလွင်ႈဢၼ်တၵ်းဢွၵ်ႇၵႂႃႇၸူးၼၼ်ႉၸိုင် ၵႂၢမ်းဢၼ်ထႃႇ ဝရႃႉၽြႃးၼႄပျႃးတီႈၶႃႈၸဝ်ႈၸမ်း၊-
၂၂ တူၺ်းလူ။မေႈယိင်းဢၼ်ယင်းၵိုၵ်းယင်းၵျၢၼ်ႇ ၵႃႈၼႂ်းႁေႃၶမ်းယုတ ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ဢွၵ်ႇၸူးၵႃႈတီႈမူးမၢတ်ႈၽွင်းမိူင်း ၶုၼ်ႁေႃၶမ်းပႃႇပုလုၼ်ႇၸိူဝ်းၼၼ်ႉလႄႈ မေႈယိင်းၸိူဝ်းၼၼ်ႉ တၵ်းဢွၼ်ၵၼ်လဝ်ႈလၢတ်ႈတီႈၸဝ်ႈႁဝ်းလႄႈဝႃႈ၊- ၵေႃႉသေႈၸဝ်ႈႁဝ်းၸိူဝ်းၼၼ်ႉ တိုၵ်းယူင်းၸူဝ်းဢဝ်ၸဝ်ႈႁဝ်းလႄႈပေႉၼႅင်ႇၸဝ်ႈႁဝ်းတီႈၶႃႈယဝ်ႉ။တေႃႈလဵဝ်ၼႆႉတိၼ်ၸဝ်ႈႁဝ်းလူမ်ႇၶဝ်ႈၵႂႃႇတီႈၶႃႈယဝ်ႉ၊ ဝႃႈၼင်ႇၼႆ တီႈၶႃႈဢေႃႈ။
၂၃ ၼင်ႇၼၼ်လႄႈၶဝ်တၵ်းဢွၼ်ၵၼ်ဢဝ်မေးၸဝ်ႈႁဝ်း၊ လုၵ်ႈလၢင်းၸဝ်ႈႁဝ်းၵႃႈမီးဢွၵ်ႇၸူးၵႃႈတီႈၵူၼ်းၶႃႇလတေႇ ၸိူဝ်းၼၼ်ႉတီႈၶႃႈဢေႃႈ။ၸဝ်ႈႁဝ်းၵေႃႈ ယင်းၵၢင်းလွတ်ႈသေၵႃႈတီႈၼႂ်းမိုဝ်းၶဝ်ၼၼ်ႉလႄႈ တၵ်းႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းပႃႇပုလုၼ်ႇ လႄႈတၵ်းႁႂ်ႈဝဵင်းၼႆႉလႆႈၶၢမ်ႇတၢင်းဢၼ်ဢဝ်ၽႆးတုတ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။
၂၄ ၸေႇတၵိ ၵေႃႈမီးဢမိင်ႉတီႈယေႇရမိလႄႈဝႃႈ၊-ယႃႇပေႁႂ်ႈၽူႈ လႂ်သေၵေႃႉသေၵူၼ်းလႆႈႁူႉလႆႈငိၼ်းလွင်ႈၵႂၢမ်းၼႆႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်မႂ်းဢမ်ႇလႆႈ တၢႆ။
၂၅ ပေႃးမူးမၢတ်ႈၽွင်းမိူင်းတင်းလၢႆငိၼ်းလွင်ႈဢၼ်ၵဝ်လၢတ်ႈၵႂၢမ်းတေႃႇၵၼ်တင်းမႂ်းလႄႈ ဢွၼ်ၵၼ်မႃးတီႈမႂ်းလႄႈထၢမ်ဝႃႈ၊-မွၵ်ႇလၢတ်ႈပၼ်ႁဝ်းလွင်ႈဢၼ်မႂ်းလဝ်ႈလၢတ်ႈၵႃႈသင် တီႈၶုၼ်ႁေႃၶမ်းလႄႈၶုၼ်ႁေႃၶမ်းလၢတ်ႈၵႃႈသင်တီႈမႂ်းၼၼ်ႉသေၵမ်း။
၂၆ ယႃႇပသေိုင်ႇပေဢမ်ဝႆႉသေၵမ်း။ႁဝ်းတၵ်းဢမ်ႇဢဝ်မႂ်းတၢႆၵူၺ်း၊ ဝႃႈၼင်ႇၼႆၸိုုင်၊ မႂ်းၶိုၼ်းလၢတ်ႈတီႈၶဝ်လႄႈဝႃႈ၊-ၵဝ်တွင်းပၢၼ်ႇလဝ်ႈလၢတ်ႈယွၼ်းဢဝ်ၵႃႈတီႈၽၢႆႇၼႃႈၶုၼ်ႁေႃၶမ်း ႁႂ်ႈမၼ်းၸဝ်ႈဢမ်ႇႁႂ်ႈၵဝ်လႆႈၶိုၼ်းၵႂႃႇၵႃႈတီႈႁိူၼ်းယေႃႇၼသၼ်ႇ ႁႂ်ႈလႆႈတၢႆၵႃႈတီႈၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆ ဢေႃႈ။
၂၇ မိူဝ်ႈၼၼ်ႉမူးမၢတ်ႈၽွင်းမိူင်းတင်းသဵင်ႈတင်းလူင်ဢွၼ်ၵၼ်မႃးတီႈယေႇရမိ လႄႈၸႅတ်ႈထၢမ်မၼ်းဢေႃႈ။ မၼ်းၵေႃႈၶိုၼ်းလၢတ်ႈၸွမ်းၵႃႈၼင်ႇဢၼ်ၶုၼ်ႁေႃၶမ်းမီးဢမိင်ႉသင်ႇ လၢတ်ႈဝႆႉၼၼ်ႉသေယဝ်ႉ၊ၶဝ်ၼၼ်ႉ ယင်းဢမ်ႇဢွၼ်ၵၼ်ၸႅတ်ႈထၢမ်ထႅင်ႈလႄႈယူႇဢေႃႈ။ၽူႈ လႂ်သေၵေႃႉသေၵူၼ်းဢမ်ႇႁူႉသၢႆငၢႆလွင်ႈ တၢင်းၼၼ်ႉ။
၂၈ ၼင်ႇၼၼ်လႄႈယေႇရမိလႆႈယူႇၵႃႈၼႂ်းဝၢင်းထွင်ႇတေႃႇထိုင်ႁွတ်ႈ ဝၼ်းဢၼ်ဝဵင်းယေႇရုသလႅမ်ႇ လႆႈၶၢမ်ႇတၢင်းဢၼ်သိမ်းဢဝ်ၼၼ်ႉလႄႈ မိူဝ်ႈဢၼ်ဝဵင်းယေႇရုသလႅမ်ႇ လႆႈၶၢမ်ႇတၢင်းဢၼ်သိမ်းဢဝ်ၼၼ်ႉ မၼ်းမီးယူႇၵႃႈၼႂ်းဝၢင်းထွင်ႇၼၼ်ႉဢေႃႈ။