၃၆
ၶုၼ်ယေႃႇယၵိမ်ႇဢဝ်လိၵ်ႈယေႇရမိတုတ်ၽႆးပႅတ်ႈ
၁ ၼႂ်းပီႊဢၼ်ၶုၼ်ယေႃႇယၵိမ်ႇလုၵ်ႈၸၢႆးယုဝ်ႇသိယၶုၼ်ႁေႃၶမ်းယုတ ၸၢမ်ႇႁၢင်ႈၸၢမ်ႇႁေႃသီႇပီႊၼၼ်ႉၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈယေႇရမိ ၸမ်း၊-
၂ မႂ်းဢဝ်ႁမ်းလိၵ်ႈသေလႄႈဢဝ်ၵႂၢမ်းၵႃႈဢၼ်ၵဝ်လၢတ်ႈဝႆႉလူၺ်ႈလွင်ႈမိူင်းဢိသရေႇလ၊မိူင်းယုတဢိၵ်ႇတင်းၵူႈသိုင်ႇၵူႈမိူင်း ၸႃႉၸဵမ်မိူဝ်ႉဝၼ်းဢၼ်ၵဝ်လၢတ်ႈတီႈမႂ်းၼႂ်းပၢၼ် ၶုၼ်ယုဝ်ႇသိယ တေႃႇထိုင် ႁွတ်ႈဝၼ်းမိူဝ်ႈၼႆႉၸိူဝ်းၼၼ်ႉတႅမ်ႈသႂ်ႇဝႆႉတႃႉ။
၃ မိူဝ်ႈဢၼ်မဵဝ်းယုတ ၶဝ်ငိၼ်းၽေးဢူးပၢတ်ႈၵႃႈဢၼ်ၵဝ်ၵျၢမ်ႇပွင်တၵ်းႁဵတ်းတီႈၶဝ်ၼၼ်ႉၸိုင်ႈ ၶဝ်ၸၢင်ႊၶေးတၵ်းဢွၼ်ဝၢႆႇၶိုၼ်းသေ ၵႃႈၼႂ်းသဵၼ်ႈတၢင်းဢၼ်ႁၢႆႉဢၼ်ယုတ်ႈဢၼ်ၶဝ်ၸွမ်းယူႇၼၼ်ႉ ႁႂ်ႈၵဝ်လႆႈပွႆႇလွတ်ႈတုၸရိူၵ်ႈဢပျႅတ်ႈၶဝ်ႈဢေႃႈ၊ဝႃႈၼင်ႇၼႆဢေႃႈ။
၄ မိူဝ်ႈၼၼ်ႉယေႇရမိ ႁွင်ႉဢဝ်ပႃႇရုၵ်ႉလုၵ်ႈၸၢႆးၼေႇရိလႄႈ ပႃႇရုၵ်ႉ ၼၼ်ႉတႅမ်ႈၸွမ်းၵႃႈၼင်ႇဢၼ်သူပ်းယေႇရမိဢဝ်ၵႂၢမ်းထႃႇဝရႃႉၽြႃး ၵႃႈဢၼ်မၼ်းၸဝ်ႈမီးဢမိင်ႉဝႆႉၼၼ်ႉ လၢတ်ႈၼၼ်ႉတႅမ်ႈဝႆႉၵႃႈၼႂ်းႁမ်းလိၵ်ႈ ဢေႃႈ။
၅ ယေႇရမိၵေႃႈသင်ႇလၢတ်ႈဝႆႉတီႈပႃႇရုၵ်ႉ လႄႈဝႃႈ၊-ၵဝ်လႆႈၶၢမ်ႇတၢင်းဢၼ်ၶျုၵ်ႈဝႆႉလႄႈၵဝ်ဢမ်ႇၵႂႃႇ ၵႃႈတီႈႁိူၼ်းထႃႇဝရႃႉၽြႃးလႆႈ။
၆ ပိူဝ်ႈၼႆလႄႈမႂ်းၵႂႃႇလႄႈၽတ်းၵႂၢမ်းထႃႇဝရႃႉၽြႃး ဢၼ်မႂ်းတႅမ်ႈဝႆႉၵႃႈတီႈႁမ်းလိၵ်ႈၸွမ်းၵႃႈၼင်ႇဢၼ်သူပ်းၵဝ်လၢတ်ႈၼၼ်ႉထိုင်ႁူၶဝ်ၸိူဝ်းဢၼ် မီးၵႃႈၼႂ်းႁိူၼ်းထႃႇဝရႃႉၽြႃးၼႂ်းဝၼ်းဢၼ်ၵမ်တၢင်းၵိၼ်ၼၼ်ႉတႃႉ။တီႈၵူၼ်းယုတ ဢၼ်လုၵ်ႉသေၵႃႈတီႈၵူႈဝၢၼ်ႈၵူႈဝဵင်းမႃးၵႃႈမီးၼၼ်ႉၵေႃႈၽတ်းထိုင်ႁူၶဝ်တႃႉ။
၇ ၶဝ်ၸၢင်ႊၶေးတၵ်းၶုပ်ႉၵူမ်ႈသူးတွင်းတီႈထႃႇဝရႃႉၽြႃးလႄႈ ဝၢႆႇၶိုၼ်းသေၵႃႈၼႂ်းသဵၼ်ႈတၢင်းဢၼ်ႁၢႆႉဢၼ်ယုတ်ႈၶဝ် ၼၼ်ႉဢေႃႈ။ တၢင်းၶႆႈၸႃႉၶႆႈၸိတ်ႈဢိၵ်ႇတင်းတေႃးသႃႉတၢင်းၸႂ်မႆႈဢၼ်ထႃႇဝရႃႉၽြႃးၸီႇယၢင်ႇပုၼ်ႈ ၵူၼ်းမဵဝ်းၼႆႉၼၼ်ႉႁႅင်းယႂ်ႇၼႃႇလူင်လၢင်ဢေႃႈ၊ ဝႃႈၼင်ႇ ၼႆဢေႃႈ။
၈ ၼင်ႇၼၼ်လႄႈပႃႇရုၵ်ႉလုၵ်ႈၸၢႆးၼေႇရိ
ၼၼ်ႉႁဵတ်းၸွမ်းၵႃႈၼင်ႇဢၼ်ပရေႃးၽိတ်ႈ ယေႇရမိသင်ႇလၢတ်ႈဝႆႉၼၼ်ႉလႄႈ ဢဝ်လိၵ်ႈဢၼ်ပႃးၼုၵ်ႈၵပၢတ်ႈထႃႇဝရႃႉၽြႃးၼၼ်ႉၽတ်းၵႃႈၼႂ်းႁိူၼ်း ထႃႇဝရႃႉၽြႃးဢေႃႈ။
၉ ၼႂ်းပီႊဢၼ်ယေႃႇယၵိမ်ႇ လုၵ်ႈၸၢႆးယုဝ်ႇသိယၶုၼ်ႁေႃၶမ်းယုတ ၸၢမ်ႇႁၢင်ႈၸၢမ်ႇႁေႃႁႃႈပီႊလိူၼ်ၼဝမ ၼၼ်ႉၵူၼ်းဝဵင်းယေႇရုသလႅမ်ႇၵႃႈမီးဢိၵ်ႇတင်းၶဝ်ၸိူဝ်းဢၼ်လုၵ်ႉသေၵႃႈတီႈဝၢၼ်ႈဝဵင်းယုတ တင်းလၢႆႁွတ်ႈမႃးၵႃႈတီႈဝဵင်းယေႇရုသလႅမ်ႇ ၵႃႈမီးၼၼ်ႉဢွၼ်ၵၼ်ပၢဝ်ႇသေႃႇၶိင်ႇ ဢၼ်ၵမ်တၢင်းၵိၼ်ၵႃႈတီႈ ၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။
၁၀ မိူဝ်ႈၼၼ်ႉပႃႇရုၵ်ႉၽတ်းလိၵ်ႈဢၼ် ပႃးၵႂၢမ်းယေႇရမိၼၼ်ႉၵႃႈၼႂ်းႁိူၼ်းထႃႇဝရႃႉၽြႃးၵႃႈၼႂ်း ၵေႇမရိ လုၵ်ႈၸၢႆးသႃႇၽၢၼ်ႇၸရေးၸဝ်ႈ ၵႃႈၼႂ်းတမ်ႇတိူင်းႁၢၼ်ႉၼိူဝ်ၵႃႈႁိမ်းၽၵ်းတူဢၼ်မႂ်ႇတီႈႁိူၼ်းထႃႇဝရႃႉၽြႃးၼၼ်ႉ ထိုင်ႁူၵူၼ်း တင်းသဵင်ႈတင်းလူင်ဢေႃႈ။
၁၁ မိူဝ်ႈဢၼ်မိၵ်ႉၶႃႇယ လုၵ်ႈၸၢႆးၵေႇမရိ ဢၼ်ပဵၼ်လုၵ်ႈၸၢႆးသႃႇၽၼ်ႇ ၼၼ်ႉငိၼ်းၵႂၢမ်းထႃႇဝရႃႉၽြႃး ၵႃႈဢၼ်ပႃးၵႃႈၼႂ်းလိၵ်ႈၼၼ်ႉၸိုင် မၼ်းလူင်းၵႂႃႇၵႃႈတီႈႁေႃၶမ်းၸူးၵႃႈၼႂ်းလုၵ်းၸရေးၸဝ်ႈလႄႈ မူးမၢတ်ႈၽွင်းမိူင်းၵႃႈမီးဢၼ် ဝႃႈၸရေးၸဝ်ႈဢေႇလိသမႃႇ၊
၁၂ တေႇလႃႇယလုၵ်ႈၸၢႆသေႇမႃႇယဢေႇလၼႃႇသၼ်ႇ လုၵ်ႈၸၢႆးဢႃႇၶပေႃႇၵေႇမရိလုၵ်ႈၸၢႆးသႃႇၽၼ်ႇၸေႇတၵိ လုၵ်ႈၸၢႆးႁႃႇၼၼိဢိၵ်ႇတင်း မူးမၢတ်ႈၽွင်းမိူင်းတင်းသဵင်ႈတင်းလူင်ၸိူဝ်းၼၼ်ႉၼင်ႈလႄႈ မီးယူႇၵႃႈတီႈၼၼ်ႉဢေႃႈ။
၁၃ မိူဝ်ႈၼၼ်ႉမိၵ်ႉၶႃႇယ ၶိုၼ်းလၢတ်ႈၵႂၢမ်းဢၼ်မၼ်လႆႈငိၼ်းၼႂ်းမိူဝ်ႈဢၼ် ပႃႇရုၵ်ႉ ၽတ်းလိၵ်ႈၼၼ်ႉၸိူဝ်း ၼၼ်ႉထိုင်ႁူၵူၼ်းတင်းလၢႆၼၼ်ႉဢေႃႈ။
၁၄ မူးမၢတ်ႈၽွင်းမိူင်းၵႃႈမီးၼၼ်ႉဢွၼ်ၵၼ်ပွႆႇၸႂ်ႉ ယေႇရုတိ လုၵ်ႈၸၢႆးၼႃႇသၼိ ဢၼ်ပဵၼ်လုၵ်ႈၸၢႆးသေႇလမိ ဢၼ်ပဵၼ်လုၵ်ႈၸၢႆးၵုသိ ၼၼ်ႉၵႂႃႇၸူးၵႃႈတီႈပႃႇရုၵ်ႉသေလႄႈသင်ႇလၢတ်ႈၵႂႃႇလႄႈဝႃႈ မႂ်းၼႆႉဢဝ်မိုဝ်းမႂ်းယိပ်းၵဝ်ဢဝ်ႁမ်းလိၵ်ႈ ဢၼ်မႂ်းၽတ်းထိုင်ႁူၵူၼ်းတင်းလၢႆၼၼ်ႉသေလႄႈမႃးတႃႉ၊ဝႃႈၼင်ႇၼႆဢေႃႈ။ ပႃႇရုၵ်ႉလုၵ်ႈၸၢႆးၼေႇရိ ၼၼ်ႉၵေႃႈဢဝ်မိုဝ်းမၼ်းယိပ်းၵမ် ဢဝ်ႁမ်းလိၵ်ႈၼၼ်ႉသေလႄႈမႃးဢေႃႈ။
၁၅ ၶဝ်ဢွၼ်ၵၼ်လၢတ်ႈတီႈမၼ်းလႄႈဝႃႈ၊-ၼင်ႈလႄႈၽတ်းထိုင်ႁူႁဝ်းတႃႉ၊ဝႃႈၼင်ႇၼႆလႄႈ ပႃႇရုၵ်ႉ ၼၼ်ႉၽတ်းထိုင် ႁူၶဝ်ဢေႃႈ။
၁၆ မိူဝ်ႈဢၼ်ၶဝ်ငိၼ်းၵႂၢမ်းၵႃႈမီးၼၼ်ႉၸိုင်ၶဝ်ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်မီးတၢင်းဢၼ်ၵူဝ်ဢၼ်ႁႄတေႃႇၵၼ်လႄႈ ဢွၼ်ၵၼ်လၢတ်ႈတီႈ ပႃႇရုၵ်ႉ လႄႈဝႃႈ ႁဝ်းတၵ်းလႆႈဢဝ်ၵႂၢမ်းၵႃႈမီးၼႆႉလဝ်ႈလၢတ်ႈတီႈၶုၼ်ႁေႃၶမ်းဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။
၁၇ လၢႆးသမ်ႉၶဝ်ထၢမ်တီႈ ပႃႇရုၵ်ႉလႄႈဝႃႈမႂ်းလၢတ်ႈလွင်ႈဢၼ်မႂ်းတႅမ်ႈဝႆႉၵႂၢမ်းၵႃႈမီး ၸွမ်းၵႃႈၼင်ႇဢၼ်ဢွၵ်ႇသူပ်းမၼ်းၼၼ်ႉၸိူဝ်ႉၼင်ႇႁိုဝ်ၼၼ်ႉတီႈႁဝ်းလူ၊ ဝႃႈၼင်ႇၼႆသေယဝ်ႉ၊ ပႃႇရုၵ်ႉၶိုၼ်းလၢတ်ႈတီႈၶဝ်လႄႈဝႃႈ မၼ်းဢဝ်ၵႂၢမ်းၵႃႈမီးၼႆႉ
၁၈ လၢတ်ႈဢွၵ်ႇသူပ်းမၼ်းလႄႈၵဝ်ၶႃႈဢဝ်ၼမ်ႉမိုၵ်ႉတႅမ်ႈသႂ်ႇဝႆႉ ၵႃႈၼႂ်းလိၵ်ႈၶႃႈဢေႃႈ။
၁၉ မိူဝ်ႈဢၼ်ဝႃႈၼင်ႇၼႆၸိုင် မူးမၢတ်ႈၽွင်းမိူင်းၸိူဝ်းၼၼ်ႉဢွၼ်ၵၼ်လၢတ်ႈတီႈ ပႃႇရုၵ်ႉ လႄႈဝႃႈမႂ်းၵႂႃႇလႄႈမႂ်းဢိၵ်ႇလူၺ်ႈၵၼ်တင်းယေႇရမိ ၼၼ်ႉဢွၼ်ၵၼ်တဵတ်ႇမႅပ်းယူႇတႃႉ။ယႃႇပေႁႂ်ႈၽူႈ လႂ်သေၵေႃႉသေၵူၼ်းလႆႈႁူႉလွင်ႈဢၼ် သွင်ၶိူဝ်မီးယူႇၵႃႈတီႈ လႂ်ၼၼ်ႉ ဝႃႈၼင်ႇၼႆလႄႈ
၂၀ ဢဝ်ႁမ်းလိၵ်ႈၼၼ်ႉသိမ်းဝႆႉၵႃႈၼႂ်းလုၵ်းၸရေးဢေႇလိသမႃႇသေယဝ်ႉ ဢွၼ်ၵၼ်ၶဝ်ႈၸူးၵႃႈတီႈၶုၼ်ႁေႃၶမ်း ၵႃႈၼႂ်းႁေႃၸဝ်ႈသေလႄႈဢဝ်ၵႂၢမ်းၵႃႈမီးၼၼ်ႉ လဝ်ႈလၢတ်ႈထိုင်ႁူ ၶုၼ်ႁေႃၶမ်း ဢေႃႈ။
၂၁ ၶုၼ်ႁေႃၶမ်းပွႆႇၸႂ်ႉယေႇႁုတိၵႂႃႇႁႂ်ႈလႆႈဢဝ်ႁမ်းလိၵ်ႈၼၼ်ႉလႄႈ မၼ်းၼၼ်ႉၵႂႃႇဢဝ်ဢွၵ်ႇသေၵႃႈၼႂ်းလုၵ်းၸရေးၸဝ်ႈ ဢေႇလိသမႃႇၼၼ်ႉမႃးသေလႄႈယေႇႁုတိ ဢဝ်ၽတ်းထိုင်ႁူၶုၼ်ႁေႃၶမ်းဢိၵ်ႇတင်းထိုင်ႁူမူးမၢတ်ႈၽွင်းမိူင်းၵႃႈဢၼ်ၸုၵ်းၶႃးၸႃးယူႇ ၵႃႈတီႈႁိမ်းၶုၼ်ႁေႃၶမ်းၸိူဝ်းၼၼ်ႉဢေႃႈ။
၂၂ မိူဝ်ႈၼၼ်ႉပဵၼ်လိူၼ်ၼဝမ လႄႈၶုၼ်ႁေႃၶမ်းၼၼ်ႉ ၼင်ႈယူႇၵႃႈၼႂ်းႁေႃၸဝ်ႈ ဢၼ်ယူႇမိူဝ်ႈၶိင်ႇၵတ်းၼၼ်ႉလႄႈၵႃႈတီႈၽၢႆႇၼႃႈမၼ်းၸဝ်ႈၼၼ်ႉ မီးၵွင်ထၢၼ်ႇၽႆးဝႆႉ ယူႇၵႃႈၼိူဝ်ၽၢင်ၽႆးဢေႃႈ။
၂၃ မိူဝ်ႈၼၼ်ႉယေႇႁုတိၼၼ်ႉတၼ်းၽတ်းမႅၼ်ႈ သၢမ်ၶႅပ်းသီႇၶႅပ်းၼိုင်ႈယဝ်ႉၼၼ်ႉၸိုင် ၶုၼ်ႁေႃၶမ်းဢဝ်မိတ်ႈထိူဝ်ထႅၵ်ႇသေလႄႈဢဝ်ႁမ်းလိၵ်ႈထႅမ်ႈတူၵ်းသႂ်ႇၵႃႈၼႂ်းၽႆးဢၼ်မီးၵႃႈၼိူဝ်ၽၢင်ၽႆးၼၼ်ႉ တေႃႇထိုင်ႁွတ်ႈႁမ်းလိၵ်ႈၼၼ်ႉထၼ်ႈပေႃးမႆႈသုတ်းပႅတ်ႈ တင်းသဵင်ႈတင်းမူတ်းၵႃႈၼႂ်းၽႆးဢၼ် မီးၵႃႈၼိူဝ်ၽၢင်ၽႆးၼၼ်ႉဢေႃႈ။
၂၄ ၶုၼ်ႁေႃၶမ်းဢိၵ်ႇတင်းၶႃႈၵူၼ်းမၼ်း ဢၼ်ငိၼ်းၵႂၢမ်းၵႃႈမီးၼၼ်ႉၸိူဝ်းၼၼ်ႉ ဢမ်ႇဢွၼ်ၵၼ်ၵူဝ်ႁႄသေၵေႃႉသေၵူၼ်း။ဢမ်ႇဢွၼ်ၵၼ်ၸၵ်ႉသိၵ်ႇၶူဝ်းၼုင်ႈတၢင်းမႆၶဝ်။
၂၅ ၵူၺ်းၵႃႈ ဢေႇလၼႃႇသၼ်ႇ၊တေႇလႃႇယ၊ၵေႇမရိၸိူဝ်းၼၼ်ႉ ဢွၼ်ၵၼ်တွင်းပၢၼ်ႇတီႈၶုၼ်ႁေႃၶမ်းႁႂ်ႈမၼ်းဢမ်ႇဢဝ်ႁမ်းလိၵ်ႈၼၼ်ႉတုတ်ႇၽႆးလႄႈ ၶုၼ် ႁေႃၶမ်းဢမ်ႇထွမ်ႇဢမ်ႇဢဝ်ၵႂၢမ်းၶဝ်။
၂၆ လၢႆးသမ်ႉၶုၼ်ႁေႃၶမ်းပွႆႇၸႂ်ႉယေႇရမေႇလ လုၵ်ႈၸၢႆးၸဝ်ႈၸရႃႇယလုၵ်ႈၸၢႆးဢႃႇၸရေႇလ ၸိူဝ်းၼၼ်ႉၵႂႃႇႁႂ်ႈလႆႈတီႉဢဝ်ၸရေးပႃႇရုၵ်ႉ ဢိၵ်ႇတင်းပရေႃးၽိတ်ႈယေႇရမိဢေႃႈ။ၵူၺ်းၵႃႈထႃႇဝရႃႉၽြႃး ဢဝ်သွင်ၶႃၼၼ်ႉသိူင်ႇဝႆႉဢေႃႈ။
၂၇ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ယေႇရမိလိုၼ်းသေဢၼ်ၶုၼ်ႁေႃၶမ်း ဢဝ်ႁမ်းလိၵ်ႈဢၼ်ပႃးၵႂၢမ်းပႃႇရုၵ်ႉ တႅမ်ႈဝႆႉၸွမ်းၵႃႈၼင်ႇဢၼ်ယေႇရမိဝႃႈဢွၵ်ႇသူပ်းၼၼ်ႉ တုတ်ႇၽႆးပႅတ်ႈၼၼ်ႉလႄႈဝႃႈၸမ်း
၂၈ မႂ်းဢဝ်ႁမ်းလိၵ်ႈတၢင်ႇဢၼ်သေလႄႈ ဢဝ်ၵႂၢမ်းၵႃႈဢၼ်ပႃးၵမ်းဢွၼ်တၢင်းၵႃႈၼႂ်းႁမ်းလိၵ်ႈၽိုၼ် ပထမ ဢၼ်ယေႃႇယၵိမ်ႇၶုၼ်ႁေႃၶမ်းယုတဢဝ်တုတ်ႇ ၽႆးပႅတ်ႈၼၼ်ႉၸိူဝ်းၼၼ်ႉတႅမ်ႈသႂ်ႇဝႆႉတႃႉ။
၂၉ မႂ်းတၵ်းလႆႈလၢတ်ႈလူၺ်ႈလွင်ႈယေႃႇယၵိမ်ႇ ၶုၼ်ႁေႃၶမ်းယုတလႄႈဝႃႈ၊- ထႃႇဝရႃႉၽြႃးမီးဢမိင်ႉၸမ်းမႂ်းဢဝ်ႁမ်းလိၵ်ႈၼၼ်ႉတုတ်ႇၽႆးပဵတ်ႈလႄႈလၢတ်ႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းတႅမ်ႈသႂ်ႇဝႆႉ ၵႃႈၼႂ်းႁမ်းလိၵ်ႈၼႆႉဝႃႈၶုၼ်ႁေႃၶမ်းပႃႇပုလုၼ်ႇ တၵ်းမႃးဢမၢၼ်ႇၶၢၼ်ပဵၼ်လႄႈ ယႃႉမိူင်းၼႆႉပႅတ်ႈသေလႄႈ ႁႂ်ႈပဵၼ်တီႈဢၼ်ထၢတ်ႇၵူၼ်းထၢတ်ႇတရိၵ်ႈသၢၼ်ႇ တင်းလၢႆၵႂႃႇဢေႃႈ၊ ဝႃႈၼင်ႇၼႆ။
၃၀ ပိူဝ်ႈၼႆလႄႈထႃႇဝရႃႉၽြႃးဢဝ်လွင်ႈယေႃႇယၵိမ်ႇ ၶုၼ်ႁေႃၶမ်းယုတလႄႈမီးဢမိင်ႉၸမ်း၊-မဵဝ်းၸိူဝ်ႉၶိူဝ်းမၼ်း ဢမ်ႇလႆႈၼင်ႈၵႃႈၼိူဝ်ရႃႇၸႃႉပလၢင်ႇတႃႇဝိတ်ႉ။ တူဝ်တၢႆမၼ်းတၵ်းလႆႈၶၢမ်ႇတၢင်းဢၼ်ထႅမ်ႈပႅတ်ႈ ၵႃႈၼႂ်းလႅတ်ႇၶႅင်ၵႃႈဝၼ်းဢိၵ်ႇတင်း ၵႃႈၼႂ်းၼမ်ႉမူၺ််ၼမ်ႉၼၢႆးၶိင်ႇၵႃႈၶိုၼ်းဢေႃႈ။
၃၁ ၵဝ်ၸၵ်းၸီႇယၢင်ႇပၼ်တၢမ်ႇတီႈမၼ်း ဢိၵ်ႇတင်းလုၵ်ႈမၼ်းလၢၼ်မၼ်းတင်းၶႃႈၵူၼ်းမၼ်းတင်းလၢႆ ၸွမ်းၵႃႈၼင်ႇဢပျႅတ်ႈၶဝ်မီးၼၼ်ႉဢေႃႈ။ၵဝ်တၵ်းႁႂ်ႈၽေးဢူးပၢတ်ႈၵႃႈဢၼ်ၵဝ်လၢတ်ႈဝႆႉၼၼ်ႉ ႁွတ်ႈထိုင်ၵႃႈၼိူဝ်ၶဝ်ဢိၵ်ႇတင်း ၵူၼ်းဝဵင်းယေႇရုသလႅမ်ႇ တင်းၵူၼ်းမိူင်းယုတ တင်းလၢႆၵွပ်ႈပိူဝ်ႈဢၼ်ၶဝ်ဢမ်ႇထွမ်ႇဢမ်ႇဢဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၃၂ မိူဝ်ႈၼၼ်ႉယေႇရမိ ဢဝ်ႁမ်းလိၵ်ႈတင်းဢၼ်ပၼ်တီႈၸရေးလူင်ပႃႇရုၵ်ႉ လုၵ်ႈၸၢႆးၼေႇရမိၼၼ်ႉလႄႈမၼ်းၼၼ်ႉဢဝ်ၵႂၢမ်းၵႃႈဢၼ်ယေႇရမိ ဝႃႈဢွၵ်ႇသူပ်းလႄႈပႃးၵႃႈၼႂ်းလိၵ်ႈဢၼ်ယေႃႇယၵိမ်ႇ ၶုၼ်ႁေႃၶမ်းဢဝ်တုတ်ႇၽႆးပႅတ်ႈၼၼ်ႉလႄႈတႅမ်ႈသႂ်ႇဝႆႉဢေႃႈ။ ၵႂၢမ်းဢၼ်မိူၼ်ၵၼ်တင်းၵႂၢမ်းၼၼ်ႉၵေႃႈထၢပ်ႈလႄႈ ဢဝ်သႂ်ႇထႅင်ႈဢေႃႈ။