၃၂
ယေႇရမိသိုဝ်ႉဢဝ်ၵွၵ်ႉလိၼ်
၁ ၼုၵ်ႈၵပၢတ်ႈၸဝ်ႈလုၵ်ႉသေၵႃႈတီႈထႃႇဝရႃႉၽြႃးႁွတ်ႈမႃးၵႃႈတီႈယေႇရမိ ၼႂ်းပီႊဢၼ်ၸေႇတၵိၶုၼ်ႁေႃၶမ်းယုတ ၸၢမ်ႇႁၢင်ႈၸၢမ်ႇႁေႃသိပ်းပီႊၼေႇပုၶတ်ႉၼေႇၸႃႇ ၸၢမ်ႇႁၢင်ႈၸၢမ်ႇႁေႃသိပ်းပၢႆပႅတ်ႇပီႊ ၼၼ်ႉဢေႃႈ။
၂ ၼႂ်းၶိင်ႇမိူဝ်ႈၼၼ်ႉႁူဝ်ႁၢၼ်ၵူၼ်းသိုၵ်းၶုၼ်ႁေႃၶမ်းပႃႇပုလုၼ်ႇ တင်းလၢႆဢွၼ်ၵၼ်လဵပ်ႈႁွပ်ႈဝဵင်းယေႇရုသလႅမ်ႇဝႆႉယဝ်ႉလႄႈ ပရေႃးၽိတ်ႈယေႇရမိၼၼ်ႉ လႆႈၶၢမ်ႇတၢင်းဢၼ်ၶျုၵ်ႈဝႆႉၵႃႈၼႂ်းထွင်ႇဢၼ်မီးၵႃႈၼႂ်းႁေႃၸဝ်ႈ ၶုၼ်ႈႁေႃၶမ်းယုတ ၼၼ်ႉယူႇ ဢေႃႈ။
၃ လွင်ႈမၼ်းၸမ်းၸေႇတၵိၶုၼ်ႁေႃၶမ်းယုတၼၼ်ႉဢဝ်မၼ်းၶင်ဝႆႉၵႃႈၼႂ်းထွင်ႇလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁဵတ်းပရေႃးၽိတ်ႈသေလႄႈ ႁေႃးလၢတ်ႈဝႃႈ၊-ထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းဢဝ်ဝဵင်းၼႆႉ ဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်းပႃႇပု လုၼ်ႇလႄႈမၼ်းၼၼ်ႉတၵ်းသိမ်းဢဝ်ဢေႃႈ။
၄ ၸေႇတၵိၶုၼ်ႁေႃၶမ်းယုတ တၵ်းဢမ်ႇၵၢင်းလွတ်ႈသေၵႃႈၼႂ်းမိုဝ်းၵူၼ်းၶႃႇလတေႇ တင်းလၢႆလႄႈ တၵ်းလႆႈႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းပႃႇပုလုၼ်ႇ ဢမၢၼ်ႇၶၢၼ်ပဵၼ်ဢေႃႈ။ သွင်ၶႃတၵ်းဢဝ်သူပ်းတေႃႇသူပ်းလၢတ်ႈၵၼ်လႄႈ ဢဝ်တႃတေႃႇတႃလူတူၺ်းၵၼ် ယူႇဢေႃႈ။
၅ မၼ်းၼၼ်ႉတၵ်းဢဝ်ၸေႇတၵိၵႂႃႇၵႃႈတီႈဝဵင်းပႃႇပုလုၼ်ႇလႄႈ မၼ်းတၵ်းလႆႈယူႇၵႃႈတီႈမိူင်းၼၼ်ႉတေႃႇထိုင်ႁွတ်ႈ ၵဝ်မႃးလူမႃးတူၺ်းမၼ်းၼၼ်ႉဢေႃႈ။ပိၵ်ႉသမ်ႉသူတိုၵ်းသိုၵ်းၵၼ်တင်းၵူၼ်းၶႃႇလတေႇတင်းလၢႆသေၵေႃႈ သူဢမ်ႇလႆႈပေႉလႆႈၼႅင်ႇဝႃႈၼင်ႇၼႆ၊ဝႃႈၼင်ႇၼႆဢေႃႈ။
၆ မိူဝ်ႈၼၼ်ႉယေႇရမိၶိုၼ်းလၢတ်ႈလႄႈဝႃႈ ၼုၵ်ႈၵပၢတ်ႈထႃႈရဝရႃႉၽြႃးႁွတ်ႈမႃးတီႈၵဝ်ၸမ်း၊- တူၺ်းလူ။ႁႃႇၼမေႇလ လုၵ်ႈၸၢႆးသႃႇလုမ်ႇ ပေႃႈၼႃႉမႂ်းၼၼ်ႉ တၵ်းမႃးတီႈမႂ်းလႄႈလၢတ်ႈဝႃႈ၊-
၇ သိုဝ်ႉဢဝ်တူင်ႈၼႃးၵဝ်ဢၼ် မီးၵႃႈတီႈဝဵင်းဢႃႇၼႃႉသုတ်ႉၼၼ်ႉသေၵမ်း။လွင်ႈမၼ်းၸမ်း မႂ်းပိူင်ႇတၢင်းဢၼ်ထုတ်ႇၼုၵ်ႈဢဝ် လႄႈသိုဝ်ႉဢဝ်ၼၼ်ႉဢေႃႈ၊ ဝႃႈၼင်ႇၼႆလႄႈ ႁႃႇၼမေႇလ လုၵ်ႈၸၢႆးပေႃႈၼႃႉၵဝ်ၼၼ်ႉမႃးၸူးတီႈၵဝ်ၵႃႈၼႂ်းထွင်ႇ မႅၼ်ႈၼင်ႇဢၼ်ထႃႇဝရႃႉၽြႃး မီးဢမိင်ႉၼၼ်ႉလႄႈလၢတ်ႈတီႈၵဝ်လႄႈဝႃႈ၊-
၈ ၶႅၼ်းတေႃႈသိုဝ်ႉဢဝ်တူင်ႈၼႃးၵဝ် ဢၼ်မီးၵႃႈတီႈဝဵင်းဢႃႇၼသုတ်ႉၼႂ်းဢိူင်ႇပိၼ်ႇယႃႇမိၼ်ၼၼ်ႉသေၵမ်း။ မႂ်းမီးဢၶႂၢင်ႉဢၼ်ပိူင်ႇၶၢမ်ႇဢမူၺ်ႇဢိၵ်ႇတင်း ဢၶႂၢင်ႉဢၼ်ပိူင်ႇတၢင်းဢၼ်ထုတ်ႇဢဝ်ၼုၵ်ႈဢဝ်ၼၼ်ႉလႄႈ သိုဝ်ႉဢဝ် ပုၼ်ႈတူဝ်မႂ်းသေၵမ်း၊ဝႃႈၼင်ႇၼႆဢေႃႈ။
၉ မိူဝ်ႈၼၼ်ႉၵဝ်ႁူႉလွင်ႈဢၼ်ၵႂၢမ်းၼႆႉပဵၼ်ၼုၵ်ႈၵပၢတ်ႈထႃႇဝရႃႉၽြႃးၼၼ်ႉလႄႈၵဝ်သိုဝ်ႉဢဝ်ၼႃးႁႃႇၼမေႇလ လုၵ်ႈၸၢႆးပေႃႈၼႃႉၵဝ် ဢၼ်မီးၵႃႈတီႈဝဵင်းဢႃႇၼသုတ်ႉ ၼၼ်ႉလႄႈ ၸင်ႁိဝ်ႈပၼ်ၵႃႈမၼ်းၶၼ်မၼ်းသိပ်းပၢႆၸဵတ်းၵျၢပ်ႈသၶေႇလဢေႃႈ။
၁၀ လိၵ်ႈၶျုၵ်ႈၵေႃႈၵဝ်ၸီႇယၢင်ႇတႅမ်ႈလႄႈ တွၵ်ႇတၼ်းသိၵ်ႈသေယဝ်ႉႁွင်ႉဢဝ်သၢၵ်ႈ သေႇလႄႈဢဝ်ယွႆးၸင်ႁိဝ်ႈငိုၼ်းပၼ်ဢေႃႈ။
၁၁ ၵဝ်ဢဝ်လိၵ်ႈၶျုၵ်ႈဢၼ်တွၵ်ႇတၼ်းသိၵ်ႈၽိုၼ်ၼိုင်ႈ ဢိၵ်ႇတင်းလၢၵ်ႈၶၢမ်ႇမၼ်းဢၼ်ၽုၺ်ႇပိုတ်ႇဝႆႉ ၽိုၼ်ၼိုင်ႈၸွမ်းၼင်ႇ ထုင်းၸၢမ်ႇထမ်ႇမသၢတ်ႈၼၼ်ႉသေလႄႈဢဝ်လိၵ်ႈၶျုၵ်ႈၼၼ်ႉဢၢပ်ႈပၼ်ၵႃႈတီႈ ပႃႇရုၵ်ႉလုၵ်ႈ ၸၢႆးၼေႇရိ
၁၂ ဢၼ်ပဵၼ်လုၵ်ႈၸၢႆးမႃႇသေႇယ ၼၼ်ႉသိုဝ်ႈၼႃႈတႂ်ႈတႃႁႃႇၼမေႇလ လုၵ်ႈၸၢႆးပေႃႈၼႃႉၵဝ်ဢိၵ်ႇတင်း သိုဝ်ႈၼႃႈတႂ်ႈတႃသၢၵ်ႈသေႇဢၼ်ထူဝ်း လၢၵ်းမၢတ်ႈတီႈလိၵ်ႈၶျုၵ်ႈၼၼ်ႉတင်း
၁၃ ၵူၼ်းယုတဢၼ်ၼင်ႈယူႇၵႃႈၼႂ်းထွင်ႇတင်းသဵင်ႈတင်းလူင်ၼၼ်ႉသေလႄႈ သင်ႇလၢတ်ႈဝႆႉတီႈပႃႇရုၵ်ႉၵႃႈတီႈၽၢႆႇ ၼႃႈၶဝ်ၼၼ်ႉလႄႈဝႃႈ၊-
၁၄ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈ မဵဝ်းဢိသရေႇလမီးဢမိင်ႉၸမ်း၊-ဢဝ်လိၵ်ႈၶျုၵ်ႈၸိူဝ်းၼႆႉဢၼ်ဝႃႈလိၵ်ႈဢၼ်တွၵ်ႇတၼ်းသိၵ်ႈၽိုၼ်ၼိုင်ႈ ဢိၵ်ႇတင်းလၢၵ်းၶၢမ်ႇမၼ်းဢၼ်ၽုၺ်ႇပိုတ်ႇဝႆႉၽိုၼ်ၼိုင်ႈလႄႈ ဢဝ်သႂ်ႇဝႆႉၵႃႈၼႂ်းမေႃႈလိၼ်ႁႂ်ႈတႄႇယူႇၶိင်ႇၵႃႇလႃႉႁိုင်ၼႃႇ တႃႉ။
၁၅ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-တၵ်းမီးတၢင်းဢၼ်သိုဝ်ႉဢဝ်ႁိူၼ်း၊ ၼႃးႁႆႊ၊သူၼ်ဢူးယဵၼ်ႇၸပိတ်ႈၵႃႈၼႂ်းမိူင်းၼႆႉထႅင်ႈလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။
၁၆ ၵဝ်ဢဝ်လိၵ်ႈၶျုၵ်ႈဢၢပ်ႈပၼ်တီႈပႃႇရုၵ်ႉလုၵ်ႈၸၢႆးၼေႇရိၼၼ်ႉသေယဝ်ႉ ၵဝ်သူးတွင်းႁဵတ်းပထၼႃႇတီႈထႃႇဝရႃႉၽြႃးလႄႈဝႃႈ၊-
၁၇ ၸဝ်ႈထႃႇဝရႃႉၽြႃးတီႈၶႃႈ။ၸဝ်ႈႁဝ်းဢဝ်တင်း မႁႃႇတၼ်းၶူဝ်းဢိၵ်ႇတင်းတၢင်းဢၼ်ယိုၼ်းၶႅၼ်မိုဝ်းၸဝ်ႈႁဝ်း ႁဵတ်းပဵၼ်ၾႃႉၵၢင်ႁၢဝ် တင်းလိၼ်မိူင်းတီႈၶႃႈယဝ်ႉ။
၁၈ လွင်ႈတၢင်းဢၼ်ၸဝ်ႈႁဝ်းဢမ်ႇတတ်ႈၼိုင်ႇလႆႈၼၼ်ႉ ဢမ်ႇမီးသေၸိူဝ်ႉသေဢၼ်တီႈၶႃႈ။ၸဝ်ႈႁဝ်းႁဵတ်းၵျေးၸူးၵရူႉၼႃႇတီႈၵူၼ်းပဵၼ်ႁဵင်ပဵၼ်မိုၼ်ႇယူႇသေလႄႈ ႁႂ်ႈဢပျႅတ်ႈပေႃႈတင်းလၢႆတူၵ်းႁွတ်ႈ ၵႃၼႂ်းႁူဝ်ဢူၵ်းလုၵ်ႈၶဝ်လၢၼ်ၶဝ်ဢၼ်ပဵၼ်လိုၼ်းၶဝ်ၼၼ်ႉတီႈၶႃႈဢေႃႈ။ၸဝ်ႈႁဝ်းပဵၼ်ၽြႃးဢၼ်ယႂ်ႇမျၢတ်ႈၼႃႇ၊ ၽြႃးဢၼ်တဵမ်ဝႆႉတင်းမႁႃႇတၼ်းၶူဝ်းလႄႈမီးၼႃႇမႃႉၸိုဝ်သဵင်ဢၼ်ဝႃႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးတီႈၶႃႈဢေႃႈ။
၁၉ ၸဝ်ႈႁဝ်းၵျၢမ်ႇပွင်တၢင်းၵျၢမ်ႇတၢင်းပွင် ဢၼ်လၢၵ်ႇလၢႆးလႄႈၸီႇယၢင်ႇ လွင်ႈတၢင်းဢၼ်ႁႅင်းယႂ်ႇယူႇသေလႄႈ ၽုၺ်ႇတႃမိုၼ်းတႃၸူးသဵၼ်ႈတၢင်းဢၼ်လုၵ်ႈၵူၼ်းတင်းလၢႆၵႂႃႇမႃးၵႃႈမီး ႁႂ်ႈလႆႈပၼ်ဢပျႅတ်ႈတီႈၵူၼ်းႁင်းၽႂ်ႁင်းမၼ်း ၸွမ်းၼင်ႇသဵၼ်ႈတၢင်းၶဝ်ဢိၵ်ႇတင်းဢၵျူဝ်းတၢင်းၵမ်တၢင်းၵျၢင်ႉၶဝ်ၼၼ်ႉ တီႈၶႃႈ ဢေႃႈ။
၂၀ ၸဝ်ႈႁဝ်းၼႄပျႃးၼီႈမိၵ်ႈလၢၵ်ႈၶၼႃႇဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆ ၵႃႈတီႈမိူင်းဢေႇၵႅပ်ႉတု ၵႃႈၼႂ်းၵူၼ်းမဵဝ်းဢိသရေႇလဢိၵ်ႇတင်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ တေႃႇထိုင်ႁူတ်ႈဝၼ်းမိူဝ်ႈၼႆႉလႄႈ ႁႂ်ႈၼႃႇမႃႉၸိုဝ်သဵင်ၸဝ်ႈႁဝ်းႁူင်ႁၢင်းယူႇတႃႇသေႇ မိူၼ်ၸိူဝ်ႉၼင်ႇဝၼ်းမိူဝ်ႈၼႆႉတီႈၶႃႈ ဢေႃႈ။
၂၁ ၸဝ်ႈႁဝ်းဢဝ်တင်းၼီႈမိၵ်ႈလၢၵ်ႈၶၼႃႇလွင်ႈတၢင်းဢၼ်လီဢၢမ်း၊ မိုဝ်းၸဝ်ႈဢၼ်ႁႅင်းယႂ်ႇ၊ၶႅၼ်ၸဝ်ႈဢၼ်ယဵတ်ႇယိုၼ်း၊ လွင်ႈတၢင်းဢၼ်လီၵူဝ်လီႁႄၸိူဝ်းၼၼ်ႉၼုၵ်ႈဢဝ်ၵူၼ်းၸဝ်ႈႁဝ်းၵူၼ်းမဵဝ်း ဢိသရေႇလ တင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတု မႃးလႄႈ
၂၂ ဢိတ်းလူပၼ်မိူင်းၼႆႉဢၼ်ၸဝ်ႈႁဝ်းတိူင်ႇဝႃႈဝႆႉတီႈပူႇၶဝ်မွၼ်ႇၶဝ် လူၺ်ႈလွင်ႈဢၼ်တၵ်းပၼ်တီႈၶဝ်ဢၼ်ဝႃႈမိူင်းဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႊလႆယူႇၼႆႉတီႈၶဝ်သေယဝ်ႉ၊ ၶဝ်ဢွၼ်ၵၼ်ၶဝ်ႈ လႄႈသိမ်းဢဝ်ယဝ်ႉသေၵေႃႈ
၂၃ ၶဝ်ဢမ်ႇထွမ်ႇဢမ်ႇဢဝ်ဢမိင်ႉၸဝ်ႈ၊ ဢမ်ႇၸွမ်းသဵၼ်ႈတၢင်းတြႃးၸဝ်ႈ၊ဢမ်ႇၵမ်ဢမ်ႇၵျၢင်ႉတင်းၵမ်တၢင်းၵျၢင်ႉ ဢၼ်ၸဝ်ႈႁဝ်းသင်ႇလၢတ်ႈဝႆႉၼၼ်ႉလႃးလႃးလႄႈ ၸဝ်ႈႁဝ်းႁႂ်ႈၽေးဢူးပၢတ်ႈ ၵႃႈဢၼ်ၶဝ်လႆႈၶၢမ်ႇၼႆႉႁွတ်ႈထိုင်ၵႃႈၼိူဝ်ၶဝ် တီႈၶႃႈယဝ်ႉ။
၂၄ ၶႅၼ်းတေႃႈလူတူၺ်းတႅၼ်ႈလိၼ်လၢင်းၸီးၸိူဝ်းၼႆႉသေၵမ်းတီႈၶႃႈ။ၶဝ်ဢွၼ်ၵၼ်ႁွတ်ႈမႃးႁႂ်ႈလႆႈတိုၵ်းဢဝ်ဝဵင်းၸဝ်ႈၼႆႉတီႈၶႃႈယဝ်ႉ။ဝဵင်းၸဝ်ႈၼႆႉလႆႈၶၢမ်ႇတၢင်းဢၼ်ဢၢပ်ႈပၼ်ၵႃႈၼႂ်းမိုဝ်းၵူၼ်း ၶႃႇလတေႇ ဢၼ်ပႃးဢဝ်ၽေးလၢပ်ႇၽေးလႅဝ်း၊ၽေးဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႇလႅင်ႉမိူင်း မႃးတိုၵ်းတေႃးၸိူဝ်းၼၼ်ႉတီႈၶႃႈယဝ်ႉ။လွင်ႈတၢင်းဢၼ်ၸဝ်ႈႁဝ်းမီးဢမိင်ႉဝႆႉၸိူဝ်းၼၼ်ႉ လႆႈတဵမ်ထူၼ်းယဝ်ႉလႄႈ တူဝ်ၸဝ်ႈႁဝ်းႁၼ်ယူႇတီႈၶႃႈဢေႃႈ။
၂၅ ၸဝ်ႈထႃႇဝရႃႉၽြႃးတီႈၶႃႈ။ ၸဝ်ႈႁဝ်းမီးဢမိင်ႉတီႈၶႃႈၸဝ်ႈလႄႈဝႃႈ၊-ဢဝ်ငိုၼ်းသိုဝ်ႉဢဝ်ၵႂၢၵ်ႉလိၼ်လႄႈ ႁွင်ႉဢဝ်ၸဝ်ႈၼႆႉလႆႈႁွတ်ႈထိုင်ၵႃႈၼႂ်းမိုဝ်းၵူၼ်းၶႃႇလတေႇ ၸိူဝ်းၼၼ်ႉယဝ်ႉတီႈၶႃႈလူင်ပေႇ၊ဝႃႈၼင်ႇၼႆဢေႃႈ။
၂၆ မိူဝ်ႈၼၼ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ယေႇရမိၸမ်း၊-
၂၇ ၵဝ်ထႃႇဝရႃႉၽြႃးၼႆႉပဵၼ်ၽြႃးပဵၼ်ၸဝ်ႈဢၼ်ဢုပ်ႉပိူင်ႇသတ်ႉတဝႃႇ တင်းသဵင်ႈတင်းလူင်ဢေႃႈ။လွင်ႈတၢင်းဢၼ်ၵဝ်ဢမ်ႇတတ်ႈၼိုင်ႇလႆႈ ၼၼ်ႉမီးသေၸိူဝ်ႉသေပိူင်ႁိုဝ်။
၂၈ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။ၵဝ်တၵ်းဢဝ်ဝဵင်းၼႆႉဢၢပ်ႈပၼ်ၵႃႈၼႂ်းမိုဝ်းၵူၼ်းၶႃႇလတေႇ တင်းလၢႆဢိၵ်ႇတင်းၵႃႈၼႂ်းမိုဝ်းၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပု လုၼ်ႇလႄႈမၼ်းၼၼ်ႉတၵ်းသိမ်းဢဝ်ဢေႃႈ။
၂၉ ၵူၼ်းၶႃႇလတေႇ ဢၼ်တိုၵ်းဝဵင်းၼႆႉၸိူဝ်းၼၼ်ႉတၵ်းဢွၼ်ၵၼ်ၶဝ်သေလႄႈ ဢဝ်ၽႆးတုတ်ႇလႄႈမႆႈဝဵင်းၼႆႉတင်းဝဵင်းဢိၵ်ႇလူၺ်ႈၵၼ်တင်းႁိူၼ်းတီႈဢၼ်ၶဝ်ဢဝ်ၼၢမ်ႇသႃႇတုတ်ႇၽႆး ၵႃႈၼိူဝ်မုင်းမၼ်းပုၼ်ႈၽြႃးပႃႇလလႄႈ ႁဵတ်းၶိူင်ႈပိူင်ပုၵ်ႉၸေႃႇဢၼ်သွၼ်းလေႃႇပုၼ်ႈၽြႃးတၢင်ႇသူႇတၢင်ႇပႃး ႁႂ်ႈလႆႈတိုၵ်းယူင်းတၢင်း ၸႂ်မႆႈၶႆႈၸႃႉၵဝ်ၸဝ်ႈၸိူဝ်းၼၼ်ႉဢေႃႈ။
၃၀ လွင်ႈမၼ်းၸမ်းၵူၼ်းမဵဝ်းဢိသရေႇလဢိၵ်ႇတင်းၵူၼ်းမဵဝ်း ယုတတင်းလၢႆဢွၼ်ၵၼ်ႁဵတ်းတုၸ ရိူၵ်ႈသိုဝ်ႈၼႃႈတႂ်ႈတႃၵဝ်ၸဵမ်မိူဝ်ႈဢၼ် ဢသၢၵ်ႈၶဝ်ယင်းလဵၵ်ႉယင်းဢွၼ်ႇၼၼ်ႉယဝ်ႉ။ၵူၼ်းမဵဝ်းဢိသရေႇလ တင်းလၢႆဢွၼ်ၵၼ်ႁဵတ်းႁႂ်ႈလႆႈတိူၵ်းယူင်း တၢင်းၸႂ်မႆႈၶႆႈၸႃႉၵဝ်ၵူၺ်းၼႂ်း ၵႃႈဢၼ်မိုဝ်းၶဝ်ႁဵတ်းၼၼ်ႉယဝ်ႉ။
၃၁ ဝဵင်းၼႆႉပဵၼ်ဝဵင်းဢၼ်ႁႂ်ႈတၢင်းဢၼ်ၶႆႈၸႃႉၵဝ်ဢွၵ်ႇလႄႈ ဢၢႆႁႅင်းတေႃးသႃႉတၢင်းၸႂ်မႆႈၵဝ်ႁႅင်းယႂ်ႇၼႃႇ ႁႂ်ႈၵဝ်လႆႈပႄႇၽဵဝ်ႈမၼ်း ပႅတ်ႈသေၵႃႈတီႈသိုဝ်ႈၼႃႈတႂ်ႈတႃၵဝ်။
၃၂ ၵွပ်ႈပိူဝ်ႈတုၸရိူၵ်ႈဢၼ်ၵူၼ်းမဵဝ်းဢိသရေႇလ ၸႃႉၸဵမ်မိူဝ်ႈဝၼ်းဢၼ်တႄႇႁဵတ်းမၼ်းၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉဢိၵ်ႇတင်းၵူၼ်းမဵဝ်းယုတ တင်းလၢႆဢၼ်ဝႃႈၶုၼ်ႁေႃၶမ်းၶဝ်၊ယိတ်ႉပရေႃးႁိၵ်ႈၶဝ်၊ ပရေႃးႁိၵ်ႈၶဝ်၊ၵူၼ်းမိူင်းယုတ ဢိၵ်ႇတင်းၶဝ်ၸိူဝ်းဢၼ်ယူႇၵႃႈၼႂ်းဝဵင်းယေႇရုသလႅမ်ႇ တင်းလၢႆၸိူဝ်းၼၼ်ႉႁဵတ်းႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉၵဝ်ၼၼ်ႉဢေႃႈ။
၃၃ ၶဝ်ၼၼ်ႉယင်းဢမ်ႇဝၢႆႇၼႃႈတေႃႇၵဝ်လႄႈ ဢွၼ်ၵၼ်ၵွင်လင်ပၼ်တီႈၵဝ်ယဝ်ႉ။ပိၵ်ႉသမ်ႉၵဝ်လုၵ်ႉၸဝ်ႉၸဝ်ႉလႄႈသင်ႇသွၼ်သုင်းမႃႉပၼ်ၶဝ်သေၵေႃႈၶဝ်ဢမ်ႇဢွၼ်ၵၼ်ထွမ်ႇ ငိၼ်းႁႂ်ႈလႆႈၶၢမ်ႇဢဝ်ဢေႃးဝႃႇတႃႉၵဝ်။
၃၄ ၶဝ်ဢွၼ်ၵၼ်ဢဝ်လွင်ႈတၢင်းဢၼ်လီႁင်ႈဢဵတ်ႇသဵတ်ႇ သႂၢင်းဝႆႉၼႂ်းႁိူၼ်းဢၼ်ႁွင်ႉႁိၵ်ႈလူၺ်ႈၼႃႇမႃႉၸိုဝ်သဵင်ၵဝ် ၼၼ်ႉႁႂ်ႈမၼ်းလႆႈၵူဝ်ႈၵိူၵ်ႇယဝ်ႉလူင်ပေႇ။
၃၅ ၶဝ်ဢွၼ်ၵၼ်တႄႇႁဵတ်းထႃႇၼႃႉတီႈသုင်ၽြႃးပႃႇလ ဢၼ်မီးၵႃႈၼႂ်းၶူင်ႈႁူၺ်ႈလုၵ်ႈၸၢႆးႁိၼ်ႇၼုမ်ႇၼၼ်ႉႁႂ်ႈ လႆႈဢဝ်လုၵ်ႈၸၢႆးၶဝ်လုၵ်ႈယိင်းၶဝ် ပုၵ်ႉၸေႃႇတီႈၽြႃးမူႇလွၵ်ႇဢၼ်ၵဝ်ဢမ်ႇသင်ႇလၢတ်ႈဝႆႉတီႈၶဝ်လႄႈ ဢမ်ႇဢဝ်သႂ်ႇၸႂ်ၶဝ်ႈၸႂ် လူၺ်ႈလွင်ႈဢၼ်ၶဝ်တၵ်းႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၼႆႉ ႁႂ်ႈမဵဝ်းယုတမီးတုၸရိူၵ်ႈၼၼ်ႉယဝ်ႉ ဝႃႈၼင်ႇၼႆ၊ ထႃႇဝရႃႉၽြႃးမီး ဢမိင်ႉဢေႃႈ။
၃၆ ၼႂ်းဝႃႈၼၼ်သေၵေႃႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢဝ်လွင်ႈဝဵင်းၼႆႉဢၼ်သူၸၢင်ႊလၢတ်ႈလႄႈဝႃႈ၊-ဝဵင်းၼႆႉတၵ်းႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းပႃႇပုလုၼ်ႇ လူၺ်ႈၽေးလၢပ်ႇၽေးလႅဝ်း၊ ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႇလႅင်ႉမိူင်းဢေႃႈ၊ ဝႃႈၼင်ႇၼႆၼၼ်ႉ လႄႈမီးဢမိင်ႉၸမ်း၊-
၃၇ တူၺ်းလူ။ၵဝ်တၵ်းသမ်ႉသိမ်းဢဝ်ၶဝ် ဢွၵ်ႇသေၵႃႈၼႂ်းဝၢၼ်ႈမိူင်းတီႈဢၼ်ၵဝ်ပႃးတင်းတၢင်းဢၼ်ၶႂ်ႈၸႃႉၶႂ်ႈၸိတ်ႈ တၢင်းဢၼ်ဢၢႆႁႅင်းတေႃးသႃႉၵဝ်ဢွၵ်ႇ၊တၢင်းဢၼ်ၸႂ်မႆႈၶႆႈၸႃႉႁႅင်းယႂ်ႇၼႃႇသေလႄႈ ႁေႃႈၶဝ်ဢွၵ်ႇၸူးၼၼ်ႉသေလႄႈဢဝ်ၶိုၼ်းမႃးၵႃႈတီႈၼႆႉလႄႈ ႁႂ်ႈၶဝ်ယူႇတဵတ်ႇလီၼိမ်လီ ဢေႃႈ။
၃၈ ၶဝ်တၵ်းပဵၼ်ၵူၼ်းၵဝ်လႄႈၵဝ်ၵေႃႈတၵ်းပဵၼ် ၽြႃးပဵၼ်ၸဝ်ႈၶဝ်ဢေႃႈ။
၃၉ ႁႂ်ႈၶဝ်လႆႈၵူဝ်ႁႄၵဝ်ယူႇသေႇသေႇၸိုင်ၵဝ်တၵ်းပၼ်သၽေႃး ဢၼ်လဵဝ်ၵၼ်ဢိၵ်ႇတင်းသဵၼ်ႈတၢင်းလဵဝ်ၵၼ်တီႈၶဝ် ပုၼ်ႈဢၼ်တၵ်းပဵၼ်ဢၵျူဝ်းတီႈၶဝ် ဢိၵ်ႇတင်းတီႈလုၵ်ႈၶဝ်လၢင်းၶဝ် ဢၼ်တၵ်းပဵၼ်မႃးလိုၼ်းၶဝ်ၼၼ်ႉဢေႃႈ။
၄၀ ၵဝ်တၵ်းႁဵတ်းပတိၺိၼ်ႇထႃႇဝရႃႉ လူၺ်ႈၵၼ်တင်းၶဝ်ႁႂ်ႈၵဝ်ဢမ်ႇလႆႈၸုၼ်ႉပႅတ်ႈၶဝ်လႄႈ ႁဵတ်းၵျေးၸူးယူႇသေႇသေႇလႄႈ ႁႂ်ႈၶဝ်တဵမ်ဝႆႉတင်းသၽေႃးဢၼ်ၵူဝ်ႁႄၵဝ်ႁႂ်ႈၶဝ်ဢမ်ႇဢွၵ်ႇသေၵႃႈတီႈၵဝ်ၵႂႃႇၼၼ်ႉဢေႃႈ။
၄၁ ၵဝ်တၵ်းၶိုတ်းၸႂ်ပဵင်းၸႂ် လူၺ်ႈလွင်ႈတၢင်းဢၼ်ႁဵတ်းၵျေးၸူးတီႈၶဝ်ၼၼ်ႉလႄႈ ပႃးတင်းႁူဝ်ၸႂ်ၵဝ်တင်းဝိၺိၺ်ႇၵဝ်သဵင်ႈသဵင်ႈမူတ်းမူတ်းယူႇသေလႄႈ တၵ်းဢဝ်ၶျႃးတီႈယူႇပၼ်ၵႃႈၼႂ်းမိူင်းၼႆႉ ဢမၢၼ်ႇၶၢၼ်ပဵၼ်ဢေႃႈ။
၄၂ ထႃႇဝရႃႉၽြႃးမီးဢမိင်ႉၸမ်း၊- မိူၼ်ၸိူဝ်ႉၼင်ႇဢၼ်ၵဝ်ႁႂ်ႈၽေးဢူးပၢတ်ႈဢၼ်ယႂ်ႇၼႃႇလူင်လၢင် ႁွတ်ႈထိုင်ၵႃႈၼိူဝ်ၵူၼ်းမဵဝ်းၼႆႉၼၼ်ႉ ၵဝ်တၵ်းႁႂ်ႈတၢင်းလီဢၼ်ၵဝ်ဝႆႉၵတိတီႈၶဝ်တင်းသဵင်ႈတင်းလူင်ၼၼ်ႉ ႁွတ်ႈ ထိုင်ၵႃႈၼိူဝ်ၶဝ်ဢေႃႈ။
၄၃ တၵ်းမီးတၢင်းဢၼ်သိုဝ်ႉဢဝ်ႁႆႊၼႃးၵႃႈမိူင်းဢၼ်သူၸၢင်ႊလၢတ်ႈဝႃႈ ပဵၼ်တီႈဢၼ်ပဝ်ႇဢၼ်လၢပ်ႈလႄႈဢမ်ႇမီးၵူၼ်းဢမ်ႇမီးတရိၵ်ႈသၢၼ်ႇႁွတ်ႈထိုင်ၵႃႈၼႂ်းမိုဝ်းၵူၼ်းၶႃႇလတေႇ တင်း လၢႆယဝ်ႉဝႃႈၼင်ႇၼႆၼၼ်ႉဢေႃႈ။
၄၄ ၵူၼ်းတင်းလၢႆတၵ်းဢွၼ်ၵၼ်ႁဵတ်း တၢင်းဢၼ်ဢဝ်ငိုၼ်းသိုဝ်ႉဢဝ်ႁႆႊဢဝ်ၼႃး၊ တၢင်းဢၼ်ၸီႇယၢင်ႇတႅမ်ႈလိၵ်ႈၶျုၵ်ႈဝႆႉ၊တၢင်းဢၼ်တွၵ်ႇတၼ်းသိၵ်ႈ တၢင်းဢၼ်ႁွင်ႉဢဝ်သၢၵ်ႈသေဝႆႉၸိူဝ်းၼၼ်ႉယူႇၵႃႈၼႂ်းမိူင်း ပိၼ်ႇယႃႇမိၼ်ႇ ဢိၵ်ႇတင်းၵႃႈၼႂ်းတီႈဢၼ်လဵပ်ႈႁွပ်ႈဝဵင်း ယေႇရုသလႅမ်ႇတင်းလၢႆၵႃႈတီႈဝဵင်းဢၼ်မီးၵႃႈၼႂ်းမိူင်းယုတ၊ ၵႃႈတီႈၼိူဝ်ႁၢၼ်ႉလွႆ၊ ၵႃႈတီႈဝဵင်းဢၼ်မီးၵႃႈတႂ်ႈတီႈပၢင်ႇတီႈပဵင်း ၵႃႈတီႈဝဵင်းဢၼ်မီးၵႃႈၼႂ်းပွတ်းတၢင်းၸၢၼ်းၼၼ်ႉၸိူဝ်းၼၼ်ႉဢေႃႈ။လွင်ႈမၼ်းၸမ်းၵဝ်သမ်ႉတၵ်းဢဝ်ၶဝ်ၸိူဝ်းဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇၼၼ်ႉၶိုၼ်းမႃးဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။