၃၁
၁ ထႃႇဝရႃႉၽြႃးမီးဢမိင်ႉၸမ်း၊-ၶိင်ႇမိူဝ်ႈၼၼ်ႉၵဝ်တၵ်းပဵၼ်ၽြႃးပဵၼ်ၸဝ်ႈ တီႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းဢိသရေႇလ တင်းသဵင်ႈတင်းလူင်လႄႈ ၶဝ်ၼၼ်ႉတၵ်း ဢွၼ်ၵၼ်ပဵၼ်ၵူၼ်းၵဝ်ဢေႃႈ။
၂ လၢႆးသမ်ႉထႃႇဝရႃႉၽြႃးမီးဢမိင်ႉၸမ်း၊-ၵူၼ်းတင်းလၢႆဢၼ်ၵၢင်းလွတ်ႈတင်းၽေးလၢပ်ႇၽေးလႅဝ်းဢၼ်ဝႃႈ ၵူၼ်းမဵဝ်းဢိသရေႇလၸိူဝ်းၼၼ်ႉ လႆႈၶၢမ်ႇၵျေးၸူးၵႃႈတီႈထိူၼ်ႇၼႂ်းမိူဝ်ႈ ဢၼ်ၵဝ်ၵႂႃႇ ႁႂ်ႈလႆႈပၼ်ၵတ်းယဵၼ်ၶျၢမ်းသႃႇၼၼ်ႉယဝ်ႉ။
၃ ထႃႇဝရႃႉၽြႃးပေႃးမႃးတီႈၵဝ်မိူဝ်ႈၵွၼ်ႇဢွၼ်ၼႆႉၼၼ်ႉလႄႈမီးဢမိင်ႉဝႃႈၸမ်း၊-ၵဝ်ဢဝ်တင်းမိတ်ႉတႃႇထႃႇဝရႃႉႁၵ်ႉပႅင်းမႂ်းဢမၢၼ်ႇၶၢၼ်ပဵၼ်ဢေႃႈ။ပိူဝ်ႈၼႆလႄႈ ၵဝ်ၼႄပျႃးၵျေးၸူးၵရူႉၼႃႇၵဝ်တီႈမႂ်းႁိုင်ၼႃႇ ဢေႃႈ။
၄ ၵၢၼ်ႇၺႃႇလုၵ်ႈယိင်းသၢဝ်ဢိသရေႇလဢိူၺ်း ၵဝ်တၵ်းသမ်ႉၶိုၼ်းတႄႇႁဵတ်းမႂ်းလႄႈ မႂ်းတၵ်းႁွတ်ႈထိုင်တၢင်းဢၼ်တႄႇႁဵတ်းဢေႃႈ။မႂ်းတၵ်းသမ်ႉၶိုၼ်းလႆႈႁၢင်ႈၶိူင်ႈၵွင်ၶဵတ်ႇယူႇ၊ ၵႃႈဝႅၼ်ၸွမ်းလူၺ်ႈၵၼ်တင်း ၶဝ်ၸိူဝ်းဢၼ် ႁဵတ်းတၢင်းဢၼ်သႂၢင်ႇသိူဝ်း ၼၼ်ႉယူႇသေလႄႈၵႂႃႇပႆဢေႃႈ။
၅ မႂ်းတၵ်းသမ်ႉၶိုၼ်းလႆႈၽုၵ်ႇလႆႈသွမ်ႈ သူၼ်ဢူးယဵၼ်ႇၸပိတ်ႈၵႃႈၼိူဝ်လွႆသမႃႇရိထႅင်ႈလႄႈ ၶဝ်ၸိူဝ်းဢၼ်ႁဵတ်းသူၼ်ဢူးယဵၼ်ၼၼ်ႉတၵ်းဢွၼ်ၵၼ်ၽုၵ်ႇသွမ်ႈသေလႄႈ ၵိၼ်မၢၵ်ႇ မၼ်းၸွမ်းလူၺ်ႈဢလူဝ်ႇမႂ်းဢေႃႈ။
၆ မိူဝ်ႈဝၼ်းဢၼ်ၵူၼ်းပႂ်ႉၵၢင်ၵႃႈၼိူဝ်ႁၢၼ်ႉလွႆ ဢေႇၽရိမ်ႇၸိူဝ်းၼၼ်ႉတၵ်းႁွင်ႉသႅၼ်ႇလႄႈလၢတ်ႈဝႃႈ၊-ဢွၼ်ၵၼ်လုၵ်ႉလႄႈၶိုၼ်ႈၸူးၵႃႈတီႈလွႆၸိဢုၼ်ႇတီႈဢၼ် ထႃႇဝရႃႉၽြႃးၽြႃးပဵၼ်ၸဝ်ႈႁဝ်းမီးၼၼ်ႉတႃႉ၊ ဝႃႈၼင်ႇၼႆၼၼ်ႉ တၵ်းႁွတ်ႈထိုင်ဢေႃႈ။
၇ ထႃႇဝရႃႉၽြႃးမီးဢမိင်ႉၸမ်း၊-ဢွၼ်ၵၼ်ႁဵတ်း ၵႂၢမ်းဢၼ်သႂၢင်ႇသိူဝ်းၼႃႇလူင်လၢင်တီႈမဵဝ်း ယႃႇၵုပ်ႉလႄႈပဝ်ႇသေႃႇတီႈၸိၵ်းၸွမ်ၵူၼ်းၵူႈၸိူဝ်ႉၵူႈမဵဝ်းၼၼ်ႉတႃႉ။ဢွၼ်ၵၼ်မွၵ်ႇလၢတ်ႈသေလႄႈယွင်ႈယေႃးလႄႈဢွၵ်ႇသူပ်းဝႃႈ၊-ထႃႇဝရႃႉၽြႃးတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၵူၼ်းၸဝ်ႈႁဝ်းဢၼ်ဝႃႈၵူၼ်းမဵဝ်းဢိသရေႇလ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉသေၵမ်းတီႈၶႃႈ၊ဝႃႈၼင်ႇၼႆတႃႉ။
၈ တူၺ်းလူ။ၵဝ်တၵ်းဢဝ်ၶဝ်ဢွၵ်ႇသေၵႃႈတီႈမိူင်းတၢင်းႁွင်ႇလႄႈသိမ်းဢဝ်ၶဝ်ဢွၵ်ႇသေၵႃႈတီႈႁိမ်းၸဵင်ႇသုတ်းလိၼ်မိူင်းပုၼ်ႉမႃးဢေႃႈ။ၵေႃႉဢၼ်တႃမွတ်ႇ၊ၵေႃႉဢၼ်တိၼ်ၵႅင်ႉ၊ မေႈယိင်းဢၼ်ပႃးတွင်ႉ၊မေႈယိင်းဢၼ်ၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းၸိူဝ်းၼၼ်ႉၵေႃႈ ပႃးမႃးလူၺ်ႈၵၼ်တင်းၶဝ်လႄႈ ပဵၼ်မုၵ်ႉပဵၼ်ၸိူဝ်းဢၼ်ယႂ်ႇၼႃႇသေလႄႈ ဢွၼ်ၵၼ်ၶိုၼ်းမႃးဢေႃႈ။
၉ ၶဝ်တၵ်းဢွၼ်ၵၼ်ႁႆႈႁွင်ႉယူႇသေလႄႈမႃးလႄႈ ၵဝ်တၵ်းဢဝ်တၢင်းဢၼ်ၶဝ်ႁဵတ်းသူးတွင်းပထၼႃႇၸိူဝ်းၼၼ်ႉ ဢဝ်ၶဝ်သူင်ႇဢေႃႈ။ၵဝ်တၵ်းႁႂ်ႈၶဝ်တၢႆၸွမ်းႁိမ်းၼမ်ႉႁွင်ႊၼမ်ႉၵႄး ၵႃႈၼႂ်းသဵၼ်ႈတၢင်းဢၼ်သိုဝ်ႈလီ ဢၼ်ဢမ်ႇလႆႈတိူဝ်ႉမႅၼ်ႈလႄႈလူမ်ႉၼၼ်ႉဢေႃႈ။လွင်ႈမၼ်းၸမ်းၵဝ်ပဵၼ်ပေႃႈမဵဝ်းဢိသရေႇလ လႄႈမဵဝ်းဢေႇၽရိမ်ႇ ၼၼ်ႉပဵၼ်လုၵ်ႈၸၢႆးတူၼ်ႈၵဝ်ဢေႃႈ။
၁၀ မဵဝ်းၵူၼ်းၼမ်ၼႃႇၶဝ်ဢိူၺ်း။ဢွၼ်ၵၼ်ထွမ်ႇငိၼ်းဢမိင်ႉထႃႇဝရႃႉၽြႃးလႄႈ ႁွင်ႉပၢဝ်ႇႁွင်ႉသေႃႇၵႃႈၼႂ်းၵူၼ်းဢၼ်မီးၵႃႈၼႂ်းပၢင်ႇလၢႆႇၸိူဝ်းၼၼ်ႉသေလႄႈမွၵ်ႇလၢတ်ႈလႄႈဝႃႈ၊-ၸဝ်ႈဢၼ်ဢဝ်မဵဝ်းဢိသရေႇလ ၸၢတ်ႇပိုၼ်ပႅတ်ႈၼၼ်ႉတၵ်းသမ်ႉၶိုၼ်းၸူႉသိမ်းသေလႄႈ ပႂ်ႉယူႇၸိူဝ်ႉၼင်ႇဢၼ်ၵူၼ်းဢၼ်လဵင်ႉသူဝ်းထိင်း သူဝ်းပႂ်ႉၽုင်သူဝ်းမၼ်းယူႇၼၼ်ႉဢေႃႈ၊ ဝႃႈၼင်ႇၼႆတႃႉ။
၁၁ လွင်ႈမၼ်းၸမ်းထႃႇဝရႃႉၽြႃးထုတ်ႇၼုုၵ်ႈဢဝ်မဵဝ်းယႃႇၵုပ်ႉလႄႈ ၵႄႇၶျွတ်ႈၼုၵ်ႈဢဝ်မၼ်းဢွၵ်ႇသေၵႃႈၼႂ်းမိုဝ်းၵေႃႉဢၼ်ႁႅင်းယႂ်ႇၼႃႇသေမၼ်းၼၼ်ႉ ယဝ်ႉ။
၁၂ ပိူဝ်ႈၼႆလႄႈမဵဝ်းၵူၼ်းၸိူဝ်းၼၼ်ႉတၵ်းဢွၼ်ၵၼ်မႃးသေလႄႈ ႁဵတ်းၵႂၢမ်းၵႃႈၼိူဝ်ၸိၵ်းၸွမ်လွႆၸိဢုၼ်ႇလႄႈ တၵ်းၸူႉၵၼ်တုမ်ၵၼ်ႁႂ်ႈလႆႈၶၢမ်ႇၵျေးၸူးတၢင်းဢၼ်ထႃႇဝရႃႉၽြႃးႁဵတ်းဢၼ်ဝႃႈ ၶဝ်ႈပိူၵ်ႇၶဝ်ႈသၢၼ်ၼမ်ႉၸပိတ်ႈ၊ၼမ်ႉမၼ်း၊ သူဝ်းဢွၼ်ႇဝူဝ်းဢွၼ်ႇၸိူဝ်းၼၼ်ႉဢေႃႈ။ၸႂ်ဝိၺိၺ်ႇၶဝ်ၼၼ်ႉတၵ်းပဵၼ်ၸိူဝ်ႉၼင်ႇသူၼ်ဢူးယဵၼ်ႇဢၼ်ႁူတ်းၼမ်ႉၼၼ်ႉလႄႈ ၵမ်းလိုၼ်း တၵ်းဢမ်ႇလႆႈမီးတၢင်းဢၼ်ႁဵဝ်ႇဢၼ်ၸွပ်ႈ။
၁၃ မိူၼ်ၼင်ႇၵၢၼ်ႇၺႃႇလုၵ်ႈယိင်းသၢဝ် တၵ်းၵႃႈဝႅၼ်ယူႇသေလႄႈ မူၼ်ႈပျေႃႇလူၺ်ႈၵၼ်တင်းၵူၼ်းၼုမ်ႇၵူၼ်းၵမ်ၵူၼ်းထဝ်ႈၵူၼ်းၵေႇတင်းလၢႆလႄႈ ၵဝ်တၵ်းႁႂ်ႈလွင်ႈတၢင်းဢၼ်ၶဝ်ၶၢင်းၶီၶၢင်းၽၢၼ်ၼၼ်ႉ ပဵၼ်တၢင်းဢၼ်ၸူမ်းသိူဝ်းဢေႃႈ။ၵဝ်တၵ်းႁဵတ်းႁႂ်ႈၸႂ်ၶဝ်သၢၵ်ႈသႃႇလႄႈ ႁႂ်ႈၶဝ်သႂၢင်ႇသိူဝ်းၼႂ်းတၢင်းဢၼ်ငိၼ်းၶီ ငိၼ်းၽၢၼ်ၶဝ်ၼၼ်ႉဢေႃႈ။
၁၄ ၵဝ်တၵ်းႁႂ်ႈႁူဝ်ၸႂ်ယိတ်ႉပရေႃးႁိၵ်ႈတင်းလၢႆထၼ်ႈပေႃးမိူဝ်ႇပေႃးၸၢၼ်ႈလူၺ်ႈၼိူဝ်ႉဢၼ်ပီးလီမၼ်းလီၼၼ်ႉလႄႈ ၵူၼ်းၵဝ်တင်းလၢႆၵေႃႈ တၵ်းဢိမ်ႇတဵမ်ဝႆႉတင်းၵျေးၸူးၵဝ်ဢေႃႈဝႃႈၼႆထႃႇဝရႃႉၽြႃးမီးဢမိင်ႉဢေႃႈ။
၁၅ ထႃႇဝရႃႉၽြႃးမီးဢမိင်ႉၸမ်း၊- ၵႃႈၼႂ်းတီႈရႃႇမလႆႈငိၼ်းသဵင်ပွင်ႉသဵင်ၶၢင်းသဵင်ႁွင်ႉသဵင်ႁႆႈလႄႈ ရႃႇၶေႇလပိူဝ်ႈဢၼ်လုၵ်ႈလၢင်းတူဝ်ၸဝ်ႈၵဝ်ႇတင်းလၢႆ ဢမ်ႇမီး ၼၼ်ႉလႄႈႁႆႈယူႇဢမ်ႇပျေႇၸႂ်လႆႈ။
၁၆ ထႃႇဝရႃႉၽြႃးမီးဢမိင်ႉၸမ်း၊-မႂ်းယိူၼ်ႉၵၼ်ႈသဵင်သူမ်းမႂ်းၼႂ်းတၢင်းဢၼ်ႁႆႈဢၼ်ႁွင်ႉလႄႈယိူၼ်ႉၵၼ်ႈမၢၵ်ႇတႃမႂ်းၼႂ်းတၢင်းဢၼ်ၼမ်ႉတႃတူၵ်းၼၼ်ႉတႃႉ။တၢင်းဢၼ်မႂ်းၵမ်ၵျၢင်ႉၼၼ်ႉတၵ်းပဵၼ်ဢၵျူဝ်းတီႈမႂ်းလႄႈ ၶဝ်ၼၼ်ႉတၵ်းဢွၼ်ၵၼ် လုၵ်ႉသေၵႃႈတီႈမိူင်းရၢၼ်ႇသူႇ ၶိုၼ်းမႃး ဢေႃႈ။
၁၇ မီးလွင်ႈဢၼ်မုင်ႈထႃႈမွင်းထႃႈၼႂ်းတီႈဢၼ်သုတ်းဢၼ်ၵွႆမႂ်းၼၼ်ႉဢေႃႈ။လုၵ်ႈမႂ်းလၢင်းမႂ်းၸိူဝ်းၼၼ်ႉ တၵ်းဢွၼ်ၵၼ်ၶိုၼ်းမႃးၵႃႈတီႈမိူင်းဢၼ်ၶဝ်ယူႇၵဝ်ႇၵဝ်ႇဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃးမီး ဢမိင်ႉဢေႃႈ။
၁၈ ၵဝ်လႆႈငိၼ်းဢေႇၽရိမ်ႇတၢင်ႇဢပျႅတ်ႈတီႈတူဝ်ၸဝ်ႈၵဝ်ႇလႄႈပွင်ႉၶၢင်းပွင်ႉမိူၼ်ႇလႄႈဝႃႈၸမ်း၊- ၸဝ်ႈႁဝ်းသင်ႇသွၼ်သုင်းမႃႉၶႃႈၸဝ်ႈလႄႈၶႃႈၸဝ်ႈလႆႈၶၢမ်ႇ တၢင်းဢၼ်သင်ႇသွၼ်သုင်းမႃႉမိူၼ်ၸိူဝ်ႉၼင်ႇဝူဝ်းဢွၼ်ႇဢၼ်ႁႄၼၼ်ႉတီႈၶႃႈယဝ်ႉ။ၶႅၼ်းတေႃႈဢဝ်ၶႃႈၸဝ်ႈဝၢႆႇၶိုၼ်းသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင် ၶႃႈၸဝ်ႈတၵ်းဝၢႆႇၶိုၼ်းတီႈၶႃႈဢေႃႈ။ၸဝ်ႈႁဝ်းပဵၼ်ထႃႇဝရႃႉၽြႃးၽြႃးပဵၼ်ၸဝ်ႈ ၵဝ်ၶႃႈတီႈၶႃႈဢေႃႈ။
၁၉ လိုၼ်းသေဢၼ်ၶႃႈၸဝ်ႈဝၢႆႇၶိုၼ်းယဝ်ႉၼၼ်ႉ ၶႃႈၸဝ်ႈၶုၵ်းၸႂ်လႆႈမႆႈၸႂ်ဢမၢၼ်ႇၶၢၼ်ပဵၼ်တီႈၶႃႈဢေႃႈ။ လိုၼ်းသေဢၼ်ၶႃႈၸဝ်ႈလႆႈၶၢမ်ႇတၢင်းဢၼ်မၼ်းၸဝ်ႈ သင်ႇသွၼ်သုင်းမႃႉယဝ်ႉၼၼ်ႉ ၶႃႈၸဝ်ႈပေႃႉယႅၼ်ႉသၼ်ၶႃတူဝ်ၸဝ်ႈၵဝ်ႇတီႈၶႃႈဢေႃႈ။ၶႃႈၸဝ်ႈဢူၵ်းဢၢႆလႄႈမီးတၢင်းဢၼ်ငိူဝ်ႈယူႇငဝ်ယူႇ ၵွပ်ႈပိူဝ်ႈဢၼ်ၶႃႈၸဝ်ႈလႆႈၶၢမ်ႇတၢင်းဢၼ်သရေႇလူႉလူၺ်ႈ လွင်ႈဢပျႅတ်ႈဢၼ်ၶႃႈၸဝ်ႈႁဵတ်းမႅၼ်ႈၼႂ်းမိူဝ်ႈဢၼ်ဢသၢၵ်ႈယင်းလဵၵ်ႉယင်းဢွၼ်ႇၼၼ်ႉတီႈၶႃႈဢေႃႈ ဝႃႈၼင်ႇၼႆၼၼ်ႉဢမၢၼ်ႇ ၶၢၼ်ပဵၼ်ယဝ်ႉ။
၂၀ ဢေႇၽရိမ်ႇၼၼ်ႉပဵၼ်လုၵ်ႈၸၢႆးဢၼ်ၵဝ်ႁၵ်ႉႁိုဝ်။ပဵၼ်လုၵ်ႈဢွၼ်ႇဢၼ်လီထုၵ်ႇၸႂ်ၵျိူၵ်ႈၸႂ်ႁိုဝ်။ ၵဝ်ၶုၵ်းၸႂ်လႆႈၶႆႈၸႂ်ထူပ်းမၼ်းၼႂ်းမိူဝ်ႈဢၼ်ၵဝ်လၢတ်ႈလွင်ႈမၼ်းၼၼ်ႉၵူႈပွၵ်ႈဢေႃႈ။ပိူဝ်ႈၼႆလႄႈႁူဝ်ၸႂ်ၵဝ်မီးတၢင်းဢၼ်ၸွၼ်မႆႈၸွၼ်ၶီ ပုၼ်ႈမၼ်းလႄႈၵဝ်တၵ်းၵႄႇသႄႇဢိတ်းလူမၼ်း ဢမၢၼ်ႇၶၢၼ်ပဵၼ်ဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၂၁ မႂ်းပၵ်းသဝ်မၢတ်ႈသဝ်တွင်းတင်းလၢႆ ၵႃႈတီႈသဵၼ်ႈတၢင်းလႄႈပုၵ်းသဝ်လိၵ်ႈသဝ်လၢႆးတႃႉ။ႁႂ်ႈၸႂ်မႂ်းၸပ်းၸွႆးသဵၼ်ႈတၢင်းလူင်ဢၼ်ဝႃႈ သဵၼ်ႈတၢင်းဢၼ်မႂ်းလႆႈၸွမ်းၵႂႃႇၼၼ်ႉတႃႉ။ ၵၢၼ်ႇၺႃႇလုၵ်ႈယိင်းသၢဝ်ဢိသရေႇလဢိူၺ်း။ဝၢႆႇၶိုၼ်းမႃးတႃႉ။ဝၢႆႇၶိုၼ်းမႃးၸူး ၵႃႈတီႈဝဵင်းၵႃႈတီႈယူႇတီႈသဝ်းမႂ်းၸိူဝ်းၼႆႉတႃႉ။
၂၂ လုၵ်ႈယိင်းဢၼ်ၽွၵ်ႈပျၢၼ်ႇၶိုၼ်းၼႆႉဢိူၺ်း။မႂ်းတၵ်းလႄႇၵႂႃႇလႄႈမႃးယူႇၶိင်ႇၵႃႇလႃႉႁိုင်ၼႃႇၵႃႈႁိုဝ်။ထႃႇဝရႃႉၽြႃး တၵ်းၸီႇယၢင်ႇ လွင်ႈတၢင်းဢၼ်မႂ်ႇၵႃႈၼိူဝ်လိၼ်မိူင်းလႄႈ မေႈယိင်းတၵ်းလွမ်ႉလဵပ်ႈႁွပ်ႈၵူၼ်းၸၢႆးဢေႃႈ။
၂၃ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-ယၢမ်းမိူဝ်ႈဢၼ်ၵဝ်သိမ်းဢဝ် ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉၶိုၼ်းမႃးၼၼ်ႉၸိုင် ၶဝ်ၸိူဝ်းဢၼ်ယူႇၵႃႈၼႂ်းဝၢၼ်ႈဝဵင်းမိူင်းယုတ တင်းလၢႆၼၼ်ႉတၵ်းဢွၼ်ၵၼ်သုင်းသွင်ၵႂၢမ်းဢၼ်လၢတ်ႈလႄႈဝႃႈ၊-ထႃႇၼႃႉတီႈယူႇတၢင်းဢၼ်သိုဝ်ႈတေႃႇဢိူၺ်း။ လွႆႈတီႈယူႇတၢင်းဢၼ်မူတ်းၸၢင်ႇဢိူၺ်း။ႁႂ်ႈထႃႇဝရႃႉၽြႃးပၼ်တၢင်းလီတီႈမႂ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၂၄ မိူင်းယုတ ဢိၵ်ႇတင်းဝၢၼ်ႈဝဵင်းမၼ်းၵႃႈမီးၼၼ်ႉတၵ်းလႆႈပႃးယူႇလူၺ်ႈၵၼ်တင်း ၶဝ်ၸိူဝ်းဢၼ်ႁဵတ်းႁႆႊႁဵတ်းၼႃး တင်းၶဝ်ၸိူဝ်းဢၼ်ပႃးဢဝ်ၽုင်သူဝ်းလႄႇ လဵင်ႉလႄႇၵိၼ်တင်းလၢႆဢေႃႈ။
၂၅ ၵဝ်ႁႂ်ႈၶဝ်ၸိူဝ်းဢၼ်ႁိူဝ်ႉၸႂ်ဢူၼ်ႈၸႂ်ၼၼ်ႉလႆႈၵိၼ်ဢိမ်ႇၵိၼ်တဵမ်လႄႈ ႁႂ်ႈၶဝ်ၸိူဝ်း ဢၼ်ႁဵဝ်ႇၸွပ်ႈၵႃႈမီးၼၼ်ႉသၢၵ်ႈသႃႇဢေႃႈ၊ဝႃႈၼင်ႇၼႆဢေႃႈ။
၂၆ လိုၼ်းၼၼ်ႉၵဝ်တိုၼ်ႇမႃးလႄႈလူတူၺ်းသေယဝ်ႉ တၢင်းဢၼ်ၼွၼ်းလပ်းၵဝ်ၼၼ်ႉပဵၼ်ဢၼ်ၶိုတ်းၸႂ်ပဵင်းၸႂ်ဢေႃႈ။
၂၇ ထႃႇဝရႃႉၽြႃးမီးဢမိင်ႉၸမ်း၊-မိူဝ်ႉဝၼ်းဢၼ်ၵဝ်တၵ်းဝၢၼ်ႇပိုၼ်ၸိူဝ်ႉၽၼ်းၵူၼ်းဢိၵ်ႇတင်းၸိူဝ်ႉၽၼ်းတရိၵ်ႈသၢၼ်ႇ ၵႃႈတီႈမဵဝ်းဢိသရေႇလတင်းမဵဝ်းယုတ ၼၼ်ႉတၵ်းႁွတ်ႈထိုင်ဢေႃႈ။
၂၈ မိူၼ်ၸိူဝ်ႉၼင်ႇဢၼ်ၵဝ်ပႂ်ႉတူၺ်းလုမ်းလႃး တၢင်းဢၼ်ၼုၵ်ႈပႅတ်ႈ၊ၵိူၼ်ႇတူၵ်း၊ပိၼ်ႇႁၢႆ၊ယႃႉပႅတ်ႈ၊ ၼိၵ်ႈၸၢၵ်ႈငႅၼ်းသေးၶဝ်ၼၼ်ႉၵဝ်တၵ်းပႂ်ႉတူၺ်းလုမ်းလႃး တၢင်းဢၼ်တႄႇႁဵတ်းၽုၵ်ႇသွမ်ႈဢေႃႈ ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၂၉ ၼႂ်းၶိင်ႇၵႃႇလႃႉမိူဝ်ႉဝၼ်းၼၼ်ႉ ၶဝ်ဢမ်ႇလႆႈဢွၼ်ၵၼ်လၢတ်ႈလႄႈဝႃႈ၊-ၵေႃႉဢၼ်ပဵၼ်ပေႃႈတင်းလၢႆၵိၼ်မၢၵ်ႇၸပိတ်ႈဢၼ်သူမ်ႈလႄႈ ၶဝ်ၸိူဝ်းဢၼ်ပဵၼ်လုၵ်ႈပဵၼ်လၢင်းၼၼ်ႉ လႆႈၶၢမ်ႇတၢင်းဢၼ်ၶဵဝ်ႈမူၺ်ႈၶဵဝ်ႈ ၵႅၼ်းဢေႃႈ၊
၃၀ ဝႃႈၼင်ႇၼႆၼၼ်ႉ၊ၵူႈၵေႃႉၵူႈၵူၼ်းတၵ်းလႆႈတၢႆၵွပ်ႈပိူဝ်ႈဢပျႅတ်ႈတူဝ်ၸဝ်ႈၵဝ်ႇလႄႈ ၵေႃႉဢၼ်ၵိၼ်မၢၵ်ႇၸပိတ်ႈ ဢၼ်သူမ်ႈၵူႈၵေႃႉၵူႈၵူၼ်းတူဝ်ၸဝ်ႈၵဝ်ႇတင်း လၢႆတၵ်းလႆႈၶၢမ်ႇတၢင်းဢၼ်ၶဵဝ်ႈမူၺ်ႈၶဵဝ်ႈၵႅၼ်းဢေႃႈ။
၃၁ ထႃႇဝရႃႉၽြႃးမီးဢမိင်ႉၸမ်း၊- ၶိင်ႇၵႃႇလႃႉမိူဝ်ႉဝၼ်းဢၼ်ၵဝ်တၵ်းဢဝ် ပတိၺိၼ်ႇတြႃးဢၼ်မႂ်ႇ ဢၼ်ပႅၵ်ႇပိူင်ႈၵၼ်တင်း ပတိၺိၼ်ႇတြႃးဢၼ်ၵဝ်ပၼ်တီႈပူႇမွၼ်ႇၵူၼ်းမဵဝ်းဢိသရေႇလ ဢိၵ်ႇတင်းၵူၼ်းမဵဝ်း ယုတ
၃၂ တင်းလၢႆယၢမ်းမိူဝ်ႈဢၼ်ၵဝ်တိုတ်ႉၸုင်ဢဝ်မိုဝ်းၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုၵႂႃႇၼၼ်ႉ ပၼ်တီႈၵူၼ်းမဵဝ်းဢိသရေႇလဢိၵ်ႇတင်းၵူၼ်းမဵဝ်းယုတ တင်းလၢႆၼႆႉၼၼ်ႉတၵ်းႁွတ်ႈထိုင်ဢေႃႈ။ၶဝ်ယႃႉပႅတ်ႈပတိၺိၼ်ႇတြႃး ဢၼ်ယၢမ်ႈပၼ်မိူဝ်ႈဢွၼ်တၢင်းၼၼ်ႉ လႄႈ ၵဝ်ၵေႃႈလီႁင်ႈဢဵတ်ႇသဵတ်ႇၶဝ်ဢေႃႈ။
၃၃ ပတိၺိၼ်ႇတြႃး ဢၼ်ၵဝ်တၵ်းပၼ်တီႈၵူၼ်းမဵဝ်းဢိသရေႇလမိူဝ်ႈၶိင်ႇၵႃႇလႃႉၵမ်းလိုၼ်းၼၼ်ႉၸမ်း ၵဝ်ထႃႇဝရႃႉၽြႃး တၵ်းဢဝ်ပိင်းၺၢပ်ႈတြႃးၵဝ်သႂၢင်းသႂ်ႇပၼ်ၵႃႈၼႂ်းၶဝ်ဢေႃႈ။ တၵ်းတႅမ်ႈသႂ်ႇဝႆႉၵႃႈၼိူဝ်ႁူဝ်ၸႂ်ၶဝ်ဢေႃႈ။ၵဝ်တၵ်းပဵၼ်ၽြႃးၶဝ်လႄႈၶဝ်ၵေႃႈတၵ်းပဵၼ် ၵူၼ်းၵဝ်ဢေႃႈ။
၃၄ ၶဝ်ၼၼ်ႉမဵဝ်းၸိူဝ်ႉၶိူဝ်းၵၼ်၊ပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈ တၵ်းဢမ်ႇလႆႈပၼ်သုင်းမႃႉဢေႃးဝႃႇတႃႉတီႈၵၼ်လႄႈဝႃႈ၊-ႁူႉထႃႇဝရႃႉၽြႃးတႃႉ၊ဝႃႈၼင်ႇၼႆၼၼ်ႉ။လွင်ႈမၼ်းၸမ်းၶဝ်ၵႃႈမီးတင်းသဵင်ႈတင်းလူင် ၸႃႉၸဵမ်ၵေႃႉဢၼ်လဵၵ်ႉသေပိူၼ်ႈတေႃႇထိုင်ႁွတ်ႈဢၼ်ယႂ်ႇသေပိူၼ်ႈၼၼ်ႉ တၵ်းႁူႉၵဝ်ယူႇဢေႃႈ။မိူဝ်ႈၼၼ်ႉၵဝ်တၵ်းယိူၼ်ႉၶၢမ်ႇဢပျႅတ်ႈၶဝ်လႄႈ တၵ်းဢမ်ႇၶုၵ်းၸႂ်လႆႈၶႆႈၸႂ်ထူပ်း တၢင်းဢၼ်ၶဝ်ၽိတ်းပိူင်ႈပူၼ်ႉလိူဝ်တင်းလၢႆၼၼ်ႉလႄႈယူႇဢေႃႈ၊ ဝႃႈၼင်ႇၼႆ ထႃႇဝရႃႉၽြႃးမီးဢမိင်ႉဢေႃႈ။
၃၅ ထႃႇဝရႃႉၽြႃးဢၼ်ၶၢၼ်းၵဝ်ဝႆႉ ပုၼ်ႈဢၼ်တၵ်းလဵင်ႉတွင်ႉ ၶိင်ႇၵႃႈဝၼ်းလႄႈ ၸီႇယၢင်ႇႁဵတ်းပဵၼ်လိူၼ်ဢိၵ်ႇတင်းလၢဝ်တင်းလၢႆ ပုၼ်ႈဢၼ်တၵ်းလႅင်းထွင်ႇၶိင်ႇၵႃႈၶိုၼ်းဢၼ်သင်ႇသွၼ်သုင်းမႃႉသမ်ႇမုၵ်ႉတြႃႇၼႂ်းမိူဝ်ႈဢၼ်လႅင်းၼမ်ႉပိူပ်ႇၼမ်ႉႁွင်ႉယူႇၶၢင်းယူႇ ဢၼ်မီးၼႃႇမႃႉၸိုဝ် သဵင်ထႃႇဝရႃႉၽြႃးၼၼ်ႉမီးဢမိင်ႉၸမ်း၊-
၃၆ ပေႃးထုင်းၾိင်ႈတြႃးၸိူဝ်းၼၼ်ႉ လပ်ႉႁၢႆၵႂႃႇသေၵႃႈတီႈၽၢႆႇၼႃႈၵဝ်ၸိုင်မဵဝ်းဢိသရေႇလ တၵ်းလႆႈသုတ်းသထေၢတ်ႇသေတၢင်းဢၼ်ပဵၼ်မဵဝ်းၵူၼ်းၼၼ်ႉ ၵႃႈတီႈၽၢႆႇၼႃႈၵဝ်ယူႇတႃႇသေႇဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၃၇ လၢႆးသမ်ႉထႃႇဝရႃႉၽြႃးမီးဢမိင်ႉၸမ်း၊-ပေႃးတႅၵ်ႈၶိုပ်ႈၾႃႉၵၢင်ႁၢဝ်လႆႈ၊ ပေႃးၸွမ်းငဝ်ႈႁၢၵ်ႈလိၼ်မိူင်းၵႃႈတႂ်ႈသုတ်းလႄႈ တူၺ်းလႆႈၸိုင်ၵဝ်တၵ်းၸုၼ်ႉပႅတ်ႈၵူၼ်းမဵဝ်းဢိသရေႇလ တင်းသဵင်ႈတင်းလူင်ၵွပ်ႈပိူဝ်ႈဢပျႅတ်ႈဢၼ်ၶဝ်ႁဵတ်းမႅၼ်ႈၸိူဝ်းၼၼ်ႉဢေႃႈ၊ ဝႃႈၼႆထႃႇဝရႃႉၽြႃးမီးဢမိင်ႉဢေႃႈ။
၃၈ လၢႆးသမ်ႉထႃႇဝရႃႉၽြႃးမီးဢမိင်ႉၸမ်း၊-မိူဝ်ႉဝၼ်းဢၼ်တၵ်းလႆႈႁဵတ်းဝဵင်းၸဝ်ႈပုၼ်ႈ ထႃႇဝရႃႉၽြႃးၸႃႉၸႅမ်တိူၵ်ႈတီႈတိုၵ်းသိုၵ်းႁႃႇၼၼ်ႇလတေႃႇထိုင်ႁွတ်ႈၽၵ်းတူဝဵင်းၼၼ်ႉတၵ်းႁွတ်ႈထိုင်ဢေႃႈ။
၃၉ ၸိူၵ်ႈမၢႆမီႈတၵ်းလႆႈမီးတၢင်းဢၼ် ၶဵင်ႈၸူးၵႃႈတီႈလွႆၵႃႇရိပ်ႇသိုဝ်ႈသိုဝ်ႈလႄႈ သမ်ႉငႅၵ်းၸူးၵႃႈတီႈလွႆၵေႃႇသဢေႃႈ။
၄၀ ၶူင်ႈႁူၺ်ႈ တီႈဢၼ်ဢဝ်တူဝ်တၢႆတင်းလၢႆဢိၵ်ႇတင်းတဝ်ႊၸုၼ်ႉပႅတ်ႈၼၼ်ႉတင်းသဵင်ႈတင်းမူတ်းဢိၵ်ႇတင်းတီႈပၢင်ႇတီႈပႅင်းၵႃႈမီးတေႃႇထိုင်ႁွတ်ႈ ၼမ်ႉႁွင်ႊၵိတြုၼ်ႇဢၼ်ဝႃႈ ၸဵင်ႇဝဵင်းဢၼ်မီးၽၵ်းတူမႃႉၵႃႈတီႈၽၢႆႇဝၼ်းဢွၵ်ႇၼၼ်ႉၸိူဝ်းၼၼ်ႉ တၵ်းဢွၼ်ၵၼ်မူတ်းၸၢင်ႇပုၼ်ႈထႃႇဝရႃႉၽြႃးဢေႃႈ။ ၵမ်းလိုၼ်းဢမ်ႇလႆႈမီးတၢင်းဢၼ် ထူၺ်ႈထွၼ်ၼုၵ်ႉပႅတ်ႈတင်းဢၼ်ၵိူၼ်ႇယႃႉၶျႃးတူၵ်းလႃးလႃးဝႃႈၼင်ႇၼႆ ဢေႃႈ။