၂၇
ယုတၶၢမ်ႇႁဵတ်းၶႃႈၼေႇပုၶတ်ႉၼေႇၸႃႇ
၁ မိူဝ်ႈဢၼ်ၶုၼ်ၸေႇတၵိ လုၵ်ႈၸၢႆးယုဝ်ႇသိယၶုၼ်ႁေႃၶမ်းယုတ ၸၢမ်ႇႁၢင်ႈၸၢမ်ႇႁေႃၼၼ်ႉၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈယေႇရမိလႄႈဝႃႈ၊-
၂ ထႃႇဝရႃႉၽြႃးမီးဢမိင်ႉတီႈၵဝ်ၸမ်း၊-ႁဵတ်းၸိူၵ်ႈဢိၵ်ႇတင်း ၵၢၼ်းသေလႄႈဢဝ်ႁၢင်ႈသႂ်ႇတီႈၶေႃးမႂ်းတႃႉ။
၃ ဢဝ်ဢၼ်ၸိူဝ်းၼၼ်ႉ ပၼ်ၵႂႃႇတီႈၶုၼ်လူင် ဢေႇတုမ်ႇ၊ၶုၼ်လူင်မေႃႇၽ၊ၶုၼ်လူင်ဢမ်ႇမုၼ်ႇ၊ ၶုၼ်လူင်တုရု ၶုၼ်လူင်ၸိတုၼ်ႇၸိူဝ်းၼၼ်ႉ ၵႃႈၼႂ်းမိုဝ်းသၢၼ်ႇတမၢၼ်ႇတင်းလၢႆ ဢၼ်ယၢမ်ႈႁွတ်ႈၵႃႈတီႈဝဵင်းယေႇရု သလႅမ်ႇတီႈၶုၼ်ႁေႃၶမ်းယုတ ၼၼ်ႉတႃႉ။
၄ မႂ်းသင်ႇလၢတ်ႈတီႈၶဝ်ၼၼ်ႉၸူးတီႈၸဝ်ႈၶဝ်လႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၽြႃးပဵၼ်ၸဝ်ႈ မဵဝ်း ဢိသရေႇလမီးဢမိင်ႉၸမ်း၊-
၅ သူတၵ်းလႆႈသင်ႇလၢတ်ႈတီႈၸဝ်ႈသူလႄႈဝႃႈ၊-ၵဝ်ဢဝ်တင်းမႁႃႇတၼ်းၶူဝ်းဢိၵ်ႇတင်း တၢင်းဢၼ်ယိုၼ်းၶႅၼ်ယိုၼ်းမိုဝ်းၵဝ်သေလႄႈ ႁဵတ်းပဵၼ်လိၼ်မိူင်းဢိၵ်ႇတင်းၵူၼ်း၊ တရိၵ်ႈသၢၼ်ႇဢၼ်မီးၵႃႈၼိူဝ်ၼႃႈ လိၼ်မိူင်းၸိူဝ်းၼၼ်ႉလႄႈၵဝ်ပၼ်တီႈၵေႃႉဢၼ်ၵဝ်ၶႆႈပၼ်ၼၼ်ႉဢေႃႈ။
၆ မိူဝ်ႈလဵဝ်ၼႆႉၸိုင်ၵဝ်ဢဝ်မိူင်းၵႃႈမီးၼႆႉ ဢၢပ်ႈပၼ်ၵႃႈၼႂ်းမိုဝ်းၶႃႈၵဝ်ၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ယဝ်ႉ။ တရိၵ်ႈသၢၼ်ႇထိူၼ်ႇတင်းလၢႆၵေႃႈၵဝ်ဢၢပ်ႈပၼ်တီႈမၼ်း ပုၼ်ႈဢၼ်မၼ်းတၵ်းၸႂ်ႉၵိၼ်သွႆ ၵိၼ်ၼၼ်ႉယဝ်ႉ။
၇ ၵူၼ်းၵူႈၸိူဝ်ႉၵူႈမဵဝ်းတင်းလၢႆဢွၼ်ၵၼ်ၵိုတ်ႈႁၢပ်ႇဢမူႉမၼ်း တင်းဢမူႉလုၵ်ႈလၢၼ်မၼ်းတေႃႇထိုင်ႁွတ်ႈ ၶိင်ႇမိူဝ်ႈသိုင်ႇၸိုင်ႈဝၢၼ်ႈမိူင်းပူၼ်ႉမႃးႁွတ်ႈမႃးၼၼ်ႉဢေႃႈ။ၶိင်ၼၼ်ႉႁွတ်ႈမႃးသေယဝ်ႉမဵဝ်းၵူၼ်းၼမ်ၼႃႇဢိၵ်ႇတင်း ၶုၼ်ႁေႃၶမ်းဢၼ်ယႂ်ႇတင်းလၢႆ တၵ်းဢွၼ်ၵၼ်ၸႂ်ႉၵိၼ်သွႆၵိၼ်မၼ်းဢေႃႈ။
၈ ထႃႇဝရႃႉၽြႃးမီးဢမိင်ႉၸမ်း၊-မဵဝ်းၵူၼ်းဢိၵ်ႇတင်းသိုင်ႇၸိုင်ႈဝၢၼ်ႈမိူင်း ဢၼ်ဢမ်ႇမီးဢလူဝ်ႇၶႂ်ႈၶၢမ်ႇတၢင်းဢၼ်ၸႂ်ႉဢၼ်သွႆတီႈၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇလႄႈ ဢမ်ႇၶႂ်ႈဢဝ်ၶေႃးၵိုတ်ႈႁၢပ်ႇၵၢၼ်းၶုၼ်ႁေႃၶမ်းပႃႇပုလုၼ်ႇၼၼ်ႉၵဝ်တၵ်းဢဝ်တင်းၽေးလၢပ်ႇၽေးလႅဝ်း ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႇလႅင်ႉမိူင်း ပၼ်တၢမ်ႇဢပျႅတ်ႈတီႈမဵဝ်းၵူၼ်းၼၼ်ႉ တေႃႇထိုင်ႁွတ်ႈၵဝ်ထၼ်ႈပေႃး ယႃႉၶဝ် ပႅတ်ႈလူၺ်ႈမိုဝ်းမၼ်းၼၼ်ႉဢေႃႈ။
၉ ပိူဝ်ႈၼႆလႄႈသူၼႆႉယႃႇပေဢွၼ်ၵၼ်ထွမ်ႇၵႂၢမ်းပရေႃးၽိတ်ႈ သြႃႇဢၼႃႇၵၢတ်ႈ၊ သြႃႇဢၼ်ၼွၼ်းၽၼ်ႁၼ်၊ သြႃႇဝိၵ်ႉၸႃႇ၊ သြႃႇဢၼ်ၸၢင်ႊၸေႃႉၸၢင်ႊႁဵတ်းဢၼ်ၸၢင်ႊႁေႃးလၢတ်ႈတီႈသူလႄႈဝႃႈ၊-သူဢမ်ႇလႆႈၶၢမ်ႇတၢင်းၸႂ်ႉတၢင်းသွႆ တီႈၶုၼ်ႁေႃၶမ်းပႃႇပုလုၼ်ႇၵူၺ်း ဝႃႈ ၼင်ႇၼႆၸိူဝ်းၼၼ်ႉ။
၁၀ ၶဝ်ၼၼ်ႉၸၢင်ႊဢွၼ်ၵၼ်ႁေႃးလၢတ်ႈၵႂၢမ်းမူႉသႃႇတီႈသူ ႁႂ်ႈသူလႆႈၶၢႆႉသေၵႃႈတီႈမိူင်းသူၵႂႃႇၵႃႈတီႈဢၼ်ၵႆဢိၵ်ႇတင်းႁႂ်ႈၵဝ်လႆႈႁေႃႈသူ ဢွၵ်ႇလႄႈသူတၵ်းလႆႈသုမ်းလႆႈၸွမ်းဢေႃႈ။
၁၁ မဵဝ်းၵူၼ်းဢၼ်ဢဝ်ၶေႃး ၵိုတ်ႈႁၢပ်ႇၵၢၼ်းၶုၼ် ႁေႃၶမ်းပႃႇပုလုၼ်ႇလႄႈ ၶၢမ်ႇတၢင်းဢၼ်ၸႂ်ႉသွႆတီႈမၼ်းၼၼ်ႉၸိုင်ၵဝ်တၵ်းပၼ်ဢၶႂၢင်ႉႁႂ်ႈမဵဝ်းၼၼ်ႉ လႆႈယူႇၵႃႈတီႈမိူင်းတီႈယူႇမၼ်းလႄႈ ၶဝ်တၵ်းလႆႈဢွၼ်ၵၼ်ႁဵတ်းႁႆႁဵတ်းၼႃးလႄႈယူႇၵႃႈၼႂ်းမိူင်းၼၼ်ႉဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။
၁၂ ၵဝ်ဢဝ်ၵႂၢမ်းၸဝ်ႈၵႃႈမီးၼၼ်ႉလဝ်ႈလၢတ်ႈတီႈၸေႇတၵိၶုၼ်ႁေႃၶမ်းယုတလႄႈဝႃႈၸမ်း၊-ဢွၼ်ၵၼ်ဢဝ်ၶေႃးသူၵိုတ်ႈႁၢပ်ႇၵၢၼ်းၶုၼ်ႁေႃၶမ်းပႃႇပုလုၼ်ႇလႄႈ ၶၢမ်ႇတၢင်းဢၼ်ၸႂ်ႉဢၼ်သွႆတီႈမၼ်းဢိၵ်ႇတင်းၵူၼ်းမၼ်းတင်းလၢႆယူႇသေလႄႈ ဢသၢၵ်ႈ ၵတ်းယဵၼ်ၶျၢမ်းသႃႇယူႇသေၵမ်းတီႈၶႃႈ။
၁၃ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းဢိၵ်ႇတင်း ၵူၼ်းၸဝ်ႈႁဝ်းတင်းလၢႆ တၵ်းလႆႈတၢႆလူၺ်ႈၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႃႉႁႃႇလႅင်ႉမိူင်းၸွမ်းၵႃႈၼင်ႇဢၼ် ထႃႇဝရႃႉၽြႃးဢဝ်လွင်ႈမဵဝ်းၵူၼ်း ဢၼ်ဢမ်ႇၶၢမ်ႇတၢင်းဢၼ်ၸႂ်ႉဢၼ်သွႆတီႈၶုၼ်ႁေႃၶမ်းပႃႇပုလုၼ်ႇ ၼၼ်ႉမီးဢမိင်ႉဝႆႉၼၼ်ႉၼင်ႇ
ႁိုဝ်တီႈၶႃႈ။
၁၄ ယႃႇပေဢွၼ်ၵၼ်ထွမ်ႇဢဝ်ၵႂၢမ်းပရေႃးၽိတ်ႈဢၼ်ႁေႃးလၢတ်ႈတီႈၸဝ်ႈႁဝ်းၶဝ်ဝႃႈ၊-သူဢမ်ႇလႆႈၶၢမ်ႇတၢင်းဢၼ်ၸႂ်ႉဢၼ်သွႆတီႈ ၶုၼ်ႁေႃၶမ်းပႃႇပုလုၼ်ႇ ၵူၺ်းဝႃႈၼင်ႇၼႆၸိူဝ်းၼၼ်ႉသေၵမ်းတီႈၶႃႈ။ၶဝ်ၸၢင်ႊဢွၼ်ၵၼ်ႁေႃးလၢတ်ႈၵႂၢမ်းမူႉသႃႇတီႈ ၸဝ်ႈႁဝ်းတီႈၶႃႈဢေႃႈ။
၁၅ ထႃႇဝရႃႉၽြႃးမီးဢမိင်ႉၸမ်း၊-ၵဝ်ယင်းဢမ်ႇပွႆႇၸႂ်ႉၶဝ်လႄႈၶဝ်ၼၼ်ႉၸင်ႇဢွၼ်ၵၼ်ဢိင်ၼႃႇမႃႉၸိုဝ်သဵင်ၵဝ်သေလႄႈ ႁေႃးလၢတ်ႈၵႂၢမ်းမူႉသႃႇ ႁႂ်ႈၵဝ်လႆႈႁေႃႈသူဢိၵ်ႇတင်းပရေႃးၽိတ်ႈဢၼ်ႁေႃးလၢတ်ႈတီႈသူၸိူဝ်းၼၼ်ႉ ဢွၵ်ႇပႅတ်ႈလႄႈႁႂ်ႈသူလႆႈသုမ်းလႆႈၸွမ်းဢေႃႈ၊ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။
၁၆ တီႈယိတ်ႉပရေႃးႁိၵ်ႈတင်းလၢႆ ဢိၵ်ႇတင်းၵူၼ်းတင်းသဵင်ႈတင်းလူင်ၵေႃႈ ၵဝ်လၢတ်ႈလႄႈဝႃႈ ထႃႇဝရႃႉၽြႃးမီးဢမိင်ႉၸမ်း၊-ယႃႇပေဢွၼ်ၵၼ်ထွမ်ႇဢဝ်ၵႂၢမ်းပရေႃးၽိတ်ႈသူဢၼ်ႁေႃးလၢတ်ႈတီႈသူဝႃႈ၊-ဢမ်ႇႁိုင်ဢမ်ႇၼၢၼ်းၶိူင်ႈပိူင်ထႃႇဝရႃႉၽြႃး တၵ်းမီးတၢင်းဢၼ်သမ်ႉၶိုၼ်းဢဝ်သေ ၵႃႈတီႈဝဵင်းပႃႇပုလုၼ်ႇမႃးဢေႃႈ၊ဝႃႈၼင်ႇၼႆၸိူဝ်းၼၼ်ႉ။ၶဝ်ၼၼ်ႉၸၢင်ႊဢွၼ် ၵၼ်ႁေႃးလၢတ်ႈၵႂၢမ်းမူႉသႃႇတီႈသူဢေႃႈ။
၁၇ ယႃႇပေဢွၼ်ၵၼ်ထွမ်ႇဢဝ်ၵႂၢမ်းၶဝ်။ ဢွၼ်ၵၼ်ၶၢမ်ႇတၢင်းဢၼ်ၸႂ်ႉသွႆတီႈၶုၼ်ႁေႃၶမ်းပႃႇပုလုၼ်ႇ လႄႈဢသၢၵ်ႈၵတ်းယဵၼ်ၶျၢမ်းသႃႇတႃႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝဵင်းၼႆႉတၵ်းလႆႈႁွတ်ႈထိုင် တၢင်းဢၼ်သိတ်ႇၵူၼ်း ယဵၼ်ၵူၼ်းၼင်ႇႁိုဝ်။
၁၈ ပေႃးၶဝ်ၸႂ်ႉပရေႃးၽိတ်ႈလႄႈၶၢမ်ႇပျႃႇတိၵ်ႈထႃႇဝရႃႉၽြႃးၸိုင်ႁႂ်ႈၶဝ်ဢွၼ်ၵၼ်တွင်းပၢၼ်ႇတီႈၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးႁႂ်ႈၶိူင်ႈပိူင်ဢၼ်ယင်းၵိုတ်းယင်းၵျၢၼ်ႇဝႆႉ ၵႃႈၼႂ်းႁိူၼ်းထႃႇဝရႃႉၽြႃးဢိၵ်ႇတင်းၵႃႈၼႂ်းႁေႃၶုၼ်ႁေႃၶမ်းယုတ တင်းၵႃႈတီႈဝဵင်းယေႇရုသလႅမ်ႇၸိူဝ်းၼၼ်ႉဢမ်ႇလႆႈမီးတၢင်းဢၼ်ဢဝ်ၵႂႃႇ ၵႃႈတီႈဝဵင်းပႃႇပုလုၼ်ႇ ပုၼ်ႉတႃႉ။
၁၉ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးဢဝ်လွင်ႈသဝ်တင်းလၢႆ ၼမ်ႉၼွင် ငဝ်ႈႁၢၵ်ႈတိၼ်ၼမ်ႉၼွင်တင်းလၢႆ၊ၶိူင်ႈပိူင်ဢၼ်ယင်းၵိုတ်းယင်းၵျၢၼ်ႇတင်းလၢႆ ဢၼ်ယင်းၵိုတ်းယင်းၵျၢၼ်ႇဝႆႉယူႇၵႃႈၼႂ်းဝဵင်းၼႆႉ၊
၂၀ ဢၼ်ၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇဢမ်ႇသိမ်းဢမ်ႇဢဝ်ၵႂႃႇ ၼႂ်းၶိင်ႇမိူဝ်ႈဢၼ်မၼ်းသိမ်းဢဝ်ယေႇၶေႃႇၼိလုၵ်ႈၸၢႆးယေႃႇယ ၵိမ်ႇၶုၼ်ႁေႃၶမ်းယုတ ဢိၵ်ႇတင်းမူးမၢတ်ႈၽွင်းမိူင်းဝဵင်းယေႇရုသလႅမ်ႇမိူင်းယုတ တင်းသဵင်ႈတင်းလူင်သေၵႃႈတီႈဝဵင်းယေႇရုသလႅမ်ႇၵႂႃႇၵႃႈတီႈဝဵင်းပႃႇပုလုၼ်ႇၼၼ်ႉသေလႄႈ မီး ဢမိင်ႉၸမ်း၊- ၸႂ်ႈတႄႉဢေႃႈ။
၂၁ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ ဢဝ်လွင်ႈၶိူင်ႈပိူင် ဢၼ်ယင်းၵိုတ်းယင်းၵျၢၼ်ႇဝႆႉယူႇၵႃႈၼႂ်းႁိူၼ်းထႃႇဝရႃႉၽြႃး ဢိၵ်ႇတင်းၵႃႈၼႂ်းႁေႃၶုၼ်ႁေႃၶမ်းယုတ တင်းၵႃႈတီႈဝဵင်းယေႇရုသလႅမ်ႇၼၼ်ႉ သေလႄႈမီးဢမိင်ႉလႄႈဝႃႈ၊-
၂၂ ၶိူင်ႈပိူင်ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇ ၵႃႈတီႈဝဵင်းပႃႇပုလုၼ်ႇလႄႈ တၵ်းလႆႈမီးယူႇၵႃႈတီႈၼၼ်ႉတေႃႇထိုင်ႁွတ်ႈ မိူဝ်ႉဝၼ်းဢၼ်ၵဝ်မႃးလူမႃးတူၺ်းၼၼ်ႉဢေႃႈ။မိူဝ်ႈၼၼ်ႉၵဝ်တၵ်းဢဝ်ၶိူင်ႈပိူင်ၸိူဝ်းၼၼ်ႉၶိုၼ်းမႃးလႄႈဝႆႉၵႃႈတီႈၼႆႈဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။