၂၅
လႆႈၶၢမ်ႇတူၵ်းၵႅၼ်းသၢဝ်းႁႃးပီႊ
၁ ၼုၵ်ႈၵပၢတ်ႈၸဝ်ႈဢၼ်ႁွတ်ႈမႃးတီႈယေႇရမိ လူၺ်ႈလွင်ႈၵူၼ်းမိူင်းယုတ ၵႃႈမီးၼႂ်းပီႊဢၼ်ယေႃႇယၵိမ်ႇလုၵ်ႈၸၢႆးၶုၼ်လူင်ယုဝ်ႇသိယ ၶုၼ်ႁေႃၶမ်းမိူင်းယုတ
၂ ၸၢမ်ႇႁၢင်ႈၸၢမ်ႇႁေႃပီႊၸတုၵ်ႉထ၊ မိူဝ်ႈဢၼ်ၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇၸၢမ်ႇႁၢင်ႈၸၢမ်ႇႁေႃပီႊပထမၼၼ်ႉ ဢၼ်ယေႇရမိ ဢဝ်သင်ႇလၢတ်ႈႁေႃးလၢတ်ႈတီႈၵူၼ်းမိူင်းယုတ ၵႃႈမီးဢိၵ်ႇတင်း ၵူၼ်းဝဵင်းယေႇရုသလႅမ်ႇၵႃႈမီးၼၼ်ႉၸမ်း၊-
၃ ၸႃႉၸဵမ်ယုဝ်ႇသိယလုၵ်ႈၸၢႆးဢႃႇမုၼ်ႇ ၶုၼ်ႁေႃၶမ်းယုတ ၸၢမ်ႇႁၢင်ၸၢမ်ႇႁေႃသိပ်းသၢမ်ပီႊလႄႈ တေႃႇထိုင်ႁွတ်ႈဝၼ်းမိူဝ်ႈၼႆႉ သၢဝ်းပၢႆသၢမ်ပီႊတဵမ်တဵမ်ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈ ၵဝ်လုၵ်ႉၸဝ်ႉၸဝ်ႉၸဵဝ်းၸဵဝ်းသေလႄႈ ဢဝ်သင်ႇလၢတ်ႈတီႈသူယူႇၶိူဝ်းၶိူဝ်းယႂ်းယႂ်းဢေႃႈ။ၵူၺ်းၵႃႈသူယင်းဢမ်ႇထွမ်ႇ ဢမ်ႇဢဝ်လႄႈဢွၼ်ၵၼ်ယူႇယဝ်ႉ။
၄ ထႃႇဝရႃႉၽြႃးၵေႃႈပွႆႇၸႂ်ႉၶႃႈမၼ်းၸဝ်ႈပရေႃးၽိတ်ႈ တင်းသဵင်ႈတင်းလူင်မႃးတီႈသူၶိူဝ်းၶိူဝ်းယႂ်းယႂ်းဢေႃႈ။ ၵူၺ်းၵႃႈသူယင်းဢမ်ႇထွမ်ႇဢမ်ႇဢဝ်၊ ယင်းဢမ်ႇႁႄႈႁူၸူးႁႂ်ႈလႆႈငိၼ်း လႄႈယူႇယဝ်ႉ။
၅ ၶဝ်ၼၼ်ႉၸင်ႇလၢတ်ႈလႄႈဝႃႈ၊-ဢွၼ်ၵၼ်ၶိုၼ်းမႃးသေ ၵႃႈတီႈသဵၼ်ႈတၢင်းဢၼ်ႁၢႆႉဢၼ်မိူၵ်ႈသူဢိၵ်ႇတင်း တၢင်းၵမ်တၢင်းၵျၢင်ႉဢၼ်ႁၢႆႉဢၼ်ယုတ်ႈၼၼ်ႉႁင်းၽႂ်ႁင်းမၼ်းလႄႈ ယူႇၵႃႈၼႂ်းမိူင်းဢၼ်ထႃႇဝရႃႉၽြႃးပၼ်တီႈသူ ဢိၵ်ႇတင်းတီႈပူႇသူ မွၼ်ႇသူၸိူဝ်းၼၼ်ႉယူႇသေႇသေႇတႃႉ။
၆ ယႃႇပေဢွၼ်ၵၼ် ၸွမ်းလင်ၽြႃးတၢင်ႇသူႇတၢင်ႇပႃးလႄႈ ႁဵတ်းဝတ်ႈၵူဝ်းၵႂၢႆႇၶဝ်။ ယႃႇပေဢဝ်လွင်ႈတၢင်းဢၼ်မိုဝ်းသူႁဵတ်းၼၼ်ႉႁႂ်ႈတၢင်းၸႂ်မႆႈၶႆႈၸႃႉၵဝ်ဢွၵ်ႇ။ၵဝ်ၵေႃႈတၵ်းဢမ်ႇၼိၵ်ႈၸၢၵ်ႈငႅၼ်းသေးသူ၊ဝႃႈၼင်ႇၼႆ ဢေႃႈ။
၇ ထႃႇဝရႃႉၽြႃးမီးဢမိင်ႉၸမ်း၊-ၼႂ်းဝႃႈၼၼ်သေၵေႃႈယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈဢွၼ်ၵၼ်ယူႇ ႁႂ်ႈမီးဢၶႂၢင်ႉ ဢၼ်ဢဝ်လွင်ႈတၢင်းဢၼ်မိုဝ်းသူႁဵတ်းၸိူဝ်းၼၼ်ႉ ႁႂ်ႈတၢင်းၸႂ်မႆႈၶႆႈၸႃႉ ၵဝ်ဢွၵ်ႇႁႂ်ႈဢၵျူဝ်းသူလႆႈလဵၵ်ႉၵေႇသုတ်ႈယွမ်းၵႂႃႇယဝ်ႉ။
၈ ပိူဝ်ႈၼႆလႄႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-ၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈ၊ၵဝ်သင်ႇလၢတ်ႈၵႂႃႇလႄႈ ဢဝ်ၵူၼ်းမိူင်း တၢင်းႁွင်ႇၵူႈၸိူဝ်ႉၵူႈမဵဝ်းဢိၵ်ႇတင်း
၉ ၶႃႈၵဝ်ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇ ၸိူဝ်းၼၼ်ႉမႃးႁႂ်ႈလႆႈတိုၵ်းတေႃးမိူင်းၼႆႉဢိၵ်ႇတင်း ၵူၼ်းဝၢၼ်ႈၵူၼ်းမိူင်းၼႆႉတင်းၵူၼ်းၵူႈၸိူဝ်ႉၵူႈမဵဝ်း ဢၼ်ယူႇၵႃႈတီႈလဵပ်ႈႁွပ်ႈႁိမ်းႁွမ်းၸိူဝ်းၼၼ်ႉလႄႈ ၵဝ်တၵ်းယႃႉၶဝ်ပႅတ်ႈမူတ်း မူတ်းသဵင်ႈသဵင်ႈလႄႈ
၁၀ ႁႂ်ႈၶဝ်ပဵၼ်တီႈဢၼ်လီဢၢမ်းတီႈဢၼ်ႁဵတ်းသဵင်သီႉသီႉသေႃႉသေႃႉသေႉသွမ်းတီႈဢၼ်သိတ်ႇၵူၼ်းယဵၼ်ၵူၼ်းယူႇ တႃႇသေႇဢေႃႈ။ၵဝ်တၵ်းႁႂ်ႈသဵင်ဢၼ်ၸူမ်းပျေႃႇ သဵင်ဢၼ်သႂၢင်ႇသိူဝ်းသဵင်းၵူၼ်းၸၢႆးဢၼ်သွင်ႇမင်ႇၵလႃႇ၊ သဵင်ၵူၼ်းယိင်းဢၼ်သွင်ႇမင်ႇၵလႃႇ သဵင်လုၺ်ဢၼ်ၶိုတ်ႇဢိၵ်ႇတင်းဢၼ် လႅင်းဝၢၼ်ႇၽႆးတဵၼ်းၸိူဝ်းၼၼ်ႉလပ်ႉႁၢႆၵႂႃႇသေ ၵႃႈၼႂ်းၶဝ်ၼႆႉဢေႃႈ။
၁၁ မိူင်းၼႆႉတင်းမိူင်းတၵ်းပဵၼ်တီႈဢၼ်သိတ်ႇၵူၼ်းယဵၼ်ၵူၼ်းတီႈဢၼ်လီဢၢမ်းဢေႃႈ။ၵူၼ်းၵူႈၸိူဝ်ႉၵူႈမဵဝ်းၸိူဝ်းၼႆႉတၵ်းလႆႈဢွၼ်ၵၼ်ၵိုတ်ႈႁၢပ်ႇဢမူႉၶုၼ်ႁေႃၶမ်းပႃႇပုလုၼ်ႇ ၸဵတ်း သိပ်းပီႊတဵမ်တဵမ်ဢေႃႈ။
၁၂ ထႃႇဝရႃႉၽြႃးမီးဢမိင်ႉၸမ်း၊-မိူဝ်ႈဢၼ်ၸေးၸဵတ်းသိပ်းပီႊယဝ်ႉၼၼ်ႉၸိုင် ၵဝ်တၵ်းပၼ်တၢမ်ႇတီႈၶုၼ်ႁေႃၶမ်းပႃႇပုလုၼ်ႇ ဢိၵ်ႇတင်းမိူင်းမၼ်ဢၼ်ဝႃႈ သိုင်ႇၸိုင်ႈဝၢၼ်ႈမိူင်းၶႃႇလတေႇၼၼ်ႉ ၵွပ်ႈပိူဝ်ႈဢပျႅတ်ႈၶဝ်လႄႈႁႂ်ႈမိူင်းၼၼ်ႉပဵၼ်တီႈဢၼ်သိတ်ႇၵူၼ်းယဵၼ်ၵူၼ်းယူႇတႃႇသေႇဢေႃႈ။
၁၃ ၵဝ်တၵ်းႁႂ်ႈ ၵႂၢမ်းဢၼ်ၵဝ်မၵ်းၶဵၼ်းဝႆႉတင်းသဵင်ႈတင်းလူင်ဢၼ်ဝႃႈၵႂၢမ်းၵႃႈဢၼ် ယေႇရမိ ႁေႃးလၢတ်ႈယူႇၽၢႆႇၼိုင်ႈတင်း သိုင်ႇၸိုင်ႈဝၢၼ်ႈမိူင်းတင်းသဵင်ႈတင်းလူင်လႄႈ တႅမ်ႈမၢႆဝႆႉၵႃႈၼႂ်းလိၵ်ႈၼႆႉၸိူဝ်းၼၼ်ႉတူၵ်းႁွတ်ႈၵႃႈၼိူဝ် သိုင်ႇၸိုင်ႈဝၢၼ်ႈမိူင်းၼၼ်ႉဢေႃႈ။
၁၄ ၵူၼ်းမဵဝ်းဢၼ်ၼမ်ၼႃႇ ဢိၵ်ႇတင်းၶုၼ်ႁေႃၶမ်းဢၼ်ယႂ်ႇၼႃႇၸိူဝ်းၼၼ်ႉ ဢွၼ်ၵၼ်ၸႂ်ႉၵိၼ်ၶဝ်ၼၼ်ႉလႄႈၵဝ်တၵ်းတွပ်ႇတႅၼ်းပၼ်ဢၵျူဝ်းဢပျႅတ်ႈ ၸွမ်းၼင်ႇတၢင်းၵမ်တၢင်းၵျၢင်ႉဢၼ်ၶဝ်ၵမ်ၵျၢင်ႉ ဢိၵ်ႇတင်းလွင်ႈတၢင်းဢၼ်ၶဝ်ဢဝ်မိုဝ်းၶဝ်ႁဵတ်းၼၼ်ႉဢေႃႈ။
ၵွၵ်းၸႂ်ႈမႆႈၽြႃးပဵၼ်ၸဝ်ႈ
၁၅ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉတီႈၵဝ်ၸမ်း၊- ႁပ်ႉၶၢမ်ႇဢဝ်ၵွၵ်းၼမ်ႉၸပိတ်ႈတၢင်းၸႂ်မႆႈၶႆႈၸႃႉၸဝ်ႈၼႆႉၵႃႈတီႈမိူင်းၵဝ်လႄႈ ႁႂ်ႈၵူၼ်းၵူႈၸိူဝ်ႉၵူႈမဵဝ်း ဢၼ်ၵဝ်ပွႆႇၸႂ်ႉမႂ်းၸူးၸိူဝ်းၼၼ်ႉသူတ်ႉ ၵိၼ်တႃႉ။
၁၆ ၶဝ်ၼၼ်ႉတၵ်းသူတ်ႉၵိၼ်လႄႈႁွတ်ႈထိုင်တၢင်းဢၼ်မဝ်းလဝ်ႈဝင်ႇဝီႈဝင်ႇဝိူဝ်ႈ ၵွပ်ႈပိူဝ်ႈလၢပ်ႇလႅဝ်းဢၼ်ၵဝ်ပွႆႇၸႂ်ႉၵႂႃႇၵႃႈၼႂ်းၵၢင်ၶဝ်ၼၼ်ႉဢေႃႈ၊ ဝႃႈ ၼင်ႇၼႆလႄႈ၊
၁၇ ၵဝ်ႁပ်ႉၶၢမ်ႇဢဝ်ၵွၵ်းၼၼ်ႉၵႃႈတီႈမိုဝ်းထႃႇဝရႃႉၽြႃးလႄႈ ႁႂ်ႈၵူၼ်းမဵဝ်းၵႃႈမီးဢၼ်ထႃႇဝရႃႉ ၽြႃးပွႆႇၸႂ်ႉၵဝ်ၵႂႃႇၸူးၸိူဝ်းၼၼ်ႉသူတ်ႉၵိၼ်ဢေႃႈ။
၁၈ ၵူၼ်းမဵဝ်းၸိူဝ်းၼၼ်ႉၸမ်း ပႃးၵူၼ်းဝဵင်းယေႇရုသလႅမ်ႇ လႂ်ၵူၼ်းမိူင်းယုတ လႂ်၊ ၶုၼ်ႁေႃၶမ်းယုတ လႂ်၊ မူးမၢတ်ႈၽွင်းမိူင်းဢၼ်တၵ်းလႆႈၵိၼ်ႇ ႁႂ်ႈလႆႈပဵၼ်တီႈဢၼ် သိတ်ႇၵူၼ်းယဵၼ်ၵူၼ်း၊
၁၉ တီႈဢၼ်လီဢၢမ်း၊တီႈဢၼ်ငိၼ်းသဵင်ဢၼ်ႁဵတ်းသီႉသီႉသေႃႉသေႃႉသေႉသွမ်း၊ တီႈဢၼ်ၵိၼ်ႇလႃႇ ၵႃႈၼင်ႇဢၼ်ပဵၼ်ဝၼ်းမိူဝ်ႈၼႆႉၼၼ်ႉ လႂ်ၶုၼ်ၽႃႇရေႃးဢၼ်လႆႈဢုပ်ႉပိူင်ႇမိူင်းဢေႇၵႅပ်ႉတု ဢိၵ်ႇတင်းၶႃႈမၼ်းၵူၼ်းမၼ်း လႂ်၊ မူးမၢတ်ႈၽွင်းမိူင်းမၼ်း လႂ်၊
၂၀ ၵူၼ်းဝၢၼ်ႈမိူင်းမၼ်းၵႃႈမီး လႂ်၊ ၵူၼ်းတၢင်ႇၸိူဝ်ႉတၢင်ႇမဵဝ်းဢၼ်လေႃးလေး လူၺ်ႈၵၼ်တင်းၶဝ်ၵႃႈမီး လႂ်၊ၶုၼ်လူင်မိူင်းဢုၸ ၵႃႈမီး လႂ်၊ၶုၼ်ၽိတ်ႉလိတ်ႉတိၵႃႈမီး လႂ်၊ၵူၼ်းမိူင်းဢႃႇသၵေႇလုၼ်ႇ၊ ၵူၼ်းမိူင်းၵႃႇ ၸ၊ၵူၼ်းမိူင်းဢေႇၵုၼ်ႇ၊
၂၁ ၵူၼ်းမိူင်းဢႃႇၸုတ်ႉ ဢၼ်ၵိုတ်းဢၼ်ၵျၢၼ်ႇဝႆႉ လႂ်၊ၵူၼ်းမိူင်းဢေႇတုမ်ႇ၊ ၵူၼ်းမိူင်းမေႃႇၽ၊ၵူၼ်းမိူင်းဢမ်ႇမုၼ်ႇ၊ ၶုၼ်လူင်မိူင်းတုရုၵႃႈမီး၊
၂၂ ၶုၼ်လူင်မိူင်းၸိတုမ်ႇၵႃႈမီး၊ ၶုၼ်လူင်ဢၼ်လႆႈဢုပ်ႉပိူင်ႇ မိူင်းၵႃႈတီႈၽၢႆႇပုၼ်ႉပၢင်ႇလၢႆႇၸိူဝ်းၼၼ်ႉၵႃႈမီး ၵူၼ်းမိူင်းတေႇထၼ်ႇ၊ ၵူၼ်းမိူင်းတေႇမ၊ၵူၼ်းမိူင်းပုၸ၊မဵဝ်းၵူၼ်း ဢၼ်ၸၢင်ႊထႃၶူၼ်ၵႅမ်ႈၶူၼ်ၵၢင်း၊ ၶုၼ် လူင်ဢႃႇရေႇပျႃႇ ၵႃႈမီး၊
၂၄ ၶုၼ်လူင်ဢၼ်လႆႈဢုပ်ႉပိူင်ႇၵူၼ်းမဵဝ်းဢၼ်လေႃးလႄးၵၼ်လႄႈယူႇၵႃႈတီႈ ထိူၼ်ႇၸိူဝ်းၼၼ်ႉၵႃႈမီး၊
၂၅ ၶုၼ်လူင်မိူင်းၸိမရိၵႃႈမီး၊ၶုၼ်လူင်မိူင်းဢေႇလမ်ႇၵႃႈမီး၊ ၶုၼ်လူင်မိူင်းမေႇတိၵႃႈမီး၊ ၶုၼ်လူင်မိူင်းတၢင်းႁွင်ႇၵႃႈမီး ပႃးၼိုင်ႈယဝ်ႉပႃးၼိုင်ႈပဵၼ်ဢၼ်ၸမ်သေဢမ်ႇဝႃႈ၊ ပဵၼ်ဢၼ်ၵႆသေ ဢမ်ႇဝႃႈ၊
၂၆ ဢိၵ်ႇတင်းသိုင်ႇၸိုင်ႈဝၢၼ်ႈမိူင်းလေႃးၵီႇၵႃႈဢၼ်မီးၵႃႈၼိူဝ်ၼႃႈလိၼ်မိူင်း တင်းၼႃး လႂ်ၸိူဝ်းၼၼ်ႉဢေႃႈ။လိုၼ်းသေၶဝ်ၸိူဝ်းၼၼ်ႉယဝ်ႉၼၼ်ႉၶုၼ် ႁေႃၶမ်းသေႇသိၵ်ႉတၵ်းလႆႈသူတ်ႉၵိၼ်ဢေႃႈ။
၂၇ မႂ်းသင်ႇလၢတ်ႈဝႆႉတီႈၶဝ်လႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉၸမ်း၊-ၵွပ်ႈပိူဝ်ႈလၢပ်ႇလႅဝ်းဢၼ်ၵဝ်ပွႆႇၸႂ်ႉၸူးၵႃႈၼႂ်းၵႄႈၵၢင်သူၼၼ်ႉ ဢွၼ်ၵၼ်သူတ်ႉၵိၼ်လႄႈမဝ်းယူႇ၊ တူၼ်ႉႁၢၵ်ႈယူႇ၊ပိၼ်ႈလူမ်ႉယူတႃႉ။
၂၈ ၵမ်းလိုၼ်းယႃႇပေလုၵ်ႉ ဝႃႈၼင်ႇၼႆယဝ်ႉ ဝႃႈၼင်ႇၼႆတႃႉ။ပေႃးၶဝ်ဢမ်ႇႁပ်ႉဢမ်ႇၶၢမ်ႇဢဝ်ၵွၵ်းၼၼ်ႉ တီႈမိုဝ်းမႂ်းႁႂ်ႈလႆႈသူတ်ႉၵိၼ်ၸိုင်မႂ်းၶိုၼ်းလၢတ်ႈတီႈၶဝ်လႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-သူတၵ်းလႆႈဢွၼ်ၵၼ်သူတ်ႉၵိၼ်ဢမၢၼ်ႇၶၢၼ်ပဵၼ်ဢေႃႈ၊ ဝႃႈၼင်ႇၼႆ ဝႆႉယဝ်ႉဝႃႈၼင်ႇၼႆတႃႉ။
၂၉ လွင်ႈမၼ်းၸမ်းပေႃးၵဝ်ၸႃႉႁဵတ်းတၢင်းဢၼ်ပၼ်ဢပျႅတ်ႈ တီႈဝဵင်းဢၼ်လႆႈၶၢမ်ႇတၢင်းဢၼ်ႁွင်ႉႁိၵ်ႈလူၺ်ႈ ၸိုဝ်သဵင်ၵဝ်ၼၼ်ႉၸိုင်၊သူယင်းဢမ်ႇလႆႈၶၢမ်ႇ တၢမ်ႇဢပျႅတ်ႈလႃးလႃးလႄႈတၵ်းလႆႈယူႇႁိုဝ်။သူယင်းဢမ်ႇလႆႈၶၢမ်ႇတၢမ်ႇလႄႈဢမ်ႇလႆႈယူႇ။ၵဝ်တၵ်းႁွင်ႉဢဝ်လၢပ်ႇဢဝ်လႅဝ်းပွႆႇၸႂ်ႉၸူးတီႈၵူၼ်းလိၼ်မိူင်းၵႃႈမီးတင်းသဵင်ႈတင်းလူင်ဢေႃႈ၊ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉဢေႃႈ။
၃၀ ပိူဝ်ႈၼႆလႄႈ ၵႂၢမ်းဢၼ်မႂ်းတၵ်းလႆႈႁဵတ်းပရေႃးၽိတ်ႈသေလႄႈႁေႃးလၢတ်ႈတီႈၶဝ်ၸမ်း၊- ထႃႇဝရႃႉၽြႃးတၵ်းယူႇၵႃႈတီႈဢၼ်သုင်ၼၼ်ႉ ႁွင်ႉပၢဝ်ႇႁွင်ႉသေႃႇလႄႈ မၼ်းၸဝ်ႈတၵ်းယူႇၵႃႈတီႈပိၵ်ႉမၢၼ်ႇၸဝ်ႈဢၼ်မူတ်းၸၢင်ႇၼၼ်ႉၵိဝ်သဵင်ဢေႃႈ။မၼ်းၸဝ်ႈတၵ်းႁွင်ႉပၢဝ်ႇႁွင်ႉသေႃႇယူႇ ၽၢႆႇၼိုင်ႈတင်းတီႈဢၼ်မၼ်းၸဝ်ႈၵိင်းဝပ်ႈယူႇၼၼ်ႉႁႅင်းယႂ်ႇၼႃႇလူင်လၢင်လႄႈ မၼ်းၸဝ်ႈတၵ်းသႅၼ်ႇႁွင်ႉယူႇ ၽၢႆႇၼိုင်ႈတင်းၵူၼ်းလိၼ်မိူင်းတင်းသဵင်ႈတင်းလူင်မိူၼ်ၸိူဝ်ႉၼင်ႇ ၶဝ်ၸိူဝ်းဢၼ် ယဵပ်ႇၼူတ်ႈမၢၵ်ႇၸပိတ်ႈၼၼ်ႉဢေႃႈ။
၃၁ သဵင်တၵ်းၸွတ်ႇတူဝ်ႈၵႂႃႇတေႃႇထိုင်ႁွတ်ႈႁိမ်းလႅၼ် သုတ်းလိၼ်မိူင်းဢေႃႈ။ထႃႇဝရႃႉၽြႃးမီးလွင်ႈဢၼ်လီထူပ်းတြႃးၵၼ်တင်းၵူၼ်းၵူႈၸိူဝ်ႉၵူႈမဵဝ်းလႄႈ မၼ်းၸဝ်ႈတၵ်းႁဵတ်းဢမူႉသႂ်ႇတီႈသတ်ႉတဝႃႇ တင်းသဵင်ႈတင်းလူင်ဢေႃႈ။ၶဝ်ၸိူဝ်းဢၼ်ႁၢႆႉၸိုင်မၼ်းၸဝ်ႈတၵ်းဢဝ်ဢၢပ်ႈပၼ်တီႈလၢပ်ႇတီႈလႅဝ်းဢေႃႈ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၃၂ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉၸမ်း၊-တူၺ်းလူ။ၽေးတၵ်းႁွတ်ႈထိုင်ၵႃႈတီႈမိူင်းၼိုင်ႈယဝ်ႉမိူင်းၼိုင်ႈလႄႈ လူမ်းၽိဝ်ႁုင်ဢၼ်ႁႅင်းယႂ်ႇၼႃႇတၵ်းလုၵ်ႉၶိုၼ်ႈသေ ၵႃႈတီႈႁိမ်းၸဵင်ႇႁိမ်းလႅၼ်လိၼ်မိူင်း ဢေႃႈ။
၃၃ မိူဝ်ႈၼၼ်ႉၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ထႃႇဝရႃႉၽြႃးဢဝ်တၢႆၼၼ်ႉ တၵ်းၸွတ်ႇတူဝ်ႈၵႂႃႇဢဝ်ၵႃႈတီႈၸႃႉၸဵမ်လိၼ်မိူင်းၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈလႄႈၽူႈ လႂ်ဢမ်ႇလႆႈၶၢင်းၶီၶၢင်းၽၢၼ်ပုၼ်ႈၶဝ်၊ ဢမ်ႇလႆႈဢဝ်ၸူႉၵၼ်ၵွင်ၵၼ်ဢမ်ႇလႆႈဢဝ်သၢင်းၵျူဝ်ႇ။ၶဝ်တၵ်းဢွၼ်ၵၼ်ပဵၼ်ၸိူဝ်ႉၼင်ႇၽၢႆႈ လူင်ၵႃႈၼိူဝ်လိၼ်ၼၼ်ႉဢေႃႈ။
၃၄ သူဢၼ်ပဵၼ်ၵူၼ်းဢၼ်လဵင်ႉသူဝ်းထိင်းသူဝ်းၶဝ်ဢိူၺ်း။ဢွၼ်ၵၼ်ဢိုတ်ႇႁႆႈႁွင်ႉသႅၼ်ႇတႃႉ။သူဢၼ်ပဵၼ်သူဝ်းလူင်သူဝ်းမျၢတ်ႈၶဝ်ဢိူၺ်း။ဢွၼ်ၵၼ်ၵိင်ႈၵိူၵ်ႇယူႇၵႃႈၼႂ်းတဝ်တႃႉ။ မိူဝ်ႉဝၼ်းဢၼ်လႆႈဢဝ်သူတၢႆၼၼ်ႉႁွတ်ႈထိုင်ယဝ်ႉ။ ၵဝ်ႁေႃႈသူၵႂႃႇၵႃႈတီႈၵူႈတီႈၵူႈလႅၼ်လႄႈ သူတၵ်းဢွၼ်ၵၼ်တူၵ်း မိူၼ်ၸိူဝ်ႉၼင်ႇဢၼ်ၶိူင်ႈပိူင်ဢၼ်ထိူၵ်ႈၵႃႈ ထိူၵ်ႈၶၼ်တူၵ်းၼၼ်ႉဢေႃႈ။
၃၅ ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉ တၵ်းဢမ်ႇမီးသဵၼ်ႈတၢင်းဢၼ်ဢွၵ်ႇပၢႆႈ။ ၶဝ်ၸိူဝ်းဢၼ်ပဵၼ်သူဝ်းလူင်သူဝ်းမျၢတ်ႈၸိူဝ်းၼၼ်ႉ တၵ်းဢမ်ႇမီးသဵၼ်ႈတၢင်းဢၼ်ပၢႆႈလႄႈလွတ်ႈ။
၃၆ လႆႈငိၼ်းသဵင် ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉႁႆႈႁွင်ႉဢိၵ်ႇတင်း သဵင်ဢၼ်ၶဝ်ၸိူဝ်းဢၼ်ပဵၼ်သူဝ်းလူင်သူဝ်းမျၢတ်ႈၼၼ်ႉပွင်ႉၶၢၼ်းၼၼ်ႉဢေႃႈ။ လွင်ႈမၼ်းၸမ်း ထႃႇဝရႃႉၽြႃးယႃႉၽဵဝ်ႈတီႈဢၼ်ၶဝ်ယၢမ်ႈ ၵိၼ်ယူႇၼၼ်ႉပႅတ်ႈဢေႃႈ။
၃၇ တီႈယူႇတၼ်းသဝ်းဢၼ်ၼိမ်လီတဵတ်ႇလီၼၼ်ႉၵေႃႈလႆႈၶၢမ်ႇတၢင်းဢၼ်သိတ်ႇယဵၼ်ၵႂႃႇ ၵွပ်ႈပိူဝ်ႈဢၼ်ထႃႇဝရႃႉၽြႃးၸႂ်မႆႈၶႆႈၸႃႉႁႅင်းယႂ်ႇၼႃႇလူင်လၢင်ၼၼ်ႉဢေႃႈ။
၃၈ မၼ်းၸဝ်ႈၸုၼ်ႉပႅတ်ႈယုမ်းတီႈယူႇမၼ်းၸဝ်ႈမိူၼ်ၸိူဝ်ႉၼင်ႇသၢင်ႇသီႈၼုမ်ႇၼၼ်ႉယဝ်ႉ။မိူင်းၶဝ်ၼၼ်ႉပဵၼ်တီႈဢၼ်လီဢၢမ်း ၵွပ်ႈပိူဝ်ႈတၢင်းဢၼ်ႁၢဝ်ႈဢၼ်ၵျၢမ်းၵေႃႉဢၼ်ၼိၵ်ႈၸၢၵ်ႈငႅၼ်းသေးဢိၵ်ႇတင်း တၢင်းဢၼ်မၼ်းၸဝ်ႈၸႂ်မႆႈၶႆႈၸႃႉႁႅင်းယႂ်ႇၼႃႇၼၼ်ႉဢေႃႈ။