၂၂
တၢင်းဢၼ်ၸီႇယၢင်ႇၶုၼ်ဢၼ်မိူၵ်ႈ
၁ ထႃႇဝရႃႉၽြႃးမီးဢမိင်ႉၸမ်း၊-မႂ်းလူင်းၸူးၵႃႈတီႈႁေႃၶုၼ်ႁေႃၶမ်းယုတ ၼၼ်ႉသေလႄႈ ဢဝ်ၵႂၢမ်းၼႆႉသင်ႇလၢတ်ႈဝႆႉလႄႈဝႃႈ၊-
၂ ၶုၼ်ႁေႃၶမ်းယုတဢၼ်ၼင်ႈၵႃႈၼိူဝ်ရႃႇၸႃႉပလၢင်ႇၶုၼ်လူင်တႃႇဝိတ်ႉ တူဝ်မႂ်းဢိၵ်ႇတင်းၶႃႈမႂ်းတင်းလၢႆ တင်းၵူၼ်းမိူင်းမႂ်းဢၼ်ၶဝ်ႈၵႃႈၼႂ်းၽၵ်းတူဝဵင်းၸိူဝ်းၼႆႉၶဝ်ဢိူၺ်း။ ဢွၼ်ၵၼ်ထွမ်ႇ ငိၼ်းၼုၵ်ႈၵပၢတ်ႈထႃႇဝရႃႉၽြႃးတႃႉ။
၃ ထႃႇဝရႃႉၽြႃးမီးဢမိင်ႉၸမ်း၊-ဢွၼ်ၵၼ်ၸီႇယၢင်ႇၸွမ်းၼင်ႇတြႃးလႄႈတႅပ်းတတ်းသိုဝ်ႈသိုဝ်ႈတေႃႇတေႃႇတႃႉ။ဢွၼ်ၵၼ်ၵႄႇသႄႇၼုၵ်ႈဢဝ်ၵေႃႉဢၼ်လႆႈၶၢမ်ႇတၢင်းဢၼ်ႁိမ်ႁူင်ႇၼၼ်ႉ လွတ်ႈသေၵႃႈၼႂ်းမိုဝ်းၵေႃႉဢၼ်ၼိၵ်ႈၸၢၵ်ႈငႅၼ်းသေးၼၼ်ႉတႃႉ။ ယႃႇပေဢွၼ်ၵၼ်ႁဵတ်း ဢၼ်ဢမ်ႇၸွမ်းၼင်ႇတြႃးသေလႄႈၼိၵ်ႈၸၢၵ်ႈငႅၼ်းသေးၵေႃႉဢၼ်ပဵၼ်ၶႅၵ်ႇ၊ ၵေႃႉဢၼ်ဢမ်ႇမီးပေႃႈမီးမေႈ၊ မေႈမုၵ်ႉမေႈမၢႆႈတင်းလၢႆ ယႃႇပေဢွၼ်ၵၼ်ထွၵ်ႇလိူတ်ႈ ၶဝ်ၸိူဝ်းဢၼ်ဢမ်ႇမီးဢပျႅတ်ႈၼၼ်ႉ ၵႃႈတီႈၼႆႉ။
၄ လွင်ႈမၼ်းၸမ်းပေႃးသူႁဵတ်းမႅၼ်ႈၸွမ်းၵႃႈၼင်ႇပိင်းၺၢပ်ႈၸဝ်ႈၼႆႉၸိုင် ၶုၼ်ႁေႃၶမ်းဢၼ်ၶီႇလေႃႉရထႃး၊ ဢၼ်ၶီႇမႃႉၸိူဝ်းၼၼ်ႉဢိၵ်ႇတင်းၶႃႈမၼ်းတင်းလၢႆ တင်းၵူၼ်းဝၢၼ်ႈၵူၼ်းမိူင်းၸဝ်ႈတင်းလၢႆတၵ်းဢွၼ်ၵၼ်ၶဝ်ႈ ၵႃႈၼႂ်းႁူးၽၵ်းတူႁိူၼ်းၸဝ်ႈ ၼႆႉဢေႃႈ။
၅ ပေႃးဢမ်ႇၼၼ်ပေႃးသူယင်းဢမ်ႇထွမ်ႇဢမ်ႇဢဝ်ဢမိင်ႉၸဝ်ႈၼႆႉၸိုင် ၵဝ်ထႃႇဝရႃႉၽြႃးဢဝ်တူဝ်ၸဝ်ႈၵဝ်တိူင်ႇလႄႈဝႃႈ ႁိူၼ်းၸဝ်ႈၼႆႉတၵ်းလႆႈပဵၼ်တီႈဢၼ်သိတ်ႇၵူၼ်းယဵၼ်ၵူၼ်းဢေႃႈ၊ ဝႃႈၼင်ႇ ၼႆဢေႃႈ။
၆ ထႃႇဝရႃႉၽြႃးမီးဢမိင်ႉလူၺ်ႈလွင်ႈႁေႃၶုၼ်ႁေႃၶမ်းယုတၸမ်း၊-ပိၵ်ႉသမ်ႉမႂ်းပဵၼ်ၸိူဝ်ႉၼင်ႇၵႃႈတီႈမိူင်းၵိလတ်ႉဢိၵ်ႇတင်း ၸိူဝ်ႉၼင်ႇၵႃႈတီႈပၢႆၸိၵ်းလွႆလေႇပၼုၼ်ႇ ၼၼ်ႉတီႈၵဝ်သေၵေႃႈၵဝ်တၵ်းႁႂ်ႈမႂ်းပဵၼ်ထိူၼ်ႇပဵၼ်ၶိူဝ်း၊ ဝဵင်းဢၼ်ၵူၼ်းဢမ်ႇယူႇဢမ်ႇသဝ်း ၼၼ်ႉဢေႃႈ။
၇ ၵဝ်တၵ်းပွင်ႁႅၼ်းၶဝ်ၸိူဝ်းဢၼ်ပႃးၽႆးဢိၵ်ႇတင်းတႃမၢတ်ႇၼၼ်ႉ ႁႂ်ႈလႆႈယႃႉၽဵဝ်ႈမႂ်းလႄႈၶဝ်ၼၼ်ႉ တၵ်းဢွၼ်ၵၼ်ပွမ်ႈတူၼ်ႈဢႃႇရိတ်ႉဢၼ်မျတ်ႈလီသေပိူၼ်ႈတီႈမႂ်းၸိူဝ်းၼၼ်ႉလူမ်ႉသေလႄႈ ဢဝ် ၶျႃးတူၵ်းသႂ်ႇၵႃႈၼႂ်းၽႆးဢေႃႈ။
၈ ၵူၼ်းမဵဝ်းၼမ်ၼႃႇတၵ်းတႆႇတၢင်းပႆတၢင်းၵႂႃႇၵႃႈတီႈႁိမ်းဝဵင်းၼႆႉသေလႄႈၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်ၵၼ်လႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈထႃႇဝရႃႉၽြႃးႁဵတ်း ၸိူဝ်ႉၼင်ႇၼႆတီႈဝဵင်းလူင်ၼႆႉ။
၉ မိူဝ်ႈဢၼ်ဝႃႈၼင်ႇၼႆၸိုင် ၶဝ်တၵ်းဢွၼ်ၵၼ်ၶိုုၼ်းလၢတ်ႈတီႈၵၼ်လႄႈဝႃႈ၊-ၵွပ်ႈပိူဝ်ႈၶဝ်ၸိူဝ်းၼႆႉၸုၼ်ႉပႅတ်ႈပတိၺိၼ်ႇထႃႇဝရႃႉၽြႃးၽြႃးပဵၼ်ၸဝ်ႈၶဝ်သေလႄႈ ဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇ ၽြႃးတၢင်ႇသူႇတၢင်ႇပႃး တင်းလၢႆ ၼၼ်ႉယဝ်ႉ၊ဝႃႈၼင်ႇၼႆဢေႃႈ။
၁၀ ယႃႇပေဢွၼ်ၵၼ်ႁႆႈႁွင်ႉလႄႈ ၶၢင်းၶီၶၢင်းၽၢၼ်ၵွပ်ႈပိူဝ်ႈၵေႃႉဢၼ်တၢႆၼၼ်ႉ။ဢွၼ်ၵၼ်ႁႆႈႁွင်ႉၵွပ်ႈပိူဝ်ႈ ၵေႃႉဢၼ်ၵႂႃႇတၢင်ႇတီႈတၢင်ႇလႅၼ်ၼၼ်ႉတႃႉ။မၼ်းၼၼ်ႉၵမ်းလိုၼ်းဢမ်ႇလႆႈၶိုၼ်းမႃး။ဢမ်ႇလႆႈႁၼ်မိူင်းတီႈဢၼ်တူဝ်ၸဝ်ႈၵဝ်ႇၵိူတ်ႇ လဵင်ႉၼၼ်ႉ။
၁၁ ထႃႇဝရႃႉၽြႃးဢဝ်လွင်ႈသႃႇလုမ်ႇ လုၵ်ႈၸၢႆးၶုၼ်လူင်ယုဝ်ႇသိယဢၼ်ၼင်ႈႁၢင်ႈၼၢင်ႈႁေႃတၢင်တူဝ်ၸဝ်ႈပေႃႈမၼ်းယုဝ်ႇသိယ လႄႈဢွၵ်ႇသေၵႃႈတီႈမိူင်းၼႆႉၵႂႃႇၼၼ်ႉလႄႈမီးဢမိင်ႉဝႆႉၸမ်း၊-ၶုၼ်ၼၼ်ႉၵမ်းလိုၼ်းဢမ်ႇလႆႈၶိုၼ်းမႃးၵႃႈတီႈမိူင်းၼႆႉ။
၁၂ မၼ်းတၵ်းလႆႈတၢႆ ၵႃႈၼႂ်းမိူင်းတီႈဢၼ်ၶဝ်သိမ်းဢဝ်မၼ်းၵႂႃႇၼၼ်ႉလႄႈ ၵမ်းလိုၼ်းမၼ်းဢမ်ႇလႆႈၶိုၼ်း ႁၼ်မိူင်းၼႆႉ။
၁၃ ၵေႃႉဢၼ်ဢဝ်လွင်ႈတၢင်းဢၼ်ဢမ်ႇတြႃးတႄႇႁဵတ်းႁိူၼ်းမၼ်းလႄႈဢဝ်လွင်ႈတၢင်းဢၼ်ဢမ်ႇသိုဝ်ႈဢမ်ႇတေႃႇႁဵတ်းႁၢၼ်ႉၼိူဝ်မၼ်းၸိူဝ်းၼၼ်ႉၼၼ်ႉၵေႃႉဢၼ်ဢမ်ႇပၼ်ၵႃႈပၼ်ၶၼ် မၼ်းၸႂ်ႉၵိၼ်ၵူဝ်းႁိူၼ်းၸမ်ၵၼ်လႄႈ
၁၄ ဢမ်ႇၶျႃးပၼ်သူးပုၼ်ႈတၢင်းႁဵတ်းၼၼ်ႉ ၵေႃႉဢၼ်လၢတ်ႈလႄႈဝႃႈၵဝ်တၵ်းႁဵတ်းႁိူၼ်းဢၼ်ယႂ်ႇဢၼ်လူင်၊ လုၵ်းႁၢၼ်ႉၼိူဝ်ဢၼ်ၵႂၢင်ႈလီလႃးလီဢေႃႈ၊ဝႃႈၼင်ႇၼႆသေလႄႈ မုင်ႈႁူးလၢင်းတဵၼ်လႄႈဢဝ်မႆႉဢႃႇရိတ်ႉ မုင်းသေယဝ်ႉ ဢဝ်ႁၢၼ်လႅင်ႊတႃးၼၼ်ႉမီးဢႃႉမင်ႇၵလႃႇ ဢေႃႈ။
၁၅ ထႃႇဝရႃႉၽြႃးမီးဢမိင်ႉၸမ်း၊-မႂ်းတၵ်းလႆႈဢုပ်ႉပိူင်ႇၸၢမ်ႇၸႃး ၵွပ်ႈပိူဝ်ႈဢၼ်ၸႂ်ပိုင်ႈၸႂ်လီမုၼ်ၵုင်ႇမႆႉဢႃႇရိတ်ႉၼင်ႇႁိုဝ်။ ပေႃႈမႂ်းၼၼ်ႉလႆႈၵိၼ်လႆႈၶူပ်းလႆႈသူတ်ႉလႆႈဢိုၵ်ႉ ဢိမ်ႇဢိမ်ႇတဵမ်တဵမ်ယူႇဢမ်ႇၸႂ်ႈႁိုဝ်။မၼ်းၸီႇယၢင်ႇလႄႈတႅပ်းတတ်းၸွမ်းၼင်ႇတြႃး ဢမ်ႇၸႂ်ႈႁိုဝ်။
၁၆ မိူဝ်ႈၼၼ်ႉမၼ်းမီးတၢင်းဢၼ်လႆႈလီလႆႈပဵၼ်ဢေႃႈ။ မၼ်းပႂ်ႉဢမူႉၶဝ်ၸိူဝ်းဢၼ်ယၢၵ်ႈဢၼ်ၽၢၼ်ဢိၵ်ႇတင်း ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉလႄႈၸီႇယၢင်ႇၸွမ်းၼင်ႇတြႃးဢေႃႈ။မိူဝ်ႈၼၼ်ႉမၼ်းမီးတၢင်းဢၼ်လႆႈလီလႆႈပဵၼ်ဢေႃႈ။
၁၇ လွင်ႈတၢင်း ၼႆႉပဵၼ်ဢၵျူဝ်းဢၼ်ႁူႉၸၵ်းၵဝ်ဢမ်ႇၸႂ်ႈႁိုဝ်။ မၢၵ်ႇတႃမႂ်းဢိၵ်ႇတင်းႁူဝ်ၸႂ်မႂ်းၸမ်းၼွၵ်ႈသေတၢင်းဢၼ်လေႃးၽႃႉပူၼ်ႉလိူဝ် တၢင်းဢၼ်ထွၵ်ႇလိူတ်ႈၵေႃႉဢၼ်ဢမ်ႇမီးဢပျႅတ်ႈ တၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉ ဢမ်ႇၸၢင်ႈဝႆႉဢမူႉတီႈလွင်ႈတၢင်းဢၼ် လႂ်လႃးလႃး။
၁၈ ပိူဝ်ႈၼႆလႄႈထႃႇဝရႃႉၽြႃးဢဝ်လွင်ႈယေႃႇယၵိမ်ႇ လုၵ်ႈၸၢႆးၶုၼ်လူင်ယုဝ်ႇသိယ ၶုၼ်ႁေႃၶမ်းယုတလႄႈမီးဢမိင်ႉၸမ်း၊- ၶဝ်ဢမ်ႇလႆႈဢွၼ်ၵၼ်ႁွင်ႉႁႆႈလႄႈဝႃႈ၊- ပီႈၸၢႆးၵဝ်ဢိူၺ်း။ၼွင်ႉယိင်းၵဝ်ဢိူၺ်း။ဝႃႈၼင်ႇၼႆလႄႈ ၶၢင်းၶီၶၢင်းၽၢၼ်ပုၼ်ႈမၼ်းလႄႈ ဝႃႈၸဝ်ႈၵဝ်ဢိူၺ်း။
၁၉ မုၼ်ၽုင်းၵဝ်ဢိူၺ်း။ဝႃႈၼင်ႇၼႆၼၼ်ႉ။ ၶုၼ်ၼၼ်ႉတၵ်းလႆႈၶၢမ်ႇတၢင်းဢၼ်တိုတ်ႉလၢၵ်းလႄႈ ဢဝ်ဢွၵ်ႇၵႂႃႇၸူးၵႃႈတီႈၼွၵ်ႈၽၵ်းတူဝဵင်းယေႇရုသလႅမ်ႇသေလႄႈ ဢဝ်သၢင်းၵျူဝ်ႇမိူၼ်ၸိူဝ်ႉၼင်ႇဢၼ်သၢင်းၵျူဝ်ႇတူဝ်လီႈၼၼ်ႉဢေႃႈ။
၂၀ ၶိုၼ်ႈၵႃႈၼိူဝ်လွႆလေႇပၼုၼ်ႇလႄႈပၢဝ်ႇသေႃႇတႃႉ။သႅၼ်ႇႁွင်ႉၵႃႈၼႂ်းမိူင်းပႃႇသၼ်ႇတႃႉ။ယူႇၵႃႈတီႈဢႃႇပရိမ်ႇၵိဝ်သဵင်တႃႉ။လွင်ႈမၼ်းၸမ်း ၵေႃႉသေႈမႂ်းၸိူဝ်းၼၼ်ႉႁွတ်ႈထိုင်တၢင်းဢၼ်လူႉဢၼ်လႅဝ်ယဝ်ႉ။
၂၁ ၵဝ်ပၼ်သတီႉၼႂ်းမိူဝ်ႈဢၼ်မႂ်းလႆႈလီလႆႈပဵၼ်ၼၼ်ႉလႄႈ မႂ်းၶိုၼ်းလၢတ်ႈလႄႈဝႃႈ၊-ၵဝ်ဢမ်ႇထွမ်ႇဢမ်ႇဢဝ်ဝႃႈၼင်ႇၼႆဢေႃႈ။ မႂ်းယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်ၸႃႉၸဵမ်မိူဝ်ႈ ဢၼ်မႂ်းယင်းလဵၵ်ႉယင်းဢွၼ်ႇၼၼ်ႉလႄႈ ယူႇၵႃႈၼင်ႇဢၼ်ယူႇၼၼ်ႉယဝ်ႉ။
၂၂ လူမ်းတၵ်းပဝ်ႇၶဝ်ၸိူဝ်းဢၼ်လဵင်ႉထိင်းမႂ်းၸိူဝ်းၼၼ်ႉလႄႈ ၵေႃႉသေႈမႂ်းၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇဢေႃႈ။မိူဝ်ႈၼၼ်ႉမႂ်းတၵ်းမီးတၢင်းဢၼ်ဢူၵ်းဢၢႆလႄႈၸႂ်လူႉၵွပ်ႈပိူဝ်ႈတုၸရိူၵ်ႈမႂ်းၵႃႈမီးၼၼ်ႉ ဢမၢၼ်ႇၶၢၼ် ပဵၼ်ဢေႃႈ။
၂၃ ၵေႃႉဢၼ်ၸင်ႇယူႇၵႃႈတီႈလွႆလေႇပၼုၼ်ႇလႄႈ ႁဵတ်းႁၢင်းယူႇၵႃႈတီႈတူၼ်ႈဢႃႇရိတ်ႉတင်းလၢႆၼႆႉဢိူၺ်း။ယၢမ်းမိူဝ်ႈဢၼ်မႂ်းလႆႈၶၢမ်ႇဝူၺ်ႇတၼႃႇဢၼ်ၶူပ်းဢၼ်ၶိုၼ်ႈၼႃႇ မိူၼ်ၸိူဝ်ႉၼင်ႇဢၼ်မေႈယိင်းလႆႈၶၢမ်ႇဝူၺ်ႇတၼႃႇ တၢင်းဢၼ်ၵိူတ်ႇလဵင်ႉလုၵ်ႈၼၼ်ႉၸိုင် မၼ်းတၵ်းပဵၼ်လွင်ႈဢၼ်လီဢိတ်းလူၼႃႇလူင်လၢင်ထၢၼ်ႇႁိုဝ်လူင်ပေႇ။
၂၄ ထႃႇဝရႃႉၽြႃးမီးဢမိင်ႉၸမ်း၊- ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉပိၵ်ႉသမ်ႉၶေႃႇၼိ လုၵ်ႈၸၢႆးၶုၼ်လူင်ယေႃႇယၵိမ်ႇ ၶုၼ်ႁေႃၶမ်းယုတ ၼၼ်ႉၼႆႉပဵၼ်လၢၵ်ႈၸွပ်ႇတၼ်းသိၵ်ႈဢၼ်ပႃးၵႃႈတီႈမိုဝ်းၽၢႆႇၶႂႃၵဝ်ဢမၢၼ်ႇၶၢၼ်ပဵၼ်သေၵေႃႈၵဝ်တၵ်းပႄႇမႂ်း ပႅတ်ႈဢေႃႈ။
၂၅ ၵဝ်တၵ်းဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်ၸွမ်းႁႃဢသၢၵ်ႈမႂ်း၊ ၵေႃႉဢၼ်မႂ်းၵူဝ်ႁႄၼႃႇလူင်လၢင်ဢၼ်ဝႃႈၵႃႈၼႂ်းမိုဝ်း ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇ ဢိၵ်ႇတင်းၵူၼ်းၶႃႇလတေႇ တင်းလၢႆၼၼ်ႉဢေႃႈ။
၂၆ ၵဝ်တၵ်းဢဝ်မႂ်းဢိၵ်ႇတင်းမေႈမႂ်းဢၼ်ၵိူတ်ႇလဵင်ႉမႂ်းမႃးၼၼ်ႉ ႁေႃႈဢွၵ်ႇၸူးၵႃႈတီႈမိူင်းဢၼ် ဢမ်ႇၸႂ်ႈထႃႇၼႃႉတီႈဢၼ်သူၵိူတ်ႇလဵင်ႉမႃးၼၼ်ႉလႄႈသူတၵ်းလႆႈတၢႆၵႃႈတီႈၼၼ်ႉဢေႃႈ။
၂၇ ၵမ်းလိုၼ်း ၶဝ်ဢမ်ႇလႆႈဢွၼ်ၵၼ်ၶိုၼ်းမႃးၵႃႈတီႈမိူင်းတီႈဢၼ်ၶဝ်မီးဢလူဝ်ႇၶႆႈၶိုၼ်းမႃးၼၼ်ႉ။ၵူၼ်းၵေႃႉၼႆႉဢၼ်ဝႃႈ ၶေႃႇၼိ ၼႆႉပဵၼ်မေႃႈလိၼ်တီႈဢၼ်ႁဵတ်းဢမ်ႇပေႃးၼင်ႇႁိုဝ်လႄႈတႅၵ်ႇလႅဝ်ႁိုဝ်။
၂၈ ပဵၼ်ၶိူင်ႈပိူင်ဢၼ်ၽူႈ လႂ်ဢမ်ႇထုၵ်ႇၸႂ်ၵျိူၵ်ႈၸႂ်ၼၼ်ႉႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မၼ်းဢိၵ်ႇတင်းၸိူဝ်ႉၶိူဝ်းမၼ်းလႆႈၶၢမ်ႇတၢင်းဢၼ်ႁေႃႈဢွၵ်ႇၸူးၵႃႈတီႈမိူင်း ဢၼ်ၶဝ်ဢမ်ႇႁူႉၼၼ်ႉၼင်ႇႁိုဝ်။
၂၉ လိၼ်မိူင်းဢိူၺ်း။လိၼ်မိူင်းဢိူၺ်း။ လိၼ်မိူင်းဢိူၺ်း။ထွမ်ႇငိၼ်းဢမိင်ႉထႃႇဝရႃႉၽြႃးတႃႉ။ ထႃႇဝရႃႉၽြႃးမီးဢမိင်ႉၸမ်း၊-တႅမ်ႈမၢႆလွင်ႈဢၼ်ၵူၼ်းၵေႃႉၼႆႉပဵၼ် ၵေႃႉဢၼ်ဢမ်ႇမီးလုၵ်ႈမီးလၢင်း၊
၃၀ ၵေႃႉဢၼ်ဢမ်ႇလႆႈလီလႆႈပဵၼ်ၸူဝ်ႈဢသၢၵ်ႈမၼ်းၼၼ်ႉဝႆႉတႃႉ။ၵေႃႉဢၼ်ပဵၼ်ၸိူဝ်ႉၶိူဝ်းမၼ်းၼၼ်ႉ ဢမ်ႇလႆႈမီးဢၶႂၢင်ႉဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇ ၶုၼ်တႃႇဝိတ်ႉဢိၵ်ႇတင်းဢၶႂၢင်ႉဢၼ်လႆႈဢုပ်ႉပိူင်ႇၸၢမ်ႇၸႃးမိူင်းယုတ သေၵေႃႉသေၵူၼ်း။