၁၉
၁ ထႃႇဝရႃႉၽြႃးမီးဢမိင်ႉၸမ်း၊- မႂ်းၵႂႃႇလႄႈသိုဝ်ႉဢဝ်ၼမ်ႉတဝ်ႈတီႈၸဝ်ႈမေႃႈလိၼ်သေယဝ်ႉ ႁွင်ႉဢဝ်ၵူၼ်းဢၼ်ပဵၼ်ၵေႇပဵၼ်ႁူဝ်တင်းလၢႆ ဢိၵ်ႇတင်း ယိတ်ႉပ ရေႃးႁိၵ်ႈ
၂ ဢၼ်ဢသၢၵ်ႈယႂ်ႇၵမ်ႈၽွင်ႈလႄႈၵႂႃႇတီႈၶူင်ႈႁူၺ်ႈလုၵ်ႈၸၢႆးႁိၼ်ႇၼုမ်ႇ ၼွၵ်ႈၽၵ်းတူးႁရသိတ်ႉသေလႄႈ ႁွင်ႉပၢဝ်ႇႁွင်ႉလၢတ်ႈၵႂၢမ်းၵႃႈဢၼ်ၵဝ်မီးဢ မိင်ႉဝႆႉၼၼ်ႉလႄႈဝႃႈ၊-
၃ ၶုၼ်ႁေႃၶမ်းယုတဢိၵ်ႇတင်းၵူၼ်းဝဵင်းယေႇရုသလႅမ်ႇၶဝ်ဢိူၺ်း။ ဢွၼ်ၵၼ်ထွမ်ႇငိၼ်းဢမိင်ႉထႃႇဝရႃႉၽြႃးတႃႉ။ၸဝ်ပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉၸမ်း၊-တူၺ်းလူ။ ၵဝ်တၵ်းႁႂ်ႈၽေးႁွတ်ႈထိုင်ၵႃႈတီႈၼႆႉတေႃႇထိုင်ႁွတ်ႈ ၵႃႈပဵၼ်ၵေႃႉဢၼ်လႆႈငိၼ်းလွင်ႈမၼ်းၼၼ်ႉ ၵူႈၵေႃႉၵူႈၵူၼ်းႁႂ်ႈႁူၶဝ်ထၼ်ႈပေႃးၶူမ်းဢေႃႈ။
၄ လွင်ႈမၼ်းၸမ်းၶဝ်ဢွၼ်ၵၼ်ၸုၼ်ႉပႅတ်ႈၵဝ်လႄႈ ႁႂ်ႈထႃႇၼႃႉတီႈၼႆႉပဵၼ်တၢင်ႇဝၢၼ်ႈတင်းမိူင်းၵႂႃႇသေလႄႈဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇဝၢၼ်ႈတၢင်ႇမိူင်းဢၼ်ၶဝ်ဢမ်ႇႁူႉ၊ ဢၼ်ပူႇမွၼ်ႇၶဝ်ဢိၵ်ႇတင်း ၶုၼ်ႁေႃၶမ်းယုတ တင်းလၢႆဢမ်ႇႁူႉၼၼ်ႉၵႃႈတီႈၼႆႉသေယဝ်ႉ ၶဝ်ဢွၼ်ၵၼ်ဢဝ်လိူတ်ႈၶဝ်ၸိူဝ်းဢၼ်ဢမ်ႇမီးဢပျႅတ်ႈၼၼ်ႉႁႂ်ႈတဵမ်ဝႆႉၵႃႈၼႂ်း ထႃႇၼႃႉတီႈၼႆႉယဝ်ႉ။
၅ ၶဝ်ဢွၼ်ၵၼ်တႄႇႁဵတ်းထႃႇၼႃႉတီႈသုင်တင်းလၢႆတီႈၽြႃးပႃႇလႁႂ်ႈလႆႈဢဝ်လုၵ်ႈၸၢႆးၶဝ်တုတ်ႇၽႆးလႄႈႁဵတ်းဝၢတ်ႈပုၵ်ႉၸေႃႇတီႈၽြႃးပႃႇလဢၼ်ၵဝ်ဢမ်ႇၸီႇယၢင်ႇ ဢမ်ႇသင်ႇလၢတ်ႈဝႆႉ ဢၼ်ႁူဝ်ၸႂ်ၵဝ်ဢမ်ႇၵျၢမ်ႇပွင်လႃးလႃးၼၼ်ႉ ယဝ်ႉ။
၆ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်းၵူၼ်းတင်းလၢႆတၵ်းဢမ်ႇႁွင်ႉႁိၵ်ႈ ထႃႇၼႃႉတီႈၼႆႉလႄႈဝႃႈထႃႇၼႃႉတေႃႇၽိတ်ႉ၊ ဢမ်ႇႁွင်ႉႁိၵ်ႈဝႃႈၶူင်ႈႁူၺ်ႈလုၵ်ႈၸၢႆးႁိၼ်ၼုမ်ႇလႄႈၶဝ်တၵ်းလႆႈႁွင်ႉႁိၵ်ႈဝႃႈ ၶူင်ႈႁူၺ်ႈတီႈဢၼ်ဢဝ်တၢႆဝႃႈၼင်ႇၼႆၼၼ်ႉ တၵ်းႁွတ်ႈထိုင် မႃးဢေႃႈ။
၇ ၵဝ်တၵ်းယႃႉတၢင်းၵျၢမ်ႇတၢင်းပွင်ၵူၼ်းမိူင်းယုတ၊ၵူၼ်းဝဵင်းယေႇရုသလႅမ်ႇ တင်းလၢႆပႅတ်ႈသေၵႃႈတီႈထႃႇၼႃႉတီႈၼႆႉလႄႈ တၵ်းႁႂ်ႈၶဝ်တူၵ်းသုမ်းလူၺ်ႈလၢပ်ႇလႅဝ်းရၢၼ်ႇသူႇၶဝ်တင်းလၢႆ ဢိၵ်ႇတင်းလူၺ်ႈမိုဝ်းၶဝ်ၸိူဝ်းဢၼ်ၸွမ်းႁႃဢဝ်ဢသၢၵ်ႈၶဝ်ၼၼ်ႉဢေႃႈ။ၵဝ်တၵ်းဢဝ်တူဝ်တၢႆၶဝ်ပၼ်ပုၼ်ႈဢၼ်ၼူၵ်ႉ ၵၢင်ႁၢဝ်တင်းလၢႆတၵ်းၵိၼ်ဢေႃႈ။
၈ ၵဝ်တၵ်းႁႂ်ႈဝဵင်းၼႆႉပဵၼ်တီႈဢၼ်လီဢၢမ်းတီႈဢၼ်ငိၼ်းသဵင်ဢၼ်ႁဵတ်းသီႉသီႉသေႃႉသေႃႉသေႉသွမ်းဢေႃႈ။ၶဝ်ၸိူဝ်းဢၼ်တႆႇတၢင်းပႆတၢင်းၵႃႈမီးၼၼ်ႉ တၵ်းဢွၼ်ၵၼ်ဢၢမ်းလႄႈႁဵတ်းသဵင်ဢၼ်သီႉသီႉသေႃႉသေႃႉ သေႉသွမ်းၵွပ်ႈပိူဝ်ႈ ၽေးဝဵင်းၼႆႉၵူႈၸိူဝ်ႉၵူႈပိူင်ၼၼ်ႉဢေႃႈ။
၉ ၵဝ်တၵ်းႁႂ်ႈၶဝ်ၵိၼ်ၼိူဝ်ႉလုၵ်ႈၸၢႆးၶဝ် ၼိူဝ်ႉလုၵ်ႈယိင်းၶဝ်လႄႈ ၶဝ်ၼင်ႇၵၼ်ၵၼ် ၵေႃႉၼိုင်ႈလႄႈၵေႃႉၼိုင်ႈတၵ်းၵိၼ်ၼိူဝ်ႉၵၼ်ၼႂ်းမိူဝ်ႈဢၼ်တင်းတပ်ႉလွမ်ႉႁွပ်ႈၶဝ်ယူႇ ဢိၵ်ႇတင်းၼႂ်းတၢင်းဢၼ်ၵိတ်ႇဢၼ်ၵႅၼ်း ရၢၼ်ႇသူၶဝ်ဢိၵ်ႇတင်းၶဝ်ၸိူဝ်းဢၼ်ၸွမ်းႁႃ ဢဝ်ဢသၢၵ်ႈၶဝ်ၼၼ်ႉတၵ်းႁႂ်ႈၶဝ်ၵိတ်ႇၵႅၼ်းၼၼ်ႉဢေႃႈ၊ ဝႃႈၼင်ႇၼႆတႃႉ။
၁၀ မိူဝ်ႈၼၼ်ႉ မႂ်းဢဝ်ၼမ်ႉတဝ်ႈၼၼ်ႉတႅၵ်ႇသိုဝ်ႈၼႃႈတႂ်ႈၶဝ်ၸိူဝ်းဢၼ်ၵႂႃႇလူၺ်ႈၵၼ်တင်းမႂ်း ၸိူဝ်းၼၼ်ႉလႄႈသင်ႇလၢတ်ႈဝႆႉတီႈၶဝ်လႄႈဝႃႈ၊-
၁၁ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊- ၵဝ်တၵ်းဢဝ်ဝဵင်းၼႆႉဢိၵ်ႇတင်းၵူၼ်းတင်းလၢႆၼႆႉ တႅၵ်ႇမိူၼ်ၸိူဝ်ႉၼင်ႇဢၼ်ဢဝ်ၼမ်ႉတဝ်ႈၸဝ်ႈမေႃႈလိၼ် ဢၼ်ဢမ်ႇသမ်ႉၶိုၼ်းမႄးႁဵတ်းလႆႈၼၼ်ႉတႅၵ်ႇၼၼ်ႉလႄႈ ၶဝ်တၵ်းဢွၼ်ၵၼ်သၢင်းၵျူဝ်ႇ ၵႃႈၼႂ်းတီႈတေႃႇၽိတ်ႉၼႆႉႁႂ်ႈထၼ်ႈပေႃး လိၼ်တီႈဢၼ်သၢင်းၵျူဝ်ႇဢမ်ႇပေႃးဢမ်ႇၵုမ် လႆႈဢေႃႈ။
၁၂ ထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းႁဵတ်းထႃႇၼႃႉတီႈၼႆႉဢိၵ်ႇတင်း တီႈၵူၼ်းဢၼ်ယူႇၵႃႈၼႂ်းထႃႇၼႃႉတီႈၼႆႈၸိူဝ်းၼၼ်ႉ ၸိူဝ်ႉၼင်ႇၼႆလႄႈႁႂ်ႈဝဵင်းၼႆႉပဵၼ်ၸိူ်ဝ်ႉၼင်ႇတီႈတေႃႇၽိတ်ႉဢေႃႈ။
၁၃ ႁိူၼ်းဝဵင်းယေႇရုသလႅမ်ႇ တင်းလၢႆႁေႃၶမ်းၶုၼ်လူင်ယုတတင်းလၢႆဢၼ်ဝႃႈ ႁိူၼ်းၵႃႈမီးဢၼ်ဢဝ်ၼၢမ်ႇသႃႇတုတ်ႇၽႆး ၵႃႈၼိူဝ်မုင်းႁိူၼ်းတီႈၶိူင်ႈပိူင်ၵၢင်ႁၢဝ်တင်းသဵင်ႈတင်းလူင်လႄႈ ဢဝ်ပုၵ်ႉၸေႃႇဢၼ်သွၼ်းလေႃႇၼၼ်ႉသွၼ်းလေႃႇတီႈၽြႃး တၢင်ႇသူႇတၢင်ႇပႃးၼၼ်ႉၸိူဝ်းၼၼ်ႉ တၵ်းလႆႈပဵၼ်ဢၼ်ၵူဝ်ႈၵိူၵ်ႇၸိူဝ်ႉၼင်ႇတီႈတေႃႇၽိတ်ႉၼႆႉဢေႃႈ၊ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
၁၄ မိူဝ်ႈၼၼ်ႉ ပရေႃးၽႅတ်ႈယေႇရမိ လုၵ်ႉသေၵႃႈတီႈတေႃႇၽိတ်ႉ တီႈဢၼ်ထႃႇဝရႃႉၽြႃးပွႆႇၸႂ်ႉမၼ်း ႁႂ်ႈလႆႈႁေႃးလၢတ်ႈၼၼ်ႉၶိုၼ်းမႃးလႄႈ ၸုၵ်းယူႇၵႃႈၼႂ်းတမ်ႇတိူင်းႁိူၼ်းထႃႇဝရႃႉၽြႃးယူႇသေလႄႈ မွၵ်ႇလၢတ်ႈ တီႈၵူၼ်းတင်းလၢႆလႄႈဝႃႈ၊-
၁၅ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉၸမ်း၊- ၵဝ်တၵ်းႁႂ်ႈၽေးတၢမ်ႇၵႃႈဢၼ်ၵဝ်ၶဵၼ်းဝႆႉၼၼ်ႉႁွတ်ႈထိုင်ၵႃႈၼိူဝ်ဝဵင်းၼႆႉဢိၵ်ႇတင်းဝၢၼ်ႈမၼ်းၵႃႈမီး ၵွပ်ႈပိူဝ်ႈဢၼ်ၶဝ်ႁႂ်ႈၶေႃးၶဝ်ၵႅၼ်ႇၶႅင်ႁႂ်ႈလႆႈဢမ်ႇထွမ်ႇဢဝ်ၵႂၢမ်းၵဝ်ၼၼ်ႉဢေႃႈ၊ ဝႃႈၼင်ႇၼႆဝႆႉယဝ်ႉဝႃႈၼင်ၼႆဢေႃႈ။