၁၇
၁ ဢပျႅတ်ႈမဵဝ်းယုတ မီးတၢင်းဢၼ်ဢဝ်တင်းၵၼ်းၺႅတ်ႈလဵၵ်းပၢႆလႅမ်ၸိင်းတႅမ်ႈမၢတ်ႈမၢႆလႄႈ ဢဝ်တူဝ်လိၵ်ႈဢႅၵ်ႉၶရႃႇ တၢင်ႇသႂ်ႇဝႆႉၵႃႈတီႈၶႅပ်းႁူဝ်ၸႂ်ၶဝ်ဢိၵ်ႇတင်းၵႃႈတီႈ ၶဝ်လႅမ်ယိၸ်ႉပလၢင်ႇၶဝ်ၼၼ်ႉယူႇဢေႃႈ
၂ တေႃႈၵႃႈလုၵ်ႈၶဝ်လၢင်းၶဝ်ယင်း ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းယိၸ်ႉပလၢင်ႇၶဝ်ဢိၵ်ႇတင်းတူၼ်ႈဢႃႇသရႃႉ ၶဝ်ဢၼ်မီးၵႃႈတီႈႁိမ်းတူၼ်ႈမႆႉဢၼ်ၶဵဝ်၊ၵႃႈၼိူဝ်လွႆဢၼ်သုင်ၸိူဝ်းၼၼ်ႉယူႇဢေႃႈ။လွႆၵဝ် ဢၼ်မီးၵႃႈၼႂ်းတီႈပၢင်ႇတီႈပဵင်းၼႆႉဢိူၺ်း။
၃ ၵဝ်တၵ်းဢဝ်ဢုၵ်ႉၸႃႇမႂ်းတင်းၽၼ်ႇတႃႇ ၵႃႈဢၼ်မႂ်းသိမ်းဝႆႉၼၼ်ႉဢိၵ်ႇတင်း တီႈဢၼ်သုင်မႂ်းၵႃႈၼႂ်းမိူင်းမႂ်းၵူႈတီႈၵူႈလႅၼ်ဢၼ်မႂ်းၽိတ်းပိူင်ႈလူၺ်ႈၸိူဝ်းၼၼ်ႉ ဢၢပ်ႈပၼ်ၵႃႈတီႈမိုဝ်း ၵေႃႉဢၼ်ႁိမ်ဢဝ်ႁူင်ႇဢဝ်ၼၼ်ႉဢေႃႈ။
၄ တူဝ်မႂ်းၵေႃႈတၵ်းလႆႈသုတ်ႉၶၢႆႉဢွၵ်ႇၵႂႃႇသေၵႃႈတီႈလိၼ်ဢမူၺ်ႇမႂ်း ဢၼ်ၵဝ်ပၼ်တီႈမႂ်းၼႆႉလႄႈတၵ်းႁႂ်ႈမႂ်းၶၢမ်ႇႁဵတ်းၶႃႈ ၵႃႈၼႂ်းမိူင်းရၢၼ်ႇသူႇမႂ်းတင်းလၢႆၵႃႈၼႂ်းမိူင်းဢၼ်မႂ်းဢမ်ႇႁူႉၼၼ်ႉဢေႃႈ။လွင်ႈမၼ်းၸမ်းသူဢွၼ်ၵၼ် သႂ်ႇၽႆးသုမ်ၽႆးတၢင်းၸႂ်မႆႈၶႆႈၸႃႉၵဝ်ဢၼ်တၵ်းမႆႈယူႇသေႇသေႇၼၼ်ႉဢေႃႈ။
၅ ထႃႇဝရႃႉၽြႃးမီးဢမိင်ႉၸမ်း၊- ၵေႃႉဢၼ်ၸႂ်ဢိင်ၸႂ်ပိုင်ႈၵူၼ်းလႄႈ ဢဝ်ၵူၼ်းသတ်ႉတဝႃႇႁဵတ်းႁႅင်းၶႅၼ်ႁႅင်း မိုဝ်းမၼ်းသေလႄႈ ႁူဝ်ၸႂ်မၼ်းၶၢႆႉတီႈဢွၵ်ႇသေၵႃႈတီႈထႃႇဝရႃႉၽြႃးၵႂႃႇၼၼ်ႉ ပဵၼ်ၵေႃႉဢၼ်ထုၵ်ႇ ၵိၼ်ႇထုၵ်ႇဝႃႈဢေႃႈ။
၆ ၵေႃႉၼၼ်ႉပဵၼ်ၸိူဝ်ႉၼင်ႇတူၼ်ႈမႆႉဢၼ်ၶႅၼ်ႉဢၼ်မီး ၵႃႈၼႂ်းတီႈပၢင်ႇတီႈပဵင်းၼၼ်ႉလႄႈဢမ်ႇလႆႈႁူႉ လွင်ႈဢၼ်တၢင်းလီတၢင်းငၢမ်းႁွတ်ႈထိုင်ၼၼ်ႉ။တၵ်းလႆႈယူႇၵႃႈၼႂ်းတီႈပၢင်ႇတီႈပဵင်းဢၼ်ႁႅင်ႈဢၼ်ႁွင်လိၼ်ၵိူဝ် ဢၼ်ၽူႈ လႂ်ၵေႃႈဢမ်ႇယူႇဢမ်ႇ သဝ်းၼၼ်ႉဢေႃႈ။
၇ ၵေႃႉဢၼ်ဢိင်ပိုင်ႈထႃႇဝရႃႉၽြႃးၵေႃႉဢၼ်ႁႂ်ႈထႃႇဝရႃႉၽြႃး ပဵၼ်လွင်ႈဢၼ်မၼ်းလီပိုင်ႈလီဢိင်ၼၼ်ႉ ပဵၼ်ၵေႃႉဢၼ်မီးမင်ႇၵလႃႇဢေႃႈ။
၈ ၵေႃႉၼၼ်ႉၸမ်း မိူၼ်ၸိူဝ်ႉၼင်ႇတူၼ်ႈဢၼ်ၽုၵ်ႇဢၼ်သွမ်ႈၵႃႈတီႈႁိမ်းၼမ်ႉလႄႈ ယင်ႇႁၢၵ်ႈၽႄႈႁၢၵ်ႈမၼ်းၵႃႈတီႈႁိမ်းၼမ်ႉႁွင်ႈသေလႄႈ ယင်းဢမ်ႇႁူႉဢမ်ႇႁၼ်လွင်ႈတၢင်းဢၼ် ႁွတ်ႈထိုင်ၶိင်ႇမႆႈၶိင်ႇႁွင်လႄႈ မႂ်ႊမၼ်းယင်းဢမ်ႇႁဵဝ်ႇဢမ်ႇၸွပ်ႈယင်းဢမ်ႇမီးတီႈဢၼ်လီမႆႈၸႂ်လူၺ်ႈ ၶူပ်ႇပီႊဢၼ်ၾႃႉလႅင်ႉၽူၼ်ဢမ်ႇတူၵ်းၼၼ်ႉလႄႈ ၸၢင်ႈမၵ်ႇမၢၵ်ႇယူႇတႃႇသေၼၼ်ႉ ဢေႃႈ။
၉ ႁူဝ်ၸႂ်ၸိုင်ၸၢင်ႈၵူတ်ႉၸၢင်ႈမဵဝ်ႉလိူဝ်တွၼ်းၼႃႇသေလွင်ႈတၢင်းၵူႈၸိူဝ်ႉၵူႈပိူင်လႄႈ မီးတၢင်းဢၼ်ၶၢႆႉ ယူႇပဵၼ်ယူႇဢေႃႈ။
၁၀ ၽူႈလႂ်ႁူႉသၽေႃးမၼ်းလႆႈ။ ၵဝ်ထႃႇဝရႃႉၽြႃးၼႆႉ ၸၢင်ႊၸႅတ်ႈထၢမ်ႁူဝ်ၸႂ်လႄႈၸၢမ်းတူၺ်းမၵ်ႇလၼ်း ၸေးၸေးၸွတ်ႇၸွတ်ႇႁႂ်ႈလႆႈပၼ်ဢၵျူဝ်းဢပျႅတ်ႈတီႈၵူၼ်းႁင်းၽႂ်ႁင်းမၼ်းၸွမ်း တၢင်းၵမ်တၢင်းၵျၢင်ႉၶဝ်မီးၼၼ်ႉဢေႃႈ။
၁၁ ၸိူဝ်ႉၼင်ႇၼၼ်ၼူၵ်ႉၵၢၼ်ႇငွမ်းၶႆႇဢၼ်ဢမ်ႇၸႂ်ႈၶႆႇမၼ်းၼၼ်ႉ ၵေႃႉဢၼ်ႁွမ်သိမ်းဢုၵ်ႉၸႃႇ ဢၼ်ဢမ်ႇတြႃးၼၼ်ႉပဵၼ်ၸိူဝ်ႉၼင်ႇၼၼ်လႄႈ တၵ်းဢဝ်ၸိူဝ်းၼၼ်ႉၵိုတ်းၵျၢၼ်ႇပႅတ်ႈဝႆႉ ၼႂ်းမိူဝ်ႈဢၼ်ဢသၢၵ်ႈမၼ်းတူၵ်းၼႂ်းၶိုင်ႈၵၢင်ၼၼ်ႉလႄႈ တၵ်းပဵၼ်ၵူၼ်းမိူၵ်ႈၼႂ်းတီႈသုတ်း မၼ်းၼၼ်ႉဢေႃႈ။
၁၂ ရႃႇၸႃႉပလၢင်ႇဢၼ်မုၼ်ႈယႂ်ႇၽုင်းယႂ်ႇၼႃႇလႄႈ သုင်ၼႃႇၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉပဵၼ်ထႃႇၼႃႉတီႈမူတ်းၸၢင်ႇႁဝ်းဢေႃႈ။
၁၃ ထႃႇဝရႃႉၽြႃး ဢၼ်ပဵၼ်လွင်ႈဢၼ်မဵဝ်းဢိသရေႇလလီမုင်ႈလီမွင်းၼၼ်ႉတီႈၶႃႈ။ၶဝ်ၸိူဝ်းဢၼ်ၸုၼ်ႉပႅတ်ႈၸဝ်ႈႁဝ်းၵႃႈမီးၼၼ်ႉ တၵ်းလႆႈဢွၼ်ၵၼ်ႁွတ်ႈထိုင်တၢင်းဢၼ်ဢူၵ်းဢၢႆဢေႃႈ။ၶဝ်ၸိူဝ်းဢၼ်ဢွၼ်ၵၼ်ဢွၵ်ႇသေ ၵႃႈတီႈၵဝ်ၵႂႃႇၼၼ်ႉတၵ်းလႆႈၶၢမ်ႇတၢင်းတႅမ်ႈမၢႆသႂ်ႇဝႆႉၵႃႈၼႂ်းလိၼ်ဢေႃႈ။ လွင်ႈမၼ်းၸမ်းၶဝ်ဢွၼ်ၵၼ်ၸုၼ်ႉပႅတ်ႈထႃႇဝရႃႉၽြႃး ဢၼ်ဝႃႈၼမ်ႉဢွၵ်ႇႁူးဢသၢၵ်ႈၼၼ်ႉယဝ်ႉ။
၁၄ ထႃႇဝရႃႉၽြႃးတီႈၶႃႈ။ၶႅၼ်းတေႃႈႁႂ်ႈတၢင်းၶႆႈတၢင်းပဵၼ်ၶႃႈၸဝ်ႈသၢၵ်ႈသႃႇၶႅၼ်းမႃးသေၵမ်းတီႈၶႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင် တၢင်းၶႆႈတၢင်းပဵၼ်ၶႃႈၸဝ်ႈတၵ်းသၢၵ်ႈသႃႇၶႅၼ်းမႃးတီႈၶႃႈဢေႃႈ။ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင် ၶႃႈၸဝ်ႈတၵ်းႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ်တီႈၶႃႈဢေႃႈ။ ၸဝ်ႈႁဝ်း ပဵၼ်တီႈဢၼ်ၶႃႈၸဝ်ႈယွင်ႈယေႃးတီႈၶႃႈ ဢေႃႈ။
၁၅ တူၺ်းတီႈၶႃႈလူ။ၶဝ်ၸၢင်ႊဢွၼ်ၵၼ်လၢတ်ႈတီႈၶႃႈၸဝ်ႈလႄႈဝႃႈ၊-ၼုၵ်ႈၵပၢတ်ႈထႃႇဝရႃႉၽြႃးမီးၵႃႈ လႂ်။ ႁႂ်ႈမၼ်းႁွတ်ႈမႃးမိူဝ်ႈလဵဝ်ၼႆႉသေၵမ်းဝႃႈ ၼင်ႇၼႆတီႈၶႃႈဢေႃႈ။
၁၆ ၶႃႈၸဝ်ႈၼႆႉဢမ်ႇဝႄႈပိူင်ႈသေဢရႃႇဢၼ်လဵင်ႉထိင်းသူဝ်းဢၼ်ၸွမ်းလင်ၸဝ်ႈၼၼ်ႉတီႈၶႃႈ။ၶႃႈၸဝ်ႈဢမ်ႇတုၵ်းဢၢင်ႈမုင်ႈမွင်းဝၼ်းဢႃႉမင်ႇၵလႃႇတီႈၶႃႈ။ၸဝ်ႈႁဝ်းႁူႉယူႇတီႈၶႃႈဢေႃႈ။လွင်ႈတၢင်းဢၼ် ဢွၵ်ႇသူပ်းၶႃႈၸဝ်ႈၼၼ်ႉ မီးယူႇ သိုဝ်ႈၼႃႈတႂ်ႈတႃၸဝ်ႈႁဝ်းတီႈၶႃႈဢေႃႈ။
၁၇ ၶႅၼ်းတေႃႈယႃႇပပေဵၼ် တီႈဢၼ်ၶႃႈၸဝ်ႈ တူၵ်းၸႂ်ၵူဝ်ႁႄသေၵမ်းတီႈၶႃႈ။ၸဝ်ႈႁဝ်းပဵၼ်တီႈဢၼ်ၶႃႈၸဝ်ႈသွၼ်ႈပိုင်ႈ ၼႂ်းမိူဝ်ႉဝၼ်းဢၼ်ၽေးႁွတ်ႈထိုင်ၼၼ်ႉတီႈၶႃႈ ဢေႃႈ။
၁၈ ႁႂ်ႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈၼၼ်ႉဢွၼ်ၵၼ်ဢူၵ်းဢၢႆသေၵမ်းတီႈၶႃႈ။ ၶႃႈၸဝ်ႈၸမ်း ယႃႇပေႁႂ်ႈသရေႇလႆႈလူႉသေၵမ်းတီႈၶႃႈ။ႁႂ်ႈၶဝ်ၼၼ်ႉ ဢွၼ်ၵၼ်ၸႂ်လူႉသေၵမ်းလူၺ်ႈတီႈၶႃႈ။ၶႃႈၸဝ်ႈႁဝ်းၸမ်း ယႃႇပေႁႂ်ႈၸႂ်လႆႈလူႉသေၵမ်းတီႈၶႃႈ။ႁႂ်ႈမိူဝ်ႉဝၼ်းၽေးဢၼ်ႇတရေႇၼၼ်ႉႁွတ်ႈထိုင်ၵႃႈၼိူဝ်ၶဝ်လႄႈ ပႃးတင်းတၢင်းဢၼ်ယႃႉပႅတ်ႈသွင်ပုၼ်ႈၼၼ်ႉသေလႄႈယႃႉၶဝ်ပႅတ်ႈသေၵမ်းတီႈၶႃႈ။
ပႂ်ႉဝၼ်းၵမ်သိၼ်ဢၼ်မူတ်းၸၢင်ႇ
၁၉ ထႃႇဝရႃႉၽြႃးမီးဢမိင်ႉတီႈၵဝ်ၸမ်း၊-မႂ်းၵႂႃႇလႄႈၸုၵ်းယူႇၵႃႈၼႂ်းၽၵ်းတူဝဵင်း မဵဝ်းၸိူဝ်ႉၶိူဝ်းၵူၼ်းတင်းလၢႆဢၼ်ၶုၼ်ႁေႃၶမ်းယုတ ၶဝ်ႈၶဝ်ႈဢွၵ်ႇဢွၵ်ႇဢိၵ်ႇတင်းၽၵ်းတူဝဵင်းယေႇရုသလႅမ်ႇ တင်းသဵင်ႈတင်းလူင်ၸိူဝ်း ၼၼ်ႉသေလႄႈလၢတ်ႈတီႈၶဝ်လႄႈဝႃႈ၊-
၂၀ ၶုၼ်ႁေႃၶမ်းယုတဢိၵ်ႇတင်းၵႃႈပဵၼ်ၵူၼ်းမိူင်းယုတ တင်းၵႃႈပဵၼ်ၵူၼ်းဝဵင်း ယေႇရုသလႅမ်ႇ ဢၼ်ၶဝ်ႈၶဝ်ႈဢွၵ်ႇဢွၵ်ႇၵႃႈတီႈႁူးၽၵ်းတူၸိူဝ်းၼႆႉၶဝ်ဢိူၺ်း။ဢွၼ်ၵၼ်ထွမ်ႇ ငိၼ်းၼုၵ်ႈၵပၢတ်ႈထႃႇဝရႃႉၽြႃးတႃႉ။
၂၁ ထႃႇဝရႃႉၽြႃးမီးဢမိင်ႉၸမ်း၊-တူဝ်သူဢွၼ်ၵၼ်ႁဵတ်းသတီႉႁႂ်ႈတူဝ်သူဢမ်ႇလႆႈႁၢပ်ႇၶူဝ်းႁၢပ်ႇလဵင်း ၼႂ်းဝၼ်းၵမ်သိၼ်လႄႈဢဝ်သႂၢင်းဢဝ်ၶဝ်ႈ ၵႃႈၼႂ်းႁူးၽၵ်းတူဝဵင်းယေႇရုသ လႅမ်ႇတင်းလၢႆၼၼ်ႉတႃႉ။
၂၂ ဝၼ်းၵမ်သိၼ်ယႃႇပေဢွၼ်ၵၼ်ဢဝ်ၶူဝ်းႁၢပ်ႇၶူဝ်းပႃးဢွၵ်ႇသေ ၵႃႈၼႂ်းႁိူၼ်းသူယေးသူ။ယႃႇပေဢွၼ်ၵၼ်ႁဵတ်းတၢင်းႁဵတ်းလႃးလႃး။ဢွၼ်ၵၼ်ႁႂ်ႈဝၼ်းၵမ်သိၼ်မူတ်းၸၢင်ႇၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉ တီႈပူႇသူမွၼ်ႇသူၼၼ်ႉ တႃႉ။
၂၃ ၶဝ်ၼၼ်ႉယင်းဢမ်ႇထွမ်ႇဢမ်ႇဢဝ်ယင်းဢမ်ႇႁႄႈႁူဝၢႆႇႁူၸူးလႄႈဢွၼ်ၵၼ်ယူႇဢေႃႈ။ ၶဝ်ဢွၼ်ၵၼ်ႁႂ်ႈၶေႃးၶဝ်ၵႅၼ်ႇၶႅင် ဢမ်ႇၶၢမ်ႇဢဝ်တၢင်းဢၼ် သင်ႇသွၼ်သုင်းမႃႉၼၼ်ႉဢေႃႈ။
၂၄ ထႃႇဝရႃႉၽြႃးမီးဢမိင်ႉၸမ်း၊- ပေႃးသူထွမ်ႇဢဝ်ၵႂၢမ်းၵဝ်ၸေးၸေးၸွတ်ႇၸွတ်ႇ ဢမ်ႇဢဝ်ၶူဝ်းႁၢပ်ႇၶူဝ်းပႃးသႂၢင်းၶဝ်ႈၵႃႈၼႂ်းႁူးၽၵ်းတူဝဵင်းၼႆႉ ၼႂ်းဝၼ်းၵမ်သိၼ်လႄႈ ယင်းဢမ်ႇႁဵတ်းတၢင်းႁဵတ်းလႃးလႃးလႄႈ ႁႂ်ႈဝၼ်းၵမ်သိၼ် မူတ်းၸၢင်ႇၸိုင်၊
၂၅ ၸႃႉၸဵမ်ၶုၼ်ႁေႃၶမ်း ဢိၵ်ႇတင်းၶုၼ်ဢၼ်ၶီႇလေႃႉရထႃး၊ ဢၼ်ၶီႇမႃႉ၊ဢၼ်ၼင်ႈၵႃႈၼိူဝ်ရႃႇၸႃႉပလၢင်ႇၶုၼ်လူင်တႃႇဝိတ်ႉ ၸိူဝ်းၼၼ်ႉလႄႈမူးမၢတ်ႈၽွင်းမိူင်း၊ၵူၼ်းမိူင်းယုတ၊ၵူၼ်းဝဵင်း ယေႇရုသလႅမ်ႇ တင်းလၢႆတၵ်းလႆႈဢွၼ်ၵၼ်မီးတၢင်းဢၼ်ၶဝ်ႈၵႃႈၼႂ်းႁူးၽၵ်းတူဝဵင်းၸိူဝ်းၼႆႉယူႇဢေႃႈ။
၂၆ ဝဵင်းၼႆႉတၵ်းတႄႇယူႇတႃႇသေဢမ်ႇထၢတ်ႇဢေႃႈ။ ၶဝ်တၵ်းပႃးဢဝ်ယိၸ်ႉဢၼ်တုတ်ႇၽႆး၊ ယိၸ်ႉတၢင်ႇၸိူဝ်ႉတၢင်ႇပိူင် လႂ်၊ၶိူင်ႈပုၵ်ႉၸေႃႇၽေႃးၸဵၼ်ႇ လႂ်၊ ၼၢမ်ႇသႃႇဢၼ်တၵ်းတုတ်ႇၽႆး လႂ်၊ ယိၸ်ႉဢၼ်ယွင်ႈယေႃး လႂ်မႃးၵႃႈတီႈၼႂ်းႁိူၼ်းထႃႇဝရႃႉၽြႃးလႄႈ တၵ်းဢွၼ်ၵၼ်လုၵ်ႉသေၵႃႈတီႈဝဵင်းယုတ လႂ် တီႈဢၼ်လဵပ်ႈႁွပ်ႈဝဵင်းယေႇရုသလႅမ်ႇ လႂ်၊မိူင်းပိၼ်ႇယႃႇမိၼ်ႇ လႂ်၊ ၵႃႈတီႈဢၼ်ပၢင်ႇဢၼ်ပဵင်း လႂ်၊ သၼ်လွႆ လႂ်၊ပွတ်းတၢင်း ၸၢၼ်း လႂ်ၸိူဝ်းၼၼ်ႉမႃးဢေႃႈ။
၂၇ ဢမ်ႇၼၼ်ပေႃးသူဢမ်ႇထွမ်ႇဢမ်ႇဢဝ်ၵႂၢမ်းၵဝ်ထၼ်ႈပေႃး ႁႂ်ႈဝၼ်းၵမ်သိၼ်မူတ်းၸၢင်ႇလႄႈ ဢမ်ႇႁၢပ်ႇဢဝ်တဵင်ႇဢဝ်ၶူဝ်းႁၢပ်ႇၶူဝ်းပႃးသေလႄႈ ၶဝ်ႈၵႃႈၼႂ်းႁူးၽၵ်းတူဝဵင်းယေႇရုသလႅမ်ႇတင်းလၢႆၼႂ်းဝၼ်းၵမ်သိၼ်လႄႈယူႇၸိုင်၊ၵဝ်တၵ်းဢဝ်ၽႆးတုတ်ႇၵႃႈၼႂ်းၽၵ်းတူဝဵင်းၸိူဝ်းၼၼ်ႉလႄႈ ၽႆးၼၼ်ႉ ယင်းဢမ်ႇမွတ်ႇဢမ်ႇယဵၼ်လႄႈ တၵ်းမႆႈႁေႃၶမ်းဝဵင်းယေႇရုသလႅမ်ႇ တင်းလၢႆဢေႃႈ။