၁၅
၁ လၢႆးသမ်ႉထႃႇဝရႃႉႉၽြႃးမီးဢမိင်ႉတီႈၵဝ်ၸမ်း၊-ပိၵ်ႉသမ်ႉမုဝ်းသေႇဢိၵ်ႇတင်းသမုၺ်ႇလ ၸုၵ်းၵူမ်ႈယူႇၵႃႈတီႈၽၢႆႇၼႃႈၵဝ်သေၵေႃႈ ႁူဝ်ၸႂ်ၵဝ်တၵ်းဢမ်ႇဝၢႆႇၸူးဝၢႆႇတေႃႇၵူၼ်းမဵဝ်းၼႆႉ။ႁေႃႈၶဝ်ဢွၵ်ႇသေၵႃႈတီႈၵဝ်လႄႈ ႁႂ်ႈၶဝ်ဢွၵ်ႇၵႂႃႇသေတႃႉ။
၂ ပေႃးၶဝ်တွင်ႉထၢမ်တီႈမႂ်းလႄႈဝႃႈ၊-ႁဝ်းၶႃႈတၵ်းလႆႈဢွၵ်ႇၵႂႃႇၸူးၵႃႈတီႈ လႂ်ၶႃႈ၊ဝႃႈၼင်ႇၼႆၸိုင် မႂ်းတၵ်းလႆႈသင်ႇလၢတ်ႈဝႆႉတီႈၶဝ်လႄႈဝႃႈ၊-ထႃႇဝရႃႉၽြႃးမီးဢမိင်ႉဝႆႉၸမ်း၊-ၶဝ်ၸိူဝ်းဢၼ်ထုၵ်ႇတၢႆၼၼ်ႉ ဢွၵ်ႇၵႂႃႇၸူးၵႃႈတီႈတၢင်းတၢႆ ၶဝ်ၸိူဝ်းဢၼ် ထုၵ်ႇၶၢမ်ႇတၢင်းဢၼ် ၶႃႈၽၼ်းပႅတ်ႈလူၺ်ႈလၢပ်ႇလူၺ်ႈလႅဝ်းၼၼ်ႉ ဢွၵ်ႇၵႂႃႇၸူးၵႃႈတီႈဢၼ်ၶၢမ်ႇတၢင်းဢၼ် ၶႃႈၽၼ်းပႅတ်ႈလူၺ်ႈလၢပ်ႇလူၺ်ႈလႅဝ်း၊ ၶဝ်ၸိူဝ်းဢၼ်ထုၵ်ႇဢိုပ်းယၢၵ်ႈၼၼ်ႉဢွၵ်ႇၵႂႃႇၸူးၵႃႈတီႈတၢင်းဢၼ်ဢိုပ်းယၢၵ်ႈ၊ ၶဝ်ၸိူဝ်းဢၼ်ထုၵ်ႇၶၢမ်ႇတၢင်းဢၼ် သိမ်းဢဝ်ၶျုၵ်ႈဝႆႉၼၼ်ႉဢွၵ်ႇၵႂႃႇၸူးၵႃႈတီႈတၢင်းဢၼ်ၶၢမ်ႇတၢင်းဢၼ် သိမ်းဢဝ်ၶျုၵ်ႈဝႆႉတႃႉ၊ဝႃႈၼင်ႇၼႆဢေႃႈ။
၃ ၵဝ်တၵ်းၶၢၼ်းဝႆႉရၢၼ်ႇသူႇသီႇမဵဝ်းဢၼ်ဝႃႈ လၢပ်ႇလႅဝ်းဢၼ်လႆႈဢဝ်ၶဝ်တၢႆ၊ မႃဢၼ်လႆႈၶူပ်းၸၼ်သိၵ်ႇၶၢတ်ႇ၊ၼူၵ်ႉၵၢင်ႁၢဝ်ဢိၵ်ႇတင်း တူဝ်ႁၢႆႉဢၼ်လႆႈၶူပ်းၵိၼ်လႄႈ ယႃႉပႅတ်ႈၸိူဝ်းၼၼ်ႉဝႆႉၵႃႈၼိူဝ်ၶဝ်ဢေႃႈ။
၄ ၵဝ်တၵ်းႁႂ်ႈၶဝ်လႆႈၶၢမ်ႇတၢင်းဢၼ် ဢဝ်ထိမ်ႈၵႂႃႇထိမ်ႈၶိုၼ်းယူႇၵႃႈၼႂ်းၵူႈသိုင်ႇၵူႈမိူင်း ၵႃႈၼိူဝ်လိၼ်မိူင်း ၵွပ်ႈပိူဝ်ႈလွင်ႈတၢင်းဢၼ်ၶုၼ်မၼႃႇသေႇ လုၵ်ႈၸၢႆးႁေႇၸၵိၶုၼ်ႁေႃၶမ်းယုတ ၼၼ်ႉႁဵတ်းၵႃႈၼႂ်းဝဵင်းယေႇရုသလႅမ်ႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၅ ဝဵင်းယေႇရုသလႅမ်ဢိူၺ်း။ၽူႈ လႂ်တၵ်းဢိတ်းလူမႂ်း။ၽူႈ လႂ်တၵ်းၶၢင်းၶီၶၢင်းၽၢၼ်လူၺ်ႈလွင်ႈမႂ်း။ၽူႈ လႂ်တၵ်းဝေႉၸူးငႅၵ်းၸူးႁႂ်ႈလႆႈထၢမ်လႄႈဝႃႈ မႂ်းယူႇလီ ၵိၼ်ဝၢၼ်ယူႇႁိုဝ်၊ဝႃႈၼင်ႇၼႆၼၼ်ႉ။
၆ ထႃႇဝရႃႉၽြႃးမီးဢမိင်ႉၸမ်း၊-မႂ်းၸုၼ်ႉပႅတ်ႈၵဝ်လႄႈသုတ်ႉၶိုၼ်းၵႂႃႇယဝ်ႉ။ပိူဝ်ႈၼႆလႄႈၵဝ်ယဵတ်ႇမိုဝ်းၵဝ်တေႃႇမႂ်းလႄႈယႃႉမႂ်းပႅတ်ႈယဝ်ႉ။ၵဝ်မိူဝ်ႇၸၢၼ်ႈလွင်ႈဢၼ်ၶုၵ်းၸႂ်လႆႈမႆႈ ၸႂ်ၵွပ်ႈၼၼ်ႉယဝ်ႉ။
၇ ၵဝ်ဢဝ်လူင်ႈၽတ်းၶဝ်ႈၽတ်းၵႃႈၼႂ်းႁူးၽၵ်းတူဝဵင်းယဝ်ႉ။ ၵဝ်ႈႁႂ်ႈလုၵ်ႈလၢင်းၶဝ်သုမ်းၸွမ်းလႄႈ ယႃႉၵူၼ်းမဵဝ်းၵဝ်ပႅတ်ႈ ၵွပ်ႈပိူဝ်ႈၶဝ်ဢမ်ႇဝၢႆႇၶိုၼ်းသေ ၵႃႈတီႈသဵၼ်ႈတၢင်းဢၼ်ၶဝ်ၸွမ်းၵႂႃႇ ၼၼ်ႉသေလႄႈၶိုၼ်းမႃးၼၼ်ႉယဝ်ႉ။
၈ မေႈမုၵ်ႉမေႈမၢႆႈၼၼ်ႉပဵၼ်ဢၼ်ၼမ်ၼႃႇ ၵႃႈတီႈၽၢႆႇၼႃႈၵဝ်လိူဝ်တွၼ်းၼႃႇသမေဵတ်ႉႁိၼ်မဵတ်ႉသၢႆး ၼမ်ႉသမ်ႇမုၵ်ႉတြႃႇၼၼ်ႉယဝ်ႉ။ၵဝ်ႁွင်ႉဢဝ်ၵေႃႉဢၼ်ႁိမ်ဢဝ်ႁူင်ႇဢဝ်ၶိင်ႇၵၢင်ဝၼ်းတဵင်ႈၼၼ်ႉ မႃးတိုၵ်းတေႃးမေႈၵူၼ်းၼုမ်ႇၵူၼ်းၵမ်တင်းလႆလႄႈ ႁႂ်ႈပဵၼ်တၢင်းဢၼ်လီၵူဝ်လီႁႄ၊ တၢင်းဢၼ်ယၢပ်ႇၸႂ်ၶၢၼ်ၸႂ်ၶီႉၶႃႉတူၵ်းႁွတ်ႈၵႃႈၼိူဝ်မၼ်းၵမ်းလဵဝ်ယဝ်ႉ။
၉ မေႈယိင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းၸဵတ်းၵေႃႉၼၼ်ႉ ႁႅင်းဢူၼ်ႈႁႅင်းယွမ်းၵႂႃႇလႄႈၶျုၵ်ႈၸႂ်မၼ်းယဝ်ႉ။ ၵၢင်ဝၼ်းမၼ်းၼၼ်ႉတူၵ်းၸႅမ်မိူဝ်ႈ ၸူဝ်ႈဢၼ်ဢမ်ႇပႆႇႁွတ်ႈထိုင် ၶိင်ႇၵၢင်ၶမ်ႈယဝ်ႉ။မၼ်းၼၼ်ႉလႆႈဢူၵ်းလႆႈဢၢႆလႄႈၵႂင်ၸႂ်ယုင်ႈၸႂ်ယူႇဢေႃႈ။ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၵေႃႈ ၵဝ်တၵ်းဢဝ်ဢၢပ်ႈပၼ်တီႈလၢပ်ႇတီႈလႅဝ်းၵႃႈတီႈၽၢႆႇၼႃႈရၢၼ်ႇသူႇၶဝ်ဢေႃႈ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၀ မေႈဢိူၺ်း။ၵဝ်ၼႆႉမီးဢႃႉမင်ႇၵလႃႇဢေႃႈ။မေႈႁဝ်းၵိူတ်ႇလဵင်ႉၵဝ်မႃး ဢၼ်ပဵၼ်ၵေႃႉဢၼ်တွပ်ႇထဵင်ၵေႃႉဢၼ် ၽိတ်းပိူၼ်ႈတင်းမိူင်းၼႆႉယဝ်ႉ။ၵဝ်ဢမ်ႇၵူႈဢဝ်ယိမ်ဢဝ်တီႈပိူၼ်ႈ။ ပိူၼ်ႈၵေႃႈဢမ်ႇၵူႈဢဝ်ယိမ်ဢဝ်တီႈၵဝ်။ၵူၺ်းၵႃႈၵူၼ်းတင်းသဵင်ႈတင်းလူင်ဢွၼ်ၵၼ် ၵိၼ်ႇလႃႇၵိၼ်ႇဝႃႈၵဝ်ဢေႃႈ။
၁၁ ထႃႇဝရႃႉၽြႃးမီးဢမိင်ႉၸမ်း၊- ၵဝ်တၵ်းပၼ်ႁႂ်ႈမႂ်းၵတ်းယဵၼ်ၶျၢမ်းသႃႇဢမၢၼ်ႇၶၢၼ်ပဵၼ်ဢေႃႈ။ၵဝ်တၵ်းၸီႇယၢင်ႇႁႂ်ႈရၢၼ်ႇသူႇမႂ်းလႆႈတွင်းပၢၼ်ႇတီႈမႂ်း ၼႂ်းမိူဝ်ႈဢၼ်ၽေးႁွတ်ႈထိုင်ဢိၵ်ႇတင်းမိူဝ်ႈဢၼ်လႆႈၶၢမ်ႇ တၢင်းဢၼ်ၼိၵ်ႈၸၢၵ်ႈငႅၼ်းသေၼၼ်ႉဢမၢၼ်ႇၶၢၼ်ပဵၼ်ဢေႃႈ။
၁၂ ၸွင်ႇၵူၼ်းတၵ်းဢဝ်လဵၵ်းမိူင်းတၢင်းႁွင်ႇ ဢိၵ်ႇတင်းတွင်းလိူင်ၼၼ်ႉႁၵ်းလႆႈႁိုဝ်။
၁၃ ၵဝ်တၵ်းဢဝ်ဢုၵ်ႉၸႃႇ ၽၼ်ႇတႃႇမႂ်း ဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်ယင်းဢမ်ႇပၼ်ၵႃႈပၼ်ႁူဝ်မၼ်းလႄႈ ႁိမ်ဢဝ်လႆႈၼၼ်ႉၵွပ်ႈပိူဝ်ႈဢပျႅတ်ႈမႂ်း ၵႃႈဢၼ်မႂ်းႁဵတ်း ၵႃႈၼႂ်းမိူင်းမႂ်းၵူႈ တီႈၵူႈလႅၼ်ၼၼ်ႉဢေႃႈ။
၁၄ ၵဝ်တၵ်းႁႂ်ႈမႂ်းၸွမ်းလူၺ်ႈၵၼ်တင်းရၢၼ်ႇသူႇမႂ်း ၵႂႃႇၵႃႈၼႂ်းမိူင်းဢၼ်မႂ်းဢမ်ႇႁူႉၼၼ်ႉဢေႃႈ။ ၽႆးတၵ်းၸပ်းၵွပ်ႈပိူဝ်ႈတၢင်းၸႂ်မႆႈၶႆႈၸႃႉၶဝ်ၼၼ်ႉလႄႈၽႆးၼၼ်ႉတၵ်းႁုပ်ႉမႆႈသူဢေႃႈ။
၁၅ ထႃႇဝရႃႉၽြႃးတီႈၶႃႈ။ၸဝ်ႈႁဝ်းႁူႉတီႈၶႃႈဢေႃႈ။ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈယူႇ သေလႄႈမႃးလူမႃးတူၺ်းၶႃႈၸဝ်ႈလႄႈပၼ်တၢမ်ႇတီႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈၼၼ်ႉ ၸွမ်းၼင်ႇတြႃးသေၵမ်းတီႈၶႃႈ။ယႃႇပယေိူၼ်ႉၶၢမ်ႇယူႇသေလႄႈတီႇၽဵဝ်ႈၶႃႈၸဝ်ႈပႅတ်ႈသေၵမ်းတီႈၶႃႈ။ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၶႃႈၸဝ်ႈလႆႈၶၢမ်ႇတၢင်းဢၼ်သေႉသွမ်းၵွပ်ႈပိူဝ်ႈၸဝ်ႈႁဝ်းၼၼ်ႉ သေ ၵမ်းတီႈၶႃႈ။
၁၆ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးတီႈၶႃႈ။ၶႃႈၸဝ်ႈထူပ်းႁၼ်ၼုၵ်ႈၵပၢတ်ႈၸဝ်ႈႁဝ်းလႄႈဢဝ်ၵိၼ်တီႈၶႃႈယဝ်ႉ။ၼုၵ်ႈၵပၢတ်ႈၸဝ်ႈႁဝ်းၼၼ်ႉပဵၼ်လွင်ႈဢၼ်ၶႃႈၸဝ်ႈ လီၸူမ်းသိူဝ်းသႂၢင်ႇၸႂ်တီႈၶႃႈဢေႃႈ။ ၶႃႈၸဝ်ႈလႆႈၶၢမ်ႇတၢင်းဢၼ်ႁွင်ႉႁိၵ်ႈလူၺ်ႈၼႃႇမႃႉၸိုဝ်သဵင်ၸဝ်ႈႁဝ်းတီႈၶႃႈဢေႃႈ။
၁၇ ၶႃႈၸဝ်ႈ ဢမ်ႇၼင်ႈၵႃႈတီႈၼႂ်းဢၼ်ၸူႉဢၼ်တုမ်ၶဝ်ၸိူဝ်းဢၼ် ဢမ်ႇၼပ်ႉဢမ်ႇၶၢၼ်းၼၼ်ႉလႄႈ ႁဵတ်းတၢင်းဢၼ်မူၼ်ႈပျေႃႇတီႈၶႃႈ။ၶႃႈၸဝ်ႈၼင်ႈယူႇၵေႃႉလဵဝ်ၵူၺ်းၶႃႈၸဝ်ႈ ၵွပ်ႈပိူဝ်ႈဢၼ်ၸဝ်ႈႁဝ်းဢဝ်မိုဝ်းတၢင်ႇသႂ်ႇၼၼ်ႉတီႈၶႃႈယဝ်ႉ။ၸဝ်ႈႁဝ်းႁႂ်ႈၶႃႈၸဝ်ႈတဵမ် ဝႆႉတင်းတေႃးသႃႉၸႂ်မႆႈတီႈၶႃႈယဝ်ႉ။
၁၈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဝူၺ်ႇတၼႃႇၶႃႈၸဝ်ႈ မၼ်ႈၶိူင်ႇယူႇလႄႈတၢင်းၸဵပ်းၶႃႈၸဝ်ႈဢၼ်ၸၢင်ႊတွပ်ႇၸၢင်ႈထဵင်တၢင်းဢၼ်ၸိုၼ်ႈမႃးၶႅၼ်းမႃးၼၼ်ႉ ယင်းဢမ်ႇလႆႈႁၢႆၵႂႃႇလႆႈၼၼ်ႉၼင်ႇႁိုဝ်တီႈၶႃႈ။ၸွင်ႇၸဝ်ႈႁဝ်းပဵၼ်ၸိူဝ်ႉၼင်ႇၼမ်ႉႁွင်ႊ ဢၼ်ၸၢင်ႊပႅတ်ႉလႅၼ်ဢိၵ်ႇတင်းၸိူဝ်ႉၼင်ႇၼမ်ႉဢၼ်ႁၢႆၵႂႃႇၼၼ်ႉ တီႈၶႃႈၸဝ်ႈဢမၢၼ်ႇ ၶၢၼ်ပဵၼ်တီႈၶႃႈႁိုဝ်။
၁၉ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊-ပေႃးမႂ်းၶိုၼ်းမႃးၸိုင်ၵဝ်တၵ်းဢဝ်မႂ်းၶိုၼ်းမႃး ႁႂ်ႈမႂ်းလႆႈၸုၵ်းၵူမ်ႈယူႇၵႃႈတီႈၽၢႆႇၼႃႈၵဝ်ဢေႃႈ။ပေႃးမႂ်းၽႄဢဝ်လွင်ႈတၢင်းဢၼ်မျၢတ်ႈ ဢွၵ်ႇသေၵႃႈၼႂ်း လွင်ႈတၢင်းဢၼ်ယုတ်ႈတင်းလၢႆၸိုင်မႂ်းတၵ်းလႆႈပဵၼ်မိူၼ်ၸိူဝ်ႉၼင်ႇသူပ်းၵဝ်ဢေႃႈ။ၶဝ်ၼၼ်ႉတၵ်းဢွၼ်ၵၼ်ၶိုၼ်းမႃးၸူးတီႈမႂ်းလႄႈ မႂ်းဢမ်ႇလႆႈၶိုၼ်း ၵႂႃႇၸူးတီႈၶဝ်။
၂၀ ၵဝ်တၵ်းႁႂ်ႈမႂ်းပဵၼ်လမ်းဝဵင်းတွင်းလိူင်ဢၼ်မၼ်ႈၶိူင်ႇယူႇ ၽၢႆႇၼိုင်ႈတင်းၵူၼ်းမဵဝ်းၼႆႉဢေႃႈ။ၶဝ်တၵ်းဢွၼ်ၵၼ်တိုၵ်းတေႃးမၼ်းလႄႈ တၵ်းဢမ်ႇလႆႈပေႉလႆႈၼႅင်ႇမႂ်း။ၵဝ်မီးယူႇၽၢႆႇမႂ်းႁႂ်ႈလႆႈၼုၵ်ႈဢဝ်ၶျွတ်ႈဢဝ်မႂ်းဢေႃႈ။
၂၁ ၵဝ်တၵ်းၼုၵ်ႈဢဝ်မႂ်းလွတ်ႈသေၵႃႈၼႂ်းမိုဝ်း ၶဝ်ၸိူဝ်းဢၼ်ႁၢႆႉဢၼ်မိူၵ်ႈ ၼၼ်ႉလႄႈထုတ်ႇဢဝ်မႂ်းဢွၵ်ႇသေ ၵႃႈၼႂ်းမိုဝ်းၶဝ်ၸိူဝ်းဢၼ်လီၵူဝ်လီႁႄၼၼ်ႉဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။