၅
ဢမ်ႇမီးၵေႃႉသိုဝ်ႈတေႃႇသေၵေႃႉ
၁ ဢွၼ်ၵၼ်ၶုၼ်ႇလႅၼ်ႈၵႂႃႇလႅၼ်ႈမႃး ၵႃႈၼႂ်းသဵၼ်ႈတၢင်းဝဵင်းယေႇရုသလႅမ်ႇတင်းလၢႆလႄႈ လူတူၺ်းႁူႉၸႅင်ႈႁႃဢဝ် ၵႃႈတီႈဢၼ်ၵႂၢင်ႈလီလႃးလီမၼ်းၸိူဝ်းၼၼ်ႉႁႂ်ႈလႆႈထူပ်းႁၼ် လွင်ႈဢၼ်မီးၵူၼ်းဝဵင်းဢၼ်ၵမ်ၵျၢင်ႉၸွမ်းၼင်ႇတြႃး၊ ၵူၼ်းဝဵင်းဢၼ်ပႂ်ႉသႅတ်ႉၸႃႇသေၵေႃႉသေၵူၼ်းႁိုဝ်ၼၼ်ႉတႃႉ။ပေႃးမီးၸိုင်ၵဝ်တၵ်းပွႆႇ လွတ်ႈဢပျႅတ်ႈဝဵင်းၼၼ်ႉဢေႃႈ။
၂ ပိၵ်ႉသမ်ႉၶဝ်လၢတ်ႈလႄႈဝႃႈ၊- ၵႃႈၼင်ႇဢၼ်ထႃႇဝရႃႉၽြႃးဢၼ်ဢသၢၵ်ႈလိပ်းယူႇၼၼ်ႉဝႃႈၼင်ႇၼႆသေၵေႃႈ ၶဝ်ဢွၼ်ၵၼ်ၵိၼ်ႇဝႃႈ ဢမ်ႇၸိုဝ်ႈဢမ်ႇၸႂ်ႈ ဢမၢၼ်ႇၶၢၼ်ပဵၼ်ဢေႃႈ။
၃ ထႃႇဝရႃႉၽြႃးတီႈၶႃႈ။မၢၵ်ႇတႃၸဝ်ႈႁဝ်းထွၵ်ႈလူၺ်ႈသႅတ်ႉၸႃႇတြႃးယူႇဢမ်ႇၸႂ်ႈတီႈၶႃႈႁိုဝ်။ပိၵ်ႉသမ်ႉၸဝ်ႈႁဝ်း ပၼ်တၢမ်ႇတီႈၶဝ်သေၵေႃႈၶဝ်ဢမ်ႇမီးၸႂ်ဢၼ်ႁဵဝ်ႇၸွပ်ႈတီႈၶႃႈ။ပိၵ်ႉသမ်ႉၸဝ်ႈႁဝ်းယႃႉၶဝ်ပႅတ်ႈသေၵေႃႈ ၶဝ်ဢွၼ်ၵၼ်ထဵင်ပႅတ်ႈတၢင်းဢၼ်သင်ႇသွၼ်သုင်းမႃႉတီႈၶႃႈယဝ်ႉ။ ၶဝ်ဢွၼ်ၵၼ်ႁႂ်ႈၼႃႈၶဝ်ၵႅၼ်ႇၶႅင်သမေၢၵ်ႇႁိၼ်တီႈၶႃႈယဝ်ႉ။ၶဝ်ဢမ်ႇၶုၵ်းၸႂ်လႆႈမႆႈၸႂ်။
၄ ပိူဝ်ႈၼႆလႄႈၵဝ်လၢတ်ႈလႄႈဝႃႈ၊- ၶဝ်ၼႆႉပဵၼ်ၵူၼ်းယၢၵ်ႈၵူၼ်းၽၢၼ်ဢမၢၼ်ႇၶၢၼ်ပဵၼ်လႄႈ ပဵၼ်ဢၼ်မိူၵ်ႈၵွပ်ႈပိူဝ်ႈဢၼ်ၶဝ်ဢမ်ႇႁူႉ သဵၼ်ႈတၢင်းထႃႇဝရႃႉၽြႃးဢိၵ်ႇတင်း တၢင်းဢၼ်ၽြႃးပဵၼ်ၸဝ်ႈၶဝ်ၸီႇ ယၢင်ႇဝႆႉၼၼ်ႉဢေႃႈ။
၅ ၵဝ်တၵ်းၵႂႃႇၸူးၵႃႈတီႈၵူၼ်းယႂ်ႇၵူၼ်းလူင်တင်းလၢႆလႄႈ လၢတ်ႈတီႈၶဝ်ၵွပ်ႈပိူဝ်ႈဢၼ်ၶဝ်ႁူႉသဵၼ်ႈတၢင်းထႃႇဝရႃႉၽြႃးဢိၵ်ႇတင်းတၢင်းဢၼ်ၽြႃးပဵၼ်ၸဝ်ႈၶဝ်ၸီႇယၢင်ႇဝႆႉၼၼ်ႉဢေႃႈ၊ ဝႃႈၼင်ႇၼႆဢေႃႈ။ၵူၺ်းၵႃႈၶဝ်ၼၼ်ႉၽွမ်ႉၵၼ်ႁၵ်းၵၢၼ်းမၼ်းၸဝ်ႈပႅတ်ႈလႄႈ တႅပ်းတၢင်းဢၼ်မၼ်းၸဝ်ႈမတ်ႉၽုၵ်ႈဝႆႉၸိူဝ်းၼၼ်ႉၶၢတ်ႇပႅတ်ႈယဝ်ႉ။ပိူဝ်ႈၼႆလႄႈသၢင်ႇသီႈဢၼ်လုၵ်ႉသေၵႃႈၼႂ်းထိူၼ်မႃးၼၼ်ႉ တၵ်း ဢဝ်ၶဝ်တၢႆဢေႃႈ။
၆ မႃထိူၼ်ႇဢၼ်ၸၢင်ႊလႄႇၵႂႃႇလႄႇမႃးၶိင်ႇႁူဝ်ၶမ်ႈၼၼ်ႉ တၵ်းၶူပ်းၵိၼ်ၶဝ်ဢေႃႈ။သိူဝ်ၸုမ်ႈ တၵ်းပႂ်ႉဝဵင်းၶဝ်တင်းလၢႆယူႇလႄႈ ၶဝ်ၵႃႈဢၼ်ဢွၵ်ႇၵႃႈၼႂ်းဝဵင်းၵႂႃႇၵႃႈၼွၵ်ႈၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ၶူပ်းၶၢတ်ႇ ပဵၼ်ပွတ်းပဵၼ်တွၼ်ႈၵႂႃႇဢေႃႈ။လွင်ႈမၼ်းၸမ်းဢပျႅတ်ႈဢၼ်ၶဝ်ၽိတ်းပိူင်ႈၸိူဝ်းၼၼ်ႉၼမ်ၼႃႇ တၢင်းဢၼ်ၶဝ်ၽွၵ်ႈပျၢၼ်ႇၶိုၼ်းၸိူဝ်းၼၼ်ႉၼမ်ၼႃႇလႄႈ တၢင်းဢၼ်ၶဝ်ၽွၵ်ႈပျၢၼ်ႇၶိုၼ်းၸိူဝ်းၼၼ်ႉ ယႂ်ႇၽႄႈတူဝ်းတွၼ်းမႃးယဝ်ႉ။
၇ ၵဝ်တၵ်းပွႆႇမႂ်းလွတ်ႈလႆႈၸိူဝ်ႉၼင်ႇႁိုဝ်။လုၵ်ႈမႂ်းလၢင်းမႂ်းဢွၼ်ၵၼ်ၸုၼ်ႉပႅတ်ႈၵဝ်လႄႈဢဝ်ၶဝ်ၸိူဝ်းဢၼ်ဢမ်ႇၸႂ်ႈတြႃးၼၼ်ႉတိူင်ႇဝႃႈၵိၼ်ႇဝႃႈယဝ်ႉ။ပိၵ်ႉသမ်ႉၵဝ်လဵင်ႉၶဝ်ဢိမ်ႇဢိမ်ႇတဵမ်တဵမ်သေၵေႃႈ ၶဝ်ၽိတ်းပိူင်ႈလႄႈ ၸူႉၵၼ်တုမ်ၵၼ်ပဵၼ်မုၵ်ႉပဵၼ်ၸိူဝ်းယူႇၵႃႈၼႂ်း ႁိူၼ်းမေႈမွၵ်ႇယႃႈယဝ်ႉ။
၈ ၶဝ်ပဵၼ်ၸိူဝ်ႉၼင်ႇမႃႉဢၼ်ၵိၼ်ဢိမ်ႇၵိၼ်တဵမ် ၶိင်ႇၵၢင်ၼႂ်ၸဝ်ႉၸဝ်ႉၼၼ်ႉလႄႈ ဢွၼ်ၵၼ် ႁွင်ႉႁေႇၸွမ်းမေႈၵူၼ်းႁိူၼ်းၸမ်ၵၼ်ႁင်းၽႂ်ႁင်းမၼ်းယူႇၼၼ်ႉယဝ်ႉ။
၉ ၵဝ်ယင်းဢမ်ႇၸႅတ်ႈထၢမ်လွင်ႈတၢင်းၸိူဝ်းၼႆႉလႄႈတၵ်းယူႇႁိုဝ်။ၵဝ်ယင်းဢမ်ႇပၼ်တၢမ်ႇတီႈၵူၼ်းမဵဝ်းၸိူဝ်ႉၼင်ႇၼႆလႄႈတၵ်းယူႇႁိုဝ်။ၵဝ်ယင်းဢမ်ႇပၼ်တၢမ်ႇ တီႈၵူၼ်းမဵဝ်းၸိူဝ်ႉၼင်ႇႁႂ်ႈၸႂ်ၵဝ်ထၼ်ႈပေႃးပျေႇပေႃးဢိမ်ႇလႄႈတၵ်းယူႇႁိုဝ်၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၀ ဢွၼ်ၵၼ်ၶိုၼ်ႈၵႃႈၼိူဝ်လမ်းဝဵင်းလႄႈ ယႃႉပႅတ်ႈတႃႉ။ယႃႇပေဢွၼ်ၵၼ်ႁဵတ်း ႁႂ်ႈပဵၼ်တၢင်းဢၼ်လူႉလႅဝ်မူတ်းမူတ်းသဵင်ႈသဵင်ႈ။ဢွၼ်ၵၼ်ပႄႇၽဵဝ်ႈၵိင်ႇမၼ်းၶႃႈမၼ်းတင်းလၢႆပႅတ်ႈတႃႉ။ဢမ်ႇၸၢပ်ႈသႅင်ႇၵၼ်တင်း ထႃႇဝရႃႉၽြႃး။
၁၁ မဵဝ်းဢိသရေႇလဢိၵ်ႇတင်းမဵဝ်းယုတဢွၼ်ၵၼ်ယႃႉသႅတ်ႉၸႃႇဢၼ်ၶဝ်ယၢမ်ႈၶၢမ်ႇဢဝ်တီႈၵဝ်ၼၼ်ႉယဝ်ႉ၊ဝႃႈၼင်ႇၼႆထႃႇဝရႃႉၽြႃး မီးဢမိင်ႉ ဢေႃႈ။
၁၂ ၶဝ်ဢွၼ်ၵၼ်တွပ်ႇထဵင်ထႃႇဝရႃႉၽြႃးယူႇသေလႄႈၸင်ႇလၢတ်ႈလႄႈဝႃႈ၊- ဢမ်ႇၸႂ်ႈမၼ်းၸဝ်ႈ၊ၽေးဢူးပၢတ်ႈဢမ်ႇလႆႈႁွတ်ႈထိုင်ၵႃႈၼိူဝ်ႁဝ်း။ႁဝ်းဢမ်ႇလႆႈဢွၼ်ၵၼ် ႁူပ်ႉထူပ်းၽေးလၢပ်ႇၽေးလႅဝ်း ဢိၵ်ႇတင်းၽေးတၢင်းဢၼ်ဢိုပ်းဢၼ်ယၢၵ်ႈ။
၁၃ ပရေႃးၽိတ်ႈၸိူဝ်းၼၼ်ႉ ဢွၼ်ၵၼ်ပဵၼ်လူမ်းလွၼ်ႉလွၼ်ႉလႄႈၼုၵ်ႈၵပၢတ်ႈၸဝ်ႈဢမ်ႇမီးတီႈၶဝ်။တၵ်းလႆႈမီးတၢင်းဢၼ်ႁဵတ်း တီႈၶဝ်ၸွမ်းၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆဢေႃႈ။
၁၄ ပိူဝ်ႈၼႆလႄႈၽြႃးပဵၼ်ၸဝ်ႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-ၵွပ်ႈပိူဝ်ႈဢၼ်သူလၢတ်ႈၵႂၢမ်းၸိူဝ်ႉၼင်ႇၼၼ်လႄႈ ၵဝ်တၵ်းႁႂ်ႈၵႂၢမ်းၵဝ်ပဵၼ်ၸိူဝ်ႉၼင်ႇၽႆးၼၼ်ႉ ဢွၵ်ႇၵႃႈၼႂ်းသူပ်းမႂ်းလႄႈ ႁႂ်ႈၵူၼ်းမဵဝ်းၼႆႉပဵၼ်ၸိူဝ်ႉၼင်ႇၽိုၼ်းၼၼ်ႉလႄႈ ၽႆးၼၼ်ႉတၵ်းလႆႈမႆႈၶဝ်ဢေႃႈ။
၁၅ ထႃႇဝရႃႉၽြႃးမီးဢမိင်ႉၸမ်း၊- မဵဝ်းဢိသရေႇလဢိူၺ်း။ၵဝ်တၵ်းဢဝ်ၵူၼ်းမဵဝ်းၼိုင်ႈသေၵႃႈတီႈဢၼ်ၵႆမႃးပုၼ်ႈဢၼ်တၵ်းတိုၵ်းတေႃးမႂ်းဢေႃႈ။တၵ်းပဵၼ်မဵဝ်းဢၼ်မႂ်းဢမ်ႇႁူႉၵႂၢမ်းၶဝ်၊ ဢမ်ႇႁူႉလွင်ႈဢၼ်ၶဝ်လၢတ်ႈၶဝ်ႈဝႃႈၼၼ်ႉ ဢေႃႈ။
၁၆ မူၵ်ႇပိုၼ်ၶဝ်ၼၼ်ႉပဵၼ်ၶုမ်သၢင်းၶႅင်းဢၼ်ၽုၺ်ႇဝႆႉလႄႈ ၶဝ်ၵႃႈမီးၼၼ်ႉဢွၼ်ၵၼ်ပဵၼ်ၵေႃႉဢၼ်ႁႅင်းယႂ်ႇၼႃႇဢေႃႈ။
၁၇ ၶဝ်ၼၼ်ႉတၵ်းဢွၼ်ၵၼ်ၵိၼ်မၢၵ်ႇၵိၼ်ႁူင်းမႂ်းဢိၵ်ႇတင်း ၶဝ်ႈမုၼ်းမႂ်းဢၼ်လုၵ်ႈၸၢႆးလုၵ်ႈယိင်းတင်းလၢႆထုၵ်ႇလီလႆႈၵိၼ်ၼၼ်ႉဢေႃႈ။ၶဝ်တၵ်းဢွၼ်ၵၼ်ၵိၼ်ၽုင်သူဝ်းၽုင်းဝူဝ်းမႂ်းလႄႈ ၵိၼ်တူၼ်ႈၶိူဝ်းမၢၵ်ႇၸပႅတ်ႉမႂ်းဢိၵ်ႇတင်း တူၼ်ႈမၢၵ်ႇလိူဝ်ႇသၢင်း ၽေႃးမႂ်းၸိူဝ်းၼၼ်ႉဢေႃႈ။
၁၈ ၶဝ်တၵ်းဢွၼ်တိုၵ်းတေႃးယႃႉၽဵဝ်ႈပႅတ်ႈ ဢၼ်မၼ်ႈၶိူင်ႇဢၼ်မႂ်းသွၼ်ႈပိုင်ႈယူႇၸိူဝ်းၼၼ်ႉပႅတ်ႈဢေႃႈ။ၵူၺ်းၵႃႈၼႂ်းၶိင်ႇၵႃႇလႃႉမိူဝ်ႉဝၼ်းၼၼ်ႉ ၵဝ်တၵ်းဢမ်ႇႁဵတ်းႁႂ်ႈသူလႆႈလူႉလႅဝ်ပႅတ်ႈမူတ်းမူတ်းသဵင်ႈသဵင်ႈ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၉ မိူဝ်ႈဢၼ်ၶဝ်ထၢမ်လႄႈဝႃႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၸီႇယၢင်ႇႁဵတ်းလွင်ႈတၢင်းၸိူဝ်းၼႆႉတီႈႁဝ်း၊ ဝႃႈၼင်ႇၼႆၸိုင် မႂ်းတၵ်းလႆႈသင်ႇလၢတ်ႈတီႈၶဝ်လႄႈဝႃႈမိူၼ်ၸိူဝ်ႉၼင်ႇဢၼ်သူၸုၼ်ႉပႅတ်ႈၵဝ်လႄႈ ပွင်ႁဵတ်းဢမူႉတြႃးတၢင်ႇသိုင်ႇတၢင်ႇမိူင်းတင်းလၢႆ ၵႃႈၼႂ်းမိူင်းသူၼႆႉၼၼ်ႉသူတၵ်းလႆႈဢွၼ်ၵၼ် ပွင်ႁဵတ်းဢမူႉၵူၼ်းတၢင်ႇသိုင်ႇတၢင်ႇမိူင်းတင်းလၢႆ ၵႃႈၼႂ်းမိူင်းဢၼ်ဢမ်ႇၸႂ်ႈမိူင်း သူၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၀ သူတၵ်းလႆႈႁေႃးလၢတ်ႈတီႈမဵဝ်းယႃႇၵုပ်ႉလႄႈ ႁွင်ႉပၢဝ်ႇႁွင်ႉသေႃႇတီႈမိူင်းယုတၸမ်း၊-ၵူၼ်းမိူၵ်ႈဢၼ်ဢမ်ႇမီးၺၢၼ်ႇ၊
၂၁ မီးမၢၵ်ႇ တႃယူႇလႄႈ ဢမ်ႇႁၼ်၊ မီးႁူလႄႈ ဢမ်ႇငိၼ်းၶဝ် ဢိူၺ်း။ဢွၼ်ၵၼ်ထွမ်ႇငိၼ်းတႃႉ။
၂၂ ထႃႇဝရႃႉၽြႃးမီးဢမိင်ႉၸမ်း၊-သူဢမ်ႇဢွၼ်ၵၼ်ၵူဝ်ႁႄၵဝ်ႁိုဝ်။ သူဢမ်ႇဢွၼ်ၵၼ်သၼ်ႇဝႆ ၵႃႈတီႈၽၢႆႇၼႃႈၵဝ် ဢၼ်ဢဝ်သၢႆးႁဵတ်းဢၼ်ၶၼ်ႈဢၼ်ၶႅၼ်ႈဝႆႉ တီႈၼမ်ႉပၢင်ႇလၢႆႇၸွမ်းလူၺ်ႈဢမိင်ႉထႃႇဝရႃႉ ဢၼ်မၼ်းဢမ်ႇပူၼ်ႉၵႂႃႇလႆႈၼၼ်ႉႁိုဝ်။ပိၵ်ႉသမ်ႉလႅင်းၼမ်ႉပိူပ်ႇၼမ်ႉတင်းလၢႆဢွၼ်ၵၼ်လုၵ်ႉသေၵေႃႈဢမ်ႇပေႉဢမ်ႇၼႅင်ႇလႆႈ။
၂၃ ဢွၼ် ၵၼ်ႁွင်ႉၶၢင်းသေၵေႃႈဢမ်ႇပူၼ်ႉဢမ်ႇပႅၼ်လႆႈ။ၵူၼ်းမဵဝ်းၼႆႉ ၸၢင်ႊမီးသၽေႃးဢၼ်ၽိတ်းပိူင်ႈလုၵ်ႉၽိုၼ်ႉ လႄႈလုၵ်ႉၽိုၼ်ႉၵႂႃႇယဝ်ႉ။
၂၄ ၶဝ်ဢမ်ႇၸၢင်ႊလၢတ်ႈၵႃႈၼႂ်းႁူဝ်ၸႂ်ၶဝ်လႄႈဝႃႈ မိူဝ်ႈလဵဝ်ၼႆႉဢွၼ်ၵၼ်ၵူဝ်ႁႄထႃႇဝရႃႉၽြႃးၽြႃးပဵၼ်ၸဝ်ႈႁဝ်းဢၼ်ႁႂ်ႈၽူၼ်ႁူဝ်ပီႊဢိၵ်ႇတင်း ၽူၼ်ႁၢင်ပီႊတူၵ်းၼႂ်းမိူဝ်ႈဢၼ်ၶိင်ႇမၼ်းထုၵ်ႇၼၼ်ႉလႄႈ ဢဝ်ၶိင်ႇဢၼ်သိမ်းဢဝ်မၢၵ်ႇဢဝ်ႁူင်းဢၼ်မၼ်းၸဝ်ႈၶၢၼ်းဝႆႉၼၼ်ႉတႃႉႁဝ်း၊ ဝႃႈၼင်ႇ ၼႆၼၼ်ႉ။
၂၅ တုၸရိူၵ်ႈသူၼၼ်ႉဢဝ်လွင်ႈတၢင်းၸိူဝ်းၼၼ်ႉဝႄႈပိူင်ႈလႄႈ ဢပျႅတ်ႈသူၼၼ်ႉႁၢမ်ႈတပ်ႉႁႄႉၶႅၼ် မၢင်ႇၵလႃႇဝႆႉယဝ်ႉ။
၂၆ ၶဝ်ၸိူဝ်းဢၼ်ႁၢႆႉဢၼ်မိူၵ်ႈဢၼ်မူပ်ႇယူႇသေလႄႈ လွမ်းတူၺ်းယူႇမိူၼ်ၸိူဝ်ႉၼင်ႇမူးသိူဝ်းၼၼ်ႉမီးယူႇၵႃႈၼႂ်းၵူၼ်းၵဝ်ဢေႃႈ။ၶဝ်ၼၼ်ႉဢွၼ်ၵၼ် ဝႆႉႁဵဝ်ႉဝႆႉၶိူမ်းႁႂ်ႈလႆႈၵၢင်ဢဝ်ၵူၼ်းဢေႃႈ။
၂၇ ၸိူဝ်ႉၼင်ႇဢၼ်ႁိူၼ်းၶင်ၼူၵ်ႉတဵမ်ဝႆႉတင်းၼူၵ်ႉၼၼ်ႉႁိူၼ်းၶဝ်ၼၼ်ႉတဵမ်ဝႆႉတင်းပရီ့ယေႇတၢင်းဢၼ်ပႅတ်ႉလႅၼ်ဢေႃႈ။ၼင်ႇၼၼ်လႄႈ ၶဝ်ဢွၼ်ၵၼ်မီးႁႅင်းယႂ်ႇၽႄႈၼမ်ၶိုၼ်းမႃးလႄႈႁွတ်ႈထိုင်တၢင်းဢၼ်မၢၵ်ႈမီးဢေႃႈ။
၂၈ ၶဝ်ဢွၼ်ၵၼ်မီးတၢင်းဢၼ်ပီးလီမၼ်းလီယူႇ။တၢင်းဢၼ် ၼႃႈလိူမ်ႈလီၶျေႃးလီယူႇလႄႈၶဝ်ယိင်ႈၶႅၼ်းႁၢႆႉလိူဝ်တွၼ်းၼႃႇသေၵူၼ်းႁၢႆႉဢေႃႈ။ၶဝ်ဢမ်ႇဢွၼ်ၵၼ်ၸီႇယၢင်ႇၸွမ်းၼင်ႇတြႃး။ ၶဝ်ဢမ်ႇဢွၼ်ၵၼ်ပႂ်ႉဢမူႉလုၵ်ႈဢွၼ်ႇဢၼ်ဢမ်ႇမီႈပေႃႈမီးမေႈၼၼ်ႉလႄႈပၼ်ႁႂ်ႈပေႉႁႂ်ႈၼႅင်ႇ။ၶဝ်ဢမ်ႇၸီႇယၢင်ႇၸွမ်းၼင်ႇတြႃးၽၢႆႇၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉ။
၂၉ ၵဝ်ယင်းဢမ်ႇၸႅတ်ႈထၢမ်လွင်ႈတၢင်းၸိူဝ်းၼၼ်ႉလႄႈတၵ်းယူႇႁိုဝ်။ၵဝ်ယင်းဢမ်ႇပၼ်တၢမ်ႇတီႈၵူၼ်းမဵဝ်းၸိူဝ်ႉၼင်ႇၼၼ်ႁႂ်ႈၸႂ်ၵဝ်ထၼ်ႈပေႃးပျေႇပေႃးဢိမ်ႇလႄႈ တၵ်းယူႇႁိုဝ်ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။
၃၀ လွင်ႈတၢင်းဢၼ်လီဢၢမ်းလႄႈ လီႈႁင်ႈဢဵတ်ႇသဵတ်ႇၼၼ်ႉပဵၼ်မႃးၵႃႈၼႂ်းမိူင်းၸဝ်ႈယဝ်ႉ။ပရေႃးၽိတ်ႈတင်းလၢႆဢွၼ်ၵၼ်ႁေႃးလၢတ်ႈ ဢမ်ႇၸိုဝ်ႈဢမ်ႇၸႂ်ႈလႄႈယိတ်ႉပရေႃးႁိၵ်ႈတင်းလၢႆ ဢွၼ်ၵၼ်ႁပ်ႉတုင်းဢဝ်ၶဝ်လႄႈလႆႈဢုပ်ႉပိူင်ႇဢေႃႈ။
၃၁ ၵူၼ်းတင်းလၢႆဢွၼ်ၵၼ်ထုၵ်ႇၸႂ်ၵျိူၵ်ႈၸႂ် လွင်ႈတၢင်းၸိူဝ်ႉၼင်ႇၼၼ်ၼၼ်ႉလႄႈ ယၢမ်းမိူဝ်ႈဢၼ်လွင်ႈတၢင်းၼၼ်ႉသုတ်းၼၼ်ႉၸိုင်သူတၵ်းဢွၼ်ၵၼ်ႁဵတ်းၸိူဝ်ႉၼင်ႇႁိုဝ်။