၄၆
၁ ၸဝ်ႈထႃႇဝရႃႉၽြႃးမီးဢမိင်ႉၸမ်း၊- ၽၵ်းတူတမ်ႇတိူင်းဢၼ်ၵႃႈၼႂ်းဢၼ်ဝၢႆႇၼႃႈၵႂႃႇ ၽၢႆႇတၢင်းဝၼ်းဢွၵ်ႇၼၼ်ႉ တၵ်းလႆႈမီးတၢင်းဢၼ်ဢိုတ်းႁပ်းဝႆႉယူႇၼႂ်းဝၼ်းဢၼ် ႁဵတ်းတၢင်းႁဵတ်းႁူၵ်းဝၼ်းတဵမ်တဵမ်ၼၼ်ႉလႄႈၼႂ်းဝၼ်းၵမ်သိၼ် ဢိၵ်ႇတင်းဝၼ်းလိူၼ်မႂ်ႇ ၼၼ်ႉတၵ်းလႆႈၽုၺ်ႇဝႆႉဢေႃႈ။
၂ ၶုၼ်ၼၼ်ႉတၵ်းလႆႈၶဝ်ႈသဵၼ်ႈတၢင်း မုၵ်ႉၽၵ်းတူၽၢႆႇၼွၵ်ႈမၼ်းၼၼ်ႉလႄႈၸုၵ်းၵႃႈတီႈႁိမ်းသဝ်ၽၵ်းတူဢေႃႈ။ယိတ်ႉပရေႃးႁိၵ်ႈတင်းလၢႆ တၵ်းလႆႈမႄးႁဵတ်းမႄးႁႅၼ်း ယိၸ်ႉဢၼ်တုတ်ႇၽႆးမၼ်းဢိၵ်ႇတင်း ယိၸ်ႉမိၵ်ႉသႁႃႇယႃႉမၼ်းတင်းလၢႆလႄႈ မၼ်းတၵ်းလႆႈၵူမ်ႈႁူဝ်မၼ်းၵႃႈတီႈၶူင်ႇၽၵ်းတူသေလႄႈဢွၵ်ႇၵႂႃႇၵႃႈတီႈၼွၵ်ႈဢေႃႈ။ၵူၺ်းၵႃႈဢမ်ႇလႆႈဢိုတ်းလႆႈႁပ်းၽၵ်းတူၼၼ်ႉ ထိုင်ႁွတ်ႈ ၶိင်ႇႁူဝ်ၶမ်ႈၼၼ်ႉ။
၃ မိူၼ်ၸိူဝ်ႉၼင်ႇၼၼ်ၼႂ်းဝၼ်းၵမ်သိၼ်ဢိၵ်ႇတင်း ၼႂ်းဝၼ်းလိူၼ်မႂ်ႇၼၼ်ႉၵူၼ်းဝၢၼ်ႈၵူၼ်းမိူင်းတင်းလၢႆ တၵ်းလႆႈဢွၼ်ၵၼ်ၵူမ်ႈႁူဝ်ၵွမ်းႁူဝ်ၵႃႈတီႈႁိမ်းၽၵ်းတူၼၼ်ႉ ၵႃႈတီႈၽၢႆႇၼႃႈထႃႇဝရႃႉ ၽြႃးဢေႃႈ။
၄ ယိၸ်ႉဢၼ်တုတ်ႇၽႆးဢၼ်ၶုၼ်တၵ်းလႆႈဢဝ်ပုၵ်ႉၸေႃႇတီႈထႃႇဝရႃႉၽြႃး ၼႂ်းဝၼ်းၵမ်သိၼ်ၼၼ်ႉၸမ်း ပဵၼ်သူဝ်းဢွၼ်ႇဢၼ်ဢမ်ႇပႃးဢပျႅတ်ႈႁူၵ်းတူဝ်၊ သူဝ်းပေႃႈဢၼ်ဢမ်ႇပႃးဢပျႅတ်ႈတူဝ်ၼိုင်ႈဢေႃႈ။
၅ ၶိူင်ႈပုၵ်ႉၸေႃႇၽေႃးၸဵၼ်ႇဢၼ်ၸၢပ်ႈသႅင်ႇၵၼ်တင်းသူဝ်းပေႃႈတူဝ်ၼိုင်ႈၼၼ်ႉတၵ်းလႆႈပဵၼ်ၽွင်ၶဝ်ႈမုၼ်းဢေႇၽႃႇၼိုင်ႈလႄႈ ၶိူင်ႈပုၵ်ႉၸေႃႇၽေႃးၸဵၼ်ႇဢၼ်ၸၢပ်ႈသႅင်ႇၵၼ်တင်း သူဝ်းဢွၼ်ႇၸိူဝ်းၼၼ်ႉတၵ်းလႆႈပဵၼ် ၵႃႈၼင်ႇဢၼ်မၼ်းမီးဢလူဝ်ႇၶႆႈပၼ်ၼၼ်ႉဢေႃႈ။ ၼမ်ႉမၼ်းတၵ်းလႆႈပႃးယေႈႁီႉၼႃႉ ပုၼ်ႈယေႈဢေႇၽႃႇၼၼ်ႉဢေႃႈ။
၆ ၼႂ်းဝၼ်းလိူၼ်မႂ်ႇၼၼ်ႉမၼ်းတၵ်းလႆႈပုၵ်ႉၸေႃႇ ဝူဝ်းပေႃႈၼုမ်ႇဢၼ်ဢမ်ႇပႃးဢၢင်ႇၵႃႇလူႉတူဝ်ၼိုင်ႈ၊ သူဝ်းဢွၼ်ႇႁူၵ်းတူဝ်၊သူဝ်းပေႃႈတူဝ်ၼိုင်ႈ ဢၼ်ဢမ်ႇပႃးဢၢင်ႇၵႃႇလူႉၼၼ်ႉ ဢေႃႈ။
၇ မၼ်းတၵ်းလႆႈပွင်ႁႅၼ်းပွင်မႄးၶိူင်ႈပုၵ်ႉၸေႃႇၽေႃးၸဵၼ်ႇဢၼ်ဝႃႈ ၽွင်ၶဝ်ႈမုၼ်းဢေႇၽႃႇၼိုင်ႈပုၼ်ႈဝူဝ်းတူဝ်ၼိုင်ႈ၊ ဢေႇၽႃႇၼိုင်ႈပုၼ်ႈသူဝ်ႈပေႃႈတူဝ်ၼိုင်ႈၵႃႈဢၼ်မီးဢလူဝ်ႇၼၼ်ႉ ပုၼ်ႈသူဝ်းဢွၼ်ႇဢိၵ်ႇတင်းၼမ်ႉမၼ်း ယေႈႁီႉၼႃႉပုၼ်ႈယေႈဢေႇၽႃႇ ၼၼ်ႉဢေႃႈ။
၈ မိူဝ်ႈဢၼ်ၶုၼ်ၼၼ်ႉၶဝ်ႈၼၼ်ႉမၼ်းတၵ်းလႆႈၶဝ်ႈၸွမ်း သဵၼ်ႈတၢင်းမုၵ်ႉၽၵ်းတူ ၼၼ်ႉလႄႈ တၵ်းလႆႈဢွၵ်ႇၸွမ်းသဵၼ်ႈတၢင်းၼၼ်ႉဢေႃႈ။
၉ မိူဝ်ႈဢၼ်ၵူၼ်းဝၢၼ်ႈၵူၼ်းမိူင်းတင်းလၢႆ ၶဝ်ႈၸူးၵႃႈတီႈၽၢႆႇၼႃႈထႃႇဝရႃႉၽြႃး ၼႂ်းမိူဝ်ႈဝၼ်းပွႆးဢၼ်ၸီႇယၢင်ႇၶၢၼ်းဝႆႉၸိူဝ်းၼၼ်ႉၼၼ်ႉၸိုင် ၵေႃႉဢၼ်ၶဝ်ႈၽၵ်းတူၼႃႈတၢင်းၸၢၼ်းၼၼ်ႉ တၵ်းလႆႈဢွၵ်ႇၽၵ်းတူၼႃႈတၢၵ်းႁွင်ႇဢေႃႈ။ မၼ်းဢမ်ႇလႆႈၶိုၼ်းဢွၵ်ႇၽၵ်းတူဢၼ်မၼ်းၶဝ်ႈၼၼ်ႉ။တၵ်းလႆႈဢွၵ်ႇၵႂႃႇသိုဝ်ႈၼႃႈမၼ်းၵမ်းလဵဝ်ႈဢေႃႈ။
၁၀ ၵေႃႉဢၼ်ပဵၼ်ၶုၼ်ၼၼ်ႉတၵ်းလႆႈၸွမ်းၵႃႈၼႂ်းၶိုင်ႈၵၢင်ၵူၼ်းတင်းလၢႆသေ လႄႈၶဝ်ႈၵႃႈၼႂ်းလႄႈ ဢွၵ်ႇလူၺ်ႈၵၼ်တင်းၶဝ်ဢေႃႈ။
၁၁ ၼႂ်းပွႆးတင်းလၢႆဢိၵ်ႇတင်းၼႂ်းတီႈၸူႉတီႈတုမ်ထမ်ႇမႃႉၵၼ်ၸိူဝ်းၼၼ်ႉ ၶိူင်ႈပုၵ်ႉၸေႃႇၽေႃးၸဵၼ်ႇတၵ်းလႆႈပဵၼ်ၽွင်ၶဝ်ႈမုၼ်းဢေႇၽႃႇၼိုင်ႈ ပုၼ်ႈဝူဝ်းတူဝ်ၼိုင်ႈ၊ဢေႇၽႃႇၼိုင်ႈ ပုၼ်ႈသူဝ်းပေႃႈတူဝ်ၼိုင်ႈဢိၵ်ႇတင်း ၵႃႈဢၼ်မီးဢလူဝ်ႇၼၼ်ႉပုၼ်ႈသူဝ်းဢွၼ်ႇတင်းလၢႆတင်းၼမ်ႉမၼ်းယေႈႁီႉၼႃႉ ပုၼ်ႈယေႈဢေႇ ၽႃႇဢေႃႈ။
၁၂ မိူဝ်ႈဢၼ်ၶုၼ်ၼၼ်ႉဢဝ်ၶိူင်ႈပုၵ်ႉၸေႃႇဢၼ်ၸွမ်းလူၺ်ႈဢလူဝ်ႇတူဝ်ၸဝ်ႈၵဝ်သေလႄႈႁဵတ်းဢၼ်ဝႃႈယိၸ်ႉဢၼ်တုတ်ႇၽႆး။ယိၸ်ႉမိၵ်ႉသႁႃႇယႃႉဢၼ်ဢၼ်ႁဵတ်းၸွမ်း ၸႂ်ၸေႇတၼႃႇၼၼ်ႉတီႈထႃႇဝရႃႉၽြႃးၼၼ်ႉၸိုင်တၵ်းလႆႈၽုၺ်ႇၽၵ်းတူဢၼ်ဝၢႆႇၼႃႈၵႂႃႇတၢင်းဢွၵ်ႇၼၼ်ႉ ပုၼ်ႈမၼ်းလႄႈမၼ်းတၵ်းလႆႈမႄးႁဵတ်းမႄးႁႅၼ်း ယိၸ်ႉဢၼ်တုတ်ႇၽႆးမၼ်း၊ယိၸ်ႉမိၵ်ႉသႁႃႇယႃႉမၼ်း မိူၼ်ၸိူဝ်ႉၼင်ႇၼႂ်းဝၼ်းၵမ်သိၼ်ၼၼ်ႉဢေႃႈ။လိုၼ်းၼၼ်ႉမၼ်းတၵ်းလႆႈဢွၵ်ႇၵႂႃႇလႄႈမၼ်းဢွၵ်ႇၵႂႃႇသေယဝ်ႉ တၵ်းလႆႈဢိုတ်း ၽၵ်းတူဝႆႉဢေႃႈ။
၁၃ ၵူႈဝၼ်းၵူႈဝၼ်းမႂ်းတၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႃးဢၢင်ႇၵႃႇလူႉၼၼ်ႉလႄႈ ဢမ်ႇပႆႇၶွပ်ႈၶူပ်ႇၼၼ်ႉတူဝ်ၼိုင်ႈမႄးႁဵတ်းမႄးႁႅၼ်းပုၼ်ႈယိၸ်ႉဢၼ်တုတ်ႇၽႆးတီႈထႃႇဝရႃႉၽြႃးဢေႃႈ။ၼႂ်ၼိုင်ႈယဝ်ႉၼႂ်ၼိုင်ႈ မႂ်းတၵ်းလႆႈမႄးႁဵတ်းမႄးႁႅၼ်း သေႇသေႇဢေႃႈ။
၁၄ ၼႂ်ၼိုင်ႈယဝ်ႉၼႂ်ၼိုင်ႈမႂ်းတၵ်းလႆႈပွင်ႁႅၼ်းပွင်မႄး ၶိူင်ႈပုၵ်ႉၸေႃႇၽေႃးၸဵၼ်ႇ ဢၼ်ႁူမ်ႈလူၺ်ႈၵၼ်တင်းသူဝ်းဢွၼ်ႇၼၼ်ႉ ဢၼ်ဝႃႈၽွင်ၶဝ်ႈမုၼ်းဢေႇၽႃႇႁူၵ်းပုၼ်ႈပုၼ်ႈၼိုင်ႈ ဢိၵ်ႇတင်းၼမ်ႉႁီၵၼႃႉသၢမ်ပုၼ်ႈပုၼ်ႈၼိုင်ႈ ႁႂ်ႈလႆႈယမ်းၽွင်ၶဝ်ႈမုၼ်းၼၼ်ႉဢေႃႈ။ဢၼ်ၼႆႉၸမ်းပဵၼ်ၶိူင်ႈပုၵ်ႉၸေႃႇၽေႃးၸဵၼ်ႇ ဢၼ်တၵ်းလႆႈႁဵတ်းတီႈ ထႃႇဝရႃႉၽြႃးယူႇသေႇသေႇ ၸွမ်းၼင်ႇထုင်းၾိင်ႈတြႃးထႃႇဝရႃႉဢေႃႈ။
၁၅ ၼင်ႇၼၼ်လႄႈ ၼႂ်ၼိုင်ႈယဝ်ႉၼႂ်ၼိုင်ႈၶဝ်တၵ်းလႆႈပွင်ႁႅၼ်းပွင်မႄးသူဝ်းဢွၼ်ႇ၊ ၶိူင်ႈပုၵ်ႉၸေႃႇၽေႃးၸဵၼ်ႇဢိၵ်ႇတင်းၼမ်ႉမၼ်း ပုၼ်ႈဢၼ်တၵ်းပုၵ်ႉၸေႃႇယိၸ်ႉဢၼ်တုတ်ႇၽႆးယူႇသေႇသေႇဢေႃႈ။
၁၆ ထႃႇဝရႃႉၽြႃးမီးဢမိင်ႉၸမ်း၊- ပေႃးၶုၼ်ၼၼ်ႉပၼ်လၢၵ်ႈသွင်ႇသေၸိူဝ်ႉသေပိူင် တီႈလုၵ်ႈၸၢႆးမၼ်းၸိုင်လၢၵ်ႈသွင်ႇၼၼ်ႉ တၵ်းလႆႈပဵၼ်ဢမူၺ်ႇဢုၵ်ႉၸႃႇၶဝ်လႄႈပဵၼ်ၶွင်လုၵ်ႈၸၢႆးမၼ်းၸိူ်ဝ်းၼၼ်ႉဢေႃႈ။တၵ်းလႆႈပဵၼ်တီႈဢၼ်ၶဝ်ၶၢမ်ႇဢမူၺ်ႇလႄႈသိမ်းဢဝ် ဢေႃႈ။
၁၇ ပေႃးမၼ်းပၼ်ဢုၵ်ႉၸႃႇဢမူၺ်ႇလၢၵ်ႈသွင်ႇသေၸိူဝ်ႉသေပိူင်တီႈၶႃႈမၼ်းၸမ်း ၶႃႈၼၼ်ႉတၵ်းလႆႈပိူင်ႇတေႃႇထိုင်ႁွတ်ႈ သၵ်ႉၵရဵတ်ႉပီႊဢၼ်လွတ်ႈၼၼ်ႉၵူၺ်းဢေႃႈ။လိုၼ်းၼၼ်ႉတၵ်းလႆႈၶိုၼ်းႁွတ်ႈထိုင်ၵႃႈၼႂ်းမိုဝ်းၶုၼ်ဢေႃႈ။ဢမူၺ်ႇမၼ်းၼၼ်ႉၸမ်းလုၵ်ႈၸၢႆး မၼ်းတၵ်းလႆႈၶၢမ်ႇဢဝ်ဢေႃႈ။
၁၈ လိူဝ်သေၼၼ်ႉၶုၼ်ၼၼ်ႉဢမ်ႇလႆႈႁဵတ်းပေႉႁဵတ်းၼႅင်ႇ ဢဝ်လိၼ်ဢမူၺ်ႇၵူၼ်းဝၢၼ်ႈၵူၼ်းမိူင်းလႄႈႁေႃႈၸဝ်ႈလိၼ်ၼၼ်ႉဢွၵ်ႇပႅတ်ႈသေၵႃႈၼႂ်းတီႈဢၼ်မၼ်းပိူင်ႇၼၼ်ႉ။မၼ်းတၵ်းလႆႈဢဝ် ၵႃႈၼႂ်းလိၼ်ဢမူၺ်ႇမၼ်းပိူင်ႇၼၼ်ႉပၼ်ဢမူၺ်ႇတီႈလုၵ်ႈၸၢႆးမၼ်းတင်းလၢႆ ႁႂ်ႈၵူၼ်းၵဝ်တင်းလၢႆ ဢမ်ႇလႆႈၶၢမ်ႇတၢင်းဢၼ်ၸၢတ်ႇပိုၼ်သေၵႃႈတီႈလိၼ်ဢမူၺ်ႇဢၼ်ၶဝ်ပိူင်ႇၼၼ်ႉဢေႃႈ။
၁၉ လိုၼ်းၼၼ်ႉၵေႃႉၼၼ်ႉဢဝ်ၵဝ်ၸွမ်းသဵၼ်ႈတၢင်းႁူးဝၢင်း ဢၼ်မီးၵႃႈတီႈႁိမ်းၽၵ်းတူၼၼ်ႉ သေလႄႈသႂၢင်းၶဝ်ႈၵႃႈၼႂ်းလုၵ်း ဢၼ်မူတ်းၸၢင်ႇယိတ်ႉပရေႃးႁိၵ်ႈတင်းလၢႆ ဢၼ်ဝၢႆႇၼႃႈၵႂႃႇၽၢႆႇတၢင်းႁွင်ႇၸိူဝ်းၼၼ်ႉသေယဝ်ႉ၊ၵဝ်ႁၼ်တီႈဢၼ်မီးၵႃႈတီႈၽၢႆႇလင် တၢင်းတူၵ်းၼၼ်ႉတီႈၼိုင်ႈဢေႃႈ။
၂၀ ၵေႃႉၼၼ်ႉလၢတ်ႈတီႈၵဝ်လႄႈဝႃႈ၊- တီႈၼႆႈၸမ်းပဵၼ်တီႈဢၼ်ယိတ်ႉပရေႃးႁိၵ်ႈတင်းလၢႆ တၵ်းလႆႈဢဝ်ယိၸ်ႉဢၼ်ၽႄႇတူႉၸရိူၵ်ႈ၊ ယိၸ်ႉဢၼ်ၽႄႇဢပျႅတ်ႈတူမ်ႈလႄႈၽဝ်ၶိူင်ႈပုၵ်ႉၸေႃႇၽေႃးၸဵၼ်ႇ ႁႂ်ႈဢမ်ႇလႆႈဢဝ်ၸိူဝ်းၼၼ်ႉဢွၵ်ႇၸူးၵႃႈၼႂ်းတမ်ႇတိူင်း ဢၼ်ၵႃႈၼွၵ်ႈႁႂ်ႈၵူၼ်းတင်းလၢႆလႆႈမူတ်းၸၢင်ႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၁ လၢႆးသမ်ႉ ၵေႃႉၼၼ်ႉ ဢဝ်ၵဝ်သႂၢင်းၶဝ်ႈၵႃႈၼႂ်းတမ်ႇတိူင်းၵႃႈၼွၵ်ႈလႄႈ ႁႂ်ႈၵဝ်ပႆလဵပ်ႈၵႂႃႇၵႃႈတီႈတမ်ႇတိူင်းသီႇၸဵင်သေယဝ်ႉ ၵဝ်ႁၼ်တမ်ႇတိူင်းဢွၼ်ႇမီးၵႃႈတီႈတမ်ႇတိူင်းၸိူဝ်းၼၼ်ႉယေႈဢၼ်ၼင်ႇၵၼ်ဢေႃႈ။
၂၂ တမ်ႇတိူင်းဢွၼ်ႇဢၼ်မီးၵႃႈၼႂ်း သီႇၸဵင်ႇတမ်ႇတိူင်းလူင်ၸိူဝ်းၼၼ်ႉ ၼႃႈယၢဝ်းမီးသီႇသိပ်းသွၵ်ႇ၊ ၼႃႈပွတ်းသၢမ်သိပ်းသွၵ်ႇလႄႈ တၢင်းဢၼ်ၶပ်ႉဢၼ်တႅၵ်ႈသီႇဢၼ်ၵႃႈၼႂ်းၸဵင်ႇၸိူဝ်းၼၼ်ႉတၢၼ်ႇပဵင်းၵၼ် ဢေႃႈ။
၂၃ ၵႃႈတီႈလဵပ်ႈႁွပ်ႈတၢင်းၼႂ်းသီႇၸဵင်ႇၸိူဝ်းၼၼ်ႉမီးထႅဝ် ပုၼ်ႈၽႆးပုၼ်ႈဢၼ်တၵ်းတူမ်ႈတၵ်းႁုင်လႄႈၵႃႈတီႈတႂ်ႈထႅဝ် ဢၼ်လဵပ်ႈႁွပ်ႈၸိူဝ်းၼၼ်ႉပဵၼ်ၵူင်ပဵၼ်ႁူးဝႆႉဢေႃႈ။ၵေႃႉၼၼ်ႉလၢတ်ႈတီႈၵဝ်လႄႈဝႃႈ၊-ၵႃႈတီႈၸိူဝ်းၼႆႉၸမ်း ပဵၼ်တီႈတူမ်ႈတီႈႁုင်တီႈဢၼ်ၶဝ်ၸိူဝ်းဢၼ်ပႂ်ႉဢမူႉႁိူၼ်းၸဝ်ႈၼၼ်ႉ လႆႈတူမ်ႈတူဝ်ယိၸ်ႉ ဢၼ်ၵူၼ်းတင်းလၢႆပုၵ်ႉၸေႃႇၸိူဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ။