၃၇
ပၢင်ႇႁူၺ်ႈလုပ်ႇႁႅင်ႈ
၁ လၢႆးသမ်ႉ မိုဝ်းထႃႇဝရႃႉၽြႃးမီးယူႇၵႃႈၼိူဝ်ၵဝ်လႄႈဝိၺိၺ်ႇထႃႇဝရႃႉၽြႃး ဢဝ်ၵဝ်ဢွၵ်ႇၵႂႃႇၵႃႈတီႈၼွၵ်ႈသေလႄႈ ဢဝ်ၵဝ်ဝႆႉၵႃႈၼႂ်းၵၢင်ပၢင်ႇႁူၺ်ႈလႄႈၵႃႈတီႈၼၼ်ႉတဵမ်ဝႆႉတင်းလုပ်ႇၼၼ်ႉဢေႃႈ။
၂ မၼ်းၸဝ်ႈႁႂ်ႈၵဝ်ပႆလဵပ်ႈၵႂႃႇၵႃႈတီႈႁိမ်းႁွမ်းလုပ်ႇၸိူဝ်းၼၼ်ႉဢေႃႈ။ၵႃႈတီႈၼိူဝ်ၼႃႈပၢင်ႇႁူၺ်ႈၼၼ်ႉ မီးလုပ်ႇၼမ်ၼႃႇလႄႈဢွၼ်ၵၼ်ပဵၼ်ဢၼ်ႁႅင်ႈႁွင် ၼႃႇလူင်လၢင်ဝႆႉဢေႃႈ။
၃ မၼ်းၸဝ်ႈၵေႃႈထၢမ်ၵဝ်လႄႈဝႃႈ၊-လုၵ်ႈၵူၼ်းဢိူၺ်း။လုပ်ႇၸိူဝ်းၼႆႉတၵ်းလိပ်းလႆႈႁိုဝ်ဝႃႈၼင်ႇၼႆလႄႈ ၵဝ်လဝ်ႈလၢတ်ႈလႄႈဝႃႈ၊-ၸဝ်ႈထႃႇဝရႃႉၽြႃးတီႈၶႃႈ။
၄ ၸဝ်ႁဝ်းႁူႉတီႈၶႃႈဢေႃႈ၊ဝႃႈၼင်ႇၼႆဢေႃႈ။မၼ်းၸဝ်ႈၵေႃႈမီးဢမိင်ႉတီႈၵဝ်လႄႈဝႃႈ၊-မႂ်းႁဵတ်းပရေႃးၽႅတ်ႈသေလႄႈႁေႃးလၢတ်ႈၵႃႈၼိူဝ်လုပ်ႇၸိူဝ်းၼႆႉလႄႈဝႃႈ၊-လုပ်ႇဢၼ်ႁႅင်ႈဢၼ်ႁွင်ၶဝ်ဢိူၺ်း။သူဢွၼ်ၵၼ်ထွမ်ႇငိၼ်းဢမိင်ႉထႃႇဝရႃႉၽြႃးတႃႉ။
၅ ၸဝ်ႈထႃႇဝရႃႉၽြႃးမီးဢမိင်ႉတီႈလုပ်ႇၸိူဝ်းၼႆႉလႄႈဝႃႈၸမ်း၊-တူၺ်းလူ။ၵဝ်တၵ်းသႂၢင်းၸႂ် သႂ်ႇၵႃႈၼႂ်းသူလႄႈသူတၵ်းလႆႈဢသၢၵ်ႈလိပ်းဢေႃႈ။
၆ ၵဝ်တၵ်းသႂၢင်း သႂ်ႇပၼ်ဢဵၼ်ၵႃႈၼိူဝ်သူလႄႈႁႂ်ႈၼိူဝ်ႉမုၼ်းၶိုၼ်းၵႃႈၼိူဝ်သူဢေႃႈ။ၵဝ်တၵ်းႁႂ်ႈၼင်ႁူမ်ႇသုမ်ႇသူလႄႈ သႂၢင်းၸႂ်ပၼ်သေယဝ်ႉသူတၵ်းလႆႈ ဢွၼ်ၵၼ်ဢသၢၵ်ႈလိပ်းလႄႈ ႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆတႃႉဝႃႈၼင်ႇၼႆလႄႈ ၵဝ်ႁဵတ်းပရေႃးၽႅတ်ႈၸွမ်းၵႃႈၼင်ႇဢၼ်မၼ်းၸဝ်ႈသင်ႇလၢတ်ႈၼၼ်ႉဢေႃႈ။
၇ ၼႂ်းမိူဝ်ႈဢၼ် ၵဝ်ယင်းတိုၵ်ႉႁဵတ်းပရေႃးၽႅတ်ႈယူႇၼၼ်ႉၸိုင်မီးသဵင်ဢၼ်လင်ႊမေႃးလႄႈ တၢင်းဢၼ်သၼ်ႇဝႆ ၵေႃႈမီးဢေႃႈ။
၈ လုပ်ႇၸိူဝ်းၼၼ်ႉဢၼ်ၼိုင်ႈလႄႈဢၼ်ၼိုင်ႈတီႈၽႂ်တီႈမၼ်းသုတ်ႉၸူးၶၢႆႉၸူးၵၼ်ဢေႃႈ။ ၼႂ်းမိူဝ်ႈဢၼ် ၵဝ်ယင်းတိုၵ်ႉလူတူၺ်းယူႇၼၼ်ႉဢဵၼ်တင်းလၢႆပေႃႇမႃးၵႃႈၼိူဝ်ၶဝ်လႄႈ ၼိူဝ်ႉၵေႃႈမုၼ်းၶိုၼ်းၵႃႈ ၼိူဝ်ၶဝ်လႄႈၼင်ၵေႃႈႁူမ်ႇသုမ်ႇၶဝ်ဝႆႉဢေႃႈ။
၉ ၵူၺ်းၵႃႈဢမ်ႇပႆႇမီးၸႂ်။ မၼ်းၸဝ်ႈၵေႃႈမီးဢမိင်ႉတီႈၵဝ်လႄႈဝႃႈ၊-လုၵ်ႈၵူၼ်းဢိူၺ်း။ႁဵတ်းပရေႃးၽႅတ်ႈတီႈလူမ်းတႃႉ။ ႁဵတ်းပရေႃးၽႅတ်ႈသေလႄႈႁေႃးလၢတ်ႈတီႈလူမ်းလႄႈဝႃႈ၊-ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၸႂ်ႈဢိူၺ်း။လုၵ်ႉသေၵႃႈၼႂ်းလူမ်းသီႇၼႃႈသီႇၽၢႆႇၸိူဝ်းၼၼ်ႉမႃးလႄႈ ပဝ်ႇ သႂ်ႇၵႃႈၼိူဝ်တူဝ်တၢႆၸိူဝ်းၼႆႉႁႂ်ႈၶဝ်ဢသၢၵ်ႈလိပ်းတႃႉ၊ ဝႃႈၼင်ႇၼႆလႄႈ
၁၀ ၵဝ်ႁဵတ်းပရေႃးၽႅတ်ႈ ၸွမ်းၵႃႈၼင်ႇဢၼ် မၼ်းၸဝ်ႈသင်ႇလၢတ်ႈဝႆႉၼၼ်ႉလႄႈ လူမ်းၶဝ်ႈၵႃႈၼႂ်းၶဝ်သေလႄႈၶဝ်ၼၼ်ႉ ဢွၼ်ၵၼ်ဢသၢၵ်ႈလိပ်းလႄႈ ပဵၼ်ပူဝ်ႇပႃႇဢၼ်ၼမ်ၼႃႇလူင်လၢင်ယူႇသေလႄႈ ၸုၵ်းယူႇၵႃႈ ၼိူဝ်တိၼ်ၶဝ်ဢေႃႈ။
၁၁ မၼ်းၸဝ်ႈၵေႃႈမီးဢမိင်ႉတီႈၵဝ်လႄႈဝႃႈ၊-လုၵ်ႈၵူၼ်းဢိူၺ်း။လုပ်ႇၸိူဝ်းၼႆႉပဵၼ်ၵူၼ်းမဵဝ်းဢိသရေႇလတင်းလၢႆဢေႃႈ။တူၺ်းလူ။ၶဝ်ၸၢင်ႊဢွၼ်ၵၼ်လၢတ်ႈလႄႈဝႃႈ၊- လုပ်ႇႁဝ်းတင်းလၢႆမီးတၢင်းဢၼ်ႁႅင်ႈၵႂႃႇႁဵဝ်ႇၵႂႃႇယဝ်ႉ။ႁဝ်းၼႆႉဢမ်ႇမီးတီႈဢၼ်မုင်ႈထႃႈမွင်းထႃႈ။ႁဝ်းၼႆႉသုမ်းၸွမ်းယဝ်ႉ၊ဝႃႈ ၼင်ႇၼႆဢေႃႈ။
၁၂ ပိူဝ်ႈၼႆလႄႈ မႂ်းႁဵတ်းပရေႃးၽႅတ်ႈသေလႄႈႁေႃးလၢတ်ႈတီႈၶဝ်လႄႈဝႃႈ၊- ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵူၼ်းၵဝ်တင်းလၢႆၶဝ်ဢိူၺ်း။ၵဝ်တၵ်းၽုၺ်ႇပိုတ်ႇ ႁူးၶုမ်ပႃႇႁဵဝ်ႈသူတင်းလၢႆလႄႈဢဝ်သူ ဢွၵ်ႇသေၵႃႈၼႂ်းႁူးၶုမ်ပႃႇႁဵဝ်ႈသူၸိူဝ်းၼၼ်ႉသေ လႄႈ ဢဝ်သူင်ႇႁွတ်ႈၵႂႃႇၵႃႈၼႂ်းမိူင်းဢိသရေႇလဢေႃႈ။
၁၃ ၵူၼ်းတင်းလၢႆၶဝ်ဢိူၺ်း။မိူဝ်ႈဢၼ်ၵဝ်ၽုၺ်ႇပိုတ်ႇႁူးၶုမ်ပႃႇႁဵဝ်ႈသူၸိူဝ်းၼၼ်ႉလႄႈ ဢဝ်သူဢွၵ်ႇသေၵႃႈၼႂ်းႁူးၶုမ်ပႃႇႁဵဝ်ႈသူၸိူဝ်းၼၼ်ႉၸိုင် သူတၵ်းလႆႈ ႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ။ၵဝ်တၵ်းဢဝ်ဝိၺိၺ်ႇၵဝ် သႂၢင်း သႂ်ႇပၼ်ၵႃႈၼႂ်းသူႁႂ်ႈသူဢသၢၵ်ႈလိပ်းလႄႈ ၶျႃးတီႈယူႇပၼ်ၵႃႈၼႂ်းၽႆးမိူင်း ဢၼ်သူယူႇၵဝ်ႇၵဝ်ႇၼၼ်ႉဢေႃႈ။
၁၄ သူတၵ်းလႆႈႁူႉလွင်ႈဢၼ်ၵဝ်ထႃႇဝရႃႉၽြႃးလၢတ်ႈဝႆႉယဝ်ႉလႄႈ ႁဵတ်းၸွမ်းဢေႃႈ၊ ထႃႇဝရႃႉၽြႃးမီးဢမိင်ႉယဝ်ႉ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
မိူင်းၼိုင်ႈတႂ်ႈၶုၼ်ႁေႃၶမ်းပႃးလဵဝ်
၁၅ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈၸမ်း၊-လုၵ်ႈၵူၼ်းဢိူၺ်း။မႂ်းဢဝ်ၶွၼ်ႉလႅမ်ႈၼိုင်ႈလႄႈဢဝ်ၵႂၢမ်းဢၼ်ဝႃႈ ပုၼ်ႈမဵဝ်းယုတဢိၵ်ႇတင်းၵူၼ်းမဵဝ်းဢိသရေႇလ တင်းလၢႆဢၼ်ႁူမ်ႈၵၼ်ပွင်းၵၼ်တင်းမၼ်းၼၼ်ႉဢေႃႈ၊ ဝႃႈၼင်ႇၼႆၼၼ်ႉ တႅမ်ႈသႂ်ဝႆႉၵႃႈၼိူဝ်မၼ်းတႃႉ။
၁၆ လၢႆးသမ်ႉဢဝ်ၶွၼ်ႉလႅမ်ႈၼိုင်ႈလႄႈ ဢဝ်ၵႂၢမ်းဢၼ်ဝႃႈပုၼ်ႈမဵဝ်း ယုဝ်းသႅပ်ႉဢိၵ်ႇတင်းၵူၼ်းမဵဝ်းဢိသရေႇလ တင်းလၢႆဢၼ်ႁူမ်ႈပွင်းၵၼ်တင်းမၼ်းၼၼ်ႉဢေႃႈ။ပဵၼ်ၶွၼ်ႉဢေႇၽရိမ်ႇယဝ်ႉ၊ ဝႃႈၼင်ႇၼႆၼၼ်ႉတႅမ်ႈ သႂ်ႇဝႆႉၵႃႈၼိူဝ်မၼ်းတႃႉ။
၁၇ ဢဝ်သွင်လႅမ်ႈၼၼ်ႉႁွမ်းၵၼ်ဝႆႉ ႁႂ်ႈပဵၼ်လႅမ်ႈလဵဝ်ၵူၺ်းပုၼ်ႈမႂ်းတႃႉ။တၵ်းပဵၼ်လႅမ်ႈလဵဝ်ၵူၺ်းၵႂႃႇၵႃႈၼႂ်းမိုဝ်းမႂ်း ဢေႃႈ။
၁၈ ပေႃးၵူၼ်းမဵဝ်းလဵဝ်ၵၼ်တင်းမႂ်းၸိူဝ်းၼၼ်ႉထၢမ်လႄႈဝႃႈ၊- တၵ်းဢမ်ႇလၢတ်ႈလွင်ႈဢၼ်ႁဵတ်းၸိူဝ်ႉၼင်ႇႁိုဝ်၊ဝႃႈၼင်ႇၼႆၸိုင် မႂ်းလၢတ်ႈတီႈၶဝ်လႄႈဝႃႈ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-
၁၉ တူၺ်းလူ။ၵဝ်တၵ်းဢဝ်ၶွၼ်ႉယုဝ်းသႅပ်ႉ ဢၼ်ဢေႇၽရိမ်ႇဢိၵ်ႇတင်းမဵဝ်းၸိူဝ်ႉၶိူဝ်းဢိသရေႇလ ဢၼ်ႁူမ်ႈၵၼ်ပွင်းၵၼ်တင်းမၼ်းယိပ်းၵမ်ၼၼ်ႉ ႁွမ်ႈၵၼ်တင်းၶွၼ်ႉယုတသေလႄႈႁႂ်ႈပဵၼ်ၶွၼ်ႉလႅမ်ႈလဵဝ်ၵူၺ်းလႄႈ တၵ်းပဵၼ်လႅမ်ႈလဵဝ်ၵႂႃႇၵႃႈၼႂ်းမိုဝ်းမႂ်းဢေႃႈဝႃႈၼင်ႇၼႆယဝ်ႉ၊ ဝႃႈၼင်ၼႆ တႃႉ။
၂၀ ၶွၼ်ႉဢၼ်မႂ်းတႅမ်ႈ သႂ်ႇဝႆႉၸိူဝ်းၼၼ်ႉတၵ်းလႆႈမီး ယူႇၵႃႈၼႂ်းမိုဝ်းမႂ်းသိုဝ်ႈၼႃႈတႂ်ႈတႃၶဝ်ဢေႃႈ။
၂၁ မႂ်းသမ်ႉလၢတ်ႈတီႈၶဝ်လႄႈဝႃႈ၊-ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းႁွင်ႉဢဝ်ၵူၼ်းမဵဝ်းဢိသရေႇလ တင်းလၢႆ ဢွၵ်ႇသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းတီႈဢၼ်ၶဝ်ႁွတ်ႈထိုင်ၼၼ်ႉလႄႈႁႂ်ႈၶဝ်လုၵ်ႉသေၵႃႈတီႈၵူႈတီႈၵူႈလႅၼ်မႃးၸူႉၵၼ်တုမ်ၵၼ်သေလႄႈ ဢဝ်ၶဝ်သူင်ႇႁွတ်ႈ ၵႃႈၼႂ်းမိူင်းဢၼ်ၶဝ်ယူႇၵဝ်ႇၵဝ်ႇၼၼ်ႉဢေႃႈ။
၂၂ ၵဝ်တၵ်းႁႂ်ႈၶဝ်ပဵၼ် ၵူၼ်းမဵဝ်းလဵဝ်ၵူၺ်းၵႃႈၼိူဝ်လွႆဢိသရေႇလတင်းလၢႆၵႃႈၼႂ်းမိူင်းၼၼ်ႉလႄႈ ၶုၼ်ႁေႃၶမ်းပႃးလဵဝ်ၵူၺ်းတၵ်းလႆႈဢုပ်ႉပိူင်ႇၸၢမ်ႇၸႃးၶဝ်ဢေႃႈ။ၵမ်းလိုၼ်း ၶဝ်ဢမ်ႇလႆႈပဵၼ်သွင်သိုင်ႇသွင်မိူင်းလႃးလႃး။
၂၃ ၵမ်းလိုၼ်း ၶဝ်ဢမ်ႇလႆႈႁႂ်ႈတူဝ်ၶဝ်ၵူဝ်ႈၵိူၵ်ႇလူၺ်ႈရုၵ်ႉထူႉသၢင်းထူႉၶဝ်၊ လွင်ႈတၢင်းဢၼ်လီႁင်ႈဢဵတ်ႇသဵတ်ႇၶဝ်လွင်ႈတၢင်းဢၼ်ပူၼ်ႉလိူဝ်ၶဝ်ၼၼ်ႉ။ၵဝ်တၵ်းၵႄႇသႄႇၼုၵ်ႈဢဝ်ၶဝ် ဢွၵ်ႇသေၵႃႈၼႂ်းတီႈယူႇတီႈသဝ်း
ၵႃႈမီးတီႈဢၼ်ၶဝ်ၽိတ်းပိူင်ႈၸိူဝ်းၼၼ်ႉလႄႈ ႁႂ်ႈၶဝ်မူတ်းသႂ်ဢေႃႈ။ ၶဝ်တၵ်းပဵၼ်ၵူၼ်းၵဝ်လႄႈၵဝ်တၵ်းပဵၼ်ၽြႃးပဵၼ်ၸဝ်ႈၶဝ်ဢေႃႈ။
၂၄ ၶႃႈၵဝ်တႃႇဝိတ်ႉတၵ်းပဵၼ်ၶုၼ်ႁေႃၶမ်းၶဝ်လႄႈ ၶဝ်ၵႃႈမီးၼၼ်ႉတၵ်းမီးၵေႃႉဢၼ်လဵင်ႉသူဝ်းထိင်းသူဝ်းၵေႃႉလဵဝ်ၵူၺ်းဢေႃႈ။ ၶဝ်တၵ်းဢွၼ်ၵၼ်ၸွမ်းသဵၼ်ႈတၢင်း ဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈ ပႂ်ႉၵမ်ပႂ်ႉၵျၢင်ႉထုင်းၾိင်ႈတြႃးၵဝ်ၸိူဝ်း ၼၼ်ႉသေလႄႈႁဵတ်းၸွမ်းဢေႃႈ။
၂၅ ၶဝ်တၵ်းလႆႈဢွၼ်ၵၼ်ယူႇ ၵႃႈၼႂ်းမိူင်းဢၼ်ၵဝ်ပၼ်တီႈၶႃႈၵဝ်ယႃႇၵုပ်ႉလႄႈပူႇသူမွၼ်ႇသူယၢမ်ႈယူႇၼၼ်ႉဢေႃႈ။ ၶဝ်ဢိၵ်ႇတင်းလုၵ်ႈလၢၼ်ၶဝ် သိုပ်ႇသိုပ်ႇတၢမ်တၢမ်ၸိူဝ်းၼၼ်ႉတၵ်းလႆႈဢွၼ်ၵၼ်ယူႇ ၵႃႈၼႂ်းမိူင်းၼၼ်ႉသေလႄႈၶႃႈၵဝ်တႃႇဝိတ်ႉ ၵေႃႈတၵ်းလႆႈဢုပ်ႉပိူင်ႇၸၢမ်ႇၸႃး ၶဝ်ယူႇသေႇသေႇဢေႃႈ။
၂၆ လိူဝ်သေၼၼ်ႉၵဝ်တၵ်းႁဵတ်းပတိၺိၼ်မိၵ်ႉသႁႃႇယႃႉလူၺ်ႈၵၼ်တင်းၶဝ်လႄႈ ပတိၺိၼ်ႇၼၼ်ႉတၵ်းပဵၼ်ပတိၺိၼ်ႇ ၼိၵ်ႉၸႃႉထႃႇဝရႃႉၽြႃးဢေႃႈ။ ၵဝ်တၵ်းၶျႃးတီႈယူႇတီႈသဝ်းၶဝ်ပၼ်လႄႈႁႂ်ႈၶဝ် ယႂ်ႇၽႄၼမ်ၵိုၼ်းမႃးလႄႈ ဢဝ်ထႃႇၼႃႉတီႈမူတ်းၸၢင်ႇၵဝ် ဝႆႉၵႃႈၼႂ်းၶိုင်ႈၵၢင်ၶဝ်ယူႇသေဢေႃႈ။
၂၇ ပိၵ်ႉမၢၼ်ႇၸဝ်ႈၵေႃႈ တၵ်းမီးယူႇတီႈၶဝ်လႄႈၵဝ်တၵ်းပဵၼ်ၽြႃးပဵၼ်ၸဝ်ႈၶဝ်လႄႈ ၶဝ်ၵေႃႈတၵ်းပဵၼ်ၵူၼ်း ၵဝ်ဢေႃႈ။
၂၈ ၼင်ႇၼၼ်လႄႈမိူဝ်ႈဢၼ်ထႃႇၼႃႉတီႈမူတ်းၸၢင်ႇၵဝ် တႄႇယူႇၵႃႈၼႂ်းၶိုင်ႈၵၢင်ၶဝ်ယူႇတႃႇသေႇၼၼ်ႉၵူၼ်းၵူႈၸိူဝ်ႉၵူႈမဵဝ်း တၵ်းလႆႈႁူႉလွင်ႈဢၼ်ၵဝ်ထႃႇဝရႃႉၽြႃး ႁႂ်ႈမဵဝ်းဢိသရေႇလ မူတ်းၸၢင်ႇဢေႃႈ၊ဝႃႈၼင်ႇၼႆတႃႉ၊ ဝႃႈၼင်ႇၼႆၽြုးပဵၼ်ၸဝ်းမီးဢမိင်ႉဢေႃႈ။