၄၅
ၸၢၵ်ႈၽႄလႅၼ်လိၼ်
၁ မိူဝ်ႈဢၼ်သူတူၵ်းၸႃႇၵွၵ်ႈသေလႄႈ ၽႄလိၼ်မႅင်ႇပၼ်ႁႂ်ႈလႆႈၶၢမ်ႇဢမူၺ်ႇၼၼ်ႉၸိုင် သူတၵ်းလႆႈဢွၼ်ၵၼ်ဢဝ် ၵႂၢၵ်ႈလိၼ်ဢၼ်မူတ်းၸၢင်ႇၵႂၢၵ်ႈၼိုင်ႈႁဵတ်းတၢင်းပုၵ်ႉၸေႃႇ ဢၼ်ယုၵ်ႉယွင်ႈထႃႇဝရႃႉၽြႃးဢေႃႈ။ၵႂၢၵ်ႈၼၼ်ႉ ၼႃႈယၢဝ်းမၼ်းတၵ်းလႆႈမီးသွင်မိုၼ်ႇပၢႆႁႃႈႁဵင်တႅၵ်ႈ၊ၼႃႈပွတ်းမၼ်းမိုၼ်ႇၼိုင်ႈဢေႃႈ။တၵ်းလႆႈပဵၼ်ဢၼ်မူတ်းၸၢင်ႇၵႃႈၼႂ်းၶွပ်ႇလႅၼ်လိၼ် မၼ်းၵႃႈမီးၼၼ်ႉဢေႃႈ။
၂ ၵႃႈၼႂ်းၵႂၢၵ်ႈလိၼ်ၼၼ်ႉၵႂၢၵ်ႈသီႇၸဵင်ႇၶိုင်ႈ ဢၼ်ၼႃႈယၢဝ်းမၼ်းမီးႁႃႈပၢၵ်ႇတႅၵ်ႈၼႃႈပွတ်းမၼ်းႁႃႈပၢၵ်ႇတႅၵ်ႈၼၼ်ႉတၵ်းလႆႈပဵၼ်ပုၼ်ႈထႃႇၼႃႉတီႈမူတ်းၸၢင်ႇဢေႃႈ။ၵႃႈတီႈႁိမ်းႁွမ်းလဵပ်ႈႁွပ်ႈမၼ်းၼၼ်ႉ တၵ်းလႆႈမီး လိၼ်ဢၼ်ပဝ်ႇ ဢၼ်လၢပ်ႈႁႃႈသိပ်းသွၵ်ႇဢေႃႈ။
၃ ၼင်ႇၼၼ်လႄႈမႂ်းတႅၵ်ႈၼႃႈယၢဝ်းသွင်မိုၼ်ႇပၢႆႁႃႈႁဵင်၊ ၼႃႈပွတ်းမိုၼ်ႇၼိုင်ႈသေယဝ်ႉ တၵ်းလႆႈပဵၼ်တီႈဢၼ်မူတ်းၸၢင်ႇ၊တီႈဢၼ်တႄႇႁဵတ်း ထႃႇၼႃႉတီႈမူတ်းၸၢင်ႇသေပိူၼ်ႈ ဢေႃႈ။
၄ လိၼ်ဢၼ်မူတ်းၸၢင်ႇၼၼ်ႉတၵ်းလႆႈပဵၼ်ပုၼ်ႈယိတ်ႉပရေႃးႁိၵ်ႈ ဢၼ်ဝႃႈၶဝ်ၸိူဝ်းဢၼ်ပႂ်ႉထႃႇၼႃႉတီႈမူတ်းၸၢင်ႇလႄႈ သုတ်ႉၸပ်းသုတ်ႉၸူးႁႂ်ႈလႆႈပွင်ႁဵတ်းဢမူႉထႃႇဝရႃႉၽြႃးၼၼ်ႉဢေႃႈ။ တၵ်းလႆႈပဵၼ်လိၼ် တီႈပုၼ်ႈဢၼ်ၶဝ်တၵ်းႁဵတ်းႁိူၼ်းဢိၵ်ႇတင်းတီႈဢၼ်မူတ်းၸၢင်ႇ ပုၼ်ႈဢၼ်ၶဝ်တၵ်းတႄႇ ႁဵတ်းထႃႇၼႃႉတီႈမူတ်းၸၢင်ႇဢေႃႈ။
၅ ၵႂၢၵ်ႈဢၼ်ၼႃႈယၢဝ်းမီးသွင်မိုၼ်ႇပၢႆႁႃႈႁဵင်၊ ၼႃႈပွတ်းမီးမိုၼ်ႇၼိုင်ႈၼၼ်ႉတၵ်းလႆႈပဵၼ် ပုၼ်ႈဢၼ်ဢဝ်ၵူၼ်းလေႇဝိဢၼ်ပႂ်ႉ ဢမူႉႁိူၼ်းၸဝ်ႈၸိူဝ်းၼၼ်ႉတၵ်းလႆႈပိူၼ်ႇႁႂ်ႈ လႆႈတႄႇႁဵတ်းလုၵ်းသၢဝ်းလုၵ်းဢေႃႈ။
၆ သူတၵ်းလႆႈၶၢၼ်းလိၼ်ဢၼ်ပဵၼ် ပုၼ်ႈဢၼ်ဝဵင်းၸဝ်ႈတၵ်းပိူင်ႇၼၼ်ႉ ၵႃႈတီႈသွင်ၽၢၵ်ႇၶၢင်ႈလိၼ်တၢင်းပုၵ်ႉၸေႃႇဢၼ်မူတ်းၸၢင်ႇၼၼ်ႉဝႆႉလႄႈ ၼႃႈယၢဝ်းမၼ်းတၵ်းလႆႈမီးမိုၼ်ပၢႆႁႃႈႁဵင်၊ ၼႃႈပွတ်းမၼ်းႁႃႈႁဵင်ဢေႃႈ။တၵ်းလႆႈပဵၼ်ပုၼ်ႈၵူၼ်းမဵဝ်းဢိသရေႇလတင်းသဵင်ႈ တင်းလူင်ဢေႃႈ။
၇ ၵႃႈတီႈသွင်ၽၢၵ်ႇၶၢင်ႈၵႂၢၵ်ႈလိၼ်တၢင်းပုၵ်ႉၸေႃႇဢၼ်မူတ်းၸၢင်ႇ ဢိၵ်ႇတင်းလိၼ်ဢၼ်ဝဵင်းၸဝ်ႈပိူင်ႇၸိူဝ်းၼၼ်ႉ ၽၢႆႇၼႃႈၵႂၢၵ်ႈလိၼ်တၢင်းပုၵ်ႉၸေႃႇဢၼ်မူတ်းၸၢင်ႇဢိၵ်ႇတင်းၽၢႆႇၼႃႈလိၼ်ဢၼ်ဝဵင်းၸဝ်ႈပိူင်ႇၼၼ်ႉ ဢၼ်ဝႃႈပွတ်းၽၢႆႇတၢင်းတူၵ်းဢိၵ်ႇတင်းပွတ်းၽၢႆႇတၢင်းဢွၵ်ႇဢၼ်ၼႃႈယၢဝ်းမၼ်းတၢၼ်ႇပဵင်းၵၼ်တင်းၵႂၢၵ်ႈလိၼ်ဢၼ်ၼိုင်ႈဢဝ်ၵႃႈတီႈလႅၼ်သုတ်းမၼ်းၽၢႆႇဝၼ်းတူၵ်းတေႃႇထိုင်ႁွတ်ႈလႅၼ်သုတ်းမၼ်းၽၢႆႇ ဝၼ်းဢွၵ်ႇၼၼ်ႉတၵ်းလႆႈပဵၼ်ပုၼ်ႈၶုၼ်ဢေႃႈ။
၈ လိၼ်ၼၼ်ႉတၵ်းလႆႈပဵၼ် လိၼ်ဢၼ်ၶုၼ်ပိူင်ႇၵႃႈၼႂ်းမိူင်းဢိသရေႇလလႄႈ ၵမ်းလိုၼ်းၶုၼ်ၵဝ်တင်းလၢႆတၵ်းဢမ်ႇလႆႈၼိၵ်ႈၸၢၵ်ႈငႅၼ်းသေးၵူၼ်းၵဝ်တင်းလၢႆ။ၶဝ်တၵ်းလႆႈဢဝ် လိၼ်ဢၼ် ယင်းၵိုတ်းယင်းၵျၢၼ်ႇၼၼ်ႉ ၽႄမႅင်ႇပၼ်တီႈမဵဝ်းဢိသရေႇလ ၸွမ်းလူၺ်ႈမဵဝ်းၽႂ်မဵဝ်းမၼ်းဢေႃႈ။
၉ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၶုၼ်ဢိသရေလၶဝ်ဢိူၺ်း။သူဢွၼ်ၵၼ်မီးတၢင်းဢၼ်ပျေႇၸႂ်ဢိမ်ႇၸႂ်တႃႉ။ ဢွၼ်ၵၼ်ပႄႇပႅတ်ႈဢမူႉတၢင်းဢၼ်ႁဵတ်းပႄႉႁဵတ်းၼႅင်ႇ၊ တၢင်းဢၼ်ႁိမ်ဢဝ်ႁူင်ႇဢဝ်တင်းလၢႆသေလႄႈ ႁဵတ်းဢမူႉတၢင်းဢၼ်ၸွမ်းၼင်ႇတြႃး၊ ဢမူႉတၢင်းဢၼ်ၸီႇယၢင်ႇသိုဝ်ႈသိုဝ်ႈတေႃႇတေႃႇတႃႉ။ၵမ်းလိုၼ်း ယႃႇပေဢွၼ်ၵၼ်ၼိၵ်ႈၸၢၵ်ႈငႅၼ်းသေးၵူၼ်းၵဝ်တင်းလၢႆ၊ ဝႃႈၼင်ႇၼႆၸဝ်ႈထႃႇဝရႃႉၽြႃး မီးဢမိင်ႉဢေႃႈ။
၁၀ သူတၵ်းလႆႈဢွၼ်ၵၼ်သုင်းတိုဝ်းယႃႇၸူႇဢၼ်မၢၼ်ႇဢၼ်မႅၼ်ႈ၊ ဢေႇၽႃႇဢၼ်မၢၼ်ႇဢၼ်မႅၼ်ႈ၊ ပၢတ်ႉဢၼ်မၢၼ်ႇဢၼ်မႅၼ်ႈဢေႃႈ။ဢေႇၽႃႇ ဢိၵ်ႇတင်းပၢတ်ႉၼၼ်ႉတၵ်းလႆႈတၢၼ်ႇၵၼ် ပဵင်းၵၼ်ဢေႃႈ။
၁၁ သွင်ၸိူဝ်ႉသွင်ပိူင်ၼၼ်ႉတၵ်းလႆႈဢိင်ႁေႃႇမေႇသေလႄႈ ဢေႇၽႃႇၼၼ်ႉတၵ်းလႆႈမီးႁေႃႇမေႇသိပ်းပုၼ်ႈပုၼ်ႈၼိုင်ႈဢေႃႈ။ပၢတ်ႉၵေႃႈတၵ်းလႆႈမီး ႁေႃႇမေႇသိပ်းပုၼ်ႈပုၼ်ႈၼိုင်ႈဢေႃႈ။
၁၂ သၢဝ်းၵေႇရႃႇတၵ်းလႆႈပဵၼ် ၵျၢပ်ႈသၶေႇလၵျၢပ်ႈၼိုင်ႈလႄႈသၢဝ်းၵျၢပ်ႈ၊သၢဝ်းႁႃႈၵျၢပ်ႈ၊ သိပ်းႁႃႈၵျၢပ်ႈတၵ်းလႆႈပဵၼ်မႃႇၼေႇၼိုင်ႈဢေႃႈ။
တၢင်းပုၵ်ႉၸေႃႇလႄႈဝၼ်းဢၼ်မူတ်းၸၢင်ႇ
၁၃ မိုဝ်းဢၼ်သူႁဵတ်း တၢင်းဢၼ်ပုၵ်ႉၸေႃႇ ဢၼ်ယုၵ်ႉယွင်ႈၼၼ်ႉၸိုင် သူတၵ်းလႆႈဢဝ်ဢေႇၽႃႇႁူၵ်းပုၼ်ႈပုၼ်ႈၼိုင်ႈၵႃႈၼႂ်းၶဝ်ႈသၢၼ်ၵျုင်ႇ ႁေႃႇမေႇၼိုင်ႈဢေႃႈ။ၶဝ်ႈသၢၼ်မူႉယေႃးၵေႃႈမႂ်းတၵ်းလႆႈဢဝ်ဢေႇၽႃႇ ႁူၵ်းပုၼ်ႈပုၼ်ႈၼိုင်ႈၵႃႈၼႂ်းႁေႃႇမေႇၼိုင်ႈပုၵ်ႉ ၸေႃႇဢေႃႈ။
၁၄ ပိင်းၺၢပ်ႈဢၼ်ၸၢပ်ႈသႅင်ႇၵၼ်တင်းၼမ်ႉမၼ်းၸမ်း တၵ်းလႆႈဢဝ်ပၢတ်ႉသိပ်းပုၼ်ႈပုၼ်ႈၼိုင်ႈၵႃႈၼႂ်းၵေႃႇရႃႉၼိုင်ႈ ဢၼ်ပဵၼ်သိပ်းပၢတ်ႉဢၼ် ဝႃႈႁေႃႇမေႇၼိုင်ႈၼၼ်ႉပုၵ်ႉၸေႃႇဢေႃႈ။
၁၅ ၼင်ႇႁိုဝ်တၵ်းၽႄႇဢပျႅတ်ႈၶဝ်ၸိုင် တၵ်းလႆႈဢဝ်သူဝ်းဢွၼ်ႇၵႃႈၼႂ်းသူဝ်းသွင်ပၢၵ်ႇ ဢၼ်မီးၵႃႈၼႂ်းတီႈဢၼ်ၼမ်ႉၼမ်၊တီႈဢၼ်ဢိသရေႇလ ယၢမ်ႈၵိၼ်ယူႇၼၼ်ႉတူဝ်ၼိုင်ႈပုၵ်ႉၸေႃႇဢေႃႈ။ဢၼ်ၸိူဝ်းၼႆႉတၵ်းလႆႈပဵၼ်ၶိူင်ႈပုၵ်ႉၸေႃႇၽေႃးၸဵၼ်ႇ၊ ယိၸ်ႉဢၼ်တုတ်ႇၽႆး၊ယိၸ်ႉမိၵ်ႉသႁႃႇယႃႉဢၼ်တၵ်းၽႄႇဢပျႅတ်ႈဢေႃႈ၊ ဝႃႈၼင်ႇ ၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။
၁၆ ၶိူင်ႈပုၵ်ႉၸေႃႇဢၼ်ယုၵ်ႉယွင်ႈၼၼ်ႉၸိုင် ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင် တၵ်းလႆႈဢွၼ်ၵၼ်ဢဝ်သၢၵ်ႈပၼ်တီႈ ၶုၼ်ဢိသရေႇလဢေႃႈ။
၁၇ ၶုၼ်ၼၼ်ႉၵေႃႈတၵ်းလႆႈဢဝ်ပုၵ်ႉၸေႃႇယိၸ်ႉဢၼ်တုတ်ႇၽႆး ၶိူင်ႈပုၵ်ႉၸေႃႇၽေႃးၸဵၼ်ႇ၊ၶိူၼ်ႈပုၵ်ႉၸေႃႇ ဢၼ်သွၼ်းလေႃႇၼႂ်းဝၼ်းႁဵတ်းပွႆး၊ဝၼ်းလိူၼ်မႂ်ႇ၊ ဝၼ်းၵမ်သိၼ်၊ဝၼ်းဢၼ်ပရိၵ်ႈသၢတ်ႈမဵဝ်းဢိသရေႇလ ၸင်ႇၸူႉၵၼ်တုမ်ႇၵႃႈဢၼ်ၸႅၼ်ႇတၢမ်းၵၼ်ၼၼ်ႉဢေႃႈ။ မၼ်းတၵ်းလႆႈမႄးႁဵတ်းမႄးႁဵၼ်းယိၸ်ႉဢၼ်ၽႄႇဢပျႅတ်ႈ ၶိူင်ႈပုၵ်ႉၸေႃႇၽေႃးၸဵၼ်ႇ၊ ယိၸ်ႉဢၼ်တုတ်ႇၽႆး၊ယိၸ်ႉမိၵ်ႉသႁႃႇႁႂ်ႈလႆႈၽႄႇဢပျႅတ်ႈမဵဝ်းဢိသရေႇလဢေႃႈ။
၁၈ ၸဝ်ႈထႃႇဝရႃႉၽြႃးမီးဢမိင်ႉၸမ်း၊- ၼႂ်းဝၼ်းလိူၼ်ပထမဝၼ်းၼိုင်ႈၼၼ်ႉ မႂ်းတၵ်းလႆႈဢဝ်ဝူဝ်းပေႃႈၼုမ်ႇဢၼ်ဢမ်ႇပႃးဢပျႅတ်ႈၼၼ်ႉတူဝ်ၼိုင်ႈလႄႈ ႁႂ်ႈထႃႇ ၼႃႉတီႈမူတ်းၸၢင်ႇမူတ်းသႂ်ဢေႃႈ။
၁၉ ယိတ်ႉပရေႃးႁိၵ်ႈတၵ်းလႆႈဢဝ်လိူတ်ႈတူဝ်ယိၸ်ႉ ဢၼ်ၽႄႇဢပျႅတ်ႈၼၼ်ႉၵမ်ႈၽွင်ႈလႄႈ သႂ်ႇၵႃႈတီႈသဝ်ၽၵ်းတူႁိူၼ်းၸဝ်ႈ၊ ၵႃႈတီႈသီႇၸဵင်ႇၶူင်ႇႁၢၼ်ႉတႂ်ႈ ယိတ်ႉပလၢင်ႇဢိၵ်ႇတင်း ၵႃႈတီႈၽၵ်းတူတမ်ႇတိူင်းဢၼ်ၵႃႈၼႂ်း ၸိူဝ်းၼၼ်ႉဢေႃႈ။
၂၀ ၼွၵ်ႈသေၼၼ်ႉၼႂ်းဝၼ်းသတ်ႉတမၵေႃႈမႂ်းတၵ်းလႆႈပုၵ်ႉၸေႃႇ မိူၼ်ၸိူဝ်ႉၼင်ႇၼၼ်ပုၼ်ႈၵေႃႉဢၼ်ၽိတ်းပိူင်ႈ ဢိၵ်ႇတင်းၵေႃႉဢၼ်ငိူဝ်ႈငႃႉၼၼ်ႉလႄႈႁဵတ်းမင်ႇၵလႃႇ တၢင်းဢၼ်ၽႄႇဢပျႅတ်ႈပုၼ်ႈ ႁိူၼ်းၸဝ်ႈဢေႃႈ။
၂၁ ၼႂ်းလိူၼ်ပထမသိပ်းသီႇဝၼ်းၼၼ်ႉသူတၵ်းလႆႈၶၢမ်ႇပွႆးပႃသၶႃႇဢၼ်ဝႃႈ ပွႆးၸဵတ်းဝၼ်းတဵမ်တဵမ်ၼၼ်ႉလႄႈတၵ်းလႆႈၵိၼ်ၶဝ်ႈမုၼ်းဢၼ် ဢမ်ႇပႃးၸိူဝ်ႉပႅင်ႈၵူၺ်းဢေႃႈ။
၂၂ ၼႂ်းဝၼ်းၶုၼ်ၼၼ်ႉတၵ်းလႆႈဢဝ်ဝူဝ်းပေႃႈတူဝ်ၼိုင်ႈမႄးႁဵတ်းမႄးႁႅၼ်းယိၸ်ႉဢၼ်ၽႄႇဢပျႅတ်ႈ ပုၼ်ႈတူဝ်ၸဝ်ႈၵဝ်ႇဢိၵ်ႇတင်းပုၼ်ႈၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင် ဢေႃႈ။
၂၃ ၼႂ်းဝၼ်းပွႆးၸဵတ်းဝၼ်းတဵမ်တဵမ်ၼၼ်ႉမၼ်းတၵ်းလႆႈမႄးႁဵတ်းမႄးႁႅၼ်း ဝူဝ်းပေႃႈၸဵတ်းတူဝ်သူဝ်းပေႃႈဢၼ်ဢမ်ႇပႃးဢပျႅတ်ႈၸဵတ်းတူဝ် ပုၼ်ႈယိၸ်ႉဢၼ်တုတ်ႇၽႆးတီႈထႃႇဝရႃႉၽြႃး ဢိၵ်ႇတင်း ပႄႉဢွၼ်ႇတူဝ်ၼိုင်ႈ ပုၼ်ႈယိၸ်ႉဢၼ်ၽႄႇဢပျႅတ်ႈၼႂ်းၸဵတ်းဝၼ်းၼၼ်ႉၵူႈဝၼ်းဢေႃႈ။
၂၄ မၼ်းတၵ်းလႆႈပွင်ႁႅၼ်းပွင်မႄးၶိူင်ႈပုၵ်ႉၸေႃႇၽေႃးၸဵၼ်ႇ ဢၼ်ဝႃႈၽွင်ၶဝ်ႈမုၼ်းဢေႇၽႃႇၼိုင်ႈ ပုၼ်ႈဝူဝ်းတူဝ်ၼိုင်ႈဢေႇၽႃႇၼိုင်ႈပုၼ်ႈသူဝ်းပေႃႈတူဝ်ၼိုင်ႈ ဢိၵ်ႇတင်းၼမ်ႉ မၼ်းယေႈႁီႉၼႃႉပုၼ်ႈဢေႇၽႃႇၼၼ်ႉဢေႃႈ။
၂၅ ၼႂ်းလိူၼ်သတ်ႉတမသိပ်းပၢႆႁႃႈဝၼ်းၼၼ်ႉ မၼ်းတၵ်းလႆႈၶၢမ်ႇပွႆးလႄႈႁဵတ်းၸိူဝ်ႉၼင်ႇၼၼ် ၸဵတ်းဝၼ်းတဵမ်တဵမ်ၸွမ်းၵႃႈၼင်ႇဢၼ် ႁဵတ်းယိၸ်ႉဢၼ်ၽႄႇဢပျႅတ်ႈ၊ယိၸ်ႉဢၼ်တုတ်ႇၽႆး၊ ၶိူင်ႈပုၵ်ႉၸေႃႇၽေႃးၸဵၼ်ႇ၊ၶိူင်ႈပုၵ်ႉၸေႃႇၼမ်ႉမၼ်းဢၼ်ဝႃႈမႃးယဝ်ႉ မိူဝ်ႈၵႆႈၼၼ်ႉဢေႃႈ။