၃၄
ၵူၼ်းလဵင်ႉထိင်းသူဝ်းတင်းသူဝ်း
၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၂ လုၵ်ႈၵူၼ်းဢိူၺ်း။ မႂ်းႁဵတ်းပရေႃးၽႅတ်ႈယူႇၽၢႆႇၼိုင်ႈတင်း ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းမဵဝ်းဢိသရေႇလလႄႈ ႁေႃးလၢတ်ႈတီႈၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉလႄႈဝႃႈ၊-ၸဝ်ႈထႃႇဝရႃႉၽြႃးမီးဢမိင်ႉၸမ်း ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းမဵဝ်းဢိသရေႇလ ဢၼ်လဵင်ႉလူတူဝ်ၸဝ်ႈၵဝ်ႇၵူၺ်းၼၼ်ႉမီးဢႃႉမင်ႇၵလႃႇဢေႃႈ။ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉ ဢမ်ႇလႆႈလဵင်ႉသူဝ်းထိင်း သူဝ်းႁိုဝ်။
၃ သူဢွၼ်ၵၼ်ၵိၼ်ၵွၼ်ႈၶႆၵွၼ်ႈမၼ်းသူဝ်းလႄႈဢွၼ်ၵၼ်ၼုင်ႈမႆၶူၼ်သူဝ်းဢေႃႈ။ သူဝ်းဢၼ်ပီးလီမၼ်းလီတင်းလၢႆၵေႃႈသူဢွၼ်ၵၼ်ဢဝ်တၢႆဢေႃႈ။
၄ ၵူၺ်းၵႃႈသူဢမ်ႇလဵင်ႉသူဝ်းလူသူဝ်းလူင်ပေႇ။သူဢမ်ႇဢွၼ်ၵၼ်ၸွႆႈထႅမ်မႃႉၸႃႉ သူဝ်းဢၼ်ႁႅင်းလဵၵ်ႉႁႅင်းၵေႇ။ဢမ်ႇဢွၼ်ၵၼ်ဢဝ်ယႃႈယႃ ယႃသူဝ်းဢၼ်မီးတၢင်းၶႆႈတၢင်းပဵၼ်ၼၼ်ႉ။ဢမ်ႇဢွၼ်ၵၼ်မတ်ႉၵွပ်ႈမတ်ႉၶဵၼ်းသူဝ်းဢၼ်ႁၵ်းဢၼ်ၵႅင်ႉၼၼ်ႉ။ဢမ်ႇဢွၼ်ၵၼ်ၸွမ်းတီႉၸွမ်းဢဝ် သူဝ်းဢၼ်ပိူၼ်ႈႁေႃႈပႅတ်ႈၸိူဝ်းၼၼ်ႉ မႃး။
၅ ဢမ်ႇဢွၼ်ၵၼ်ႁႃဢဝ်သူဝ်းဢၼ်ႁၢႆၵႂႃႇၼၼ်ႉလႄႈ ဢွၼ်ၵၼ်ႁဵတ်းပေႉႁဵတ်းၼႅင်ႇသေလႄႈ ၸီႇယၢင်ႇၶဝ်ႁၢဝ်ႈၵျၢမ်းၼႃႇလူင်လၢင်ယဝ်ႉ။ၶဝ်လႆႈၶၢမ်ႇတၢင်းဢၼ်ဢဝ်မၢၵ်ႇမိူဝ်ၵႂႃႇ ၵွပ်ႈပိူဝ်ႈဢၼ်ဢမ်ႇမီးၵေႃႉဢၼ်ဢၼ်လဵင်ႉသူဝ်းထိင်းသူဝ်းၼၼ်ႉလႄႈ ၶဝ်လႆႈပဵၼ်တီႈဢၼ်တူဝ်ထိူၼ်ႇႁၢႆႉတင်းလၢႆ ၶူပ်းၵိၼ်ၼႂ်းမိူဝ်ႈဢၼ်ၶဝ်လႆႈၶၢမ်ႇ တၢင်းဢၼ်မၢၵ်ႇမိူဝ်ပႅတ်ႈၼၼ်ႉဢေႃႈ။
၆ သူဝ်းၵဝ်ၸိူဝ်းဢၼ်လႆႈလႄႇၵႂႃႇလႄႇမႃးယူႇၵႃႈၼိူဝ်လွႆၵႃႈမီးဢိၵ်ႇတင်းၵုင်းၵႃႈမီးလႄႈ သူဝ်းၵဝ်ၸိူဝ်းၼၼ်ႉ လႆႈၶၢမ်ႇတၢင်းဢၼ်မၢၵ်ႇမိူဝ်ပႅတ်ႈၵႃႈၼိူဝ်လိၼ်တင်းၼႃႈယူႇလႄႈၽူႈ လႂ်သေၵေႃႉသေၵူၼ်းဢမ်ႇဢွၼ်ၵၼ်ၸွမ်းသွၵ်ႈၸွမ်းႁႃ ဝႃႈၼင်ႇၼႆယဝ်ႉဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၇ ပိူဝ်ႈၼႆလႄႈသူၸိူဝ်းဢၼ်လဵင်ႉသူဝ်းထိင်းသူဝ်းၶဝ်ဢိူၺ်း။ဢွၼ်ၵၼ်ထွမ်ႇငိၼ်းဢမိင်ႉထႃႇဝရႃႉၽြႃးတႃႉ။
၈ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ ၵွပ်ႈပိူဝ်ႈဢၼ်သူဝ်းၵဝ်ၸိူဝ်းၼၼ်ႉပဵၼ်တီႈဢၼ်ႁိမ်ဢဝ်ႁူင်ႇဢဝ် တီႈဢၼ်တူဝ်ထိူၼ်ႇႁၢႆႉတင်းသဵင်ႈတင်းလူင် ၶူပ်းၵိၼ်ၵွပ်ႈပိူဝ်ႈဢၼ် ဢမ်ႇမီးၵေႃႉဢၼ်လဵင်ႉသူဝ်းထိင်းသူဝ်းၼၼ်ႉလႄႈ
၉ ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၶဝ်ၼၼ်ႉ ဢမ်ႇၸွမ်းသွၵ်ႈၸွမ်းႁႃသူဝ်းၵဝ်ၸိူဝ်းၼၼ်ႉလႄႈ ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၸိူဝ်းၼၼ်ႉ ဢမ်ႇလဵင်ႉဢမ်ႇထိင်းသူဝ်းၵဝ်၊ လဵင်ႉလူတူဝ်ၸဝ်ႈၵဝ်ႇၵူၺ်းၼၼ်ႉလႄႈ သူၸိူဝ်းဢၼ်လဵင်ႉသူဝ်းထိင်းသူဝ်းၶဝ်ဢိူၺ်း။ဢွၼ်ၵၼ် ထွမ်ႇငိၼ်းဢဝ်ဢမိင်ႉထႃႇဝရႃႉၽြႃးတႃႉ။
၁၀ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-တူၺ်းလူ။ၵဝ်ယူႇၽၢႆႇၼိုင်ႈတင်းၶဝ်ၸိူဝ်းဢၼ် လဵင်ႉသူဝ်းထိင်းသူဝ်းၸိူဝ်းၼၼ်ႉဢေႃႈ။ၵဝ်တၵ်းယွၼ်းဢဝ်သူဝ်းၵဝ်တင်းလၢႆတီႈမိုဝ်းၶဝ်လႄႈ ႁႂ်ႈၶဝ်ဢမ်ႇလႆႈလဵင်ႉသူဝ်းထိင်းသူဝ်းဢေႃႈ။ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၸိူဝ်းၼၼ်ႉ ၵမ်းလိုၼ်းဢမ်ႇလႆႈဢွၼ်ၵၼ်လဵင်ႉလူတူဝ်ၸဝ်ႈၵဝ်ႇ။ၵဝ်တၵ်းၼုၵ်ႈဢဝ်သူဝ်းၵဝ်တင်းလၢႆသေ ၵႃႈတီႈသူပ်းၶဝ်ႁႂ်ႈဢမ်ႇလႆႈပဵၼ်တီႈဢၼ်ၶဝ်ၵိၼ်ၶဝ်ၶူပ်း။
၁၁ ၸဝ်ႈထႃႇဝရႃႉၽြႃးမီးဢမိင်ႉၸမ်း ၵဝ်ဢၼ်ဝႃႈၵဝ်ၼႆႉတၵ်းၸွမ်းသူဝ်းၵဝ်ၸိူဝ်းၼၼ်ႉလႄႈ သွၵ်ႈဢဝ်ႁႃဢဝ် ၶဝ်ဢေႃႈ။
၁၂ ၸိူဝ်ႉၼင်ႇဢၼ်ၵေႃႉဢၼ်လဵင်ႉသူဝ်းထိင်းသူဝ်းၼၼ်ႉၸွမ်းႁႃဢဝ်သူဝ်း မၼ်းတင်းလၢႆၼႂ်းမိူဝ်ႉဝၼ်းဢၼ်မၼ်း ႁွတ်ႈၽႅဝ်ၵႃႈၼႂ်းသူဝ်းမၼ်းဢၼ်မီးတၢင်းမၢၵ်ႇမိူဝ်ၵႂႃႇၼၼ်ႉ၊ၵဝ်ၵေႃႈတၵ်းလႆႈႁႃဢဝ်သူဝ်းၵဝ်တင်းလၢႆဢေႃႈ။ၵဝ်ၼုၵ်ႈဢဝ်ဢွၵ်ႇသေၵႃႈၼႂ်းတီႈဢၼ်ၶဝ်လႆႈမီး တၢင်းဢၼ်မၢၵ်ႇမိူဝ်ၵႂႃႇၵူႈတီႈၵူႈလႅၼ် ၼႂ်းမိူဝ်ႉဝၼ်းဢၼ်ၾႃႉမိုတ်လႄႈ လပ်းသိင်ႇ ၼၼ်ႉမႃးဢေႃႈ။
၁၃ ၵဝ်တၵ်းႁွင်ႉဢဝ်ၶဝ်ဢွၵ်ႇသေၵႃႈၼႂ်းမဵဝ်းၵူၼ်းတင်းလၢႆလႄႈၼုၵ်ႈဢဝ်ၶဝ်ဢွၵ်ႇသေ ၵႃႈၼႂ်းၵူႈသိုင်ႇၵူႈမိူင်းမႃးၸူႉၵၼ်တုမ်ၵၼ်သေယဝ်ႉ ဢဝ်ၶဝ်ၵႂႃႇသူင်ႇ ၵႃႈတီႈမိူင်းဢၼ်ၶဝ်ယူႇၵဝ်ႇၵဝ်ႇၼၼ်ႉဢေႃႈ။ၵဝ်တၵ်းလဵင်ႉလူၶဝ်ၸႃႉၸဵမ် ၵႃႈၼိူဝ်လွႆဢိသရေႇလတင်းလၢႆၵႃႈတီႈႁိမ်းၼမ်ႉႁွင်ႊၼမ်ႉၵႄး ဢိၵ်ႇတင်းၵႃႈၼႂ်းတီႈဢၼ်ၵူၼ်းယူႇၵူၼ်းသဝ်း ၵႃႈမီးၼၼ်ႉဢေႃႈ။
၁၄ ၵဝ်တၵ်းလဵင်ႉလူၶဝ် ၵႃႈၼႂ်းတီႈဢၼ်သူယၢမ်ႈၵိၼ်ယူႇဢၼ်လီၼၼ်ႉလႄႈ ၶွၵ်ႈၶဝ်တင်းလၢႆမီးၵႃႈၼိူဝ်လွႆဢိသရသေႇလဢၼ်သုင်တင်းလၢႆဢေႃႈ။ၶဝ်တၵ်းလႆႈၼွၼ်းၵႃႈၼႂ်းၶွၵ်ႈဢၼ်လီဢၼ်ငၢမ်းလႄႈ ၵိၼ်ယူႇၵႃႈၼႂ်းတီႈဢၼ်ယၢမ်ႈၵိၼ်ယူႇ ဢၼ်လိူင်ႇမီးၼမ်ႉ ၵႃႈၼိူဝ်လွႆဢိသရေႇလတင်းလၢႆဢေႃႈ။
၁၅ ၵဝ်တၵ်းလဵင်ႉလူသူဝ်းၵဝ်လႄႈပၼ်တီႈဢၼ်ၶဝ်ၼွၼ်းဢေႃႈ။ ၵဝ်တၵ်းသွၵ်ႈတၵ်းႁႃသူဝ်းဢၼ်ႁၢႆၵႂႃႇၼၼ်ႉလႄႈ တၵ်းၸွမ်းတီႉၸွမ်းဢဝ်သူဝ်းဢၼ်ပိူၼ်ႈႁေႃႈပႅတ်ႈၼၼ်ႉ မႃးဢေႃႈ။
၁၆ ၵဝ်တၵ်းမတ်ႉၵွပ်ႈမတ်ႉၶဵၼ်းသူဝ်းဢၼ်ႁၵ်းဢၼ်ၵႅင်ႉၼၼ်ႉလႄႈ တၵ်းၸွႆႈထႅမ်မႃႉၸႃႉသူဝ်းဢၼ်ႁႅင်းလဵၵ်ႉႁႅင်းၵေႇၼၼ်ႉဢေႃႈ။ၵဝ်တၵ်းဢဝ်သူဝ်းဢၼ်ပီးလီမၼ်းလီမီးဢဵၼ်မီးႁႅင်းၼၼ်ႉတၢႆလႄႈ တၵ်းလဵင်ႉလူၶဝ်ၸွမ်းၼင်ႇတြႃးဢေႃႈ၊ ဝႃႈၼင်ႇၼႆၸဝ်ႈထႃႇဝ ရႃႉၽြႃးမီးဢမိင်ႉဢေႃႈ။
၁၇ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၽုင်သူဝ်းၵဝ်ၼႆႉဢိူၺ်း။ၵဝ်တၵ်းၸၵ်းၽႄၸီႇယၢင်ႇၵႄႈဝူင်ႈၵၢင်သူဝ်းတင်းလၢႆ ဢိၵ်ႇတင်းၵႄႈဝူင်ႈၵၢင်သူဝ်းပေႃႈတင်းလၢႆ တင်းပႄႉပေႃႈတင်းလၢႆဢေႃႈ။
၁၈ သူထၢင်ႇ လွင်ႈဢၼ်သူၵိၼ်ၵႃႈၼႂ်းတီႈဢၼ်ယၢမ်ႈၵိၼ်ယူႇဢၼ်လီဢၼ်ငၢမ်းၼၼ်ႉ ၵူၺ်းဢမ်ႇၵႃးသူဢဝ်တိၼ်ယဵပ်ႇယမ်ႈယိူဝ်ႈယႃႈဢၼ်ၵိုတ်းဢၼ်ၵျၢၼ်ႇၼၼ်ႉပဵၼ်လွင်ႈဢၼ်လဵၵ်ႉဢၼ်ဢွၼ်ႇႁိုဝ်။သူထၢင်ႇလွင်ႈဢၼ် သူၵိၼ်ၼမ်ႉဢၼ်လိုၵ်ႉလီလမ်ႇလီၵူၺ်းဢမ်ႇၵႃး သူဢဝ်တင်းတိၼ်ႁႂ်ႈၼမ်ႉဢၼ်ၵိုတ်းဢၼ်ၵျၢၼ်ႇ ဢၼ်ၶုၼ်ႇဢူၼ်ၼၼ်ႉပဵၼ်လွင်ႈဢၼ် လဵၵ်ႉဢၼ်ဢွၼ်ႇႁိုဝ်။
၁၉ သူဝ်းၵဝ်တင်းလၢႆလႆႈဢွၼ်ၵၼ်ၵိၼ်ယိူဝ်ႈယႃႈဢၼ်သူယဵပ်ႇယမ်ႈၼၼ်ႉလႄႈ ၶဝ်လႆႈဢွၼ်ၵၼ်ၵိၼ်ၼမ်ႉဢၼ်သူဢဝ်တိၼ်ႁႂ်ႈၶုၼ်ႇႁႂ်ႈ ဢူၼ်ၼၼ်ႉဢေႃႈ။
၂၀ ပိူဝ်ႈဢၼ်ပဵၼ်ၼင်ႇၼႆလႄႈၸဝ်ႈထႃႇဝရႃႉၽြႃး မီးဢမိင်ႉတီႈၶဝ်ၼၼ်ႉလႄႈဝႃႈၸမ်း၊-ၵဝ်ဢၼ်ဝႃႈၵဝ်ၼႆႉတၵ်းၸၵ်းၽႄၸီႇယၢင်ႇ ၵႄႈဝူင်ႈၵၢင်သူဝ်း ဢၼ်ပီးလီမၼ်းလီတင်းသူဝ်းဢၼ်ယွမ် ဢၼ်ႁဵဝ်ႇၸိူဝ်းၼၼ်ႉဢေႃႈ။
၂၁ ၵွပ်ႈပိူဝ်ႈဢၼ်သူဢဝ်ပဵမ်ႉဢိၵ်ႇတင်း ႁူဝ်မႃႇတွၵ်ႈဢီးလႄႈ ဢဝ်ၶဝ်လႅမ်ပတ်ႉတေႃးသူဝ်း ဢၼ်ႁႅင်းလဵၵ်ႉႁႅင်းၵေႇၼၼ်ႉထၼ်ႈပေႃးႁႂ်ႈၶဝ်မၢၵ်ႇမိူဝ်ၵႂႃႇၵူႈတီႈၵူႈလႅၼ်ၼၼ်ႉလႄႈ ၵဝ်တၵ်း ၵႄႇသႄႇၼုၵ်ႈဢဝ်ၽုင်သူဝ်းၵဝ်လႄႈၶဝ်ၼၼ်ႉၵမ်းလိုၼ်းႁိမ်ဢဝ်ႁူင်ႇဢဝ်။
၂၂ ၵဝ်တၵ်းၸၵ်းၽႄၸီႇယၢင်ႇၵႄႈဝူင်ႈၵၢင်သူဝ်းတင်းလၢႆ ဢိၵ်ႇတင်းသူဝ်းတင်းလၢႆ ဢေႃႈ။
၂၃ ၵဝ်တၵ်းၶၢၼ်းၵေႃႉဢၼ်လဵင်ႉသူဝ်းထိင်းသူဝ်းၵေႃႉၼိုင်ႈဢၼ်ဝႃႈၶႃႈၵဝ်တႃႇဝိတ်ႉ ဝႆႉၵႃႈၼိူဝ်ၶဝ်လႄႈမၼ်းၼၼ်ႉတၵ်းလဵင်ႉလူၶဝ်ဢေႃႈ။ မၼ်းၼၼ်ႉတၵ်းလဵင်ႉလူၶဝ်လႄႈ လႆႈႁဵတ်းၵေႃႉဢၼ်လဵင်ႉသူဝ်းထိင်း သူဝ်းတီႈၶဝ်ဢေႃႈ။
၂၄ ၵဝ်ထႃႇဝရႃႉၽြႃးတၵ်းပဵၼ် ၽြႃးပဵၼ်ၸဝ်ႈၶဝ်လႄႈ ၶႃႈၵဝ်တႃႇဝိတ်ႉၵေႃႈတၵ်းလႆႈပဵၼ်ၶုၼ်ၶဝ်ဢေႃႈ။ၵဝ်ထႃႇဝရႃႉၽြႃးလၢတ်ႈဝႆႉယဝ်ႉ။
၂၅ ၵဝ်တၵ်းႁဵတ်းပတိၺိၼ်ႇ တၢင်းဢၼ်ၼိမ်ဢၼ်လီလူၺ်ႈၵၼ်တင်းၶဝ်လႄႈႁႂ်ႈတူဝ်ထိူၼ်ႇႁၢႆႉထၢတ်ႇယဵၼ်သေၵႃႈၼႂ်းမိူင်းၸဝ်ႈဢေႃႈ။
ၶဝ်တၵ်းလႆႈဢွၼ်ၵၼ်ယူႇၼိမ်ၼိမ်လီလီ ၵႃႈၼႂ်းထိူၼ်ႇၼႂ်းၶိူဝ်းလႄႈၼွၼ်းလပ်းၼွၼ်းလီၵႃႈၼႂ်းပႃႇမႆႉပႃႇတွၵ်ႇဢေႃႈ။
၂၆ ၵဝ်ပၼ်တၢင်းလီတီႈၶဝ်ဢိၵ်ႇတင်း တီႈၵႃႈတီႈဢၼ်မီးလဵပ်ႈႁွပ်ႈလွႆၵဝ်ၼၼ်ႉလႄႈ ႁႂ်ႈႁႃႇၽူၼ်တူၵ်းၼႂ်းမိူဝ်ႉဝၼ်းဢၼ်ၶိင်ႇမၼ်းထုၵ်ႇၼၼ်ႉသေလႄႈ ႁႃႇၽူၼ်ႇ တၢင်းလီတၵ်းလႆႈတူၵ်းဢေႃႈ။
၂၇ တူၼ်ႈမႆႉထိူၼ်ႇမႆႉၶိူဝ်းတၵ်းလႆႈမၢၵ်ႇမၢၵ်ႇမၼ်းလႄႈ လိၼ်ၵေႃႈတၵ်းပၼ်ႁူင်းဢေႃႈ။ၶဝ်တၵ်းလႆႈဢွၼ်ၵၼ်ယူႇလုင်ႉလီလွတ်ႈလီၵႃႈၼႂ်းမိူင်းၶဝ်ဢေႃႈ။မိူဝ်ႈဢၼ်ၵဝ်တႅပ်းၸိူၵ်ႈၵၢၼ်းဢၼ်ၶဝ်ႁၢပ်ႇၼၼ်ႉလႄႈ ၵႄႇသႄႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းၶဝ်ၸိူဝ်းဢၼ် ႁဵတ်းပေႉႁဵတ်းၼႅင်ႇၸႂ်ႉၵိၼ်ၶဝ်ၼၼ်ႉၸိုင်ၶဝ်တၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ။
၂၈ ၵမ်းလိုၼ်းၵူၼ်းတၢင်ႇၸိူဝ်ႉတၢင်ႇၶိူဝ်းဢမ်ႇလႆႈႁိမ်ဢဝ်ၶဝ်။တူဝ်ထိူၼ်ႇႁၢႆႉၵႃႈၼိူဝ်လိၼ်ၼၼ်ႉဢမ်ႇလႆႈၶူပ်းလႆႈၵိၼ်ၶဝ်။ၶဝ်တၵ်းလႆႈယူႇလုင်ႉလီလွတ်ႈလီလႄႈ ၽူႈ လႂ်ဢမ်ႇလႆႈႁႂ်ႈၶဝ်ၵူဝ်ၶဝ် ႁႄလႃးလႃး။
၂၉ ၵဝ်တၵ်းလုမ်းလႃးပႃႇမႆႉဢၼ်မီးသရေႇၼၼ်ႉပုၼ်ႈၶဝ်ဢေႃႈ။ၵမ်းလိုၼ်းၶဝ်ဢမ်ႇလႆႈသုမ်းလႆႈၸွမ်းလူၺ်ႈၵၼ်တင်း ဢၼ်တၢင်းၵိၼ်တၢင်းၶူပ်းၵႃႈပဵၼ်ၼၼ်ႉၵႃႈၼႂ်းမိူင်းလႄႈ ၶဝ်ဢမ်ႇလႆႈၶၢမ်ႇတၢင်း ဢၼ်ၵူၼ်းတၢင်ႇၸိူဝ်ႉတၢင်ႇမဵဝ်းသေႉသွမ်း။
၃၀ ၶဝ်တၵ်းလႆႈႁူႉလွင်ႈဢၼ် ၵဝ်ထႃႇဝရႃႉၽြႃးၽြႃးပဵၼ်ၸဝ်ႈၶဝ်မီးယူႇလူၺ်ႈၵၼ်တင်းၶဝ် ဢိၵ်ႇတင်းလွင်ႈဢၼ်ၶဝ်ဢၼ်ဝႃႈမဵဝ်းဢိသရေႇလ ၼၼ်ႉပဵၼ်ၵူၼ်းၵဝ်ၼၼ်ႉဢေႃႈ၊ ဝႃႈၼင်ႇၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။
၃၁ သူဢၼ်ပဵၼ်သူဝ်းၵဝ်၊ သူဝ်းဢၼ်ၵိၼ်ယူႇတီႈဢၼ်ယၢမ်ႈၵိၼ်ယူႇၼၼ်ႉၸိူဝ်းၼႆႉဢိူၺ်း။သူပဵၼ်ၵူၼ်းၵဝ်ဢေႃႈ။ၵဝ်ၵေႃႈပဵၼ်ၽြႃးပဵၼ်ၸဝ်ႈသူဢေႃႈ၊ဝႃႈၼင်ႇၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။