၃၆
ပျႃႇတိၵ်ႉလွင်ႈလွႆဢိသရေႇလ
၁ လၢႆးသမ်ႉ လုၵ်ႈၵူၼ်းဢိူၺ်း။ ႁဵတ်းပရေႃးၽႅတ်ႈသေလႄႈလၢတ်ႈတီႈလွႆဢိသရေႇလ တင်းလၢႆလႄႈဝႃႈ၊-လွႆဢိသရေႇလၶဝ်ဢိူၺ်း။ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃးတႃႉ။
၂ ၸဝ်ႈထႃႇဝရႃႉၽြႃးမီးဢမိင်ႉၸမ်းၵွပ်ႈပိူဝ်ႈဢၼ်ရၢၼ်ႇသူႇတင်းလၢႆ ဢွၼ်ၵၼ်ယူႇၽၢႆႇၼိုင်ႈတင်းသူသေလႄႈလၢတ်ႈလႄႈဝႃႈ၊- ဢေႇႁေႉ။လွႆထႃႇဝရႃႉၸိူဝ်းၼၼ်ႉ ႁွတ်ႈထိုင်ၵႃႈၼႂ်းမိုဝ်းႁဝ်းယဝ်ႉ၊ဝႃႈၼင်ႇၼႆၼၼ်ႉလႄႈ မႂ်းႁဵတ်းပရေႃးၽႅတ်ႈသေလႄႈ လၢတ်ႈလႄႈဝႃႈ၊-
၃ ၸဝ်ႈထႃႇဝရႃႉၽြႃးမီးဢမိင်ႉၸမ်းၵွပ်ႈပိူဝ်ႈဢၼ်ၶဝ်ႁႂ်ႈသူလူႉလႅဝ်လႄႈ ဢိုၼ်ၵိၼ်သူၵူႈၽၢႆႇၵူႈပႃႈႁႂ်ႈထၼ်ႈပေႃး ပဵၼ်တီႈဢၼ်ၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ယင်းၵိုတ်းယင်းၵျၢၼ်ႇယူႇၸိူဝ်းၼ ၼ်ႉသိမ်းဢဝ်ဢိၵ်ႇတင်းၵွပ်ႈပိူဝ်ႈဢၼ်သူလႆႈႁွတ်ႈထိုင်တီႈသူပ်း ၶဝ်ၸိူဝ်းဢၼ်ၶႃႉၸိုဝ်ၶၢႆသဵင်ၼၼ်ႉတင်း တီႈဢၼ်ၵူၼ်းတင်းလၢႆသေႉသွမ်းၼၼ်ႉလႄႈ လွႆဢိသရေႇလၶဝ်ဢိူၺ်း။
၄ ဢွၼ်ၵၼ်ထွမ်ႇငိၼ်းဢမိင်ႉၸဝ်ႈထႃႇဝရႃႉၽြႃးတႃႉ။ၸဝ်ႈထႃႇဝရႃႉၽြႃးမီးဢမိင်ႉတီႈလွႆသုင်၊လွႆဢွၼ်ႇ၊ တီႈၼမ်ႉႁွင်ႊၼမ်ႉၵႄးတီႈၶူင်ႈတီႈႁူၺ်ႈ၊တီႈဢၼ်ပၢင်ႇဢၼ်ၵဵင်ႈ၊တီႈဝဵင်းဢၼ်သိတ်ႇၵူၼ်းယဵၼ်ႈၵူၼ်းဢၼ်ပဵၼ် ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယင်းၵိုတ်းယင်းၵျၢၼ်ႇ ဢၼ်ယူႇၵႃႈတီႈႁိမ်းႁွမ်းလဵပ်ႈႁွပ်ႈၸိူဝ်းၼၼ်ႉ ႁိမ်ဢဝ်သိမ်းဢဝ်၊တီႈဢၼ်ၶဝ် သေႉသွမ်းၸိူဝ်းၼၼ်ႉလႄႈဝႃႈၸမ်း၊-
၅ ၵဝ်ပႃးၽၢႆႇတၢင်းဢၼ်ၵဝ်ဢမ်ႇယုမ်ႇမႂ်းၼၼ်ႉသေလႄႈ လၢတ်ႈဝႆႉယူႇၽၢႆႇၼိုင်ႈတင်း ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉဢိၵ်ႇတင်းၵူၼ်းမဵဝ်း ဢေႇတုမ်ႇ ဢၼ်မီးၸႂ်ဢၼ်ၸူမ်းသိူဝ်းၼႃႇလူင်လၢင်သေလႄႈ ၸီႇယၢင်ႇႁႂ်ႈမိူင်းၵဝ်ပဵၼ်ပုၼ်ႈဢၼ်ၶဝ်တၵ်းပိူင်ႇဢိၵ်ႇတင်း ၸႂ်ဢၼ်ဝႆႉတၢင်းၽိတ်းႁႂ်ႈလႆႈဢဝ်မိုဝ်းၵဝ်ဝႆႉပုၼ်ႈဢၼ်တၵ်းႁိမ်ဢဝ်ႁူင်ႇဢဝ်ၵႃႈမီးၼၼ်ႉ ဢမၢၼ်ႇ ၶၢၼ်ပဵၼ်ယဝ်ႉ။
၆ ပိူဝ်ႈဢၼ်ပဵၼ်ၼင်ႇၼႆလႄႈမႂ်းဢဝ်လွင်ႈမိူင်းဢိသရေႇလသေလႄႈ ႁဵတ်းပရေႃးၽႅတ်ႈလႄႈလၢတ်ႈဝႆႉတီႈလွႆသုင်လွႆဢွၼ်ႇ၊ တီႈၼမ်ႉႁွင်ႊၼမ်ႉၵႄး၊တီႈၶူင်ႈတီႈႁူၺ်ႈၸိူဝ်းၼၼ်ႉလႄႈဝႃႈ၊-ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵဝ်ပႃးတၢင်းဢၼ်ၵဝ်ဢမ်ႇယုမ်ႇမႂ်းၼၼ်ႉဢိၵ်ႇတင်း တေႃးသႃႉတၢင်းၸႂ်မႆႈၶႆႈၸႃႉၵဝ်သေလႄႈ လၢတ်ႈဝႆႉၵွပ်ႈပိူဝ်ႈဢၼ်သူလႆႈၶၢမ်ႇတၢင်းဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ သေႉသွမ်း ၼၼ်ႉယဝ်ႉ။
၇ ပိူဝ်ႈၼႆလႄႈၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵဝ်ယုၵ်ႉမိုဝ်းၵဝ်ၵိၼ်ႇဝႃႈလႄႈဝႃႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇၵႃႈတီႈလဵပ်ႈႁွပ်ႈသူၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်သရေႇၶဝ်လူႉ ဢမၢၼ်ႇ ၶၢၼ်ပဵၼ်ဢေႃႈ၊ဝႃႈၼင်ႇၼႆဝႆႉယဝ်ႉ။
၈ လွႆဢိသရေႇလဢိူၺ်း။ သူၸမ်းတၵ်းလႆႈဢွၼ်ၵၼ်တႅၵ်ႇၵိင်ႇတႅၵ်ႇၶႃႊလႄႈ မၢၵ်ႇမၢၵ်ႇပုၼ်ႈၵူၼ်းၵဝ်ၵူၼ်းမဵဝ်း ဢိသရေႇလ တင်းလၢႆဢေႃႈ။ၶိင်ႇမိူဝ်ႈဢၼ်ၶဝ်ၶိုၼ်းမႃးၼၼ်ႉ ၸမ်ယဝ်ႉ။
၉ တူၺ်းလူ။ၵဝ်ယူႇၽၢႆႇသူလႄႈတၵ်းၶိုၼ်းမႃးၸူးတီႈသူသေလႄႈ သူတၵ်းလႆႈၶၢမ်ႇတၢင်းဢၼ်ႁဵတ်းႁႆႊႁဵတ်းၼႃး သႂ်ႇလႄႈ ဝၢၼ်ႇၸိူဝ်ႉဝၢၼ်ႇၽၼ်းသႂ်ႇဢေႃႈ။
၁၀ ၵဝ်တၵ်းႁႂ်ႈၵူၼ်းတင်းလၢႆဢၼ်ဝႃႈၵူၼ်းမဵဝ်းဢိသရေႇလ တင်းသဵင်ႈတင်းလူင်ၵႃႈမီးၼၼ်ႉ ယႂ်ႇၽႄၼမ်ၵိုၼ်းမႃးၵႃႈၼိူဝ်သူလႄႈ ဝဵင်းတင်းလၢႆတၵ်းမီးၽူႈမီးၵူၼ်း၊ တီႈဢၼ်လူႉလႅဝ်တင်းလၢႆတၵ်းလႆႈၶၢမ်ႇတၢင်းဢၼ်မႄးၵုမ်းမႄးႁဵတ်းဢေႃႈ။
၁၁ ၵဝ်တၵ်းႁႂ်ႈၵူၼ်းဢိၵ်ႇတင်း တရိၵ်ႈသၢၼ်ႇၼမ်ၵိုၼ်းၼႃႇၵႃႈၼိူဝ်သူလႄႈၶဝ်ၼၼ်ႉ တၵ်းဢွၼ်ၵၼ် ယႂ်ႇၽႄႈတူဝ်းတွၼ်းမႃးလႄႈၵိူတ်ႇလဵင်ႉလုၵ်ႈလဵင်ႉလၢင်းဢေႃႈ။ၵဝ်တၵ်းႁႂ်ႈသူမီးၽူႈမီးၵူၼ်း မိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ၼၼ်ႉလႄႈ ႁဵတ်းၵျေးၸူးဢၼ် ယႂ်ႇလိူဝ်တွၼ်းၼႃႇသေၵျေးၸူးဢၼ်ႁဵတ်းမိူဝ်ႈၵွၼ်ႇဢွၼ်ၼႆႉၼၼ်ႉဢေႃႈ။သူတၵ်း လႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ။
၁၂ ၵဝ်တၵ်းႁဵတ်းႁႂ်ႈၵူၼ်းတင်းလၢႆဢၼ်ဝႃႈၵူၼ်းၵဝ်ၵူၼ်းမဵဝ်း ဢိသရေႇလ တင်းလၢႆၼၼ်ႉၵႂႃႇမႃးၵႃႈၼိူဝ်သူဢေႃႈ။ၶဝ်ၼၼ်ႉတၵ်းသိမ်းဢဝ်မႂ်းလႄႈ မႂ်းလႆႈပဵၼ်ဢမူၺ်ႇၶဝ်လႄႈ ၵမ်းလိုၼ်းမႂ်းတၵ်းဢမ်ႇလႆႈႁႂ်ႈၶဝ်သုမ်းလုၵ်ႈ သုမ်းလၢင်း။
၁၃ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵွပ်ႈပိူဝ်ႈဢၼ်ပိူၼ်ႈလၢတ်ႈတီႈမႂ်းလႄႈဝႃႈမိူင်းဢိူၺ်း။မႂ်းၼႆႉၸၢင်ႊၶူပ်းၵိၼ်ၵူၼ်းတင်းလၢႆလႄႈ ၸၢင်ႊႁိမ်ဢဝ်ယႃႉပႅတ်ႈၵူၼ်းမဵဝ်းတင်းလၢႆဢေႃႈ၊ဝႃႈၼင်ႇၼႆၼၼ်ႉ လႄႈ
၁၄ ၵမ်းလိုၼ်း မႂ်းတၵ်းဢမ်ႇလႆႈၶူပ်းလႆႈၵိၼ်ၵူၼ်းတင်းလၢႆ တၵ်းဢမ်ႇလႆႈႁိမ်ဢဝ်ယႃႉပႅတ်ႈၵူၼ်းမဵဝ်းမႂ်းတင်လၢႆ ဝႃႈၼင်ႇၼႆၸဝ်ႈထႃႇဝရႃႉၽြႃးမီးဢမိင်ႉ ဢေႃႈ။
၁၅ ၵမ်းလိုၼ်းၵဝ်တၵ်းဢမ်ႇႁႂ်ႈမႂ်းလႆႈငိၼ်းၵႂၢမ်းဢၼ်ၵူၼ်းၵူႈၸိူဝ်ႉၵူႈမဵဝ်းသေႉသွမ်းၼၼ်ႉ။ၵမ်းလိုၼ်းမႂ်းတၵ်းဢမ်ႇလႆႈၶၢမ်ႇ တၢင်းဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၢင်ႇဢပျႅတ်ႈ။ၵမ်းလိုၼ်းမႂ်းတၵ်းဢမ်ႇလႆႈႁဵတ်းတၢင်းဢၼ် ႁႂ်ႈၵူၼ်းမဵဝ်းမႂ်းတင်းလၢႆၶီႇလိုတ်းလႄႈလူမ်ႉ၊ ၸဝ်ႈထႃႇဝရႃႉၽြႃးမီးဢမိင်ႉဝႆႉယဝ်ႉ၊ဝႃႈၼင်ႇၼႆဢေႃႈ။
၁၆ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၁၇ လုၵ်ႈၵူၼ်းဢိူၺ်း။မိူဝ်ႈဢၼ်ၵူၼ်းမဵဝ်းဢိသရေႇလ တင်းလၢႆယူႇၵႃႈၼႂ်းမိူင်းၶဝ်ယူႇ ၼၼ်ႉၸိုင် ၶဝ်ဢွၼ်ၵၼ်ႁႂ်ႈမိူင်းၼၼ်ႉၵူဝ်ႈၵိူၵ်ႇလူၺ်ႈသဵၼ်ႈတၢင်းဢၼ်ၶဝ်ၸွမ်းဢိၵ်ႇတင်း တၢင်းၵမ်တၢင်းၵျၢင်ႉၶဝ်ဢေႃႈ။သဵၼ်ႈတၢင်းဢၼ်ၶဝ်ၸွမ်းၼၼ်ႉပဵၼ်ၸိူဝ်ႉၼင်ႇဢၼ်ဝူၺ်ႇဢၼ်ႁင်ႈမေႈယိင်း ဢၼ်ႁွတ်ႈထိုင် ဢူႉတူႉၼၼ်ႉၵႃႈတီႈၽၢႆႇၼႃႈၵဝ်ဢေႃႈ။
၁၈ ပိူဝ်ႈၼႆလႄႈၵဝ်ဢဝ်တေႃးသႃႉတၢင်းၸႂ်မႆႈၶႂ်ႈၸႃႉၵဝ် ထွၵ်ႇ သႂ်ႇၵႃႈၼိူဝ်ၶဝ် ၵွပ်ႈပိူဝ်ႈလိူတ်ႈဢၼ်ၶဝ်ထွၵ်ႇပႅတ်ႈ ၵႃႈတီႈမိူင်းၼၼ်ႉဢိၵ်ႇတင်း ၵွပ်ႈပိူဝ်ႈဢၼ်ၶဝ်ႁႂ်ႈၵူဝ်ႈၵိူၵ်ႇလူၺ်ႈရုၵ်ႉ ထူႉၼၼ်ႉယဝ်ႉ။
၁၉ ၵဝ်ဢဝ်ၶဝ်ၸၢတ်ႇပိုၼ်ပႅတ်ႈၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆလႄႈ ႁႂ်ႈၶဝ်ႁွတ်ႈထိုင်ၵႃႈၼႂ်းၵူႈသိုင်ႇၵူႈမိူင်းယဝ်ႉ။ၵဝ်ၸီႇယၢင်ႇၶဝ်ၸွမ်းၵႃႈၼင်ႇသဵၼ်ႈတၢင်းၶဝ်ဢိၵ်ႇတင်းတၢင်းၵမ်တၢင်းၵျၢင်ႉၶဝ်ၼၼ်ႉယဝ်ႉ။
၂၀ ၼႂ်းဝႃႈၼၼ်သေၵေႃႈမိူဝ်ႈဢၼ်ၶဝ်ႁွတ်ႈထိုင် ၵႃႈၼႂ်းၵူၼ်းတၢင်ႇဝၢၼ်ႈတၢင်ႇမိူင်းၸိူဝ်းၼၼ်ႉတီႈဢၼ်ၶဝ်ၵႂႃႇၼၼ်ႉၸိုင် ၶဝ်ၶျႃးၼႃႇမႃႉၸိုဝ်သဵင်ၵဝ်တူၵ်းတီႈတႅမ်ႇ ၵွပ်ႈပိူဝ်ႈဢၼ်ပိူၼ်ႈဢဝ်လွင်ႈၶဝ်သေလႄႈလၢတ်ႈလႄႈဝႃႈ၊-ၶဝ်ၼႆႉပဵၼ်ၵူၼ်းထႃႇဝရႃႉၽြႃးဢေႃႈ။ ၶဝ်လႆႈဢွၼ်ၵၼ်ဢွၵ်ႇသေၵႃႈၼႂ်းမိူင်း မၼ်းၸဝ်ႈမႃးယဝ်ႉ၊ဝႃႈၼင်ႇၼႆၼၼ်ႉဢေႃႈ။
၂၁ ၵူၺ်းၵႃႈၵဝ်သေလၢႆၼႃႇမႃႉၸိုဝ်သဵင်မျၢတ်ႈၵဝ် ဢၼ်ၵူၼ်းမဵဝ်းဢိသရေႇလ တင်းလၢႆၶျႃးတူၵ်းတီႈတႅမ်ႇၵႃႈၼႂ်းၵူၼ်း ၵူႈၸိူဝ်ႉၵူႈမဵဝ်းတီႈဢၼ်ၶဝ်ႁွတ်ႈထိုင်ၼၼ်ႉဢေႃႈ။
၂၂ ပိူဝ်ႈၼႆလႄႈမႂ်းလၢတ်ႈတီႈၵူၼ်းမဵဝ်းဢိသရေႇလ တင်းလၢႆလႄႈဝႃႈ၊-ၸဝ်ႈထႃႇဝရႃႉၽြႃးမီးဢမိင်ႉၸမ်း၊-မဵဝ်းဢိသရေႇလဢိူၺ်း။ၵဝ်ထွၵ်ႈလူၺ်ႈသူလႄႈႁဵတ်းလွင်ႈတၢင်းၼႆႉဢမ်ႇၸႂ်ႈ။ ၵဝ်ထွၵ်ႈလူၺ်ႈၼႃႇမႃႉၸိုဝ်သဵင်မျၢတ်ႈၵဝ် ဢၼ်သူၶျႃးတူၵ်းတီႈတႅမ်ႇၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း တီႈဢၼ်သူႁွတ်ႈထိုင်ၼၼ်ႉၵူၺ်းလႄႈ ႁဵတ်းဢေႃႈ။
၂၃ ၵဝ်တၵ်းယွင်ႈယေႃးမႁႃႇၼႃႇမႃႉၸိုဝ်သဵင်ၵဝ်ဢၼ်သူၶျႃးတူၵ်းတီႈတႅမ်ႇ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆဢၼ်ဝႃႈ ၵႃႈၼႂ်းၶိုင်ႈၵၢင်ၶဝ်ၼၼ်ႉဢေႃႈ။မိူဝ်ႈဢၼ်ၵဝ်ႁွတ်ႈထိုင်တၢင်းဢၼ်ယွင်ႈယေႃးၵွပ်ႈပိူဝ်ႈသူ သိုဝ်ႈၼႃႈတႂ်ႈတႃၶဝ်ၼၼ်ႉၸိုင်ၶဝ်တၵ်းလႆႈႁူႉလွင်ႈဢၼ်ဝုႈ ၵဝ်ပဵၼ်ထႃႇဝရႃႉၽြႃးဢေႃႈ ဝႃႈၼင်ႇၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။
၂၄ လွင်ႈမၼ်းၸမ်းၵဝ်တၵ်းႁွင်ႉဢဝ်သူ ဢွၵ်ႇသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းလႄႈ ၼုၵ်ႈဢဝ်သူဢွၵ်ႇသေၵႃႈၼႂ်းၵူႈသိုင်ႇၵူႈမိူင်း မႃးၸူႉၵၼ်တုမ်ၵၼ်လႄႈ ဢဝ်သူသူင်ႇ ႁွတ်ႈၵႃႈၼႂ်းမိူင်းဢၼ်သူယူႇၵဝ်ႇၵဝ်ႇၼၼ်ႉဢေႃႈ။
၂၅ ၵဝ်တၵ်းဢဝ်ၼမ်ႉဢၼ်မူတ်းသႂ် ၽႅတ်း သႂ်ႇသူလႄႈ သူတၵ်းလႆႈမူတ်းသႂ်ဢေႃႈ။ ၵဝ်တၵ်းႁႂ်ႈသူၵၢင်းလွတ်ႈတၢင်းဢၼ်ဝူၺ်ႇဢၼ်ႁင်ႈ ၶႆးတင်သူၵူႈၸိူဝ်ႉၵူႈပိူင် ဢိၵ်ႇတင်းရုၵ်ႉထူႉသူၵႃႈမီးၼၼ်ႉဢေႃႈ။
၂၆ ၵဝ်တၵ်းပၼ်ႁူဝ်ၸႂ်ဢၼ်မႂ်ႇတီႈသူလႄႈဢဝ်သၽေႃးဢၼ်မႂ်းသႂၢင်း သႂ်ႇပၼ်ၵႃႈၼႂ်းသူဢေႃႈ။ၵဝ်တၵ်းၼုၵ်ႈဢဝ်ႁူဝ်ၸႂ်မၢၵ်ႇႁိၼ်ဢွၵ်ႇသေ ၵႃႈၼႂ်းတူဝ်ၶၼ်ႇထႃႇသူလႄႈ ပၼ်ႁူဝ်ၸႂ်ၼိူဝ်ႉတီႈသူဢေႃႈ။
၂၇ ၵဝ်တၵ်းဢဝ်ဝိၺိၺ်ႇၵဝ်သႂၢင်း သႂ်ႇပၼ်ၵႃႈၼႂ်းသူလႄႈ ႁဵတ်းႁႂ်ႈသူဢွၼ်ၵၼ်ၸွမ်းသဵၼ်ႈတၢင်းထုင်းၾိင်ႈၽြႃးၵဝ်လႄႈ သူတၵ်းပႂ်ႉၵမ်ပႂ်ႉၸွမ်း လွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉ လႄႈႁဵတ်းၸွမ်းဢေႃႈ။
၂၈ သူတၵ်းလႆႈဢွၼ်ၵၼ်ယူႇၵႃႈၼႂ်း မိူင်းဢၼ်ၵဝ်ပၼ်တီႈပူႇသူမွၼ်ႇသူၼၼ်ႉလႄႈပဵၼ်ၵူၼ်းၵဝ်ဢေႃႈ။ၵဝ်ၵေႃႈတၵ်းပဵၼ်ၽြႃးပဵၼ်ၸဝ်ႈ သူဢေႃႈ။
၂၉ ၵဝ်တၵ်းႁႂ်ႈသူၵၢင်းလွတ်ႈတၢင်းဢၼ်ဝူၺ်ႇဢၼ်ႁင်ႈၶႆးတင်သူၵႃႈမီးဢေႃႈ။ၵဝ်တၵ်းသင်ႇလၢတ်ႈၵႂႃႇတီႈၶဝ်ႈပိူၵ်ႇၶဝ်ႈသၢၼ်လႄႈႁႂ်ႈ ယႂ်ႇၽႄႈတူဝ်းတွၼ်းမႃးသေလႄႈ တၵ်းဢမ်ႇႁႂ်ႈၽေးတၢင်းဢၼ် ၶဝ်ႈၵႃႈမၢၵ်ႇပႅင်းႁွတ်ႈထိုင်ၵႃႈၼိူဝ်သူ။
၃၀ ၵဝ်တၵ်းႁႂ်ႈမၢၵ်ႇမႆႉမၢၵ်ႇတွၵ်ႇဢိၵ်ႇတင်း မၢၵ်ႇလိၼ်ႁူင်းလိၼ်လိူင်ႇၼမ်ၼႃႇႁႂ်ႈသူ ဢမ်ႇလႆႈၶၢမ်ႇတၢင်းဢၼ်ၵူၼ်းတၢင်ႇၸိူဝ်ႉတၢင်ႇမဵဝ်း သေႉသွမ်းလူၺ်ႈလွင်ႈတၢင်းဢၼ်တွင်ႉမႆႈ သႆႈလိူတ်ႇၼၼ်ႉဢေႃႈ။
၃၁ မိူဝ်ႈၼၼ်ႉသူတၵ်းဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း သဵၼ်ႈတၢင်းဢၼ်ႁၢႆႉယုတ်ႈသူဢိၵ်ႇတင်း တၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းယူႇၼၼ်ႉလႄႈ တူဝ်သူတၵ်းဢွၼ်ၵၼ်လီႁင်ႈတူဝ်သူၵွပ်ႈပိူဝ်ႈဢပျႅတ်ႈတူႉၸရိူၵ်ႈသူ ဢိၵ်ႇတင်းလွင်ႈတၢင်းဢၼ်လီႁင်ႈဢဵတ်ႇသဵတ်ႇသူ ၸိူဝ်းၼၼ်ႉဢေႃႈ။
၃၂ သူဢွၼ်ၵၼ်ႁူႉမၢတ်ႈဝႆႉ လွင်ႈဢၼ်ၵဝ်ဢမ်ႇထွၵ်ႈလူၺ်ႈသူသေလႄႈႁဵတ်းလွင်ႈတၢင်းၼႆႉၼၼ်ႉတႃႉ။မဵဝ်းဢိသရေႇလဢိူၺ်း။ဢွၼ်ၵၼ်ဢူၵ်းဢၢႆလႄႈ ၵႂင်ၸႂ်ယုင်ႈၸႂ်ယူႇ ၵွပ်ႈပိူဝ်ႈသဵၼ်ႈတၢင်းဢၼ်သူၸွမ်းၸိူဝ်းၼၼ်ႉတႃႉ ဝႃႈၼင်ႇၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။
၃၃ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၼႂ်းမိူဝ်ႉဝၼ်းဢၼ်ၵဝ်ႁႂ်ႈသူ လွတ်ႈသေဢပျႅတ်ႈတူႉၸရိူၵ်ႈသူၵႃႈမီးလႄႈပဵၼ်ဢၼ်မူတ်းသႂ်ၼၼ်ႉၸိုင် ၵဝ်တၵ်းႁႂ်ႈဝဵင်းသူတင်းလၢႆမီးၽူႈမီးၵူၼ်းလႄႈ ၵႃႈတီႈဢၼ်လူႉဢၼ်လႅဝ်ၸိူဝ်းၼၼ်ႉ တၵ်းလႆႈၶၢမ်ႇ တၢင်းဢၼ်မႄးၵုမ်းမႄး ႁဵတ်းဢေႃႈ။
၃၄ ၼႂ်းလိၼ်ဢၼ်ပဵၼ်တီႈဢၼ်သိတ်ႇဢၼ်ယဵၼ်သိုဝ်ႈၼႃႈတႂ်ႈတႃ ၶဝ်ၸိူဝ်းဢၼ်တႆႇတၢင်းပႆတၢင်းၵႂႃႇၸိူဝ်းၼၼ်ႉ သမ်ႉတၵ်းလႆႈၶၢမ်ႇတၢင်းဢၼ် ႁဵတ်းႁႆႊႁဵတ်းၼႃး သႂ်ႇဢေႃႈ။
၃၅ မိူဝ်ႈၼၼ်ႉၵူၼ်းတင်းလၢႆတၵ်းဢွၼ်ၵၼ်လၢတ်ႈလႄႈဝႃႈ၊-မိူင်းဢၼ်ပဵၼ်တီႈဢၼ်သိတ်ႇဢၼ်ယဵၼ်ၵႂႃႇၼၼ်ႉ ပဵၼ်ၸိူဝ်ႉၼင်ႇသူၼ်ဢူးယဵၼ်ဢေႇတႅၼ်ႇၼၼ်ႉလႄႈ ဝဵင်းဢၼ်ပဵၼ်ဢၼ်လူႉဢၼ်လႅဝ်၊ ဢၼ်သိတ်ႇဢၼ်ယဵၼ်၊ဢၼ်ၵိူၼ်ႇဢၼ်ပင်းၸိူဝ်းၼႆႉၵေႃႈ ဢွၼ်ၵၼ်ပဵၼ်ဢၼ်မၼ်ႈၶိူင်ႇဝႆႉလႄႈတဵမ်ဝႆႉတင်းၽူႈတင်းၵူၼ်းယဝ်ႉ၊ ဝႃႈၼင်ႇၼႆ ဢေႃႈ။
၃၆ မိူဝ်ႈၼၼ်ႉၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ယင်းၵိုတ်းယင်းၵျၢၼ်ႇယူႇၵႃႈတီႈႁိမ်းႁွမ်းလဵပ်ႈႁွပ်ႈသူၸိူဝ်းၼၼ်ႉ တၵ်းလႆႈႁူႉလွင်ႈဢၼ်ၵဝ်ထႃႇဝရႃႉၽြႃးမႄးၵုမ်းမႄးႁဵတ်း တီႈဢၼ်ၵိူၼ်ႇပင်းလူႉလႅဝ်တင်းလၢႆဢိၵ်ႇတင်းလွင်ႈဢၼ်ၽုၵ်ႇသွမ်ႈ ၵႃႈတီႈလိၼ်ဢၼ်ပဵၼ်တီႈဢၼ်သိတ်ႇဢၼ်ယဵၼ်ၼၼ်ႉဢေႃႈ။ ၵဝ်ထႃႇဝရႃႉၽြႃးမီးဢမိင်ႉဝႆႉယဝ်ႉ။ၵဝ်တၵ်းႁဵတ်းၸွမ်းဢေႃႈ။
၃၇ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းလႆႈၶၢမ်ႇတၢင်းဢၼ်ၵူၼ်းမဵဝ်း ဢိသရေႇလ တင်းလၢႆတွင်းပၢၼ်ႇႁႂ်ႈၵဝ်ႁဵတ်းလွင်ႈတၢင်းၼႆႉပုၼ်ႈၶဝ်ဢေႃႈ။ ၵဝ်တၵ်းႁႂ်ႈၶဝ်ယႂ်ႇၽႄႈၼမ်ၵိုၼ်းမႃးယူႇ တိၵ်းတိၵ်းလူၺ်ႈၽူႈလူၺ်ႈၵူၼ်း မိူၼ်ၸိူဝ်ႉၼင်ႇၽုင်သူဝ်းၼၼ်ႉ ဢေႃႈ။
၃၈ ဝဵင်းဢၼ်လူႉလႅဝ်ၸိူဝ်းၼၼ်ႉတၵ်းလႆႈတဵမ်ဝႆႉတင်း မုၵ်ႉၵူၼ်းၸိူဝ်းၵူၼ်းမိူၼ်ၸိူဝ်ႉၼင်ႇမူႇသူဝ်းၽုင်သူဝ်းဢၼ်မူတ်းၸၢင်ႇဢၼ်ဝႃႈ မူႇသူဝ်းၽုင်သူဝ်းဝဵင်းယေႇရုသလႅမ်ႇ ၼႂ်းၶိင်ႇမိူဝ်ႈဢၼ်ၶၢမ်ႇပွႆးထမ်ႇမႃႉၼၼ်ႉလႄႈ ၶဝ်တၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။