၂၆
ပျႃႇတိၵ်ႈလွင်ႈမိူင်းတုရု
၁ ၼႂ်းပီႊဢၼ်ထူၼ်ႈထိုင်သိပ်းဢဵတ်း ပီႊလိူၼ်ပထမဝၼ်းၼိုင်ႈၼၼ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈၸမ်း၊-
၂ လုၵ်ႈၵူၼ်းဢိူၺ်း။ ၵွပ်ႈပိူဝ်ႈဝဵင်းတုရုယူႇၽၢႆႇၼိုင်ႈတင်းဝဵင်းယေႇရုသလႅမ်ႇ လႄႈဝႃႈ၊- ဢေႇႁေႉ။မၼ်းဢၼ်ပဵၼ်ၽၵ်းတူသိုင်ႇၸိုင်ႈဝၢၼ်ႈမိူင်းတင်းလၢႆၼၼ်ႉ လူႉလႅဝ်လႄႈ မၼ်းတၵ်းႁွတ်ႈထိုင်ၵႃႈၼႂ်းမိုဝ်းၵဝ်ဢေႃႈ။ ၵွပ်ႈပိူဝ်ႈဢၼ်မၼ်းပဵၼ်ဢၼ်သိတ်ႇၵူၼ်းယဵၼ်ၵူၼ်းၵႂႃႇလႄႈ ၵဝ်တၵ်းမီး တၢင်းဢၼ်ၼမ်ၵိုၼ်းမႃးဢေႃႈ၊ ဝႃႈၼင်ႇၼႆလႄႈ၊
၃ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ဝဵင်းတုရုဢိူၺ်း။ၵဝ်ယူႇၽၢႆႇၼိုင်ႈတင်းမႂ်းဢေႃႈ။ၵဝ်တၵ်းႁႂ်ႈၵူၼ်းတၢင်ႇၸိူဝ်ႉတၢင်ႇမဵဝ်းၼမ်ၼႃႇ ဢွၼ်ၵၼ်လုၵ်ႉၶီႇၶိုၼ်ႈၸူးမႂ်းမိူၼ်ၸိူဝ်ႉၼင်ႇဢၼ်ၼမ်ႉသမ်ႇမုၵ်ႉတြႃႇ ႁႂ်ႈလႅင်းၼမ်ႉ ပိူပ်ႇၼမ်ႉမၼ်းလုၵ်ႉၶိုၼ်ႈၼၼ်ႉဢေႃႈ။
၄ ၶဝ်ၼၼ်ႉတၵ်းဢွၼ်ၵၼ်ယႃႉလမ်းဝဵင်းတုရု ပႅတ်ႈလႄႈၵိူၼ်ႇလၢင်းၸီႇမၼ်းတင်းလၢႆတူၵ်းပႅတ်ႈဢေႃႈ။ၵဝ်တၵ်းၶုတ်ႉၵွၵ်းဢဝ်မုၼ်ႈလိၼ်မၼ်းပႅတ်ႈလႄႈႁႂ်ႈမၼ်းပဵၼ်ၸိူဝ်ႉၼင်ႇမၢၵ်ႇႁိၼ်ဢၼ်ၵဵင်ႈဢၼ်လိူမ်ႈဝႆႉၼၼ်ႉဢေႃႈ။
၅ မၼ်းတၵ်းလႆႈပဵၼ် တီႈဢၼ်တၢၵ်ႇၼႅင်ႈတၢၵ်ႇၶႄယူႇၵႃႈၼႂ်းပၢင်ႇလၢႆႇဢေႃႈ။ၵဝ်မီးဢမိင်ႉဝႆႉယဝ်ႉဝႃႈၼင်ႇၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။မၼ်းတၵ်းလႆႈပဵၼ်တီႈဢၼ်ၵူၼ်းၵူႈၸိူဝ်ႉၵူႈမဵဝ်းႁိမ်ဢဝ်ႁူင်ႇဢဝ် ဢေႃႈ။
၆ လုၵ်ႈယိင်းမၼ်းဢၼ်မီးၵႃႈတီႈၼွၵ်ႈတီႈပၢင်ႇတင်းလၢႆဢၼ်တၵ်းလႆႈ တၢႆလူၺ်ႈလၢပ်ႇလူၺ်ႈလႅဝ်းလႄႈၶဝ်တၵ်းလႆႈႁူႉလွင်ႈဢၼ်ၵဝ်ပဵၼ် ထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။
၇ လၢႆးသမ်ႉၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းဢဝ်ၼေႇပုၶတ်ႉၼေႇၸႃႇ ၶုၼ်ႁေႃၶမ်းပႃႇပုလုၼ်ႇဢၼ်ဝႃႈ ၶုၼ်ႁေႃၶမ်းၼိူဝ်ၶုၼ်ႁေႃၶမ်းတင်းလၢႆဢိၵ်ႇလူၺ်ႈၵၼ်တင်းမႃႉမၼ်း လႂ်၊လရထေႃးမၼ်း လႂ်၊ ႁူဝ်ႁၢၼ်ၵူၼ်းသိုၵ်းၶီႇမႃႉမၼ်း လႂ်၊မုၵ်ႉၵူၼ်းၸိူဝ်းၵူၼ်းမၼ်း လႂ်၊ ၵူၼ်းၼမ်ၼႃႇ လႂ်လုၵ်ႉသေၵႃႈတီႈၼႃႈတၢင်း ႁွင်ႇမႃးၸူးၵႃႈတီႈဝဵင်းတုရုဢေႃႈ။
၈ မၼ်းၼၼ်ႉတၵ်းဢဝ်လုၵ်ႈယိင်းမၼ်း ဢၼ်မီးၵႃႈတီႈၼွၵ်ႈတီႈပၢင်ႇၸိူဝ်းၼၼ်ႉတၢႆလူၺ်ႈလၢပ်ႇလူၺ်ႈလႅဝ်းဢေႃႈ။မၼ်းတၵ်းႁဵတ်းတိူၵ်ႈတီႈတိုၵ်းသိုၵ်း ယူႇၽၢႆႇၼိုင်ႈတင်းမႂ်းလႄႈၵေႃႇႁဵတ်းတဵင်ႁဵတ်းတႅၼ်ႈလိၼ်ယူႇၽၢႆႇၼိုင်ႈတင်းမႂ်းသေလႄႈ ယုၵ်ႉဢဝ်ၶိူင်ႈႁႄႉလၢၵ်ႈၼၢၵ်ႈႁႄႉ ၵင်ႈယူႇၽၢႆႇၼိုင်ႈတင်းမႂ်းဢေႃႈ။
၉ မၼ်းတၵ်းဢဝ်တုမ်သၢၵ်ႇတွင်ႈတင်းလၢႆႁွႆႈဝႆႉယူႇၽၢႆႇၼိုင်ႈတင်းလမ်းဝဵင်းမႂ်းလႄႈ ဢဝ်လၢပ်ႇဢဝ်လႅဝ်းၵိူၼ်ႇယႃႉတိူၵ်ႈတီႈတိုၵ်း သိုၵ်းမႂ်းတင်းလၢႆပႅတ်ႈယဝ်ႉ။
၁၀ ၵွပ်ႈပိူဝ်ႈဢၼ်မႃႉမၼ်းၼမ်လႄႈၽုၼ်ႇမုၵ်ႉတၵ်းႁူမ်ႇသုမ်ႇမႂ်းဢေႃႈ။မိူဝ်ႈဢၼ်မၼ်းၶဝ်ႈၵႃႈၼႂ်းၽၵ်းတူလမ်းဝဵင်းမႂ်း မိူၼ်ၸိူဝ်ႉၼင်ႇဢၼ်ၵူၼ်းၸၢင်ႊၶဝ်ႈၵႃႈၼႂ်းဝဵင်း ၸွမ်းႁူးပွင်ႇႁူးလူင်ႉလမ်းဝဵင်းၼၼ်ႉၸိုင် လမ်းဝဵင်းမႂ်းတၵ်းသၼ်ႇဝႆၵွပ်ႈပိူဝ်ႈသဵင်ႁူဝ်ႁၢၼ်ၵူၼ်းသိုၵ်းၶီမႃႉတင်းလၢႆ ဢိၵ်ႇတင်းသဵင် လေသဵင်လႅင်သဵင်လေႃႉရထႃးၸိူဝ်းၼၼ်ႉဢေႃႈ။
၁၁ မၼ်းတၵ်းႁႂ်ႈၵိပ်ႇမႃႉမၼ်းတင်းလၢႆ ယဵပ်ႇၶၢမ်ႈသဵၼ်ႈတၢင်းမႂ်းၵႃႈမီးလႄႈဢဝ်လၢပ်ႇဢဝ်လႅဝ်းၽၼ်းၵူၼ်းမႂ်းတင်းလၢႆလႄႈသဝ်တီႈၵူဝ်းၵႂၢႆႇဢၼ်မႂ်းသွၼ်ႈပိုင်ႈ ၸိူဝ်းၼၼ်ႉတၵ်းလူမ်ႉတူၵ်းၵႃႈၼိူဝ်လိၼ်ဢေႃႈ။
၁၂ ၶဝ်တၵ်းဢွၼ်ၵၼ်ႁိမ်ဢဝ်ဢုၵ်ႉၸႃႇမႂ်းလႄႈ သိမ်းဢဝ်ၵုၼ်ႇသိၼ်မႂ်းတင်းလၢႆၵႂႃႇဢေႃႈ။ၶဝ်တၵ်းဢွၼ်ၵၼ်ၵိူၼ်ႇယႃႉၽႃဢုတ်ႇမႂ်းလႄႈ ယႃႉၽဵဝ်ႈႁေႃမႂ်းႁိူၼ်းမႂ်းဢၼ်သႃႇယႃႇလီငၢမ်းတင်းလၢႆပႅတ်ႈသေလႄႈ ဢဝ်မၢၵ်ႇႁိၼ်၊ၼိူဝ်ႉမႆႉ၊မုၼ်ႈလိၼ်မႂ်း ၶျႃးတူၵ်းပႅတ်ႈၵႃႈၼႂ်း ၼမ်ႉဢေႃႈ။
၁၃ ၵဝ်တၵ်းႁႂ်ႈသဵင်ၵႂၢမ်းဢၼ်မႂ်းႁဵတ်းၼၼ်ႉထၢတ်ႇယဵၼ်လႄႈ ၵမ်းလိုၼ်း ဢမ်ႇလႆႈငိၼ်းသဵင် တိင်ႇဢၼ်မႂ်းလဵတ်းၼၼ်ႉ။
၁၄ ၵဝ်တၵ်းႁႂ်ႈမႂ်းပဵၼ်မၢၵ်ႇႁိၼ်ဢၼ်ၵဵင်ႈ ဢၼ်လိူမ်ႈဝႆႉလႄႈမႂ်းတၵ်းလႆႈပဵၼ်တီႈဢၼ်တၢၵ်ႇၼႅင်ႈတၢၵ်ႇၶႄဢေႃႈ။ ၵမ်းလိုၼ်းဢမ်ႇလႆႈသမ်ႉၶိုၼ်းတႄႇၶိုၼ်းႁဵတ်းမႂ်း။ၵဝ်ထႃႇဝရႃႉၽြႃးမီးဢမိင်ႉဝႆႉယဝ်ႉ၊ဝႃႈၼင်ႇၼႆၸဝ်ႈထႃႇဝရႃႉၽြႃး မီးဢမိင်ႉဢေႃႈ။
၁၅ ၸဝ်ႈထႃႇဝရႃႉၽြႃး ဢဝ်လွင်ႈဝဵင်းတုရုသေလႄႈမီးဢမိင်ႉၸမ်း၊-ၵူၼ်းၼႂ်းၼမ်ႉတင်းလၢႆတၵ်းဢွၼ်ၵၼ်သၼ်ႇၶွၼ်းဝႆ ၵွပ်ႈပိူဝ်ႈဢၼ်မႂ်းၵိူၼ်ႇပင်းလူမ်ႉၼႂ်းမိူဝ်ႈဢၼ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်တိူဝ်ႉမၢတ်ႇၼၼ်ႉသႅၼ်ႇႁွင်ႉလႄႈ ဢမူႉတၢင်းဢၼ်ၶႃႈၽၼ်းဢဝ်တၢႆ ဢၼ် ယႂ်ႇၼႃႇပဵၼ်မႃးၵႃႈၼႂ်းၵၢင်မႂ်းၼၼ်ႉဢေႃႈ။
၁၆ ၶုၼ်သမ်ႇမုၵ်ႉတြႃႇၵႃႈမီးၼၼ်ႉ တၵ်းဢွၼ်ၵၼ်လူင်းသေၵႃႈၼိူဝ်ရႃႇ ၸႃႉပလၢင်ႇၶဝ်လႄႈ ထွတ်ႇသိူဝ်ႈယၢဝ်းၶဝ်လွၼ်ႈၶူဝ်းၼုင်ႈၶဝ် ဢၼ်တမ်ႇၵၢမ်းႁၢင်ႈၶိူင်ႈၼၼ်ႉသေလႄႈ ၼုင်ႈၶူဝ်းၼုင်ႈတၢင်းဢၼ်သၼ်ႇဝႆယူႇ၊ၼင်ႈၵႃႈၼိူဝ်လိၼ်ယူႇ၊ သၼ်ႇဝႆၵူႈၵႅပ်ႉၵူႈၸူဝ်ႈယူ လႄႈၵႂင်ၸႂ်ယုင်ႈၸႂ်ၵွပ်ႈပိူဝ်ႈမႂ်းယူႇဢေႃႈ။
၁၇ ၶဝ်တၵ်းဢွၼ်ၵၼ်ႁဵတ်း တၢင်းဢၼ်ပွင်ႉၶၢင်းပွင်ႉမိုၼ်ပုၼ်ႈမႂ်းလႄႈလၢတ်ႈတီႈမႂ်းလႄႈဝႃႈ၊- ဝဵင်းဢၼ်မီးၵႃႈတီႈႁိမ်းပၢင်လၢႆႇ၊ ဝဵင်းဢၼ်ႁူင်ႁၢင်းဢၼ်ၵူၼ်းပၢင်ႇလၢႆႇယူႇလႄႈႁႅင်း ယႂ်ႇၼႃႇတီႈပၢင်ႇလၢႆႇ၊ဢၼ်ႁႂ်ႈတၢင်းဢၼ်လီၵူဝ်လီႁႄ ၵူၼ်းမႂ်းမီးယူႇၵႃႈၼိူဝ်ၵူၼ်းပၢင်ႇလၢႆႇတင်းလၢႆၼႆႉဢိူၺ်း။မႂ်းၼႆႉလူႉလႅဝ်ၼႃႇလူင်လၢင် ယဝ်ႉလူင်ပေႇ၊ဝႃႈၼင်ႇၼႆဢေႃႈ။
၁၈ ၼႂ်းမိူဝ်ႉဝၼ်းဢၼ်မႂ်းၵိူၼ်ႇလူမ်ႉၼၼ်ႉ ၵူၼ်းၼႂ်းၼမ်ႉတင်းလၢႆတၵ်းဢွၼ်ၵၼ်သၼ်ႇၶွၼ်းဝႆလႄႈ ၵူၼ်းၼႂ်းပၢင်ႇလၢႆႇၸိူဝ်းၼၼ်ႉတၵ်းဢွၼ်ၵၼ်တူၵ်းၸႂ် ၵွပ်ႈပိူဝ်ႈဢၼ်မႂ်းလပ်ႉႁၢႆၵႂႃႇ ၼၼ်ႉဢေႃႈ။
၁၉ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-မိူဝ်ႈဢၼ်ၵဝ်ႁႂ်ႈမႂ်းပဵၼ် ဝဵင်းဢၼ်သိတ်ႇဢၼ်ယဵၼ်မိူၼ်ၸိူဝ်ႉၼင်ႇဝဵင်းဢၼ်ၵူၼ်း ဢမ်ႇယူႇဢမ်ႇသဝ်းၼၼ်ႉလႄႈ ဢဝ်ပၢင်ႇလၢႆႇမႃးၵႃႈၼိူဝ်မႂ်းလႄႈၼမ်ႉဢၼ် ယႂ်ႇဢၼ်လူင်ထူမ်ႈႁူမ်ႇမႂ်းၼၼ်ႉၸိုင် ၵဝ်တၵ်းၶျႃးမႂ်းတူၵ်း လူၺ်ႈၵၼ်တင်းၶဝ်ၸိူဝ်းဢၼ် လူင်းၵႃႈၼႂ်းႁူးလိၼ်ၶုမ်လိၼ်
၂၀ တီႈယူႇၵူၼ်းမိူဝ်ႈၵွၼ်ႇမိူဝ်ႈမိုၼ်ႉၸိူဝ်းၼၼ်ႉလႄႈႁႂ်ႈမႂ်းယူႇၵႃႈတီႈတႂ်ႈလိၼ်၊ ၵႃႈၼႂ်းတီႈဢၼ်ပဵၼ်ဢၼ်သိတ်ႇဢၼ်ယဵၼ်ယူႇ ၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉလူၺ်ႈၵၼ်တင်း ၶဝ်ၸိူဝ်းဢၼ်လူင်းၵႃႈၼႂ်းႁူးလိၼ်ၶုမ်လိၼ်ၼၼ်ႉ ႁႂ်ႈမႂ်းဢမ်ႇလႆႈမီးၵေႃႉဢၼ်ယူႇဢၼ်သဝ်းၵႃႈၼႂ်းမႂ်းဢေႃႈ။မိူဝ်ႈၼၼ်ႉၵဝ်တၵ်းၽုၺ်ပိုတ်ႇ မုၼ်ၽုင်းၵဝ်ၵႃႈၼႂ်းမိူင်းတီႈယူႇၶဝ်ၸိူဝ်းဢၼ်ဢသၢၵ်ႈလိပ်းၼၼ်ႉဢေႃႈ။
၂၁ မႂ်းၸမ်းၵဝ်တၵ်းႁႂ်ႈပဵၼ်တီႈဢၼ်လီၵူဝ်လီႁႄလႄႈ ၵမ်းလိုၼ်းမႂ်းဢမ်ႇလႆႈမီးလႃးလႃး။ပိၵ်ႉသမ်ႉပိူၼ်ႈႁႃမႂ်းသေၵေႃႈၵမ်းလိုၼ်းဢမ်ႇထူပ်းမႂ်းလႆႈလႃးလႃး၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။