၄
တၢင်းဢၼ်သိမ်းဢဝ်ယေႇရုသလႅမ်ႇ
၁ လၢႆးသမ်ႉပိူင်ၼိုင်ႈမၼ်းၸဝ်ႈမီးဢမိင်ႉလႄႈဝႃႈ၊-လုၵ်ႈၵူၼ်းဢိူၺ်း။မႂ်းဢဝ်ၶႅပ်းဢုတ်ႇဝႆႉၵႃႈတီႈၽၢႆႇၼႃႈမႂ်းသေယဝ်ႉ တႅမ်ႈပုင်ႇႁၢင်ႊဝဵင်းယေႇရုသလႅမ်ႇ သႂ်ႇဝႆႉၵႃႈ ၼိူဝ်မၼ်းတႃႉ။
၂ လွမ်ႉလဵပ်ႈႁွပ်ႈဝဵင်းၼၼ်ႉဝႆႉလႄႈတႄႇႁဵတ်းတပ်ႉၵႃႈၼွၵ်ႈမၼ်းသေလႄႈၵေႃႇႁဵတ်းတႅမ်လိၼ်ယူႇၽၢႆႇၼိုင်ႈတင်းမၼ်းတႃႉ။ႁၢင်ႈဝႆႉၶၢင်းဝႆႉၵူၼ်းတပ်ႉၵူၼ်းသိုၵ်းတင်းလၢႆ ယူႇၽၢႆႇၼိိုင်ႈတင်းမၼ်းလႄႈဢဝ်တုမ်သၢၵ်ႇတွင်းတင်းလၢႆ ႁွႆႈဝႆႉလဵပ်ႈႁွပ်ႈမၼ်းယူႇ ၽၢႆႇၼိုင်ႈတင်းမၼ်းတႃႉ။
၃ ၼွၵ်ႈသေၼၼ်ႉဢဝ်ၶႅပ်းလဵၵ်းလႄႈ ပူၵ်းတင်ႈႁႂ်ႈပဵၼ်တႅၼ်ႈလဵၵ်းတေးလဵၵ်းၵႃႈတီႈၵႄႈဝူင်ႈၵၢင်မႂ်းတင်းဝဵင်းသေယဝ်ႉ ဝၢႆႇၼႃႈမႂ်းတေႃႇမၼ်းလႄႈ မၼ်းတၵ်းလႆႈၶၢမ်ႇတၢင်းဢၼ်လွမ်ႉလဵပ်ႈႁွပ်ႈဝႆႉလႄႈမႂ်းတၵ်လွမ်ႉလဵပ်ႈႁွပ်ႈမၼ်းဝႆႉဢေႃႈ။ဢၼ်ၼႆႉၸမ်း တၵ်းလႆႈပဵၼ်ၼီႈမိၵ်ႈလၵ်ႉၶၼႃႇ တီႈမဵဝ်း ဢိသရေႇလဢေႃႈ။
၄ လိူဝ်သေၼၼ်ႉမႂ်းၼွၼ်းသီႇၵႅင်းၵႃႈၼိူဝ်ပဵမ်ႉၽၢႆႇသၢႆႉမႂ်းလႄႈ ဢဝ်ဢပျႅတ်ႈမဵဝ်းဢိသရေႇလဝႆႉတီႈပဵမ်ႉမႂ်းၼၼ်ႉတႃႉ။မႂ်းတၵ်းလႆႈၶၢမ်ႇဢဝ်ဢပျႅတ်ႈၶဝ်ၸွမ်းၵႃႈၼင်ႇဢၼ် ၼပ်ႉမိုဝ်ႉၼပ်ႉဝၼ်းဢၼ်မႂ်းလႆႈ ၼွၼ်းၸိူဝ်ႉၼင်ႇၼၼ်ၼၼ်ႉဢေႃႈ။
၅ လွင်ႈမၼ်းၸမ်းၵဝ်မၵ်းၶဵၼ်း ပီႊဢၼ်သဵၼ်ႈၽႃႁွမ်းလူၺ်ႈၵၼ်တင်းဢပျႅတ်ႈၶဝ်ၼၼ်ႉဝႆႉတီႈမႂ်း ၸွမ်းၵႃႈၼင်ႇဢၼ်ၼပ်ႉဢၢၼ်ႇသၢမ်ပၢၵ်ႇပၢႆၵဝ်ႈသိပ်းဝၼ်းၼၼ်ႉယဝ်ႉ။ ၼင်ၼၼ်လႄႈ မႂ်းတၵ်းလႆႈၶၢမ်ႇဢပျႅတ်ႈမဵဝ်းဢိသရေႇလ ဢေႃႈ။
၆ မိူဝ်ႈဢၼ်မိူဝ်ႉဝၼ်းၸိူဝ်းၼၼ်ႉၸေးယဝ်ႉၼၼ်ႉၸိုင် မႂ်းသမ်ႉၼွၼ်းသီႈၵႅင်းၵႃႈၼိူဝ်ပဵမ်ႉၽၢႆႇၶွႃမႂ်းလႄႈၶၢမ်ႇဢပျႅတ်ႈမဵဝ်းယုတထႅင်ႈလူးၵွၼ်ႇတႃႉ။ ၵဝ်မၵ်းၶဵၼ်းဝႆႉသီႇသိပ်းဝၼ်းတဵမ်တဵမ် ယေႈဝၼ်းပုၼ်ႈယေႈပီႊတီႈမႂ်းယဝ်ႉ။
၇ မႂ်းတၵ်းလႆႈဝူတ်ႈၶႅၼ်ဝူတ်ႈမိုဝ်းမႂ်းယဵတ်ႇယိုၼ်းလႄႈ ဝၢႆႇၼႃႈမႂ်းတေႃႇတၢင်းဢၼ်လွမ်ႉလဵပ်ႈႁွပ်ႈဝဵင်းယေႇရုသလႅမ်ႇ ဝႆႉၼၼ်ႉသေလႄႈႁဵတ်းပရေႃး ၽႅတ်ႈယူႇၽၢႆႇၼိုင်ႈတင်းဝဵင်းၼၼ်ႉဢေႃႈ။
၈ ၵဝ်တၵ်းဢဝ်ၸိူၵ်ႈမတ်ႉၽုၵ်ႇမႂ်းဝႆႉလႄႈ မႂ်းဢမ်ႇလႆႈၽိုၼ်ႉသေၽၢႆႇၼိုင်ႈၸူး ၽၢႆႇၼိုင်ႈတေႃႇထိုင်ႁွတ်ႈ မိူဝ်ႉဝၼ်းဢၼ်လႆႈႁဵတ်းတၢင်းဢၼ်လွမ်ႉလဵပ်ႈႁွပ်ႈဝႆႉထၼ်ႈ ပေႃးၸေးၼၼ်ႉဢေႃႈ။
၉ ၼွၵ်ႈသေၼၼ်ႉမႂ်းဢဝ်ၶဝ်ႈသၢၼ်ၵျုင်ႇ၊ၶဝ်ႈသၢၼ်မူႉယေႃး၊ ထူဝ်ႇ၊ထူဝ်ႇႁူဝ်ၸၢင်ႉ၊သၢၼ်ၶဝ်ႈငူၵ်း၊ သၢၼ်ၶဝ်ႈၵူႇသၢမ်ႇၼၼ်ႉ သႂ်ႇဝႆႉလူၺ်ႈၵၼ်ၵႃႈၼႂ်းမေႃႈလုၵ်ႈလဵဝ်လႄႈ ဢဝ်ႁဵတ်းၶဝ်ႈမုၼ်းတႃႉ။ မႂ်းတၵ်းလႆႈဢဝ်ၵိၼ်မိူဝ်ႉဝၼ်းသၢမ်ပၢၵ်ႇပၢႆၵဝ်ႈသိပ်းဝၼ်းတဵမ်တဵမ် ၸွမ်းၵႃႈၼင်ႇဢၼ်ၼပ်ႉမိုဝ်ႉၼပ်ႉဝၼ်း ဢၼ်မႂ်းတၵ်းလႆႈၼွၼ်းသီႈၵႅင်းၵႃႈၼိူဝ်ပဵမ်ႉ ၽၢႆႇၼိုင်ႈၼၼ်ႉဢေႃႈ။
၁၀ ၶဝ်ႈမုၼ်းဢၼ်မႂ်းတၵ်းလႆႈၵိၼ်ၼၼ်ႉၸိုင် ယေႈဝၼ်းယေႈဝၼ်းမႂ်းတၵ်းလႆႈၸင်ႈႁိဝ်ႈ ဢဝ်ၵျၢပ်ႈသၶေႇလသၢဝ်းၼိုင်ႈဢေႃႈ။
၁၁ ၼမ်ႉၵေႃႈမႂ်းတၵ်းလႆႈတူင်လႄႈ ဢဝ်ၵိၼ်ႁီႉၼႃႉႁူၵ်းပုၼ်ႈဢဝ်ပုၼ်ႈ ၼိုင်ႈဢေႃႈ။
၁၂ မႂ်းတၵ်းလႆႈၵိၼ်ၸိူဝ်ႉၼင်ၼၼ်ၵူႈပွၵ်ႈၵူႈပွၵ်ႈဢေႃႈ။ မႂ်းတၵ်းလႆႈဢဝ်ၵိၼ်မိူၼ်ၸိူဝ်ႉၼင်ႇၶဝ်ႈမုၼ်းမူႉယေႃးၼၼ်ႉလႄႈ တၵ်းလႆႈဢဝ်ၽဝ်မူၵ်းၵႃႈၼႂ်းၽႆး ဢၼ်ဢဝ်ၽၢႆႈလူင်ၵူၼ်း သႂ်ႇႁဵတ်းၼၼ်ႉၵႃႈ တီႈၽၢႆႇၼႃႈၵူၼ်းတင်းလၢႆဢေႃႈ။
၁၃ ၼင်ႇၼၼ်လႄႈၵူၼ်းမဵဝ်း ဢိသရေႇလ တင်းလၢႆတၵ်းလႆႈၵိၼ်ၶဝ်ႈမုၼ်းဢၼ်ၵူဝ်ႈၵိူၵ်ႇ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ တီႈဢၼ်ၵဝ်ႁေႃႈၶဝ်ဢွၵ်ႇၸူးၼၼ်ႉဢေႃႈ၊ဝႃႈၼင်ၼႆထႃႇဝရႃႉၽြႃးမီးဢမိင်ႉဢေႃႈ။
၁၄ ၵဝ်ၵေႃႈလၢတ်ႈလႄႈဝႃႈ၊- ၸဝ်ႈထႃႇဝရႃႉၽြႃးတီႈၶႃႈ။ႁူဝ်ၸႂ်ၶႃၸဝ်ႈတၵ်းဢမ်ႇပႆႇတွၼ်ႉႁွတ်ႈထိုင်တၢင်းဢၼ်ၵူဝ်ႈၵိူၵ်ႇတီႈၶႃႈ။ ၸႃႉၸဵမ်မိူဝ်ႈဢၼ်ဢသၢၵ်ႈၶႃႈၸဝ်ႈယင်းလဵၵ်ႉယင်းဢွၼ်ႇ တေႃႇထိုင်ႁွတ်ႈမိူဝ်ႈလဵဝ်ၼႆႉၶႃႈၸဝ်ႈဢမ်ႇပႆႇတွၼ်ႉၵိၼ်ၼိူဝ်ႉတူဝ်ဢၼ်တၢႆၵူၺ်းမၼ်း ဢိၵ်ႇတင်း တူဝ်ဢၼ်တူဝ်ႁၢႆႉၶူပ်းတၢႆၼၼ်ႉလႄႈ တူဝ်ဢၼ်လီႁင်ႈဢဵတ်ႇသဵတ်ႇၼၼ်ႉၵေႃႈဢမ်ႇပႆႇတွၼ်ႉၶဝ်ၵႃႈၼႂ်းသူပ်းၶႃႈၸဝ်ႈတီႈၶႃႈ၊ ဝႃႈ ၼင်ႇၼႆလႄႈ မၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊-
၁၅ ၵဝ်ပၼ်ၶီႈဝူဝ်း ပုၼ်ႈတၢင်တူဝ်ၽၢႆႈလူင်ၵူၼ်းၼၼ်ႉဢေႃႈ။ တၵ်းလႆႈဢဝ်ဢၼ်ၼၼ်ႉၽဝ်မူၵ်းၶဝ်ႈမုၼ်းမႂ်းဢေႃႈ၊ဝႃႈၼင်ႇၼႆဢေႃႈ။
၁၆ လၢႆးသမ်ႉမၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊-လုၵ်ႈၵူၼ်းဢိူၺ်း။ၵဝ်တၵ်းႁၵ်းၶဝ်ႈမုၼ်းတင်းဢၼ်ၵမ်ႉဢၼ်ထွၵ်ႈၼၼ်ႉၶၢတ်ႇပႅတ်ႈသေ ၵႃႈၼႂ်းဝဵင်းယေႇရုသလႅမ်ဢေႃႈ။ၶဝ်ၼၼ်ႉတၵ်းဢွၼ်ၵၼ်ၸင်ႁိဝ်ႈၶဝ်ႈမုၼ်းသေလႄႈ ၵိၼ်လူၺ်ႈၸႂ်ဢၼ်မႆႈၸႂ်ၶီၸႂ်ဢေႃႈ။
၁၇ ၼမ်ႉၵေႃႈၶဝ်တၵ်းဢွၼ်ၵၼ်တုင်းသေလႄႈ ၵိၼ် လူၺ်ႈၸႂ်ဢၼ်ယုင်ႈၸႂ်ၵႂင်ၸႂ်ထၼ်ႈပေႃးတုၵ်းႁႃဢေႁႃၶဝ်ႈမုၼ်းတင်းၼမ်ႉလႄႈ ၼင်ႇၵၼ်ၵၼ်ႁွတ်ႈထိုင်တၢင်းဢၼ်ယုင်ႈၸႂ်ၵႂင်ၸႂ် တေႃႇၵၼ်လႄႈယွမ်းၵႂႃႇႁၢႆၵႂႃႇၵွပ်ႈပိူဝ်ႈဢပျႅတ်ႈၶဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။