၂၈
ပျႃႇတိၵ်ႉလွင်ႈၶုၼ်မိူင်းတုရု
၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၂ လုၵ်ႈၵူၼ်းဢိူၺ်း။မႂ်းလၢတ်ႈတီႈၶုၼ်တုရုလႄႈဝႃႈ၊-ၸဝ်ႈထႃႇဝရႃႉၽြႃးမီးဢမိင်ႉၸမ်း ၵွပ်ႈပိူဝ်ႈဢၼ်မႂ်းမီးတၢင်းၸႂ်ဢၼ်ဢုပ်ႇဢၼ်ဢၢတ်ႇ လႄႈဝႃႈၵဝ်ပဵၼ်ၽြႃးပဵၼ်ၸဝ်ႈဢေႃႈ။
၃ ၵဝ်ၼင်ႈၵႃႈၼိူဝ်ပလၢင်ႇၽြႃးၵႃႈၼႂ်းပၢင်ႇလၢႆႇဢေႃႈ၊ ဝႃႈၼင်ႇၼႆလႄႈ ပဵၼ်ၽြႃးပဵၼ်ၸဝ်ႈဢမ်ႇၸႂ်ႈ၊ပဵၼ်ၵူၼ်းၵူၺ်းလႄႈ ထၢင်ႇမၢတ်ႈတူဝ်မႂ်းပဵၼ် ၸိူဝ်ႉၼင်ႇၽြႃးပဵၼ်ၸဝ်ႈၼၼ်ႉလႄႈ မႂ်းယိင်ႈၶႅၼ်းမီးပိင်ႇၺႃႇၼႃႇသေတၢၼ်ႇယေႇလၼၼ်ႉလူင်ပေႇ။လွင်ႈတၢင်းဢၼ်ပိူၼ်ႈသိူင်ႇမႅပ်းဝႆႉႁႂ်ႈမႂ်းဢမ်ႇလႆႈႁူႉလႆႈႁၼ်ၼၼ်ႉ ဢမ်ႇမီးသေ ၸိူဝ်ႉသေပိူင်။
၄ ၵွပ်ႈပိူဝ်ႈၺၢၼ်ႇပိင်ႇၺႃႇမႂ်းလႄႈ မႂ်းမၢၵ်ႇမီးဢုၵ်ႉၸႃႇဢေႃႈ။မႂ်းလႆႈဢဝ်ငိုၼ်းၶမ်းသိမ်းပႅင်းဝႆႉၵႃႈ ၼႂ်းၽၼ်ႇတႃႇမႂ်းယဝ်ႉ။
၅ မႂ်းဢဝ်တင်းပိင်ႇၺႃႇဢၼ်လၢၵ်ႇလၢႆးဢိၵ်ႇတင်း တၢင်းဢၼ်ၵႃႉၵုၼ်ႇၶၢႆသိၼ်မႂ်းၼၼ်ႉႁႂ်ႈၸေးၸိမ်ႇမႂ်း ယႂ်ႇမႃးလႄႈ ဢုပ်ႇဢၢတ်ႇယူႇ ၵွပ်ႈပိူဝ်ႈၸေးၸိမ်ႇမႂ်းၼၼ်ႉယဝ်ႉ။
၆ ပိူဝ်ႈဢၼ်ပဵၼ်ၼင်ႇၼႆလႄႈၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵွပ်ႈပိူဝ်ႈဢၼ်မႂ်းထၢင်ႇမၢတ်ႈတူဝ်မႂ်း ပဵၼ်ၸိူဝ်ႉၼင်ႇၽြႃးပဵၼ်ၸဝ်ႈၼၼ်ႉလႄႈ ၵဝ်တၵ်းဢဝ်ၵူၼ်းဝၢၼ်ႈၵူၼ်းမိူင်းဢၼ်လီၵူဝ်လီႁႄၸိူဝ်းၼၼ်ႉ သူင်ႇႁွတ်ႈၵႃႈတီႈမႂ်းလႄႈၶဝ်ၼၼ်ႉ
၇ တၵ်းဢွၼ်ၵၼ်ထွတ်ႇလၢပ်ႇၶဝ်လႅဝ်းၶဝ်ၽၼ်းမူၼ်ၵုင်ႇပိင်ႇၺႃႇမႂ်းလႄႈၶျႃးသရေႇ တၢင်းဢၼ်ႁၢင်ႊလီႁၢင်ႊငၢမ်းမႂ်းတူၵ်းတီႈတႅမ်ႇဢေႃႈ။
၈ ၶဝ်ၼၼ်ႉ တၵ်းဢွၼ်ၵၼ်ၶျႃးမႂ်းတူၵ်းၵႃႈၼႂ်းႁူးလိၼ်ၶုမ်လိၼ်လႄႈ မႂ်းတၵ်းလႆႈတၢႆလူၺ်ႈတၢင်းတၢႆၶဝ်ၸိူဝ်းဢၼ်လႆႈၶၢမ်ႇ တၢင်းဢၼ်ၶႃႈၽၼ်းဢဝ်တၢႆၵႃႈၼႂ်းၵၢင်ပၢင်ႇလၢႆႇၼၼ်ႉဢေႃႈ။
၉ မႂ်းတၵ်လၢတ်ႈၵႃႈတီႈၽၢႆႇၼႃႈ ၶဝ်ၸိူဝ်းဢၼ်ဢဝ်မႂ်းတၢႆၼၼ်ႉလႄႈဝႃႈၵဝ်ၼႆႉပဵၼ်ၽြႃးဢေႃႈ၊ ဝႃႈၼင်ႇၼႆဢမၢၼ်ႇၶၢၼ်ပဵၼ်ႁိုဝ်။ မႂ်းပဵၼ်ၵူၼ်းၵူၺ်းလႄႈဢမ်ႇပဵၼ်ၽြႃးၵႃႈ ၼႂ်းမိုဝ်းၶဝ်ၸိူဝ်းဢၼ်ဢဝ်မႂ်းတၢႆၼၼ်ႉ။
၁၀ မႂ်းတၵ်းလႆႈတၢႆလူၺ်ႈတၢင်းတၢႆ ၶဝ်ၸိူဝ်းဢၼ်ၵူၼ်းဢၼ်ဢမ်ႇၶၢမ်ႇမၢင်ႇၵလႃႇ တၢင်းဢၼ်ထိူဝ်ႁိမ်းၼၼ်ႉလူၺ်ႈမိုဝ်းၵူၼ်းတၢင်ႇဝၢၼ်ႈတၢင်ႇမိူင်းဢေႃႈ။ၵဝ်လၢတ်ႈဝႆႉယဝ်ႉ။ၸဝ်ႈထႃႇဝရႃႉၽြႃးမီးဢမိင်ႉဝႆႉယဝ်ႉ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၁၂ လုၵ်ႈၵူၼ်းဢိူၺ်း။ မႂ်းႁဵတ်းတၢင်းဢၼ်ပွင်ႉၶၢင်းပွင်ႉမိုၼ် ပုၼ်ႈၶုၼ်ႁေႃၶမ်းတုရုလႄႈလၢတ်ႈတီႈမၼ်းလႄႈဝႃႈ၊- ၸဝ်ႈထႃႇဝရႃႉၽြႃးမီးဢမိင်ႉၸမ်း၊-မႂ်းလႆႈဢဝ်တၼ်းသိၵ်ႈတွၵ်ႇဝႆႉတီႈဢၼ် ၸေးၸုင်ႇၼၼ်ႉယဝ်ႉ။
၁၃ မႂ်းတဵမ်ဝႆႉတင်းပိင်ႇၺႃႇလႄႈမီးတၢင်းဢၼ်ၸေးၸုင်ႇဝႆႉတင်း တၢင်းဢၼ်ႁၢင်ႊလီႁၢင်ႊငၢမ်းယဝ်ႉ။မႂ်းလႆႈယူႇၵႃႈတီႈဢေႇတိၼ်ႇသူၼ်ဢူးယဵၼ်ႇၽြႃးပဵၼ်ၸဝ်ႈၼၼ်ႉယဝ်ႉ။ ၵႃႈၼိူဝ်ၵွၵ်းႁူဝ်မႂ်းၼၼ်ႉမႂ်းတိုဝ်းသႅင်မျၢတ်ႈၵူႈၸိူဝ်ႉၵူႈမဵဝ်းဢၼ်ဝႃႈသႅင်လႅင်ႊ၊ဢုၵ်ႉသၽူႈရႃး၊ ၸိင်ႇ၊မျၢၵ်ႈရွႆး၊ၸၢႆးၶႃးယွတ်ႇ၊ၼၵႃးသွႆႇ၊ၼီႇလႃႇ၊ ပတ်ႈတမျႃး၊မျႃႉၸိူဝ်းၼၼ်ႉဢိၵ်ႇတင်းၶမ်းဢေႃႈ။တၢင်းဢၼ်ႁဵတ်းၵွင်ၶဵတ်ႇမႂ်း၊ပီႇၼႄးမႂ်းၼၼ်ႉမီးဝႆႉယူႇၵႃႈၼႂ်းမႂ်းလႄႈ မီးတၢင်းဢၼ်မႄးပွင်မႄးႁႅၼ်းဝႆႉယူႇ ၸႃႉၸဵမ် မိူဝ်ႉဝၼ်းဢၼ်မႂ်းလႆႈၶၢမ်ႇ တၢင်းဢၼ်ၽၢၼ်ႇသၢင်းႁဵတ်းပဵၼ်ၼၼ်ႉဢေႃႈ။
၁၄ မႂ်းပဵၼ်ၶေႇရုၽိမ်ႇ ဢၼ်ၵီႈၽႄသုမ်ႇႁူမ်ႇယူႇၼၼ်ႉလႄႈၵဝ်ဢဝ်မႂ်းၶျႃးတီႈယူႇဝႆႉဢေႃႈ။မႂ်းတူၵ်းတီႈတူၵ်းလႅၼ်ၵႃႈၼိူဝ်လွႆဢၼ်မူတ်းၸၢင်ႇၽြႃးပဵၼ်ၸဝ်ႈလႄႈလႆႈၵႂႃႇမႃးယူႇၵႃႈၼႂ်းမၢၵ်ႇႁိၼ်ဢၼ်ၽႆးလုၵ်ႉယူႇ ၸိူဝ်းၼၼ်ႉဢေႃႈ။
၁၅ ၸႃႉၸဵမ်မိူဝ်ႉဝၼ်းဢၼ်မႂ်းလႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ်ၼၼ်ႉ တေႃႇထိုင်ႁွတ်ႈမိူဝ်ႉဝၼ်းဢၼ်လႆႈထူပ်းလႆႈႁၼ် ဢပျႅတ်ႈၵႃႈၼႂ်းမႂ်းၼၼ်ႉလႄႈ မီးတၢင်းဢၼ်ၸေးၸုင်ႇယူႇၵႃႈၼႂ်း သဵၼ်ႈတၢင်းၵႃႈဢၼ်မႂ်းၸွမ်းၼၼ်ႉဢေႃႈ။
၁၆ ၶဝ်ႁႂ်ႈမႂ်းတဵမ်ဝႆႉတင်းဢမူႉဢႃႉထမ်ႇမႃႉ ၵွပ်ႈပိူဝ်ႈတၢင်းဢၼ်ၵႃႉၵုၼ်ႇၶၢႆသိၼ်မႂ်းၼမ်ၼႃႇၼၼ်ႉလႄႈ မႂ်းတၵ်းလႆႈႁွတ်ႈထိုင်ဢပျႅတ်ႈတၢင်းဢၼ်ၽိတ်းပိူင်ႈယဝ်ႉ။ပိူဝ်ႈဢၼ်ပဵၼ်ၼင်ႇၼႆလႄႈ ၵဝ်လႆႈႁေႃႈမႂ်းတူၵ်းပႅတ်ႈသေၵႃႈၼိူဝ်လွႆၽြႃးပဵၼ်ၸဝ်ႈ ၸိူဝ်ႉၼင်ႇၵေႃႉဢၼ်ႁၢႆႉယုတ်ႈၼၼ်ႉယဝ်ႉ။ၶေႇရုၽိမ်ႇဢၼ်သုမ်ႇႁူမ်ႇဢိူၺ်း။ၵဝ်လႆႈပႄႇၽဵဝ်ႈမႂ်းပႅတ်ႈသေ ၵႃႈၼႂ်းမၢၵ်ႇႁိၼ်ဢၼ်ၽႆးလုၵ်ႉ ၸိူဝ်းၼၼ်ႉယဝ်ႉ။
၁၇ မႂ်းမီးၸႂ်ဢၼ်ဢုပ်ႇဢၢတ်ႇယူႇၵွပ်ႈပိူဝ်ႈသရေႇ တၢင်းဢၼ်ႁၢင်ႊလီႁၢင်ႊငၢမ်းမႂ်းၼၼ်ႉလႄႈမႂ်းႁႂ်ႈပိင်ႇၺႃႇမႂ်း ၽင်ႉဢူႉၵႂႃႇၵွပ်ႈပိူဝ်ႈမုၼ်ၵုင်ႇမႂ်းဢၼ်တႆႈႁိူဝ်ႈၼၼ်ႉယဝ်ႉ။ၵဝ်လႆႈၶျႃးမႂ်းတူၵ်းတီႈတႅမ်ႇတေႃႇထိုင်ႁွတ်ႈလိၼ်ယဝ်ႉ။ ၵဝ်လႆႈဢဝ်မႂ်းၶျႃးဝႆႉတီႈၽၢႆႇၼႃႈၶုၼ်ႁေႃၶမ်းတင်းလၢႆႁႂ်ႈၶဝ်လႆႈလူတူၺ်းမႂ်းယဝ်ႉ။
၁၈ မႂ်းႁႂ်ႈ ထႃႇၼႃႉတီႈမူတ်းၸၢင်ႇမႂ်းတင်းလၢႆ ၵူဝ်ႈၵိူၵ်ႇလူၺ်ႈဢပျႅတ်ႈမႂ်းဢၼ်ၼမ်ၼႃႇ ဢိၵ်ႇတင်းတၢင်းဢၼ်ၵႃႉၵုၼ်ႇၶၢႆသိၼ်ဢႃႉထမ်ႇမႃႉၼၼ်ႉယဝ်ႉ။ပိူဝ်ႈၼႆလႄႈ ၵဝ်လႆႈႁႂ်ႈၽႆးလုၵ်ႉၵႃႈၼႂ်းၶိုင်ႈၵၢင်မႂ်းပုၼ်ႈဢၼ်တၵ်းတုတ်ႇမႂ်းယဝ်ႉ။ ၵဝ်လႆႈဢဝ်မႂ်းႁႂ်ႈပဵၼ်တဝ်ႈယူႇၵႃႈၼိူဝ်လိၼ်သိုဝ်ႈၼႃႈတႂ်ႈတႃ ၶဝ်ၸိူဝ်းဢၼ်ႁၼ်မႂ်း ၵႃႈမီးၼၼ်ႉဢေႃႈ။
၁၉ ၶဝ်ၼၼ်ႉမီးၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၵႃႈဢၼ်ႁူမႂ်းၼၼ်ႉ တၵ်းဢွၼ်ၵၼ်ၵႂင်ၸႂ်ယုင်ႈၸႂ်ၵွပ်ႈပိူဝ်ႈမႂ်းဢေႃႈ။ မႂ်းပဵၼ်တီႈဢၼ်လီၵူဝ်လီႁႄဢေႃႈ။ၵမ်းလိုၼ်းမႂ်းတၵ်းဢမ်ႇလႆႈပေႃႇမႃးလႃးလႃး၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
ပျႃႇတိၵ်ႉလွင်ႈသေႃးတုမ်ႇ
၂၀ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၂၁ လုၵ်ႈၵူၼ်းဢိူၺ်း။မႂ်းဝၢႆႇၼႃႈတေႃႇဝဵင်းၸိတုမ်ႇ သေလႄႈ ႁဵတ်းပရေႃးၽႅတ်ႈယူႇၽၢႆႇ ၼိုင်ႈတင်းမၼ်းလႄႈဝႃႈ၊-
၂၂ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ဝဵင်းၸိတုမ်ႇဢိူၺ်း။ၵဝ်ယူႇၽၢႆႇၼိုင်ႈတင်းမႂ်းလႄႈမုၼ်ၽုင်းတၼ်းၶူဝ်းၵဝ် တၵ်းထၢင်ႇသႃးယူႇၵႃႈၼႂ်းၵၢင်မႂ်းဢေႃႈ။မိူဝ်ႈဢၼ်ၵဝ်ပၼ်တၢမ်ႇဢပျႅတ်ႈၵႃႈၼႂ်းမၼ်းလႄႈ လႆႈၶၢမ်ႇတၢင်းဢၼ်ရူဝ်ႇသေႇၵူဝ်ယမ်ၵႃႈၼႂ်းမၼ်းၼၼ်ႉၸိုင်၊ၵူၼ်းတင်းလၢႆ တၵ်းလႆႈ ႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ။
၂၃ ၵဝ်တၵ်းပွႆႇၸႂ်ႉၽေးၵႃႇလႁႃႇလႅင်ႉမိူင်း ၸူးၵႃႈၼႂ်းမၼ်းဢိၵ်ႇတင်းၽေးလၢပ်ႇၽေးလႅဝ်း ၸူးၵႃႈၼႂ်းသဵၼ်ႈတၢင်းမၼ်းလႄႈ မိူဝ်ႈဢၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိူဝ်ႉမၢတ်ႇၼၼ်ႉ ဢွၼ်ၵၼ်လူမ်ႉတၢႆၵႃႈၼႂ်းၵၢင်မၼ်းလူၺ်ႈလၢပ်ႇလူၺ်ႈလႅဝ်း ၵႃႈတီႈႁိမ်းႁွမ်းလဵပ်ႈႁွပ်ႈမၼ်းၵူႈၽၢႆႇၵူႈပႃႈၼၼ်ႉၸိုင်ၶဝ်တၵ်းလႆႈႁူႉလွင်ႈ ဢၼ်ၵဝ်ပဵၼ်ၽြႃးဢေႃႈ။
၂၄ မိူဝ်ႈၼၼ်ႉၼႂ်းၶဝ်ၸိူဝ်းဢၼ်ယူႇၵႃႈတီႈႁိမ်းႁွမ်းလဵပ်ႈႁွပ်ႈမဵဝ်းဢိသရေႇလ လႄႈႁဵတ်းဢမ်ႇပေႃးၼင်ႇႁိုဝ် တီႈၶဝ်ယူႇၼၼ်ႉတၵ်းဢမ်ႇလႆႈမီးတူၼ်ႈၼၢမ်ဢၼ်ၸၢင်ႊၸွၵ်ႈ ၶႂၢၵ်ႈဢၼ်ၸၢင်ႊယႃႉယူၵ်ႉသေၸိူဝ်ႉသေပိူင်လႃးလႃး။ၶဝ်တၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၂၅ လၢႆးသမ်ႉၸဝ်ႈထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-မိူဝ်ႈဢၼ်ၵဝ်ႁွင်ႉဢဝ်ၵူၼ်းမဵဝ်းဢိသရေႇလ တင်းလၢႆဢွၵ်ႇသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း တီႈဢၼ်ၶဝ်လႆႈၶၢမ်ႇတၢင်းဢၼ်ၸၢတ်ႇပိုၼ်ၼၼ်ႉမႃးၸူႉၵၼ်တုမ်ၵၼ်လႄႈ ၵဝ်လႆႈၶၢမ်ႇ တၢင်းဢၼ်ရူဝ်ႇသေႇၵူဝ်ယမ်သိုဝ်ႈၼႃႈတႂ်ႈတႃမဵဝ်းၵူၼ်းတင်းလၢႆၵွပ်ႈပိူဝ်ႈၶဝ်ၼၼ်ႉၸိုင်ႈ ၶဝ်တၵ်းလႆႈဢွၼ်ၵၼ်ယူႇ ၵႃႈၼႂ်းမိူင်းၶဝ်ဢၼ်ၵဝ်ပၼ်တီႈၶႃႈ ၵဝ်ယႃႇၵုပ်ႉမိူဝ်ႈဢွၼ်တၢင်းၼၼ်ႉဢေႃႈ။
၂၆ ၶဝ်တၵ်းလႆႈယူႇၵႃႈၼႂ်းမိူင်းလူင်ႈလူင်ႈလွတ်ႈလွတ်ႈလႄႈ ဢွၼ်ၵၼ်ႁဵတ်းႁိူၼ်းႁဵတ်းယေး၊ ဢွၼ်ၵၼ်ၽုၵ်ႇသူၼ်ဢူးယဵၼ်ႇၸပိတ်ႉလႄႈ ယူႇလူင်ႈလူင်ႈလွတ်ႈလွတ်ႈၼႂ်းမိူဝ်ႈဢၼ်ၵဝ် ၸီႇယၢင်ႇတၢမ်ႇဢပျႅတ်ႈ တီႈၶဝ်ၵႃႈဢၼ်ယူႇၵႃႈတီႈႁိမ်းႁွမ်းလဵပ်ႈႁွပ်ႈၶဝ်လႄႈ ႁဵတ်းဢမ်ႇပေႃးၼင်ႇႁိုဝ်တီႈၶဝ်ယူႇၼၼ်ႉဢေႃႈ။ၶဝ်ၼၼ်ႉတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။