၁၇
ႁူင်ႉသွင်တူဝ်တင်းၶိူဝ်းမၢၵ်ႇၸပိတ်ႉ
၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၂ လုၵ်ႈၵူၼ်းဢိူၺ်း။မႂ်းလၢတ်ႈၵႂၢမ်းသိူင်ႇၵႂၢမ်းဢမ်လႄႈ ၶႆႊဢပုမ်ႇပၼ်တီႈမဵဝ်းဢိသရေႇ လ ယူႇလႄႈဝႃႈ၊-
၃ ထႃႇဝရႃႉၽြႃးမီးဢမိင်ႉဝႃႈႁူင်ႉၶမ်းလူင်ဢၼ်မီးပိၵ်ႇဢၼ် ယႂ်ႇဢၼ်ယၢဝ်းၼႃႇ၊ ဢၼ်တဵမ်ဝႆႉတင်း ၶူၼ်ဢၼ်ၼမ်ၼႃႇလႄႈ ဢရွင်ႇႁၢင်ႊၽၢင်မၼ်းပဵၼ်လၢႆၸိူဝ်ႉလၢႆမဵဝ်းဝႆႉၼၼ်ႉ မႃးၸူးၵႃႈတီႈ လွႆလေႇပၼုၼ်ႇလႄႈ
၄ ယိပ်းၵမ်ပၢႆတူၼ်ႈဢႃႇရိတ်ႉသေလႄႈ ယၵ်းပိတ်ႉဢဝ်ယွတ်ႈမၼ်းဢၼ်သုင်ၼႃႇသေပိူၼ်ႈ ၸိူဝ်းၼၼ်ႉလႄႈၵၢပ်ႈဢဝ်ၵႂႃႇၸူးၵႃႈတီႈမိူင်းတီႈၵေႃႉဢၼ်ၶၢႆၼၼ်ႉလႄႈ ဢဝ်ၽုၵ်ႇဝႆႉၵႃႈၼႂ်းဝဵင်း ၸဝ်ႈၵုၼ်ႇၸဝ်ႈသႅၼ်းဢေႃႈ။
၅ ၸိူဝ်ႉၽၼ်းမိူင်းၵေႃႈမၼ်းဢဝ်လႄႈ ဝၢၼ်ႇပိုၼ်ၵႃႈၼႂ်းတီႈဢၼ်ၶွၼ်ၼမ်ႉမၼ်းလိၼ်လီၼၼ်ႉလႄႈဢဝ်ၽုၵ်ႇဝႆႉၵႃႈတီႈႁိမ်းတီႈဢၼ်ၼမ်ႉလိူင်ႇၼမ်ႉၼမ်သေလႄႈ ဝႆႉမိူၼ်ၸိူဝ်ႉၼင်ႇ တူၼ်ႈမႆႉၶႆႉၼၼ်ႉဢေႃႈ။
၆ မၼ်းဢွၵ်ႇတူၼ်ႈလႄႈပဵၼ်ၶိူဝ်းမၢၵ်ႇၸပိတ်ႉ ဢၼ်တူၼ်ႈတႅမ်ႇတူၼ်ႈဢႅၵ်းယူႇသေလႄႈ တိူၼ်းၶိူဝ်းယၢဝ်းၼၼ်ႉလႄႈၵိင်ႇမၼ်းၶႃႊမၼ်းတင်းလၢႆၵူမ်ႈၵိူင်းၼူပ်ႈၸူးတီႈႁူင်ႉၶမ်းၼၼ်ႉယူႇ၊ ယင်ႇႁၢၵ်ႈၵႃႈတႂ်ႈမၼ်းၼၼ်ႉယူႇသေလႄႈ ပဵၼ်တူၼ်ႈၶိူဝ်းမၢၵ်ႇၸပိတ်ႉဢၼ်တႅၵ်ႇၵိင်ႇတႅၵ်ႇၶႃႈလႄႈ တဵမ်ဝႆႉတင်း ယွတ်ႈဢေႃႈ။
၇ မီးႁူင်ႉၶမ်းလူင်ဢၼ်မီးပိၵ်ႇဢၼ် ယႂ်ႇၼႃႇလႄႈၶူၼ်ၼႃတၼ်ၼႃႇၼၼ်ႉတူဝ်ၼိုင်ႈဢေႃႈ။တူၼ်ႈၶိူဝ်းမၢၵ်ႇၸပိတ်ႉၼၼ်ႉ ယူႇၵႃႈတီႈဢၼ်ပဵၼ်ႁၢၼ်ႉပဵၼ်ၸၼ်ႉတီႈဢၼ်ၽုၵ်ႇမၢၵ်ႇမၼ်းၼၼ်ႉ လႅမ်ႈႁၢၵ်ႈၶူတ်ႉႁၢၵ်ႈမၼ်းၸူးၵႃႈတီႈမၼ်းၼၼ်ႉလႄႈ ဢဝ်ၵိင်ႇမၼ်းၶႃႊမၼ်းသေႇ ၸူးၵႃႈတီႈမၼ်းၼၼ်ႉႁႂ်ႈမၼ်းၼၼ်ႉ လႆႈႁူတ်းၼမ်ႉပၼ်တီႈမၼ်းဢေႃႈ။
၈ လွင်ႈၼင်ႇႁိုဝ်တၵ်းႁႂ်ႈမႂ်ႊႈမၼ်းတႅၵ်ႇၵိင်ႇတႅၵ်ႇၶႃႈယူႇ၊ မၢၵ်ႇမၢၵ်ႇယူႇသေလႄႈ ပဵၼ်တူၼ်ႈၶိူဝ်းမၢၵ်ႇၸပိတ်ႉဢၼ်လီဢၼ်ငၢမ်းၸိုင်ႈ ဢဝ်မၼ်းၽုၵ်ႇဝႆႉၵႃႈၼႂ်း တီႈဢၼ်ၶွၼ်ႇၼမ်ႉလိၼ်လီ ၵႃႈတီႈႁိမ်းဢၼ်ၼမ်ႉလိူင်ႇၼမ်ႉၼမ်ၼၼ်ႉယဝ်ႉ၊ဝႃႈၼင်ႇၼႆတႃႉ။
၉ ပိူဝ်ႈဢၼ်ပဵၼ်ၼင်ႇၼႆလႄႈလၢတ်ႈလႄႈဝႃႈ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-တူၼ်ႈၼၼ်ႉတၵ်းလႆႈလီလႆႈပဵၼ်ႁိုဝ်။တၵ်းလႆႈထူၺ်ႈႁၢၵ်ႈမၼ်း ဢွၵ်ႇပႅတ်ႈလႄႈပိတ်းဢဝ်မၢၵ်ႇမၼ်းပႅတ်ႈႁႂ်ႈမၼ်းလႆႈႁဵဝ်ႇလႆႈႁႅင်ႈဢမ်ႇၸႂ်ႈႁိုဝ်။မႂ်ႊမၼ်းၶိူဝ်းမၼ်းၵႃႈဢၼ်ဢွၵ်ႇမႃးၼၼ်ႉတၵ်းလႆႈႁဵဝ်ႇၸွပ်ႈလႄႈယင်းဢမ်ႇပႃးတၼ်းၶူဝ်းဢၼ် ယႂ်ႇ ဢိၵ်ႇတင်းမူႇၵူၼ်းၽုင်ၵူၼ်းဢၼ်ၼမ်ၼႃႇ ႁႂ်ႈလႆႈထူၺ်ႈဢွၵ်ႇပႃးႁၢၵ်ႈ မၼ်းပႅတ်ႈလႄႈတၵ်းလႆႈပဵၼ်ဢေႃႈ။
၁၀ မၼ်းမီးတၢင်းဢၼ်ၽုၵ်ႇသွမ်ႈယူႇသေလႄႈ မၼ်းတၵ်းလႆႈလီလႆႈပဵၼ်ႁိုဝ်။ ယၢမ်းမိူဝ်ႈဢၼ်လူမ်းတၢင်းဢွၵ်ႇထူဝ်း သႂ်ႇမၼ်းၼၼ်ႉၸိုင် မၼ်းတၵ်းလႆႈႁဵဝ်ႇၸွပ်ႈၵႂႃႇဢမ်ႇၸႂ်ႈႁိုဝ်။မၼ်းတၵ်းႁဵဝ်ႇၸွပ်ႈၵႂႃႇၵႃႈၼႂ်းတီႈဢၼ်ပဵၼ်ႁၢၼ်ႉပဵၼ်ၸၼ်ႉတီႈဢၼ်ၽုၵ်ႇသွမ်ႈမၼ်းၼၼ်ႉဢေႃႈ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈၸမ်း၊-မႂ်းလၢတ်ႈတီႈမဵဝ်းဢၼ်ၸၢင်ႊလုၵ်ႉၽိုၼ်ႉၼၼ်ႉလႄႈဝႃႈ သူႁူႉလွင်ႈဢၼ်ၵႂၢမ်းၼႆႉၶႂ်ႈဝႃႈ ၸိူဝ်ႉၼင်ႇႁိုဝ်ၼၼ်ႉႁိုဝ်။
၁၂ မႂ်းလၢတ်ႈတီႈၶဝ်လႄႈဝႃႈၶုၼ်ႁေႃၶမ်းပႃႇပုလုၼ်ႇ ၼၼ်ႉႁွတ်ႈထိုင်ၵႃႈတီႈဝဵင်းယေႇရုသလႅမ်ႇလႄႈ သိမ်းဢဝ်ၶုၼ်ႁေႃၶမ်းမၼ်းဢိၵ်ႇတင်းမူးမၢတ်ႈၽွင်းမိူင်းတင်းလၢႆၵႂႃႇ ၵႃႈတီႈဝဵင်းပႃႇပုလုၼ်ႇ ယဝ်ႉ။
၁၃ မၼ်းဢဝ်ၵႃႈၼႂ်းၸိူဝ်ႉၸၢဝ်းၶိူဝ်းၶုၼ်ၵေႃႉၼိုင်ႈလႄႈ ႁဵတ်းပတိၺိၼ်ႇလူၺ်ႈၵၼ်တင်းမၼ်းၼၼ်ႉသေလႄႈ တိုၵ်းသႅတ်ႉၸႃႇသေယဝ်ႉ သိမ်းဢဝ်ၵူၼ်း ဝၢၼ်ႈၵူၼ်းမိူင်းဢၼ်ႁႅင်း ယႂ်ႇၼႃႇတင်းလၢႆ
၁၄ ၵႂႃႇႁႂ်ႈသိုင်ႇၸိုင်ႈဝၢၼ်ႈမိူင်း လႆႈယူတ်းလႆႈယွမ်းလႄႈၵမ်းလိုၼ်းဢမ်ႇမီးတၢင်းဢၼ်လုၵ်ႉဢၼ်တူင်ႉ ၵွပ်ႈပိူဝ်ႈ ဢၼ်ပႂ်ႉသႅတ်ႉၸႃႇၸဝ်ႈၼၼ်ႉၵူၺ်းၼၼ်ႉယဝ်ႉ။
၁၅ ၼႂ်းဝႃႈၼၼ်သေၵေႃႈ ၵေႃႉၼၼ်ႉပွႆႇၸႂ်ႉတမၢၼ်ႇမၼ်းတင်းလၢႆၵႂႃႇၵႃႈတီႈမိူင်းဢေႇၵႅပ်ႉတု ႁႂ်ႈလႆႈယွၼ်းဢဝ်မႃႉတင်းလၢႆ ဢိၵ်ႇတင်းၵူၼ်းၼမ်ၼႃႇသေလႄႈ လုၵ်ႉၽိုၼ်ႉယဝ်ႉ။ၵေႃႉဢၼ်ႁဵတ်းၸိူဝ်ႉၼင်ႇၼၼ်ၼၼ်ႉၸိုင်တၵ်းလႆႈလီလႆႈပဵၼ်ႁိုဝ်။တၵ်းလႆႈလွတ်ႈၽေးႁိုဝ်။ၵေႃႉၼၼ်ႉသႅတ်ႉၸႃႇလူႉယဝ်ႉလႄႈ မၼ်းတၵ်းလႆႈလွတ်ႈ ႁိုဝ်။
၁၆ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ ၵႃႈၼႂ်းတီႈၶုၼ်ႁေႃၶမ်းဢၼ်ၶၢၼ်းမၼ်းဝႆႉ ၵႃႈၼႂ်းဢရႃႇၶုၼ်ႁေႃၶမ်းဢၼ်မၼ်းႁဵတ်းဢမ်ႇရူဝ်ႇသေႇၵူဝ်ယမ်သႅတ်ႉၸႃႇၼၼ်ႉလႄႈ ယႃႉပတိၺိၼ်ႇမၼ်းပႅတ်ႈၼၼ်ႉယူႇၼၼ်ႉဢၼ်ဝႃႈၵႃႈတီႈမၼ်းၼၼ်ႉၵႃႈၼႂ်းဝဵင်း ပႃႇပုလုၼ် ၼၼ်ႉမၼ်းတၵ်းလႆႈတၢႆဢေႃႈ။
၁၇ ၶုၼ်ၽႃႇရေႃးဢိၵ်ႇတင်းပူဝ်ႇပႃႇၵူၼ်းသိုၵ်းမၼ်း ဢၼ်ႁႅင်း ယႂ်ႇၼႃႇတင်းမူႇၵူၼ်းၽုင်ၵူၼ်းမၼ်းဢၼ်ၼမ်ၼႃႇၸိူဝ်းၼၼ်ႉၵေႃႈ ပိၵ်ႉသမ်ႉၶဝ်ဢွၼ်ၵၼ်ၵုမ်းၵေႃႇတႅၼ်ႊလိၼ်လႄႈတႄႇႁဵတ်းတိူၵ်ႈတီႈတိုၵ်းသိုၵ်းတင်းလၢႆ ႁႂ်ႈလႆႈဢဝ်ၵူၼ်းတၢႆၼမ်ၼႃႇသေၵေႃႈတိုၵ်းသိုၵ်းပုၼ်ႈမၼ်း လႄႈဢမ်ႇပေႉႉၼႅင်ႇလႆႈ။
၁၈ လွင်ႈမၼ်းၸမ်းမၼ်းယႃႉပတိၺိၼ်ႇပႅတ်ႈလႄႈ ႁဵတ်းဢမ်ႇရူဝ်ႇသေႇၵူဝ်ယမ်သႅတ်ႉၸႃႇယဝ်ႉ။တူၺ်းလူ။ပိၵ်ႉသမ်ႉမၼ်းတူပ်းမိုဝ်းၵၼ်ယဝ်ႉသေၵေႃႈ မၼ်းႁဵတ်းလွင်ႈတၢင်းၵႃႈမီးၸိူဝ်းၼႆႉလႄႈ မၼ်းဢမ်ႇလႆႈၵၢင်းလွတ်ႈတင်းၽေး။
၁၉ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊-ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ ၵဝ်တၵ်းႁႂ်ႈဢပျႅတ်ႈဢၼ်ႁဵတ်းဢမ်ႇရူဝ်ႇသေႇၵူဝ်ယမ်သႅတ်ႉၸႃႇၵဝ်လႄႈ ယႃႉပတိၺိၼ်ႇၵဝ်ပႅတ်ႈၼၼ်ႉ တူၵ်းႁွတ်ႈၵႃႈၼိူဝ်မၼ်းဢေႃႈ။
၂၀ ၵဝ်တၵ်းဢဝ်ၼႅင်ႈၶႄၵဝ် ႁူမ်ႇသုမ်ႇမၼ်းလႄႈ ဢဝ်တူင်ႇႁဵဝ်ႉၶိုမ်းၵဝ်ထုၵ်ႇၶဵၼ်းမႅၼ်ႈမၼ်းသေယဝ်ႉ ဢဝ်မၼ်းၵႂႃႇၵႃႈတီႈဝဵင်းပႃႇပုလုၼ်ႇ လႄႈၸႅတ်ႈထၢမ်ၸီႇယၢင်ႇမၼ်းၵႃႈတီႈဝဵင်းၼၼ်ႉ ၵွပ်ႈပိူဝ်ႈဢပျႅတ်ႈဢၼ်မၼ်းၽိတ်းပိူင်ႈၼၼ်ႉဢေႃႈ။
၂၁ ၶဝ်ၸိူဝ်းဢၼ်ဢွၼ်ၵၼ်ဢွၵ်ႇပၢႆႈသေၵႃႈတီႈမၼ်းၵႃႈမီး ဢိၵ်ႇတင်းႁူဝ်ႁၢၼ်ၵူၼ်းသိုၵ်းမၼ်း ပဵၼ်တပ်ႉပဵၼ်တႃႇတင်းသဵင်ႈတင်းလူင်ၼၼ်ႉတၵ်းလႆႈလူမ်ႉတၢႆ လူၺ်ႈလၢပ်ႇလူၺ်ႈလႅဝ်းလႄႈ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ၸၢတ်ႇပိုၼ်ပႅတ်ႈ ၵႃႈၼႂ်းလူမ်းၵူႈၽၢႆႇၵူႈပႃႈဢေႃႈ။သူတၵ်းလႆႈႁူႉလွင်ႈဢၼ်ၵဝ်ထႃႇ၀ ရႃႉၽြႃးမီး ဢမိင်ႉဝႆႉၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၂ လၢႆးသမ်ႉထႃႇဝရႃႉၽြႃးမီးဢမိင်ႉၸမ်း၊-ၵဝ်တၵ်းဢဝ်ယွတ်ႈဢၼ်သုင်ၼႃႇသေပိူၼ်ႈ ၵႃႈတီႈတူၼ်ႈဢႃႇရိတ်ႉဢၼ်သုင်ၼၼ်ႉလႄႈၽုၵ်ႇသွမ်ႈဢေႃႈ။ၵဝ်တၵ်းယၵ်းဢဝ်ယွတ်ႈ ဢၼ်ၼုမ်ႇလီၵႃႈၼႂ်းပၢႆယွတ်ႈမၼ်းတင်းလၢႆၼၼ်ႉလႄႈၽုၵ်ႇသွမ်ႈဝႆႉၵႃႈၼိူဝ်လွႆဢၼ် သုင်ဢၼ်မျၢတ်ႈဢေႃႈ။
၂၃ ၵဝ်တၵ်းဢဝ်မၼ်းၽုၵ်ႇသွမ်ႈဝႆႉၵႃႈၼိူဝ်လွႆဢိသရေႇလဢၼ်သုင်ၼႃႇၼၼ်ႉသေလႄႈ မၼ်းတၵ်းတႅၵ်ႇၵိင်ႇတႅၵ်ႇၶႃႈလႄႈမၢၵ်ႇမၢၵ်ႇမၼ်းသေယဝ်ႉ ပဵၼ်တူၼ်ႈဢႃႇရိတ်ႉ ဢၼ်လီဢၼ်ငၢမ်းဢေႃႈ။မဵဝ်းၼူၵ်ႉတင်းသဵင်ႈတင်းလူင်တၵ်းဢွၼ်ၵၼ်တူၵ်းတီႈတူၵ်းလႅၼ်ၵႃႈတီႈတႂ်ႈတူၼ်ႈၼၼ်ႉလႄႈ ၶဝ်တၵ်းဢွၼ်ၵၼ်ယူႇသဝ်း ၵႃႈတီႈႁူမ်ႈၵိင်ႇ မၼ်းၶႃႊမၼ်းၸိူဝ်းၼၼ်ႉဢေႃႈ။
၂၄ တူၼ်ႈမႆႉထိူၼ်ႇၵႃႈဢၼ်မီးၼၼ်ႉ တၵ်းလႆႈႁူႉလွင်ႈဢၼ်ၵဝ်ထႃႇဝရႃႉၽြႃးဢဝ်တူၼ်ႈဢၼ်သုင်ပဵၼ်ဢၼ်တႅမ်ႇလႄႈ ယုၵ်ႉယွင်ႈတူၼ်ႈဢၼ်တႅမ်ႇ ပဵၼ်ဢၼ်သုင် ဢိၵ်ႇတင်း လွင်ႈဢၼ် ၵဝ်ဢဝ်တူၼ်ႈဢၼ်ၶဵဝ်လီတင်ႈလီပဵၼ်ဢၼ်ႁဵဝ်ႇႁႅင်ႈလႄႈ ဢဝ်တူၼ်ႈဢၼ်ႁဵဝ်ႇႁႅင်ႈပဵၼ်ဢၼ်ၶဵဝ်လီတင်ႈလီၼၼ်ႉ ဢေႃႈ။ၵဝ်ထႃႇဝရႃႉၽြႃးမီးဢမိင်ႉဝႆႉယဝ်ႉလႄႈႁဵတ်းဝႆႉယဝ်ႉဢေႃႈ။