၁၂
တၢင်းဢၼ်ပၢႆႈဢွၵ်ႇၼွၵ်ႈမိူင်း
၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈ၊-
၂ လုၵ်ႈၵူၼ်းဢိူၺ်း။မႂ်းယူႇၵႃႈၼႂ်းၵူၼ်းမဵဝ်းဢၼ်ၸၢင်ႊလုၵ်ႉၽိုၼ်ႉလႄႈ မီးတႃဢၼ်လႆႈႁၼ်သေၵေႃႈဢမ်ႇၸၢင်ႊႁၼ်။ မီးႁူဢၼ်လႆႈငိၼ်းသေၵေႃႈဢမ်ႇၸၢင်ႊငိၼ်းၼၼ်ႉဢေႃႈ။လွင်ႈမၼ်းၸမ်းၶဝ်ပဵၼ် ၵူၼ်းမဵဝ်းဢၼ်ၸၢင်ႊလုၵ်ႉၽိုၼ်ႉဢေႃႈ။
၃ ပိူဝ်ႈဢၼ်ပဵၼ်ၼင်ႇၼႆလႄႈလုၵ်ႈၵူၼ်းဢိူၺ်း။ႁႅၼ်းၶူဝ်းႁႅၼ်းလဵင်းမႂ်းႁႂ်ႈလႆႈၶၢႆႉၵႂႃႇတၢင်ႇတီႈတၢင်ႇလႅၼ်လႄႈ ၶၢႆႉၵႂႃႇသိုဝ်ႈၼႃႈတႂ်ႈတႃၶဝ်ၶိင်ႇၵၢင်ဝၼ်းတႃႉ။ၶၢႆႉတီႈယူႇတီႈသဝ်းမႂ်းၵႂႃႇ တၢင်ႇတီႈတၢင်ႇလႅၼ် သိုဝ်ႈၼႃႈတႂ်ႈတႃၶဝ်တႃႉ။ ပိၵ်ႉသမ်ႉၶဝ်ပဵၼ်မဵဝ်းဢၼ်ၸၢင်ႊလုၵ်ႉၽိုၼ်ႉသေ ၵေႃႈၶဝ်ၸၢင်ႊၶေးလႆႈသတိဢေႃႈ။
၄ တၵ်းလႆႈဢဝ်ဢုၵ်ႉၸႃႇၶူဝ်းလဵင်းမႂ်းဢွၵ်ႇသိုဝ်ႈၼႃႈတႂ်ႈတႃၶဝ်ၶိင်ႇၵၢင်ဝၼ်းမိူၼ်ၸိူဝ်ႉၼင်ႇဢုၵ်ႉၸႃႇၶူဝ်းလဵင်းဢၼ်ႁႅၼ်းဝႆႉပုၼ်ႈဢၼ်တၵ်းၶၢႆႉတီႈယူႇတီႈသဝ်းၼၼ်ႉဢေႃႈ။မႂ်းတၵ်းလႆႈဢွၵ်ႇၵႂႃႇ သိုဝ်ႈၼႃႈတႂ်ႈတႃၶဝ်ၶိင်ႇႁူဝ်ၶမ်ႈမိူၼ်ၸိူဝ်ႉၼင်ႇ ၵေႃႉဢၼ်လႆႈၶၢမ်ႇတၢင်းဢၼ်သိမ်း ဢဝ်ၵႂႃႇၼၼ်ႉဢေႃႈ။
၅ မႂ်းၶုတ်းမူင်ႇႁူးၵႃႈတီႈလမ်းဢုတ်ႇသိုဝ်ႈၼႃႈတႂ်ႈတႃၶဝ်လႄႈဢဝ်ဢုၵ်ႉၸႃႇၶူဝ်း လဵင်းဢွၵ်ႇၵႂႃႇတႃႉ။
၆ မႂ်းတၵ်းလႆႈဢဝ်ႁၢပ်ႇ သႂ်ႇၵႃႈၼိူဝ်ႁူဝ်မႃႇမႂ်းလႄႈ ဢဝ်ဢွၵ်ႇၵႂႃႇသိုဝ်ႈၼႃႈတႂ်ႈတႃၶဝ်ၶိင်ႇၵၢင်ၶမ်ႈဢေႃႈ။
၇ မႂ်းတၵ်းလႆႈႁူမ်ႇၼႃႈသေႁႂ်ႈမႂ်းဢမ်ႇလႆႈႁၼ်လိၼ်ဢေႃႈ။လွင်ႈမၼ်းၸမ်းၵဝ်ၶၢၼ်းမႂ်းဝႆႉႁႂ်ႈမႂ်းပဵၼ်ၼီႈမိၵ်ႈမဵဝ်းဢိသရေႇလ ယဝ်ႉဝႃႈၼင်ႇၼႆလႄႈၵဝ်ႁဵတ်းၸွမ်း ၵႃႈၼင်ႇဢၼ်မီးဢမိင်ႉတီႈၵဝ်ၼၼ်ႉလႄႈ ဢဝ်ဢုၵ်ႉၸႃႇၶူဝ်းလဵင်းၵဝ်ဢွၵ်ႇၶိင်ႇၵၢင်ဝၼ်းမိူၼ်ၸိူဝ်ႉၼင်ႇဢုၵ်ႉၸႃႇၶူဝ်းလဵင်း ဢၼ်ႁႅၼ်းဝႆႉပုၼ်ႈဢၼ်တၵ်းၶၢႆႉတီႈယူႇတီႈသဝ်းၼၼ်ႉသေယဝ်ႉ ဢဝ်ၵဝ်ၶုတ်းမူင်ႇႁူး ၵႃႈၼႂ်းလမ်းဢုတ်ႇၶိင်ႇႁူဝ်ၶမ်ႈသေလႄႈဢဝ်ဢွၵ်ႇၶိင်ၵၢင်ၶမ်ႈလႄႈ ဢဝ်ႁၢပ်ႇ သႂ်ႇၵႃႈၼိူဝ်ႁူဝ် မႃႇၵဝ်ၵႂႃႇသိုဝ်ႈၼႃႈတႂ်ႈတႃၶဝ်ဢေႃႈ။
၈ ၶိင်ႇၵၢင်ၼႂ်ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈ ဝႃႈ၊-
၉ လုၵ်ႈၵူၼ်းဢိူၺ်း။မဵဝ်းဢိသရေႇလမဵဝ်းဢၼ်ၸၢင်ႊလုၵ်ႉၽိုၼ်ႉၼၼ်ႉ ထၢမ်တီႈမႂ်းလႄႈဝႃႈမႂ်းႁဵတ်းၵႃႈသင်ဝႃႈၼင်ႇၼႆဢမ်ႇၸႂ်ႈႁိုဝ်။
၁၀ မႂ်းမွၵ်ႇလၢတ်ႈတီႈၶဝ်လႄႈဝႃႈ ၸဝ်ႈထႃႇဝရႃႉၽြႃးမီးဢမိင်ႉၸမ်းပျႃႇတိၵ်ႈၸဝ်ႈၼႆႉ ၸၢပ်ႈသႅင်ႇၵၼ်တင်းၶုၼ်ဢၼ်ဢုပ်ႉၵႃႈၼိူဝ်ဝဵင်း ယေႇရုသလႅမ်ႇဢိၵ်ႇတင်းၵူၼ်းမဵဝ်းဢိသရေႇလ ၵႃႈဢၼ်မီးယူႇၵႃႈၼႂ်ဝဵင်းၼႆႉၸိူဝ်းၼၼ်ႉဢေႃႈ။
၁၁ လၢတ်ႈတီႈၶဝ်လႄႈဝႃႈ- ၵဝ်ၼႆႉပဵၼ်ၼီႈမိၵ်ႈတီႈသူဢေႃႈ။ၸိူဝ်ႉၼင်ႇဢၼ်ၵဝ်ႁဵတ်းၼႆႉသူတၵ်းလႆႈဢွၼ်ၵၼ်ႁဵတ်းဢေႃႈ။
၁၂ ၶဝ်တၵ်းဢွၼ်ၵၼ်ၶၢႆႉတီႈယူႇတီႈသဝ်းလႄႈ ၶၢမ်ႇတၢင်းဢၼ်ႁိမ်ဢဝ်ၵႂႃႇဢေႃႈ။ၶုၼ်ဢၼ်မီးၵႃႈၼႂ်းၶဝ်ၼၼ်ႉၵေႃႈ တၵ်းလႆႈဢဝ်ႁၢပ်ႇ သႂ်ႇတီႈ ႁူဝ်မႃႇမၼ်းၶိင်ႇၵၢင်ၶမ်ႈသေလႄႈဢွၵ်ႇၵႂႃႇဢေႃႈ။ၶဝ်တၵ်းလႆႈ ၶုတ်းမူင်ႇႁူးၵႃႈတီႈလမ်းဢုတ်ႇႁႂ်ႈလႆႈဢဝ်ဢွၵ်ႇၵႂႃႇလႄႈ မၼ်းတၵ်းလႆႈႁူမ်ႇသုမ်ႇၼႃႈမၼ်းသေႁႂ်ႈတႃမၼ်းဢမ်ႇလႆႈႁၼ်လိၼ်ဢေႃႈ။
၁၃ ၵဝ်တၵ်းဢဝ်ၼႅင်ႈၵဝ်ၶႄၵဝ်ႁူမ်ႇသုမ်ႇမၼ်းၼၼ်ႉလႄႈ ႁႂ်ႈမၼ်းထုၵ်ႇၶဵၼ်းမႅၼ်ႈ ၵႃႈၼႂ်းတူင်ႇႁဵဝ်ႉတူင်ႇၶိုမ်းၵဝ်ဢေႃႈ။ၵဝ်တၵ်းဢဝ်မၼ်းၵႂႃႇၵႃႈတီႈ ဝဵင်းပႃႇပုလုၼ်ႇ မိူင်းၶႃႇလ တေႇပုၼ်ႉလႄႈ ပိၵ်ႉသမ်ႉမၼ်းၸဝ်ႈတင်းလႆႈတၢႆၵႃႈတီႈဝဵင်းၼၼ်ႉသေၵေႃႈ မၼ်းဢမ်ႇလႆႈႁၼ်ဝဵင်း ၼၼ်ႉ။
၁၄ ၵဝ်တၵ်းဢဝ်ၶဝ်ၸိူဝ်းဢၼ်လွမ်ႉႁွပ်ႈႁႂ်ႈလႆႈၸွႆႈထႅမ်မႃႉၸႃႉမၼ်းၵႃႈမီး ဢိၵ်ႇတင်းတပ်ႉၵူၼ်းသိုၵ်းမၼ်းၵႃႈမီး ၸၢတ်ႇပိုၼ်ၸူးၵႃႈတီႈလူမ်းၵူႈၽၢႆႇၵူႈပႃႈဢေႃႈ။
၁၅ ၵဝ်တၵ်းပွႆႇလၢပ်ႇၵႂႃႇၸွမ်းလင်ၶဝ်ဢေႃႈ။မိူဝ်ႈဢၼ်ၵဝ်ႁႂ်ႈၶဝ်ၽၢတ်ႇၽႄၵၼ်ၵႂႃႇၵႃႈၼႂ်း ၵူၼ်းၵူႈၸိူဝ်ႉၵူႈမဵဝ်းလႄႈ ဢဝ်ၶဝ်ၸၢတ်ႇပိုၼ်ပႅတ်ႈၵႃႈၼႂ်းၵူႈသိုင်ႇၵူႈမိူင်းၼၼ်ႉၸိုင်ၶဝ်တၵ်းလႆႈႁူႉလွင်ႈဢၼ်ၵဝ်ပဵၼ် ထႃႇဝရႃႉ ၽြႃးဢေႃႈ။
၁၆ ၼႂ်းဝႃႈၼၼ်သေၵေႃႈၵဝ်တၵ်းႁႂ်ႈၵူၼ်းဢၼ်ၵေႇၼႃႇၵမ်ႈၽွင်ႈ ၵၢင်းလွတ်ႈတင်းၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ ၽေးၵႃႇလႁႃႇလႅင်ႉမိူင်းလႄႈ ၵိုတ်းၵျၢၼ်ႇဝႆႉႁႂ်ႈၶဝ်လႆႈၽုၺ်ႇဢွၵ်ႇၼႄပျႃႉ လွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈဢၼ်ၶဝ်ႁဵတ်း တီႈၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ ဢၼ်ၶဝ်တၵ်းႁွတ်ႈထိုင်ၵမ်းလိုၼ်းၼၼ်ႉဢေႃႈ။ၶဝ်တၵ်းလႆႈႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆတႃႉ။
၁၇ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈ၊-
၁၈ လုၵ်ႈၵူၼ်းဢိူၺ်း။သၼ်ႇသၼ်ႇသၢႆသၢႆသေလႄႈၵိၼ်တၢင်းၵိၼ်တၢင်းၶူပ်းတႃႉ။သၼ်ႇဝႆယူႇ။ႁဵတ်းသတိယူႇသေလႄႈၵိၼ်ၼမ်ႉတႃႉ။
၁၉ လၢတ်ႈတီႈၵူၼ်းမိူင်းလႄႈဝႃႈ၊-ၸဝ်ႈထႃႇဝရႃႉၽြႃးဢဝ်လွင်ႈမိူင်း ဢိသရေႇလ ဢိၵ်ႇတင်းၵူၼ်းဝဵင်းယေႇရုသလႅမ်ႇတင်းလၢႆလႄႈ မီးဢမိင်ႉၸမ်းၶဝ်တၵ်းလႆႈဢွၼ်ၵၼ်ႁဵတ်းသတိယူႇသေလႄႈ ၵိၼ်တၢင်းၵိၼ်တၢင်းၶူပ်းလႄႈတၵ်းလႆႈဢွၼ်ၵၼ်ၵႂင်ၸႂ်ယုင်ႈၸႂ်ယူႇသေလႄႈ ၵိၼ်ၼမ်ႉႁႂ်ႈမိူင်းၼၼ်ႉထၼ်ႈပေႃး လႆႈၵၢင်းလွတ်ႈတင်းတၢင်းဢၼ်တဵမ်ဝႆႉၵႃႈၼႂ်းမၼ်းၼၼ်ႉ ၵွပ်ႈပိူဝ်ႈဢမူႉဢႃႉထမ်ႇမႃႉဢၼ်ၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင်ႁဵတ်း ၼၼ်ႉဢေႃႈ။
၂၀ ဝဵင်းဢၼ်ၵူၼ်းယူႇၵူၼ်းသဝ်းၸိူဝ်းၼၼ်ႉတၵ်းလႆႈလူႉလႅဝ်လႄႈမိူင်းၸဝ်ႈတၵ်းလႆႈပဵၼ်တီႈဢၼ်သိတ်ႇဢၼ်ယဵၼ်ဢေႃႈ။သူတၵ်းလႆႈႁူႉဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။
၂၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈ၊-
၂၂ လုၵ်ႈၵူၼ်းဢိူၺ်း။ၵႂၢမ်းထုင်းဢၼ်သူၸၢင်ႊသုင်းတိုဝ်း ၵႃႈၼႂ်းမိူင်းဢိသရေႇလလႄႈဝႃႈ၊-မိူဝ်ႉဝၼ်းပဵၼ်ဢၼ်ယိုၼ်းဢၼ်ယၢဝ်းလႄႈ ပျႃႇတိၵ်ႈရူႇပႃႇရုင်ႇၵူႈၸိူဝ်ႉၵူႈပိူင်ဢွၼ်ၵၼ်လူႉၵႂႃႇယဝ်ႉ၊ ဝႃႈၼင်ႇၼႆၼၼ်ႉၸမ်းပဵၼ်ၸိူဝ်ႉၼင်ႇႁိုဝ်။
၂၃ ပိူဝ်ႈဢၼ်ပဵၼ်ၼင်ႇၼၼ်လႄႈမႂ်းသင်ႇလၢတ်ႈတီႈၶဝ်လႄႈဝႃႈ၊- ၸဝ်ႈထႃႇဝရႃႉၽြႃးမီး ဢမိင်ႉၸမ်းၵဝ်တၵ်းႁႂ်ႈၵႂၢမ်းထုင်းၼၼ်ႉႁၢႆလႄႈ ၵမ်းလိုၼ်းၶဝ်တၵ်းဢမ်ႇလႆႈဢဝ်မၼ်းႁဵတ်းၵႂၢမ်းထုင်းသေလႄႈ သုင်းသွင်ႇၵႃႈၼႂ်းမဵဝ်းဢိသရေႇလဝႃႈၼင်ႇၼႆတႃႉ။ၵူၺ်းၵႃႈလၢတ်ႈတီႈၶဝ်လႄႈဝႃႈမိူဝ်ႉဝၼ်းၸမ်ယဝ်ႉ။ပျႃႇတိၵ်ႈရူႇပႃႇရုင်ႇတင်းသဵင်ႈတင်းလူင်တၵ်းလႆႈတဵမ်ထူၼ်ႈဢေႃႈ၊ ဝႃႈၼင်ႇၼႆ တႃႉ။
၂၄ ၵမ်းလိုၼ်းဢမ်ႇလႆႈမီးရူႇပႃႇရုင်ႇဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉ။ဢမ်ႇလႆႈမီးတၢင်းဢၼ်ႁဵတ်းပရေႃးၽႅတ်ႈဢၼ်ၶျေႃးဢၼ်ဝွၼ်းၼၼ်ႉ။လွင်ႈ မၼ်းၸမ်းၵဝ်ပဵၼ်ထႃႇဝရႃႉၽြႃးဢေႃႈ။
၂၅ ၵဝ်တၵ်းလၢတ်ႈလႄႈ ၵႂၢမ်းဢၼ်ၵဝ်လၢတ်ႈၼၼ်ႉ တၵ်းလႆႈတဵမ်ထူၼ်ႈဢေႃႈ။ၶိင်ႇမၼ်းမိုဝ်ႉမၼ်းဢမ်ႇလႆႈၶၢႆႉ။မဵဝ်းဢၼ်ၸၢင်ႊလုၵ်ႉၽိုၼ်ႉဢိူၺ်း။ ၵဝ်တၵ်းလၢတ်ႈၼႂ်းၸူဝ်ႈပၢၼ်သူႇလႄႈတၵ်းႁႂ်ႈတဵမ်ထူၼ်ႈဢေႃႈ၊ဝႃႈၼင်ႇၼႆ ၸဝ်ႈထႃႇဝရႃႉၽြႃးမီးဢမိင်ႉဢေႃႈ။
၂၆ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈ၊-
၂၇ လုၵ်ႈၵူၼ်းဢိူၺ်း။ၵူၼ်းမဵဝ်းဢိသရေႇလတင်းလၢႆၸၢင်ႊဢွၼ်ၵၼ်လၢတ်ႈလႄႈဝႃႈ ပျႃႇတိၵ်ႈရူႇပႃႇရုင်ႇ ဢၼ်မၼ်းႁၼ်ၼၼ်ႉပဵၼ်ပုၼ်ႈမိူဝ်ႉဝၼ်းဢၼ်ၵႆၼႃႇလႄႈ မၼ်းဢဝ်လွင်ႈဢၼ်ၶိင်ႇၵႃႇလဢၼ်ၵႆၼႃႇၼၼ်ႉႁေႃးလၢတ်ႈဢေႃႈ၊ဝႃႈၼင်ႇၼႆ ဢေႃႈ။
၂၈ ပိူဝ်ႈၼႆလႄႈလၢတ်ႈတီႈၶဝ်လႄႈ ဝႃႈထႃႇဝရႃႉၽြႃးမီးဢမိင်ႉၸမ်း ၵႂၢမ်းၵဝ်တၵ်းဢမ်ႇၶၢႆႉၶိင်ႇမၼ်းမိုဝ်ႉမၼ်းလႄႈၵႂၢမ်းဢၼ်ၵဝ်လၢတ်ႈၼၼ်ႉ တၵ်းလႆႈတဵမ်ထူၼ်ႈဢေႃႈ ဝႃႈၼင်ႇၼႆၸဝ်ႈထႃႇဝရႃႉၽြႃးမီးဢမိင်ႉဢေႃႈ။