၃၈
ပျႃႇတိၵ်ႉလွင်ႈၶုၼ်ၵေႃႇၵ
၁ လၢႆးသမ်ႉ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈၵဝ် လႄႈဝႃႈၸမ်း၊-
၂ လုၵ်ႈၵူၼ်းဢိူၺ်း။မႂ်းဝၢႆႇၼႃႈမႂ်းတေႃႇၶုၼ်ၵေႃႇၵႃႉမိူင်းမႃႇၵေႃႇၵ ဢၼ်ပဵၼ်ၶုၼ်ရေႃႇသမိူင်းမေႇသိၵ်ႉ၊မိူင်းတုပလ ၼၼ်ႉလႄႈႁဵတ်းပရေႃးၽႅတ်ႈယူႇၽၢႆႇၼိုင်ႈတင်းမၼ်းသေလႄႈ ႁေႃးလၢတ်ႈလႄႈ ဝႃႈ၊-
၃ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၶုၼ်ၵေႃႇၵဢၼ်ပဵၼ်ၶုၼ်မိူင်းရေႃႇသ၊ မိူင်းမေႇသိၵ်ႉ၊မိူင်းတုပလ ၸိူဝ်းၼၼ်ႉၼႆႉဢိူၺ်း။
၄ ၵဝ်ယူႇၽၢႆႇၼိုင်ႈတင်းမႂ်းဢေႃႈ။ၵဝ်တၵ်းႁႂ်ႈမႂ်းဝၢႆႇၶိုၼ်းဢေႃႈ။ၵဝ်တၵ်းဢဝ်ၶေႃလဵၵ်းၵွင်ႉသူပ်းမႂ်းသေလႄႈ ဢဝ်မႂ်းဢိၵ်ႇတင်းမုၵ်ႉၵူၼ်းၸိူဝ်းၵူၼ်းမႂ်း၊မႃႉမႂ်း၊ႁူဝ်ႁၢၼ်ၵူၼ်းသိုၵ်း ၶီႇမႃႉမႂ်းဢၼ်သုင်းတိုဝ်းလၢၵ်ႈၼၢၵ်ႈၸုမ်ႇၵူႈၸိူဝ်ႉၵူႈမဵဝ်း၊ ဢၼ်ပဵၼ်ပူဝ်ႇပႃႇဢၼ် ယႂ်ႇၼမ်ၼႃႇလႄႈ ပႃးၶိူင်ႈႁႄႉလၢၵ်ႈၼၢၵ်ႈလူင်၊ၶိူင်ႈႁႄႉလၢၵ်ႈၼၢၵ်ႈဢွၼ်ႇသေလႄႈ ယိပ်းၵမ်လၢပ်ႇ ၵမ်လႅဝ်းၸိူဝ်းၼၼ်ႉမႃးဢေႃႈ။
၅ ၵူၼ်းမိူင်းပေႇရသိ၊ၵူၼ်းမိူင်းၵုသ၊ၵူၼ်းမိူင်းၽုတ ဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈလႄႈ တိုဝ်းမွၵ်ႇႁူဝ်လဵၵ်းႁင်းၽႂ်ႁင်းမၼ်းၵႃႈမီး ၵေႃႇမႃႇ ဢိၵ်ႇတင်းတပ်ႉမၼ်းၵႃႈမီး၊
၆ မဵဝ်းတေႃႇၵႃႇမဢၼ်ပဵၼ်ၵူၼ်းမိူင်းတၢင်းႁွင်ႇ ဢိၵ်ႇတင်းတပ်ႉမၼ်းၵႃႈမီး မူႇၽုင်မုၵ်ႉၸိူဝ်းၵူၼ်းၼမ်ၼႃႇၼၼ်ႉတၵ်းဢွၼ် ၵၼ်ၸွမ်းလူၺ်ႈၵၼ်တင်းမႂ်းမႃးဢေႃႈ။
၇ မႂ်းပွင်မႄးပွင်ႁႅၼ်းဝႆႉတႃႉ။မႂ်းဢိၵ်ႇတင်းမုၵ်ႉၵူၼ်းၸိူဝ်းၵူၼ်းၵႃႈဢၼ်ၸူႉၵၼ်တုမ်ၵၼ်တီႈမႂ်းၸိူဝ်းၼၼ်ႉ ဢွၼ်ၵၼ်ပွင်မႄး ပွင်ႁႅၼ်းတူဝ်သူဝႆႉလႄႈပႂ်ႉၶဝ်ယူတႃႉ။
၈ ပူၼ်ႉၶိင်ႇၵႃႇလမိူဝ်ႉဝၼ်းၵႂႃႇႁိုင်ၼႃႇသေယဝ်ႉ မႂ်းတၵ်းလႆႈမီးဢၶႂၢင်ႉဢၼ်လႆႈဢုပ်ႉပိူင်ႇဢေႃႈ။ၼႂ်းၶူပ်ႇပီႊမိူဝ်ႈၵမ်းလိုၼ်းပူၼ်ႉမႂ်းတၵ်းလႆႈၶီႇသိုၵ်းၸူး ၵႃႈတီႈမိူင်းဢၼ်လွတ်ႈတင်းၽေးလၢပ်ႇၽေးလႅဝ်းၵူၼ်းဢၼ်လႆႈၶၢမ်ႇတၢင်းဢၼ်ၼုၵ်ႈဢဝ်ဢွၵ်ႇသေၵႃႈၼႂ်းမဵဝ်း ၵူၼ်းဢၼ်ၼမ်ၼႃႇၼၼ်ႉသေလႄႈ မႃးၵႃႈၼိူဝ်လွႆဢိသရေႇလဢၼ်လႆႈပဵၼ်ဢၼ်သိတ်ႇဢၼ်ယဵၼ်ယူႇ သေႇသေႇၼၼ်ႉဢေႃႈ။ ၵူၺ်းၵႃႈၶဝ်ပဵၼ်ဢၼ်လႆႈၶၢမ်ႇတၢင်းဢၼ်ၼုၵ်ႈဢဝ်ဢွၵ်ႇသေ ၵႃႈၼႂ်းမဵဝ်းၵူၼ်းၼမ်ၼႃႇၼၼ်ႉလႄႈ ၶဝ်ၵႃႈမီးၼၼ်ႉတၵ်းလႆႈယူႇလုင်ႉလီလွတ်ႈလီ ဢေႃႈ။
၉ မႂ်းတၵ်းၶိုၼ်ႈသေလႄႈမႃးမိူၼ်ၸိူဝ်ႉၼင်ႇၽူၼ်လူင်လူမ်းလူင်လႄႈ မႂ်းဢိၵ်ႇတင်းတပ်ႉမႂ်းၵႃႈမီးတင်းမဵဝ်းၼမ်ၼႃႇ ဢၼ်ပႃးတီႈမႂ်းၸိူဝ်းၼၼ်ႉတၵ်းပဵၼ်ၸိူဝ်ႉၼင်ႇၾႃႉမိုတ်းၽူၼ်ဢုမ်ႈၵႃႈၼႂ်းမိူင်းၼၼ်ႉဢေႃႈ။
၁၀ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-မိူဝ်ႉဝၼ်းၼၼ်ႉမႂ်းတၵ်းၶုၵ်းၸႂ်လႆႈၶႆႈၸႂ်ထူပ်းၵူႈၸိူဝ်ႉၵူႈပိူင်လႄႈ ၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီယူႇသေလႄႈ လၢတ်ႈဝႃႈ၊-
၁၁ ၵဝ်တၵ်းၶီႇၸူးၵႃႈတီႈမိူင်းဝၢၼ်ႈၼွၵ်ႈၼႃးပၢင်ႇၼမ်ၼႃႇၼၼ်ႉဢေႃႈ။ၵဝ်တၵ်းၶိုၼ်ႈၸူးၵႃႈတီႈမိူင်းၶဝ်ၸိူဝ်းဢၼ်ယင်းဢမ်ႇမီးလမ်းဝဵင်း၊ ဢမ်ႇမီးၵိူၼ်ႇၽၵ်းတူတင်းၽၵ်းတူလႄႈပဵၼ်တီႈဢၼ်တဵတ်ႇလီၼိမ်လီလႄႈ ယူႇလုင်ႉလီလွတ်ႈလီၼၼ်ႉ၊ႁႂ်ႈလႆႈသိမ်းဢဝ်ဢုၵ်ႉၸႃႇၶဝ်လႄႈ ႁိမ်ႁူင်ႇဢဝ်ၶူဝ်းလဵင်း ၶဝ်ဢိၵ်ႇတင်း
၁၂ ႁႂ်ႈလႆႈတိုၵ်းတေႃး ၵႃႈတီႈဢၼ်မိူဝ်ႈဢွၼ်ၼႆႉၼၼ်ႉပဵၼ်ဢၼ်သိတ်ႇဢၼ်ယဵၼ်လႄႈ မိူဝ်ႈလဵဝ်ၼႆႉမီးၽူႈမီးၵူၼ်းဢိၵ်ႇတင်း ၵႃႈတီႈၶဝ်ၸိူဝ်းဢၼ်ဢွၵ်ႇသေၵႃႈၼႂ်းၵူႈၸိူဝ်ႉၵူႈမဵဝ်း မႃးၸူႉၵၼ်တုမ်ၵၼ်လႄႈမၢၵ်ႈမီးတရိၵ်ႈသၢၼ်ႇ ဢိၵ်ႇတင်းဢုၵ်ႉၸႃႇတင်း လၢႆလႄႈယူႇၵႃႈၼႂ်းမိူင်းၼၼ်ႉၸိူဝ်းၼၼ်ႉဢေႃႈ။
၁၃ ၵူၼ်းမိူင်းသေႇၽ၊ ၵူၼ်းမိူင်းတေႇတၼ်ႇ၊ၸဝ်ႈၵုၼ်ႇၸဝ်ႈသိၼ်တႃႇသု၊ သၢင်ႇသီႈၼုမ်ႇၵႃႈမီးၼၼ်ႉတၵ်းဢွၼ်ၵၼ်ထၢမ်တီႈမႂ်းလႄႈဝႃႈ၊-ၸဝ်ႈႁဝ်းၼႆႉမႃးႁႂ်ႈလႆႈႁိမ်ဢဝ်ႁူင်ႇဢဝ်ဢုၵ်ႉၸႃႇပိူၼ်ႈၶႃႈႁိုဝ်။ ၸဝ်ႈႁဝ်းႁႂ်ႈၶဝ်ၸိူဝ်းဢၼ်ႁူမ်ႊဢၼ်ပွင်းၸဝ်ႈႁဝ်းၼၼ်ႉ ၸူႉၵၼ်တုမ်ၵၼ်ႁႂ်ႈလႆႈသိမ်းဢဝ်ဢုၵ်ႉၸႃႇပိူၼ်ႈလႄႈ ဢဝ်ငိုၼ်းၶမ်းဢိၵ်ႇတင်းတရိၵ်ႈသၢၼ်ႇတင်းဢုၵ်ႉၸႃႇတင်းလၢႆလႄႈႁိမ်ဢဝ်ၼမ်ၼႃႇလူင်လၢင်ၵႂႃႇၶႃႈႁိုဝ်၊ ဝႃႈၼင်ႇၼႆဝႆႉယဝ်ႉဝႃႈၼင်ႇၼႆတႃႉ။
၁၄ ပိူဝ်ႈၼႆလႄႈလုၵ်ႈၵူၼ်းဢိူၺ်း။မႂ်းႁဵတ်းပရေႃးၽႅတ်ႈသေလႄႈႁေႃးလၢတ်ႈတီႈၵေႃႇၵလႄႈဝႃႈ၊-ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၼႂ်းမိူဝ်ႈဢၼ်ၵူၼ်းၵဝ်ၵူၼ်းမဵဝ်းဢိသရေႇလ ယူႇတဵတ်ႇလီၼိမ်လီၼၼ်ႉမႂ်းတၵ်း ဢမ်ႇႁူႉႁိုဝ်။
၁၅ မႂ်းဢိၵ်ႇတင်းမဵဝ်းၵူၼ်းၼမ်ၼႃႇလူၺ်ႈၵၼ်တင်းမႂ်းၵႃႈပဵၼ်ႁူဝ်ႁၢၼ်ၵူၼ်းသိုၵ်းၶီႇမႃႉ၊ မုၵ်ႉၵူၼ်းၸိူဝ်းၵူၼ်းဢၼ် ယႂ်ႇၼမ်ၼႃႇလူင်လၢင် ပူဝ်ႇပႃႇဢၼ်ႁႅင်း ယႂ်ႇၼႃႇလူင်လၢင်ၸိူဝ်းၼၼ်ႉ တၵ်းၶီႇဢွၵ်ႇသေ ၵႃႈတီႈၼႃႈတၢင်းႁွင်ႇမႃးဢေႃႈ။
၁၆ မႂ်းတၵ်းၶိုၼ်ႈလႄႈမႃးတိုၵ်းတေႃးၵူၼ်းၵဝ်ၵူၼ်းမဵဝ်းဢိသရေႇလ တင်းလၢႆ မိူၼ်ၸိူဝ်ႉၼင်ႇၽႃႉမိုတ်းၽူၼ်ဢုမ်ႈမိူင်း ၼၼ်ႉဢေႃႈ။ၵႃႈၼႂ်းၶိင်ႇၵႃႇလမိူဝ်ႉဝၼ်းၵမ်းလိုၼ်းပုၼ်ႉၵဝ်တၵ်းဢဝ်မႂ်း မႃးယူႇၽၢႆႇၼိုင်ႈတင်းမိူင်းၵဝ်ႁႂ်ႈၵူၼ်းၵူႈၸိူဝ်ႉၵူႈမဵဝ်းလႆႈႁူႉမႂ်းၵေႃႇၵဢိူၺ်း။ ၼႂ်းမိူဝ်ႈဢၼ်ၵဝ်ႁွတ်ႈထိုင်တၢင်းဢၼ်ယွင်ႈယေႃး သိုဝ်ႈၼႃႈတႂ်ႈတႃၶဝ်ၵွပ်ႈပိူဝ်ႈမႂ်းၼၼ်ႉဢေႃႈ။
၁၇ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-မႂ်းပဵၼ်ၵေႃႉဢၼ်ၵဝ်ဢဝ်ၶႃႈၵဝ်ပရေႃးၽႅတ်ႈမဵဝ်းဢိသရေႇလ ဢၼ်ႁဵတ်းပရေႃးၽႅတ်ႈသေလႄႈ ႁေႃးလၢတ်ႈလွင်ႈဢၼ်ၵဝ်တၵ်းဢဝ်မႂ်းၶီႇသိုၵ်းမႃးယူႇၽၢႆႇၼိုင်ႈတင်းၶဝ်ၼၼ်ႉလႄႈႁေႃးလၢတ်ႈဝႆႉ ၼႂ်းၶိင်ႇၵႃႇလမိူဝ်ႉဝၼ်းဢွၼ်ၼႆႉႁိုင်ၼႃႇၸိူဝ်းၼၼ်ႉသေလႄႈ ပျႃႇတိၵ်ႈဝႆႉမိူဝ်ႈၵွၼ်ႇ ဢွၼ်ၼႆႉၼၼ်ႉဢမ်ႇၸႂ်ႈႁိုဝ်။
၁၈ ၸဝ်ႈထႃႇဝရႃႉၽြႃးမီးဢမိင်ႉၸမ်း၊-ၼႂ်းၶိင်ႇၵႃႇလမိူဝ်ႉဝၼ်းဢၼ်ၵေႃႇၵ မႃးတိုၵ်းတေႃးမိူင်းဢိသရေႇလ ၼၼ်ႉဢၢႆႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ် တၵ်းႁုပ်ႇၶိုၼ်ႈၸူးၵႃႈၼႂ်းၶူႈလင် ၵဝ်ဢေႃႈ။
၁၉ ၵဝ်ပႃးတင်းဢဝ်ၵဝ်ဢမ်ႇယုမ်ႇမႂ်းၼၼ်ႉဢိၵ်ႇတင်းၽႆးတေႃးသႃႉ တၢင်းၸႂ်မႆႈၶႂ်ႈၸႃႉၵဝ်သေလႄႈလၢတ်ႈဝႃႈ၊-ၼႂ်းမိူဝ်ႉဝၼ်းၼၼ်ႉတၵ်းပဵၼ်ဢၼ်သၼ်ႇၶွၼ်းဝႆဢၼ် ယႂ်ႇၼႃႇလူင်လၢင်ၵႃႈၼႂ်း မိူင်းဢိသရေႇလဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။
၂၀ ပႃပၢင်ႇလၢႆႇ၊ၼူၵ်ႉၼိူဝ်ၾႃႉၵၢင်ႁၢဝ်၊ တူဝ်ထိူၼ်ႇ၊တရိၵ်ႈသၢၼ်ႇဢၼ်ၸၢင်ႊၵႂႃႇၸၢင်ႊၵၢၼ်း ၵႃႈၼိူဝ်လိၼ်၊ၵူၼ်းၵႃႈဢၼ်မီးၵႃႈၼိူဝ်ၼႃႈလိၼ်ၼၼ်ႉ တၵ်းဢွၼ်ၵၼ်သၼ်ႇဝႆႉၵႃႈတီႈၽၢႆႇၼႃႈၵဝ်လႄႈ လွႆတၵ်းဢွၼ်ၵၼ်မီးတၢင်းဢၼ်ၵိူၼ်ႇပင်းယူႇ ၵႃႈတီႈဢၼ်သုင်ဢၼ်ၸၼ်းၸိူဝ်းၼၼ်ႉ တၵ်းလူမ်ႉတူၵ်းယူႇ၊ လမ်းဢုတ်ႇတင်းသဵင်ႈတင်းလူင် တၵ်းလူမ်ႉပင်းယူႇဢေႃႈ။
၂၁ ၸဝ်ႈထႃႇဝရႃႉၽြႃးမီးဢမိင်ႉၸမ်း၊- ၵဝ်တၵ်းသင်ႇလၢတ်ႈၵႂႃႇတီႈလၢပ်ႇတီႈလႅဝ်း ၵႃႈၼိူဝ်လွႆၵဝ်တင်းသဵင်ႈတင်းလူင်မႃးယူႇၽၢႆႇၼိုင်ႈတင်းမၼ်းလႄႈၵူၼ်းတင်းသဵင်ႈတင်းလူင် ၵေႃႉၼိုင်ႈလႄႈၵေႃႉၼိုင်ႈ တၵ်းဢဝ်လၢပ်ႇဢဝ်လႅဝ်းၶႃႈၽၼ်းၵၼ်ဢေႃႈ။
၂၂ ၵဝ်တၵ်းဢဝ်ၽေးၵႃႇလႁႃႇလႅင်ႉမိူင်း၊ ၽေးတၢင်းဢၼ်ထွၵ်ႇလိူတ်ႈပႅတ်ႈၼၼ်ႉပၼ်တၢမ်ႇဢေႃႈ။ၵဝ်တၵ်းႁႂ်ႈၼမ်ႉၽူၼ်ဢၼ်ႁူမ်ႇထူမ်ႈ၊ မၢၵ်ႇႁဵပ်းဢၼ် ယႂ်ႇ၊ၽူၼ်ႆး ဢၼ်လေႃးၵၼ်တင်းၵၢၼ်ႉၼၼ်ႉ တူၵ်း သႂ်ႇၵႃႈၼိူဝ်မၼ်းဢိၵ်ႇတင်း တပ်ႉမၼ်းတင်းမဵဝ်းၵူၼ်းၼမ်ၼႃႇဢၼ်ပႃးတီႈမၼ်းၸိူဝ်းၼၼ်ႉဢေႃႈ။
၂၃ ၼင်ႇၼၼ်လႄႈ ၵဝ်တၵ်းယွင်ႈယေႃးတူဝ်ၸဝ်ႈၵဝ်ႇလႄႈႁႂ်ႈတူဝ်ၸဝ်ႈၵဝ်ႇႁွတ်ႈထိုင်တၢင်းဢၼ်မူတ်းၸၢင်ႇသေလႄႈ ၼႄပျႃးမုၼ်ၽုင်းတူဝ်ၸဝ်ႈၵဝ်ႇႁႂ်ႈထၢင်ႇသႃးသိုဝ်ႈၼႃႈတႂ်ႈတႃ မဵဝ်းၵူၼ်းၼမ်ၼႃႇလႄႈၶဝ်တၵ်းလႆႈႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆယဝ်ႉဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။